မြေလတ်အသံ၊ ဇူလိုင် ၂၅၊ ၂၀၂၅။

စစ်ကိုင်းတိုင်း၊ ကနီမြို့နယ်တရားသူကြီးအဖွဲ့မှ ဥက္ကဌအပါအဝင် ၄ ဦးကို ဇူလိုင် ၁၇ ရက်မှာ တာဝန်ကနေ ရပ်စဲလိုက်တယ်လို့တရားရေးဌာနနဲ့ နီးစပ်သူတဦးက မြေလတ်အသံကို ပြောပါတယ်။

တာဝန်ကနေရပ်စဲခံရလိုက်ရသူ ၄ ဦးဟာ အမျိုးသားညီညွတ်ရေးအစိုးရ – NUG တရားရေးဝန်ကြီး ဌာနရဲ့ ကနီမြို့နယ်တရားသူကြီးအဖွဲ့မှ ဥက္ကဌအမျိုးသမီး ၁ ဦးနဲ့ အဖွဲ့ဝင်အမျိုးသား ၃ ဦးဖြစ်ပါတယ်။

“NUGက စာထွက်တာပါ။ သူတို့ ၄ ဦးက အချင်းချင်း မသင့်မြတ်ကြဘူး။ ဒါပေမယ့် လာဘ်စားတာတို့ ဘာတို့တော့မရှိဘူး”လို့ တရားရေးဌာနနဲ့နီးစပ်သူ အမျိုးသားတဦးကပြောပါတယ်။

အမျိုးသားညီညွတ်ရေးအစိုးရ၊ နိုင်ငံတော်သမ္မတရုံးရဲ့ ဇူလိုင် ၁၇ ရက်စွဲပါ ထုတ်ပြန်စာမှာတော့ ကနီမြို့နယ်တရားသူကြီးအဖွဲ့မှအထက်ပါပုဂ္ဂိုလ်တို့ကို ၎င်းတို့အကြားတွင်ဖြစ်ပေါ်နေတဲ့ အခြေအနေတွေအရ ဆက်လက်တာဝန်ပေးအပ်ရန်မသင့်တာကြောင့် တာဝန်မှရပ်စဲလိုက်တယ်လို့ ဖော်ပြပါတယ်။

အဆိုပါတရားသူကြီးအဖွဲ့အတွင်း လစ်လပ်သွားတဲ့နေရာတွေအတွက်ကိုတော့ ဇူလိုင် ၂၅ ရက်ဒီကနေ့အထိ အစားထိုးခန့်အပ်တာမလုပ်ဆောင်နိုင်သေးဘူးလို့ အထက်ပါအမျိုးသားက ဆိုပါတယ်။

စာတည်း – လင်း

ကျော်စွာ၊ သိုက်ထွန်း

မြေလတ်အသံ၊ ဇူလိုင် ၈၊ ၂၀၂၅။

ကနီ၊ ယင်းမာပင်နဲ့ဘုတလင်မြို့နယ် ကျောင်းသားများသမဂ္ဂ(ဗကသများအဖွဲ့ချုပ်)တွေပူးပေါင်းပြီး ၆၃ နှစ်မြောက် ဆဲဗင်းဇူလိုင်အခမ်းအနားကို စစ်ကိုင်းတိုင်း၊ ကနီမြို့နယ်တနေရာမှာ ပြုလုပ်ခဲ့တယ်လို့ ဗကသများအဖွဲ့ချုပ်ထံက သိရပါတယ်။

အခမ်းအနားကို ဒေသတွင်းအုပ်ချုပ်ရေး၊ ကာကွယ်ရေးနဲ့လုံခြုံရေးအဖွဲ့ဝင်တွေအပါ အင်အား ၆၀ကျော် တက်ရောက်ခဲ့ပြီး သမဂ္ဂအလံကိုအလေးပြုတာ၊ အခင်း ဖြစ်ပွားခဲ့တဲ့ ၁၉၆၂ ဇူလိုင်လ ၇ ရက် အကြောင်းဟောပြောတာ၊ ဒေသတွင်း ပအဖ၊ ပကဖ၊ ပလဖ( ပသုံးလုံး)ယန္တရားနဲ့တွေ့ဆုံဆွေးနွေးတာ၊ ဆဲဗင်းဇူလိုင်အထိမ်းအမှတ် ကဗျာရွတ်ဆိုတာနဲ့ မြို့နယ် ၃ ခုက သမဂ္ဂကျောင်းသားထု တွေ့ဆုံဆွေးနွေးတာတွေပြုလုပ်ခဲ့ကြပါတယ်။

“ ၁၉၆၂ က တော်လှန်ရေးဟာ စစ်အာဏာရှင်စနစ်တခုတည်းကို တော်လှန်ခြင်းမဟုတ်ဘူး၊ ဒီမိုကရေစီပညာရေးအတွက်ပါ တိုက်ပွဲဝင်ခဲ့တယ်ဆိုတာကို အထင်းသားမြင်နိုင်တယ်၊ ကျောင်းသားတွေရဲ့ ရပိုင်ခွင့်၊ ကျောင်းသားအရေးကို ရဖို့တော်လှန်ခဲ့ကြတယ်။ အဲ့ဒီကတည်းက တော်လှန်ရေးသည် အခုအခြေအနေထိ အခုချိန်ထိ တော်လှန်နေခြင်းဖြစ်တယ်”လို့ ဗကသများအဖွဲ့ချုပ်လူထုလုပ်ငန်းကော်မတီဝင်တဦးက မြေလတ်အသံကို ပြောပါတယ်။

အခမ်းအနားပြီးဆုံးပြီးနောက် ဗကသများအဖွဲ့ချုပ်က တက်ရောက်လာတဲ့လူထုကို လက်နက်ကြီးနဲ့ လေကြောင်းအန္တရာယ်သတိပေးစာဖြန့်ဝေတာနဲ့ အသိပညာပေးတာတွေ ပြုလုပ်ခဲ့တယ်လို့ သိရပါတယ်။

အလားတူ စစ်ကိုင်းတိုင်း၊ ယင်းမာပင်မြို့နယ်အတွင်းမှာ ဆဲဗင်းဇူလိုင်အရေးအခင်း ၆၃ နှစ်ပြည့် အထိမ်းမှတ်အဖြစ် စစ်အာဏာရှင်ဆန့်ကျင်ရေးလူထုသပိတ်တိုက်ပွဲ ပြုလုပ်ခဲ့ပါတယ်။

အဆိုပါလူထုသပိတ်လှုပ်ရှားမှုကို ဇူလိုင် ၇ ရက် ညနေပိုင်းမှာ ချီတက်ခဲ့ကြပြီး “ ၇.၇.၆၂ မမေ့ကြနဲ့၊ 7 July” စတဲ့ ဓာတ်ပုံ၊ ဘန်နာတွေနဲ့ စစ်အာဏာရှင်ဆန့်ကျင်ရေးလှုပ်ရှားမှုပြုလုပ်ခဲ့ကြတာလို့ ဆိုပါတယ်။

” ကျောင်းသားသမဂ္ဂအဆောက်အအုံဖြိုခွင်းခံခဲ့ရပြီး၊ ကျောင်းသားတွေအများအပြားအသက်ပေးခဲ့ရတာတွေ ပြည်သူတွေမမေ့ဖို့နဲ့ သမိုင်းမကွယ်ပျောက်ဖို့ ရည် ရွယ်ချက်ရယ်၊ စစ်အာဏာရှင်ဟာ ခေတ်အဆက်ဆက်ပြည်သူကို ဒုက္ခပေးနေတာဆိုတဲ့အသိ ပြည်သူတွေကိုသိစေချင်နဲ့ ရည်ရွယ်ချက်နဲ့ သပိတ်ပြုလုပ်ခဲ့တာဖြစ်တယ်” လို့ ယင်းမာပင်-ဆားလင်းကြီးရွာပေါင်းစုံသပိတ်ကော်မတီဝင်တဦးက ပြောပါတယ်။

အဆိုပါ လူထုသပိတ်ကို ယင်းမာပင်-ဆားလင်းကြီးရွာပေါင်းစုံလူထုသပိတ်ဦးဆောင်ကော်မတီ၊ လူငယ့်အားမာန်၊ ပြည်သူ့အားမာန်၊ နောက်ပြန်မလှည့်ကြေး ဒီတော်လှန်ရေး၊ အောင်လံလွှင့်မည် ရွှေရေကြည်၊ အောင်လံလွှင့်မည် ဒေါင်းသွေးနီ၊ သွေးမအေးတဲ့ရွှေနွယ်သွေးစတဲ့ သပိတ်စစ်ကြောင်းတွေနဲ့ ဒေသခံပြည်သူတွေက ပူးပေါင်းလုပ်ဆောင်ခဲ့တာလို့ သိရပါတယ်။

ယင်းမာပင်၊ ဧပြီ ၂၄၊ ၂၀၂၅။

စစ်ကိုင်းတိုင်း၊ ကနီမြို့နယ်နဲ့ ယင်းမာပင်မြို့နယ်အစပ်ရှိ ကျေးရွာတွေကို စစ်ကောင်စီတပ်က ဧပြီ ၂၂ ရက်ကနေ ၂၄ ရက်ထိ လေကြောင်းတိုက်ခိုက်တာနဲ့ လက်နက်ကြီးပစ်ခတ်တာတွေလုပ်ခဲ့တယ်လို့ ဒေသခံတွေဆီက သိရပါတယ်။

ဧပြီ ၂၂ ရက်မှာ အနောက်မြောက်တိုင်းစစ်ဌာနချုပ်ကနေ ယင်းမာပင်မြို့နယ်၊ သံဘိုရွာကို လက်နက်ကြီးနဲ့ပစ်ခတ်ခဲ့တဲ့အပြင် စက်တပ်လေထီးနဲ့ တိုက်ခိုက်ခဲ့တာကြောင့် အမျိုးသမီး ၃ ဦး ပြင်းထန်ဒဏ်ရာ ရရှိခဲ့ပါတယ်။

“ကွမ်းခြံထဲမှာ အလုပ်လုပ်နေတဲ့ အမျိုးသမီး ၃ယောက်ကို လက်နတ်ကြီးအစတွေ မှန်သွားတယ်၊ အသက် ၅၀ ဝန်းကျင်အမျိုးသမီး ၁ ယောက်နဲ့ အသက် ၃၀ခန့်အမျိုးသမီး ၂ ယောက်ပေါ့၊ ၃၀ ခန့်အရွယ် အမျိုးသမီးတစ်ယောက်ကတော့ ဆီးခုံကိုထိသွားတယ်၊ ကျန်အမျိုးသမီး ၁ ယောက်ကတော့ ခြေသလုံးကို ထုတ်ချင်းပေါက်သွားတယ်၊ အသက် ၅၀ ဝန်းကျင်အမျိုးသမီးက ပေါင်ကိုမှန်သွားတယ်၊ သူလည်းထုတ်ချင်းပေါက်တာပဲ။” လို့ ရွာခံတဦးက ပြောပါတယ်။

အလားတူ ကနီမြို့နယ်၊ သမင်ခြံရွာနဲ့ အနီးတဝိုက်ကိုလည်း ဧပြီ ၂၂ ရက်မှာ ဒရုန်းနဲ့ ဗုံးကြဲခဲ့တာကြောင့် နေအိမ် ၁ လုံးပျက်စီးပြီး ခိုင်းနွား ၁ ကောင်ကို ထိမှန်ဒဏ်ရာရခဲ့ပါတယ်။

အခုလိုစစ်ကောင်စီရဲ့တိုက်ခိုက်မှုတွေ ဆက်တိုက်ဆိုသလိုရင်ဆိုင်နေရတာကြောင့် သက်ကြီးပိုင်းဒေသခံတွေလည်း ထိတ်လန့်နေကြရတယ်လို့ ကနီမြို့နယ်မှ ဒေသခံတဦးကပြောပါတယ်။

“လာပြီဆိုတဲ့ အသံကြားရင် ဗုံးခိုကျင်းထဲဝင်နေကြရတယ်၊ အဓိကကတော့ အသက်ကြီးရွယ်အိုတွေဆိုရင် တော်တော်ကို ထိတ်လန့်နေကြတယ်။ နောက်ဆက်တွဲအခြေအနေတော့ ဘယ်လိုလာမယ်မသိဘူး၊ ကျောင်းတွေကတော့ ပိတ်ထားတယ်၊ သုံးရက်ဆက် လာပစ်နေတာ နွား ၁ ကောင်ပဲထိတာ ကံကောင်းတာပဲ။” လို့ ကနီမြို့နယ်ကျေးရွာတရွာက ဒေသခံတဦးက ပြောပါတယ်။

ဒါ့အပြင် ဧပြီ ၂၃ နဲ့ ၂၄ ရက်မှာလည်း ကနီ၊ ယင်းမာပင်အစပ်က ကျေးရွာတွေအနီးကို စက်တပ်လေထီးနဲ့ လေကြောင်းတိုက်ခိုက်ခဲ့ပြီး ဒီတိုက်ခိုက်မှုမှာတော့ အထိအခိုက်မရှိဘူးလို့ သိရပါတယ်။

စစ်ကောင်စီဟာ ဧပြီ ၂ ရက်ကနေ ဧပြီ ၃၀ ရက်အထိ အပစ်ရပ်ကြောင်းကြေညာထားပေမယ့် စစ်ကိုင်း၊ မကွေးနဲ့ ပဲခူးတိုင်းတွင်းက ကျေးရွာတွေကို လေကြောင်းတိုက်ခိုက်မှုတွေ ခပ်စိပ်စိပ်လုပ်ဆောင်နေတာဖြစ်ပါတယ်။

အလာတူး ဧပြီ ၂၃ ရက် နေ့လယ်ပိုင်းမှာလည်း စစ်ကိုင်းတိုင်း၊ ဒီပဲယင်းမြိုနယ်၊ လက်လှုပ်တောင်ရွာက ဆေးပေးခန်းတဝိုက်ကို လေကြောင်းကနေတိုက်ခိုက်လို့ အမျိုးသမီး ၃ ဦးအပါ ၅ ဦးသေဆုံးခဲ့ပါသေးတယ်

သတင်း – ကျော်စွာ၊ စာတည်း – လင်း

ကနီ၊ မတ် ၁၉၊ ၂၀၂၅။

စစ်ကိုင်းတိုင်း၊ ကနီမြို့နယ်၊ အုမ္မနဲ့ယင်းကျေးရွာကြားမှာ လေကြောင်းတိုက်ခိုက်ခံရလို့ အမျိုးသမီး ၂ ဦးဒဏ်ရာရတယ်လို့ ကနီမြို့နယ်ပကဖထံက သိရပါတယ်။

မတ် ၁၈ ရက် မနက် ၁၁ နာရီ မိနစ် ၂၀ ခန့်မှာ အဆိုပါကျေးရွာ ၂ ရွာကြားက လမ်းနဲ့ယာခင်းတွေကို စစ်ကောင်စီတပ်ဖွဲ့ဝင်တွေဘက်က ဂျက်ဖိုက်တာ ၂ စီးနဲ့ လေကြောင်းတိုက်ခိုက်မှု ၂ ကြိမ်ပြုလုပ်ခဲ့တယ်လို့ ဆိုပါတယ်။

“မထင်မှတ်လည်း လာကြဲတာပေါ့။ စစ်ရေးလှုပ်ရှားမှု ဘာမှလည်းမရှိဘူး။ တောသွားလမ်းတွေမှာ ကျတာ။ လှည်းနဲ့သွားနေချိန် ထိတာ။ ရော့ကက်တွေနဲ့ ပစ်ခတ်သွားတာ။”လို့ ကနီမြို့နယ်ပကဖတာဝန်ခံက ပြောပါတယ်။

တိုက်ပွဲဖြစ်ပွါးတာမရှိဘဲ စစ်ကောင်စီတပ်က လေကြောင်းကနေတိုက်ခိုက်ခဲ့တာကြောင့် ကုန်းသာကျေးရွာနေ အသက် ၂၀ ကျော်အရွယ် မယဥ်ယဥ်ဌေးမှာ ဘယ်လက်မောင်း၊ ဘယ်ဦးခေါင်း၊ နားရွက်နဲ့ ယင်းကျေးရွာနေ အသက် ၃၂ နှစ်အရွယ် မခင်လှိုင်ဝင်းမှာ ဝမ်းဗိုက်နဲ့ဦးခေါင်းတွေမှာ ထိခိုက်ဒဏ်ရာရခဲ့ပြီး လှည်း ၁ စီးပျက်စီးသွားသလို နွား ၂ ကောင်လည်း ထိခိုက်ဒဏ်ရာရသွားတယ်လို့ သိရပါတယ်။

မတ် ၁၀ ရက်ကလည်း ကနီမြို့နယ်၊ ချင်းတွင်းမြစ်ကမ်းဘေးက နတ်ကြီးရွာကိုတိုက်လေယာဉ်နဲ့ ဗုံးကြဲခံရလို့ ၁ ဦး သေဆုံး ၁ ဦး ဒဏ်ရာရတယ်လို့ သိရပါတယ်။

စာတည်း – ကိုချမ်း

ကနီ၊ မတ် ၁၁၊ ၂၀၂၅။

စစ်ကိုင်းတိုင်း၊ ကနီမြို့နယ်၊ ချင်းတွင်းမြစ်ကမ်းဘေးက နတ်ကြီးရွာကိုတိုက်လေယာဉ်နဲ့ ဗုံးကြဲခံရတာကြောင့် ဒေသခံအမျိုးသား ၁ ဦးသေဆုံးပြီး ၁ ဦးဒဏ်ရာရတယ်လို့ ကနီမြို့နယ်ပြည်သူ့ကာကွယ်‌ရေးအဖွဲ့ရဲ့ ပြန်ကြားရေးတာဝန်ခံဆီက သိရပါတယ်။

မတ် ၁၀ ရက်နေ့လယ် ၂ နာရီ ၃၀ မိနစ်ကနေ ၅ နာရီထိအတောအတွင်း စစ်ကောင်စီဘက်က ဂျက်ဖိုက်တာ ၃ စီးနဲ့ ကျေးရွာအနီးက ကူးတို့ဆိပ်သောင်ပြင်နဲ့တောစပ်တွေကို ဗုံးကြဲတာ၊ ရော့ကတ်တွေနဲ့ ၇ ကြိမ်ပစ်ခတ်ခဲ့တာလို့ဆိုပါတယ်။

“ဂျက်ဖိုက်တာနဲ့စုစုပေါင်း ၃ စီး ၇ ကြိမ်လာပစ်တာ။ နတ်ကြီးအရှေ့ဘက် သောင်ပြင်မှာ အများပြည်သူသုံးတဲ့ကူးတို့မှာ အများဆုံးကျတာ။ ငှက်ပျောခြံတွေထဲလည်းကျတယ်။ “လို့ ကနီမြို့နယ်ပကဖပြန်ကြားရေးတာဝန်ခံကပြောပါတယ်။

လေ‌ကြောင်းကနေဗုံးကြဲပစ်ခတ်ခံရလို့ သောင်ပြင်ကူးတို့ဆိပ်နားမှာ ကမ်းကူးဖို့စောင့်နေတဲ့ အသက် ၃၀ ကျော်အရွယ်အမျိုးသား ၁ ဦးသေဆုံးပြီး ၁ ဦးဒဏ်ရာရကာ ကား ၂ စီးမီးလောင်ပျက်စီးသွားတယ်လို့ သိရပါတယ်။

လေကြောင်းကနေ ဗုံးကြဲပစ်ခတ်ပြီးနောက် မတ် ၁၁ ရက် ဒီမနက်ပိုင်းထိ အဆိုပါ ကူးတို့ဆိပ်ကမ်းကို သွားလာသူမရှိတော့ဘူးလို့ သိရပါတယ်။

ဗုံးကြဲပစ်ခတ်ခံရတဲ့ ကူးတို့ဆိပ်ဟာ နတ်ကြီးကျေးရွာကနေ အရှေ့ဘက် မုဌောကျေးရွာကို ကူးတဲ့ ကူးတို့ဆိပ်ဖြစ်ပြီး လေကြောင်းအန္တရာယ်ကြောင့် နတ်ကြီး၊ ဝချောင်းလေး၊ ဝချောင်းကြီး၊ မုဌောအရှေ့၊ မုဌောအနောက်အပါအဝင် ကျေးရွာ ၆ ရွာခန့်က ဒေသခံ ၆,၀၀၀ ကျော်ဘေးလွတ်ရာကို ထွက်ပြေးတိမ်းရှောင်နေကြရပါတယ်။

ပြီးခဲ့တဲ့ ဖေဖော်ဝါရီ ၁၇ ရက်နေ့ကလည်း ကနီနယ် မုဌောကျေးရွာကူးတို့ဆိပ်ကို စစ်ကောင်စီဘက်က လေကြောင်းကနေ ဗုံးကြဲလို့ သံဃာတပါး၊ ဒေသခံ ၂ ဦးဒဏ်ရာရပြီး ဆီတင်ယာဥ် ၁ စီးနဲ့ဆိုင်ကယ် ၁၁ စီးမီးလောင်ပျက်စီးသွားတယ်လို့ သိရပါတယ်။

စာတည်း – လင်း