အောင်လံ၊ ဩဂုတ် ၁၆၊ ၂၀၂၅။

မကွေးတိုင်း၊ အောင်လံမြို့ပေါ်မှာ စစ်ကောင်စီတပ်ဖွဲ့ဝင်တွေက ဒေသခံအမျိုးသား ၁၂ ဦးကို စစ်ကောင်စီတပ်ဖွဲ့ဝင်တွေက စစ်မှုထမ်းအတွက် ဖမ်းဆီးခဲ့တယ်လို့ ဒေသခံတွေဆီက သိရပါတယ်။

ဩဂုတ် ၁၀ ရက်ကနေ ၁၃ ရက်အတွင်း စစ်ကောင်စီတပ်နဲ့ပျူစောထီးအဖွဲ့ဝင်တွေက အောင်လံမြို့အထွက် တာဂွလမ်းဆုံ၊ မြို့ရှောင်လမ်းရှိ “ဇာမဏီ”စက်သုံးဆီဆိုင်အနီး၊ မြို့တောင်ဘက်အထွက်ဂိတ်နဲ့ မြောက်ဘက်အထွက်ဂိတ်တွေမှာ ဖမ်းဆီးမှုတွေပြုလုပ်နေတာလို့ ဆိုပါတယ်။

“လမ်းသွားလမ်းလာတွေကို ဖမ်းတာ။ ရွာဘက်ကလာတဲ့လူတွေလည်း ဖမ်းတယ်။ ကားတွေပေါ်ကနေ မှတ်ပုံတင်တွေကြည့်ပြီးတော့ ခေါ်တယ်။ ကျနော်မြင်ခဲ့တဲ့နေရာမှာတော့ တာဝမှာ ပျူစောထီး ၃ ယောက်ပဲရှိတယ်။ အဲ့ ၃ ယောက်ရပ်တဲ့နေရာက စစ်တပ်ရှိတာကိုး။ ကျနော်သိရသလောက်ဆို (ဖမ်းခံရတာ) ၁၂ ယောက်ရှိတယ်”လို့ ဒေသခံတဦးက ပြောပါတယ်။

ဩဂုတ် ၁၀ ရက်မှာ ရွှေပန်းတောကျေးရွာဘက်ကနေ အောင်လံစျေးပွဲတော်လာတဲ့ အမျိုးသား ၇ ဦးကို တာဝဂိတ်မှာဖမ်းဆီးပြီး ဩဂုတ် ၁၁ ရက်မှာ အောင်လံမြို့တွင်းမှာ ကုန်တင်ယာဥ်တွေကို ရပ်ခိုင်းပြီး တွဲကားစပယ်ယာ ၃ ဦး၊ မြို့ပေါ်မှာပြုလုပ်နေတဲ့ ပွဲစျေးအတွင်းက အမျိုးသား ၁ ဦး၊ ဩဂုတ် ၁၂ ရက်မှာ အောင်လံ-ပြည်ကားလမ်းပေါ်က တီတွတ်ဂိတ်မှာ ခရီးသည်တင်ယာဥ်နဲ့လိုက်ပါလာတဲ့ အမျိုးသား ၂ ဦး ဖမ်းဆီးခံရတာလို့ ဆိုပါတယ်။

ဖမ်းခံရသူတွေဟာ အသက် ၁၈ နှစ်ကနေ ၃၅ နှစ်ကြားအရွယ်တွေဖြစ်ပြီး ခလရ ၇၁ တပ်ထဲမှာ ဖမ်းဆီးထားကာ မိသားစုဝင်တွေက ငွေကြေးနဲ့သွားပြန်ရွေးဖို့ လုပ်ဆောင်ပေမယ့် ညှိုနှိုင်းမခံဘူးလို့ သိရပါတယ်။

ဩဂုတ် ၁၆ ရက် ဒီကနေ့အထိတော့ ဖမ်းဆီးခံထားရသူတွေက ပြန်လွှတ်လာတာမျိုးမရှိသေးဘဲ ဆက်လက်ထိန်းသိမ်းခံထားရကာ စစ်မှုထမ်းပို့ဆောင်ဖို့ရှိနေတာကို စုံစမ်းသိရှိထားရတယ်လို့ အထက်ပါဒေသခံက ဆိုပါတယ်။

အခုလို စစ်မှုထမ်းဖမ်းဆီးနေတာကြောင့် ကျေးရွာတွေဘက်ကနေ မြို့ပေါ်ကို အမျိုးသားတွေ မလာရဲတော့ဘဲ အမျိုးသမီးတွေသာ စျေးရောင်းစျေးဝယ်သွားလာနေကြသလို မြို့ခံအမျိုးသားတွေလည်း အခြေအနေကြည့်သွားလာနေကြတယ်လို့ သိရပါတယ်။

ပြီးခဲ့တဲ့ ဇူလိုင် ၂၁ ရက်ကနေ ၂၄ ရက်အတွင်းကလည်း အောင်လံမြို့နယ်၊ ရွာမထုံ၊ အောင်မြေကုန်း၊ ငပြင်းကျေးရွာတွေက ဒေသခံ အမျိုးသား ၁၅ ဦးကို စစ်မှုထမ်းဖို့နေအိမ်တွေကနေ ဝင်ရောက်ဖမ်းဆီးသွားသေးတယ်လို့ သိရပါတယ်။

ပုံစာ – စစ်မှုထမ်းသင်တန်းအတွက် တပ်သားသစ် စုဆောင်းခံရသူအချို့အား တွေ့ရစဉ်။ (ပုံဟောင်း) (ဓါတ်ပုံ – စစ်ကောင်စီ)

စာတည်း – လင်း

အောင်လံ၊ ဇူလိုင် ၂၆၊ ၂၀၂၅။

မကွေးတိုင်း၊ အောင်လံမြို့နယ်ကကျေးရွာတွေမှာ လူငယ်အမျိုးသားတွေ ရက်ခြားဆိုသလို စစ်မှုထမ်းဖို့အတွက် ပေါ်တာဆွဲဖမ်းဆီးခံနေရတယ်လို့ ဒေသခံတွေထံက သိရပါတယ်။

ဇူလိုင် ၂၄ ရက် ညပိုင်းမှာ ရွာမထုံးရွာအခြေစိုက် အမှတ် ၁၅ ကာကွယ်ရေးပစ္စည်းစက်ရုံ(ကပစ ၁၅) စစ်ကောင်စီတပ်နဲ့ပျူစောထီးတပ်ဖွဲ့တွေက ရွာမထုံးရွာခံအမျိုးသား ၂ ဦးကို နေအိမ်တွေထဲ ဝင်ရောက်ဖမ်းဆီးသွားတယ်လို့ ဆိုပါတယ်။

“ပျူစောထီး ချစ်သဲက အဲ့ဒီရွာသား ၂ ယောက်ကို လိုက်ပြတာ။ သူက ဦးဆောင်ပြီး ဖမ်းဆီးခိုင်းတာပါ။ စစ်မှုထမ်းဖို့လို့ပြောပြီးခေါ်သွားတာဘဲ။ ရွာရဲ့ အနောက်ဘက် ကပစ ၁၅ ဘက်ကို ခေါ်သွားတာ။ အခုထိ ဘာသတင်းမှ မကြားရသေးဘူး” လို့ အောင်လံဒေသခံအမျိုးသမီးတဦးက ​မြေလတ်အသံကို ပြောပါတယ်။

ဖမ်းဆီးခံရသူတွေဟာ အသက် ၂၅ နှစ်အရွယ် ရွာမထုံးရွာနေ အမျိုးသား ၂ ဦး ဖြစ်ပြီး ၄င်းတို့ ၂ ဦး ကို ကပစ ၁၅ တပ်တွင်းကို ဖမ်းခေါ်သွားတာဖြစ်ကာ ဇူလိုင်လ ၂၆ ရက် ဒီကနေ့အထိ အဆက် အသွယ်မရသလို ပြန်လည်လွတ်မြောက်လာတာမရှိဘူးလို့ သိရပါတယ်။

အလားတူ ဇူလိုင် ၂၁ ရက်ညပိုင်းကလည်း အောင်လံမြို့နယ်၊ အောင်မြေကုန်းရွာကို ကပစ ၁၅ စစ်ကောင်စီတပ်ဖွဲ့ဝင် ၁၀ ဦးကျော် ဝင်ရောက်စီးနင်းပြီး အသက် ၂၂ နှစ်ကနေ ၄၀ ကြား အမျိုးသား ၃ ဦးကို ဖမ်းဆီးသွားခဲ့တယ်လို့ ဆိုပါတယ်။

ပြီးခဲ့တဲ့ ဇူလိုင် ၂၄ ရက် နေ့လယ်ပိုင်းကလည်း အောင်လံမြို့၊ ငပြင်းကျေးရွာကို စစ်ကောင်စီအဖွဲ့ဝင်တွေ ဝင်ရောက်ပြီး ရွာခံ အရပ်သား ၁၀ ဦးကျော်ကို ဖမ်းဆီးသွားခဲ့တယ်လို့ အောင်လံမြို့နယ်အတွင်းစစ်ရေးနဲ့ ဒေသတွင်းသတင်းကိုဖော်ပြနေတဲ့ အောင်လံလူထုအဖွဲ့က ထုတ်ပြန်ထားပါတယ်။

“နောက်ထပ်လည်းသူတို့လူလိုရင်ဖမ်းအုံးမှာပဲ။ အခုအနိုင်ကျင့်ဖမ်းဆီးခံရတဲ့ လူတန်းစားတွေက အခြေခံလူတန်းစားတွေပါ။ နယ်မြေခံတော်လှန်ရေးအဖွဲ့တွေအနေနဲ့လည်း ငြိမ်ခံမနေဘဲ ဒီစစ်မှုထမ်းဖမ်းဆီးနေတဲ့ကိစ္စနဲ့ပတ်သက်ပြီး သတိပေးချက်တွေ ထုတ်စေချင်တယ်”လို့ အထက်ပါ အမျိုးသမီးတဦးကပြောပါတယ်။

ရွာမထုံးကျေးရွာအနောက်ဘက် ကပစ ၁၅ တပ်ဝင်ပေါက်လမ်းခွဲမှာ စစ်ကောင်စီနဲ့ပျူစောထီးအဖွဲ့ဝင် ၂၀ ဦးဝန်းကျင်ဟာ ဂိတ်စခန်းချပြီး ဖြတ်သန်းသွားလာနေတဲ့ အရပ်သားတွေဆီကနေ ငွေကြေးတောင်းခံတာနဲ့ ကုန်ပစ္စည်းတွေကို လုံခြုံရေးအကြောင်းပြသိမ်းယူလေ့ရှိတယ်လို့ သိရပါတယ်။

ကပစ ၁၅ တပ်ဟာ အောင်လံမြို့နယ် ရွာမထုံး၊ ရွှေပန်းတော၊ ဆင်ကြံ၊ သမ္ဘူလ၊ ကျားသေ စတဲ့ ရွာတွေအနီးမှာတည်ရှိပြီး ဒေသခံအမျိုးသားတွေကို ဖမ်းဆီးတာအပြင် ပဲခူးရိုးမတောင်ခြေအစပ်ကျေးရွာတွေကို စစ်ကြောင်းထိုးမီးရှို့တာတွေလည်း လုပ်ဆောင်လေ့ရှိတယ်လို့ သိရပါတယ်။

စာတည်း – ဟိန်းစံ

အောင်လံ၊ မေ ၅၊ ၂၀၂၅။

မကွေးတိုင်း၊ အောင်လံမြို့နယ်၊ ကန်သာယာကျေးရွာကို စစ်ကောင်စီတပ်က ၂ ရက်ဆက် ဗုံးကြဲခံရတာကြောင့် ဒေသခံ ၄ ဦးထိခိုက်ပြီး နေအိမ် ၁၀ လုံးကျော်ပျက်စီးခဲ့တယ်လို့ ရွာနဲ့ နီးစပ်သူတွေဆီက သိရပါတယ်။

မေ ၃ ရက်နေ့လယ် ၁ နာရီခန့်မှာ ဂျက်ဖိုက်တာ ၁ စီးက ကန်သာယာကျေးရွာထဲကို ပေါင် ၂၀၀ ဗုံး ၂ လုံးကြဲချခဲ့ရာ ကျေးရွာအရှေ့ဘက်ကိုကျပြီး နေအိမ် ၃ လုံးပျက်စီးခဲ့ပါတယ်။

မေ ၄ ရက်ည ၇ နာရီ ၄၅ မိနစ်ခန့်မှာလည်း Y 12 လေယာဥ်နဲ့ ၆၀ မမ ဗုံးသီး အလုံး ၂၀ ခန့်ကြဲချခဲ့ရာ ကျေးရွာထဲ ၆ လုံးကျရောက်ပေါက်ကွဲပြီး ကျန်ဗုံးသီးတွေက ကျေးရွာအပြင်ဘက်ကို ကျရောက်ပေါက်ကွဲတာတွေရှိခဲ့တယ်လို့ ဆိုပါတယ်။

“ကန်သာယာမှာက ဗုံးသီးအလုံး ၂၀ လောက်ချသွားတာဆိုတော့ အိမ်တွေထိခိုက်တာ၊ ပျက်တာ လန်တာပျံတာတွေရှိတယ်။ လူထိခိုက်တာလည်းရှိတယ်။ အိမ်တွေဆို ထရံပေါက်တာတွေပါဆို ၁၀ လုံးလောက်ရှိမယ်”လို့ ရွာနဲ့နီးစပ်သူတဦးက ပြောပါတယ်။

ဗုံးကျပေါက်ကွဲလို့ အသက် ၁၆ နှစ် နဲ့ ၂၀ နှစ်အရွယ် အမျိုးသား ၂ ဦး၊ ၄၀ ကျော်အရွယ် အမျိုးသား ၂ ဦး စုစုပေါင်း ၄ ဦး မစိုးရိမ်ရဒဏ်ရာရသွားပြီး နွား ၄ ကောင်သေဆုံးခဲ့တယ်လို့ ဆိုပါတယ်။

အိမ်ခြေ ၁၂၀ ခန့်ရှိတဲ့ကန်သာယာရွာဟာ ခုလိုလေကြောင်းကဗုံးကြဲခံရတာ ပထမဆုံးအကြိမ်ဖြစ်ပြီး လက်ရှိမှာ ဒေသခံ ၄၀၀ ခန့်လည်း ဘေးလွတ်ရာကျေးရွာတွေဘက်ကို ထွက်ပြေးတိမ်းရှောင်နေရပါတယ်။

စာတည်း – လင်း

အောင်လံ၊ ဧပြီ ၆၊ ၂၀၂၅

မကွေးတိုင်း၊ အောင်လံမြို့၊ စမ်းချောင်းရပ်ကွက်၊ ၁၈ လမ်းနဲ့ ၁၉ လမ်းအကြား ကားဂိတ်ဝန်းအဟောင်းရှိ လူနေအိမ်ဆိုင်ခန်း ၄၀ ကျော်ကို စစ်ကောင်စီတပ်ဖွဲ့တွေနဲ့ ဌာနဆိုင်ရာအဖွဲ့ဝင်တွေက အင်အားသုံးဖျက်ဆီးနေတယ်လို့ ဒေသခံတွေဆီက သိရပါတယ်။

ဧပြီ ၆ ရက်ဒီမနက် ၉ နာရီခန့်မှာ အောင်လံမြို့နယ်စည်ပင်သာယာအဖွဲ့ဝင်၊ ရဲနဲ့ စစ်ကောင်စီ စုစုပေါင်းအင်အား ၃၀ ကျော်လောက်က ကားဝန်းဟောင်းထဲကိုရောက်လာပြီး ဆိုင်ခန်းတွေကို ဖြိုဖျက်နေတယ်လို့ ဆိုပါတယ်။

“ဘက်ဟိုးနဲ့ အပြင်ဘက်က ဆိုင်ခန်းတွေကို ဖျက်နေတယ်။ အဲ့နားကို လမ်းပိတ်ထားတယ်။ ကားတွေ အဖြတ်မခံဘူး။ ပစ္စည်းသယ်တဲ့သူတွေတောင် အနောက်လမ်းကနေပတ်ပြီး သယ်နေရတယ်။ ပြီးတော့ စည်ပင်က မိုက်နဲ့အော်နေတယ်။”လို့ ဖြစ်စဉ်ကိုမြင်တွေ့ရတဲ့ ဒေသခံအမျိုးသမီးတဦးက ပြောပါတယ်။

လွန်ခဲ့တဲ့ နှစ်ပေါင်း ၃၀ ကျော်ကတည်းက ဆောက်လုပ်ထားတဲ့ အဆိုပါကားဝန်းထဲမှာရှိတဲ့ အဲ့ဒီဆိုင်ခန်းတွေကို အောင်လံမြို့နယ်စည်ပင်သာယာဆီကနေ ဆိုင်ခန်းရှင်တွေက ကျပ်သိန်းရာချီပေး ဝယ်ယူထားတာလို့ ဆိုပါတယ်။

အဆိုပါ ဆိုင်ခန်းတွေကို ယနေ့အပြီးဖြိုချဖို့ စစ်ကောင်စီဘက်က စီစဉ်ထားတဲ့အတွက် ဆိုင်ခန်းရှင်တွေကို ပစ္စည်းချက်ချင်းရွှေ့ပြောင်းဖို့ ပြောထားတယ်လို့လည်းသိရကြောင်း အထက်ပါအမျိုးသမီးက ပြောပါတယ်။

ခုလို ဆိုင်ခန်းတွေကိုဖျက်သိမ်းရာမှာလည်း ဆိုင်ခန်းပိုင်ရှင်တွေကို နစ်နာကြေးပေးတာမရှိဘူးလို့ ဆိုပါတယ်။၊

ပြီးခဲ့တဲ့ ဇန်နဝါရီလက ကားဝန်းအသစ်ကို အောင်လံမြို့ပြင်မှာဖွင့်လှစ်ခဲ့တာကြောင့် ကားဝန်းအဟောင်းကို စည်ပင်သာယာအဖွဲ့ဘက်က ဖျက်သိမ်းဖို့လုပ်ဆောင်လာတာဖြစ်နိုင်တယ်လို့လည်း သူကခန့်မှန်းပါတယ်။

ဆိုင်ခန်းရှင်တွေအနေနဲ့ ၂၀၂၄ ဒီဇင်ဘာ ၃၁ ရက်နဲ့ ၂၀၂၅ ဇန်နဝါရီ ၁၅ ရက်တို့မှာ အပြီးဖယ်ရှားပေးဖို့ စစ်ကောင်စီရဲ့ မကွေးတိုင်းအစိုးရရုံးကညွှန်ကြားပေမယ့် မထွက်ခွာတာကြောင့် ဧပြီ ၆ ရက်မနက် ၉ နာရီနောက်ဆုံးထားထွက်ခွာဖို့နဲ့ မထွက်ခွာရင်ဖယ်ရှားရှင်းလင်းမယ်လို့ ဧပြီ ၄ ရက်ထုတ် အောင်လံမြို့နယ်စည်ပင်သာယာရေးအဖွဲ့ရဲ့ ကြေညာချက်မှာဖော်ပြထားပါတယ်။

လက်ရှိအချိန်မှာ လူမနေတဲ့ဆိုင်ခန်း ၄ ခန်းကို ဘက်ဟိုးနဲ့ဖြိုချထားပြီး ဆိုင်ခန်းပိုင်ရှင်တွေက ငိုယိုတောင်းပန်တာကြောင့် ပစ္စည်းရွှေ့မယ့်အချိန်ကို ခေတ္တပေးထားကာ ပစ္စည်းတွေရွှေ့ပြီးတာနဲ့ဖြိုချဖို့ စစ်ကောင်စီအဖွဲ့ဝင်တွေက စောင့်ဆိုင်းနေကြတယ်လို့ သိရပါတယ်။

စာတည်း – လင်း

အောင်လံ၊ ဖေဖော်ဝါရီ ၂၃၊ ၂၀၂၅။

မကွေးတိုင်း၊ အောင်လံမြို့နယ်၊ သမ္ဘူလကျေးရွာထိပ်ရှိ ကွမ်းယာဆိုင်အနီးမှာ သမ္ဘူလတိုက်နယ်ရဲစခန်းမှ နယ်ထိန်းရဲဒုတပ်ကြပ် ၁ ဦး ပစ်ခတ်ခံရပြီးသေဆုံးခဲ့တယ်လို့ အောင်လံမြို့နယ် ပြည်သူ့ကာကွယ်ရေးအဖွဲ့ဆီက သိရပါတယ်။

သေဆုံးသူဟာ အသက် ၃၀ ကျော်အရွယ်ရှိ နယ်ထိန်းရဲဒုတပ်ကြပ် မျိုးကြီး ဖြစ်ပြီး ဖေဖော်ဝါရီ ၂၂ ရက် မနက် ၈ နာရီခန့်မှာ အရပ်ဝတ်နဲ့ကွမ်းယာဆိုင်မှာကွမ်းဝယ်နေစဉ် ဒေသခံကာကွယ်ရေးတပ်ဖွဲ့ ဝင်တွေက ပစ်ခတ်ခဲ့တာလို့ ဆိုပါတယ်။

“မနက်ဆို သူက တကြိမ်နှစ်ကြိမ်လောက် အပြင်ပုံမှန်ထွက်လေ့ရှိတယ်။ အဲ့ဆိုင်ကလည်း သူထိုင်နေကျ ဆိုင်ဆိုတာ ကျနော်တို့သိထားတယ်။ မနက်စောဆို သွားလာတာရှိတယ်။ ကွမ်းထုတ်တယ်ပေါ့။ မကြာပါဘူး။ အဲ့မှာ လေးငါးမိနစ်နေ ပြန်ပေါ့။ အရပ်ဝတ်နဲ့ရှိနေချိန် ကျည် ၆ တောင့်ပစ်ခဲ့တာ”လို့ အောင်လံမြို့နယ်ပြည်သူ့ကာကွယ်ရေးအဖွဲ့ ဒုတာဝန်ခံကပြောပါတယ်။

ပစ်ခတ်ခံရလို့ ရဲဒုတပ်ကြပ် မျိုးကြီးမှာ ဦးခေါင်းနဲ့နောက်ကျောတွေမှာ ကျည်ထိဒဏ်ရာနဲ့ နေရာတင် သေဆုံးခဲ့တယ်လို့ ဆိုပါတယ်။

ပစ်ခတ်ခံရတဲ့နေရာနဲ့ရဲစခန်းဟာ ကိုက် ၅၀၀ ခန့်ကွာဝေးပြီး ပစ်ခတ်ခံရပြီးနောက် ရဲတွေက အလောင်းကိုလာကောက်သွားတယ်လို့ အောင်လံမြို့နယ်ပြည်သူ့ကာကွယ်ရေးအဖွဲ့ ဒုတာဝန်ခံက ပြောပါတယ်။

အဲ့ဒီနောက် ရဲတပ်ဖွဲ့ဝင်တွေဟာ ကျေးရွာအဝင်အထွက်လမ်းတွေပိတ်ပြီး ရှာဖွေမှုတွေပြုလုပ်ခဲ့သလို အောင်လံအခြေစိုက် ခလရ ၇၁၊ ကပစ ၁၅ က စစ်ကောင်စီအင်အား ၇၀ ခန့်ကလည်း သမ္ဘူလရဲစခန်းကို အင်အားဖြည့်ပြီးရောက်လာတယ်လို့ သိရပါတယ်။

ဒီပစ်ခတ်မှုကိုတော့ သရက်ခရိုင်တပ်ရင်း ၁၊ နေပြည်တော်တပ်ရင်း ၉၀၂၊ နေပြည်တော်တပ်ရင်း ၈၀၄၊ အောင်လံမြို့နယ်ပကဖအဖွဲ့ဝင်တွေက ပူးပေါင်းပစ်ခတ်ရှင်းလင်းခဲ့တာလို့ ဆိုပါတယ်။

ပြီးခဲ့တဲ့နှစ် စက်တင်ဘာ ၂၄ ရက်ကလည်း အောင်လံမြို၊ ရွာထောင်ရပ်ကွက်၊ အေးချမ်းဖြိုး (၁၉) လမ်းမှာနေထိုင်နေတဲ့ တလုပ်ပင်ကျေးရွာအုပ်ချုပ်ရေးမှူးနဲ့ တပည့်ဖြစ်သူတို့ နေအိမ်ရှေ့ရှိနေစဉ် ပစ်ခတ်ခံရပြီး အုပ်ချုပ်ရေးမှူသေဆုံးကာ တပည့်ဖြစ်သူဒဏ်ရာရခဲ့တယ်လို့ သိရပါတယ်။

စာတည်း – လင်း

မကွေး၊ ဖေဖော်ဝါရီ ၁၆၊ ၂၀၂၅။

မကွေးတိုင်း၊ အောင်လံမြို့၊ မကျည်းကုန်းရပ်ကွက်၊ သဇင်လမ်းသွယ်မှာ စစ်မှုထမ်းပေါ်တာဆွဲခံရပြီး ပြန်ပြေးလာသူကို လာခေါ်တဲ့ ရဲတပ်ကြပ်ကြီးအပါအဝင် ၂ ဦး ဓားခုတ်ခံရပြီး သေဆုံးသွားတယ်လို့ ဒေသခံတွေဆီက သိရပါတယ်။

ဖေဖော်ဝါရီ ၁၅ ရက်ညနေ ၅ နာရီခန့်မှာ အောင်လံမြို့မရဲစခန်းက အသက် ၅၃ နှစ်အရွယ် ရဲတပ်ကြပ်ကြီး ကျော်သူရနဲ့ အသက် ၅၀ အရွယ်ငထွန်းတို့ ၂ ဦးဟာ စစ်မှုထမ်းအတွက်ပေါ်တာဆွဲခံရပြီးနောက် ပြန်ပြေးလာသူ အသက် ၃၃ နှစ်အရွယ်အမျိုးသားကို သဇင်လမ်းသွယ်က နေအိမ်မှာ ပြန်လာခေါ်ချိန် အဆိုပါအမျိုးသားနဲ့ အကိုဖြစ်သူတို့က ဓါးနဲ့ခုတ်ခဲ့တာလို့ ဆိုပါတယ်။

“သူတို့က လက်နက်မပါဘူး။ အရင်ကတော့ ကိုင်ကြတယ်။ နှစ်ယောက်ထဲအေးရာအေးကြောင်း သွားတာ။ ဟိုကလည်း သူတို့အပူနဲ့သူတို့ရှိနေတာဆိုတော့ ထွက်ခုတ်လိုက်တာ နှစ်ယောက်စလုံး အပြတ်ပဲ။ နှစ်ယောက်စလုံးသေသွားတာ။”လို့ ဒေသခံတဦးကပြောပါတယ်။

ဓားနဲ့ခုတ်ခံရချိန် ၂ ဦးစလုံးထွက်ပြေးခဲ့ပြီး ရဲတပ်ကြပ်ကြီးကျော်သူရက နေအိမ်အနီးခရမ်းညွန့်စိုက်ခင်းထဲမှာလဲကျသေဆုံးကာ ငထွန်းကတော့ကိုင်းတောထဲမှာသေဆုံးသွားတယ်လို့ ဆိုပါတယ်။

ဓားနဲ့ခုတ်သူတွေရဲ့ မိသားစုမှာ ညီအကို ၄ ဦးနဲ့မိဘ ၂ ပါးရှိပြီး ၆ ဦးစလုံးနေအိမ်ကနေ တိမ်းရှောင်နေကြတယ်လို့ သိရပါတယ်။

ဓားခုတ်မှုဖြစ်ပြီးနောက် စစ်ကောင်စီတပ်သားတွေနဲ့ရဲအဖွဲ့ဟာ စစ်ဆေးမှုတွေလာလုပ်ပြီး အလောင်းတွေကိုသယ်သွားကာ ညပိုင်းမှာတော့ မကျည်းကုန်းရပ်ကွက်အတွင်း သေနတ်ပစ်ဖောက်တာနဲ့ လူရှာတာတွေလုပ်ခဲ့တယ်လို့ အထက်ပါဒေသခံက ပြောပါတယ်။

ရဲတပ်ကြပ်ကြီးကျော်သူရဟာ မကျည်းကုန်းရပ်ကွက်နဲ့ သရက်တောရပ်ကွက်နယ်ထိန်းဖြစ်ပြီး ငထွန်းကတော့ ကျော်သူရနဲ့ပေါင်းပြီး ရဲသတင်းပေးလုပ်နေတဲ့ပျူစောထီးအဖွဲ့ဝင်ဖြစ်ကာ သူတို့အလောင်းတွေကိုတော့ ဖေဖော်ဝါရီ ၁၇ ရက်နေ့ ညနေ ၃ နာရီမှာ အောင်လံသုသာန်မှာ သင်္ဂြိုဟ်မယ်လို့ သိရပါတယ်။

စာတည်း – လင်း