သေဆုံး

ရွှေဘို၊ မတ် ၁၆၊ ၂၀၂၃။

စစ်ကိုင်းတိုင်း၊ ရွှေဘိုမြို့နယ်၊ ညောင်းကိုင်းကျေးရွာက ထွက်လာတဲ့ ပျူစောထီးကားကို ဒေသခံကာကွယ်ရေးတပ်တွေက မိုင်းဆွဲတိုက်ခိုက်ခဲ့ရာ ပျူစောထီး ၂ ဦး သေဆုံးခဲ့တယ်လို့ သိရပါတယ်။

ပျူစောထီး ၄ ဦး လိုက်ပါလာတဲ့ကားကို မတ်လ ၁၄ ရက်မနက် ၁၀ နာရီလောက်မှာ ဂျူးမြေဇင်း၊ ထန်းနှောင်းကိုင်းနဲ့ မြို့လှရွာ လမ်းဆုံမှာ တိုက်ခိုက်ခဲ့တာလို့ ဗိုလ်ကျားရိုင်း – ရွှေဘို (LPDF) အဖွဲ့ဆီက သိရပါတယ်။

“၂ ကောင်သေတာ။ ဒီပတ်ချာလည်ရွာတွေမှာ ပြည်သူပိုင်နေအိမ်တွေဆိုလည်း ခိုးဆိုးလုနှိုက်နေတာ၊ ဒီနားနယ်တဝိုက်ကတော့ သူတို့အဆိုးဆုံးပဲ။ စစ်ကြောင်းတွေဆိုလည်း သူတို့လှမ်းလှမ်းခေါ်တာပဲ။ မိုင်းက ပဒေသာ ၃ လုံးကွဲတာ” လို့ ပြောပါတယ်။

မိုင်းဆွဲခံရပြီးနောက် သေဆုံးပျူစောထီး ၂ ဦးရဲ့အလောင်းကို မိုင်းဆွဲတဲ့နေရာအနီးက ကြက်ခြံထဲမှာ မီးရှို့ထားခဲ့တယ်လို့လည်း သိရပါတယ်။

ဒီတိုက်ခိုက်မှုကို ဗိုလ်ကျားရိုင်း-ရွှေဘို (LPDF)၊ မတစ်ထောင်-တစ်ကောင်ဘွား (ဒီပဲယင်း)၊ ဗိုလ်ဂျပန်ကြီး (T.T.T) – SHWEBO (LPDF) အဖွဲ့၊ တောင်သူကြီးများအဖွဲ့ -LDF နဲ့ ရွှေဘိုမြို့နယ် တိုက်နယ် -၂ မဟာမိတ်အင်အားစုတွေက ပူးပေါင်းတိုက်ခိုက်ခဲ့တာလို့ သိရပါတယ်။

ပြီးခဲ့တဲ့ မတ်လ ၅ ရက်ကလည်း ညောင်ကိုင်းရွာက ပြန်လာတဲ့ ပျူနဲ့စစ်သားတွေကို ဗိုလ်ကျားရိုင်း – ရွှေဘို(LPDF)အဖွဲ့က ဂျိုးမြေဇင်းနဲ့ မြို့လှရွာအကြားမှာ မိုင်းဆွဲတိုက်ခိုက်ခဲ့ရာ တပ်ကြပ်တဦး ခြေ‌ထောက်ပြတ်ပြီး ပျူစောထီးတဦး သေဆုံးခဲ့ပါသေးတယ်။

စာတည်း – လင်း

စစ်ကိုင်း၊ ဇွန် ၁၈၊ ၂၀၂၃။

စစ်ကိုင်းတိုင်း၊ ဝက်လက်မြို့နယ်အတွင်းမှာ စစ်ကောင်စီတပ်သားတွေက အကြောင်းမဲ့ လက်နက်ကြီး၊ လက်နက်ငယ်တွေနဲ့ ပစ်ခတ်လို့ ဇွန်လ ၁၆ ရက် တရက်တည်းမှာတင် စစ်ကောင်စီလက်အောက်ခံ ကျေးရွာအုပ်ချုပ်ရေးမှူးရဲ့ သားဖြစ်သူအပါ ၂ ဦး သေဆုံးခဲ့တယ် လို့ ဝက်လက် ပကဖအဖွဲ့ဆီက သိရပါတယ်။

၁၆ ရက်မနက်ပိုင်းက ဝက်လက်မြို့အနောက်ဘက်၊ မူးဆည်ဘောင်အနီး တပ်စွဲထားတဲ့ စစ်ကောင်စီတပ်က လက်နက်ငယ်တွေနဲ့ ပစ်ခတ်တာကြောင့် သခွတ္တောရွာမမှာ နေထိုင်တဲ့ အသက် ၃၃ နှစ်အရွယ် ကိုရဲမော် ကျည်ထိမှန်သေဆုံးခဲ့ပြီး၊ ညနေပိုင်းမှာတော့ လှတောရွာဘက်ကနေ ပစ်လိုက်တဲ့ လက်နက်ကြီးကျည်က အသက် ၂၃ နှစ်အရွယ် ကိုထက်ဝေစိုးကို ထိမှန်သေဆုံးခဲ့တာလည်း ဖြစ်ပါတယ်။

“နှစ်ဦးစလုံးက နှမ်းခင်းထဲ အလုပ်လုပ်နေရင်း စစ်တပ်က ရမ်းပစ်တဲ့ကျည်နဲ့ သေဆုံးရတာ။ ကိုရဲမော်က နေရာတင်သေတာ၊ ထက်ဝေစိုးက ည ၁၂ နာရီလောက်မှာသေတာ”လို့ ဒေသခံတဦးက ပြောပါတယ်။

သူတို့ ၂ ဦးဟာ သခွတ္တောရွာမှာ နေထိုင်သူတွေဖြစ်ကာ ကိုရဲမော်က ရွာအနောက်ဘက်ရှိ နှမ်းခင်းမှာ ကျည်ထိမှန်ခဲ့တာဖြစ်ပြိး ကိုထက်ဝေစိုးကတော့ ရွာတောင်ဘက်ရှိ နှမ်းခမ်းတခုမှာ ရှိနေချိန် ကျည်ထိမှန်ခဲ့တာလို့ သိရပါတယ်။

ကိုထက်ဝေစိုးရဲ့ ဖခင်က သခွတ္တောရွာ အုပ်ချုပ်ရေးမှူးဖြစ်ပြီး လက်ရှိရွာမှာမနေဘဲ ဝက်လက်မြို့ပေါ်က ဝန်ထမ်းအိမ်ရာတခုမှာ နေထိုင်နေတာလို့လည်း အထက်ပါဒေသခံက ဆက်ပြောပါတယ်။

ဇွန်လ ၁၇ ရက် မနေ့ကမနက် ၉ နာရီမှာ ကိုရဲမော်ရဲ့အလောင်းကို မြေမြှုပ်သဂြိုဟ်ပြီး ၁၁ နာရီလောက်မှာတော့ ကိုထက်ဝေစိုးရဲ့အလောင်းကို မီးသဂြိုဟ်ခဲ့တယ်လို့ သိရပါတယ်။

ပြီးခဲ့တဲ့နှစ် ဇွန်လဝန်းကျင်ကလည်း သခွတ္တောရွာတောင်ပိုင်းက နေအိမ် ၂၀ ကိုစစ်တပ်ကမီးရှို့လို့ ပြာကျပျက်စီးခဲ့ရပါသေးတယ်။

စာတည်း – လင်း

မန္တလေး၊ ဇွန် ၁၆၊ ၂၀၂၃။

မန္တလေးတိုင်းဒေသကြီး၊ မြင်းခြံမြို့နယ်၊ ဂွေးပင်ရိုးကျေးရွာအနီးမှာ မိုင်းအတုကို လာရှင်းတဲ့ စစ်ကောင်စီအဖွဲ့ မိုင်းအစစ်ဆွဲတိုက်ခိုက်ခံရပြီး ၄ ဦးသေဆုံးခဲ့တယ်လို့ 27 Revolution Forces အဖွဲ့ဆီက သိရပါတယ်။

ဇွန်လ ၁၅ ရက် နေ့လယ် ၁ နာရီခန့်မှာ ဂွေးပင်ရိုးကျေးရွာအနီး၊ မြင်းခြံ – တောင်သာသွား ကားလမ်းဘေးမှာ PDF တွေဘက်က အယောင်ပြထောင်ထားတဲ့ မိုင်းအတုကို တောင်သာဘက်ကနေ အင်အား ၂၀ လောက်နဲ့ မိုင်းလာဖြုတ်ခဲ့ရာမှာ တိုက်ခိုက်ခံခဲ့ရတာလို့ ဆိုပါတယ်။

“မိုင်းအတုကိုတော့ မြင်သာအောင်ထောင်ထားတော့ သူတို့လူတွေ သတင်းပို့လို့ လာဖြုတ်ကြတယ်။ မိုင်းအစစ်တွေက မြေမြှုပ်ထားတာ။ အချို့က မိုင်းဖြုတ်နေတဲ့အချိန်၊ အချို့က ခပ်လှမ်းလှမ်းကနေ နေကြတာ။ သူတို့က လေးဘက်ထောက်မိုင်းဖြုတ်နေတဲ့အချိန် မိုင်းအစစ်ကို ဆွဲပစ်လိုက်တာ”လို့ 27 Revolution Forces တာဝန်ရှိသူက ပြောပါတယ်။

မိုင်းဆွဲခံရလို့ စစ်ကောင်စီဘက်က ၄ ဦးသေဆုံးသွားတာကို မျက်မြင်တွေ့ရပြီး ဒဏ်ရာရသူတွေလည်း ရှိတယ်လို့ သူကဆက်ပြောပါတယ်။

မိုင်းထိလို့ သေဆုံးသွားသူတွေကိုတော့ တောင်သာဘက်က လူမှုကူညီရေးအသင်းကားတွေကို စစ်ကောင်စီဘက်က ခေါ်ပြီး တင်သွားတယ်လို့ သိရပါတယ်။

အဲဒီမိုင်းဆွဲမှုကို မြင်းခြံခရိုင် တပ်ရင်း ၁၊ 27 Revolution Forces၊ နွားထိုးကြီး ပကဖ အဖွဲ့တွေက ပူးပေါင်းလုပ်ဆောင်ခဲ့တာပါ။

အဲ့ဒီနောက် မနေ့ညပိုင်းမှာတော့ ဂွေးပင်ရိုးကျေးရွာနဲ့တမိုင်ခန့်အကွာရှိ ဖက်တောရွာမှာ တပ်စွဲထားတဲ့ စစ်ကောင်စီအဖွဲ့က တညလုံးနီးပါး သေနတ်တွေပစ်ဖောက်နေခဲ့တယ်လို့ သိရပါတယ်။

ဇွန်လ ၁၁ ရက် ညနေပိုင်းကလည်း မြင်းခြံမြို့နယ်၊ တူရွင်းဘိုကျေးရွာနဲ့ သစ်ရုံကျေးရွာကြားမှာ PDF တွေထောင်ထားတဲ့ မိုင်းတွေသိမ်းပြီး ပြန်လာတဲ့ စစ်ကောင်စီအဖွဲ့ ပဒေသာမိုင်းထိပြီး ၇ ဦး သေဆုံးသွားတယ်လို့ သိရပါတယ်။

စာတည်း – လင်း