မြေလတ်အသံ၊ ဇူလိုင် ၂၊ ၂၀၂၃။
မြေလတ်အသံက တင်ဆက်တဲ့ “သူတို့နဲ့ စကားပြောခြင်း” Podcast အစီအစဉ်မှာ ဘီလုံး Team မှ ရဲဘော်တဦးဖြစ်တဲ့ ရဲဘော် ကျီးကန်း ရဲ့ တော်လှန်ရေးကာလအတွင်း ပါဝင်ခဲ့မှု၊ လက်နက်ကိုင်တော်လှန်ရေးအတွင်း ခန္ဓာကိုယ်အစိတ်အပိုင်း၊ မိသားစုဝင်နဲ့ ရဲဘော်ရဲဘက်တွေ ဆုံးရှုံးခဲ့ရတဲ့အကြောင်းတွေနဲ့အတူ သူ့ရဲ့ယုံကြည်ရဲရင့်မှုတွေကို အခု Podcast မှာ စကားပြောဖြစ်ခဲ့ပါတယ်။
ရဲဘော် ကျီးကန်း (ပထမပိုင်း) “ဆုံးရှုံးမှု၊ ယုံကြည်မျှော်လင့်ချက် နှင့် တော်လှန်ရေး”
မကွေး၊ ဇွန် ၁၄၊ ၂၀၂၃။
မကွေးတိုင်း၊ ပခုက္ကူခရိုင်၊ ရေစကြိုမြို့နယ် အောင်နန်းကျေးရွာအနီးက ရေစကြို ပကဖ စခန်းခွဲ ၁ ခု စီးနင်းတိုက်ခိုက်ခံရပြီး ရဲဘော် ၁ ဦးသေဆုံးကာ စခန်းရှိ ပစ္စည်းတွေ သိမ်းဆည်းခံလိုက်ရတယ်လို့ ရေစကြို ပကဖထံက သိရပါတယ်။
ဇွန်လ ၁၃ ရက် မနေ့မနက် ၄ နာရီဝန်းကျင်မှာ အင်အား ၆၀ ခန့်ပါ စစ်ကောင်စီ ခလရ ၂၅၈ တပ်က အောင်နန်းကျေးရွာအနီး ရေစကြိုပကဖ စခန်းခွဲတခုကို ဝင်ရောက်စီးနင်းတိုက်ခိုက်ခဲ့လို့ အပြန်အလှန် တိုက်ပွဲဖြစ်ပွားပြီးတဲ့နောက် စခန်းစီးနင်းခံလိုက်ရတာလို့ ဆိုပါတယ်။
“၁၂ ရက်နေ့ ညပိုင်းလောက်ကတည်းက စကစ ဘက်က စခန်းနားကို ကပ်လာတာ။ ဖြစ်တဲ့ မနက်အစောပိုင်းမှာ နှစ်ဖက်အပြန်အလှန်ပစ်ခတ်ကြသေးတယ်။ အဲ့ဒီမှာ ကင်းကျရဲဘော်တဦး ဖမ်းဆီးခံလိုက်ရတယ်။ ကျန်သူအချို့ကတော့ လွတ်မြောက်လာပါတယ်” လို့ ရေစကြိုမြို့နယ် ပကဖ သတင်းနဲ့ ပြန်ကြားရေး တာဝန်ရှိသူက မြေလတ်အသံကို ပြောပါတယ်။
စစ်ကောင်စီတပ်ရဲ့ ဖမ်းဆီးခံလိုက်ရတဲ့ ရဲဘော်ဟာ အသက် ၃၀ အရွယ် ရဲဘော်ဂျင်ဘီဆိုသူ ဖြစ်ပြီး ဖမ်းဆီးခံရပြီးနောက် လမ်းတနေရာမှာဘဲ ပစ်သတ်သွားကာ အလောင်းကိုတော့ ပြန်မရသေးဘူးလို့ ဆိုပါတယ်။
စခန်းစီးနင်းခံရမှုကြောင့် ရေစကြိုပကဖ စခန်းခွဲမှာ အသုံးပြုနေတဲ့ ကား ၁ စီး၊ ဆိုင်ကယ် ၃ စီးနဲ့ လက်လုပ်မိုင်းအချို့၊ ကျည်ဆံအနည်းငယ်၊ ယူနီဖောင်းတွေနဲ့ ဆက်စပ်ပစ္စည်းတွေ ဆုံးရှုံးသွားတယ်လို့ သိရပါတယ်။
အဆိုပါတိုက်ပွဲမှာ စစ်ကောင်စီဘက်က ထိခိုက်ဒဏ်ရာရသူတွေ ရှိပေမယ့် အရေအတွက်ကို အတည်ပြုလို့ မရသေးဘူးလို့ ဆိုပါတယ်။
မတ်လ ၁၈ ရက်နေ့က ရေစကြိုမြို့နယ်၊ ရေလယ်ကျွန်းဒေသရှိ Myingyan Black Tiger စခန်းကို စစ်ကောင်စီဘက်က ဝင်ရောက်တိုက်ခိုက်ရာ ရဲဘော် ၂ ဦး ထိခိုက်ဒဏ်ရာရခဲ့သေးသလို စစ်ကောင်စီဘက် က ၃ ဦးထက်မနည်းသေဆုံးခဲ့သေးတယ်လို့ သိရပါတယ်။
ပုံစာ – သိမ်းဆည်းခံလိုက်ရတဲ့ ရေစကြိုပကဖစခန်းမှ ပစ္စည်းများ( စစ်ကောင်စီတယ်လီဂရမ်)
စာတည်း – ရင်ငြိမ်း
ပဲခူး၊ ဇွန် ၈၊ ၂၀၂၃။
ပဲခူးတိုင်း(အနောက်ခြမ်း)၊ သာယာဝတီခရိုင်၊ လက်ပံတန်းမြို့က စတိုးဆိုင်တခု ဇွန်လ ၆ ရက် မနက် အစော ၁ နာရီခန့်မှာ ဖောက်ထွင်းခံရလို့ ငွေသားနဲ့ ရွှေထည်တွေအများအပြား ဆုံးရှုံးသွားတယ်လို့ သိရပါတယ်။
လက်ပံတန်းမြို့၊ မင်းရပ် ရပ်ကွက်၊ ကုလားကုန်းရပ်၊ လမ်းမတော်လမ်းမှာရှိတဲ့ သိန်းသိန်းစတိုး ဖောက်ထွင်းခံခဲ့ရတာဖြစ်ပြီး အပေါင်ဆိုင်နဲ့ပါ တွဲဖက်ဖွင့်ထားတာကြောင့် ရွှေထည်အများအပြားပါ ဖောက်ထွင်းခံခဲ့ရတာလို့ မြို့ခံတဦးက မြေလတ်အသံကိုပြောပါတယ်။
“ဆိုင်ရှင်တွေက လက်ပံတန်းမှာ အရမ်းချမ်းသာကြတဲ့သူတွေ။ တခြားဟိုတယ်တွေလည်းပိုင်တာရှိတယ် ။ စတိုးဆိုင်က အပေါင်ဆိုင်နဲ့တွဲဖွင့်ထားတာ။ ဆိုင်ရော၊ အိမ်ရောတွဲထားတာပေါ့။ ညသန်းခေါင်ကျော် ဝင်ပြီး ဖောက်ထွင်းသွားတာ ဆိုင်ကလူတွေလည်း တယောက်မှမနိုးဘူး” လို့ ပြောပါတယ်။
စတိုးဆိုင်အတွင်းရှိ မီးခံသေတ္တာဖောက်ထွင်းခံခဲ့ရတာဖြစ်ပြီး ဖောက်ထွင်းခံရမှုကြောင့် ငွေကျပ် သိန်း ၂၀၀၀ ခန့်နဲ့ ရွှေထည်ပစ္စည်းမျိုးစုံ ၇၀၀ ကျော် ရွှေချိန် ၃ ပိဿာနီးပါး ဆုံးရှုံးသွားတယ်လို့ ဆိုပါတယ်။
ဆိုင်တွင်း CCTV တွေကို ပြန်လည်စစ်ဆေးရာမှာ ဝင်ရောက်ဖောက်ထွင်းနေတဲ့ အမျိုးသားတဦးကို တွေ့ ရှိခဲ့ပြီး ဆိုင်ပြင်က CCTV ကင်မရာတွေကိုတော့ ဖောက်ထွင်းသူတွေက ရွှံ့နဲ့ပိတ်ကာ အိမ်အနောက်ဘက်ကနေ ဝင်ရောက်ဖောက်ထွင်းသွားလို့ သိရပါတယ်။
ဖောက်ထွင်းခံရတဲ့ စတိုးဆိုင်ဟာလည်း လက်ပံတန်းမြို့မရဲစခန်းနဲ့ ၁ မိုင်ခန့်အကွာမှာသာ တည်ရှိတယ်လို့ မြို့ခံတွေဆီကသိရပါတယ်။
ပြီးခဲ့တဲ့ ၂၀၂၂ ခုနှစ် ဩဂုတ်လအတွင်းကလည်း လက်ပံတန်းမြို့၊ ဗိုလ်အောင်ကျော်လမ်းက နေအိမ်တခုမှာ နေ့ခင်းဘက်ကြီး အိမ်ရှင်ကိုကြိုးတုပ် ဓားပြတိုက်မှုဖြစ်ပွားခဲ့ပါသေးတယ်။
စာတည်း – ရင်ငြိမ်း