ပေါက်၊ စက်တင်ဘာ ၄၊ ၂၀၂၅။

မကွေးတိုင်း၊ ပေါက်မြို့နယ် ရှေ့တန်းတနေရာမှာ စစ်ကော်မရှင်စစ်ကြောင်းကို အပြန်အလှန်ပစ်ခတ်ရင်း ဗိုက်ပွင့်ပြီး တပ်ဖွဲ့ဝင် ၁ ဦးကျဆုံးခဲ့တယ်လို့ ပခုက္ကူခရိုင် အမှတ်-၁၁ တပ်ရင်းဆီက သိရပါတယ်။

ကျဆုံးခဲ့သူဟာ ပခုက္ကူခရိုင် အမှတ်-၁၁ တပ်ရင်း PPC တပ်ဖွဲ့ဝင် အသက် ၁၉ နှစ်အရွယ် ကျော်ဇင်ဝင်း (ခ) တာယာဖြစ်ပြီး စက်တင်ဘာ ၁ ရက်မှာ စစ်ကော်မရှင်ဘက်ကပစ်ခတ်တဲ့ကျည်မှန်ပြီး ဗိုက်ပွင့် ကျဆုံးခဲ့တာလို့ ဆိုပါတယ်။

“ဗိုက်ပွင့်သွားတာ၊ လမ်းမှာမိုးရွာတော့ ဆေးရုံအချိန်မှီမရောက်တော့ ကျဆုံးသွားတာ၊ ရှေ့တန်းတနေရာမှာ ဖြစ်သွားတာပါ၊ ကျနော်တို့ ကာကွယ်ရေးတပ်ဖွဲ့တွေ လုပ်ထုံးလုပ်နည်းအတိုင်း အမိန့်ပြန်တမ်းထုတ်ပြီး သေနက် ၃ လက်နဲ့ ၁ လက်ကို ၃ ချက်ဖောက်ပြီးသင်္ဂြိုဟ်တယ်” ပခုက္ကူခရိုင် အမှတ် ၁၁ တပ်ရင်း ပြန်ကြားရေးတာဝန်ခံက ပြောပါတယ်။

ကျဆုံးတပ်ဖွဲ့ဝင်ရဲ့ ဈာပနအခမ်းအနားကိုတော့ စက်တင်ဘာ ၃ ရက်က ပေါက်မြို့နယ်ထဲမှာ မကွေးတိုင်းဗျူဟာရုံးအုပ်အဖွဲ့၊ ပခုက္ကူခရိုင် အမှတ် ၁၁ တပ်ရင်း ဒုတပ်ရင်းမှူးနဲ့ တပ်ဖွဲ့ဝင်တွေ တက်ရောက်ခဲ့ကြတယ်လို့ ဆိုပါတယ်။

စစ်ကော်မရှင်တပ်နဲ့တိုက်ပွဲတွေအတွင်း တပ်ဖွဲ့ဝင်ကျော်ဇင်ဝင်းအပါအဝင် ပခုက္ကူခရိုင် အမှတ်-၁၁ တပ်ရင်းမှ တပ်ဖွဲ့ဝင် ၇ ဦးအထိ ကျဆုံးထားတယ်လို့ သိရပါတယ်။

စာတည်း – လင်း

မြိုင်၊ ဩဂုတ် ၉၊ ၂၀၂၅။

မကွေးတိုင်း၊ ပေါက်မြို့နယ်၊ နတ်ဦးယာဉ်ကျေးရွာအနီး ရိက္ခာပို့စစ်ကြောင်းကို တိုက်ခိုက်ရင်း တော်လှန်ရေး တပ်ဖွဲ့ဝင် ၁ ဦးကျဆုံးခဲ့တယ်လို့ ပခုက္ကူခရိုင် အမှတ် ၂ တပ်ရင်းဆီက သိရပါတယ်။

ကျဆုံးခဲ့သူဟာ ပခုက္ကူခရိုင်တပ်ရင်း ၂ က တပ်ဖွဲ့ဝင် အသက် ၂၂ နှစ်အရွယ် ဇော်ခိုင်(ခ)ဘီလူးဖြစ်ပြီး ဩဂုတ် ၆ ရက်မှာ ရိက္ခာစစ်ကြောင်းကိုတိုက်ခိုက်ရင်း စစ်ကောင်စီတပ်ဘက်ကပစ်ခတ်တဲ့ ဗုံးသီးစ ထိမှန်ကျဆုံးခဲ့တာလို့ လို့ ဆိုပါတယ်။

“ပေါက်မြို့နယ်၊ နတ်ဦးယာဥ်ကျေးရွာအနီးမှာ တပ်မ ၁၀၁ လက်အောက်ခံတပ် ရိက္ခာပို့စစ်ယာဥ်တန်းနဲ့ ထိတွေ့မှုဖြစ်ပြီး ၄၀ မမ ဗုံးသီးစမှန်ပြီး ကျသွားတာပါ” လို့ အမှတ် ၂ တပ်ရင်း သတင်းနဲ့ပြန်ကြားရေးတာဝန်ခံက ပြောပါတယ်။

တပ်ဖွဲ့ဝင် ဇော်ခိုင် (ခ) ဘီလူးရဲ့ ဈာပနအခမ်းအနားကိုတော့ ဩဂုတ် ၈ ရက်က မြိုင်မြို့နယ်တနေရာမှာ ပြုလုပ်ခဲ့တာဖြစ်ပြီး အခမ်းအနားကို တပ်ရင်းတာဝန်ရှိသူတွေနဲ့ စစ်ကြောင်းကတာဝန်ရှိသူတွေ၊ တော်လှန်ရေးတပ်ဖွဲ့ဝင်တွေ တက်ရောက်ခဲ့ကြတယ်လို့ ဆိုပါတယ်။

လက်ရှိအချိန်ထိ စစ်ကောင်စီတပ်နဲ့တိုက်ပွဲတွေအတွင်း ပခုက္ကူခရိုင် အမှတ် ၂ တပ်ရင်းက တပ်ဖွဲ့ဝင် စုစုပေါင်း ၁၁ ဦးအထိ ကျဆုံးခဲ့တယ်လို့ သိရပါတယ်။

စာတည်း – လင်း

မြေလတ်အသံ၊ သြဂုတ် ၇၊ ၂၀၂၅။

ကချင်ပြည်နယ်၊ ဗန်းမော်မြို့သိမ်းတိုက်ပွဲအတွင်းး စစ်ကိုင်းတိုင်း၊ ယင်းမာပင်အခြေစိုက် ယင်းမာပင်ခရိုင်တပ်ရင်း ၂၈ မှတပ်ဖွဲ့ဝင် ၁ ဦးကျဆုံးခဲ့တယ်လို့ အဲ့ဒီအဖွဲ့ဆီက သိရပါတယ်။

ကျဆုံးသူဟာ ယင်းမာပင်ခရိုင်တပ်ရင်း ၂၈ မှ အသက် ၁၈ နှစ်အရွယ် တပ်ဖွဲ့ဝင် လမင်းဖြစ်ပြီး သြဂုတ် ၅ ရက်နေ့လယ် ၁ နာရီကျော်မှာ တိုက်ပွဲအတွင်း စစ်ကောင်စီတပ်တွေပစ်ခတ်လိုက်တဲ့ လက်နက်ကြီးကျည်ထိမှန်ခဲ့တာလို့ဆိုပါတယ်။

“ရဲဘော်လေးက တော်ပါတယ်။ ရဲဘော်လေးက ကျနော်ဆီရောက်တာ ၂၀၂၂ မှာ ရောက်တာပါ။ ပင်လည်ဘူးမြို့သိမ်းတိုက်ပွဲမှာလည်း ပါဝင်ဆင်နွှဲခဲ့တဲ့ကလေးတယောက်ပါ။ အရမ်းလည်း မာတယ်။ ရဲဘော်အချင်းချင်းကလည်းချစ်တယ်။ သနားအောင်လည်းနေတတ်ပါတယ်။ ကျနော်တို့ အရမ်းခံစားရပါတယ်”လို့ ယင်းမာပင်ခရိုင် တပ်ရင်း ၂၈ မှ တပ်ရင်းမှူးဗိုလ်စွမ်းက ပြောပါတယ်။

တပ်ဖွဲ့ဝင်လမင်းရဲ့ ရုပ်အလောင်းကို အညာဒေသကိုသယ်ယူဖို့ရာ လမ်းပန်းဆက်သွယ်ရေးခက်ခဲတာကြောင့် ဗန်းမော်မှာပဲ သြဂုတ် ၅ ရက်က မြေမြုပ်သင်္ဂြိုဟ်ခဲ့တယ်လို့ သူကဆိုပါတယ်။

လက်ရှိမှာလည်း ဗန်းမော်မြို့သိမ်းတိုက်ပွဲဆက်ဖြစ်နေပြီး စစ်ကောင်စီတပ်က လေကြောင်း၊ လက်နက်ကြီးတွေနဲ့ ခုခံတိုက်ခိုက်မှုတွေလုပ်ဆောင်နေတယ်လို့သိရပါတယ်။

ပြီးခဲ့တဲ့ ၂၀၂၄၊ ဒီဇင်ဘာ ၄ ရက်က စတင်ဆင်နွှဲခဲ့တဲ့ ဗန်းမော်မြို့သိမ်းစစ်ဆင်ရေးအတွင်း KIAနဲ့ PDF ပူးပေါင်းတပ်တွေက အမှတ် (၂၁) စစ်ဆင်ရေးကွပ်ကဲမှုဌာနချုပ် (စကခ-၂၁) အပါအဝင် လက်ကျန် တပ်စခန်းတွေအကုန်လုံးကို ထိုးစစ်ရှိန်မြှင့်တိုက်ခိုက်နေရာ စကခ (၂၁) ကာကင်းစခန်းတွေအပါအဝင် စစ်ကောင်စီတပ်စွဲရာနေရာတွေကို သိမ်းပိုက်ထားပြီးဖြစ်တယ်လို့ သိရပါတယ်။

စာတည်း – လင်း

မြေလတ်အသံ၊ ဇူလိုင် ၂၅၊ ၂၀၂၅။

စစ်ကိုင်းတိုင်း၊ ရွှေဘိုမြို့နယ်မှာ အင်အား ၁၀၀ ကျော်နဲ့ထိုးစစ်ဆင်လာတဲ့ စစ်ကောင်စီတပ်သားတွေကို ခုခံတိုက်ခိုက်ရင်း တော်လှန်ရေးတပ်ဖွဲ့ဝင် ၁ ဦး ကျဆုံးခဲ့တယ်လို့ ရွှေဘိုခရိုင်အမှတ် ၂၆ တပ်ရင်းဆီက သိရပါတယ်။

အဲ့ဒီစစ်ကြောင်းဟာ ရွှေဘိုမြို့နယ်ရှိ တော်လှန်ရေးတပ်ဖွဲ့တွေသိမ်းပိုက်ထားတဲ့နေရာကို ထိုးစစ်ဆင်လာချိန် ဇူလိုင် ၂၄ ရက်မနက် ၈ နာရီကျော်ကစပြီး ၁ နာရီ ခန့်ကြာ တော်လှန်ရေးတပ်တွေနဲ့ ထိတွေ့တိုက်ပွဲဖြစ်ခဲ့တာလို့ဆိုပါတယ်။

“ရန်သူ့စစ်ကြောင်းကို ခုခံရင်း မြင့်မြတ်စွာကျဆုံးခဲ့တာပါ။ ရန်သူ့စစ်ကြောင်းကို ကောင်းစွာ ခုခံချေမှုန်းနိုင်ခဲ့ပါတယ်။ ရန်သူ့ဘက်က ထိခိုက်ကျဆုံးမှုများစွာနဲ့ ဆုတ်ခွာသွားပေမယ့် ရန်သူ့လက်နက်နဲ့ အလောင်းတော့မရခဲ့ပါဘူး”လို့ ရွှေဘိုခရိုင်အမှတ် ၂၆ တပ်ရင်းမှ တပ်ရင်းမှူး ပီလွန်ကပြောပါ တယ်။

ကျဆုံးသူမှာ ရွှေဘိုခရိုင်အမှတ် ၂၆ တပ်ရင်းမှ တပ်ဖွဲ့ဝင်ရန်လင်းဖြစ်ပြီး တိုက်ပွဲအတွင်း ဦးခေါင်းကို ကျည်ထိမှန်ခဲ့တာဖြစ်ပြီး ၎င်းရဲ့ရုပ်အလောင်းကိုတော့ ဇူလိုင် ၂၄ ရက်နေ့လယ်မှာ မြေမြှုပ် သင်္ဂြိုဟ်လိုက်ပြီလို့ သူကဆက်ပြောပါတယ်။

တပ်ဖွဲ့ဝင်ရန်လင်းဟာ ရှမ်း-မန်းစစ်ဆင်ရေး၊ စဉ့်ကူးမြို့သိမ်းတိုက်ပွဲတို့မှာ ပါဝင်တိုက်ခိုက်ခဲ့သူဖြစ်ပြီး သူ့အနေနဲ့ ရှေ့တန်းရက်စေ့လို့ တပ်ချိန်းတဲ့အချိန်မှာ နောက်တန်းမပြန်ဘဲ လက်ရှိတိုက်ပွဲမှာဆက်လက် တိုက်ပွဲဝင်ရင်း ကျဆုံးခဲ့တာလို့ တပ်ရင်းမှူး ပီလွန်ကပြောပါတယ်။

အထက်ပါစစ်ကောင်စီစစ်ကြောင်းဟာ ဇူလိုင် ၂၅ ရက်ဒီကနေ့အထိ ဆက်လက် ထိုးစစ်ဆင်လာနေတာကြောင့် နှစ်ဖက်တိုက်ပွဲပြင်းထန်နေပြီး တိုက်ပွဲဝင်နေတဲ့ ညီနောင် ၆ ရင်းဖြစ်တဲ့ ရွှေဘိုခရိုင်အမှတ် ( ၁၅၊၁၈၊ ၂၃၊ ၂၆၊ ၉၇၀၆၊ ၁၇၀၁) တပ်ရင်းတွေမှာ ကျည်၊ ခဲယမ်းတွေ လိုအပ်လျှက်ရှိနေတယ်လို့သိရပါတယ်။

စာတည်း – လင်း