စစ်ကောင်စီတပ်စခန်း

ပဲခူး၊ ဇွန် ၂၅၊ ၂၀၂၅။

ပဲခူးတိုင်း၊ ညောင်လေးပင်၊ ကျောက်တံခါး၊ ဖြူးမြို့နယ်တွေအတွင်းက ရန်ကုန်-မန္တလေး အမြန်လမ်းဟောင်းပေါ်ရှိ စစ်ကောင်စီတပ်ဖွဲ့စခန်း ၉ခုကို တပြိုင်နက်တိုက်ခိုက်ခဲ့တယ်လို့ အမျိုးသားညီညွတ်ရေးအစိုးရ- NUG ကာကွယ်ရေးဝန်ကြီးဌာနက ထုတ်ပြန်ပါတယ်။

အဆိုပါစခန်းတွေကို ဇွန် ၂၅ ရက် ဒီကနေ့မနက်အစောပိုင်းမှာ တပြိုင်နက်တိုက်ခိုက်ခဲ့တာဖြစ်ပြီး တိုက်ပွဲတွေအတွင်း စစ်ကောင်စီတပ်ဖွဲ့ဝင် ၂၀ ဦးထက်မနည်းသေဆုံး၊ ရဲအုပ် ၁ ဦးအပါ စစ်သုံ့ပန်း ၃ ဦးကို ဖမ်းဆီးရရှိခဲ့ပြီး တော်လှန်ရေးတပ်ဖွဲ့တွေဘက်ကလည်း ၁ ဦး သေဆုံး ၂ ဦး ထိခိုက်ဒဏ်ရာရခဲ့တယ်လို့ ဖော်ပြပါတယ်။

အဆိုပါစခန်း ၉ ခုအနက် ညောင်လေးပင်နဲ့ကျောက်တံခါးမြို့အကြား တော်ဝိကျေးရွာစစ်ကောင်စီတပ်စခန်းကို ဇွန် ၂၅ ရက်မနက် ၁ နာရီမှာဝင်ရောက်တိုက်ခိုက်ခဲ့ပြီး မနက် ၂ နာရီမှာ အပြီးသတ်သိမ်းပိုက်နိုင်ခဲ့တယ်လို့ ပဲခူးရှေ့ခြမ်းမှာ စစ်ရေးလှုပ်ရှားနေတဲ့ တော်ဝင်ဒေါင်းတပ်ရင်းက ပြောပါတယ်။

အင်အား ၅၀ ခန့်ရှိ တော်ဝိစစ်တပ်အထိုင်စခန်းကို ၁ နာရီအကြာတိုက်ခိုက်ခဲ့ရပြီး တိုက်ပွဲတွေအတွင်း စစ်ကောင်စီဘက်က ၁၃ ဦးသေဆုံးပြီး ၃ ဦး အရှင်ဖမ်းမိကာ ကျန်စစ်ကောင်စီတပ်ဖွဲ့တွေဟာ စခန်းစွန့်ခွာထွက်ပြေးသွားခဲ့တယ်လို့ ဆိုပါတယ်။

“ သူတို့ကရွာထိပ်ဘုန်းကြီးကျောင်းကို အခြေပြုပြီးတော့ အထိုင်ချထားတာ၊ အဲဒီအထိုင်ချထားတဲ့နေရာတွေကို ကျနော်တို့ အဖွဲ့တွေခွဲပြီးရှင်းလင်းခဲ့တာဆိုတော့ သူတို့အခြေပြုနေထိုင်တဲ့နေရာတွေကိုအကုန်လုံး တိုက်ခိုက်ချေမှုန်းနိုင်ခဲ့တယ်၊ ပြီးတော့ ကျနော်တို့မီးရှို့ဖျက်ဆီးခဲ့တယ်၊ စုစုပေါင်း သေဆုံးတာက ၁၃ ဦး သူတို့ရဲ့ရုပ်အလောင်းတွေကိုလည်း အဲ့ဒီနားမှာပဲမီးရှို့ဖျက်ဆီးခဲ့တယ်” လို့ တော်ဝင်ဒေါင်းတပ်ရင်းသတင်းနဲ့ပြန်ကြားရေးတာဝန်ခံက မြေလတ်အသံကို ပြောပါတယ်။

ဒါ့အပြင် တော်ဝိစခန်းသိမ်းတိုက်ပွဲအတွင်း ရဲအုပ် ၁ ဦး၊ ရဲအရာခံဗိုလ် ၁ ဦးနဲ့ စစ်ကောင်စီတပ်သား ၁ ဦး ကို အရှင်ဖမ်းမိခဲ့ကာ ၎င်းစခန်းက MA3 ၁ လက်၊ MA 13 ၁ လက်၊ ၆ လုံးပြူးသေနတ် ၂ လက်၊ BA 63 (G3) ၃ လက်၊ ၆၀ မမ ကွန်မန်ဒိုစိန်ပြောင်း ၁ လက်၊ ၄၀ မမ ဗုံးပစ်လောင်ချာ ၁ လက်နဲ့ ကျည်မျိုးစုံအပါ စခန်းအားလုံးကနေ စုစုပေါင်း လက်နက်ကြီး၊ လက်နက်ငယ် ၁၆ လက် ခဲယမ်း၊ စစ်သုံးပစ္စည်းအများအပြားသိမ်းဆည်းနိုင်ခဲ့တယ်လို့ သိရပါတယ်။

တိုက်ခိုက်မှုကို အမှတ် ၂ စစ်ဆင်ရေးနယ်မြေ၊ တိုင်းစစ်ဌာန(ပဲခူး)၊ ဗျူဟာ ၂၄ နဂါးနီစစ်ကြောင်း၊ အာဠာဝက တပ်ရင်း၊ အမှတ် ၃၅၀၃ တပ်ရင်း၊ ဖြူး(ပကဖ)၊ ဗျူဟာ ၂၅၊ အမှတ် ၃၇၀၂ တပ်ရင်း၊ Spring Warriors Column၊ KNLA တပ်ရင်း ၉၊ ဗျူဟာ ၂၆၊ တော်ဝင်ဒေါင်းတပ်ရင်း၊ တောကျီးကန်းတပ်ရင်းတွေက ပူးပေါင်း တိုက်ခိုက်ခဲ့တာလို့ ကာကွယ်ရေးဝန်ကြီးဌာနက ထုတ်ပြန်ထားပါတယ်။

စာတည်း – ဟိန်းစံ

မြေလတ်အသံ၊ ဇွန် ၁၅၊ ၂၀၂၅။

ပဲခူးတိုင်း၊ ကျောက်ကြီးမြို့နယ်၊ အုန်းပင်စုကျေးရွာရှိ စစ်ကောင်စီတပ်စခန်းကို တိုက်ခိုက်သိမ်းပိုက်ခဲ့ပြီး တိုက်ပွဲအတွင်း စစ်ကောင်စီတပ်ဖွဲ့ဝင် ၈ ဦးသေဆုံးပြီး လက်နက်ခဲယမ်းတွေသိမ်းဆည်းရရှိခဲ့တယ်လို့ ဇွန် ၁၅ ရက်ဒီကနေ့မှာ အထူးကွန်မန်ဒိုတပ်ရင်း -P29914 ကထုတ်ပြန်ပါတယ်။

စစ်ကောင်စီတပ်ဖွဲ့ဝင်အင်အား ၃၀ ကျော်နဲ့ ၁ နှစ်ကျော်ကြာတပ်စွဲထားတဲ့ အုန်းပင်စုရွာစခန်းကို တော်လှန်ရေးပူးပေါင်းတပ်ဖွဲ့တွေက ဇွန် ၆ ရက်နေ့လယ် ၃ နာရီကျော်မှာ သိမ်းပိုက်ရရှိခဲ့တာလို့ ဆိုပါတယ်။

“ရွာကတော့ ရွာသားတွေ မရှိတော့ပါဘူး။ စကစ ထိုင်ပြီးကတည်းကပေါ့။ သူတို့အထိုင်ချတာကတော့ သိပ်မကြာသေးပါဘူး။ ၁ နှစ်ကျော်လောက်ပဲရှိမယ်။ သိမ်းပိုက်ရရှိခဲ့တာကတော့ ပုံမှန်အတိုင်းပဲ။ ချေမှုန်းရေးနဲ့ပါပဲ။ မျက်မြင်အတည်ပြုပါတယ် သေဆုံးကိုတော့။”လို့ အထူးကွန်မန်ဒိုတပ်ရင်း – P29914 မှ တာဝန်ရှိသူတဦးက ပြောပါတယ်။

တိုက်ပွဲဖြစ်ပြီး ၁ နာရီခွဲအကြာမှာ စခန်းရှိစစ်ကောင်စီတပ်ဖွဲ့ဝင်တွေက ကျောက်ကြီးမြို့ပေါ်ကို ထွက်ပြေးခဲ့ကြတယ်လို့ ဆိုပါတယ်။

တိုက်ပွဲအတွင်း G3 ကျည် ၅၈၀ တောင့်၊ ၄၀ မမ ၁၀ လုံး၊ RPG ပို့ယမ်း ၁၁ ခု၊ RPG အသီး ၉ လုံး၊ MA ခွင်းဗုံး ၇ လုံး၊ RPG 7 ၁ လက်၊ MA11 ၁ လက်၊ လက်ပစ်ဗုံး ၅ လုံး၊ ၁၄ မိုင်း ၇လုံး၊ ရှေ့ထွက်မိုင်း ၃ လုံး၊ MA ကျည်ဘောက် ၃ ဘောက်၊ မိုင်းရှာစက် ၁ လုံး နဲ့ စစ်အသုံးအဆောင်ပစ္စည်းတွေ သိမ်းဆည်းခဲ့တယ်လို့ သိရပါတယ်။

ကျောက်တံခါးနဲ့ ကျောက်ကြီးမြို့ကြားရှိ အုန်းပင်စုကျေးရွာစစ်ကောင်စီတပ်စခန်းကို အထူးကွန်မန်ဒိုတပ်ရင်း – P29914 ၊ KNLA တပ်ရင်း ၈၊ ၉၊ အာဋ္ဌာဝက စစ်ကြောင်း၊ ၃၇၀၂ တပ်ရင်း၊ ရန်ကုန်ပကဖ၊ ဧရာဝတီပကဖတို့ ပူးပေါင်းတိုက်ခိုက်ခဲ့တာလို့ သိရပါတယ်။

စာတည်း – လင်း

အုတ်တွင်း၊ ဇွန် ၇၊ ၂၀၂၅။

ပဲခူးတိုင်း၊ အုတ်တွင်းမြို့နယ်၊ အထက်ခပေါင်းဆည်ရေလွှဲတမံမှာ အထိုင်ချတပ်စွဲထားတဲ့ စစ်ကောင်စီဂိတ်စခန်းကို တိုက်ခိုက်မီးရှို့ခဲ့ပြီးနောက် လက်နက် ၄ လက်နဲ့ ခဲယမ်းတွေကို သိမ်းဆည်းခဲ့တယ်လို့ ဇွန် ၆ ရက်မှာ A.D.G Brothers အဖွဲ့က ထုတ်ပြန်ပါတယ်။

ခပေါင်းဆည်ပေါ်မှာ စစ်အာဏာမသိမ်းမီအချိန်ကတည်းက စစ်ကောင်စီတပ်ဖွဲ့ဝင် ၁၀ ဦးကျော်နဲ့ တပ်စွဲစခန်းချထားတာဖြစ်ပြီး အဲဒီစခန်းကို ဇွန် ၃ ရက်မနက် ၅ နာရီကျော်မှာ တိုက်ခိုက်ခဲ့တာလို့ ဆိုပါတယ်။

“တိုက်ပွဲက ၂ နာရီလောက်ကြာခဲ့တယ်။ သူတို့(စကစ)တွေက စခန်းဘေးကတောထဲကိုပြေးဆင်းတာ အချိန်မရတော့လို့ မလိုက်တော့တာ။ စခန်းနားမှာတော့ အလောင်း ၃ လောင်းတွေ့တာ။ မိမိတို့ဘက်ကတော့ ၂ ယောက်ဒဏ်ရာရတယ်မစိုးရိမ်ရဘူး”လို့ A.D.G Brothers မှ တာဝန်ရှိသူတဦးက ပြောပါတယ်။

စစ်ကောင်စီတပ်သားတွေ စခန်းစွန့်ခွာထွက်ပြေးခဲ့ပြီးနောက် ရှင်းလင်းရေးဝင်လုပ်ချိန် စစ်ကောင်စီတပ်ဖွဲ့ဝင် အလောင်း ၃ လောင်း၊ G3 သေနတ် ၃လက်နဲ့ MA 11 သေနတ် ၁ လက်၊ အီနာဂါ ၅ လုံး၊ လက်ပစ်ဗုံး ၁ လုံး၊ ကျည်ကာအင်္ကျီ ၂ ထည်တို့ကို သိမ်းဆည်းရရှိခဲ့ကာ စခန်းကိုမီးရှို့ခဲ့တယ်လို့ သူကဆိုပါတယ်။

တိုက်ပွဲဖြစ်ပြီးနောက် ဇွန် ၄ ရက်မှာ ခပေါင်းဆည်စခန်းအနီးရှိ အမှတ် ၆ တပ်မတော်တန်းမြင့် လေ့ကျင့်ရေးကျောင်း၊ ခလရ ၄၈ တပ်တို့က စစ်ကောင်စီတပ်ဖွဲ့ဝင် ၆၀ ခန့်နဲ့ စစ်ကြောင်းထိုးလာချိန် မိုင်းဆွဲတိုက်ခိုက်ခဲ့ရာ ၈ ဦးသေဆုံးခဲ့တာကို မျက်မြင်တွေ့ခဲ့ရတယ်လို့ အထက်ပါတာဝန်ရှိသူက ပြောပါတယ်။

အဆိုပါစစ်ကြောင်းဟာ နောက်ထပ်အင်အားထပ်ဖြည့်ပြီး အင်အား ၁၀၀ ခန့်နဲ့ ဇွန် ၇ ရက်ဒီကနေ့အထိ ခပေါင်းဆည်ဘက်ကို စစ်ကြောင်းထိုးလာနေတာကြောင့် တိုက်ပွဲဖြစ်မယ့်အခြေအနေရှိနေတယ်လို့ သိရပါတယ်။

စာတည်း – လင်း

မုံရွာ၊ ဧပြီ ၁၈၊ ၂၀၂၃။

စစ်ကိုင်းတိုင်း၊ မုံရွာမြို့၊ အောင်ဇေယျရပ်ကွက် တောင်ကုန်းပေါ်မှာ တပ်စွဲထားတဲ့ စစ်ကောင်စီတပ်ကို လက်နက်ကြီးတွေနဲ့ တိုက်ခိုက်ခဲ့လို့ စစ်ကောင်စီတပ်သားတွေ ထိခိုက်သေဆုံးရှိနိုင်တယ်လို့ သိရပါတယ်။

ဧပြီလ ၁၈ ရက် ဒီကနေ့မနက်အစော ၃ နာရီလောက်မှာ အင်အား ၅၀ လောက်နဲ့ တပ်စွဲထားတဲ့ စစ်ကောင်စီစခန်းကို ၆၀ မမ၊ ၈၀ မမ၊ ၁၂၀ မမ အလုံးရေ ၃၀ ကျော်နဲ့ အချိန်နာရီဝက် အကြာသွားရောက်တိုက်ခိုက်ခဲ့တာလို့ Salingyi Border Task Force တာဝန်ရှိသူက ပြောပါတယ်။

“လက်နက်ကြီးတွေနဲ့ တော်တော်လေးပစ်ပြီးချိန်မှ သူတို့(စစ်ကောင်စီ)ဘက်က ပြန်ပစ်သလို၊ တောင်အောက်မှာရှိနေတဲ့ စကစနောက်တစ်ဖွဲ့က ရှေ့ဆက်တိုးလာတော့ ကျနော်တို့ဘက်မှာ သေနတ် အစစ်က ၂ လက်ပဲရှိလို့ ယှဥ်မပစ်နိုင်လို့ ပြန်ဆုတ်လာရတယ်” လို့ ပြောပါတယ်။

အဲဒီတိုက်ခိုက်မှုမှာ စစ်ကောင်စီဘက်က ထိခိုက်သေဆုံးမှုရှိနိုင်ပေမယ့် အခြေအနေအသေးစိတ်သိရဖို့ စုံစမ်းနေဆဲဖြစ်ပြီး ဒေသကာကွယ်ရေး ပူးပေါင်းအဖွဲ့တွေဘက်က လက်နက်ကြီးပစ်ခတ်ချိန် မတော်တဆမှုဖြစ်လို့ ရဲဘော် ၁ ဦး မျက်လုံးမှာ မစိုးရိမ်ရ ထိခိုက်ဒဏ်ရာရခဲ့တယ်လို့ ဆိုပါတယ်။

“ဗုံးသီးကို လက်နက်ကြီးပြောင်းထဲထည့်ချိန် အဆုံးထိမရောက်ဘဲ တဝက်ကနေ ဗုံးသီးပြန်ထွက်လာတော့ ဗုံးထည့်တဲ့ရဲဘော်က ရှောင်ချိန်မရလိုက်ဘဲ ဗုံးသီးနဲ့ပွတ်မိတာ” လို့ ပြောပါတယ်။

အဲ့ဒီစစ်ကောင်စီတပ်စွဲထားတဲ့နေရာဟာ ချင်းတွင်းတံတားအနောက်ဘက် စစ်မှုထမ်းဟောင်းတွေအတွက် ရပ်ကွက်အသစ် လုပ်ပေးထားတဲ့နေရာဖြစ်ပြီး လမ်းသွားလမ်းလာတွေကို စစ်ဆေးတာနဲ့ စစ်ကောင်စီတပ်တွေက အနီးအနားကျေးရွာတွေကို စစ်ကြောင်းထိုးချိန် လက်နက်ကြီးတွေနဲ့ ထောက်ထားပေးတဲ့နေရာဖြစ်ပြီး စစ်ရေးအရအရေးပါတဲ့နေရာတစ်ခုဖြစ်လို့ သွားရောက်တိုက်ခိုက်ခဲ့တာလို့ သိရပါတယ်။

အဲဒီတိုက်ခိုက်မှုကိုတော့ Salingyi Border Task Force – SBTF (ပကဖ)၊ Eagle Defense Force-EDF ၊ ယက္ခညီနောင် /GTF တပ်ခွဲ (၂)၊ မဲမှောင်ပြောက်ကျားတပ်ဖွဲ့၊ အာဠာဝက အပါအဝင် မဟာမိတ်ပူးပေါင်းတပ်တွေက စုပေါင်းတိုက်ခိုက်ခဲ့တယ်လို့ သိရပါတယ်။

စာတည်း – ရင်ငြိမ်း

စစ်ကိုင်း၊ ဖေဖော်ဝါရီ ၁၁၊ ၂၀၂၃။

စစ်ကိုင်းတိုင်း၊ ကန့်ဘလူမြို့နယ်၊ ညောင်ကိုင်းကျေးရွာမှာ အထိုင်ချတပ်စွဲထားတဲ့ စစ်ကောင်စီရဲ့ တပ်စခန်းတခုကို ဖေဖော်ဝါရီလ ၁၀ ရက် မနေ့ကမနက် ၁၀ နာရီလောက်မှာ ဒေသခံကာကွယ်ရေးတပ်ဖွဲ့တွေက ဝင်ရောက်ဖျက်ဆီးခဲ့တယ်လို့ သိရပါတယ်။

ညောင်ကိုင်းရွာမှာ ၅ လနီးပါး အထိုင်ချတပ်စွဲထားတဲ့ အဲ့ဒီတပ်စခန်းကို သွားရောက်တိုက်ခိုက်ချိန် စစ်ကောင်စီတပ်ဖွဲ့ဝင် တဦးလည်း သေဆုံးခဲ့ပြီး အများအပြား ထိခိုက်ဒဏ်ရာရသွားတယ်လို့ Kanbalu Underground Warriors တပ်ဖွဲ့ဝင် တဦးက မြေလတ်အသံကို ပြောပါတယ်။

“သူတို့ (စစ်ကောင်စီ)အထိုင်ချထားတာက၂ နေရာပေါ့။ ရွာပြင်မှာက ဂိတ်ချထားတယ်။ ရွာထဲမှာက အထိုင်ချထားတယ်။ ရွာထဲကို ပြောက်ကျားနည်းနဲ့ ဝင်တိုက်ပြီး စခန်းတွေကို မီးရှို့နိုင်ခဲ့တယ်။ စကစ တဦးလည်း သေသွားတယ်” လို့ ဆိုပါတယ်။

အဲ့ဒီစခန်းကို တိုက်ခိုက်ချိန်မှာ မဟာမိတ်ပူးပေါင်းတပ်ဖွဲ့တွေက လက်နက်ကြီး၊ လက်နက်ငယ်တွေကို အသုံးပြုခဲ့တဲ့အပြင် ဒရုန်းတွေနဲ့ပါ ပစ်ခတ်ခဲ့တယ်လို့ အထက်ပါတပ်ဖွဲ့ဝင်က ဆိုပါတယ်။

ဒီစစ်ဆင်ရေးကို Kanbalu Underground Warriors၊ MPF U.18၊ မြေပြင်လှုပ်ရှားညီနောင်များ၊ ကန့်ဘလူမြို့နယ် L – PDF မဟာမိတ်အဖွဲ့တွေနဲ့ ပူးပေါင်းတိုက်ခိုက်ခဲ့တာဖြစ်ပြီး ပစ်ခတ်ချိန် ၄ နာရီဝန်းကျင်လောက် ကြာခဲ့တယ်လို့ သိရပါတယ်။

ဒါ့အပြင် Kanbalu Underground Warriors တပ်ဖွဲ့အနေနဲ့ ညောင်ကိုင်းကျေးရွာက စစ်ကောင်စီတပ်စခန်းကို သွားရောက်ပစ်ခတ်တာဟာ ၃ ကြိမ်ထက်မနည်း ရှိပြီလို့လည်း ဆိုပါတယ်။