ဆန္ဒပြ

စစ်ကိုင်း၊ မေ ၃၁၊ ၂၀၂၃။

စစ်ကိုင်းတိုင်း၊ မုံရွာမြို့ပေါ်မှာ စစ်တပ်ပိုင် မြဝတီဘဏ်ရှေ့မှာ အာဏာရှင်ဆန့်ကျင်ရေးစာတန်းကို မုံရွာလူငယ် များအစည်းအရုံးအဖွဲ့ဝင်တွေက မေလ ၃၁ ရက် ဒီနေ့မနက် ၇ နာရီက ချိတ်ဆွဲခဲ့ကြပါတယ်။

ချိတ်ဆွဲထားတဲ့ဘန်နာပေါ်မှာ “ကျွေးတဲ့လက်ပြန်ကိုက်တဲ့စစ်ခွေး မင်းပထွေး မအလ နာရေးအတွက် ပြင်ဆင်ထားဟေ့” လို့ စာလုံးအနီတွေနဲ့ ရေးသားဖော်ပြထားပါတယ်။

အဆိုပါ ဘန်နာစာတန်းကို လုံခြုံရေးအရ ကာရံတားဆီးထားတဲ့ ဝါးလုံးတွေအပေါ်မှာ ချိတ်ဆွဲခဲ့တာဖြစ်ပါတယ်။

စာတည်း – လင်းဇေ

မုံရွာ၊ မေ ၇၊ ၂၀၂၃။

စစ်ကိုင်းတိုင်း၊ မုံရွာမြို့လယ်ကနာရီစင်မှာ မေလ ၇ ရက်ဒီနေ့မနက် ၇ နာရီက စစ်အာဏာရှင်ဆန့်ကျင်ရေးစာတန်းပါ ဘန်နာကို မုံရွာလူငယ်အစည်းအရုံးမှ အဖွဲ့ဝင်လူငယ်တွေက စစ်အာဏာရှင်ဆန့်ကျင်ရေးလှုပ်ရှားမှုအဖြစ် ချိတ်ဆွဲခဲ့တယ်လို့ သိရပါတယ်။

“အခုချိန်ထိ သူတို့က လုံးဝအုပ်ချုပ်လို့မရပါဘူး။ ဒါကိုပြသလိုတာရယ်၊ သူတို့(စစ်တပ်)တွေ မခံမရပ်နိုင် ဖြစ်အောင် “အုပ်ချုပ်လို့တော့မရဘူး၊ ဒုတ်စုပ်လို့တော့ရမယ်”စာသားကို ကင်းပုန်းတွေရှိတဲ့ကြားက မြို့လယ်ခေါင်မှာ ချိတ်ဆွဲခဲ့တာပါ”လို့ မုံရွာလူငယ်အစည်းအရုံးဝင်တဦးက ပြောပါတယ်။

ဒါ့အပြင် စာတန်းချိတ်ဆွဲအပြီးမှာ အဲဒီနာရီစင်နာရီရှေ့မှာပဲ ကားတာယာကွင်းကို မီးရိူ့ဆန္ဒပြခဲ့ကြတယ်လို့ သိရပါတယ်။

မုံရွာ၊ ဧပြီ ၈၊ ၂၀၂၃။

စစ်ကိုင်းတိုင်း၊ မုံရွာခရိုင်အတွင်း ချင်းတွင်းမြစ်ကမ်းဘေးကျေးရွာများသပိတ်စစ်ကြောင်းက ဧပြီလ ၇ ရက်နေ့ ညနေပိုင်းမှာ “ပြည်သူရှိနေသရွေ့ ပါတီရှိနေမယ်” စာသားကိုင်ဆောင်ပြီး စစ်အာဏာရှင်ဆန့်ကျင်ဆန္ဒပြကာ လူထုသပိတ်ဖော်ဆောင်ခဲ့တယ်လို့သိရပါတယ်။

စစ်ကိုင်း၊ မတ် ၂၇၊ ၂၀၂၃။

စစ်ကိုင်းတိုင်း၊ မုံရွာမြို့နယ်၊ မုံရွာ-ပုသိမ်လမ်းမှာ အညာပစ်တိုင်းထောင်လေးများ အဖွဲ့ကဦးဆောင်ပြီး မတ်လ ၂၇ ရက်ဒီကနေ့မှာ စစ်ကောင်စီကို ဆန္ဒပြခဲ့ကြပါတယ်။

“ဖက်ဆစ်စနစ်သပိတ်မှောက် ဖက်ဒရယ်လမ်းကိုရဲရဲလျှောက်” စာသားပါ ဘန်နာကိုကိုင်ဆောင်ပြီး တပ်မတော်ယူနီဖောင်းကို မီးရှို့ခဲ့ကြရာ မုံရွာလူငယ်များအစည်းအရုံးဝင်တွေကလည်း ပူးပေါင်းဝန်းရံခဲ့ကြပါတယ်။

“တပ်မတော်နေ့မှာ ပြည်သူလူထုအနေနဲ့ စစ်တပ်ကိုမထောက်ခံကြောင်း ဆန္ဒထုတ်ဖော်ခဲ့တာပါ။ ပြည်သူလူထု မထောက်ခံတဲ့စစ်တပ်ဟာ ကြာကြာမခံပါဘူး။ ခုဆို တဖြည်းဖြည်း ယိုင်လဲလာပါပြီ။ အရေးနိမ့်လာပြီ ဖြစ်တဲ့အတွက် ပြည်သူလူထုအနေနဲ့ ဆက်လက် တောင့်ခံခုခံပေးကြဖို့ တောင်းဆိုလိုပါတယ်” လို့ အညာပစ်တိုင်းထောင်လေးများအဖွဲ့ ဦးဆောင်သူက ပြောပါတယ်။

အညာပစ်တိုင်းထောင်လေးများအဖွဲ့ဟာ သူတို့ဒေသအတွင်း ဆန္ဒဖော်ထုတ်တာတွေအပြင် ပြည်တွင်း၊ပြည်ပ အလှူရှင်တွေနဲ့ချိတ်ဆက်ပြီး မီးဘေးသင့် ပြည်သူတွေကို မီးဖိုဆောင်သုံးပစ္စည်းတွေနဲ့ ဆန်နဲ့ဆီတွေကိုပါ လှူဒါန်းနေတာလည်း ဖြစ်ပါတယ်။

စာတည်း – လင်း

တန့်ဆည်၊ မတ် ၁၈၊ ၂၀၂၃။

စစ်ကိုင်းတိုင်း၊ တန့်ဆည်မြို့နယ်ထဲက ကျေးရွာတရွာမှာ မတ်လ ၁၈ ရက်ဒီမနက်ပိုင်းက တန့်ဆည်ပင်မသပိတ်စစ်ကြောင်းက ဦးဆောင်ပြီး ရေပေါ်ဆီအနုပညာရှင်တွေ အလိုမရှိကြောင်း ကြွေးကြော်ကာ ဆန္ဒပြခဲ့ကြတယ်လို့ သိရပါတယ်။

ပြည်သူ့ဘက်က မရပ်တည်တဲ့ အနုပညာရှင်တွေ၊ ရေပေါ်စီ အနုပညာရှင်တွေ၊ ကြားနေ အနုပညာရှင်တွေကို လုံးဝအလိုမရှိကြောင်း ဘန်နာတွေကိုင်စွဲပြီး ဆန္ဒပြခဲ့ကြတာလည်း ဖြစ်ပါတယ်။

ဒါ့အပြင် “စစ်ကောင်စီတပ်နဲ့ပူးပေါင်းတဲ့ အနုပညာရှင်မှန်သမျှ ဆန့်ကျင်ကြ” စာတန်းပါ ဘန်နာတွေ ကိုင်စွဲပြီး စစ်အာဏာရှင် ဆန့်ကျင်ရေး ကြွေးကြော်သံတွေနဲ့အတူ သပိတ်စစ်ကြောင်းထွက်ခဲ့တယ်လို့ သိရပါတယ်။

ပေါင်းတည်၊ မတ် ၃၊ ၂၀၂၃။

ပဲခူးတိုင်းအနောက်ခြမ်း၊ ပေါင်းတည်မြို့တနေရာမှာ မတ်လ ၃ ရက် ဒီနေ့မနက်အစောပိုင်းကမြို့ခံ ၇/လူငယ်တွေက ဆန္ဒပြခဲ့ကြတယ်လို့ သိရပါတယ်။

ပြီးခဲ့တဲ့ ၂၀၂၁ ခုနှစ် မတ်လ ၃ ရက်က မုံရွာမြို့ ဘုရားနီလမ်းမှာ ကျဆုံးခဲ့တဲ့ ကဗျာဆရာကေဇဝင်း ၂ နှစ်ပြည့် အထိမ်းအမှတ်အနေနဲ့ သူရေးသားခဲ့တဲ့ “ခင်ဗျားတို့နဲ့ ကျနော်ကွဲလွဲခဲ့လည်း ခင်ဗျားတို့အတွက် ကျနော် အသက်ပေးမှာပါပဲ” စာတန်းကိုကိုင်ကာ ဆန္ဒပြကြတာလို့ သိရပါတယ်။

စစ်ကောင်စီရဲ့ယုတ်မာကောက်ကျစ်မှုကြောင့် ကျဆုံးခဲ့သူတွေ ထောင်တွင်းအကျဉ်းချခံထားရသူတွေနဲ့ အိုးအိမ်စွန့်ခွါ ထွက်ခွါသွားရသူတွေအပါ CDM နိုင်ငံ့သူရဲကောင်းဝန်ထမ်းတွေအတွက် ရရာနည်းနဲ့ တော်လှန်ရေးမှာ ဆက်လက်ပါဝင်ကြဖို့နဲ့ မြို့ပေါ်ပြောက်ကျားလူထုသပိတ် လှုပ်ရှားမှုတွေမှာလည်း ပူးပေါင်းပေးကြဖို့ တော်လှန်ရဲဘော် ၇/တွေရဲ့ ထုတ်ပြန်ချက်မှာ ပြည်သူတွေကို တိုက်တွန်းထားပါသေးတယ်။

စာတည်း – 007

စစ်ကိုင်း၊ ဖေဖော်ဝါရီ ၁၃၊ ၂၀၂၃။

စစ်ကိုင်းတိုင်း၊ ကန့်ဘလူခရိုင်၊ ကျွန်းလှမြို့နယ်က ဒေသခံတွေ၊ ကျွန်းလှမြို့နယ် အထွေထွေသပိတ်ကော်မတီ၊ CDM ဝန်ထမ်းတွေနဲ့အတူ ပြည်သူ့ကာကွယ်ရေးရဲဘော်တွေ ပူးပေါင်းပြီး ဒီနေ့ဖေဖော်ဝါရီလ ၁၃ ရက်မှာစစ်ကောင်စီကို ဆန့်ကျင်ကြောင်း စုပေါင်းဆန္ဒပြခဲ့ပါတယ်။

“ဒီနေ့ ဖေဖော်ဝါရီလ ၁၃ ရက်နေ့မှာကျရောက်တဲ့ ဗိုလ်ချုပ်မွေးနေ့အထိမ်းအမှတ်အဖြစ် ကျွန်းလှမြို့ သဖန်း ဆိပ်ဆည်အနောက်ခြမ်း ပြောင်သွယ်ချောင်းရိုးတလျှောက် ကျေးရွာတွေစုပေါင်းပြီး စစ်အာဏာရှင်ဆန့်ကျင်ရေးသပိတ် ပြုလုပ်ခဲ့သလို လူထုစည်းရုံးရေးဟောပြောပွဲတွေပါ ပြုလုပ်ခဲ့တာပါ။ အင်အား ၂၀၀ နီးပါးလောက်ရှိတယ်”လို့ သပိတ်အဖွဲ့ဝင်ဒေသခံတဦးက ပြောပါတယ်။

“ဆောင်းကျွတ်ပေမယ့် ဒေါင်းခွပ်တာရပ်မသွားဘူး၊ အောင်လံလွှင့်ဖို့ ပြင်ထားကြ ” “ဖက်စစ်ရွေးကောက်ပွဲသပိတ်မှောက်၊ ဖက်ဒရယ်လမ်းကို ရဲရဲလျှောက် “ အစရှိတဲ့ စာတန်းတွေကို ကိုင်ဆောင်ပြီး ချီတက်ဆန္ဒပြခဲ့ကြတာပါ။

ချီတက်ဆန္ဒပြပြီးနောက် သပိတ်ကော်မတီအဖွဲ့ဝင်၊ CDM ပြည်သူ့ဝန်ထမ်းတွေက ဗိုလ်ချုပ်အောင်ဆန်းနဲ့ ပတ်သက်တဲ့အကြောင်းအရာတွေ တော်လှန်ရေးနဲ့နိုင်ငံရေးသဘောတရားတွေကို စုပေါင်းဟောပြော တာတွေ ပြုလုပ်ခဲ့တယ်လို့ သိရပါတယ်။

မုံရွာ၊ ဖေဖော်ဝါရီ ၉၊ ၂၀၂၃။

မုံရွာလူထုသပိတ်တိုက်ပွဲ ဦးဆောင်ကော်မတီ ဖွဲ့စည်းခြင်း ၂ နှစ်ပြည့်အဖြစ် မုံရွာမြို့အဝင် မုဒ်ဦးရှေ့မှာ ဒီနေ့ဖေဖော်ဝါရီ ၉ ရက် မနက်ပိုင်းမှာ အင်အားအများအပြားနဲ့ စစ်အာဏာရှင်ဆန့်ကျင်ရေးအတွက် ချီတက်ဆန္ဒပြခဲ့ကြပါတယ်။

“ဒီကနေ့ဟာ ကျနော်တို့ မုံရွာလူထုသပိတ်တိုက်ပွဲ ဦးဆောင်ကော်မတီ ဖွဲ့စည်းခြင်း ၂ နှစ်ပြည့်မြောက်တဲ့နေ့ ဖြစ်ပါတယ်။ ဒီနေ့ ကျရောက်တဲ့ ၂ နှစ်ပြည့် အထိမ်းမှတ်အနေနဲ့ မုံရွာမြို့လမ်းမထက်ကို ချီတက်ပြီး “(၂)နှစ်ပြည့်မှသည် ရှေ့သို့ချီ စုပေါင်းအားနှင့် ရုန်းကြမည်” ဆိုတဲ့ စာသားနဲ့အတူ လူထုသပိတ်စစ်ကြောင်း ချီတက်ခဲ့ကြတာပါ” လို့ သပိတ်ကော်မတီဝင်တဦးက ပြောပါတယ်။

အဆိုပါသပိတ်စစ်ကြောင်းအတွင်း စစ်အာဏာရှင်ဆန့်ကျင်ရေး လူထုကြွေးကြော်သံတွေ ဟစ်ကြွေးပြီး လမ်းမတလျောက် ချီတက်သပိတ်မှောက်ခဲ့ကြသလို ၂ နှစ်တာကာလအတွင်း ဖက်ဒရယ်ဒီမိုကရေစီရေးအတွက် အသက်ပေးခဲ့ရသူတွေ၊ မတရားဖမ်းဆီးခံထားရတဲ့ ရဲဘော်တွေနဲ့အတူ၊ မလွတ်မြောက်သေးတဲ့ သူတွေအတွက် ဖက်ဒရယ်ဒီမိုကရေစီပြည်ထောင်စုအတွက် ဆက်လက်တိုက်ပွဲဝင်သွားမယ်လို့ ဆိုပါတယ်။

၂ နှစ်တာကာလအတွင်း ပြည်သူလူထုနဲ့အတူ တသားတည်း ရပ်တည်ကာ လူထုလုပ်ရှားမှုတွေ အားကောင်းလာစေဖို့နဲ့အတူ ဖက်ဒရယ်ဒီမိုကရေစီ နိုင်ငံသစ်မျှော်ရည်မှန်းချက်တို့အတွက် ပြည်သူတွေ ပါဝင်လာနိုင်ရေးတို့ကို တစိုက်မတ်မတ် ကြိုး‌စားဆောင်ရွက်ခဲ့ပြီး စစ်အာဏာရှင်စနစ်ဆိုးကို ဆန့်ကျင်တော်လှန်လျက် ရှိသလို ပြည်သူတွေနဲ့အတူ တသားတည်း ရပ်တည်ကာ အတူချီတက် တိုက်ပွဲဝင်သွားမည် ဖြစ်ကြောင်း ချီတက်ဆန္ဒပြခဲ့ကြတာပါ။

မန္တလေး၊ ဖေဖော်ဝါရီ ၁၊ ၂၀၂၃။

မန္တလေးတိုင်း၊ မတ္တရာမြို့နယ်က ပြည်သူ့ကာကွယ်ရေးတပ်ဖွဲ့တွေနဲ့ စစ်ကိုင်းမြို့နယ်က ပြည်သူ့ကာကွယ်ရေးတပ်ဖွဲ့တွေက ဖေဖော်ဝါရီ ၁ ရက်ဒီမနက်၇ နာရီလောက်မှာ တော်လှန်ရေးကာလ ၂ နှစ်ပြည့်သွားပေမယ့် ရဲဘော်တွေအနေနဲ့ ဘယ်တော့မှသွေးမအေးကြောင်း ဆန္ဒဖော်ထုတ်ခဲ့ကြပါတယ်။

ဒီလှုပ်ရှားမှုမှာ စုစုပေါင်းရဲဘော် အင်အား ၂၀၀ ဝန်းကျင်ပါဝင်ပြီး မနက် ၇ နာရီကနေ ၁၀ နာရီအတွင်း ပြုလုပ်ခဲ့ကြတာပါ။

နဂါးနီပြောက်ကျားတပ်ဖွဲ့မှ တာဝန်ခံ ကိုသားငယ်က “ဒါက ကျနော်တို့ဘက်က တော်လှန်ရေး ၂ နှစ်ပြည့် သွေးမအေးကြောင်း ပြည်သူနဲ့တသားတည်းရှိကြောင်း ရဲဘော်တွေလက်နက်မကိုင်ပဲ သပိတ်ဆန္ဒထုတ်ဖော်ကြတာပါဗျ” လို့ ပြောပါတယ်။

မတ္တရာမြို့နယ်က ကောင်းကင်တော်လှန်ရေးအင်အားစု၊ နဂါးနီပြောက်ကျားတပ်ဖွဲ့ဝင်တွေနဲ့ စစ်ကိုင်းမြို့နယ်အရှေ့ခြမ်းက LPDF ပြောက်ကျားတပ်ဖွဲ့များ၊ စစ်ကိုင်းမြို့နယ်ကျေးရွာ(ပ.က.ဖ) တပ်ဖွဲ့ဝင်တွေက စုပေါင်းပြုလုပ်ခဲ့တာလည်း ဖြစ်ပါတယ်။

ပဲခူး၊ ဒီဇင်ဘာ ၂၃၊ ၂၀၂၁။

ပဲခူးတိုင်းအနောက်ခြမ်း ပေါင်းတည်အကျဥ်းထောင်မှာ ပုဒ်မ၅၀၅ က နဲ့ အကျဥ်းချခံထားရသူ ၉ ဦးကို ဒီနေ့မနက်မှာ အကျဥ်းထောင်တရားရုံးကနေ ထောင်ဒဏ်၂နှစ်စီ ချမှတ်ခဲ့တယ်လို့ မိသားစုဝင်တဦးကပြောပါတယ်။

သူတို့တွေဟာပြီးခဲ့တဲ့ မတ်လ ၂၇ရက် တော်လှန်ရေးနေ့က ပေါင်းတည်မြို့မှာငြိမ်းချမ်းစွာဆန္ဒပြနေတုန်း စစ်ကောင်စီက ပစ်ခတ်ဖြိုခွင်းလို့ ဖမ်းဆီးခံခဲ့ရသူတွေ ဖြစ်ပါတယ်။

“အခုမနက်ပဲ ထောင်တရားရုံးကနေ ပုဒ်မ ၅၀၅ နဲ့ တရားစွဲခံရသူ ၉ဦးကို ထောင်ဒဏ် ၂ နှစ်စီ ချမှတ်လိုက်တယ်၊ အားလုံးက အုန်းနဲစမ်းရွာကပါ၊ အဲ့အထဲမှာမှ ထက်ကိုကိုလင်းဆိုတဲ့ တယောက်ကကျ ပုဒ်မ ၃၀၇နဲ့ ကပ်ခံရပြီး ၃၀၇အတွက်က ထောင်တနှစ်ချလိုက်တော့ သူက သုံးနှစ်ဖြစ်သွားတယ်” လို့ လိုက်ပါအကျိုးဆောင်ပေးနေသူတဦးက ပြောပါတယ်။

သူတို့အားလုံးဟာတရွာတည်းသားတွေဖြစ်ပြီး ချုပ်နှောင်ခံနေရတာ ၉ လရှိပြီဖြစ်ကြောင်း သိရပါတယ်။