အညာမြေစစ်ဘေးရှောင်ကူညီရေးအဖွဲ့

မြစ်ခြေ၊ ဇူလိုင် ၁၆၊ ၂၀၂၆။

မကွေးတိုင်း၊ ပခုက္ကူမြို့နယ်၊ မြစ်ခြေမြို့က စစ်ဘေးရှောင် ၁၅၀၀ ကျော်အတွက် ဆန်၊ ဆီ စားနပ်ရိက္ခာတွေ ကူညီပေးခဲ့တယ်လို့ အညာမြေ စစ်ဘေးရှောင်ကူညီရေး အဖွဲ့ဆီက သိရပါတယ်။

အိမ်ခြေ ၁၂၀၀ ခန့် မီးရှို့ခံခဲ့ရတဲ့ မြစ်ခြေမြို့မှာ ဇူလိုင် ၁၁ ရက်နေ့က လူတဦးကို ဆန် ၁ပြည်၊ အိမ်ထောင်စု တစုကို ဆီ ၅၀ သားနှုန်းနဲ့ ထောက်ပံ့ခဲ့တာလို့ အညာမြေအဖွဲ့ဝင်တဦးက ပြောပါတယ်။

ပခုက္ကူမြို့နယ်က ကံမနဲ့ မြစ်ခြေမြို့တဝိုက်မှာ စစ်ဘေးရှောင်နေရတဲ့ ကျေးရွာ ၂၀ ခန့်ရှိပြီး စစ်ဘေးရှောင်ကာလ ၂ လကျော်ကြာပြီးတဲ့နောက် ကူညီထောက်ပံ့မှုတွေ ရနေပေမယ့် မလုံလောက်တာတွေ ဖြစ်နေတယ်လို့ သူကဆိုပါတယ်။

“ဒီမှာက ကူညီပေးနေတဲ့ ထောက်ပံ့ရေးအဖွဲ့တွေလည်း ရှိတယ်။ သူတို့အတွက် ထောက်ပံ့မှုတွေ ရောက်သင့်သလောက်လည်း ရောက်တယ်ဆိုပေမယ့် လက်ရှိမှာ စစ်ရှောင်နေရတဲ့ လူဦးရေက ၂ သောင်းကျော်ရှိနေတယ်။” လို့ သူကပြောပါတယ်။

မြစ်ခြေမြို့တဝိုက်ကို ၂၀၂၆ မေလ ၉ ရက်ကစလို့ အောင်သာရွာ ပျူစောထီးတွေနဲ့ ပခုက္ကူတပ်မ ၁၀၁ ပူးပေါင်းအင်အား ၄၀၀ ကျော်နဲ့ စစ်ကြောင်းထိုးပြီး အိမ်ခြေ တထောင်ကျော်ကို မီးရှို့ဖျက်ဆီးကာ ပြည်သူ ၄၀ ကို သတ်ဖြတ်သွားခဲ့တာ ဖြစ်ပါတယ်။

ဓာတ်ပုံ – အညာမြေစစ်ဘေးရှောင်ကူညီရေးအဖွဲ့