စစ်ရှောင်ထောက်ပံ့ငွေ

ပွင့်ဖြူ ၊ ဒီဇင်ဘာ ၉၊ ၂၀၂၅။

မကွေးတိုင်း၊ ပွင့်ဖြူမြို့နယ်၊ ဆင်လူးရွာစစ်ဘေးရှောင်တွေအတွက် ထောက်ပံ့ငွေတွေကို အလွဲသုံးတယ်ဆိုကာ မင်းဘူးခရိုင်ပကဖပြန်ကြားရေးတာဝန်ခံ ကိုအညာသားနဲ့ စစ်ရှောင်အဖွဲ့ခေါင်းဆောင်တို့ တိုင်ကြားခံရပြီးနောက် စစ်ဆေးမှုတွေလုပ်ဆောင်နေတယ်လို့ ဒေသခံစစ်ဘေးရှောင်တွေနဲ့ ပကဖအဖွဲ့ ခေါင်းဆောင်ထံက သိရပါတယ်။

ပြီးခဲ့တဲ့ အောက်တိုဘာလအတွင်းမှာ အမျိုးသားညီညွတ်ရေးအစိုးရ-NUG က ဆင်လူးရွာစစ်ရှောင်အိမ်ထောင်စု ၃၈ စုအတွက် စစ်ရှောင်တဲတွေဆောက်လုပ်ဖို့ ငွေကျပ်သိန်း ၃၀၀ ထောက်ပံ့ပေးခဲ့ပြီး အဲ့ဒီထဲကငွေတချို့ကိုအလွဲသုံးတယ်ဆိုကာ မင်းဘူးခရိုင်ပကဖပြန်ကြားရေးတာဝန်ခံ ကိုအညာသား၊ စစ်ရှောင်အဖွဲ့ခေါင်းဆောင် ၁ ဦးနဲ့ စစ်ရှောင်ကူညီရေးအဖွဲ့ဝင် ၁ ဦး စုစုပေါင်း ၃ ဦး တိုင်ကြားခံခဲ့ရတာလို့ ဆိုပါတယ်။

” NUG ကနေ စစ်ဘေးရှောင်တွေအိမ်ဆောက်ဖို့ ငွေချပေးတာကတော့ ကိုအညာသား ဆီကို ချပေးတာ။ မင်းဘူးခရိုင်ပကဖ ကိုတော့ တိုင်ထားပါတယ်။ တိုင်ထားပေမဲ့ ဘာမှကို ကျနော်တို့ မသိရသေးဘူး။ တိုင်ထားတာက ၁ လလောက်ရှိပါပြီ။ မရတဲ့စစ်ဘေးရှောင်တွေကတော့ နီးစပ်ရာအိမ်တွေမှာ နေရပါတယ်။ တချို့လည်း ဆွေမျိုးတွေဆီ ကပ်နေရပါတယ်” လို့ ဆင်လူးရွာစစ်ဘေးရှောင်တဦးက မြေလတ်အသံကို ပြောပါတယ်။

အောက်တိုဘာလအတွင်း စစ်ရှောင်ထောက်ပံ့ငွေကို အိမ်ထောင်စု ၁ စု ငွေကျပ် ၇ သိန်းနှုန်းနဲ့ အိမ်ထောင်စု ၂၈ စု အတွက်သာ ပေးခဲ့ပြီး အိမ်ထောင်စု ၁၀ စုအတွက် ထောက်ပံ့ငွေမပေးတာကြောင့် စစ်ရှောင်စခန်းတွေကို တာဝန်ယူထားတဲ့ ကိုအညာသား အပါ ၃ ဦးကို အခုလိုတိုင်ကြားခဲ့တာလို့ သိရပါတယ်။

” ၁၀ လပိုင်း ၁၃ ရက်က ဝေ(ပေး)တာပါ။ စစ်ဘေးရှောင်တွေ အိမ်ဆောက်ဖို့ချပေးတာပါ။ သူတို့လက်အောက်မှာ မနေတဲ့သူတွေကို မပေးဘူးဆိုပြီး သူတို့(စစ်ရှောင်စာရင်း)ထဲကနေ ထုတ်တယ်ဆိုပြီးလုပ်ထားတာပါ။ စာရင်းကောက်သွားတုန်းက မရတဲ့စစ်ဘေးရှောင်တွေရဲ့ အမည်စာရင်းတွေပါတယ်” လို့ အထက်ပါ စစ်ရှောင်က ပြောပါတယ်။

စစ်ရှောင်တွေရဲ့ တိုင်ကြားချက်ကို လက်ခံရရှိထားပြီး ဖြစ်စဥ်နဲ့ပတ်သက်လို့ စစ်ရှောင်စခန်းတွေကို အဓိကဦးစီးနေတဲ့ ကိုအညာသားအပါ ၃ ဦးနဲ့ တိုင်ကြားသူတွေဘက်ကိုပါ စစ်ဆေးမှုတွေလုပ်ဆောင်နေတယ်လို့ မင်းဘူးခရိုင်သတင်းနဲ့ပြန်ကြားရေးတာဝန်ခံ ကိုတင်က ပြောပါတယ်။

” ကျနော်တို့ကပထမနေ့က တိုင်ကြားသူ ဦးအောင်ရွှေနဲ့ဒေါ်တင်မူ(စစ်ရှောင်)ကို စစ်ဆေးထားတယ်။ အဲ့ဒါတွေကိုတော့ မှတ်တမ်းတွေရှိတယ်။ ကျနော်တို့ လောလောဆယ်စစ်ဆေးနေဆဲ ဖြစ်နေပါတယ်။ တိုင်ကြားခံရတဲ့ စစ်ရှောင်အဖွဲ့ခေါင်းဆောင်နဲ့ စစ်ရှောင်ကူညီရေးအဖွဲ့ဝင်ကိုတော့ စစ်ဆေးထားတယ်။ အဓိကဖြစ်တဲ့ စစ်ဘေးရှောင်စခန်းကိုဦးစီးနေတဲ့ ကိုအညာသား ကို မစစ်ဆေးရသေးဘူး” လို့ သူကပြောပါတယ်။

လက်ရှိမှာ စစ်ဆေးခံနေရတယ်ဆိုတဲ့ မင်းဘူးခရိုင်ပြန်ကြားရေးတာဝန်ခံ(ဟောင်း) ကိုအညာသားဟာ ခရိုင်ပကဖအဖွဲ့မှ နုတ်ထွက်ထားကြောင်းသိရှိရပြီး ၎င်းရဲ့ မင်းဘူးခရိုင်သတင်းနဲ့ပြန်ကြားရေးတာဝန်ခံနေရာကို ကိုတင်က လွန်ခဲ့တဲ့ ၂ လခွဲခန့်ကစတင်ကာ တာဝန်ယူထားတယ်လို့ သိရပါတယ်။

ကနဦးစစ်ဆေးချက်တွေအရ အလွဲသုံးစားမှုတချို့ကို တွေ့ရှိထားတယ်လို့ မင်းဘူးခရိုင်ပကဖ ပြန်ကြားရေးတာဝန်ခံက ဆက်ပြောပါတယ်။

” စစ်ဆေးချက်အရတော့ စာရင်းတွေကောက်ပြီး မပေးတာတော့ တွေ့ရှိရတယ်။ အိမ်ထောင်စု ၃၅ စုစာကောက်ပြီး ၂၈ စုစာပဲ ပေးတယ်လို့တော့ တိုင်ကြားခံရသူ‌ စစ်ရှောင်အဖွဲ့ခေါင်းဆောင်နဲ့ စစ်ရှောင်ကူညီရေးအဖွဲ့ဝင်ကတော့ ဝန်ခံတယ်” လို့ သူက ပြောပါတယ်။

ပျူစောထီးစခန်းတွေအခြေစိုက်ထားတဲ့ ဆင်လူးရွာမှာ ပျူစောထီးနဲ့ စစ်ကော်မရှင်တပ်အင်အားရာနဲ့ချီတပ်စွဲနေတာဖြစ်ပြီး ရွာခံတွေကိုကျေးရွာပြင်ပထွက်ခွင့်ပိတ်ဆို့ထားတာပါ။

စစ်ကော်မရှင်တပ်က ရွာခံတွေကိုထင်သလိုဖမ်းဆီးနှိပ်စက်တာနဲ့ အမျိုးသားတွေကို ပျူစောထီးအဖြစ်အဓမ္မစုဆောင်းတာတွေကြောင့် ၂၀၂၄ စက်တင်ဘာလကစတင်ကာ ဆင်လူးရွာခံတွေက ကျေးရွာကနေစွန့်ခွာထွက်ပြေးလာပြီး မင်းဘူးခရိုင်ပကဖလက်အောက်မှာ ခိုလှုံစစ်ဘေးရှောင်နေထိုင်နေကြတာလည်း ဖြစ်ပါတယ်။

ဖြည့်စွက်ချက်။ ။ စစ်ဆေးခံရသူမှာ သတင်းနှင့်ပြန်ကြားရေးတာဝန်ခံ(ဟောင်း)ဖြစ်ကြောင်း ထပ်မံသိရှိရသဖြင့် ဖြည့်စွက်ထားသည်။

စာတည်း – ဟိန်းစံ