စစ်ကြောင်းထိုး

မြေလတ်အသံ၊ ဇန်နဝါရီ ၉၊ ၂၀၂၅။

မကွေးတိုင်း၊ ပခုက္ကူမြို့နယ်၊ ကံရပ်ကြီးရွာကို စစ်ကော်မရှင်တပ်က ဇန်နဝါရီ ၈ ရက်မှာမီးရှို့ခဲ့တာကြောင့် ရွာလုံးကျွတ်မီးလောင်ပျက်စီးခဲ့တယ်လို့ ဒေသခံတွေက ပြောပါတယ်။

အိမ်ခြေ ၂၀၀ ကျော်ရှိတဲ့ ကံရပ်ကြီးရွာကို အင်အား ၂၀၀ ကျော်ပါ စစ်ကော်မရှင်တပ်သားတွေက မနက် ၁၀ နာရီကနေ နေ့လယ် ၃ နာရီကျော်အထိမီးရှို့ခဲ့တာကြောင့် လူနေအိမ် ၁၅ လုံးခန့်သာ မီးမလောင်ဘဲ ကျန်ခဲ့တယ်လို့ ဆိုပါတယ်။

“အိမ်ခြေ ၂၀၀ ကျော်မှာ ၁၅ အိမ်လောက်ပဲကျန်တယ်။ စကမတွေက မနက် ၁၀ နာရီကျော်လောက် ကတည်းက မီးရှို့ပြီး ညနေ ၃ နာရီလောက်မှာ ပခုက္ကူနယ်ထဲက ညောင်ဂျစ်ပင်ပျူရွာကို ပြန်သွားတာ။ ရွာထဲ၀င်လည်း နေစရာမရှိ ပြာပုံဖြစ်နေတော့ အိုးမဲ့အိမ်မဲ့ နေစရာမရှိဖြစ်နေတာပေါ့ဗျာ။”လို့ ဒေသခံ အမျိုးသားတဦးက ပြောပါတယ်။

အဲ့ဒီစစ်ကြောင်းဟာ ရွာအတွင်းကိုသေနတ်တွေပစ်ဖောက်ပြီး ဝင်ရောက်လာချိန် လမ်းသွားနေတဲ့ အသက် ၈၀ အရွယ် အဘွားအို ၁ ဦးလည်း ရုတ်တရက်လဲကျ သေဆုံးသွားခဲ့တယ်လို့ ဆိုပါတယ်။

“သေဆုံးတဲ့အဘွားက စစ်ကြောင်းစ၀င်လာကတည်းက လန့်ပြီသေဆုံးတာပါ။ ရွာသားတွေကတော့ နေစရာလည်း မရှိတော့ဘူး။ စားစရာလည်း မရှိတော့ဘူး။ အကုန်ပါသွားတာပေါ့ဗျာ။ ဘာတခုမှ မကျန်တာ”လို့ အထက်ပါအမျိုးသားက ပြောပါတယ်။

လက်ရှိမှာ ကံရပ်ကြီးကျေးရွာမှ ဒေသခံပြည်သူတွေဟာ နေစရာအိမ်တွေမရှိတော့တာကြောင့် အနီးဝန်းကျင်မှာရှိတဲ့ ကျေးရွာတွေရဲ့ ဘုန်းတော်ကြီးကျောင်း၊ စာသင်ကျောင်းတွေမှာ ခိုလှုံနေကြရတယ်လို့လည်း သူကဆိုပါတယ်။

အဲ့ဒီစစ်ကြောင်းဟာ ပခုက္ကူမြို့အခြေစိုက် တပ်မ ၁၀၁ ကဖြစ်ပြီး ကံရပ်ကြီးရွာကို မီးရှို့ပြီးနောက် ပခုက္ကူမြို့နယ်၊ ညောင်ဂျစ်ပင်ကျေးရွာကိုဝင်ရောက်ကာ အဲဒီကနေတဆင့် ညနေ ၆ နာရီလောက်မှာ ကမ္မရဲစခန်းကိုဝင်ရောက်သွားတယ်လို့ သိရပါတယ်။

ပြီးခဲ့တဲ့ ဇန်နဝါရီ ၆ ရက် မနက် ၉ နာရီဝန်းကျင်ကလည်း မြိုင်မြိုနယ်၊ ဝယ်တောက်ရွာ ဂျိုင်ရိုကော်ပတာနဲ့ ဗုံးကြဲတိုက်ခိုက်ခံရပြီး ဆေးပေးခန်းနဲ့ နေအိမ်အဆောက်အဦတချို့ ပျက်စီးခဲ့တယ်လို့ မြိုင်မြို့ခံတွေဆီက သိရပါတယ်။

စာတည်း – လင်း

စဉ့်ကူး၊ ဇန်နဝါရီ ၅၊ ၂၀၂၆။

မန္တလေးတိုင်း၊ စဉ့်ကူးမြို့နယ်အနောက်ခြမ်း မြစ်ကမ်းအနီးကကျေးရွာတွေကို စစ်ကော်မရှင်တပ်က စစ်ကြောင်းထိုးပြီး ရွာတွေကိုမီးရှို့နေတယ်လို့ ဒေသခံတွေဆီက သိရပါတယ်။

‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌အင်အား ၁၀၀ ကျော်ပါ စစ်ကော်မရှင်စစ်ကြောင်းဟာ ဧရာဝတီမြစ်ဘေးက ကျွန်းကြီး၊ သဲအင်း၊ ကျွန်းတော်၊ ကြက်တူရွေး၊ ဟင်္သာမရွာတွေကို ဇန်နဝါရီ ၂ ရက်က စတင်ဝင်ရောက်လာပြီးနောက် အဲ့ဒီထဲကကျွန်းကြီးရွာကိုတော့ ဇန်နဝါရီ ၃ ရက်မှာ မီးရှို့ခဲ့တယ်လို့ ဆိုပါတယ်။

“မတ္တရာမြို့နယ်ဘက်ကနေ ကားလမ်းအတိုင်း ဆင်းလာတာ။ ၃ ရက်နေ့ မနက်ပိုင်းမှာ ကျွန်းကြီးရွာကို လက်နက်ကြီး၊ လက်နက်ငယ်တွေ ပစ်ဝင်တယ်။”လို့ ဒေသခံတဦးက ပြောပါတယ်။

ဒါ့အပြင်ဇန်နဝါရီ ၅ ရက် ဒီနေ့မှာလည်း ဟင်္သာမကျေးရွာကို မီးရှို့နေတယ်လို့သိရကာ စစ်ကြောင်းကြောင့် အထက်ပါကျေးရွာတွေက ဒေသခံတွေတိမ်းရှောင်နေရတဲ့အတွက် ပျက်စီးဆုံးရှုံးမှုအခြေအနေကို မသိရသေးဘူးလို့ သူကဆက်ပြောပါတယ်။

ဟင်္သာမကျေးရွာအုပ်စုမှာ ကြက်တူရွေး၊ ဟင်္သာမ၊ မြစ်ကမ်းကြီး၊ စဉ့်အိုးကျွန်းစတဲ့ ရွာ ၅ ရွာစုပေါင်း နေထိုင်ပြီး ၂၀၂၃ အတွင်းမှာ စစ်ကော်မရှင်တပ်က ၃ ကြိမ်တိုင် ရွာလုံးကျွတ်မီးရှို့ခဲ့တဲ့အတွက် နေအိမ်အနည်းငယ်သာကျန်ခဲ့ပြီး အဲ့ဒီနေအိမ်တွေကို ဒီနေ့ မီးဆက်ရှို့နေတာလို့ ဒေသခံတွေက ပြောပါတယ်။

စဉ့်ကူးမြို့နယ်ရဲ့ ၉၅ ရာခိုင်နှုန်းလောက်ကို စစ်ကော်မရှင်တပ်ကသိမ်းယူထားပြီလို့ ဒေသခံ တော်လှန်‌ရေးတပ်‌တွေဆီက သိရပြီး လက်ရှိမှာတော့ စစ်ကော်မရှင်ဘက်က မသိမ်းယူနိုင်သေးတဲ့ ဧရာဝတီမြစ်ကမ်းအနီးက ရွာတွေကို စစ်ကြောင်းထိုးနေတဲ့အပြင် သဲအင်း၊ ဟင်္သာမရွာ၊ ကြက်တူရွေးရွာတို့ကိုလည်း စစ်ကြောင်းဝင်လာနိုင်တာကြောင့် ပြည်သူအားလုံး ရှောင်တိမ်းနေကြတယ်လို့ သိရပါတယ်။

လက်ရှိမှာ စစ်ကြောင်းရှိနေတဲ့ ကျွန်းကြီးရွာနဲ့ သဲအင်း၊ ဟင်္သာမရွာ၊ ကြက်တူရွေးတို့ဟာ ၁ မိုင်ဝန်းကျင်ပဲကွာဝေးကာ အဲ့ဒီရွာတွေရဲ့ တဖက်ကမ်းက ဝက်လက်မြို့နယ်အရှေ့ခြမ်းကိုလည်း စစ်ကြောင်းထိုးနေတဲ့အတွက် ဒေသခံတွေအခက်တွေ့နေရတယ်လို့ ဆိုပါတယ်။

စဉ့်ကူးမြို့အပါအဝင် မိုးကုတ်- မန္တလေးလမ်းပိုင်းက စဉ့်ကူးမြို့နယ်ရဲ့ အရေးပါတဲ့နေရာ တွေကို ဒီဇင်ဘာလက စစ်ကော်မရှင်တပ်တွေက ပြန်သိမ်းယူလိုက်ပြီး ယခု မန္တလေး- စဉ့်ကူးလမ်းကို ပြန်ဖွင့်လိုက်ပြီလို့ သိရပါတယ်။

သတင်း – မြတ်

ဝက်လက်၊ ဇန်နဝါရီ ၅၊ ၂၀၂၆။

စစ်ကိုင်းတိုင်း၊ ဝက်လက်မြို့နယ်အရှေ့ခြမ်းက ကျေးရွာတွေကို စစ်ကော်မရှင်တပ်ဖွဲ့ဝင်တွေက စစ်ကြောင်းထိုးဝင်ရောက်နေပြီး ဒေသခံအမျိုးသမီး ၅ ဦးကိုလည်း အဓမ္မပြုကျင့်ခဲ့တယ်လို့ ဒေသခံတွေဆီက သိရပါတယ်။

အဓမ္မပြုခံခဲ့ရသူတွေဟာ အသက် ၂၀ကျော်ကနေ ၃၀ ကျော်အရွယ်အမျိုးသမီး ၄ ဦးနဲ့ အသက် ၄၀ အရွယ် အမျိုးသမီး ၁ ဦးတို့ဖြစ်ပြီး စစ်ကော်မရှင်တပ်ဖွဲ့ဝင်တွေက ဇန်နဝါရီ ၁ ရက်မှာဖမ်းဆီးပြီးနောက် သူတို့ တပ်စွဲထားတဲ့ ရွာသစ်ရွာကိုခေါ်ဆောင်ကာ အဓမ္မပြုခဲ့တာလို့ ဆိုပါတယ်။

“အဲဒီနေ့မှာပဲ သန္ဓေတားဆေးထိုးပြီး ပြန်လွှတ်ပေးလိုက်တာလို့ သိရတယ်။ အဲဒီအထဲက အမျိုးသမီး ၁ ယောက်က စိတ်မကျန်းမာ‌ရေးမကောင်းဘူး။”လို့ ဒေသခံတဦးက ပြောပါတယ်။

အဆိုပါ အမျိုးသမီး ၅ ဦးမှာ ဝက်လက်မြို့နယ် မင်းရွာ‌တောင်ရွာက ၁ ဦးနဲ့ အင်ဒေါင်းရွာက ၄ ဦးဖြစ်ပြီး ဇန်နဝါရီ ၃ ရက်ညနေပိုင်းမှ ရွာသစ်ရွာစခန်းကနေ ပြန်လွတ်လာခဲ့ကြတယ်လို့ ဆိုပါတယ်။

တပ် ၃၃ လက်အောက်ခံ စစ်ကော်မရှင်တပ်ဖွဲ့ဝင်နဲ့ပျူစောထီး အင်အား ၁၅၀ ပါ အဲ့ဒီစစ်ကြောင်းဟာ ဒီဇင်ဘာလနောက်ဆုံးပတ်ကစလို့ မင်းကွန်းဒေသကနေ ဝက်လက်မြို့နယ်ထဲကို ဝင်ရောက်လာပြီးနောက် ရှိမ်းမကားရဲစခန်းက တပ်ဖွဲ့ဝင်တွေနဲ့ပူးပေါင်းကာ စစ်ကြောင်းထိုးနေတာလို့ ဆိုပါတယ်။

အဲ့ဒီစစ်ကြောင်းဟာ ဇန်နဝါရီ ၁ ရက်ကနေ ၃ ရက်အထိ ရွာသစ်ရွာမှာတပ်စွဲခဲ့ပြီး နေအိမ် ၄ လုံးကို မီးရှို့ခဲ့ကာ ဇန်နဝါရီ ၄ ရက်မှာတော့ ကမ်းဖြူရွာနဲ့ မှော်ဦးရွာတို့ကိုဝင်ရောက်ပြီးနောက် ဒီနေ့အထိ အဲ့ဒီရွာတွေထဲမှာရှိသေးတယ်လို့ သိရပါတယ်။

ဒီစစ်ကြောင်းကြောင့် ရွာသစ်၊ အင်ဒေါင်း၊ ရွာသာ၊ ကမ်းဖြူ၊ ငါးပတ်ချောင်း၊ မှော်ဦး၊ ရေလည်မော်ရွာက ဒေသခံသောင်းနဲ့ချီ ထွက်ပြေးနေရတယ်လို့ သိရပါတယ်။

၂၀၂၃ သြဂုတ်၂၆ ရက်ကလည်း ဝက်လက်မြို့နယ် အနောက်ခြမ်း၊ ကျီးကန်ရွာက ကိုယ်ဝန် ၃ လရှိ မရွှေမန်းသူ ဆိုသူကို မိဘတွေရှေ့တင် တပ်မ ၃၃ တပ်ဖွဲ့ဝင်တွေပါတဲ့ စစ်ကော်မရှင်တပ်ဖွဲ့ဝင်တွေက အုပ်စုဖွဲ့အဓမ္မပြုကျင့်ပြီး သတ်ဖြတ်ခဲ့ပါသေးတယ်။

သတင်း – မြတ်

မြေလတ်အသံ၊ ဇန်နဝါရီ ၃၊ ၂၀၂၅။

စစ်ကိုင်းတိုင်း၊ ဝက်လက်မြို့နယ်ကရွာတွေကို စစ်ကော်မရှင်တပ်က ၁ လအတွင်း လေကြောင်းကနေ ဗုံးကြဲတိုက်ခိုက်ခဲ့ရာ ကလေးတွေအပါအဝင် အမျိုးသမီး၊ အမျိုးသား ၂၆ ဦး သေဆုံးခဲ့ပြီး ၄၀ ကျော်ဒဏ်ရာရရှိခဲ့တယ်လို့ ဒေသတွင်းအခြေအနေတွေကိုဖော်ပြနေတဲ့ Wetlet Informational Network က ဇန်နဝါရီ ၁ ရက်မှာ ထုတ်ပြန်ထားပါတယ်။

ဒီစာရင်းဟာ ဒီဇင်ဘာ ၂ ရက်ကနေ ၃၁ ရက်အထိ ကျေးရွာ ၁၄ ရွာထက်မနည်းကို စစ်ကော်မရှင်တပ်က ဗုံးကြဲတိုက်ခိုက်ခဲ့ရာမှာ သေဆုံး၊ ဒဏ်ရာရသူအရေအတွက်ကို စုစည်းထားတာလို့ ဆိုပါတယ်။

ဒီဗုံးကြဲတိုက်ခိုက်မှုအတွင်း သေဆုံးသူ ၂၆ ဦးမှာ နတ်မှော်ဦးရွာက ၅ ဦး၊ ထုံးကြီးရွာက ၄ ဦး၊ ဆည်တောရွာက ၅ ဦး၊ ငါးပတ်ချောင်းရွာမှ ၇ ဦး၊ လိင်ပင်ရွာက ၃ ဦး၊ သစ်ဆိမ့်ရွာက ၂ ဦး တို့ဖြစ်ကြပါတယ်။

“စ**တွေဖက်က ဝက်လက်နယ်ကို PDF တွေမထိန်းချုပ်နိုင်ဖို့နဲ့ သူတို့ထိန်းချုပ်နိုင်ဖို့အတွက် အခုလိုဗုံးကြဲတာ လို့ယူဆပါတယ်။ ကြဲတာက တိုက်ပွဲမရှိတဲ့နေရာတွေပဲ အကြဲခံရတာ။ ပြည်သူတွေအနေနဲ့ ဗုံးခိုကျင်းတွေတူးဖို့နဲ့ လေကြောင်းသတိ အမြဲမပြတ်ရှိနေဖို့လိုတယ်”လို့ ဝက်လက်ဒေသခံ တော်လှန်ရေးတပ်ဖွဲ့ဝင်တဦးက ပြောပါတယ်။

သေဆုံးသူတွေဟာ အမျိုးသမီး ၁၅ ဦးနဲ့ အမျိုးသား ၁၁ ဦးဖြစ်ပြီး အဲဒီထဲမှာ အသက် ၂ နှစ်နဲ့ ၄ နှစ်ကလေးငယ် ၃ ဦး၊ အသက် ၈၀ အရွယ်အမျိုးသား ၁ ဦးနဲ့ ၇၀ အရွယ်အမျိုးသမီး ၁ ဦးတို့ ပါဝင်ကြပါတယ်။

စစ်ကော်မရှင်တပ်က လေကြောင်းတိုက်ခိုက်တာနဲ့ မြေပြင်ကနေပါစစ်ကြောင်းထိုးနေတာကြောင့် ဒေသခံတွေလည်း ဘေးလွတ်ရာကို ထွက်ပြေးတိမ်းရှောင်နေကြရပါတယ်။

လက်ရှိအချိန်ထိ ဝက်လက်မြို့နယ်ကို ဝင်ရောက်နေတဲ့စစ်ကြောင်းကြောင့် ထုံးဘို၊ ရှားကွဲ၊ ရေဂမိုး၊ ရွာသစ်၊ လှေပို့ဆိပ်၊ သစ်ဆိပ့်၊ ကူကြီး၊ ငါးပတ်ချောင်း၊ သရက်ပင်ရွာ၊ ရေလည်မော်၊ မှော်ဦး၊ ကမ်းဖြူ၊ ရွာသာ၊ မင်းရွာတောင်၊ အင်ဒေါင်း၊ ရှိမ်းမကား၊ ငါးရယ်၊ ဆည်တော၊ ငါးတိုက်တောင်စတဲ့ ကျေးရွာတွေက ဒေသခံတွေထွက်ပြေးတိမ်းရှောင်နေကြရတယ်လို့ သိရပါတယ်။

စာတည်း – လင်း

ကျော်ကြီး၊ ဒိန်းဂျား

ပခုက္ကူ၊ ဒီဇင်ဘာ ၁၄၊ ၂၀၂၅။

မကွေးတိုင်း၊ ပခုက္ကူမြို့နယ်၊ ကမ္မမြို့ အမှတ် ၁ ရပ်ကွက်ထဲကို စစ်ကော်မရှင်တပ်တွေပစ်တဲ့ လက်နက်ကြီး ထိမှန်တာကြောင့် ဒေသခံ ၁ ဦးသေဆုံးတဲ့အပြင် နေအိမ်တွေလည်းမီးရှို့ခံခဲ့ရတယ်လို့ ဒေသကာကွယ်ရေးအဖွဲ့ဝင်တွေနဲ့ ဒေသခံတွေဆီက သိရပါတယ်။

ဒီဇင်ဘာ ၁၃ ရက် မနက် ၉ နာရီခန့်မှာ ပခုက္ကူ တပ်မ ၁၀၁ က ထွက်လာတဲ့ အင်အား ၁၀၀ ကျော်ပါ စစ်ကော်မရှင်စစ်ကြောင်းဟာ မြိုင်ဘက်ကနေ ကမ္မမြို့ရဲစခန်းကို ရောက်လာပြီးနောက် လက်နက်ကြီးတွေပစ်ခတ်ခဲ့တာကြောင့် အသက် ၅၄ နှစ်အရွယ် ဦးပုဆိန်ဆိုသူ နေရာမှာသေဆုံးပြီး ဇနီးဖြစ်သူ ပြင်းထန်ဒဏ်ရာရခဲ့ပါတယ်။

” ၆၀ မမ ၁ လုံးတည်းပစ်တာ။ ရွာသစ်ရပ်ကွက်ထဲက ထရံရက်နေကြတဲ့ လင်မယားနေအိမ်ပေါ် ကျတယ်။ အမျိုးသားက ပွဲချင်းပြီးသေဆုံးပြီးတော့ အမျိုးသမီးက ပြင်းထန်ဒဏ်ရာရတယ်။ မနေ့က စျေးတောင် ဘက်နေအိမ်တွေ မီးရှို့တယ်။ ဒီမနက်လည်း မီးထပ်ရှို့တယ်။ “လို့ ဒေသကာကွယ်ရေးအဖွဲ့ဝင်တဦးက ပြောပါတယ်။

မနေ့ကစစ်ကြောင်းဝင်လာချိန်မှာ ကမ္မစျေးတောင်ဘက်ကနေအိမ် ၇ လုံးကို မီးရှို့ခဲ့တဲ့အပြင် ဒီမနက်ပိုင်းမှာ အဲ့ဒီစျေးတောင်ဘက်က နေအိမ် ၅ လုံးကိုမီးရှို့ကာ ၄ မိုင်အကွာရှိ မြစ်ခြေမြို့နယ်၊ ဆားကျင်းကုန်းကျေးရွာကို စစ်ကြောင်းထိုးမီးရှို့ပြီးနောက် ရဲစခန်းထဲကို ပြန်ဆုတ်လာကြတယ်လို့ သိရပါတယ်။

“အခုမနက် ၁၀ နာရီဝန်းကျင်ကလည်း ကမ္မမြို့ဈေးရဲ့တောင်ဘက်က နေအိမ်တွေကို မီးတွေရှို့နေတယ်၊ ပြည်သူနေအိမ်တွေကို မီးရှို့သွားတာ၊ တော်လှန်ရေးတပ်ဖွဲ့ဝင်တွေနဲ့ ပတ်သက်တယ်ဆိုပြီး မီးရှို့သွားတာ၊ ကမ္မမြို့ပေါ်အခြေအနေက ကပ်ကြည့်လို့မရသေးဘူး၊ စစ်ကြောင်းက ရုတ်တရက်ဝင်ချလာတာ၊ မီးရှို့ပြီး ကမ္မမြို့ ရဲစခန်းထဲကို ပြန်ဝင်သွားတယ်။“ လို့ ကမ္မမြို့ခံတဦးက ပြောပါတယ်။

စစ်ကော်မရှင်စစ်ကြောင်းက လက်နက်ကြီးပစ်၊ မီးရှို့နေလို့ ကမ္မမြို့ပေါ်ရပ်ကွက်နေသူတွေနဲ့ ဆားကျင်းကုန်း၊ ချောင်းဦး၊ ရေမျက်၊ ရွာသာအေး၊ ပြည့်အိုင်၊ ရေလာကြီးကျေးရွာတွေက ပြည်သူ ၁၀,၀၀၀ ကျော် ထွက်ပြေးတိမ်းရှောင်နေကြရပါတယ်။

ပြီးခဲ့တဲ့ မေ ၂ ရက်ကလည်း ပခုက္ကူမြို့နယ်၊ မီးသွေးကန်ကျေးရွာမှာ စစ်ကော်မရှင်တပ်ဘက်က ပစ်ခတ်တဲ့ လက်နက်ကြီးကျရောက်ပေါက်ကွဲလို့ ကလေးငယ် ၁ ဦးသေဆုံးပြီး ၃ ဦးဒဏ်ရာရခဲ့သေးတယ်လို့ သိရပါတယ်။

စာတည်း – လင်း

အောင်စိုး၊ ဟယ်သာ

မြေလတ်အသံ၊ နိုဝင်ဘာ ၁၇၊ ၂၀၂၅။

မကွေးတိုင်း၊ မြိုင်မြို့နယ်အနောက်ခြမ်းနဲ့ ပေါက်မြို့နယ်မြောက်ခြမ်းကို စစ်ကော်မရှင်တပ်က နိုဝင်ဘာ ၁၇ ရက်ဒီမနက်ကစပြီး စစ်ကြောင်းထိုးနေတာကြောင့် ကျေးရွာ ၃၀ ကျော်က ဒေသခံတွေထွက်ပြေးနေကြရတယ်လို့ ဒေသခံတွေဆီက သိရပါတယ်။

မြိုင်မြို့နယ်အခြေစိုက် စက်မှု ၂ ကနေ အင်အား ၁၅၀ ခန့်ပါ စစ်ကော်မရှင်စစ်ကြောင်းက မြိုင်မြို့နယ် အနောက်ခြမ်းကတဆင့် ပေါက်မြို့နယ်ထဲကိုဝင်ရောက်နေပြီး နောက်ထပ်အင်အား ၁၀၀ ကျော်ပါ စစ်ကြောင်းကလည်း ပေါက်မြို့နယ်မြောက်ခြမ်းကို စစ်ကြောင်းထိုးနေတာလို့ ဆိုပါတယ်။

“မြိုင်စစ်ကြောင်းက ဒီကနေ့စထိုးတာ။ ပေါက်စစ်ကြောင်းကတော့ မနေ့က မြောက်ခြမ်းကိုစရောက်တာ။ ဒီမနက် ၁၀ နာရီကျော်မှာတော့ မြိုင်ကစစ်ကြောင်းက ပေါက်နယ်ကိုရောက်သွားတယ်။ ပေါက်နယ်၊ ချိုင်စောက်ရွာကိုပေါ့။ ပေါက်ကစစ်ကြောင်းနဲ့ပေါင်းပြီး စစ်ကြောင်းထိုးနေတာ”လို့ ပေါက်ဒေသခံတော်လှန်ရေးတပ်ဖွဲ့ဝင်တဦးက ပြောပါတယ်။

အခုလိုစစ်ကြောင်းထိုးနေတာကြောင့် မြိုင်မြို့နယ်အနောက်ခြမ်းက ကုန်းရွာ၊ ဆိတ်သာ၊ ဝါးရင်းချိုင်၊ ကျွဲတွင်း၊ တောင်ရိုးနဲ့ ပေါက်မြို့နယ်မြောက်ခြမ်းက ဆေးပင်ကြီး၊ ကမ္ဘားဖြူ၊ တဲကြီး၊ ကန်သစ်၊ ထန်းပေါက်ကုန်း အပါအဝင် ကျေးရွာ ၃၀ ကျော်က ဒေသခံ ၃ သောင်းနီးပါး ထွက်ပြေးနေကြရတယ်လို့ သိရပါတယ်။

“ကပစ ၂၄ က ထိုးတဲ့စစ်ကြောင်းက ပေါက်နယ်အနောက်ပိုင်းက ထန်းပင်ချောင်းရွာမှာ ဝင်ရောက်၊ ရွှေဘုံသာ ပျူရွာကထွက်လာတဲ့စစ်ကြောင်းကပေါက် ချိုင်စောက်(အောက်စု)မှာပဲ ဆက်လက်တည်ရှိတယ်၊ မြိုင်စက်မှု ကထွက်လာတဲ့ စစ်ကြောင်းက ပေါက်နယ် ကမ္ဘားဖြူရွာ၊ ကန်သစ်ရွာ၊ ထန်းပေါက်ကုန်း (ဒေသအခေါ် ချောင်းခြောက်တော) သုံးရွာကြားတောကြားထဲမှာ ရောက်နေပါတယ်”လို့ ပေါက်မြို့နယ်ဒေသခံတဦးက ဆိုပါတယ်။

လက်ရှိ ပေါက်မြို့နယ်အတွင်းမှာ တမခ ၁၀၁၊ ကပစ ၂၁ နဲ့ ကပစ ၂၄ က စစ်ကော်မရှင်တပ်တွေ ပူးပေါင်းထားတဲ့ စုစုပေါင်းစစ်ကြောင်း ၃ ကြောင်းရောက်ရှိနေတာလို့ သိရပါတယ်။

စစ်ကြောင်းကြောင့်တိမ်းရှောင်နေကြရတဲ့ စစ်ရှောင်ဒေသခံတွေမှာလည်း တောတွေထဲမှာ ခိုလှုံနေကြရတာကြောင့် စားနပ်ရိက္ခာ၊ ဆေးဝါး၊ အနွေးထည်တွေနဲ့ အမိုးအကာတွေလိုအပ်နေကြတယ်လို့ အညာမြေတပ်ပေါင်းစုမှတပ်ဖွဲ့ဝင်တဦးက ပြောပါတယ်။

“စစ်ရှောင်တွေရဲ့အခက်အခဲကတော့ သူတို့ရဲ့စားရေးသောက်ရေးဖြစ်တယ်။ ရက်ရှည်မဟုတ်သေးတဲ့အတွက် စားရေး၊ သောက်ရေးအကြီးကျယ်မဟုတ်သေးဘူးပေါ့။ အဓိကအခက်အခဲဆိုရင်တော့ တော၊ တောင်တွေထဲမှာ တိမ်းရှောင်ရတဲ့အတွက် စိတ်ပင်ပန်းမှု၊ စိတ်ဒဏ်ရာတွေကတော့ အကြီးမားဆုံး ပြဿနာပေါ့။ ဆောင်းတွင်းဖြစ်တဲ့အတွက် ရာသီဥတုဒဏ်ကိုကောင်းကောင်းခံရတာ ကလေးငယ်တွေ၊ သက်ကြီး ရွယ်အိုတွေ ထိခိုက်လွယ်အုပ်စုတွေမှာ အဓိကပြဿနာဖြစ်တာပေါ့နော်”လို့ ဆိုပါတယ်။

မြိုင် စက်မှု ၂ ကထွက်လာတဲ့စစ်ကြောင်းဟာ အောက်တိုဘာ တတိယပတ်လောက်ကစတင်ပြီး ပခုက္ကူမြို့နယ်နဲ့ မြိုင်မြို့နယ်က ကျေးရွာတွေကို စစ်ကြောင်းထိုးမီးရှို့ခဲ့ပြီး နိုဝင်ဘာ ၁၁ ရက်မှာ ပျူစောထီးအားကောင်းတဲ့ သရက်ကန်ရွာကတဆင့် မြိုင်စက်မှု ၂ ကိုလာချိန် ရွာတန်းရှည်ကျေးရွာအနီးမှာ ဒေသခံ ၅ ဦးကိုဖမ်းဆီးခဲ့ပါသေးတယ်။

အဲ့ဒီနောက် နိုဝင်ဘာ ၁၂ ရက်မနက်ပိုင်းမှာ မြိုင်အခြေစိုက် စက်မှု ၂ ကနေထွက်လာပြီးနောက် ၃ မိုင်အကွာ ဝက်ပုတ်ရွာအနီးမှာ ဖမ်းဆီးခံထားရသူတွေထဲက အသက် ၃၄ နှစ်အရွယ် မငယ်တာနဲ့ ၄၉ နှစ်အရွယ် ကိုကံစိန်တို့ကိုသတ်ကာ နေအိမ် ၂ လုံးကိုလည်း မီးရှို့ပြီး စက်မှု ၂ ကိုပြန်ဝင်ပြီးနောက် တခုတကြိမ်ပြန်လည် စစ်ကြောင်းထွက်လာတာလည်း ဖြစ်ပါတယ်။

စာတည်း – လင်း