မုံရွာ၊ ဇွန် ၁၃၊ ၂၀၂၅။

စစ်ကိုင်းတိုင်း၊ မုံရွာမြို့မှာ ဇွန် ၂ ရက်ညနေပိုင်းကစပြီး စစ်ကောင်စီတပ်ဖွဲ့ဝင်တွေက စစ်မှုထမ်းဖို့ အမျိုးသားတွေကို ပြန်လည်ဖမ်းဆီးနေတယ်လို့ ဒေသခံတွေဆီက သိရပါတယ်။

မုံရွာမြို့ပေါ် လမ်းမကြီးတွေနဲ့ မြို့ဝင်မြို့ထွက်၊ ရပ်ကွက်ကလမ်းကြားတွေကအစ လမ်းသွားလမ်းလာ အမျိုးသားတွေကိုစစ်မှုထမ်းဖို့ စစ်ကောင်စီတပ်ဖွဲ့ဝင်တွေက စစ်ကားနဲ့ အုပ်စုဖွဲ့ကာဖမ်းဆီးမှုတွေ လုပ်ဆောင်လာတယ်လို့ ဆိုပါတယ်။

“မနက်နေ့ည မရွေးဘူး စစ်ကားဖင်ထိုးပြီး ဖမ်းတာ။ ဆီဆိုင်ထဲ ဆီဖြည့်နေရင်းကို ဆွဲခံရတာဆိုတော့ မလုံခြုံတော့ဘူး။ လမ်းပေါ်မြို့ထဲမှာဆို တော်ရုံ လူငယ်တွေ သွားသွားလာလာ မလုပ်ရဲကြတော့ဘူး။ ဘီယာဆိုင်၊ လက်ဘက်ရည်ဆိုင်တွေလည်း လူငယ်လူလတ်ပိုင်းတွေ မရှိဘူး လူကြီးပိုင်းတွေဘဲ တွေ့ရတော့တာ။”လို့ အသက် ၄၀ ကျော်အရွယ် မုံရွာမြို့ခံအမျိုးသားတဦးက မြေလတ်အသံကို ပြောပါတယ်။

မတ်လပိုင်း ၂၈ နေ့ ငလျင်လှုပ်ခတ်ပြီးနောက်ပိုင်းမှာတော့ မုံရွာမြို့မှာ စစ်မှုထမ်းဖို့ပေါ်တာဆွဲ ဖမ်းဆီးမှုတွေကို ယာယီရပ်နားထားခဲ့ပေမယ့် ၂ လကျော်အကြာမှာတော့ ယခုလို ဖမ်းဆီးမှုတွေ ပြန်လည်လုပ်ဆောင်လာတာဖြစ်တယ်လို့ ဒေသခံတွေက ဆိုပါတယ်။

ဇွန် ၂ ရက်ညနေပိုင်းမှာ မြဝတီရပ်ကွက်၊ ဗိုလ်တေဇလမ်းပေါ်မှာ ဆီဖြည့်နေတဲ့ ဒယ်လီပို့ အမျိုးသား ၂ ဦး၊ ဇွန် ၄ ရက်မှာ ရေဦးဆန်ဆိုင်ဂိတ်ကိုဖြတ်သွားတဲ့ သက္ကယ်ကျင်းရွာခံ အမျိုးသား ၂ ဦး၊ ဇွန် ၉ ရက်မှာ ချမ်းမြသာစည်နဲ့ ဘုန်းစိုးရပ်ကွက်ရှိ အရက်ဆိုင် ၂ ဆိုင်က အမျိုးသား ၆ ဦး၊ ဇွန် ၁၀ ရက်မှာ ပေ ၈၀ လမ်းအတွင်း ဆိုင်ကယ်စီးအမျိုးသား ၁ ဦးနဲ့ သလ္လာကျောင်းအနီးအမျိုးသား ၂ ဦး စုစုပေါင်း အမျိုးသား ၁၃ ဦးဝန်းကျင်စစ်မှုဖမ်းဖို့ ဖမ်းဆီးခံလိုက်ရတယ်လို့ မြေလတ်အသံက စုံစမ်းသိရှိရပါတယ်။

ဖမ်းဆီးခံရသူတွေဟာ အသက် ၂၀ ဝန်းကျင်အရွယ်ကနေ ၃၀ ကျော် ဝန်းကျင်အရွယ်တွေဖြစ်ပြီး ဖမ်းဆီးခံရတဲ့နေ့မှာတော့ မုံရွာမြို့ရဲ့ စစ်ကြောရေးနေရာဖြစ်တဲ့ မြို့တော်ခန်းမထဲမှာထားလေ့ရှိတယ်လို့ သိရပါတယ်။

“မနက်အစောပိုင်းဆို စစ်ကားနဲ့ ဖမ်းဖမ်းလာတယ်။ ဘယ်ကနေ ဘယ်လိုကို ဖမ်းလာများမသိဘူး။ ညနေဆိုလည်း စစ်ကားကခန်းမရှေ့ထိုးရပ်ပြီး ဖမ်းလာတဲ့သူတွေကို အော်ငေါက်ဆဲဆို ဆင်းခိုင်းတာ။ မိုးရွာရွာ နေပူပူ ဖမ်းချင်တဲ့နေ့ ထွက်ဖမ်းနေကြတာဘဲ။” လို့ မြို့ခံတဦးက မြေလတ်အသံကို ပြောပါတယ်။

ဖမ်းဆီးခံရသူတွေကို မြို့တော်ခန်းမထဲမှာ နှစ်ညအိပ်ထားရှိပြီးနောက်မှာတော့ မုံရွာမြို့အနောက် မြောက်တိုင်းစစ်ဌာနချုပ် – နမခ ဆီကို ပို့ဆောင်စေလွှတ်တယ်လို့ သူက ဆက်ပြောပါတယ်။

အခုရက်ပိုင်း မုံရွာမြို့ပေါ်မှာ စစ်မှုထမ်းဖို့ပေါ်တာဆွဲ ဖမ်းဆီးမှုတွေ လုပ်ဆောင်နေတာကြောင့် မြို့ပေါ်က လူငယ်လူလတ်ပိုင်း အမျိုးသားတွေတင်မကဘဲ သက္ကယ်ကျင်း၊ လယ်ဇင်၊ အောင်သာ စတဲ့အနီးနားဝန်းကျင် ကျေးရွာကရွာသားတွေပါ မြို့ပေါ် အလုပ်မလာကြဘူးလို့လည်း အလုပ်ပွဲရုံတွေဆီက သိရပါတယ်။

စာတည်း- လင်း

မြေလတ်အသံ၊ ဇွန် ၁၃၊ ၂၀၂၅ ။

စစ်ကိုင်းတိုင်း၊ ယင်းမာပင်မြို့နယ်၊ ဝမ်ပေါင်ကြေးနီစီမံကိန်းအနီးက ကျေးစာကျရွာကို စစ်ကောင်စီပူးပေါင်းတပ်ဖွဲ့က ဝင်ရောက်စီးနင်းပြီး ရွာခံ ၄၀ နီးပါးကို ဖမ်းဆီးခေါ်ဆောင်သွားတယ်လို့ ဒေသခံတွေထံကသိရပါတယ်။

ဇွန် ၁၃ ရက် ဒီကနေ့မနက် ၈ နာရီလောက်မှာ စစ်ကောင်စီတပ်နဲ့ရဲတပ်ဖွဲ့ပူးပေါင်းအင်အား ၁၀၀ ကျော်ဟာ ကျေးစာကျရွာအတွင်း ဝင်ရောက်လာပြီး ကျေးရွာအတွင်းတွေ့ရှိတဲ့ အသက်ငယ်ပိုင်း အမျိုးသား၊ အမျိုးသမီးတွေကို ဖမ်းဆီးသွားတာလို့ ဆိုပါတယ်။

“ ရွာအနောက်ဖက်ပေါက်ကနေ ခြေသံလုံလုံနဲ့ဝင်လာပြီး ရွာထဲက လမ်းထွက်နေတဲ့သူ၊ ခြံဝန်းထဲတွေ့တဲ့သူ မိန်းကလေး၊ ယောကျာ်းလေးအကုန်ဖမ်းတာ။ တချို့လည်းထွက်ပြေးလို့ လိုက်ပစ်တယ်။ ဖမ်းသွားတာ သက်ငယ်ပိုင်းတွေများတယ်၊ အသက် ၄၀ ကျော် ဦးလေးတယောက်လောက်ပဲပါတယ်” လို့ ရွာခံအမျိုးသားတဦးက မြေလတ်အသံကို ပြောပါတယ်။

အဆိုပါစစ်ကြောင်းဟာ လက်ရှိမှာ မြောက်ယမားတံတားအနီး ပုသိမ်-မုံရွာလမ်းပေါ်ကို ပြန်လည်ရောက်ရှိသွားပြီဖြစ်ကာ ဖမ်းဆီးခေါ်ဆောင်သွားသူတွေကို ဓားစာခံလုပ်ပြီး လမ်းကင်းလုံခြုံရေးယူနေတယ်လို့ ဆိုပါတယ်။

“ မနေ့က နမခမှာ ရောက်နေတဲ့ ကြေးနီသယ်မယ့်ကားတွေက ခုဝမ်ပေါင်ကြေးနီစီမံကိန်းထဲကို ထွက်လာပြီလို့ သိရတယ်။ အဲ့ဒီကားတွေ အတိုက်ခံရမှာစိုးလို့ သူတို့လမ်းကင်းယူတာမှာ ရွာသားတွေကို ဓားစာခံလုပ်ပြီး ဖမ်းသွားတာမျိုး” လို့ အထက်ပါရွာခံက သုံးသပ်ပြောပါတယ်။

ဖမ်းဆီးခေါ်ဆောင်သွားတဲ့စစ်ကြောင်းဟာ မုံရွာ နမခစစ်ကောင်စီတပ်၊ ဝမ်ပေါင်ကြေးနီစီမံကိန်းမှာတပ်စွဲထားတဲ့ စစ်ကောင်စီတပ်ဖွဲ့နဲ့ ယင်းမာပင်အခြေစိုက် ရဲတပ်ရင်း ၂၈ က ရဲတပ်ဖွဲ့ပူးပေါင်းစစ်ကြောင်းဖြစ်တယ်လို့ သိရပါတယ်။

လက်ရှိမှာ ၎င်းစစ်ကြောင်းကြောင့် ဝမ်ပေါင်ကြေးနီစီမံကိန်းအနီးကျေးရွာတွေဖြစ်တဲ့ ဆားလင်းကြီးမြို့နယ် ဂုဏ်တော၊ ဒုန်းတော၊ ယင်းမာပင်မြို့နယ် ၊ ကျေးစာကျ၊ ပိန်းနွယ်ချောင်၊ အုံတုံပင်၊ ထန်းတောကြီးစတဲ့ ကျေးရွာတွေ ရွာလုံးကျွတ်ထွက်ပြေးတိမ်းရှောင်နေရတယ်လို့ သိရပါတယ်။

မြေလတ်အသံ၊ ဇွန် ၁၀၊ ၂၀၂၅။

စစ်ကိုင်းတိုင်း၊ ပုလဲမြို့နယ်အတွင်း တိုက်လေယာဥ် ၁ စီး ရုတ်တရက်စက်ချို့ယွင်းပြီး မြေပြင်ပေါ် ပျက်ကျခဲ့တယ်လို့ စစ်ကောင်စီသတင်းထုတ်ပြန်ရေးအဖွဲ့က ထုတ်ပြန်လာပါတယ်။

ဇွန် ၁၀ ရက် ဒီကနေ့ နေ့လယ် ၁၂ နာရီ ၁၅ မိနစ်မှာ လေ့ကျင့်ပျံသန်းမှုပြုလုပ်နေတဲ့ တိုက်လေယာဥ်ဟာ ပုလဲမြို့နယ်၊ မင်းတိုင်ပင်ရွာအရှေ့ဘက် မီတာ ၂,၀၀၀ ခန့်အကွာ စပါးစေ့ရွာအနီးမှာ စက်ချို့ယွင်းပျက်ကျခဲ့တာလို့ ဆိုပါတယ်။

ပုလဲမြို့နယ် ကန်ဒေါင့်နယ်မြေရဲစခန်းကို တော်လှန်ရေးတပ်ဖွဲ့တွေက ယခုလဆန်းပိုင်းကစတင်ကာ တိုက်ခိုက်နေတာကြောင့် စစ်ကောင်စီတပ်က လေကြောင်းနေ့စဥ်ဗုံးကြဲတိုက်ခိုက်နေတာ ၉ ရက်ရှိပြီလို့ ဒေသခံတွေဆီက သိရပါတယ်။

အခုပျက်ကျတဲ့ တိုက်လေယာဥ်ဟာ လေ့ကျင့်ပျံသန်းတဲ့တိုက်လေယာဥ်မဟုတ်ဘဲ ပုလဲနယ်ထဲက တိုက်ပွဲတွေကို လေကြောင်းကနေဗုံးလာကြဲတဲ့တိုက်လေယာဥ်ဖြစ်ပြီး မင်းတိုင်ပင်ရွာပေါ်ကနေ အနိမ့်ပျံသန်းစဥ်မှာ ပွိုင့်ဖိုက်စက်သေနတ်တွေနဲ့ ဝိုင်းဝန်းပစ်ခတ်ခဲ့လို့ ပျက်ကျခဲ့တာဖြစ်တယ်လို့ မြေပြင်တပ်ဖွဲ့ဝင်တွေက ပြောပါတယ်။

စစ်ကောင်စီထုတ်ပြန်ချက်မှာ တိုက်လေယာဥ်တစီး စက်ချို့ယွင်းမြေပြင်ပေါ်ပျက်ကျတယ်လို့ ဖော်ပြထားပြီး တိုက်လေယာဥ်အမျိုးအစားကိုတော့ ဖော်ပြမထားပါဘူး။

ပြီးခဲ့တဲ့မေလနောက်ဆုံးပတ်မှာလည်း ကချင်ပြည်နယ်၊ ဗန်းမော်မြို့ စကခ ၂၁ ကို စစ်ကူလာပို့တဲ့ စစ်ကောင်စီရဲ့ သယ်ယူပို့ဆောင်ရေးရဟတ်ယာဥ် Mi 17 ၃ စီး ကို KIA ပူးပေါင်းတပ်ဖွဲ့တွေက ပစ်ချခဲ့တာကြောင့် ရွှေကူမြို့နယ် တောတောင်အတွင်း ၁ စီးပျက်ကျခဲ့ပြီး စစ်ကောင်စီတပ်ဖွဲ့ဝင် ၁၆ ဦး သေဆုံးခဲ့ တဲ့ဖြစ်စဥ်ဖြစ်ပွားခဲ့ပေမယ့် အဆိုပါ ဖြစ်စဥ်မှာလည်း စစ်ကောင်စီက ရဟတ်ယာဥ်ရုတ်တရက်စက်ချို့ ယွင်းပျက်ကျတယ်လို့ ထုတ်ပြန်ခဲ့ပါတယ်။

တောင်ငူ၊ ဇွန် ၉၊ ၂၀၂၅။

ပဲခူးတိုင်း၊ တောင်ငူမြို့၊ မင်းကြီးညိုရပ်ကွက်မှာ ဧည့်စာရင်းဝင်စစ်တဲ့စစ်ကောင်စီတပ်ဖွဲ့ဝင်တွေက သေနတ်နဲ့ပစ်တဲ့အတွက် အမျိုးသား ၁ ဦးသေဆုံးခဲ့တယ်လို့ ဒေသခံတွေဆီက သိရပါတယ်။

သေဆုံးသူဟာ လက်သမားပန်းရံလုပ်သူ အသက် ၃၅ နှစ်အရွယ်ကိုနောင်နောင်ဖြစ်ပြီး ဇွန် ၇ ရက်ည ၁၀ နာရီကျော်က ညီဖြစ်သူနဲ့နေအိမ်မှာရှိနေချိန် စစ်ကောင်စီအဖွဲ့ဝင်တွေက ခြံအရှေ့ကနေသေနတ်နဲ့ ပစ်ခတ်ခဲ့တာ လို့ ဆိုပါတယ်။

“သူ့အိမ်ကို မီးနဲ့ထိုးပြီး ခြံတံခါးကိုခေါက်တယ်တဲ့။ သူတို့က ညီအစ်ကိုနှစ်ယောက်တည်းနေတာ။ တံခါးလာခေါက်တော့ ညီလုပ်သူက အကိုရေ တံခါးခေါက်နေတယ်။ အရှေ့မှာလည်း မီးထိုးနေတယ် သွားကြည့်လိုက်အုန်းဆိုတော့ အကိုလုပ်သူကသွားကြည့်တာ။ သူ့ကိုလည်းတွေ့ရော ပစ်ပစ်ဆိုတဲ့ အသံကြားပြီး ပစ်ခံလိုက်ရတာ”လို့ ရပ်ကွက်နေသူတဦးက ပြောပါတယ်။

သေနတ်နဲ့ပစ်ခံရလို့ ကိုနောင်နောင်မှာ ဆီးခုံကိုကျည်ထိမှန်ခဲ့ပြီး တောင်ငူဆေးရုံကိုပို့ချိန်မှာ သေဆုံးသွားတယ်လို့ ဆိုပါတယ်။

ကိုနောင်နောင်နဲ့ညီဖြစ်သူတို့ဟာ နိုင်ငံရေးနဲ့ပတ်သက်သူတွေမဟုတ်ဘဲ ပန်းရံလက်သမားလုပ်ကိုင်နေထိုင်သူတွေသာဖြစ်တယ်လို့ အထက်ပါဒေသခံကဆက်ပြောပါတယ်။

ကိုနောင်နောင်ရဲ့ နာရေးကိုတော့ ဇွန် ၉ ရက်ယနေ့ညနေပိုင်းမှာ နီးစပ်ရာသုသာန်မှာတင် သင်္ဂြိုဟ်သွားမယ်လို့ သိရပါတယ်။

ပြီးခဲ့တဲ့ မေ ၁၄ ရက်ကလည်း တောင်ငူမြို့နယ်၊ ကမ်းနီကျေးရွာအုပ်စုထဲက ဂုန်မင်းအိုင်ကျေးရွာကို ဝင်လာတဲ့စစ်ကြောင်းက ရွာခံလူငယ် ၂ ဦးကိုဖမ်းဆီးပြီး နှိပ်စက်သတ်ဖြတ်ခဲ့သေးတယ်လို့ သိရပါတယ်။

နိုင်ငံရေးအကျဥ်းသားများကူညီစောင့်ရှောက်ရေးအသင်း – AAPP ရဲ့ ဇွန်လ ၆ ရက်ထုတ် အစီရင်ခံစာ အရ ၂၀၂၁၊ စစ်အာဏာသိမ်းချိန်ကနေ ၂၀၂၅၊ ဇွန်လ ၆ ရက်အထိ စစ်ကောင်စီနဲ့၎င်းတို့ရဲ့ လက်ပါးစေတွေကြောင့် သေဆုံးသူ ၆,၇၇၆ ဦးရှိတယ်လို့ သိရပါတယ်။

စာတည်း – လင်း

ကန့်ဘလူ၊ ဇွန် ၇၊ ၂၀၂၅။

စစ်ကိုင်းတိုင်း၊ ကန့်ဘလူမြို့နယ်၊ ကံကြီးကျေးရွာကနေ စစ်ကောင်စီဖမ်းသွားတဲ့ ကလေးငယ် ၃ ဦး အပါ ပြည်သူ ၁၆ ဦးဟာ တပတ်ကြာတဲ့အထိ ပြန်မလွတ်လာသေးဘူးလို့ ကျွန်းလှ-ကန့်ဘလူတက်ကြွလှုပ်ရှားသူများအဖွဲ့-(ကန့်ဘလူခရိုင်)က ပြောပါတယ်။

စစ်ကောင်စီတပ်အင်အား၂၀၀ ခန့်ပါ စစ်ကြောင်းဟာ မေ ၃၁ ရက် မနက် ၉ နာရီဝန်းကျင်မှာ ကံကြီးရွာကိုဝင်ရောက်စီးနင်းကာ ရွာခံ ၁၆ ဦးကိုဖမ်းဆီးသွားပြီး လက်ရှိမှာ ဖမ်းဆီးထားသူတွေကို ချပ်သင်းရွာအထိုင်စခန်းမှာ ထိန်းသိမ်းထားကာ ဒီကနေ့ ဇွန် ၇ ရက်အထိ ပြန်လွတ်လာတာမရှိသေးဘူးလို့ ဆိုပါတယ်။

” ခုထိတော့ပြန်လွတ်လာတာမရှိသေးဘူး။ သူတို့နဲ့ပတ်သက်ပြီးတော့ ထပ်မသိရသေးဘူး။ သူတို့(စကစ) အထိုင်တွေကိုခေါ်သွားရင် သတင်းထပ်သိရဖို့တော့မလွယ်ဘူး။ ဖမ်းခံထိတဲ့အထဲ ကလေး ၃ ယောက်တော့ပါတယ်”လို့ ကျွန်းလှ-ကန့်ဘလူတက်ကြွလှုပ်ရှားသူများအဖွဲ့-(ကန့်ဘလူခရိုင်)တာဝန်ရှိသူ အမျိုး သမီးက ပြောပါတယ်။

ဖမ်းဆီးခံထားရသူတွေအနက် အသက် ၇ နှစ်ကနေ ၁၂ ကြား မိန်းကလေး ၃ ဦး၊ အသက် ၁၈ နှစ်ကနေ ၅၀ ကြား အမျိုးသား၊ အမျိုးသမီး ၁၃ ဦးဖြစ်ပြီး ဖမ်းဆီးခံရသူတွေရဲ့ အသေးစိတ်အချက်အလက်တွေက ၎င်းတို့လုံခြုံရေးအရ ထုတ်ဖော်ပြောဆိုလို့မရကြောင်း ၎င်းက ပြောပါတယ်။

မေ ၁၈ ရက်ကနေ ဇွန် ၂ ရက်အထိ ကန့်ဘလူနယ်ထဲက ကျေးရွာတွေကို စစ်ကြောင်းထိုးခဲ့တဲ့ ချပ်သင်းနဲ့ကိုးတောင်ဘို့ အထိုင်တပ်စခန်းတွေက စစ်ကောင်စီတပ်နဲ့ ပျူစောထီးပူးပေါင်းတပ်တွေဟာ ဇွန် ၃ ရက် နောက်ပိုင်း စစ်ရေးလှုပ်ရှားမှုမရှိဘဲ ငြိမ်သက်နေတယ်လို့ သိရပါတယ်။

စစ်ကောင်စီတပ်ဖွဲ့ဝင်တွေက ကျေးရွာတွေကို လှည့်ပတ်စစ်ကြောင်းထိုးခဲ့ချိန်က ထွက်ပြေးခဲ့ရတဲ့ ကံကြီး၊ ဦးကင်းကြည်၊ ပေါက်ဆိန်ကုန်း၊ သင်တော၊ အလယ်ခုံ၊ လွင်ကြီး၊ ဇော်ချောင်း၊ အောက်တဲ၊ ဝက်သဲအင်း၊ တင်မော်၊ ညိုပင်ရှို၊ နှောကုန်း၊ ပေါက်ကုန်း၊ ဇီးကုန်းနဲ့ မိဿလင်ကုန်းစတဲ့ကျေးရွာတွေက ဒေသခံသောင်းချီဟာ ဇွန် ၇ ရက်နေ့အထိ ကျေးရွာတွေကို ပြန်မဝင်နိုင်သေးဘဲ စစ်ရှောင်နေရဆဲဖြစ်တယ်လို့ ဆိုပါတယ်။

အထက်ပါစစ်ကြောင်းဟာ ကံကြီးရွာကို စီးနင်းစဥ်မှာ ရွာခံတွေဖြစ်တဲ့ ဦးသိန်းထွေး ၄၀ နှစ်၊ မောင်ဇေယျာထွန်း ၂၀ နှစ်တို့ကို ကျေးရွာအနောက်ဘက်ကုန်းမြင့်ပေါ်မှာ သတ်ဖြတ်ခဲ့ပါသေးတယ်။

စာတည်း – ဟိန်းစံ