မြေလတ်အသံ၊ ဖေဖော်ဝါရီ ၂၀၊ ၂၀၂၅။

ချန်ပီယံလိဂ် ၁၆ သင်းအဆင့် Play off ပွဲစဉ်မှာ ရီရဲလ်မက်ဒရစ်က မန်ချက်စတာစီးတီးကို နှစ်ကျော့လုံး အနိုင်ကန်ပြီး ၁၆ သင်းအဆင့်ကို တက်ရောက်သွားခဲ့ပါတယ်။

မနေ့ညက ယှဉ်ပြိုင်ခဲ့တဲ့ Play off ဒုတိယအကျော့မှာတော့ မက်ဒရစ်အိမ်ကွင်းမှာ အမ်ဘာပေရဲ့ ဟက်ထရစ် သွင်းဂိုးတွေနဲ့အတူ ၃-၁ ရလဒ်နဲ့ မန်စီးတီးကို အနိုင်ရရှိခဲ့တာပါ။ ပထမအကျော့ မန်စီးတီးအိမ်ကွင်းမှာလည်း ၂-၃ နဲ့ ရီရဲလ်မက်ဒရစ်က နိုင်ခဲ့တာကြောင့် နှစ်ကျော့ပေါင်း ၆-၃ ရလဒ်နဲ့ အပြတ်အသတ် အနိုင်ရရှိခဲ့ပါတယ်။

လာလီဂါမှာ အငြင်းပွားဖွယ်အနီကဒ်နဲ့ သရေရလဒ်ကြောင့် အဆင့် ၁ နေရာကနေ ဖယ်ပေးခဲ့ရတဲ့ ရီရဲလ်မက်ဒရစ်ဟာ ဒီပွဲမှာတော့ ကစားကွက်အသာ ဂိုးအသာနဲ့ မန်စီးတီးကို အပြတ်အသတ် ချေမှုန်းခဲ့တာပါ။ ဒီပွဲမှာ ရခဲ့တဲ့ ဟက်ထရစ်သွင်းဂိုးကြောင့် တိုက်စစ်မှူး အမ်ဘာပေအနေနဲ့လည်း ဒီရာသီ ချန်ပီယံလိဂ် သွင်းဂိုး ၇ ဂိုးအထိ ရရှိလာခဲ့ပြီ ဖြစ်ပါတယ်။

မန်ချက်စတာစီးတီးအသင်းကတော့ ပရီးမီးယားလိဂ်မှာလည်း လက်ရှိ အဆင့် ၄ နေရာအထိ ရောက်ရှိနေသလို ချန်ပီယံလိဂ်မှာလည်း ၁၆ သင်းအဆင့်တောင် မရောက်နိုင်ဘဲ စောစောစီးစီး အိမ်ပြန်ခဲ့ရပြီပဲ ဖြစ်ပါတယ်။ ဒါ့အပြင် လာမယ့် တနင်္ဂနွေညမှာ လက်ရှိ ပရီးမီးယားလိဂ် အဆင့် ၁ နေရာက လီဗာပူးလ်နဲ့ ရင်ဆိုင်ရဦးမှာဖြစ်လို့ အဲ့ဒီပွဲဟာလည်း မန်စီးတီးတို့အတွက် ခက်ခဲတဲ့ပွဲ ဖြစ်လာဦးမလား ကြည့်ရမှာပါ။

ချန်ပီယံလိဂ် ၁၆ သင်းအဆင့် Play off မှာ အနိုင်ရရှိခဲ့ကြတဲ့ ဖီယင်နု၊ ကလပ်ဘရုဂ်၊ ဘိုင်ယန်၊ ဘင်ဖီကာ၊ ဒေ့ါမွန်၊ ပီအက်စ်ဂျီ၊ ပီအက်စ်ဗွီ နဲ့ ရီရဲလ်မက်ဒရစ်တို့ကတော့ ၁၆ သင်းအဆင့်ကို တက်လှမ်းခဲ့ကြပါပြီ။

ချန်ပီယံလိဂ် ၁၆ သင်းအဆင့် မဲခွဲပွဲကိုတော့ ဖေဖော်ဝါရီ ၂၁ ရက် သောကြာနေ့မှာ ကျင်းပသွားမှာပဲ ဖြစ်ပါတယ်။ 

Photo – Real Madrid C.F.

မြေလတ်အသံ၊ ဖေဖော်ဝါရီ ၃၊ ၂၀၂၅။

မနေ့က ယှဉ်ပြိုင်ခဲ့တဲ့ ပရီးမီးယားလိဂ် ပွဲစဉ် ၂၄ ရဲ့ နောက်ဆုံးပွဲစဉ်မှာ အာဆင်နယ်အသင်းက မန်ချက်စတာစီးတီးအသင်းကို ၅-၁ ရလဒ်နဲ့ ဂိုးပြတ်အနိုင်ရယူခဲ့ပြီး အဆင့် ၁ နေရာက လီဗာပူးလ်ကို ဆက်လက်ဖိအားပေးနိုင်ခဲ့ပါတယ်။

အာဆင်နယ်အသင်းက အဓိက တောင်ပံတိုက်စစ်ကစားသမား ဆာကာ ဒဏ်ရာရပြီးတဲ့နောက်ပိုင်း ပုံမှန်ပွဲထွက်လေ့ရှိတဲ့ မာတင်နယ်လီ၊ ထရော့ဆက်၊ ဟားဗက်ဇ် တို့နဲ့ တိုက်စစ်တွဲလုံးနဲ့ ပုံမှန်အတိုင်းပွဲထွက်လာပြီး ဆာကာ၊ ဂျေဇူး၊ တိုမီယာစု၊ ဘန်ဝှိုက်တို့ ဒဏ်ရာကြောင့် မပါဝင်နိုင်ခဲ့ပါဘူး။

မန်စီးတီးဘက်ကတော့ လက်ရှိ ဇန်နဝါရီ အပြောင်းအရွှေ့ကာလ ဖရန့်ဖတ်ကနေ ဝယ်ယူထားတဲ့ အိုမာ မာမွတ်ရှ် ကို ကွင်းလယ်မှာ ပွဲထုတ်လာသလို ဂိုးသမားနေရာမှာတော့ အီဒါဆင်အစား အော်တီဂါ နဲ့ ပွဲထွက်လာခဲ့ပါတယ်။ ဒီပွဲမှာ အဓိကပွဲထွက်လူစာရင်းက အကီ၊ ဒီယက်ဇ်၊ ဒိုကူ တို့နဲ့ ဒီရာသီကာလရှည်ကြာ အနားယူနေရတဲ့ ရိုဒရီ အပြင် အော်စကာဘော့ဘ် လည်း ဒဏ်ရာကြောင့် မပါဝင်နိုင်ခဲ့ပါဘူး။

ပွဲအစ ၁ မိနစ်ကျော်မှာပဲ မန်စီးတီး နောက်တန်းကစားသမား အကန်ဂျီရဲ့ ဘောလုံးထိန်းသိမ်းပုံ မသေသပ်မှုကနေတဆင့် အာဆင်နယ်အတွက် ဦးဆောင်ဂိုးကို အသင်းခေါင်းဆောင် အော်ဒီဂတ်က ရယူပေးနိုင်ခဲ့ပါတယ်။ အဲ့ဒီနောက် ပထမပိုင်းတပိုင်းလုံးနီးပါး မန်စီးတီးက တောက်လျှောက် တိုက်စစ်ဆင် ကစားလာခဲ့ပေမယ့် ချေပဂိုးမရရှိခဲ့ပါဘူး။

ဒုတိယပိုင်း ၅၅ မိနစ်မှာတော့ ဟာလန်းရဲ့ ခေါင်းတိုက်သွင်းဂိုးနဲ့ မန်စီးတီးတို့ ချေပဂိုးပြန်လည်ရရှိခဲ့ပါသေးတယ်။ ဒါပေမယ့် ချေပဂိုးသွင်းယူပြီး ၁ မိနစ်အကြာမှာပဲ ကွင်းလယ်လူပါတေးရဲ့ကန်ချက် ဂျွန်စတုန်းနဲ့ထိပြီး လမ်းကြောင်းပြောင်း ဂိုးဝင်ခဲ့လို့ အာဆင်နယ်တို့ ပွဲကိုချက်ချင်းပြန်လည် ဦးဆောင်နိုင်ခဲ့ပါတယ်။ အဲ့ဒီနောက် ၆၂ မိနစ်မှာ လူးဝစ်စကယ်လီ၊ ၇၆ မိနစ်မှာ ကိုင်ဟားဗက်ဇ် နဲ့ ၉၀ မိနစ်မှာ အီသန်နွယ်နာရီတို့က အသီးသီး သွင်းဂိုးတွေရယူနိုင်ခဲ့ကာ မန်ချက်စတာစီးတီးကို ဂိုးပြတ် အနိုင်ယူခဲ့တာပါ။

ဒီနိုင်ပွဲကြောင့် အာဆင်နယ်အသင်းက လက်ရှိ အဆင့် ၁ က လီဗာပူးလ်အသင်းထက် ၁ ပွဲပိုကန်ထားပြီး ၆ မှတ်ကွာဟနေပေးမယ့် အဆင့် ၂ နေရာကနေ အနီးကပ်ဆုံး ဖိအားပေးနေဆဲ ဖြစ်ပါတယ်။

ပြီးခဲ့တဲ့ ၄ ရာသီဆက်တိုက် ပရီးမီးယားလိဂ် ချန်ပီယံဖြစ်ခဲ့တဲ့ မန်ချက်စတာစီးတီးအသင်းက လက်ရှိမှာတော့ ပရီးမီးယားလိဂ် အဆင့် ၄ နေရာမှာ ရပ်တည်နေပြီး အဆင့် ၁ နဲ့ ၁၅ မှတ်အထိ ကွာဟနေပြီ ဖြစ်ပါတယ်။ ဒါ့အပြင် လက်ရှိခြေစွမ်းအရ လာမယ့်ဗုဒ္ဓဟူးနေ့ ရီရဲလ်မက်ဒရစ်နဲ့ ကန်ရမယ့် ချန်ပီယံလိဂ် ၁၆ သင်းအဆင့် Play-off ပွဲမှာလည်း ရုန်းကန်ရဦးမယ့် အခြေအနေပါ။

Photo – Premier League.

မြေလတ်အသံ၊ ဒီဇင်ဘာ ၂၇၊ ၂၀၂၄။

မနေ့ညက ယှဉ်ပြိုင်ခဲ့တဲ့ ပရီးမီးယားလိဂ်ရဲ့ ခရစ္စမတ်ကာလဘောက်ဆင်ဒေးမှာတော့ လီဗာပူးလ်က လက်စတာကို အနိုင်ရရှိခဲ့ကာ ချဲလ်ဆီးနဲ့ ယူနိုက်တက်တို့ ရှုံးနိမ့်ခဲ့ပါတယ်။ ဒါ့အပြင် မန်စီးတီးကတော့သရေရလဒ်သာရရှိခဲ့လို့ ဆက်လက်ပြီး နိုင်ပွဲပျောက်ဆုံးနေဆဲ ဖြစ်ပါတယ်။

မနေ့ည အစောပိုင်းမှာ ယှဉ်ပြိုင်ခဲ့တဲ့ မန်စီးတီးနဲ့ အဲဗာတန် ပွဲမှာ တစ်ဖက် တစ်ဂိုးစီသာ ရရှိခဲ့ပြီး သရေရလဒ်နဲ့ ပွဲပြီးဆုံးခဲ့ပါတယ်။ ဒီပွဲမှာ မန်စီးတီး ပင်နယ်တီရရှိခဲ့ပေမယ့် မန်စီးတီးတိုက်စစ်မှူး ဟာလန်းရဲ့ ကန်သွင်းချက်ကို အဲဗာတန်ဂိုးသမား ပစ်ဖို့ဒ် ကာကွယ်နိုင်ခဲ့တဲ့အပြင် ပြန်ထွက်လာတဲ့ဘောလုံးကို ဘနာဒိုဆေးဗားရဲ့ပေးပို့မှုကတဆင့် ဟာလန်း ထပ်မံပိတ်သွင်းယူနိုင်ခဲ့ပေမယ့် လူကျွံနေခဲ့လို့ တစ်ဂိုးစီ သရေရလဒ်နဲ့သာ ပွဲပြီးဆုံးခဲ့ပါတယ်။ ဂွာဒီယိုလာရဲ့ မန်စီးတီးဟာ အခုပွဲအပါအဝင် ပြိုင်ပွဲစုံနောက်ဆုံး ၁၃ ပွဲမှာ ၉ ပွဲရှုံး၊ ၃ ပွဲသရေနဲ့ ၁ ပွဲသာ အနိုင်ရရှိထားခဲ့တာ ဖြစ်ပါတယ်။

အဆင့် ၂ နေရာမှာရှိနေပြီး ရလဒ်ကောင်းတွေဖော်ဆောင်နိုင်နေတဲ့ ချဲလ်ဆီးအသင်းကလည်း မနေ့ညက ဖူလ်ဟမ်အသင်းကို အိမ်ကွင်း စတန်းဖို့ဒ်ဘရစ်ချ်မှာ မထင်မှတ်ဘဲ ရှုံးနိမ့်ခဲ့ရပါတယ်။ ပွဲအစ ၁၆ မိနစ်မှာတင် ကိုးလ်ပါးမာရဲ့ ဦးဆောင်ဂိုးနဲ့ ချဲလ်ဆီးတို့ ဦးဆောင်နိုင်ခဲ့ပေမယ့် နောက်ထပ် သွင်းဂိုးမရရှိတော့ဘဲ ၈၂ မိနစ်နဲ့ နာကျင်အချိန်ပို ၉၅ မိနစ်တို့မှာ ဖူလ်ဟမ်အသင်းကို ချေပဂိုးနဲ့အနိုင်ဂိုး ခွင့်ပြုခဲ့ရပြီး ၁-၂ ရလဒ်နဲ့ ရှုံးနိမ့်ခဲ့ရပါတယ်။

ဒါ့အပြင် အမော်ရင်ရဲ့ ယူနိုက်တက်တို့ဟာလည်း ပုံစံကောင်းပျောက်ဆုံးနေဆဲဖြစ်ပြီး ဝုဗ်အသင်းကို ၂ ဂိုး ဂိုးမရှိနဲ့ ရှုံးနိမ့်ခဲ့ပါသေးတယ်။ ပထမပိုင်းမှာ ဝုဗ်အသင်းကို ဖိအားပေးကစားနိုင်ခဲ့ပေမယ့် သွင်းဂိုးမရရှိခဲ့တဲ့ ယူနိုက်တက်တို့ဟာဒုတိယပိုင်း ပွဲအစမှာပဲ အသင်းခေါင်းဆောင် ဘရူနို ဖာနန်ဒက် အနီကတ်နဲ့ ထုတ်ပယ်ခံရတာကြောင့် ၁ ယောက်လျော့နဲ့ယှဉ်ပြိုင်ခဲ့ရပြီး ဝုဗ် ကို အရေးနိမ့်ရတာပါ။ ဒီပွဲမှာ ထောင့်ကန်ဘောကနေ တိုက်ရိုက်ကန်သွင်းပြီး ဝုဗ်အသင်း ဦးဆောင်ဂိုး ရခဲ့တဲ့အပြင် နာကျင်အချိန်ပို နောက်ဆုံးမိနစ် တန်ပြန်တိုက်စစ်ကနေ အနိုင်သေချာစေမယ့် ဒုတိယဦးဆောင်ဂိုး ရရှိခဲ့တာကြောင့် ပွဲအပြီးမှ ၂ ဂိုး ဂိုးမရှိရလဒ်နဲ့ ယူနိုက်တက်တို့ အရေးနိမ့်ခဲ့ရပါတယ်။ ဒီပွဲစဉ်အပြီးမှာ ယူနိုက်တက်အသင်းဟာ တန်းဆင်းဇုံနဲ့ ၈ မှတ်အကွာ အဆင့် ၁၄ နေရာအထိ ရောက်ရှိသွားခဲ့ပြီပဲ ဖြစ်ပါတယ်။

ယမန်နေ့ည နောက်ဆုံးပွဲစဉ်အဖြစ်ယှဉ်ပြိုင်ခဲ့တဲ့ လီဗာပူးလ်နဲ့ လက်စတာအသင်း ပွဲစဉ်မှာတော့ လီဗာပူးလ်တို့ ၃-၁ ရလဒ်နဲ့ အိမ်ကွင်းနိုင်ပွဲရရှိခဲ့ပြီး အမှတ်ဇယားကို ဖိအားကင်းကင်းနဲ့ ဆက်လက်ဦးဆောင်နေဆဲ ဖြစ်ပါတယ်။ ဒီပွဲမှာတော့ လက်စတာတို့က ပွဲအစ ၆ မိနစ်မှာတင် ဦးဆောင်ဂိုးရခဲ့ပေမယ့် ပထမပိုင်းနာကျင်အချိန်ပိုမှာ ဂက်ပိုရဲ့ အဝေးကန်ချက်နဲ့ ချေပဂိုးကို ခွင့်ပြုခဲ့ရပါတယ်။ ဒါ့အပြင် အိမ်ရှင်လီဗာပူးလ်တို့က ပွဲစဉ်တလျှောက်လုံး တိုက်စစ်ပြီးတိုက်စစ်ကစားခဲ့ကာ ၄၉ မိနစ်မှာ ကာတစ်ဂျုံး ၈၂ မိနစ်မှာ ဆာလာတို့ရဲ့ သွင်းဂိုးတွေနဲ့ အနိုင်ရလဒ်ကို ဖော်ဆောင်သွားနိုင်ခဲ့ပါတယ်။ ပထမပိုင်းမှာ မိုဟာမက်ဆာလာရဲ့ ကန်သွင်းချက်တွေ ဂိုးအဖြစ်မရရှိခဲ့ဘဲ အကြိမ်ကြိမ်လွဲချော်ခဲ့လို့သာ ဒီထက် ဂိုးမပြတ်ခဲ့တာလို့ ဆိုရမှာလည်း ဖြစ်ပါတယ်။ ဒီနိုင်ပွဲကြောင့် လီဗာပူးလ်အသင်းဟာ အဆင့် ၂ က ချဲလ်ဆီးထက် ၁ ပွဲလျော့ကစားထားပြီး ၇ မှတ်အထိ ဖြတ်ထားနိုင်ကာ အမှတ်ပေးဇယားကို သက်တောင့်သက်သာနဲ့ပဲ ဆက်လက်ဦးဆောင်ထားနိုင်ပါသေးတယ်။

ဒါ့အပြင် ဒီရာသီမှာ အားလုံးမထင်မှတ်ထားတဲ့ နော်တင်ဟမ်ဖောရက်စ်အသင်းဟာလည်း စပါးစ်အသင်းကို အနိုင်ယူပြီး အဆင့် ၃ အထိ တက်လှမ်းလာနိုင်ခဲ့တာကိုလည်း တွေ့ရှိရပါတယ်။ 

မြေလတ်အသံ၊ နိုဝင်ဘာ ၃၊ ၂၀၂၄။

နည်းပြအပြောင်းအလဲပြုလုပ်ထားတဲ့ မန်ချက်စတာယူနိုက်ဟာ နည်းပြသစ် အာမိုရင် မကိုင်တွယ်ခင် လက်ထောက်နည်းပြဖြစ်တဲ့ ဂန္ထဝင်ကစားသမား နစ္စတယ်ရွိုင်းက ယာယီနည်းပြအဖြစ် ကိုင်တွယ်နေတာပဲ ဖြစ်ပါတယ်။

နစ္စတယ်ရွိုင်းအနေနဲ့ ဒီပွဲဟာ ယူနိုက်တက်ကိုနည်းပြအဖြစ် တာဝန်ယူပြီးကိုင်တွယ်ရမယ့် ဒုတိယပွဲဖြစ်ပြီး ပထမဆုံး ကိုင်တွယ်ခဲ့တဲ့ EFL ပွဲစဉ်မှာတော့ လက်စတာစီးတီးအသင်းကို ၅ ဂိုး ၂ ဂိုး ရလဒ်နဲ့ ဂိုးပြတ်နိုင်ပွဲ ရရှိခဲ့တာပါ။

ယနေ့ည မြန်မာစံတော်ချိန် ၁၁ နာရီမှာ ယှဉ်ပြိုင်မယ့်ပရီးမီးယားလိဂ် ပွဲစဉ် ၁၀ မှာတော့ နစ္စတယ်ရွိုင်းရဲ့ ယာယီနည်းပြဘဝ ဒုတိယပွဲစဉ်အဖြစ်  ချဲလ်ဆီးအသင်းကို အိမ်ကွင်းမှာ လက်ခံယှဉ်ပြိုင်ရမှာဖြစ်ပြီး တန်ဟဂ် ထုတ်ပယ်ပြီးနောက်ပိုင်း ယူနိုက်တက်တို့ ဘာတွေ လုပ်ပြနိုင်မလဲဆိုတာ စောင့်ကြည့်ရမယ့် အခြေအနေပါ။

ပြီးခဲ့တဲ့ EFL ပွဲစဉ်မှာ နယူးကာဆယ်ကို ၂ ဂိုး ဂိုးမရှိနဲ့ ရှုံးနိမ့်ခဲ့ရတဲ့ ချဲလ်ဆီးအသင်းကတော့ အဲ့ဒီပွဲမှာ အရန်ကစားသမားတွေကိုသာ အသုံးပြုသွားတာဖြစ်ပြီး ဦးစားပေးကစားသမားတွေကိုပဲ ထုတ်သုံးခဲ့တဲ့ ယူနိုက်တက်နဲ့စာရင် ကစားသမားတွေ ကောင်းကောင်း အနားရထားတဲ့ အခြေအနေဖြစ်ပါတယ်။ ဒါ့အပြင် ဒဏ်ရာရ ကစားသမားကင်းစင်တဲ့ချဲလ်ဆီးဘက်က ဒဏ်ရာရ ကစားသမား ၈ ယောက်လောက်ရှိနေတဲ့ ယူနိုက်တက်ထက်ပိုပြီးတော့ ကစားသမား ရွေးချယ်အသုံးပြုနိုင်စွမ်း သာလွန်နေတာလည်း ဖြစ်ပါတယ်။

ယူနိုက်တက်အိမ်ကွင်း အိုးထရက်ဖို့ဒ် နောက်ဆုံး ၁၁ ကြိမ်တိတိ ချဲလ်ဆီးကို ရှုံးနိမ့်ထားခြင်းမရှိခဲ့ဘဲ ၅ ပွဲနိုင် ၆ ပွဲသရေ ရရှိထားခဲ့ပေမယ့် ချဲလ်ဆီးနောက်ဆုံးတွေ့ဆုံခဲ့တဲ့ ချဲလ်ဆီးရဲ့ စတန်းဖို့ဘရစ်ကွင်းမှာတော့ ၄ ဂိုး ၃ ဂိုး ရလဒ်နဲ့ ယူနိုက်တက် ရှုံးနိမ့်ခဲ့ရပြီး ကိုးလ်ပါးမားက ဟက်ထရစ် သွင်းယူတာကိုပါ ခွင့်ပြုခဲ့ရတာပါ။

ဒီနေ့ညမှာတော့ ပရီးမီးယားလိဂ်မှာ ခြေစွမ်းအတန်အသင့် တည်ငြိမ်နေတဲ့ ချဲလ်ဆီးနဲ့ လတ်တလော နည်းပြအပြောင်းအလဲအပြင် ခြေစွမ်းတည်ငြိမ်မှုပါမရသေးတဲ့ ယူနိုက်တက်တို့ပွဲစဉ်ဟာ သွင်းဂိုးအများအပြားနဲ့ ပွဲကောင်းတစ်ပွဲဖြစ်လာမလားဆိုတာ စိတ်ဝင်စားစရာပါ။

ယူနိုက်တက် ဂန္ထဝင် တိုက်စစ်မှူး နစ္စတယ်ရွိုင်းရဲ့ တိုက်စစ်အားသန်တဲ့ ကစားဟန်ကရော ချဲလ်ဆီးကို ဘယ်လောက်အထိ လွှမ်းမိုးနိုင်မလဲ၊ ပရိသတ်မျှော်လင့်ထားသလို နစ္စတယ်ရွိုင်းအနေနဲ့ နိုင်ပွဲယူဆောင်ပေးနိုင်မလား၊ ဒါမှမဟုတ် လက်ရှိ အဖက်ဖက်က ပိုမိုသာလွန်နေတဲ့ ချဲလ်ဆီးကပဲ အဝေးကွင်း ၁၁ ပွဲဆက် အနိုင်မရခဲ့သေးတဲ့ စံချိန်ကို ချိုးဖျက်သွားနိုင်မလားဆိုတာ စောင့်ကြည့်ရမှာပါ။

Photo – SuperSport Football

မြေလတ်အသံ၊ အောက်တိုဘာ ၂၈၊ ၂၀၂၄။

မန်ချက်စတာယူနိုက်တက်အသင်းဟာ အသင်းရဲ့ရလဒ်တွေဆိုးရွားလာတာကြောင့် သူတို့အသင်းရဲ့နည်းပြဖြစ်သူ ဟော်လန်နိုင်ငံသား အဲရစ်တန်ဟဂ်ကို အသင်းမှထုတ်ပယ်လိုက်ပြီလို့ သိရပါတယ်။ 

အခုနှစ်ဘောလုံးရာသီမှာတော့ မန်ချက်စတာယူနိုက်တက်ဟာ တန်ဟဂ်အတွက် အူဂါတေ၊ မာဇာအိုရူအီ၊ ဒီလစ်၊ ရိုဟို၊ ဇက်ဇီ စတဲ့ကစားသမားအသစ်တွေကို ဖြည့်တင်းပေးခဲ့ပေမယ့် ရလဒ်တွေဆိုးရွားနေပြီး ပရီးမီးယားလေး ၉ ပွဲမှာ ၄ ပွဲအထိရှုံးနိမ့်ထားရသလို ယူရိုပါလိဂ်မှာလည်း ၃ ပွဲဆက် သရေကျခဲ့ပါတယ်။ 

အောက်တိုဘာ ၂၇ ရက်ကယှဉ်ပြိုင်ခဲ့တဲ့ ပရီးမီးယားလိဂ်ပွဲစဉ် ၉ မှာ ဝက်စ်ဟမ်းအသင်းကိုရှုံးနိမ့်ပြီးချိန်မှာတော့ မန်ချက်စတာယူနိုက်တက်အသင်းဟာ တန်ဟဂ်နဲ့လမ်းခွဲလိုက်ပြီး မန်ချက်စတာရဲ့ဂန္ထဝင်ကစားသမားတဦးဖြစ်တဲ့ လက်ထောက်နည်းပြ နစ္စတယ်ရွိုင်းကို ယာယီနည်းပြအဖြစ်ခန့်အပ်လိုက်ပါတယ်။ 

တန်ဟဂ်ဟာ ၂၀၂၂ ခုနှစ် ဧပြီလမှာ မန်ချက်စတာယူနိုက်တက်ကို စတင်ကိုင်တွယ်ခဲ့ပြီး အဲ့ဒီနှစ်မှာပဲ အသင်းဟာ ပရီးမီးယားလိဂ်ရဲ့တတိယနေရာကနေ ချန်ပီယံလိဂ်ဝင်ခွင့်ရခဲ့ကာ အက်(ဖ်)အေဖလားပွဲမှာလည်း ဗိုလ်လုပွဲအထိ တက်ရောက်နိုင်ခဲ့ပေမယ့် မြို့ခံပြိုင်ဘက်မန်စီးတီးအသင်းကို ရှုံးနိမ့်ခဲ့ရပါတယ်။ 

အဲ့ဒီနှစ်မှာတော့ တန်ဟဂ်ကိုင်တွယ်နေတဲ့ မန်ချက်စတာယူနိုက်တက်အသင်းဟာ ကာရာဘောင်းဖလားပြိုင်ပွဲမှာ ဗိုလ်လုပွဲအထိတက်ရောက်ခဲ့ကာ နယူးကာဆယ်ကိုအနိုင်ရပြီး ဗိုလ်စွဲနိုင်ခဲ့ပါတယ်။ 

၂၀၂၃ – ၂၄ ဘောလုံးရာသီ ချန်ပီယံလိဂ်ဝင်ရောက်ယှဉ်ပြိုင်ရာမှာတော့ အသင်းရဲ့အဆိုးရွာဆုံးရလဒ်အဖြစ် အုပ်စုတွင်းပြိုင်ဘက်တွေဖြစ်တဲ့ ဘိုင်ယန်၊ ကိုဗင်ဟေဂင်၊ ဂါလာတာစာရေးတို့ကို မကျော်ဖြတ်နိုင်ဘဲ အုပ်စုနောက်ဆုံးအဆင့်နဲ့ ဥရောပဘောလုံးပွဲတွေကနေ နှုတ်ဆက်ခဲ့ရပါတယ်။ 

ပရီးမီးယားလိဂ်မှာလည်း ၂၀၂၃ – ၂၄ ရာသီအတွက် အမှတ်ပေါင်း ၆၀ သာရရှိခဲ့ပြီး အဆင့် ၈ နေရာနဲ့ ဇာတ်သိမ်းခဲ့သလို ဒီရလဒ်ဟာ ဒီရလဒ်ဟာ တန်ဟဂ်ရဲ့ အဆိုးရွားဆုံးရလဒ်တွေထဲက ရလဒ်တခုလည်း ဖြစ်ခဲ့ပါတယ်။

၂၀၂၃ – ၂၄ ဘောလုံးရာသီမှာ တန်ဟဂ်တယောက် ပရိသတ်တွေကို ဖြေသိမ့်ပေးနိုင်တာတခုကတော့ အက်(ဖ်)ဖေဖလားဗိုလ်လုပွဲကိုတက်ခဲ့ပြီး မြို့ခံပြိုင်ဘက် မန်ချက်စတာစီးအသင်းကို အနိုင်ရခဲ့တာဖြစ်ပါတယ်။ ဒါကြောင့်လည်း မန်ချက်စတာယူနိုက်တက်အသင်းဟာ ဥရောပဘောလုံးရပ်ဝန်းကို ခြေချခွင့်ရပြီး ယူရိုပါလိဂ်မှာ ဝင်ရောက်ယှဉ်ပြိုင်ခွင့်ရခဲ့တာပါ။  

လက်ရှိအချိန်မှာ နည်းပြလက်မဲ့ဖြစ်သွားတဲ့ မန်ချက်စတာယူနိုက်တက်အသင်းဟာ နာဂယ်စမန်း၊ ဇာဗီ၊ သောမတ်စ်ဖရန့်စတဲ့နည်းပြတွေကို ချိတ်ဆက်နေတယ်လို့ သတင်းတွေထွက်ပေါ်နေပြီဖြစ်ပါတယ်။