တောင်သာ၊ အောက်တိုဘာ ၆၊ ၂၀၂၆။

မန္တလေးတိုင်း၊ တောင်သာမြို့နယ်၊ သာပေါင်းလေးကျေးရွာရှိ အလယ်တန်းကျောင်းမှာ ဒရုန်းနဲ့ဗုံးချခဲ့လို့ ကလေးငယ်တွေ အပါအဝင် ၈ ဦးဒဏ်ရာရတယ်လို့ တောင်သာမြို့နယ်ပကဖ တာဝန်ရှိသူတွေထံက သိရပါတယ်။

ဒီကနေ့ အောက်တိုဘာ ၆ ရက်နေ့ မနက် ၈ နာရီ ၂၅ မိနစ်ခန့်က ထန်းပင်ကန်ကျေးရွာမှာ တပ်စွဲထားတဲ့ စစ်တပ်ကနေ ဒရုန်းတစီးနဲ့ သာပေါင်းလေးရွာက စာသင်ကျောင်းဝင်းထဲကို ဗုံးသီးတလုံးကြဲချခဲ့တာလို့ ဆိုပါတယ်။

“တိုက်ပွဲလည်းမရှိဘဲ အလွတ်ကြီးလာချသွားတာ။ တစီးတည်းလာပြီး တလုံးထဲချသွားတာ။ ကျောင်းကိုချတာမှာ ကျောင်းမျက်နှာစာ ကွက်လပ်ထဲကျတာ။ ကျောင်းလာနေချိန်ဆိုတော့ ကလေးတွေလည်း ထိတာရှိတယ်။”လို့ တောင်သာပကဖ တာဝန်ရှိသူက ပြောပါတယ်။

ဗုံးထိမှန်တာကြောင့် ဆရာမတဦးနဲ့ ကျောင်းသား/ကျောင်းသူ ၇ ဦးစုစုပေါင်း ၈ ဦးပြင်းထန်ဒဏ်ရာရထားတယ်လို့သိရပြီး ထိခိုက်သူတွေနဲ့ ပတ်သက်တဲ့ အသေးစိတ်အချက်အလက်တော့ မရသေးပါဘူး။

အဲ့ဒီ သာပေါင်းလေးကျေးရွာဟာ အာဏာသိမ်းစစ်တပ်ရဲ့ ထိန်းချုပ်ထားတဲ့ ရွာဖြစ်သလို သူတို့ရဲ့လက်အောက်ခံ စာကျောင်းလည်းဖြစ်တယ်လို့ သိရပြီး ထိခိုက်သူတွေကိုတော့ နီးစပ်တဲ့ဆေးရုံဆေးခန်းတွေကို သယ်သွားတယ်လို့သာသိရပါတယ်။

စက်တင်ဘာလ ၂ ရက်နေ့ကလည်း မလှိုင်မြို့နယ်၊ ဆည်ကွဲကျေးရွာမှာ စစ်တပ်ဒရုန်းကြောင့် အမျိုးသား ၁ ဦးသေဆုံးပြီး ဇနီးဖြစ်သူ ဒဏ်ရာရခဲ့သေးတယ်လို့ သိရပါတယ်။

ညောင်ဦး၊ ဩဂုတ် ၃၊ ၂၀၂၅။

မန္တလေးတိုင်း၊ ညောင်ဦးမြို့နယ်၊ ငါးသရောက်မြို့၊ ဆည်ရွာမှာ မူလတန်းပြဆရာမ ၁ ဦးပစ်ခတ်ခံရပြီး သေဆုံးခဲ့တယ်လို့ ညောင်ဦးမြို့နယ်ပြည်သူ့ကာကွယ်ရေးအဖွဲ့ဆီက သိရပါတယ်။

ပစ်သတ်ခံရသူဟာ ဆည်ရွာ အထကကျောင်းခွဲမှာ တာဝန်ကျ မူလတန်းပြဆရာမ အသက် ၃၀ အရွယ်ရှိ ဒေါ်ဝါဝါမိုး ဆိုသူဖြစ်ပြီး ဇူလိုင် ၃၁ ရက် ည ၁၂ နာရီခန့်မှာ တော်လှန်ရေးတပ်တွေက ဝင်ရောက်ပစ်ခတ်ခဲ့တာလို့ဆိုပါတယ်။

“သူကိုအိမ်ထဲမှာပဲ ဝင်ရှင်းတာ။ သူကအရင်တခါ မျက်စိထိထားတာရှိတယ် ပထမတခါရှင်းတုန်းက။ အဲ့တုန်းက သူ့ညီမကိုရှင်းသေးတာ။ တော်တော်တော့ကြာပြီ။”လို့ ညောင်ဦးမြို့နယ်ပကဖတာဝန်ခံ ကိုဇီးကပြောပါတယ်။

ပစ်ခတ်ခံရတာကြောင့် ဒေါ်ဝါဝါမိုးမှာ ဝမ်းဗိုက်၊ ခါး၊ လက်နဲ့တင်ပါးတွေမှာ ကျည်ထိဒဏ်ရာတွေနဲ့ နေရာတင်သေဆုံးခဲ့တယ်လို့ သိရပါတယ်။

ဆရာမဒေါ်ဝါဝါမိုးဟာ ၂၀၂၂ ကတည်းက စစ်ကောင်စီတပ်နဲ့ပူးပေါင်းပြီး သတင်းပေးတာ၊ ရွေးကောက်ပွဲ အတွက် မဲစာရင်းကိစ္စတွေကို ပါဝင်လုပ်ကိုင်တာတွေရှိပြီး ငါးသရောက်ရဲစခန်းကို တော်လှန်ရေးတပ်တွေ သိမ်းချိန်မှာလည်း ဒေါ်ဝါဝါမိုးတိုင်ကြားထားတဲ့စာရွက်စာတမ်းတွေကို တွေ့ရှိတာအပြင် ဖခင်ကလည်း သတင်းပေးလုပ်နေသူဖြစ်တာကြောင့် ဒေသတွင်းတော်လှန်ရေးတပ်ဖွဲ့တခုက ပစ်ခတ်တာလို့ ကိုဇီးက အတည်ပြုပြောပါတယ်။

ပြီးခဲ့တဲ့ ဇွန် ၁၉ ရက်ကလည်း ညောင်ဦးမြို့နယ်၊ လက်ပံခြေပေါ်ကျေးရွာအုပ်စု၊ တောင်ဖက်တန်း ကျေးရွာနေ အုပ်ချုပ်ရေးရွာခွဲတာဝန်ခံတဦး နေအိမ်မှာရှိနေချိန်ပစ်ခတ်ခံရပြီး သေဆုံးခဲ့တယ်လို့ သိရပါတယ်။

စာတည်း – လင်း

မြေလတ်အသံ၊ မေ ၁၂၊ ၂၀၂၅။

ပျောက်ဆုံးနေတဲ့ ရန်ကုန်တက္ကသိုလ်ကထိက ဒေါ်ဝင်းဝင်းအောင်ဟာပညာရေးဌာနမှ အကြောင်းမဲ့ပျက်ကွက်ပြီးနောက် မိမိသဘောဆန္ဒအလျောက် ရည်ရွယ် ချက်ရှိရှိ အာရက္ခတပ်တော်-AA ထံ ပူးပေါင်းသွားတာဖြစ်ကြောင်း စစ်ကောင်စီပိုင်သတင်းစာတွေမှာ ဖော်ပြပါတယ်။

ဒေါ်ဝင်းဝင်းအောင် ဟာ ရန်ကုန်အဝေးသင်တက္ကသိုလ် သတ္တဗေဒဌာနမှဖြစ်ပြီး ငလျင်ဘေးဒဏ်ကြောင့် မန္တလေးတိုင်းမှတက္ကသိုလ်ဝင်တန်းပြန်လည်ဖြေဆိုမယ့် ကျောင်းသားတွေကို သင်ကြားပေးဖို့ မိတ္ထီလာတက္ကသိုလ်ကိုရောက်ရှိနေတာဖြစ်ကာ မေ ၇ ရက်မနက်ပိုင်းမှာ ၎င်းရဲ့မိတ်ဆွေများဖြင့်တွေဆုံရန်ဆိုကာ ဖုန်းဆက်ခွင့်တိုင်ခဲ့ပြီးနောက် ပြန်လည်ရောက်ရှိမလာဘဲ အကြောင်းမဲ့ပျက်ကွက်ခဲ့ကြောင်း စစ်ကောင်စီက ဆိုပါတယ်။

တက္ကသိုလ်ရှိ CCTV မှတ်တမ်းတွေအရ ဒေါ်ဝင်းဝင်းအောင်ဟာ မေ ၇ ရက် မနက် ၆ နာရီခန့်မှာ ၎င်းနေထိုင်ရာအဆောင်ကနေ အသုံးဆောင်ပစ္စည်းတွေထည့်ထားတဲ့ အိတ် ၁ လုံးနဲ့ထွက်ခွာသွားပြီး လက်ဖက်ရည်ဆိုင် ၁ ခုမှာ မနက်စာစားပြီးနောက် ၇ နာရီခန့်မှာ အဆိုပါဆိုင်ရှေ့ရောက်ရှိလာတဲ့ ကား ၁ စီးပေါ်ကို မိမိဆန္ဒအလျောက်လိုက်ပါသွားတာလို့ ဖော်ပြပါတယ်။

ဒေါ်ဝင်းဝင်းအောင်ဟာ ၎င်းမပျောက်ဆုံးမီကာလကတည်းက အာရက္ခတပ်တော်-AA နဲ့ ဆက်သွယ်ခဲ့ပြီး မေ ၇ ရက်မှာ ဆားလင်းကြီးမြို့နယ်အခြေပြုလှုပ်ရှားတဲ့ PDF ခေါင်းဆောင်ရဲ့ ချိတ်ဆက်ကူညီမှုနဲ့ ဆားလင်းကြီးမြို့နယ်၊ ကျားတက်ကျေးရွာကို သွားရောက်ခဲ့ကာ အဲ့ဒီကတဆင့် AA ထံ ဝင်ရောက်သွားတာလို့လည်း စွပ်စွဲဖော်ပြပါတယ်။

ဒါ့အပြင် ဒေါ်ဝင်းဝင်းအောင်ဟာ ရခိုင်ပြည်နယ်၊ စစ်တွေမြို့မှာမွေးဖွားသူ ရခိုင်လူမျိုးတဦးဖြစ်ပြီး မူလတန်းမှ ဘွဲ့ရတဲ့အထိ စစ်တွေမြို့မှာ ပညာသင်ကြားခဲ့ကြောင်း၊ တက္ကသိုလ်တွေမှာ နည်းပြဆရာမအဖြစ် တာဝန်မထမ်းဆောင်မီကလည်း စစ်တွေမြို့ အထကကျောင်းတွေမှာ တန်းပြဆရာမအဖြစ် သင်ကြားပေးခဲ့တယ်လို့ ဆိုပါတယ်။

ဒေါ်ဝင်းဝင်းအောင်ရဲ့ရည်ရွယ်ချက်မှာ AA တပ်ဖွဲ့အခြေပြုရာနယ်မြေတွေအတွင်း ပညာရေးဆိုင်ရာလုပ်ငန်းတွေမှာ ပူးပေါင်းကူညီနိုင်ရေး ဝင်ရောက်သွားခဲ့တာလို့လည်း စစ်ကောင်စီက ဆိုထားပါတယ်။

ကထိကဆရာမ ဒေါ်ဝင်းဝင်းအောင်နဲ့ပတ်သက်ပြီး မြင်းခြံခရိုင် PDF အမှတ် (၄-၁၀) တပ်ရင်းကတော့ စစ်ကောင်စီရဲ့ယန္တရားလည်ပတ်စေမယ့်လုပ်ငန်းတွေမှာ အားသွန်ခွန်စိုက် ကြိုးပမ်းဆောင်ရွက်နေတာကြောင့် မိတ္ထီလာမြို့နယ်တနေရာမှာဖမ်းဆီးခဲ့ပြီး လိုအပ်တဲ့စုံစမ်းစစ်ဆေးမှုတွေ လုပ်ဆောင်နေတယ်လို့ မေ ၈ ရက်မှာ ထုတ်ပြန်ထားပေမယ့် နောက်ဆက်တွဲအခြေအနေကိုတော့ ထပ်မံထုတ်ပြန်လာတာ မတွေ့ရသေးပါဘူး။