ခြေထောက်ပြတ်

ရေတာရှည်၊ ဒီဇင်ဘာ ၂၆၊ ၂၀၂၅။

ပဲခူးတိုင်း၊ ရေတာရှည်မြို့နယ်၊ နှောပင်ကျေးရွာမှာ ပဲခင်းထဲသွားတဲ့ သက်ကြီးအမျိုးသား ၁ ဦး မိုင်းထိပြီး ခြေထောက်ပြတ်သွားတယ်လို့ ကူညီလုပ်ဆောင်ပေးခဲ့သူတွေဆီက သိရပါတယ်။

မိုင်းထိသူဟာ နှောပင်ကျေးရွာနေ အသက် ၆၇ နှစ်အရွယ် ဦးစံအေးဆိုသူဖြစ်ပြီး ဒီဇင်ဘာ၂၅ ရက် ညနေ ၄ နာရီခန့်မှာ ရွာပြင်ပဲခင်းထဲကိုသွားချိန် မြေမြုပ်မိုင်းထိခဲ့တာလို့ ဆိုပါတယ်။

“သူအိမ်ကနေ ပဲခင်းအသွားမှာထိတာ။ ရွာဝန်းကျင်မှာပဲထိတာ။ ခွဲစိတ်ဖို့ကတော့ ဒီနေ့မှလုပ်ရမယ်။ ထိတာကညာဘက်ခြေထောက်ပါ”လို့ ကူညီလုပ်ဆောင်ပေးခဲ့သူတဦးကပြောပါတယ်။

မိုင်းထိလို့ ဦးစံအေးမှာ ညာဘက်ခြေကျင်းဝတ်ကနေပြတ်ထွက်သွားပြီး ဆေးရုံရောက်လာချိန် အရေးပေါ်သွေးသွင်းကာ ပြတ်သွားတဲ့ခြေထောက်ကို ဒီဇင်ဘာ ၂၆ ရက် ဒီကနေ့မှာ ခွဲစိတ်မှုပြုလုပ်သွားဖို့ရှိနေပြီး လိုအပ်တဲ့ဆေးစစ်မှုတွေလည်းပြုလုပ်ရမယ်လို့ ဆိုပါတယ်။

မိုင်းထိတဲ့နေရာဟာ စစ်ကော်မရှင်တပ်နဲ့ တော်လှန်ရေးတပ်တွေဘက်က စစ်ရေးလှုပ်ရှားသွားလာနေတဲ့နယ်မြေဖြစ်တာကြောင့် ဘယ်အဖွဲ့ကထောင်ထားတဲ့မိုင်းဆိုတာမသိရသေးဘူးလို့ ဆိုပါတယ်။

ပြီးခဲ့တဲ့ မတ်လ ၂ ရက်ကလည်း ရေတာရှည်မြို့နယ်၊ ကျွန်းတောကုန်းကျေးရွာမှာ ပဲကောက်ထွက်တဲ့ ၁၂ အရွယ် Grade – 3 ကျောင်းသား မိုင်းထိပြီး ခြေထောက် ၂ ချောင်းပြတ်သွားတယ် သိရပါတယ်။

စာတည်း – လင်း

ထန်းတပင်၊ ဇွန် ၆၊ ၂၀၂၅။

ပဲခူးတိုင်း၊ ထန်းတပင်မြို့နယ်၊ ရွှေအင်းမကျေးရွာမှာ အင်ဥထွက်ကောက်တဲ့အမျိုးသားတဦး မိုင်းထိပြီး ခြေထောက်ပြတ်သွားတယ်လို့ ကူညီပေးနေသူတွေဆီက သိရပါတယ်။

မိုင်းထိသူဟာ အသက် ၃၂ နှစ်အရွယ် ကိုထွန်းလင်းအောင်ဆိုသူဖြစ်ပြီး ဇွန် ၅ ရက်မနက် ၁၁ နာရီခန့်မှာ နေအိမ်အနီးတောစပ်မှာ အင်ဥသွားကောက်ရင်း မိုင်းနင်းမိခဲ့တာလို့ ဆိုပါတယ်။

“သူတို့မိသားစုက မြို့ပေါ်လည်းတက်မလာနိုင်ဘူး။ စားဝတ်နေရေး သွားရေးလာရေးအခက်အခဲပေါင်းစုံနဲ့ စားဖို့သောက်ဖို့ မနည်းရုန်းကန်နေရတာ။ ရွာထဲမှာဘဲ ကြုံရာကျပန်းလုပ်၊ အင်ဥကောက်မျှစ်ချိုး ဟင်းရွက်ခူးလုပ်တာ။ ဖြစ်တဲ့နေ့ကလည်း အိမ်နဲ့မနီးမဝေးမှာ အင်ဥကောက်တဲ့အချိန်မှာ မိုင်းမှန်သွားတာ”လို့ ကူညီဆောင်ရွက်ပေးနေသူတဦးကပြောပါတယ်။

မိုင်းထိလို့ အဆိုပါ အမျိုးသားမှာ ဘယ်ဘက်ခြေကျင်းဝတ်အောက်ပိုင်းက ပြတ်ထွက်သွားပြီး ညာဘက်ခြေထောက်နဲ့ ခန္ဓာကိုယ်တွေမှာ မိုင်းစမှန်ဒဏ်ရာတွေရထားတယ်လို့ ဆိုပါတယ်။

သူဟာ အလုပ်အကိုင်အဆင်မပြေတာကြောင့် ကျေးရွာမှာ ကြုံရာကျပန်းလုပ်ကိုင်ပြီး သားသမီး ၃ ဦးနဲ့ အမျိုးသမီးဖြစ်သူတို့ကို ရှာဖွေလုပ်ကိုင်ကျွေးမွေးနေသူဖြစ်လို့ ယခုလိုမိုင်းထိသွားတာကြောင့် မိသားစုစားဝတ်နေရေးလည်း ပိုပြီးကျပ်တည်းသွားတယ်လို့ သိရပါတယ်။

အခုမိုင်းထိတဲ့ဒေသဟာ နယ်မြေမငြိမ်သက်တဲ့ဒေသတခုဖြစ်ပြီး ယခင်တိုက်ပွဲတွေလည်းဖြစ်ဘူးတယ်လို့ ဆိုပါတယ်။

“နယ်မြေမငြိမ်သက် မအေးချမ်းတဲ့အထဲမှာပါတယ်။ ဘယ်ကစိုးမိုးထားတယ်ဆိုတာတော့ ကျနော်တို့ မသိရဘူး။ တိုက်ပွဲတွေဖြစ်ထားခဲ့တဲ့ဒေသ။ အခုတော့ဖြစ်မဖြစ်မသိရဘူး။ စစ်ရေးအခြေအနေနဲ့ ပတ်သက်ပြီးတော့ မသိရဘူး။ သူက နင်းမိတဲ့ မိုင်းဆိုတော့မြေမြှုပ်မိုင်းဖြစ်ဖို့များတယ်”လို့ အထက်ပါ ကူညီပေးနေသူက ဆက်ပြောပါတယ်။

လက်ရှိမှာတော့ မိုင်းထိထားသူကို တောင်ငူဆေးရုံမှာဆေးကုသနေရပြီး ဆေးကုသဖို့ ငွေကြေးအကူအညီ လိုအပ်နေသလို စောင်၊ ခြင်ထောင်တွေကအစမပါလာတဲ့အတွက် မြို့ခံပရဟိတအဖွဲ့တွေက ကူညီထားရတယ်လို့ ဆိုပါတယ်။

ပြီးခဲ့တဲ့ မတ် ၂ ရက်ကလည်း ရေတာရှည်မြို့နယ်၊ ကျွန်းတောကုန်းကျေးရွာမှာ မိဘတွေအတွက် အပိုဝင်ငွေရအောင် ပဲကောက်ထွက်တဲ့ G 3 ကျောင်းသား ၁၂ အရွယ်ကလေးငယ် မိုင်းထိလို့ ခြေထောက်နှစ်ချောင်းပြတ်ခဲ့ပါသေးတယ်။

စာတည်း – လင်း

ရေတာရှည်၊ မတ် ၃၊ ၂၀၂၅။

ပဲခူးတိုင်း၊ ရေတာရှည်မြို့နယ်၊ ကျွန်းတောကုန်းကျေးရွာအနီးပဲခင်းမှာ ပဲကောက်ထွက်တဲ့ အသက် ၁၂ နှစ် ယောက်ျားလေး ၁ ဦး မြေမြှုပ်မိုင်းနင်းမိလို့ ခြေထောက် ၂ ဖက်ပြတ်တောက်ဒဏ်ရာ(စိုးရိမ်ရ) ရရှိသွားတယ်လို့ ဒေသခံတွေထံက သိရပါတယ်။

မြေမြှုပ်မိုင်းနင်းမိသူဟာ ကျွန်းတောကုန်းကျေးရွာနေ မူလတန်း(G 3) ကျောင်းသား မောင်ကြယ်စင်ဟိန်းဖြစ်ပြီး မတ် ၂ ရက် မနေ့ညနေ ၃ နာရီကျော်မှာ ကျေးရွာအနီးပဲခင်းကိုပဲကောက်ထွက်ချိန် အင်းစပ်အနီးမှာ မိုင်းထိခဲ့တာလို့ဆိုပါတယ်။

“ကလေးက ၃ တန်းကျောင်းသားလေး။ လိမ္မာတော့ ကျောင်းအားတဲ့အချိန်မှာ မတ်ပဲ ကောက်သင်း ကောက်ပြီးတော့ ၁,၀၀၀ (ကျပ်) ရရ ၂,၀၀၀ (ကျပ်) ရရ အမေမိဘကိုပြန်ပေးတာ။ သူတို့ရွာနား မတ်ပဲကောက်တဲ့လယ်ကန်သင်းနားလေးနဲ့ အင်းနားလေးမှာ ရေဆင်းသောက်တာမှာ ထိသွားတာ။”လို့ ရေတာရှည်ဒေသခံတဦးက မြေလတ်အသံကို ပြောပါတယ်။

မိုင်းနင်းမိတာကြောင့် ကလေးငယ်မှာ ခြေထောက် ၂ ချောင်းလုံး ဒူးဆစ်အောက်ဘက်ကနေ ပြတ်ထွက်သွား(စိုးရိမ်ရ) ဒဏ်ရာရရှိခဲ့ကာ ကလေးငယ်မိသားစုက ငွေကြေးအဆင်မပြေတာကြောင့် ကျေးရွာကကူညီကားငှားကာ တောင်ငူဆေးရုံကိုပို့ဆောင်ဆေးကုသမှုခံယူနေရတယ်လို့ သိရပါတယ်။

ကလေးငယ်မိုင်းထိခဲ့တဲ့ကျေးရွာဟာ စစ်ကောင်စီတပ်နဲ့ KNLA၊PDF ပူးပေါင်းတပ်တွေ ၂ ဖက်လုံး စစ်ရေးလှုပ်ရှားနယ်မြေဖြစ်တာကြောင့် အဲ့ဒီမိုင်းကို ဘယ်အဖွဲ့ကထောင်တယ်ဆိုတာ မသိရဘူးလို့ ဆိုပါတယ်။

ပြီးခဲ့တဲ့နှစ် မတ် ၂၀ ရက်ကလည်း ရေတာရှည်မြို့နယ်၊ ကံလှရွာမှာ စစ်ကျန်ဗုံးသီးအဟောင်းကို ဆော့ကစားရာကနေပေါက်ကွဲမှုဖြစ်လို့ ကလေး ၂ ဦးသေဆုံးကာ ၁ ဦး ဒဏ်ရာရခဲ့တယ်လို့ သိရပါတယ်။

၂၀၂၄ ခုနှစ်အတွင်း မြန်မာနိုင်ငံမှာ မြေမြှုပ်မိုင်းနဲ့ထပ်ဆင့်ပေါက်ကွဲစေတဲ့ပစ္စည်းတွေကြောင့် ထိခိုက်သေဆုံးသူ ၁,၀၈၂ ဦး အထိ ရှိခဲ့ပြီး အဲ့ဒီထဲက ၂၉ ရာခိုင်နှုန်းဟာ ကလေးသူငယ်တွေဖြစ်တယ်လို့ ကုလသမ္မဂကလေးများရံပုံငွေအဖွဲ့ – UNICEF က ဖေဖော်ဝါရီလအတွင်း ထုတ်ပြန်ခဲ့တဲ့အစီရင်ခံစာမှာ ဖော်ပြထားပါတယ်။

စာတည်း – ဟိန်းစံ