ငွေကြေးတောင်းခံ

စစ်ကိုင်း၊ မေ ၂၅၊ ၂၀၂၃။

စစ်ကိုင်းတိုင်း၊ ချောင်းဦးမြို့နယ်၊ အမြင့်မြို့ဟောင်းရဲစခန်းမှာတပ်စွဲထားတဲ့ စစ်ကောင်စီတပ်ဖွဲ့တွေဟာ လမ်းသွားလမ်းလာ ဆိုင်ကယ်၊ကားတွေကိုဖမ်းဆီးပြီး ငွေကြေးအဆမတန်တောင်းခံနေတယ်လို့ ဒေသခံတွေဆီက သိရပါတယ်။

အမြင့်မြို့ဟောင်းရဲစခန်းမှာ တနှစ်ကျော်ကြာတပ်စွဲထားတဲ့ အင်အား ၅၀ ခန့်ရှိစစ်ကောင်စီတပ်ဟာ ပြီးခဲ့တဲ့ဧပြီလကစတင်ကာ အမြင့်မြို့ဟောင်းလမ်းပေါ်က ကား၊ဆိုင်ကယ်တွေကိုဖမ်းဆီးပြီး ယာဉ်ပေါ်ပါ ငွေကြေးတွေကိုယူဆောင်သလို ကားနဲ့ဆိုင်ကယ်တွေကိုလည်း ငွေကြေးအဆမတန်တောင်းပြီး ပြန်ရွေးခိုင်းတယ်လို့ မုံရွာအမြင့်လမ်းသတင်းမှန်ပြန်ကြားရေးတာဝန်ခံတဦးက ပြောပါတယ်။

“အမြင့်မြို့ဟောင်းလမ်းပိုင်းကနေ ဖြတ်သန်းသွားလာနေတဲ့ ပြည်သူတွေဆီက ဆိုင်ကယ်တွေဖမ်းဆီးပြီး တစီးကို ၃ သိန်းနဲ့ ပြန်ရွေးခိုင်းတယ်။ ကားတွေဆို ကားပေါ်ပါတဲ့ပိုက်ဆံအကုန်ယူတယ်။ ဆိုင်ကယ်တွေဖမ်းပြီးရင် တရက်ထဲအပြီးရွေးခိုင်းတယ်။ သူတို့တောင်းတဲ့ငွေပမာဏ မပေးနိုင်ရင် တော်တော်တောင်းပန်ပြီးမှ တဝက်ကြေးပေးရတယ်” လို့ ပြောပါတယ်။

အဲ့ဒီစစ်ကောင်စီတပ်တွေဟာ တပ်စွဲထားတဲ့ ၁ နှစ်ကျော်ကာလအတွင်း ရဲစခန်းအပြင်ဘက်ကို သွားရောက်လစာမထုတ်ရဲတဲ့အတွက် အခုလိုဖမ်းဆီးပြီး ငွေကြေးအမြောက်အမြား တောင်းယူနေတာလို့ ပြောဆိုပေမယ့် သီးခြားတော့အတည်မပြုနိုင်ပါဘူး။

အမြင့်မြို့ထဲက ရွှေကြိုးရစ်ဘုရားနဲ့ ညိုမိတို့ရွာစာကြည့်တိုက်အနီး ပြည်သူတွေအလုပ်သွား၊ ပြန်ချိန်တွေမှာ စစ်ကောင်စီတပ်က ဖမ်းဆီးမှုတွေကိုအဓိကထားလုပ်ဆောင်နေလို့ အခြေခံလုပ်သားပြည်သူတွေ အခက်အခဲကြုံတွေ့နေရတယ်လို့ ဆိုပါတယ်။

မုံရွာ-အမြင့်-ချောင်းဦးလမ်းပိုင်းဟာ စစ်ကောင်စီတပ်နဲ့ လက်အောက်ခံရဲတွေ မကြာခဏ ပစ်ခတ်တိုက်ခိုက်ခံနေရတဲ့နေရာတွေဖြစ်လို့ ယခင်က အခုလိုဖမ်းဆီးငွေတောင်းတာတွေမရှိပေမယ့် ပြီးခဲ့တဲ့ ဧပြီလကစလို့ လုပ်ဆောင်လာတာလို့ ဒေသခံတွေကပြောပါတယ်။

စာတည်း − ရင်ငြိမ်း

ပဲခူး၊ မတ် ၁၊ ၂၀၂၃။

ပဲခူးမြို့၊ ရွှေမော်ဓော်ဘုရား တောင်ဘက်မုဒ် သနပ်ပင်လမ်းမကြီးဘေးမှာ စစ်ကောင်စီလက်အောက်ခံ တပ်ဖွဲ့ဝင်တွေဟာ အခုရက်ပိုင်း လိုင်စင်မဲ့ကား၊ ဆိုင်ကယ်တွေကို ဖမ်းဆီးပြီး ငွေကြေးတောင်းခံမှုတွေ ပိုမိုပြုလုပ်လာတယ်လို့ မြို့ခံတဦးဆီက သိရပါတယ်။

ရဲ၊ ယာဥ်ထိန်းရဲနဲ့ စစ်ကောင်စီတပ်ဖွဲ့တွေ ပေါင်းပြီး အင်အား ၂၀ နီးပါးနဲ့ ပဲခူးမြို့ပေါ်က ရွှေမော်ဓောဘုရား တောင်ဘက်မုဒ်မှာ ညနေ ၄ နာရီခွဲကနေ ၅ နာရီခွဲထိ ဖမ်းဆီးစစ်ဆေးမှုတွေ ပြုလုပ်လာတာ ၁ လနီးပါးရှိပြီ ဖြစ်တယ်လို့ ဆိုပါတယ်။

ဒါ့အပြင် ဖမ်းဆီးသူတွေထဲမှာ စစ်ကောင်စီအဖွဲ့တွေနဲ့အတူ ဆိုင်ကယ် ကယ်ရီသမား တချို့ကလည်း ပါဝင်ကူညီပေးတယ်လို့ ဖမ်းဆီးခံခဲ့ရသူတဦးက ပြောပါတယ်။

“မနေ့က အဖမ်းခံလိုက်ရတဲ့ ဆိုင်ကယ်တွေ စုစုပေါင်း ၂၅ စီးလောက် ရှိမယ်။ ဆန်အိတ်တင်ကား ၂ စီးလည်း အဖမ်းခံရတယ်။ ဖမ်းမိရင် ဆိုင်ကယ်နံပါတ်၊ လိပ်စာတွေ ပြောရမယ်။ အဖေနာမည်တွေ ပြောရတယ်။ ပြောပြီးရင် သူတို့က ချလန်ဖြတ်ပေးတယ်။ စာရင်းစာအုပ်မှာ လက်မှတ်ထိုးရတယ်။ ကျနော်တောင် အဲ့နေ့က တသောင်းပေးလိုက်ရတယ်” လို့ ဆိုပါတယ်။

ဖမ်းဆီးရမိထားတဲ့ ကား၊ ဆိုင်ကယ်တွေကို အနည်းဆုံး ငွေကျပ် တသောင်းကနေ ငွေကျပ် ၅ သိန်းအထိ တောင်းခံလေ့ရှိတယ်လို့လည်း အထက်ပါမြို့ခံက ပြောပါတယ်။

“ပိုက်ဆံက သူတို့ပါးစပ်ဖျားကနေ တောင်းသလောက် ပေးရတယ်။ ဖမ်းဆီးထားတဲ့ ဆိုင်ကယ်တွေ၊ ကားတွေဆို ဖမ်းမိတဲ့နေ့မှာပဲ အပြီးရွေးရတယ်။ နောက်ရက်တွေဆို သိပ့်မသေချာတော့ဘူး” လို့ ဆိုပါတယ်။

ပြီးခဲ့တဲ့ ဖေဖော်ဝါရီလ ၂၄ ရက်ကလည်း ပဲခူးမြို့၊ ရွှေမော်ဓောဘုရား အနောက်ဘက်မှာရှိတဲ့ သီရိဟံသာခန်းမဘေးကို ဖမ်းဆီးထိန်းသိမ်းထားတဲ့ မော်တော်ဆိုင်ကယ် ၁၀ စီးနီးပါးသယ်ဆောင်သွားပြီး အခုချိန်ထိ ပြန်လည်မရရှိသေးဘူးလို့ သိရပါတယ်။

စာတည်း – လင်း