ဆော

ဆော၊ ဖေဖော်ဝါရီ ၆၊ ၂၀၂၆။

မကွေးတိုင်း၊ ဆောမြို့နယ်၊ ကျောက်ထုမြို့နဲ့ ၂ မိုင်အကွာ မိအယ်ကျေးရွာကို စစ်ကော်မရှင်တပ်က ဗုံးကြဲခဲ့တာကြောင့် အခြေခံကျောင်းသူ ၂ ဦးအပါအဝင် အမျိုးသမီး ၅ ဦးသေဆုံးခဲ့တယ်လို့ ကျေးရွာနဲ့ နီးစပ်သူတွေဆီက သိရပါတယ်။

ဖေဖော်ဝါရီ ၅ ရက် ၃ နာရီလောက်မှာ UAV ဒရုန်းတွေနဲ့ကင်းထောက်လာတာကိုတွေ့ရပြီး ၁ နာရီလောက်အကြာ ညနေ ၄ နာရီကျော်မှာ စစ်ကော်မရှင်ရဲ့ဂျက်ဖိုက်တာ ၁ စီးက ရွာအလယ်ပိုင်းကို ဗုံး ၂ လုံးကြဲချခဲ့တာလို့ ဆိုပါတယ်။

“ရွာလယ်တည့်တည့်အိမ်ပေါ်မှာကျတာ။ ထိခိုက်သေဆုံးက အမျိုးသမီးတွေချည်းပဲ။ ကျောင်းသူလေး ၂ ယောက်ပါတယ်။ ဗုံးကျတဲ့နေရာမှာတော့ အိမ်တွေပျက်စီးပြီး ၁ လုံးဆိုမီးကိုလောင်သွားတာ။ ကျန်တာတွေက ပြိုတာပျက်တာ။ တည့်တည့်ကျတဲ့အိမ်က မီးကိုလောင်သွားတာ။ ပြင်းတယ်”လို့ ကျေးရွာနဲ့နီးစပ်သူတဦးက ပြောပါတယ်။

ဗုံးထိပြီး အသက် ၄၀ အရွယ်အမျိုးသမီး ၁ ဦးနဲ့ သမီးဖြစ်သူ ၈ နှစ်အရွယ် ၃ တန်းကျောင်းသူ၊ ၁၃ နှစ်အရွယ် ၇ တန်းကျောင်းသူ၊ အသက် ၇၀ အရွယ်အမျိုးသမီး ၁ ဦးနဲ့သမီးဖြစ်သူ အသက် ၅၀ အရွယ်အမျိုးသမီး ၁ ဦး စုစုပေါင်း ၅ ဦးသေဆုံးကာ အသက် ၅၀ ကျော်အရွယ် နောက်ထပ်အမျိုးသမီး ၂ ဦးပြင်းထန်ဒဏ်ရာရပြီး နေအိမ် ၅ လုံးလည်း ပျက်စီးခဲ့တယ်လို့ သိရပါတယ်။

မိအယ်ရွာမှာ အိမ်ခြေ ၁၅၀ ခန့်ရှိပြီး ဗုံးကြဲခံရပြီးနောက် ဒေသခံတွေလည်းဘေးလွတ်ရာကို ထွက်ပြေးတိမ်းရှောင်နေကြရတယ်လို့ ဆိုပါတယ်။

ပြီးခဲ့တဲ့ ဇန်နဝါရီ ၂၀ ရက်ကလည်း ဆောမြို့နယ်၊ လယ်ကြီးအိုင့်ကျေးရွာကို ဂျက်ဖိုက်တာနဲ့ ဗုံးကြဲတိုက်ခိုက်ခဲ့တာကြောင့် ဒေသခံ ၁ ဦး သေဆုံးပြီး ၄ ဦး ဒဏ်ရာရရှိခဲ့တယ်လို့ သိရပါတယ်။

စာတည်း – လင်း

ကျူးလွန်သူတွေကို စစ်ကော်မရှင်လက်အောက်ရဲတွေရော မြို့နယ်ပလဖ ကပါ ရှာဖွေနေ

မြေလတ်အသံ၊ အောက်တိုဘာ၂၁၊ ၂၀၂၅။

မကွေးတိုင်း၊ ဂန့်ဂေါခရိုင်၊ ဆောမြို့မှာ ရဲတပ်ကြပ်ကြီးရဲ့ဇနီးဖြစ်သူ သက်ကြီးပိုင်းအမျိုးသမီး ၁ ဦး ပစ္စည်းလုယက်အသတ်ခံရပြီးနောက် အလောင်းကို ဆာလာအိတ်နဲ့ထည့်ကာ စွန့်ပစ်ခံထားရတယ်လို့ မြို့ခံတွေဆီက သိရပါတယ်။

အသတ်ခံရသူမှာ ဆောမြို့၊ ဇေယျာရပ်ကွက်နေ အသက် ၆၂ နှစ်ရှိ ဒေါ်ရှိန်းခေါဝါ ဖြစ်ပြီး သေဆုံးပြီးနောက်စွန့်ပစ်ခံထားရတဲ့ရုပ်အလောင်းကို သူပိုင်တောင်ယာတဲနဲ့ ကိုက် ၅၀ အကွာမှာ ရပ်ကွက်နေပြည်သူတွေက အောက်တိုဘာ ၁၉ ရက် နေ့လယ် ၁ နာရီကျော်မှာ တွေ့ရှိခဲ့တာလို့ ဆိုပါတယ်။

” အဲ့ဒီအဘွားနဲ့တရပ်ကွက်တည်းနေတဲ့ ပြည်သူတွေက သူမထင်းရှာဖို့ဆိုပြီး တောင်ယာကို ထွက်သွားတာ ၂ ရက်ကြာပြီ အိမ်ကိုပြန်မရောက်လာလို့ လိုက်ရှာကြတာ။ ရှာတော့ဆာလာအိတ်နဲ့ထုတ်ထားတဲ့ အလောင်းကိုပဲတွေ့ရှိခဲ့တာ။ အလောင်းတွေ့ချိန်မှာတော့ သူဝတ်ထားတဲ့ ရွှေတွေမရှိတော့ဘူး”လို့ ဆောမြို့ခံအမျိုးသားတဦးက မြေလတ်အသံကို ပြောပါတယ်။

ဒေါ်ရှိန်းခေါဝါဟာ ဆောမြို့မရဲစခန်းမှာတာဝန်ကျနေတဲ့ ရဲတပ်ကြပ်ကြီး ရှာလောရဲ့ဇနီးဖြစ်ပြီး သူနေထိုင်တဲ့ ရဲစခန်းအနီး ဇေယျာရပ်ကွက်နေအိမ်ကနေ ဒေသအခေါ် သန်းပင်ခုံစုန်းတလင်းပြင်ဥယျာဥ်တောရှိ သူပိုင်တဲ့တောင်ယာဆီ အောက်တိုဘာ ၁၇ ရက် မနက်ပိုင်းမှာ ထွက်သွားခဲ့ပြီးနောက် ၂ ရက်အကြာမှာ သေဆုံးလျက်တွေ့ရှိခဲ့ရတာလို့ ဆိုပါတယ်။

” ဒဏ်ရာတွေကတော့ ဘယ်ဘက်နားထင်ကို တုံးတဲ့အရာတစ်ခုနဲ့ထုရိုက်ခံတာရတာပါ။ ဦးနှောက်ထဲသွေးယိုစီးပီးသေတယ်လို့သိရပါတယ်”လို့ သူက ဆက်ပြောပါတယ်။

ရုပ်အလောင်းတွေ့ရှိချိန်မှာ ဒေါ်ရှိန်းခေါဝါ ဝတ်ဆင်ထားတဲ့ ဆွဲကြိုး၊ လက်စွပ်၊ နားကပ် စတဲ့ ရွှေထည်တွေနဲ့ သေဆုံးသူအမြဲလွယ်ထားလေ့ရှိတဲ့ ဘေးလွယ်အိတ်တလုံးလည်း ပျောက်ဆုံးနေတယ်လို့ သိရပါတယ်။

ဒေါ်ရှိန်းဝါအသတ်ခံရမှုနဲ့ပတ်သက်ပြီး သူ့နေအိမ်ကိုအဝင်၊ အထွက်အမြဲရှိတဲ့ ဆောမြို့နေ ကိုချစ်ရင်ထူး နဲ့ ကိုဖိုးအေးတို့ ၂ ဦးမှာ အခင်းဖြစ်တဲ့ အောက်တိုဘာ ၁၇ ရက်ကစလို့ ဆောမြို့ပေါ်ကနေပျောက်ဆုံးနေတာကြောင့် ၎င်းတို့ ၂ ဦးကို သံသယတရားခံအဖြစ်ယူဆထားကာ စစ်ကော်မရှင်လက်အောက်ရဲတပ်ဖွဲ့ဝင်တွေရာ ဆောမြို့နယ်ပြည်သူ့လုံခြုံရေးအဖွဲ့(ပလဖ)ကပါ လိုက်လံရှာဖွေနေကြတယ်လို့ သိရပါတယ်။

စာတည်း – ဟိန်းစံ

မြေလတ်အသံ၊ အောက်တိုဘာ ၁၃၊ ၂၀၂၅။

မကွေးတိုင်း၊ ဆောမြို့နဲ့ ကျောက်ထုမြို့ကနေထွက်ပြေးလာကြတဲ့ စစ်ကော်မရှင်တပ်မှ တပ်ကြပ်ကြီး ၁ ဦးနဲ့ ဒုတပ်ကြပ် ၂ ဦးတို့ကို တော်လှန်ရေးတပ်ဖွဲ့တွေက ဖမ်းဆီးခဲ့တယ်လို့ တော်လှန်ရေးတပ်ဖွဲ့ဝင်တဦးက ပြောပါတယ်။

ဆောမြို့ကနေထွက်ပြေးလာတဲ့ အသက် ၄၀ ခန့်အရွယ်ရှိ တပ်ကြပ်ကြီးကို အောက်တိုဘာ ၁၂ ရက်ည ၆ နာရီကျော်မှာ ဆောမြို့နယ် ကျေးရွာတရွာအနီးမှာ ဖမ်းမိပြီး ကျောက်ထုအခြေစိုက် အမတ ၃၆၈ တပ်ရင်းကထွက်ပြေးလာတဲ့ ၃၈ နှစ်အရွယ် ဒုတပ်ကြပ် ၂ ဦးကိုတော့ အောက်တိုဘာ ၁၀ ရက်မနက် ၈ နာရီကျော်က ကျောက်ထုမြို့နယ် ကားလမ်းတနေရာမှာဖမ်းမိခဲ့ကြတာလို့ ဆိုပါတယ်။

“ဒုတပ်ကြပ် ၂ ယောက်ကိုတော့ ရွာခံတွေနဲ့ ရွာပကဖတွေက ဖမ်းမိတာ။ သူတို့ကို သက်ဆိုင်ရာတပ်ဖွဲ့တခုကို အပ်လိုက်တယ်။ တပ်ကြပ်ကြီးကိုတော့ ဆောအခြေစိုက်တပ်ဖွဲ့တဖွဲ့က ဝိုင်းဝန်းဖမ်းဆီးလိုက်တာပါ။ သူ့မှာတော့ သေနတ်မပါလာဘူး”လို့ မြေပြင်အခြေအနေကိုသိရှိတဲ့ တော်လှန်ရေးတပ်ဖွဲ့ဝင်တဦးက ပြောပါတယ်။

ဒုတပ်ကြပ် ၂ ဦးဆီကတော့ MA 5 ပစ္စတို ၁ လက်၊ 9 mm ကျည် ၅ တောင့်၊ လက်ပစ်ဗုံး ၁ လုံး၊ လက်ကိုင်ဖုန်း ၁ လုံးတို့ကို သိမ်းဆည်းရမိခဲ့တယ်လို့ ဆိုပါတယ်။

ဖမ်းဆီးရမိတဲ့ တပ်ကြပ်ကြီးက ဆောမြို့ပေါ်ကနေ ထွက်ပြေးလာခဲ့တာဖြစ်ပေမယ့် ဘယ်တပ်ရင်းကလဲဆိုတာကိုတော့ မသိရှိရသေးဘဲ လက်ရှိမှာ ဖမ်းမိသူ ၃ ဦးကို စစ်ဆေးမေးမြန်းမှုပြုလုပ်ကာ ထိန်းသိမ်းထားတယ်လို့ အထက်ပါတပ်ဖွဲ့ဝင်ကပြောပါတယ်။

ဒါ့အပြင် ဒုတပ်ကြပ် ၂ ဦးထွက်ပြေးခဲ့တာနဲ့ပတ်သက်ပြီး အမတ ၃၆၈ က တပ်ဖွဲ့ဝင် ၁၀၀ ကျော်ဟာ ကျောက်ထုမြို့နယ်ရှိကျေးရွာတွေဘက်ကို အောက်တိုဘာ ၁၀ ရက် နဲ့ ၁၁ ရက်တို့မှာ စစ်ကြောင်းထိုးပြီး ရှာဖွေခဲ့ပေမယ့် မတွေ့ရှိတာကြောင့် အောက်တိုဘာ ၁၂ ရက်မနက်ပိုင်းမှာ တပ်ပြန်ဆုတ်သွားခဲ့ကြတယ်လို့ ဒေသခံတွေဆီက သိရပါတယ်။

စာတည်း – လင်း

မြေလတ်အသံ၊ စက်တင်ဘာ ၂၈၊ ၂၀၂၅။

မိုးသည်းထန်စွာရွာပြီး တောင်နံရံပြိုကျမှုကြောင့် ပြိုကျပျက်စီးသွားတဲ့ မကွေးတိုင်း၊ ဆောမြို့နယ်၊ ဆော-ကျောက်ထု ကတ္တရာ ကားလမ်းပိုင်းကို ပြုပြင်နေဆဲဖြစ်တာကြောင့် ယာဥ်ငယ်တွေကို အချိန်အကန့်အသတ်နဲ့ သွားလာခွင့်ပြုထားရတယ်လို့ ဒေသခံတွေကပြောပါတယ်။

ပျက်စီးသွားတဲ့ လမ်းအရှည် ပေ ၂၀၀ ခန့်ကို စက်တင်ဘာ ၂၆ ရက်ကနေ ၂၈ ရက် ဒီကနေ့အထိ ပြုပြင်နေရဆဲဖြစ်တာကြောင့် ကုန်ကားကြီးတွေကိုသွားလာခွင့်မပေးဘဲ အိမ်စီးကား၊ ခရီးသည်တင် ကားငယ်တွေနဲ့ ကယ်ရီဆိုင်ကယ်တွေကိုသာ သွားခွင့်ပြုပေးနေရတာလို့ ဆိုပါတယ်။

“အချိန်တွေက အလုပ်လုပ်ချိန် ၁ နာရီခွဲလောက်ကြာရင် ၁ ကြိမ်သွားခွင့်ပြုပါတယ်။ အလုပ်နားချိန် ခွင့်ပြုတာမဟုတ်ပါ။ ခရီးသွားတွေသွားနိုင်ဖို့ လုပ်ငန်းရပ်ပေးရတာပါ။ အချိန်ကို နာရီနဲ့ပြောလို့မရဘူး။ စက်ယန္တရားတွေနဲ့ အလုပ်စလုပ်ပြီး ၁ နာရီလောက်ကြာရင် တကြိမ်သွားခွင့်ပြုတယ်” လို့ လမ်းပြုပြင်ရာမှာ ဦးဆောင်လုပ်ကိုင်ပေးနေတဲ့ ဆရာတော်တပါးက မိန့်ပါတယ်။

စက်တင်ဘာ ၂၇ ရက်မနေ့ကမနက်ပိုင်းမှာ လမ်းပြုပြင်နေဆဲကြားကနေ ကားတွေ၊ ဆိုင်ကယ်တွေကို ၃ ကြိမ်ခွင့်ပြုပေးခဲ့ရပြီး စက်တင်ဘာ ၂၈ ရက်ဒီကနေ့မှာတော့ မနက်ပိုင်း ၁ ကြိမ်သာ သွားခွင့်ပြုခဲ့ရပြီး လမ်းအနေနဲ့ ယာဥ်ကြောတဖက်စီပဲသွားခွင့်ပြုရတာကြောင့် ၁ ကြိမ်ကို မိနစ် ၂၀ ခန့်ကြာမြင့်တယ်လို့ သိရပါတယ်။

လက်ရှိပြုပြင်နေရတဲ့ ကားလမ်းပိုင်းဟာ ပြိုကျသွားတဲ့ကတ္တရာလမ်းအစား တောင်ခြေရင်းကနေ ဘက်ဟိုးတွေနဲ့ မြေသားလမ်းသစ်ဖောက်လုပ်ထားတာဖြစ်တာကြောင့် အဲဒီလမ်းကို နောက်ထပ် ရေတိုက်မစားရအောင် သစ်၊ ဝါးတွေနဲ့ဆည်ခတ်ပြီး မြေပြိုတာသက်သာအောင် ကမ်းပါးတွေကို သစ်တွေနဲ့ ဗန်းအဆင့်တွေလုပ်ရအုံးမှာဖြစ်တယ်လို့လည်း ဆိုပါတယ်။

“လမ်းပြင်တဲ့နေရာက ဖို့မြေအသစ်တွေဆိုတော့ လမ်းချော်တယ်။ ဗွက်ထတယ်။ သီးခြားလမ်းလွှဲ လုပ်ဖို့ကလည်းခက်နေတာ။ တောင် နဲ့ ရေချောင်းကြားဆိုတော့ ယာယီလမ်းလွှဲလုပ်လို့ မရဘူး။ လမ်းသစ်အခြေအနေက နောက်သုံးရက်လောက်ဆိုရင် ပြီးမှာပါ။ ကုန်ကျငွေကိုတော့ ပြည်သူတွေလှူကြပါတယ်”လို့ အထက်ပါ ဆရာတော်ကမိန့်ပါတယ်။

အဆိုပါ လမ်းသစ်ပြုပြင်နေမှုဟာ လာမယ့် အောက်တိုဘာ ၁ ရက်မှာ ပြီးစီးနိုင်ပြီး ပြုပြင်မှု ကုန်ကျစရိတ်ကတော့ သိန်း ၂၀၀ ခန့်မှန်းထားကာ လက်ရှိမှာပြည်သူတွေနဲ့ အဖွဲ့အစည်းတွေဆီကနေ အလှူငွေ သိန်း ၁၃၀ ခန့် ရရှိထားပြီဖြစ်တယ်လို့လည်း ဆရာတော်က မိန့်ကြားပါတယ်။

ခုပျက်စီးသွားတဲ့လမ်းပိုင်းဟာ မကွေးတိုင်းကနေ ရခိုင်ပြည်နယ်နဲ့ ချင်းပြည်နယ်ဖက်တို့ကို ကုန်စည်စီးဆင်းရာမှာအရေးပါတဲ့ လမ်းတခုဖြစ်ပြီး ပြီးခဲ့တဲ့ စက်တင်ဘာ ၂၅ ရက်နေ့လယ် ၃ နာရီကျော်မှာ မိုးရွာပြီးတောင်နံရံမြေပြိုကျရာကနေတဆင့် ပျက်စီးခဲ့တာလည်းဖြစ်ပါတယ်။

ဓာတ်ပုံ – ပေးပို့။

စာတည်း – လင်း

ဆော၊ ဇွန် ၆ ၊၂၀၂၅။

မကွေးတိုင်း၊ ဆောမြို့နယ်၊ ညောင်ကန်ကျေးရွာကို စစ်ကောင်စီတပ်က လေကြောင်းကနေ ဗုံးကြဲတိုက်ခိုက်ခဲ့တာကြောင့် အမျိုးသား ၃ ဦးသေဆုံး၊ ၆ ဦး ဒဏ်ရာရခဲ့တယ်လို့ ဒေသခံတွေဆီက သိရပါတယ်။

ဇွန် ၅ ရက် နေ့လယ် ၂ နာရီခန့်မှာ ညောင်ကန်ကျေးရွာက ရခိုင်ပြည်နယ်ကိုထွက်ခွာမယ့် ကုန်တင်ကားတွေရပ်နားထားတဲ့နေအိမ်ကို တိုက်ခိုက်ရေးလေယာဥ် ၁ စီးနဲ့ ဗုံး ၁ လုံးကြဲချခဲ့ရာ နေအိမ်ပေါ်ကျရောက်ပေါက်ကွဲခဲ့တယ်လို့ ဆိုပါတယ်။

” (ကုန်တင်)ကားတွေထားတဲ့ အိမ်ပေါ်တည့်တည့်ကြီးကိုကျတာ။ အဲ့ဒီအိမ်မှာကကုန်သည်တွေပဲ စုနေကြတာ။ ရခိုင်ကိုထွက်မယ့်ကားတွေ”လို့ ဆောမြို့ခံတဦးက မြေလတ်အသံကို ပြောပါတယ်။

လေယာဥ်ဗုံးကြောင့် (အမည်စိစစ်ဆဲ) ရခိုင်ကုန်သည်အမျိုးသား ၁ ဦး၊ ကုန်ကားမောင်းနှင်သူ ကိုဝင်းစိုး၊ ကုန်တင်ကုန်ချလုပ်သား ကိုကျော်သက် တို့ ၃ ဦးနေရာမှာ သေဆုံးခဲ့ကြကာ နောက်ထပ်အမျိုးသား ၆ ဦး ဒဏ်ရာရရှိခဲ့ပြီး အဲ့ဒီထဲက ၅ ဦးမှာ ဒဏ်ရာပြင်းထန်တယ်လို့ သိရပါတယ်။

ဒါ့အပြင် ဗုံးပေါက်ကွဲမှုကြောင့် နေအိမ်ဝန်းအတွင်းရှိ ကုန်ပစ္စည်းတွေတင်ဆောင်တဲ့ ၆ ဘီးကား ၂ စီးနဲ့ ဂျက်ပလူးအမျိုးအစား ကား ၁ စီး မီးလောင်ပျက်စီးခဲ့သလို နေအိမ်ပါပြိုကျပျက်စီးခဲ့တယ်လို့ အထက်ပါအမျိုးသားက ဆိုပါတယ်။

သေဆုံး ရခိုင်ကုန်သည်အမျိုးသားရဲ့ ရုပ်အလောင်းကို အခင်းဖြစ်နေရာကနေ ရခိုင်ပြည်နယ်ကို သယ်ယူသွားတယ်လို့ သူက ဆိုပါတယ်။

ပြီးခဲ့တဲ့မေ ၁ ရက်ကလည်း အညာကတင်းကျေးရွာကို စစ်ကောင်စီတပ်က လေကြောင်းကနေ ဗုံးကြဲတိုက် ခိုက်ခဲ့တာကြောင့် ၈ နှစ်အရွယ်ကလေး ၁ ဦးအပါ အမျိုးသမီး ၄ ဦးသေဆုံးခဲ့တယ်လို့ သိရပါတယ်။

စာတည်း – ဟိန်းစံ