ပခုက္ကူ၊ မတ် ၂၅၊ ၂၀၂၆။

မကွေးတိုင်း၊ ပခုက္ကူအခြေစိုက် Black God အဖွဲ့ဝင် ၁ ဦး စစ်ကော်မရှင်တပ်ဆီ လက်နက်နဲ့အတူ ဘက်ပြောင်းသွားတယ်လို့ အညာမြေတပ်ပေါင်းစုတာဝန်ရှိသူဆီက သိရပါတယ်။

ဘက်ပြောင်းသွားသူဟာ အသက် ၂၁ နှစ်အရွယ် ဖြူဖွေး (ခ) ကောင်းခန့်ဆိုသူဖြစ်ပြီး မတ်လ ၂၄ ရက် နေ့လယ် ၂ နာရီခန့်မှာ တာဝန်ကျရာနေရာကနေ ကမ္မမြို့ကိုသွားမယ်ဆိုပြီး ထွက်သွားရာမှ စစ်ကော်မရှင်တပ်ဆီ ဘက်ပြောင်းသွားတာလို့ဆိုပါတယ်။

“သူက ရှေ့တန်းမှာတာဝန်ကျနေတာမှ ရှေ့တန်းကခဏနားတဲ့နေ့ခင်း ၂ နာရီလောက်မှာ ကမ္မကိုသွားစရာရှိတယ်ဆိုပြီး ဒေသခံ ၁ ယောက်ကိုလိုက်ပို့ခိုင်းတယ်။ ကွန်မန်ဒါကိုလည်း စျေးဝယ်သွားစရာရှိတယ်ပြောပြီးသွားတော့ ‘ သွားလိုက် ပြန်လာပေါ့’ ဆိုပြီး လွှတ်လိုက်တာ။ အချိန်တန်လို့ပြန်မလာမှစုံစမ်းတော့ ** ဘက်ဝင်သွားတာ သိလိုက်ကြတာ”လို့ အညာမြေတပ်ပေါင်းတာဝန်ရှိသူက ပြောပါတယ်။

ဖြူဖွေး (ခ) ကောင်းခန့်ဟာ ကမ္မမြို့ကတဆင့် ညောင်ဂျစ်ပင်ရွာ ပျူစောထီးစခန်းကိုသွားတယ်လို့သိရပြီး သူနဲ့အတူ MA 1 သေနတ် ၁ လက်၊ ကျည်ဘောက် ၃ ခုကို ယူဆောင်သွားတယ်လို့ ဆိုပါတယ်။

သူဟာ ၂၀၂၂ ခုနှစ်ကတည်းက Black God တပ်ဖွဲ့ဆီ ဝင်ရောက်လာသူဖြစ်တယ်လို့ ဆိုပါတယ်။

Black God အဖွဲ့ဟာ LPDF အဖွဲ့ ၁ ခုဖြစ်ကာ အညာမြေတပ်ပေါင်းစုအဖွဲ့တွေနဲ့ မဟာမိတ်ဆက်ဆံရေးရှိပြီး စစ်ကော်မရှင်ကို ပူးပေါင်းတိုက်ခိုက်နေတဲ့အဖွဲ့ဖြစ်တယ်လို့ သိရပါတယ်။

အဆိုပါကိစ္စနဲ့ပတ်သက်ပြီး သက်ဆိုင်ရာတပ်ဖွဲ့တာဝန်ရှိသူဆီ မြေလတ်အသံက ဆက်သွယ်မေးမြန်းထားပေမယ့် ပြန်လည်ဖြေကြားမျိုးမရှိသေးပါဘူး။

၂၀၂၆ ဇန်နဝါရီ ၁ ရက်ကနေ မတ်လ ၂၅ ရက်အထိ ပခုက္ကူအခြေစိုက် တော်လှန်ရေးအဖွဲ့တွေက တပ်ဖွဲ့ဝင် ၁၅ ဦးခန့် စစ်ကော်မရှင်ဘက်ကို ဘက်ပြောင်းသွားတာကို ကြားသိထားရတယ်လို့ အညာမြေတပ်ပေါင်းစု ဆီက သိရပါတယ်။

စာတည်း – လင်း

ရွှေဘို၊ ဖေဖော်ဝါရီ ၂၄၊ ၂၀၂၆။

စစ်ကိုင်းတိုင်း၊ ရွှေဘိုခရိုင်၊ ဝက်လက်မြို့နယ်အတွင်း စစ်ရေးလှုပ်ရှားနေတဲ့ ပြည်သူ့ကာကွယ်ရေးတပ်မတော် – PDF ရွှေဘိုခရိုင်တပ်ရင်း ၁၅ တပ်ခွဲ ၃ က တပ်ဖွဲ့ဝင် ၂၀ ကျော် PDF အဖြစ်ကနေ နုတ်ထွက်သွားတယ်လို့ အဲ့ဒီတပ်ခွဲထံက သိရပါတယ်။

တပ်ခွဲ ၃ တပ်ဖွဲ့ဝင် ၂၀ ကျော်ဟာ ရွှေဘိုခရိုင်တပ်ရင်း ၁၅ ထံ ပြီးခဲ့တဲ့ ဒီဇင်ဘာလအတွင်းက နုတ်ထွက်စာတင်ပြခဲ့ပြီးနောက် ၂ လကျော်အကြာ ဖေဖော်ဝါရီ ၂၂ ရက်မှာ ထုတ်ယူထားတဲ့လက်နက်ခဲယမ်းနဲ့တွေကို ပြန်လည်အပ်နှံပြီး နုတ်ထွက်ခဲ့တာလို့ ဆိုပါတယ်။

” နုတ်ထွက်စာတင်ထားတာ ၂ လလောက်ရှိပြီး။ ခွဲ ၃ ကရဲဘော်တွေက အဆင်မပြေတော့ဘူး။ ရဲဘော်တွေမှာ ကုန်ထမ်းစားနေရတယ်။ အထက်ကလည်း ဘာမှ မထောက်ပံတော့ကျ ကြာရှည်ကလည်း မရပ်တည်နိုင်တော့ဘူး။ အကြွေးတွေလည်းနစ်နေပြီ။ အဲဒါကြောင့်မို့ပါ ” လို့ PDF အဖြစ်ကနေ နုတ်ထွက်လိုက်တဲ့ တပ်ခွဲ ၃ တပ်ခွဲမှူးဟောင်း ဗိုလ်ချုပ် က မြေလတ်အသံကို ပြောပါတယ်။

လက်ရှိမှာ PDF အဖြစ်ကနေ နုတ်ထွက်လာခဲ့ပေမယ့် ထောက်ပို့ပြည်သူတွေအဖြစ် ဆက်လက်ရပ်တည်သွားမှာဖြစ်တယ်လို့ တပ်ခွဲမှူးဟောင်း ဗိုလ်ချုပ် က ဆက်ပြောပါတယ်။

ရွှေဘိုခရိုင်တပ်ရင်း ၁၅ ကနေ ထုတ်ယူထားတဲ့ သေနတ် ၁၀ လက်၊ ခဲယမ်းနဲ့စစ်အသုံးအဆောင်ပစ္စည်းတွေကို တပ်ရင်းမှူးထံ တိုက်ရိုက်အပ်နှံပြီးနုတ်ထွက်တာမဟုတ်ဘဲ တိုက်နယ်ပကဖကနေတဆင့် အပ်နှံခဲ့တာလို့ သိရပါတယ်။

တပ်ခွဲ ၃ က အပ်နှံတဲ့ စစ်လက်နက်ခဲယမ်းတွေကို လက်ခံထားတဲ့ တိုက်နယ်ပကဖတွေကတဆင့် ရွှေဘိုခရိုင်တပ်ရင်း ၁၅ တပ်ရင်းမှူးထံကို ယမန်နေ့ ဖေဖော်ဝါရီ ၂၃ ရက်မှာ ဆက်လက်လွှဲပြောင်းပေးပြီးဖြစ်တယ်လို့ ဖြစ်စဥ်အခြေအနေကိုသိထားတဲ့ ဒေသအခြေစိုက် PDF အဖွဲ့ဝင်တဦးက ပြောပါတယ်။

” ခွဲ ၃ ဗိုလ်ချုပ်တို့အဖွဲ့က ဗိုလ်ကောက်ရိုးနဲ့အဆင်မပြေတာလို့တော့ သိရတယ်။ အဲဒီတော့ တပ်ရင်းကတပ်ဆင်ထားတဲ့ အီကွေးမန့်(ချပ်ဝတ်တန်ဆာ)၊ လက်နက်ကအစ တိုက်နယ်ကိုအသိသက်သေထားပြီး အပ်သွားတာလို့ သိရတယ်။ အဓိကထောက်ပံမှုမရှိတာ၊ ရင်းမှူးနဲ့အဆင်မပြေတာကြောင့်လို့တော့ သိရတယ်” လို့ ဒေသကာကွယ်ရေးအဖွဲ့ဝင်တဦးက ပြောပါတယ်။

PDF တွေအနေနဲ့ တပ်ဖွဲ့ဝင်အဖြစ်ကနေ နုတ်ထွက်လိုပါက သက်ဆိုင်ရာတပ်ရင်းကတဆင့် ဝန်ကြီးဌာနအဆင့်ဆင့်ကို တင်ပြပြီး ခွင့်ပြုချက်ရယူဖို့လိုအပ်တယ်လို့ ရွှေဘိုခရိုင်အတွင်းက တော်လှန်ရေးတပ်ဖွဲ့တခုရဲ့ခေါင်းဆောင်တဦးထံက သိရပါတယ်။

တပ်ခွဲ ၃ က ဗိုလ်ချုပ်တို့အဖွဲ့ဟာ ယခင်က LPDF အနေနဲ့ ရပ်တည်ခဲ့ပြီး ၂၀၂၂ အတွင်းမှာ အမျိုးသားညီညွတ်ရေးအစိုးရ-NUG လက်အောက်ရွှေဘိုခရိုင်တပ်ရင်း ၁၅ ရဲ့တပ်ခွဲ ၅ အနေနဲ့ဝင်ရောက်ခဲ့ပြီးနောက် ဗိုလ်ကောက်ရိုး တပ်ရင်းမှူးတာဝန်ရယူချိန်မှာ တပ်ခွဲ ၃ အဖြစ် ပြောင်းလဲဖွဲ့စည်းခဲ့တာလို့ သိရပါတယ်။

ဝေါ၊ ဩဂုတ် ၂၃၊ ၂၀၂၅။

ပဲခူးတိုင်း၊ ဝေါမြို့နယ်ပြည်သူ့ကာကွယ်ရေးအဖွဲ့ဝင် ၁ ဦးဖြစ်တဲ့ ရန်နိုင်စိုး(ခ)နှစ်ဆယ် ဟာ တပ်ဖွဲ့ပိုင်ငွေကျပ် ၁၀ သိန်းကိုယူဆောင်ပြီး ထွက်ပြေးသွားတယ်လို့ ပကဖတာဝန်ခံဆီက သိရပါတယ်။

ဩဂုတ် ၁၈ ရက်မှာ ရှေ့တန်းတနေရာကနေ ဘဏ္ဍာရေးအဖွဲ့ရှိတဲ့ နောက်တန်းတနေရာကို ပြန်ပို့ခိုင်းလိုက်တဲ့ ပြည်သူလှူဒါန်းငွေကျပ် ၁၀ သိန်းကိုယူဆောင်ပြီး ထွက်ပြေးသွားတာလို့ ဆိုပါတယ်။

“သူမိသားစုအရေး အဆင်မပြေတာတွေပါတယ်။ နောက်ပိုင်း သူ့မိဘတွေက ကျန်းမာရေးမကောင်း အဆင်မပြေတော့ စိတ်ဓာတ်တွေကျလာတာလည်းပါတယ်။ သူ့မှာ ကိုယ်ရေးကိုယ်တာ အခက်အခဲတွေပါလာတယ်။ သူ့အမေလည်းကျန်းမာရေးမကောင်းလို့ ဆေးရုံတင်ထားရတယ်။ အဲ့လိုတွေကြောင့် လုပ်သွားတယ်လို့ မြင်တယ်”လို့ ဝေါပကဖ တာဝန်ခံက ပြောပါတယ်။

တော်လှန်ရေးကာလ ကြာမြင့်လာတာနဲ့အမျှ တပ်ဖွဲ့ဝင်တွေရဲ့ ကိုယ်ရေးကိုယ်တာအခက်အခဲလည်းရှိလာကြချိန် စိတ်ဓာတ်ကျလာသူတွေရှိသလို စိတ်ဓာတ်မကျဘဲ ဆက်လက်တိုက်ပွဲဝင်သူတွေလည်း ရှိနေတယ်လို့ သူကဆက်ပြောပါတယ်။

ရန်နိုင်စိုး (ခ) နှစ်ဆယ်ရဲ့မိခင်ဟာ ဆေးရုံတက်နေရတာကို တပ်ဖွဲ့ကိုတင်ပြလာတာကြောင့် မိခင် ဆေးကုသဖို့ တပ်ဖွဲ့အနေနဲ့ ငွေကျပ် ၁ သိန်း ကူညီထောက်ပံပေးခဲ့သေးတယ်လို့ ဆိုပါတယ်။

ရန်နိုင်စိုး (ခ) နှစ်ဆယ်ဟာ လက်ရှိမှာတခြားနေရာတခုကိုထွက်ပြေးပြီး အလုပ်လုပ်မယ်လို့သိထားရကာ စစ်ကောင်စီဘက်ကို ကူးပြောင်းသွားတာမျိုးတော့မဟုတ်ဘူးလို့ အထက်ပါတာဝန်ခံက ပြောပါတယ်။

ရန်နိုင်စိုး (ခ) နှစ်ဆယ်ဟာ စစ်ကော်မရှင်တပ်မှာစစ်မှုထမ်းရမှာကြောက်ပြီး ၂၀၂၃ မှာ ဝေါမြို့နယ်ပကဖ ဆီဝင်ရောက်လာသူဖြစ်ကာ တပ်ဖွဲ့မှာ တာဝန်ထမ်းဆောင်ချိန် အမိန့်နာခံပြီး အလုပ်ကို ကြိုးစားလုပ်ကိုင်သူ တဦးဖြစ်တယ်လို့ သိရပါတယ်။

ယခုလို တပ်ဖွဲ့ပိုင်ငွေတွေကို ယူဆောင်ပြီးထွက်ပြေးသွားမှုဟာ ပထမဆုံးအကြိမ်ဖြစ်ပြီး သူနဲ့အတူ တပ်ဖွဲ့ပိုင်လက်နက်တွေပါသွားတာမျိုးမရှိဘူးလို့ ဆိုပါတယ်။

ဝေါမြို့နယ်ပကဖ အဖွဲ့ဟာ စစ်အာဏာရှင်စနစ်ကို လက်မခံတဲ့လူငယ်တွေနဲ့ဖွဲ့စည်းထားပြီး စစ်အာဏာသိမ်းပြီးနောက် ၂၀၂၂ ကစတင်ကာ လက်နက်ကိုင်တိုက်ပွဲဝင်နေကြတာလို့ သိရပါတယ်။

စာတည်း – လင်း

မြေလတ်အသံ၊ ဇူလိုင် ၂၀၊ ၂၀၂၅။

စစ်ကိုင်းတိုင်း၊ ကန့်ဘလူမြို့ နယ်၊ ရပ်ကျေးပြည်သူ့ကာကွယ်ရေးအဖွဲ့မှ လူငယ်တပ်ဖွဲ့ဝင် ၁ ဦး အဆိပ်ပြင်းမြွေ(မြွေပွေး)ကိုက်ခံရပြီးနောက် ဆေးကုသမှုခံယူနေချိန် ကျဆုံးခဲ့တယ်လို့ Kantbalu Counter Revolution Army (KBU-CRA) က ပြောပါတယ်။

ကျဆုံးခဲ့သူမှာ ညောင်ပေါင်ရင်းကျေးရွာ ပြည်သူ့ကာကွယ်ရေးအဖွဲ့မှ အသက် ၁၉ နှစ်အရွယ် ရဲကို ကို(ခ)ကံကောင်း ဖြစ်ပြီး သူဟာ ဇူလိုင် ၁၁ ရက်မနက်ပိုင်းမှာ ကျေးရွာကိုကင်းပတ်နေချိန် ဝဲဖက်ခြေဖမိုးကို အဆိပ်ပြင်းမြွေကိုက်ခံခဲ့ရတာလို့ ဆိုပါတယ်။

“ကန့်ဘလူမြို့နယ်မှာ NUG ကဖွင့်ထားတဲ့ ပြည်သူ့ဆေးရုံ ရှိတယ်။အဲ့ဒီဆေးရုံးကို သွားတာ လမ်းက စစ်ကြောင်းရှိနေလို့ ပြန်လှည့်ခဲ့ရတယ်”လို့ Kantbalu Counter Revolution Army (KBU-CRA)တာဝန်ခံ ကိုငယ်လေး က ပြောပါတယ်။

အဲ့ဒီနောက် စစ်ကောင်စီထိန်းချုပ်မှုအောက်မှာရှိနေတဲ့ မြို့ကြီးတခုရဲ့ ဆေးရုံကို ပို့ဆောင်ကုသခဲ့ပေမယ့် ဆေးရုံရောက်နောက်ကျတာ၊ ကျောက်ကပ်ဆေးဖိုးမတတ်နိုင်ခဲ့တာတွေကြောင့် ဇူလိုင် ၁၉ ရက်မနက် ၈ နာရီမှာ ကျဆုံးသွားတာလို့ သိရပါတယ်။

“အဲ့ဒီ(လုံခြုံရေးအရမြို့အမည်မဖော်နိုင်တဲ့)ဆေးရုံကို လမ်းကြောင်းအမျိုးမျိုးရှာပြီး သွားခဲ့ရတာ။ ဆေးရုံရောက်တော့ အဆိပ်ကလွန်သွားတယ်။ နှလုံး၊အဆုပ်တွေ၊အသည်းတွေ ကျွမ်းသွားတယ်”လို့ သူက ဆက်ပြောပါတယ်။

ရဲဘော် ကံကောင်းဟာ အထက်ပါဆေးရုံပေါ်မှာပဲ ကျ‌ဆုံးခဲ့တာကြောင့် ၎င်းရဲ့ရုပ်အလောင်းကို ကန့်ဘလူရှိပကဖစခန်းရှိရာကို ဇူလိုင် ၂၀ ရက်ဒီကနေ့မှာ ပြန်လည်သယ်ယူလာခဲ့ပြီး နာရေးကိစ္စတွေ ဆက်လက်ဆာင်ရွက် နေတယ်လို့ သိရပါတယ်။

ကျေးရွာလုံခြုံရေးအတွက် ကင်းပတ်လှည့်နေချိန် ပကဖတပ်ဖွဲ့ဝင် ကံကောင်းမှာ တိုက်ခိုက်ရေးစစ်ဖိနပ်မရှိလို့ `ရှိုးဝါး´အမျိုးအစား ညှပ်ဖိနပ်စီးကင်းလှည့်ချိန် အခုလို အဆိပ်ပြင်းမြွေကိုက်ခံခဲ့ရတာလို့ ဆိုပါတယ်။

ကန့်ဘလူမြို့နယ်မှာ စစ်ဖိနပ် ၁ ရံကို ၅၅,၀၀၀ ကျပ်စျေးရှိပေမယ့် ဝယ်ယူဖို့လမ်းကြောင်းခက်ခဲတာအပြင် တပ်ဖွဲ့အနေနဲ့လည်း ငွေကြေးအဆင်မပြေတာကြောင့် ရဲဘော်တွေဟာ စစ်ဖိနပ်အစား ညှပ်ဖိနပ်အသုံးပြုကာ စစ်ဘက်တာဝန်တွေ ထမ်းဆောင်နေကြရတယ်လို့ သိရပါတယ်။

စာတည်း – ဟိန်းစံ

အင်အား ၅၀၀ ကျော်ပါစစ်ကြောင်းက ထွက်ပြေးသူတဝက် သေဆုံးတဝက်ဖြစ်နေဟုဆို

မြေလတ်အသံ၊ ဇူလိုင်၁၁၊ ၂၀၂၅။

ချင်းပြည်နယ်၊ ဖလမ်းမြို့ကိုပြန်လည်သိမ်းပိုက်နိုင်ရေး စေလွှတ်ခံရတဲ့ စစ်ကောင်စီစစ်ကြောင်းက ထွက်ပြေးလာတဲ့ စစ်ကောင်စီတပ်ဖွဲ့ဝင် ၂၀ ဦး ကို ထိန်းသိမ်းထားတယ်လို့ ကလေးမြို့ပြပြောက်ကျားစီမံချက်အဖွဲ့က ပြောပါ တယ်။

ဧပြီလနောက်ဆုံးအပတ်ကစလို့ ကလေးမြို့ အခြေစိုက် ဒေသကွပ်ကဲမှုစစ်ဌာနချုပ် (ဒကစ) ကနေ စစ်အင်အား ၅၀၀ ကျော်ဟာ ချင်းပြည်နယ်က တော်လှန်ရေးတပ်ဖွဲ့တွေ ထိန်းချုပ်ထားတဲ့ ဖလမ်းမြို့ကို တိုက်ခိုက်ဖို့ စေလွှတ်ခံခဲ့ရတာဖြစ်ပြီး ၎င်းစစ်ကြောင်းကနေ ဇွန်နဲ့ မေလအတွင်း စစ်ကောင်စီတပ်ဖွဲ့ဝင် ၂၀ ဦးထွက်ပြေးလာခဲ့လို့ ဆိုပါတယ်။

” ထွက်ပြေးပြီး ကျနော်တို့ဘက်ကို ၂ လအတွင်း ရောက်ရှိလာတဲ့ အရေအတွက်ကတော့ စကစအယောက် ၂၀ နဲ့ လက်နက်က ၁၁ လက်ပါခဲ့တယ်။ တခြားတပ်တွေဘက်ရောက်သွားတဲ့ တပ်ပြေးတွေလည်း အများကြီးဗျ”လို့ ကလေးမြို့ပြပြောက်ကျားစီမံချက်အဖွဲ့တာဝန်ရှိသူက မြေလတ်အသံကို ပြောပါတယ်။

ထွက်ပြေးလာတဲ့ စစ်ကောင်စီတပ်ဖွဲ့ဝင်တွေကို CDM စာရင်းတင်သွင်းပေးထားပြီး ကောင်းမွန်စွာနဲ့ လွတ်လွတ်လပ်လပ်ထားသလို မိသားစုဝင်တွေကို ခေါ်ချင်တဲ့သူတွေအတွက်ကိုလည်း ကူညီခေါ် ဆောင်ပေးထားတယ်လို့ ၎င်းက ဆိုပါတယ်။

အထက်ပါစစ်ကောင်စစ်ကြောင်းဟာ ဇူလိုင် ၁၁ ရက် ဒီကနေ့အထိ ကလေး-သိုင်းငင်းလမ်း တလျောက် မှာ တော်လှန်ရေးတပ်ဖွဲ့တွေနဲ့ တိုက်ပွဲဖြစ်ပွားနေတာကြောင့် ၂ လကျော်ကြာအထိ ဖလမ်းမြို့နယ်အတွင်း ဝင်ရောက်နိုင်တာမရှိသေးဘူးလို့ သိရပါတယ်။

” သူတို့(စကစ)စစ်ကြောင်းက ချင်းပြည်နယ်နဲ့ ကလေးမြို့နယ်စပ် သိုင်းငင်းတောင် မရောက်သေးဘူး သေတဲ့စကစတဝက်၊ ထွက်ပြေးတဲ့စကစကတဝက်ဖြစ်နေပြီ။ ထွက်ပြေးတဲ့စကစတွေက စစ်မှုထမ်း (သင်တန်းဆင်း)တွေဗျ။ သိုင်းငင်းအနီးမှာက တိုက်ပွဲကဆက်ဖြစ်တုန်းပါ” လို့ အထက်ပါတာဝန်ရှိသူက ပြောပါတယ်။

ကလေးမြို့ကနေ သိုင်းငင်းကျေးရွာလမ်းဆုံအထိ ၂၅ မိုင်ကွာဝေးပြီး သိုင်းငင်းကနေ ဖလမ်းမြို့ကို နောက်ထပ် မိုင် ၅၀ ခန့်ကွာဝေးတာကြောင့် ချင်းတော်လှန်ရေးအင်အားစုတွေက တီးတိန်မြို့က လွဲရင် ကျန်နေရာ အများစုကိုထိန်းချုပ်ထားနိုင်ပြီး စစ်ကောင်စီစစ်ကြောင်းအနေနဲ့ ဖလမ်းမြို့ကို ရောက်ရှိဖို့ လွယ်ကူမှာမဟုတ်ဘူးလို့ တော်လှန်ရေးအင်အားစုတွေက ဆိုကြပါတယ်။

ဖလမ်းမြို့နယ်တခုလုံးကို ချင်းညီနောင် (Chin BrotherHood)က ယခုနှစ် ဧပြီ ၉ ရက်မှာ အလုံးစုံ သိမ်းပိုက်ရရှိခဲ့ပြီး ချင်းညီနောင်စစ်ဆင်ရေး (Operation CB) ဖလမ်းမြို့ သိမ်းတိုက်ပွဲမှာ အညာဒေသမှ စစ်ကိုင်းဖက်ဒရယ်တပ်ပေါင်းစု(SFT)အပါအဝင် PDF ၁၇ ဖွဲ့ပါဝင်တိုက်ခိုက်ခဲ့ပါတယ်။

စာတည်း – ဟိန်းစံ