ရေတာရှည်၊ ဒီဇင်ဘာ ၁၉၊ ၂၀၂၅။

ပဲခူးတိုင်း၊ ရေတာရှည်မြို့နယ်၊ ကျေးရွာတရွာက ဒေသခံတွေဟာ စစ်ကော်မရှင်ပြုလုပ်မယ့်ရွေးကောက်ပွဲကို ဆန့်ကျင်ကြောင်း ၃ ရက်ဆက်ဆန္ဒပြခဲ့ကြတယ်လို့ ဆန္ဒပြပွဲဦးဆောင်ပါဝင်သူဆီက သိရပါတယ်။

ဒေသခံ အင်အား ၅၀၀ ကျော်က ဒီဇင်ဘာ ၁၆ ရက်ကနေ ၁၈ ရက်အထိ ရေတာရှည်မြို့နယ်၊ မြောက်ပိုင်းကျေးရွာတရွာမှာ ရွေးကောက်ပွဲကို ဆန့်ကျင်ကြောင်းကို ကျေးရွာတဝိုက်မှာ ချီတက်လမ်းလျှောက်ဆန္ဒပြတာ၊ စုဝေးဆန္ဒပြတောင်းဆိုတာတွေ ပြုလုပ်ခဲ့ကြတယ်လို့ ဆိုပါတယ်။

“၂၀၂၅ အခု အတုအယောင်ရွေးကောက်ပွဲကို နေ့စဥ်မပြတ် ဆန္ဒပြချီတက်ကန့်ကွက်တဲ့အနေနဲ့ ရက်ဆက်ဆန္ဒပြပွဲကို ပြုလုပ်ခဲ့တာ၊ အဓိကရည်ရွယ်ချက်က စကမရွေးကောက်ပွဲလုပ်တယ်ဆိုတာ လွတ်လပ်ပြီးတရားမျှတတဲ့ ရွေးကောက်ပွဲမဟုတ်ဘဲ ပြည်သူလူထုကို လိမ်ညာဂျင်းထည့်ပြီး သူတို့ရဲ့စစ်သက်တမ်းကြာရှည်ပြီး စစ်ကျွန်ဘဝကို ရေရှည်ဖြစ်ထွန်းဖို့ရာ ပြည်သူကို သက်သက်ခုတုံးလုပ်တာကို နိုင်ငံတကာကလည်းသိဖို့ရာအတွက် ကမ္ဘာ့သတင်းမီဒီယာတွေမှာလည်း ကျယ်ကျယ်ပြန့်ပြန့်ဖြစ်ပေါ်လာရာ ရည်ရွယ်ပြီးလုပ်တာ”လို့ ဆန္ဒပြပွဲ ဦးဆောင်ပါဝင်သူတဦးက ပြောပါတယ်။

သမ္မတဦးဝင်းမြင့်နဲ့ နိုင်ငံတော်အတိုင်ပင်ခံပုဂ္ဂိုလ်ဒေါ်အောင်ဆန်းစုကြည်အပါအဝင် နိုင်ငံရေးအကျဥ်းသားအားလုံး အမြန်ဆုံးပြန်လွတ်ပြီး ဖက်ဒရယ်နိုင်ငံတော်ပေါ်ပေါက်ဖို့ဆက်လက် ဆန္ဒပြသွားမှာလို့လည်း ဆိုပါတယ်။

ပြီးခဲ့တဲ့ ဒီဇင်ဘာ ၆ ရက်ကလည်း ရေတာရှည်မြို့နယ်မြောက်ခြမ်းတနေရာမှာ ဒေသခံရာကျော်က ရွေးကောက်ပွဲကိုဆန့်ကျင်ကြောင်း ဆန္ဒပြခဲ့ကြသေးတယ်လို့ သိရပါတယ်။

စာတည်း – လင်း

ရေတာရှည်၊ ဒီဇင်ဘာ ၇၊ ၂၀၂၅။

ပဲခူးတိုင်း၊ ရေတာရှည်မြို့နယ်မှာ ဒီဇင်ဘာ ၆ ရက်မနက် ၁၀ နာရီခန့်က စစ်ကော်မရှင်တပ်ကဦးစီးကျင်းပမယ့်ရွေးကောက်ပွဲကို ဒေသခံရာနဲ့ချီ ဆန့်ကျင်ဆန္ဒပြခဲ့ကြတယ်လို့ ဆန္ဒပြပွဲဦးဆောင်လှုပ်ရှားသူတဦးဆီက သိရပါတယ်။

လူဦးရေ ၃၀၀ ကျော်ပါဝင်တဲ့ ဒီဆန္ဒပြပွဲကို ရေတာရှည်မြို့နယ်မြောက်ပိုင်းတနေရာမှာ ပြုလုပ်ခဲ့တာဖြစ်ပြီး ဒေသတွင်းကျေးရွာတွေကိုလှည့်လည်ကာ တော်လှန်ရေး ကြွေးကြော်သံ၊ ဆောင်ပုဒ်တွေကို ကြွေးကြော်ဆန္ဒပြခဲ့ကြတာလို့ သိရပါတယ်။

“စစ်အာဏာရှင်လုပ်နေတဲ့ ရွေးကောက်ပွဲကာလဟာ ပြည်တွင်းစစ်မငြိမ်းချမ်းသေးဘဲ ပြည်ပနိုင်ငံတွေကပါ လှည့်လည်ပြီး လိမ်ညာဟန်ပြပြီးတော့မှ လုပ်နေတဲ့အတုအယောင်ရွေးကောက်ပွဲ ဖြစ်တာကြောင့်မို့လို့ နိုင်ငံတကာအနေနဲ့ ဒီရွေးကောက်ပွဲမှာပြည်သူတွေ ပူးပေါင်းပါဝင်မှုမရှိဘူးဆိုတာ နိုင်ငံတကာကိုသိစေချင်လို့ဆန္ဒပြရတာ”လို့ ဆန္ဒပြပွဲဦးဆောင်ပါဝင်သူတဦးက ပြောပါတယ်။

ဖမ်းဆီးခံထားရတဲ့ သမ္မတဦးဝင်းမြင့်နဲ့ နိုင်ငံတော်အတိုင်ပင်ခံပုဂ္ဂျိလ်ဒေါ်အောင်ဆန်းစုကြည်အပါအဝင် နိုင်ငံရေးအကျဥ်းသားအားလုံး အမြန်ဆုံးပြန်လွတ်ပြီး ဖက်ဒရယ်နိုင်ငံတော်ပေါ်ပေါက်လာဖို့ ဆက်လက် ဆန္ဒပြသွားမယ်လို့လည်း ဆိုပါတယ်။

မန္တလေး၊ ဒီဇင်ဘာ ၅၊ ၂၀၂၅။

သပိတ်ခေါင်းဆောင်‌‌တွေဆန္ဒပြခဲ့တဲ့ မန္တလေးဈေးချိုက သစ်သီးတန်းကို ဒီဇင်ဘာ ၄ ရက် ည ၁၂ နာရီမှာ စစ်ကော်မရှင်လက်အောက်ခံတပ်ဖွဲ့တွေက ဝင်ရောက်ဖျက်ဆီးခဲ့ပြီး ပြန်ဖွင့်ရင်အရေးယူမယ်ဆိုပြီး ခြိမ်းခြောက်ခဲ့တယ်လို့ မြို့ခံတွေဆီက သိရပါတယ်။

အဲ့ဒီစျေးတန်းမှာ ဒီဇင်ဘာ ၃ ရက်မနက်ပိုင်းမှာ ‌‌‌‌‌‌‌‌‌‌‌‌‌‌‌‌‌‌‌‌‌‌‌မန္တလေး သပိတ်ခေါင်းဆောင် ဒေါက်တာ တေဇာဆန်း၊ ရန်ကုန်သပိတ်ခေါင်းဆောင် ကိုနန်းလင်း၊ စစ်ကိုင်းသပိတ်ခေါင်းဆောင် ကိုခန့်ဝေဖြိုးတို့ ဦးဆောင်ပြီး စစ်အာ‌‌ဏာရှင်တိုက်ဖျက်ရေးနဲ့ ရွေးကောက်ပွဲအတွက် ဆန့်ကျင်ဆန္ဒပြခဲ့ကြတာပါ။

အဆိုပါဆန္ဒပြတဲ့ ရုပ်သံဖိုင်ကို ဒေါက်တာတေဇာဆန်းက ထုတ်ပြန်ပြီးတဲ့နောက် မနေ့ကညပိုင်းမှာ သစ်သီးတန်းကို မြို့နယ်ရဲတပ်ဖွဲ့၊ ပြည်သူ့လုံခြုံရေးအဖွဲ့ (ရပ်ကွက်အလိုက်ဖွဲ့ထားတဲ့ယူနီ ဖောင်းအပြာဝတ်ပျူစောထီး၊ ပျူစောထီးအဖွဲ့နဲ့ စည်ပင်ဝန်ထမ်းတို့ ပူးပေါင်းပြီး ဆဲဆို ဖျက်ဆီးခဲ့တာလို့ မြို့ခံတွေက ပြောပါတယ်။

” ‘အကြမ်းဖက်အားပေးတွေ၊ နင်တို့ အားပေးတဲ့အကြမ်းဖက်တွေကိုလာကယ်ခိုင်း၊ ဒီအချိန်အထိ ဘာဖြစ်လို့ ဖွင့်ထားတာလဲ’ဆိုပြီး ဆဲတာ။ မအေနှမကိုင်ဆဲတာပေါ့။ အသီးခြင်းတွေအကုန်ဆွဲမှောက်။ ရောင်းမရတော့အောင်ဖျက်ဆီးမှုတွေလုပ်သွားတယ်”လို့ မြို့ခံတဦး ကပြောပါတယ်။

အဲဒီအသီးစျေးတန်းဟာ မန္တလေး ဈေးချိုရဲ့ တောင်ဘက် ၂၉ လမ်း၊ ၈၄ လမ်းနဲ့ ၈၅ လမ်းကြားမှာတည်ရှိတာပါ။

ဒီဇင်ဘာ ၃ ရက်နေ့ကလည်း စစ်ခေါင်းဆောင်မင်းအောင်လှိုင် မန္တလေးမြို့ကနေ ပြင်ဦးလွင်မြို့ကိုသွားချိန် ဆန္ဒပြမှုဖြစ်ခဲ့ပြီး အဲဒီနေ့ကတည်းက စစ်ကော်မရှင်တပ်တွေဟာ မြို့အဝင်အထွက်ပိတ်ကာ ရှာဖွေတာတွေ ပြုလုပ်ခဲ့ပါ‌‌သေးတယ်။

သတင်း – မြတ်

ဒေသခံတချို့နဲ့ ဆွေးနွေးညှိနှိုင်းမှုတွေလုပ်ထားတယ်လို့ မင်းကင်းပအဖ ပြော

မင်းကင်း၊ နိုဝင်ဘာ ၁၀၊ ၂၀၂၅။

စစ်ကိုင်းတိုင်း၊ ကလေးခရိုင်၊ မင်းကင်းမြို့နယ်က တော်လှန်ရေးတပ်ဖွဲ့တချို့ဦးစီးလုပ်ကိုင်မယ့် လောင်းပြည့်ကျွန်းရွှေ‌မျောစီမံကိန်းကို နိုဝင်ဘာ ၈ ရက်မှာ ဒေသခံလူထုအင်အား ၂,၀၀၀ ကျော်က တတိယအကြိမ်ဆန္ဒပြ ကန့်ကွက်ခဲ့ကြတယ်လို့ ဒေသခံတွေဆီက သိရပါတယ်။

ပြီးခဲ့တဲ့အောက်တိုဘာလအတွင်းမှာလည်း ၂ ကြိမ်တိုင်ဆန္ဒပြကန့်ကွက်ခဲ့ပေမယ့် အဲ့ဒီ ရွှေမျောကိုဆက်လက်လည်ပတ်နေပြီး ဒေသခံတွေရဲ့ဆန္ဒကို မျက်ကွယ်ပြုထားတာကြောင့် တတိယအကြိမ်ဆန္ဒပြရတာဖြစ်တယ်လို့ ဆန္ဒပြစဉ်မှာ ပါဝင်ခဲ့သူတဦးက ပြောပါတယ်။

“တတိယအကြိမ် ဆန္ဒပြရတာနဲ့ ပတ်သက်ပြီးပြောရရင် ရွှေမျောတွေ ဆက်လက်တိုးချဲ့ လုပ်ကိုင်နေပြီး ပိတ်တန်းတွေပစ်ကာ မောင်းဖို့ပြင်ဆင်နေကြပြီဖြစ်လို့ ပြည်သူတွေအနေနဲ့ တတိယအကြိမ် ဆန္ဒပြရခြင်း ဖြစ်ပါတယ်။” လို့ ဆန္ဒပြစဉ်မှာပါဝင်ခဲ့သူက ပြောပါတယ်။

ဆန္ဒပြပွဲမှာတော့ ရွှေမျောကို ရပ်တန့်ပေးဖို့နဲ့ ပအဖ၊ ပကဖ တာဝန်ခံတွေ တာဝန်ကနေ ရပ်နားပေးဖို့ အဓိကတောင်းဆိုခဲ့ကြတယ်လို့ ဆန္ဒပြပွဲ ဦးဆောင်သူတဦးက မြေလတ်အသံကို ပြောပါတယ်။

အဆိုပါ တတိယအကြိမ်ဆန္ဒပြပွဲကို သင်တော၊ ညောင်ပင်သာ၊ အုန္နဲဘုတ်၊ ဘင်ရွာ၊ အနောက်တောရွာ၊ ကျောက်ခဲတက်ရွာက စစ်ဘေးရှောင်တွေနဲ့ ခေတ်လုံကျေးရွာတွေက ဒေသခံအင်အား ၂,၀၀၀ကျော်နဲ့ ချီတက်ဆန္ဒပြခဲ့ကြတာလို့ သိရပါတယ်။

မင်းကင်းမြို့နယ် ပအဖတာဝန်ခံကတော့ ရွှေမျောလည်ပတ်တာမျိုးမရှိသေးဘဲ ရွှေမျောနဲ့ နီးစပ်တဲ့ လောင်းပြည့်ရွာနဲ့ ဇင်ကလဲရွာပြည်သူတွေနဲ့ ပြီးခဲ့တဲ့ အောင်တိုဘာ ၈ ရက်မှာ တွေ့ဆုံညှိနှိုင်းခဲ့တာတွေရှိခဲ့ပြီး အဲ့ဒီရွာတွေအတွက် မျောလုပ်ငန်းရှင်တွေက ထောက်ပံ့ငွေပေးတာ၊ ဒေသခံတွေက မျောထဲမှာ သီးနှံနဲ့ ရွှေမျောဆက်စပ်ပစ္စည်း လာရောက်ရောင်းချတာမျိုးတွေရှိတယ်လို့ ဆိုပါတယ်။

“လုပ်ငန်းလည်ပတ်မှုကတော့ မရှိသေးဘူးဗျ၊ ဒေသခံဆိုတဲ့အထဲမှာ အဓိက နစ်နာမဲ့ရွာ ၂ ခု၊ လောင်းပြည့်ရွာနဲ့ ဇင်ကလဲရွာတွေကိုတော့သွားတွေ့တယ်၊ ပြည်သူနဲ့ အပြန်အလှန်ဆွေးနွေးတာတွေ ရှိခဲ့ပါတယ်ဗျ၊ ဒီ ၂ ရွာက ဒီနေ့အထိသူတို့လိုချင်တာကို ကျနော်တို့ဆီတွေ့ဆုံဆွေးနွေးကြတယ်၊ မျောလုပ်ငန်းရှင်နဲ့တွေ့တယ်၊ ဒေသအတွက် ထိခိုက်မယ့် ကိစ္စတွေမလုပ်ဖို့ ဆွေးနွေးဖြစ်ကြတယ်၊ မျောလုပ်ငန်းရှင်တွေကနေတဆင့် ထောက်ပံ့မှုတွေလည်း ရပါတယ်၊ ရွာခံတွေလည်း မျောလုပ်မဲ့ဂွင်မှာ သီးနှံတို့ တခြားမျောနဲ့ဆက်စပ်တာတွေ ရောင်းချတာတွေလာရောက်လုပ်ကိုင်နေကြပါတယ်။”လို့ မင်းကင်းမြို့နယ် ပအဖတာဝန်ခံက ပြောပါတယ်။

ဆန္ဒပြစဉ်မှာ ဒေသခံတွေက မင်းကင်းမြို့နယ် ပအဖနဲ့ ပကဖတာဝန်ခံတွေကို တာဝန်ကရပ်ဆိုင်းပေးဖို့ တောင်းဆိုလာတဲ့အပေါ် အရင်ဆွေးနွေးညှိနှိုင်းပြီး ဝန်ကြီးဌာနကို အကြောင်းကြားတာမျိုးတွေလုပ်ဖို့ မင်းကင်းမြို့နယ် ပအဖတာဝန်ခံက ဆိုပါတယ်။

“လက်ရှိ အခြေအနေမှာ ဘာမှမစခင် တွေ့ဆုံဆွေးနွေးအဖြေရှာကြဖို့ကိုပဲ ကျနော်တို့ ဆောင်ရွက်ချင်တာပါ။ ကျနော့်အနေနဲ့ရော၊ ကျနော့် ပအဖ တဖွဲ့လုံးအနေနဲ့ရော၊ ပြည်သူ့ဆန္ဒကို အလေးထားပါတယ်။ ပြည်သူတောင်းဆိုမှုကို လိုက်လျောချင်ပါတယ်။ ဘောင်ထဲကနေ တွေ့ဆုံဆွေးနွေးရေးလုပ်ကြပါ။ ကျနော်တို့ကနေတဆင့် ပြည်သူ့စကားသံကို ဝန်ကြီးဌာနကို ပြန်တင်ပေးမှာပါ။” လို့ မင်းကင်းမြို့နယ် ပအဖတာဝန်ခံက မြေလတ်အသံကို ပြောပါတယ်။

မင်းကင်းမြို့နယ်၊ လောင်းပြည့်ကျွန်းရွှေမျောကို တော်လှန်ရေးတပ်တချို့က တော်လှန်ရေးရန်ပုံငွေ အတွက်ဆိုကာ အမျိုးသားညီညွတ်ရေးအစိုးရ- NUG သယံဇာတဝန်ကြီးဆီစာတင်ပြီး ပြုလုပ်ခဲ့တာလို့ မင်းကင်းမြို့နယ်ပကဖတာဝန်ခံက အောက်တိုဘာ ၂ ရက် မြေလတ်အသံရဲ့ ဆက်သွယ်မေးမြန်းမှုမှာ ဖြေကြားထားပါတယ်။

အောက်တိုဘာ ၂ ရက်နဲ့ ၅ ရက်မှာလည်း အဆိုပါရွှေမျောစီမံကိန်းနဲ့ပတ်သက်ပြီး လောင်းပြည့်ရွာ၊ အနောက်တောရွာ၊ အုန္နဲဘုတ်ရွာ၊ ဘင်ရွာ၊ ညောင်ပင်သာရွာ၊ ဇင်ကလဲရွာ၊ သင်းတောရွာတို့က ဒေသခံထောင်ကျော်က ဆန္ဒပြကန့်ကွက်ခဲ့ကြပါသေးတယ်။

စာတည်း – လင်း

◼ စီမံကိန်းမရပ်မချင်း ဆက်လက်ဆန္ဒပြသွားမယ်လို့ ဒေသခံတွေပြော

မင်းကင်း၊ အောက်တိုဘာ ၅၊ ၂၀၂၅။

တော်လှန်ရေးတပ်တချို့ လုပ်ကိုင်မယ့် စစ်ကိုင်းတိုင်း၊ မင်းကင်းမြို့နယ်၊ လောင်းပြည့်ကျွန်းရွှေမျော စီမံကိန်းကို မင်းကင်းဒေသခံ ၂,၀၀၀ ကျော်က ဒီကနေ့ အောက်တိုဘာ ၅ ရက်မနက်ပိုင်းမှာ ဒုတိယအကြိမ်ဆန္ဒပြကန့်ကွက်ခဲ့တယ်လို့ ဒေသခံတွေဆီက သိရပါတယ်။

မင်းကင်းမြို့နယ်အတွင်းက ပျူစောထီးကျေးရွာတွေကိုမသိမ်းနိုင်တာ၊ ယခင်ရွှေမျောလုပ်ကွက်တွေက ရတဲ့အခွန်ငွေတွေကို တော်လှန်ရေးအတွက် အကျိုးရှိရှိအသုံးမချတာ၊ မြို့နယ်ပအဖက လောင်းကစားဝိုင်းတွေမှာ အခွန်ငွေကိုသုံးစွဲပစ်တာတွေကြောင့် တော်လှန်ရေးရန်ပုံငွေအတွက် ဒီရွှေမျောကို လုပ်ကိုင်မယ်ဆိုတာကို မယုံကြည်တာကြောင့် ခုလိုဆန္ဒပြကြတာလို့ ဆိုပါတယ်။

“ဒီ ရွှေမျောကရတဲ့ပိုက်ဆံတွေ၊ ရေဂိတ်ကရတဲ့ အခွန်တွေလည်း ရှိကြတယ်၊ အဲဒီအခွန်တွေကနေ သူတို့ လက်နက်တွေဝယ်နိုင်ပြီးတော့ တိုက်ပွဲငယ်လေးတွေကိုပဲ ဖော်ဆောင်နိုင်တယ်၊ ဘယ်ပျူရွာကိုမှလည်း ကောင်းကောင်းသိမ်းပိုက်နိုင်ထားတာ မရှိသေးဘူး၊ အဲ့ဒီ ရေဂိတ်တွေ ရွှေမျောတွေကရတဲ့ အခွန်ငွေကိုလည်း စာရင်းအတိအကျနဲ့ ချပြနိုင်တာတွေ တခုမှ မရှိဘူး၊ သူတို့အကျိုးစီးပွါးအတွက် လုပ်တာမဟုတ်ရင် အဲဒါတွေက ဘာတွေလဲ။” လို့ ဆန္ဒပြစဉ်မှာ ပါဝင်ခဲ့သူတဦးက ဆိုပါတယ်။

မင်းကင်းမြို့နယ်၊ လောင်းပြည့်ရွာ အနီးကအဆိုပါရွှေမျောစီမံကိန်းကို တော်လှန်ရေးတပ်တချို့က တော်လှန်ရေးရန်ပုံငွေအတွက်ဆိုကာ အမျိုးသားညီညွတ်ရေးအစိုးရ – NUG၊ သယံဇာတဝန်ကြီးဌာနဆီ စာတင်ပြီး ပြုလုပ်ခဲ့တာလို့ မင်းကင်းမြို့နယ်ပအဖတာဝန်ခံက အောက်တိုဘာလ ၂ ရက်က မြေလတ်အသံရဲ့ ဆက်သွယ်မေးမြန်းမှုမှာ ဖြေကြားခဲ့ပါတယ်။

အောက်တိုဘာ ၂ ရက်မှာလည်း အဆိုပါရွှေမျောကို မင်းကင်းဒေသခံ ၁,၀၀၀ ကျော်က သင်တောရွာမှာ ဆန္ဒပြကန့်ကွက်ခဲ့ကြပြီး ရပ်တန့်ပေးမယ့်အလားအလာ မရှိတာကြောင့် ယနေ့အောက်တိုဘာ ၅ ရက်မှာတော့ ဒေသခံ ၂,၀၀၀ ကျော်က စီမံကိန်းနဲ့ မျက်နှာချင်းဆိုင်နေရာတခုမှာ ထပ်မံဆန္ဒပြ ကန့်ကွက်ခဲ့ကြတာလို့ ဒေသခံတဦးက ဆိုပါတယ်။

“ပအဖနဲ့ မသက်ဆိုင်ဘူး၊ အပေါ်က MOD အထက်ကလုပ်တာ၊ ဒီ ဝန်ကြီးတွေကနေ သူတို့က အထက်ကလူကြီးတွေတိုင်ပင်ပြီး သူတို့ဘာသာသူတို့ ဖြေရှင်းမယ်လို့ ပြောသွားတဲ့ပုံစံအရ ပြည်သူတွေအနေနဲ့ ဒီဟာကို ခန့်မှန်းကြည့်လိုက်ရင် သူတို့က ဒီရွှေမျောခွင်ကို လုပ်ကိုလုပ်မယ်ဆိုတာကြီးကို သိသာနေတဲ့အချက်ရယ်၊ အခု လက်ရှိမှာဆိုရင်လည်း တန်းတွေကာထားပြီးပြီ၊ မောင်းရုံပဲ ကျန်တော့တာပေါ့နော်၊ ဆန္ဒပြနေတဲ့အနေအထားကြောင့်သာ ရပ်ထားရတဲ့ပုံ၊ ပြီးတော့ ပြည်သူတွေ အနေနဲ့ မနက်ဖြန် ၆ ရက်နေ့မှာ မောင်းမယ်လို့သိထားရတယ်၊ အဲဒီအတွက် ထပ်မံပြီးတော့ ဆန္ဒပြကြတာ။” လို့ ဒေသခံအမျိုးသမီးတဦးက ဆိုပါတယ်။

အဆိုပါရွှေမျောကြောင့် ဒေသခံတွေရဲ့ ဘိုးဘွားပိုင်မြေတွေမှာ လုပ်ကိုင်စားသောက်ဖို့ ကြုံလာမယ့် အခက်အခဲတွေ၊ စီးပွားရေးကျဆင်းမှုကြောင့် ပညာရေး၊ ကျန်းမာရေးစောင့်ရှောက်မှု ဆုံးရှုံးတာတွေ၊ ကုန်စျေးနှုန်းကြီးမြင့်လာမယ့် စိုးရိမ်ချက်တွေ ရှိနေတယ်လို့ သိရပါတယ်။

“ဒေသခံတွေ အဓိကလိုချင်တာတော့ ဒီဘိုးဘွားပိုင်ကျွန်းကြီးကို မပျက်မစီးဘဲ လုပ်ကိုင်စားသောက်ချင်တာပါပဲ၊ သူတို့က အဲ့ဒီလိုလုပ်လိုက်ရင် ကျနော်တို့က နောက်နှစ်တွေမှာ ဘယ်လိုဆက်ပြီး ဒီကျွန်းတွေမှာ တောင်သူတွေ လုပ်ကိုင်စားသောက်လို့ရမှာလဲ၊ ထပ်ပြီးတော့ ကျနော်တို့ဒေသရဲ့ ပညာရေးတွေ၊ ကျန်းမာရေးတွေ အဆင်ပြေပြေနဲ့ ဘယ်လိုနေနိုင်မှာလဲ၊ ပြီးတော့ အဲဒီရွှေမျောတွေ ဖြစ်လာခဲ့ရင် ကျနော်တို့ဒေသတွေမှာ ကုန်စျေးနှုန်းတွေ ကြီးလာမယ်၊ ပြီးရင် သူတို့ ဒီရွှေမျောရဲ့အလျောက် မူးယစ်ဆေးဝါးတွေ ပေါများလာမယ်။”လို့ ဆန္ဒပြစဉ်မှာ ပါဝင်ခဲ့သူတဦးက ဆိုပါတယ်။

လောင်းပြည့်ကျွန်းဟာ ချစ်တွင်းမြစ်ကမ်းဘေး မင်းကင်းမြို့နယ်၊ လောင်းပြည့်ရွာအနီးမှာရှိပြီး ယခင်က ရွှေတူးဖော်တာမျိုးတွေမရှိခဲ့ဘဲ ယခုမှ ကျွန်းတဝိုက်မှာ ရွှေမျောဖောင် ဆယ်နဲ့ချီချထားပြီး တူးဖော်ဖို့ ပြင်ဆင်နေတာလို့ ဒေသခံတဦးက ပြောပါတယ်။

ဆိုပါဆန္ဒပြပွဲတွေမှာ လောင်းပြည့်ရွာ၊ အနောက်တောရွာ၊ အုန္နဲဘုတ်ရွာ၊ ဘင်ရွာ၊ ညောင်ပင်သာရွာ၊ ဇင်ကလဲရွာ၊ သင်းတောရွာက ဒေသခံတွေပါဝင်ပြီး ရွှေမျောစီမံကိန်း ရပ်တန့်သွားတဲ့အထိ ဆန္ဒပြကန့်ကွက်မှုတွေ ဆက်တိုက်လုပ်ဆောင်သွားမယ်လို့ သိရပါတယ်။

၂၀၂၄ မတ် ၆ ရက်ကလည်း မင်းကင်းမြို့နယ်၊ ကမ်းပြည့်ကျေးရွာအနီး ကမ်းပြည့်ရွှေမှော် လုပ်ငန်းခွင်ကြောင့် ဒေသခံပြည်သူလူထုရဲ့ စိုက်ခင်းပျက်စီးတာတွေ၊ ရွှေမျောရပ်တန့်ဖို့ပြောပေမယ့် မရပ်တန့်ခဲ့တာတွေကြောင့် မင်းကင်းမြို့နယ်ဒေသခံတွေက မြို့နယ်ပအဖတာဝန်ခံ အပါအဝင် ရွှေမျောအာဏာပိုင်တွေကို ရာထူးကထုတ်ပယ်ဖို့အထိ ဆန္ဒပြကန့်ကွက်ခဲ့ကြပါသေးတယ်။

စာတည်း – လင်း

စစ်ကိုင်း၊ မေ ၃၁၊ ၂၀၂၃။

စစ်ကိုင်းတိုင်း၊ မုံရွာမြို့ပေါ်မှာ စစ်တပ်ပိုင် မြဝတီဘဏ်ရှေ့မှာ အာဏာရှင်ဆန့်ကျင်ရေးစာတန်းကို မုံရွာလူငယ် များအစည်းအရုံးအဖွဲ့ဝင်တွေက မေလ ၃၁ ရက် ဒီနေ့မနက် ၇ နာရီက ချိတ်ဆွဲခဲ့ကြပါတယ်။

ချိတ်ဆွဲထားတဲ့ဘန်နာပေါ်မှာ “ကျွေးတဲ့လက်ပြန်ကိုက်တဲ့စစ်ခွေး မင်းပထွေး မအလ နာရေးအတွက် ပြင်ဆင်ထားဟေ့” လို့ စာလုံးအနီတွေနဲ့ ရေးသားဖော်ပြထားပါတယ်။

အဆိုပါ ဘန်နာစာတန်းကို လုံခြုံရေးအရ ကာရံတားဆီးထားတဲ့ ဝါးလုံးတွေအပေါ်မှာ ချိတ်ဆွဲခဲ့တာဖြစ်ပါတယ်။

စာတည်း – လင်းဇေ