ဒီပဲယင်း၊ ဩဂုတ် ၉၊ ၂၀၂၅။

စစ်ကိုင်းတိုင်း၊ ဒီပဲယင်းမြို့နယ်ပြည်သူ့လုံခြုံရေးတပ်ဖွဲ့ – ပလဖက ဒေသတွင်းဖြတ်သန်းသွားတဲ့ သစ်ကားတွေကို ပြေစာမဲ့ငွေကောက်ခံတယ်ဆိုကာ လှည့်လည်ဆန္ဒပြခဲ့ကြတယ်လို့ ဒေသခံတွေထံက သိရပါတယ်။

မြို့နယ်ပလဖရဲ့ဒေသအခေါ် အင်ကြင်းတံပိုးရေလှောင်တမံထိပ်ဂိတ်ကို ဖျက်သိမ်းပေးဖို့ ကျေးရွာ ၁၀ ရွာက ဒေသခံ ၂၀၀ ခန့် ဩဂုတ် ၉ ရက် မနေ့ နေ့လယ်ပိုင်းမှာ ဆန္ဒပြခဲ့ကြတာဖြစ်ပြီး ငွေကောက်ခံမှုများပြားတာ၊ ပြေစာမဖြတ်ဘဲ ငွေတောင်းခံတာတွေလုပ်ဆောင်နေတာကြောင့် အခုလိုလုပ်ဆောင်တာလို့ ဆန္ဒပြမှုမှာပါဝင်သူဒေသခံတဦးက မြေလတ်အသံကို ပြောပါတယ်။

အဲ့ဒီစစ်ဆေးရေးဂိတ်ကို ဒီပဲယင်းမြို့နယ်ပလဖတာဝန်ခံက ဦးစီးနေပြီး ငွေကောက်ခံတာမှာ တပ်ဖွဲ့ဝင်တွေအပြင် ပလဖက ဖမ်းဆီးထားတဲ့ အကျဥ်းသားတွေလည်း ဝင်ရောက်ကောက်ခံမှုတွေရှိနေတယ်လို့လည်း ဆိုပါတယ်။

အဲဒီ့ပလဖဂိတ်က ဂိတ်အခွန်ပြေစာပေးဆောင်တာမရှိဘဲ ငွေကောက်ခံနေတဲ့အပေါ် သက်ဆိုင်ရာ NUG အစိုးရဝန်ကြီးဌာနတွေအနေနဲ့ ထိန်းသိမ်းပေးဖို့ တောင်းဆိုတယ်လို့လည်း ပြောပါတယ်။

ဒေသခံတွေ ဆန္ဒပြမှုဖြစ်စဥ်နဲ့ပတ်သက်ပြီး ၎င်းနေရာဟာ ဒီပဲယင်းမြို့နယ်ပလဖအဖွဲ့စခန်းနေရာဖြစ်ပြီး ဖြတ်သန်းသွားလာတဲ့ သစ်ကားတွေကို သက်ဆိုင်ရာမြို့နယ်သယံဇာတဝန်ကြီးဌာနရဲ့ ခွင့်ပြုချက်(မျော)နဲ့သယ်ဆောင်ခြင်း ရှိ၊ မရှိ စစ်ဆေးမှုတွေ လုပ်ဆောင်တဲ့နေရာလည်းဖြစ်တယ်လို့ တုံ့ပြန်ပါတယ်။

ပြီးခဲ့တဲ့ ဇွန်လအတွင်းမှာလည်း ဝက်လက်မြို့နယ်ခရိုင်ချင်းဆက်လမ်းတွေမှာ ဖွင့်လှစ်ထားတဲ့ ရှိန်းမကားတိုက်နယ်ပကဖရဲ့ အခွန်ကောက်ဂိတ်ဟာ ဖြတ်သန်းသွားတဲ့ စက်သုံးဆီတင်ကားတွေကို ပေပါ ၁ လုံးကို ၁၅,၀၀၀ ကျပ် ကောက်ခံတာကြောင့် ဒေသတွင်းစက်သုံးဆီသယ်ဆောင်သူတွေနဲ့ ဒေသခံတွေပူးပေါင်းပြီး ဆန္ဒပြခဲ့ပါသေးတယ်။

စာတည်း – ဟိန်းစံ၊ တည်းဖြတ် – M

ဝက်လက်၊ ဇွန် ၁၃၊ ၂၀၂၅။

စစ်ကိုင်းတိုင်း၊ ဝက်လက်မြို့နယ်၊ ရှိန်းမကားတိုက်နယ်ပကဖအဖွဲ့ရဲ့ ဂိတ်ကြေးငွေကောက်ခံမှုအပေါ် ဒေသခံပြည်သူတွေက ဆန္ဒထုတ်ဖော်ခဲ့ကြတယ်လို့ ဝက်လက်မြို့နယ် ဒေသခံတွေဆီက သိရပါတယ်။

ဇွန် ၁၁ ရက်နဲ့ ၁၂ ရက်တွေမှာ ရှိန်မကားတိုက်နယ်၊ မင်းကုန်းလေးကျေးရွာအနီးမှာ ဝက်လက်ဒေသခံ ၃၀၀ ဝန်းကျင်က ဆန္ဒထုတ်ဖော်ခဲ့တာဖြစ်ပြီး လက်ရှိအခွန်ကောက်ခံနှုန်းဟာ များပြားနေတာကြောင့် လျှော့ချကောက်ခံပေးဖို့ အခုလို လုပ်ဆောင်တာဖြစ်တယ်လို့ ဆိုပါတယ်။

“ ကျနော်တို့မနေ့ကဆန္ဒပြတော့ သူတို့ရောက်လာတယ်၊ သူတို့က ဆီ ၁ ပေပါကိုသယ်လို့ရှိရင် ၁၅,၀၀၀ ကျပ်နှုန်းကောက်တယ်၊ ကျနော်တို့ ပြည်သူတွေအနေနဲ့ကလည်း ကျန်တဲ့ကျေးရွာလမ်းတွေဖြတ်တဲ့အခါမှာ အလှူငွေထည့်ခဲ့ရသေးတယ်၊ သူတို့ကဘာမှမလုပ်ပဲနဲ့ ဆီ ၁ ပေပါကို ၁၅,၀၀၀ ကျပ်နှုန်း၊ ၁၀ ပေပါ ပါလို့ရှိရင် ၁ သိန်းခွဲနှုန်းဖြစ်သွားတော့ ကျနော်တို့အနေနဲ့က သိပ်အဆင်မပြေဘူး၊ နိုင်ငံရေးကာလ မငြိမ်မသက်တဲ့အထဲမှာ အခွန်စီးဆင်းမှုက နည်းနည်းလေးများနေတော့ ကျပ်တည်းမှုတွေဖြစ်လာတယ် “ လို့ ဆန္ဒပြမှုမှာပါဝင်သူတဦးက ပြောပါတယ်။

ဒါ့အပြင် ဂိတ်ဖွင့်အခွန်အများအပြားကောက်ခံနေပေမယ့် အခွန်ရရှိငွေနဲ့ ဒေသဖွံ့ဖြိုးမှုအတွက် ပြန်လည်လုပ်ဆောင်ပေးတာနည်းပါးကြောင်း ဆန္ဒပြသူတွေက ပြောဆိုထားကာ လက်ရှိဆန္ဒပြမှုတွေအပေါ် ဝက်လက်မြို့နယ်အဆင့် ပသုံးလုံးအဖွဲ့ဝင်တွေလာရောက်ဖြေရှင်းပေးနေပေမယ့် တိကျတဲ့အဖြေမထွက်သေးဘူးလို့ ဆိုပါတယ်။

ဒေသခံတွေ ဆန္ဒပြနေမှုနဲ့ပတ်သက်ပြီး ရှိန်းမကားတိုက်နယ်ပကဖခေါင်းဆောင် ဗိုလ်ရိုင်က ဝက်လက်မြို့နယ်အတွင်း ခရိုင်ချင်းဆက်လမ်းတွေမှာ ဗိုလ်ရိုင်အဖွဲ့၊ ရွှေဘို-မန္တလေးလမ်းပိုင်းမှာ ဝက်လက်အခွန်တာဝန်ခံ ၁ ဦးမိုးကျော်တို့က NUG သတ်မှတ်နှုန်းထားများအတိုင်းသာ မြို့နယ်ပအဖထုတ်ပေးတဲ့ပြေစာနဲ့ အခွန်ကောက်ခံတာဖြစ်တယ်လို့ ပြောပါတယ်။

“ ကျနော်တို့ပြောချင်တာက တနိုင်ငံလုံးအတိုင်းအတာနဲ့မကျေနပ်တာဆိုရင် ဝန်ကြီးဌာနအနေနဲ့ နှုန်းထားကိုပြင်လို့ရတယ်၊ အခုဟာက ဝက်လက်မြို့နယ်၊ ပေါက်ကံတိုက်နယ်၊ ညောင်ပင်ကြီးတော တရွာတည်းက ဆန္ဒပြတာ၊ ဒါက ကျနော်တို့က လုပ်ပေးလို့ရတဲ့အနေအထား မဟုတ်ဘူး” လို့ ဗိုလ်ရိုင်က ပြောပါတယ်။

ကောက်ခံရရှိတဲ့ အခွန်ငွေတွေအပေါ် ဖြန့်ခွဲသုံးစွဲမှုအခြေအနေတွေကိုလည်း ဗိုလ်ရိုင်က အခုလို ရှင်းပြပါတယ်။

“ ငွေကြေး ၁၀၀ ကောက်လို့ရှိရင် ၄၀ ရာခိုင်နှုန်း ကျနော်တို့ ရတယ်၊ ကျန်တဲ့ဖြတ်သွားဖြတ်လာမြို့နယ်တွေကို ၂၀ ရာခိုင်နှုန်းခွဲပေးရတယ်၊ ကျနော်တို့ရတဲ့ ၄၀ ရာခိုင်နှုန်းထဲကမှ တပ်ရင်းအသုံးစရိတ် ပကဖ အသုံးစရိတ်၊ ပအဖ အသုံးစရိတ် လူသားစာနာအသုံးစရိတ် ပလဖအသုံးစရိတ် ဆိုပြီး ၁၀ ရာခိုင်နှုန်း ပြန်ခွဲပေးရတာ”

“ဘယ်မှမရောက်ဖူးဆိုရင် ကျနော်တို့ ဝက်လက်မြို့နယ်က မီးလောင်ခံရတဲ့မြို့နယ်ပါ၊ တော်လှန်ရေးမှာ ပထမဦးဆုံးလုပ်တာ ဝက်လက်မြို့ပါ၊ မီးလောင်ခံရတဲ့အိမ်တွေ ပြန်လည်တည်ဆောက်ဖို့ ကျနော်တို့ဘက်က မျှောတိုင်တွေပေးတယ်၊ ဝါးတွေပေးတယ်၊ ထန်းရွက်တွေပေးတယ်၊ ထန်းသားတွေပေးတယ်၊ ထောက်ပံ့ကြေးတွေပေးတယ်၊ ကျဆုံးရဲဘော်တွေရဲ့မိသားစုတွေကို ထောက်ပံ့ကြေးတွေပေးတယ်၊ ကျနော်တို့ ဒီအခွန်ငွေတွေနဲ့ပေးတာ၊ ဘာမှမစီးဆင်းဘူးဆိုတာက ကျနော်တို့လုပ်ရပ်တွေကို မမြင်တာလား၊ မသိတာလား” လို့ ၎င်းက ပြောပါတယ်။

စာတည်း – ဟိန်းစံ၊ တည်းဖြတ် – HP

ရွှေဘို၊ ဧပြီ ၇၊ ၂၀၂၅။

စစ်ကိုင်းတိုင်း၊ ရွှေဘိုမြို့နယ်၊ ညောင်ကိုင်းကျေးရွာနေ ပြည်သူတွေက ဧပြီ ၄ ရက် မွန်းလွဲ ၁၂ နာရီကျော်မှာ ကျေးရွာမှာလုံခြုံရေးအတွက်ရောက်ရှိနေတဲ့ ရွှေဘိုခရိုင် အမှတ် ၄ တပ်ရင်းကို ဆန္ဒပြခဲ့ကြတယ်လို့ ဒေသခံတွေက ပြောပါတယ်။

တပ်ရင်း ၄ ရွာမှာ စခန်းချနေစဉ်အတွင်း တပ်ရင်း ၄ က ဒေသခံတွေရဲ့ပစ္စည်းတွေကို ယူဆောင်သွားတဲ့အတွက် ရွာထဲမှာဆက်ပြီးမနေဖို့ တရွာလုံးကဆန္ဒပြခဲ့ကြတာလို့ ညောင်ကိုင်းရွာဒေသခံ ဦးဖိုးထူးက ပြောပါတယ်။

“အဲ့ဒီ ရင်း ၄ နဲ့ လူရမ်းကားတစုတွေပေါ့ကွာ။ ရွာရှိတဲ့ပစ္စည်း စက်ပစ္စည်း၊ ထော်လာဂျီ၊ လက်တွန်း၊ ရေစုပ်စက်၊ ဆိုလာပြား၊ မော်တာ၊ နောက်ဆုံးကွာ တို့ရွာက တာဝါတိုင်က ရွာတရွာလုံးမီးသုံးမယ့်ဟာတွေ(မီးစက်)အထိ ခိုးယူသွားတာကို၊ ဓါးပြတိုက်တာကို မကျေနပ်လို့ကွ” လို့ ညောင်ကိုင်းကျေးရွာ ဒေသခံ ဦးဖိုးထူးက ဆိုပါတယ်။

ဒါ့အပြင် ဆန္ဒပြနေချိန်အတွင်း ရွှေဘိုခရိုင်အမှတ် ၄ တပ်ရင်းမှ တပ်ဖွဲ့ဝင်တဦးက ဆန္ဒပြပြည်သူတွေကို သေနတ်နဲ့ချိန်ရွယ်ပြီးခြိမ်းခြောက်ခဲ့တယ်လို့ သူက ဆက်ပြောပါတယ်။

“အဲ့ဒီ ရွှေဘိုခရိုင် ရင်း ၄ လို့ခေါ်တဲ့ အမည်မသိ ရဲဘော်တယောက်က ငါ့ရင်ဘတ်ကို သေနတ်နဲ့ ကျည်ထိုးချိန်လို့ကွ၊ ငါ **မြင်ကပ်တာ၊ မုန်းတာ။ အဲ့ဒါကြောင့်မို့ ရင်း ၄ ကို ငါ လုံးဝ လုံးဝ ညောင်ကိုင်းရွာထဲမှာ ဘယ်လိုနည်းနဲ့မှ မနေစေချင်တာ။” လို့ ဆိုပါတယ်။

ဆန္ဒပြပြီးနောက် အဲ့ဒီနေ့ညနေ ၅ နာရီကျော်မှာတော့ ညောင်ကိုင်းကျေးရွာကနေ ရွှေဘိုခရိုင်အမှတ် ၄ တပ်ရင်းက ထွက်ခွာပေးခဲ့တယ်လို့ ဆိုပါတယ်။

ရွာကထွက်ချိန်မှာလည်း ပစ္စည်းတချို့ကိုယူသွားခဲ့ကာ ခုလိုတွေ လုပ်ဆောင်နေတဲ့အပေါ် ကြောက်လန့်ရပြီး ဘယ်အဖွဲ့အစည်းကိုအကူညီတောင်းရမလဲမသိဘူးဖြစ်နေတယ်လို့ ညောင်ကိုင်းဒေသခံ မဖြူက ပြောပါတယ်။

“ထွက်တော့ ထွက်ခွာပေးပါတယ်။ ထွက်ခွာပေးတဲ့အချိန်မှာ ကျမတို့ ညောင်ကိုင်းရွာ ပိုင်ဆိုင်တဲ့ တာဝါတိုင်က စက်ကြီး(မီးစက်)ကိုလည်း သယ်သွားပါတယ်။ ကျမတို့ ဖြစ်နိုင်ရင် အဲ့စက်ကြီးကို ယူချင်ပါတယ်။ ကူညီပေးမယ့်အဖွဲ့အစည်းများရှိရင် ကျမတို့ကဘယ်အဖွဲ့အစည်းကိုလည်း အကူအညီ တောင်းရမှန်းမသိ။ ရွာမှာ စစ်ကောင်စီကိုလည်း ကြောက်ရ ရင်း ၄ ကိုလည်း ကြောက်ရ။ ကျမတို့ အတွက် အကာအကွယ်ပေးမယ့် ဘယ်သူများရှိပါသလဲရှင့်။ အဖွဲ့အစည်းများရှိရင် အကူအညီတောင်းအပ်ပါတယ်ရှင့်။” လို့ ဆိုပါတယ်။

အခုလိုညောင်ကိုင်းကျေးရွာသားတွေ ဆန္ဒပြကြတာနဲ့ပတ်သက်ပြီး ရွှေဘိုခရိုင်အမှတ် ၄ တပ်ရင်းမှ တာဝန်ရှိသူတဦးကို မြေလတ်အသံကမေးမြန်းရာမှာတော့ ၎င်းတို့တပ်ရင်းအနေနဲ့ လုပ်ထုံးလုပ်နည်းနဲ့ အညီ ပကဖ၊ ပအဖတို့နဲ့ စနစ်တကျပူးပေါင်းဆောင်ရွက်ထားတဲ့ကိစ္စဖြစ်တာကို ရွာသားတွေ နားလည်မှုလွဲတာပဲ ဖြစ်လိမ့်မယ်လို့ တုံ့ပြန်ပါတယ်။

အိမ်ခြေ ၂၀၀ ကျော်ရှိတဲ့ညောင်ကိုင်းကျေးရွာမှာ ၄ နှစ်ကျော်ကြာတပ်စွဲနေထိုင်ခဲ့တဲ့ စစ်ကောင်စီ နဲ့ ပျူစောထီးတပ်ဖွဲ့ဝင်တွေဟာ တော်လှန်ရေးတပ်ဖွဲ့တွေရဲ့ ရိက္ခာဖြတ်တောက်မှုကြောင့် အခုနှစ် ဖေဖော်ဝါရီ ၂၁ ရက်မှာ စခန်းစွန့်ထွက်ပြေးခဲ့ကြပြီး အဲ့ဒီနောက်မှာ ရွှေဘိုခရိုင်အမှတ် ၄ တပ်ရင်းက ကျေးရွာလုံခြုံရေးအတွက် ရွာထဲမှာစခန်းချနေထိုင်ခဲ့တာလို့ သိရပါတယ်။

တည်းဖြတ် – M