မန္တလေး၊ ဧပြီ ၁၀၊ ၂၀၂၃။

မန္တလေးတိုင်းဒေသကြီး၊ ချမ်းမြသာစည်မြို့နယ်၊ အောင်ပင်လယ်ရပ်ကွက် မီးလောင်မှုမှာနေအိမ် ၁၂ လုံး ဆုံးရှုံးပြီး မီးဘေးသင့်ပြည်သူ ၄၀ ခန့်ရှိတယ်လို့ မြို့ခံတွေဆီက သိရပါတယ်။

ယနေ့ ဧပြီလ ၁၀ ရက်နေ့ မနက် ၅ နာရီခွဲခန့်မှာ အောင်ပင်လယ်ရပ်ကွက် ၅၁ လမ်းနဲ့ ၅၂ လမ်းကြား၊ ၁၀၅ လမ်းနဲ့ ၁၀၆ လမ်းကြားနေ ယခင်က ပဲပြုတ်ရောင်းတဲ့နေအိမ်ကနေ ဝါယာရှော့ဖြစ်ပြီး မီးလောင်ခဲ့တယ်လို့ ဒေသခံတဦးက ပြောပါတယ်။

“သိရသလောက်က မီးစလောင်တဲ့အိမ်က ပဲပြုတ်ရောင်းတယ်လို့ သိရတယ်။ ခုနောက်ပိုင်းကတော့ မရောင်းတော့ဘူး။ အိမ်တွေက ကပ်နေတာကြောင့် ပျက်စီးဆုံးရှုံးမှု များသွားတာနေမယ်။ အဲလမ်းမှာက ထရံကာ နေအိမ်တွေနဲ့ တိုက်တွေက ရောနေတာ” လို့ သူကဆက်ပြောပါတယ်။

မီးလောင်မှုကြောင့် မီးဘေးသင့်ပြည်သူ ၄၀ ခန့်ကို နီးစပ်ရာဘုန်းကြီးကျောင်းမှာ ထားရှိပေးထားတယ်လို့ သိရပါတယ်။

ဒါ့အပြင် မီးလောင်မှုမှာ တိုက် ၅ လုံးအပါအဝင် သွပ်မိုးထရံကာနေအိမ် စုစုပေါင်း ၁၂ လုံးမီးလောင်သွားပြီး ကာလတန်ဖိုး ကျပ်သိန်း ၂၀၀၀ ကျော်ဖိုးခန့် ဆုံးရှုံးနိုင်တယ်လို့ မြို့ခံတွေက ခန့်မှန်းပါတယ်။

မီးလောင်မှုကို စစ်ကောင်စီလက်အောက်ခံ မီးသတ်ဦးစီဌာနမှ Level-1 အဆင့်သတ်မှတ်ပြီး မီးသတ်ဌာနမှ အုပ်ချုပ်မှု ယာဉ် (၃) စီး၊ မီးငြိမ်းသတ်ယာဉ် (၁၀) စီး၊ ရေသယ်ယာဉ် (၅) စီး၊ မီးသတ်တပ်ဖွဲ့ဝင် (၇၀) ဦး၊ ရပ်ကွက်ပြည်သူများနဲ့ ဝိုင်းဝန်းငြိမ်းသတ်ပေးခဲ့ရတယ်လို့ သိရပါတယ်။

မတ်လ ၂၇ ရက်နေ့ကလည်း အောင်မြေသာစံမြို့နယ်၊ အိုးဘိုရွှေကျင်ရပ်ကွက်၊ အကွက် (၄၀)၊ ၇၆ လမ်းနဲ့ ၇၈လမ်းဒေါင့်မှာ ဖုန်းအားသွင်းထားရာက နေအိမ် ၇ လုံး မီးလောင်ခဲ့တယ်လို့ သိရပါတယ်။

မန္တလေး၊ ဧပြီ ၁၊ ၂၀၂၃။

မန္တလေးတိုင်းဒေသကြီး၊ ချမ်းမြသာစည်မြို့နယ်၊ ချမ်းမြသာစည်တောင်ရပ်ကွက်နဲ့ ထွန်တုံးရပ်ကွက်က ရာအိမ်မှူး ၂ ဦး ၁ ရက်တည်း ပစ်သတ်ခံလိုက်ရတယ်လို့ သိရပါတယ်။

မတ်လ ၃၁ ရက်နေ့ နေ့လည် ၁ နာရီလောက်မှာ ချမ်းမြသာစည်တောင်ရပ်ကွက်၊ အကွက်(၈၅၅)နေ အသက် ၅၂ နှစ်အရွယ် ဦးစိုးနိူင် (ရာအိမ်မှူး၊ အရံမီးသတ် တပ်စုမှုး)ဟာ ဆိုင်ကယ်နဲ့ သွားနေချိန် စစ်ကိုင်းလမ်းခွဲလမ်းမပေါ်ရှိ FUJI စတိုးဆိုင်ရှေ့အရောက်မှာ သေနတ်သမားတွေက ပစ်ခတ်သွားလို့ သေဆုံးသွားတယ်လို့ ဒေသခံတဦးက ပြောပါတယ်။

“မနေ့က ဖြစ်တာက ၂ ဦးပါ။ တယောက်က နေအိမ်မှာ ပစ်သတ်ခံရတယ်။ တယောက်က လမ်းပေါ်မှာ ပစ်သတ်ခံရတယ်။ နေအိမ်ပစ်သတ်ခံရတဲ့ ရာအိမ်မှူးက စစ်ထွက်။ သူကိုယ်တိုင် သေနတ်ဝယ်ကိုင်ထားတာ ရှိတယ်။ သေနတ်သမားတွေက သူ့ကိုပစ်သတ်ပြီး သေနတ်နဲ့ကျည်တွေပါ ယူသွားတာ။ နှစ်ယောက်စလုံးက သေသွားတယ်” လို့ ပြောပါတယ်။

အဲဒီ ညနေ ၃ နာရီ ၄၅ မိနစ်ခန့်မှာ ချမ်းမြသာစည်မြို့နယ်၊ ထွန်တုံးရပ်ကွက်၊ အကွက် ဖဖ-၄/၈၆၊ ၁၁၃လမ်း၊ ၄၆×၄၇ လမ်းကြားနေ ရာအိမ်မှုး ဦးစန်းအောင် (၅၂) နှစ်ဟာ နေအိမ်မှာ ထိုင်နေချိန် သေနတ်သမား ၄ ဦးက ဆိုင်ကယ်နဲ့ရောက်လာပြီး ပစ်ခတ်သွားလို့ နေရာမှာပဲ သေဆုံးသွားတယ်လို့ ဆိုပါတယ်။

ရာအိမ်မှူး ဦးစန်းအောင်ကိုတော့ အောင်စည်တော်စစ်ဆင်ရေးအဖွဲ့က ပစ်ခတ်ရှင်းလင်းခဲ့တာဖြစ်ပြီး ရှင်းလင်းချိန်မှာ ပစ္စတို ၁ လက်၊ ကျည် ၂၂ တောင့်၊ ဖုန်းနဲ့အခြားဆက်စပ်ပစ္စည်းတွေ သိမ်းဆည်းရမိတယ်လို့ အောင်စည်တော်စစ်ဆင်ရေးအဖွဲ့က ထုတ်ပြန်ထားပါတယ်။

ရာအိမ်မှူး ဦးစိုးနိုင်ကိုတော့ ဘယ်အဖွဲ့က ဘာကြောင့်ရှင်းလင်းလိုက်တယ်ဆိုတာ ထုတ်ပြန်ထားတာ မရှိသေးပါဘူး။

ဖေဖော်ဝါရီလ ၁၇ ရက်နေ့မှာ ချမ်းမြသာစည်မြို့နယ် ချမ်းတောင်ရပ်ကွက် ၇၈ လမ်းနဲ့ ရန်မန်းသံလမ်းကြား ပညာပျိုးခင်းလမ်း၊ အကွက် ၉၀၂ သီတာအေးရပ်ကွက်၊ ပညာပျိုးခင်းလမ်းပေါ်မှာ ဆိုင်ကယ်နဲ့လာနေတဲ့ မဟာအောင်မြေမြို့နယ်၊ ရွှေဘုန်းရှိန်ရပ်ကွက်အုပ်ချုပ်ရေးမှူး ဦးဇော်ဝင်းထွန်း (၅၆) နှစ်ကို သေနတ်သမားတွေက ပစ်ခတ်လို့ သေဆုံးသွားသေးတယ်လို့ သိရပါတယ်။

စာတည်း – 007

မန္တလေး၊ ဒီဇင်ဘာ ၂၂၊ ၂၀၂၂။

မန္တလေးမြို့၊ ချမ်းမြသာစည်မြို့မရဲစခန်းလိုင်းခန်းတခုကို ဒီဇင်ဘာလ ၂၁ ရက်မနေ့ကနေ့လယ်ပိုင်းမှာ လက်ပစ်ဗုံးနဲ့ဖောက်ခွဲတိုက်ခိုက်ခဲ့တယ်လို့ No More Dictatorship People Defense Force -NMD က သတင်းထုတ်ပြန်ထားပါတယ်။

ချမ်းမြသာစည်မြို့နယ်၊ မာလကာခြံရပ်ကွက်တောင်ဘက် ၈၆ × ၈၇ကြားနဲ့ ၄၅ × ၄၆ကြား၊ ဒေါနခြံရပ် အမှတ် ၁၀ က မြို့မရဲစခန်းလိုင်းခန်းကို နေ့လယ် ၁၂ နာရီခွဲလောက်မှာ ဖောက်ခွဲတိုက်ခိုက်ခဲ့တာလို့ NMD-PDFတာဝန်ခံ ကိုZeus က ပြောပါတယ်။

“မြို့မရဲစခန်းလိုင်းခန်းထဲကို ခြံစည်းရိုးအပြင်ကနေ လက်ပစ်ဗုံးတလုံးနဲ့ ပစ်ပေါက်တိုက်ခိုက်ခဲ့တာပါ။ ပျက်စီးမှုနဲ့ ထိခိုက်မှုကတော့ သေချာပေါက်ရှိမှာ၊ စုံစမ်းတုန်းပါ” လို့ပြောပါတယ်။

ဒေသခံတဦးပြောတာကတော့ ရဲစခန်းတိုက်ခိုက်ခံရအပြီး လူနာတင်ကားတွေ စခန်းအတွင်းဝင်သွားတာကို မြင်ရတယ်လို့ပြောဆိုထားကာ ထိခိုက်မှုအခြေအနေကိုတော့ မြေလတ်အသံက သီးခြားအတည်ပြုနိုင်ခြင်း မရှိသေးပါဘူး။

NMD-PDF အဖွဲ့ဟာ ဒီဇင်ဘာလ ၅ ရက်ညနေကလည်း မန္တလေးမြို့၊ အမရပူရရပ်ကွက်သစ်၊ တောင်သမန်ကန်ပတ်လမ်းက စစ်ကောင်စီစစ်လက်နက်ပစ္စည်းစက်ရုံ အနောက်မြောက်ပေါက်ကင်းတဲဂိတ်ကို လက်ပစ်ဗုံးနဲ့ ပစ်ခတ်တိုက်ခိုက်ခဲ့ပါသေးတယ်။