ခမရ ၁၂၀

မြေလတ်အသံ၊ နိုဝင်ဘာ ၇၊ ၂၀၂၅။

စစ်ကိုင်းတိုင်း၊ ကောလင်းခရိုင်၊ ဝန်းသိုမြို့ နယ်အခြေစိုက် ခမရ ၁၂၀ တပ်ရင်းက ထွက်ပြေးလာတဲ့ စစ်ကော်မရှင်တပ်သား ၄ ဦးကို ထိန်းသိမ်းထားတယ်လို့ ဝန်းသိုမြို့နယ်ပကဖဆီကသိရပါတယ်။

ထွက်ပြေးလာသူတွေဟာ စစ်ကော်မရှင်တပ်သား အောင်ကိုဦး၊ အောင်ဖြိုးသူ၊ ဇင်မင်း၊ အောင်မြင့်သိန်းတို့ ဖြစ်ပြီး ၎င်းတို့အကုန်လုံးဟာပေါ်တာဆွဲခံရပြီးနောက် စစ်မှုထမ်းသင်တန်း တက်ရောက်ခဲ့သူတွေ ဖြစ်ကြတယ်လို့ ဆိုပါတယ်။

“ဒီလေးယောက်ထဲမှာ အောင်ဖြိုးသူက ချိတ်ဆက်ပြီး ဝင်လာတာ။ အောင်ဖြိုးသူကို ဇင်မင်းက ၁၂၀ ကနေ ဆိုင်ကယ်နဲ့လိုက်ပို့လာတာ။ သူကကျနော်တို့ဆီရောက်တော့ မပြန်ချင်တော့တာနဲ့ သူ့ကိုပါ ထိန်းသိမ်းထားတာ။ ကျန်နှစ်ယောက် အောင်ကိုဦးနဲ့ အောင်မြင့်သိန်းက ထွက်ပြေးလာပြီးနောက် ပြည်သူတွေက ကျနော်တို့ဆီပို့ပေးခဲ့တာ”လို့ ဝန်းသိုမြို့နယ်ပကဖတာဝန်ရှိသူတဦးက ပြောပါတယ်။

မန္တလေးဇာတိဖြစ်သူ အောင်ဖြိုးသူနဲ့ မှော်ဘီဇာတိဖြစ်သူ ဇင်မင်းတို့ဟာ ဝန်းသိုမြို့နယ်ပကဖနဲ့ ချိတ်ဆက်ပြီးနောက် အောက်တိုဘာ ၃၁ ရက် မနက် ၁၁ နာရီမှာ ခမရ ၁၂၀ တပ်ရင်းကနေ ထွက်ပြေးလာချိန် ပကဖတပ်ဖွဲဝင်တွေက သွားရောက်ခေါ်ဆောင်ခဲ့တာလို့ သူကဆိုပါတယ်။

နိုဝင်ဘာ ၄ ရက်မှာတော့ ဖောင်းပြင်မြို့ဇာတိ အောင်မြင့်သူနဲ့ အောက်တိုဘာ ၂၉ ရက်မှာ မိတ္ထီလာဇာတိ အောင်ကိုဦးတို့ဟာ ခမရ ၁၂၀ တပ်ရင်းကနေ ထွက်ပြေးလာခဲ့ပြီးနောက် ကျေးရွာတရွာအရောက်မှာ ပြည်သူတွေနဲ့တွေ့ပြီး ပြည်သူတွေက ၎င်းတို့ကို ပကဖထံပို့ ဆောင်ပေးခဲ့တာလို့ အထက်ပါတာဝန်ရှိသူက ပြောပါတယ်။

အဲ့ဒီထဲက အောင်ကိုဦး၊ ဇင်မင်းနဲ့ အောင်မြင့်သိန်းတို့ဟာ ၂၀၂၄ အတွင်းဖမ်းဆီးခံခဲ့ရပြီးနောက် အပတ်စဥ် ၃၊ ၄ နဲ့ ၅ တက်ရောက်ခဲ့ကြသူတွေဖြစ်ကာ အောင်ဖြိုးသူကတော့ အခုနှစ်ဇွန်လမှာ ဖမ်းခံရပြီး အပတ်စဥ် ၁၄ တက်ရောက်ခဲ့သူဖြစ်တယ်လို့ ဆိုပါတယ်။

ထွက်ပြေးလာချိန် ၄ ဦးစလုံးမှာ လက်နက်ခဲယမ်းတွေမပါလာဘဲ လက်ရှိမှာတော့ သူတို့ကို ကောင်းမွန်စွာ ကျွေးမွေးစောင့်ရှောက်ထားတယ်လို့ သိရပါတယ်။

စာတည်း – လင်း

မြေလတ်အသံ၊ အောက်တိုဘာ ၃၁၊ ၂၀၂၅။

စစ်ကိုင်းတိုင်း၊ ကောလင်းခရိုင်၊ ဝန်းသိုမြို့နယ်အခြေစိုက် ခမရ ၁၂၀ တပ်ရင်းမှ ထွက်ပြေးလာခဲ့တဲ့ စစ်ကော်မရှင်တပ်သား ၁ ဦးကို ထိန်းသိမ်းထားတယ်လို့ ဝန်းသိုမြို့နယ်ပကဖဆီက သိရပါတယ်။

ထွက်ပြေးလာသူဟာ အသက် ၂၄ နှစ်အရွယ် တပ်သား အောင်ကိုဦးဖြစ်ပြီး အောက်တိုဘာ ၂၉ ရက် နေ့လယ်ပိုင်းမှာ တပ်ထဲကနေထွက်ပြေးလာခဲ့ပြီးနောက် တော်လှန်ရေးတပ်ဖွဲ့ဝင်တချို့နဲ့နီးစပ်တဲ့ အမျိုးသမီး ၁ ဦးနဲ့တွေ့ပြီး အောက်တိုဘာ ၂၉ ရက်ညနေ ၆ နာရီမှာ ဝန်းသိုမြို့နယ်ပကဖဆီကို ရောက်ရှိခဲ့တာလို့ ဆိုပါတယ်။

“သူထွက်ပြေးလာတော့ သံလမ်းကိုရောက်တယ်။ သံလမ်းအတိုင်းလျှောက်ခဲ့တဲ့အချိန် မှာ ပြည်သူအမျိုးသမီး ၁ ဦးနဲ့တွေ့တယ်။ သူမက ‘ဘယ်ကိုသွားမလို့လဲ၊ ဘာလုပ်မလဲ’လို့ မေးလိုက်တယ်။ သူကခြေဦးတည့်ရာသွားမှာပေါ့။ ဘယ်ကလာတာလဲဆိုတော့ တပ်ကနေထွက်ပြေးခဲ့တာဆိုတော့ သူမက ကျနော်တို့ဆီကိုထည့်ပေးခဲ့တယ်။ သူမက ကျနော်တို့ဆီကို ဆိုင်ကယ်နဲ့ခေါ်ဆောင်ခဲ့ပြီးမှ ကျနော်တို့လက်ထဲကိုထည့်ခဲ့တယ်”လို့ ဝန်းသိုမြို့နယ်ပကဖ တာဝန်ရှိသူတဦးက ပြောပါတယ်။

တပ်သားအောင်ကိုဦး တပ်ကနေထွက်ပြေးလာခဲ့ချိန် အရပ်ဝတ်နဲ့ဖြစ်ပြီး သေနတ်မပါလာခဲ့တာကြောင့် သူ့ကိုခေါ်လာတဲ့ အမျိုးသမီးကလည်း မကြောက်ဘဲ ပကဖဆီရောက်ရှိအောင် ခေါ်ဆောင်ခဲ့တာလို့ အထက်ပါတာဝန်ရှိသူက ဆိုပါတယ်။

တပ်သား အောင်ကိုဦးဟာ ၂၀၂၄ စက်တင်ဘာလက မိတ္ထိလာမြို့ပေါ်မှာ ညစာထွက်စားချိန် စစ်ကော်မရှင် တပ်သားတွေရဲ့ ပေါ်တာဆွဲဖမ်းဆီးမှုကိုခံရကာ စစ်မှုအပတ်စဥ် ၅ တက်ခဲ့ရပြီး သင်တန်းဆင်းချိန်မှာ စစ်ကိုင်းအခြေစိုက် တပ်မ ၃၃ ကို ရောက်ရှိခဲ့တာလို့ဆိုပါတယ်။

တပ်မ ၃၃ ကိုရောက်ပြီး ၃ ရက်မြေက်နေ့မှာ ထွက်ပြေးဖို့ကြိုးစားခဲ့တာကြောင့် မန္တလေးနန်းတွင်း စစ်အကျဥ်းထောင်မှာ ပြီးခဲ့တဲ့ဇွန်လအထိ ၆ လ စစ်ထောင်ချခံခဲ့ရကာ ထောင်ကလွတ်ချိန်မှာလည်း တပ်မ ၃၃ ကိုပဲပြန်လည်ပို့ဆောင်ခံခဲ့ရတယ်လို့ သိရပါတယ်။

အဲ့ဒီနောက်မှာ တပ်မ ၃၃ လက်အောက်ခံ ဝန်းသိုမြို့နယ်အခြေစိုက် ခမရ ၁၂၀ တပ်ရင်းကို ပြီးခဲ့တဲ့ အောက်တိုဘာ ဒုတိယအပတ်မှာ ပြောင်းရွှေ့တာဝန်ကျခဲ့ပြီး ရှမ်းမြောက်ဘက်ကို ရှေ့တန်းမထွက်ချင်တာ ကြောင့် အခုလိုထွက်ပြေးလာခဲ့တာဖြစ်တယ်လို့ တပ်သားရဲ့ပြောဆိုမှုကို ကိုးကားပြီး အထက်ပါတာဝန်ရှိသူက ပြောပါတယ်။

လက်ရှိမှာ အောင်ကိုဦးကို ဝန်းသိုမြို့နယ်ပကဖက ကောင်းမွန်စွာကျွေးမွေးထားပြီး စစ်ရာဇဝတ်မှုကျူးလွန်ခဲ့တာ ရှိ၊မရှိနဲ့ ပတ်သက်ကာ စစ်ဆေးမေးမြန်းနေဆဲဖြစ်တယ်လို့လည်း သိရပါတယ်။

စာတည်း – လင်