မြေလတ်အသံ၊ ဧပြီ ၂၅၊ ၂၀၂၅။

စစ်ကိုင်းတိုင်း၊ မုံရွာမြို့နယ်၊ ကံပြားကြီးကျေးရွာအုပ်စု၊ ရွာတော်ရွာမှာ လက်နက်ကြီးဗုံးသီးကျရောက်ပေါက်ကွဲတာကြောင့် သက်ကြီးပိုင်းတွေအပါ အရပ်သား ၄ ဦး သေဆုံးခဲ့တယ်လို့ ဒေသခံတွေဆီက သိရပါတယ်။

ဧပြီ ၂၅ ရက် ဒီကနေ့မနက် ၉ နာရီဝန်းကျင်မှာ မုံရွာအခြေစိုက် အနောက်မြောက်တိုင်းစစ်ဌာနချုပ်(နမခ) ကနေ ၇ မိုင်ခန့်အကွာ မုံရွာ-သာစည်လမ်းပေါ်ရှိ ရွာတော်ရွာကို ၆၀ မမ ဗုံးသီး ၃ လုံးပစ်ခတ်ခဲ့တာဖြစ်ပြီး ၂ လုံးမှာ ကျေးရွာတွင်းနေအိမ်တွေပေါ် ကျရောက်ပေါက်ကွဲခဲ့တာလို့ ဆိုပါတယ်။

” သေသွားတဲ့ ကိုအောင်ကျော်ဦးနဲ့ ကိုဖြိုးဝေတို့က ညီအစ်ကိုတော်ကြတာ၊ သူတို့ ၂ ယောက်က မှန်မှန်ချင်းမသေသေးဘူး၊ နောက် ၁၅ မိနစ်လောက်နေမှ သွေးထွက်လွန်ပြီး သေသွားတာ။ အဘွားနဲ့ မိန်းမကြီးကတော့ ပွဲချင်းပြီးသေတာ” လို့ ရွာတော်ရွာခံအမျိုးသားတဦးက မြေလတ်အသံကို ပြောပါတယ်။

လက်နက်ကြီးဗုံးသီးစထိမှန်တာကြောင့် ရွာတော်ရွာနေထိုင်သူ ကိုဖြိုးဝေ အသက် ၄၀ နှစ်၊ အသက် ၅၀ နှစ်အရွယ် ကိုအောင်ကျော်ဦးနဲ့ ဒေါ်မိပိုင်၊ ဒေါ်ဝိုင်းကြည် အသက် ၇၀ နှစ် တို့သေဆုံးခဲ့ပြီး ၎င်းတို့ကို ဒီကနေ့ညနေပိုင်းမှာမှ သင်္ဂြိုဟ်မှာဖြစ်ကြောင်း သိရပါတယ်။

မုံရွာ၊ နမခကနေ ဧပြီ ၂၃ ရက် ည ၁၀ နာရီခန့်ကစတင်ကာ ဒီကနေ့မနက်အထိ လက်နက်ကြီးတွေနဲ့ပစ်ခတ်နေတာဖြစ်ပြီး လက်နက်ကြီးပစ်ခတ်သံတွေ ဆက်တိုက်ကြားနေရကြောင်း မုံရွာမြို့ခံတွေကလည်း ပြောပါတယ်။

မကွေးတိုင်း၊ စလင်းမြို့နယ်မှာလည်း လေကြောင်းကနေဗုံးကြဲခံရတာကြောင့် အသက် ၇၀ ကျော် အဘိုး၊ အဘွား ၂ ဦး ဒဏ်ရာ(ပြင်းထန်)ရရှိခဲ့တယ်လို့ ဒေသခံတွေက ပြောပါတယ်။

ဧပြီ ၂၄ ရက် မနေ့ညနေ ၅ နာရီခန့်မှာ မြောက်ချောင်းဖြူအုပ်စု၊ ရွာသစ်ကလေးကျေးရွာကို တိုက်လေယာဥ် ၁ စီးနဲ့ ဗုံး ၂ လုံးကြဲချ တိုက်ခိုက်ခဲ့တာဖြစ်ပြီး လူထိခိုက်မှုအပြင် နေအိမ် ၁ လုံး၊ စာသင်ကျောင်းနဲ့ ဘုန်းကြီးကျောင်းလည်း ပျက်စီးခဲ့တယ်လို့ ဆိုပါတယ်။

“ ရွာသစ်ကလေးကျေးရွာမှာ တိုက်ပွဲတွေလည်းမရှိပါဘူး၊ PDF တပ်ရင်း/တပ်ဖွဲ့တွေလည်း မရှိပါဘူး၊ ဘယ်လိုအကြောင်းအရာကြောင့် ဒီလိုကြဲသွားတယ်ဆိုတာကျမတို့မသိရသေးပါဘူး” လို့ စလင်းမြို့ခံအမျိုးသမီးတဦးက ပြောပါတယ်။

ရွာသစ်ကလေးရွာဟာ အိမ်ခြေ ၅၀၊ အိမ်ထောင်စု ၃၀ စု၊ လူဦးရေ ၂၀၀ ဝန်းကျင်ရှိပြီး လက်ရှိမှာ ရွာလုံးကျွတ်နီးပါးတိမ်းရှောင်နေရတယ်လို့ သိရပါတယ်။

သတင်း – ခေတ်သဒ္ဒါ၊ ဒိန်းဂျား၊ စာတည်း – ဟိန်းစံ

ပခုက္ကူ၊ ဧပြီ ၂၄၊ ၂၀၂၅။

မကွေးတိုင်း၊ ပခုက္ကူမြို့နယ်ထဲက ကျေးရွာတွေကို စစ်ကောင်စီလေကြောင်းကနေ ပစ်ခတ်တိုက်ခိုက်ခဲ့တာကြောင့် ဒေသခံအမျိုးသမီး ၁ ဦးသေဆုံးပြီး အမျိုးသား ၃ ဦးထိခိုက်ခဲ့တယ်လို့ ဧရာဒေါင်း ကြက်ကလေးတပ်ဖွဲ့ဆီက သိရပါတယ်။

ဧပြီ ၂၃ ရက် ညနေ ၄ နာရီ ၁၀ မိနစ်ဝန်းကျင်မှာ စစ်ကောင်စီရဲ့ဂျက်ဖိုက်တာ ၂ စီးပေါ်ကနေ Rocket ၃ လုံးနဲ့ ဆယ်ပင်စု၊ ရွာသစ်၊ အောက်ကျင်းနဲ့ ဖလံအိုးကျေးရွာအနီးကို ပစ်ခတ်တိုက်ခိုက်ရာမှာ ထိခိုက်သေဆုံးခဲ့ကြတာပါ။

“အမျိုးသမီးတဦးကတော့ နေရာတင်ပွဲချင်းပြီးသေဆုံးတာ၊ အမျိုးသား ၃ ဦးကတော့ ဒဏ်ရာရတယ်၊ ပျက်စီးမှုကတော့ နေအိမ် ၃ လုံး၊ စာသင်ကျောင်းနဲ့ ဘုန်းကြီးကျောင်းတွေပါ” လို့ ဧရာဒေါင်းကြက်ကလေးတပ်ဖွဲ့ တာဝန်ခံက ပြောပါတယ်။

ဒီတိုက်ခိုက်မှုကြောင့် ဆယ်ပင်စုကျေးရွာက အသက် ၁၈ နှစ်အရွယ်အမျိုးသမီး ၁ ဦးသေဆုံးကာ ရွာသစ်ရွာက အသက် ၁၇ နှစ်အရွယ် အမျိုးသား ၃ ဦးထိခိုက်ဒဏ်ရာရခဲ့တယ်လို့ သိရပါတယ်။

ဒါ့အပြင် ဆယ်ပင်စုရွာက ဘုန်းကြီးကျောင်း၊ စာသင်ကျောင်းနဲ့ နေအိမ် ၃ လုံးအပါ တိုက်ခိုက်ခံရတဲ့ ကျေးရွာတွေက စုစုပေါင်းနေအိမ် ၅ လုံးပျက်စီးခဲ့ပါတယ်။

“စစ်ရှောင်တွေနေတဲ့ဘုန်းကြီးကျောင်းကို ပစ်မှတ်ထားတိုက်ခိုက်ပေမယ့် ပစ်မှတ်ကိုမထိဘဲ ဘုန်းကြီးကျောင်းဘေးမှာရှိတဲ့ နေအိမ် ၂ လုံး မီးလောင်ပျက်စီးပြီးအဲ့အိမ်နားကလူတွေထိသွားတာ”လို့ အညာမြေအရပ်ဖက်အဖွဲ့အစည်း (မြိုင်)ရဲ့ တာဝန်ရှိတဦး ကပြောပါတယ်။

Rocket အပြင် စက်သေနတ်၊ မီးလောင်ဗုံးတွေလည်း ပစ်ခတ်ကြဲချသွားတာဖြစ်ပြီး ခုလိုပစ်ခတ်မှုတွေလုပ်ခံနေရတဲ့ ဒေသခံတွေအနေနဲ့လေကြောင်းအန္တရာယ်ကို သတိထားကြဖို့ သူကဆက်ပြောပါတယ်။

“ပျူရွာတွေ တအားများတဲ့နေရာတွေဆိုတော့ အနီးအနားကရွာတွေကိုချခိုင်းနေတဲ့ သဘောတွေ ဖြစ်မယ်။ ခုချိန်မှာစစ်ကောင်စီက ပြည်သူများကိုပဲ ပစ်မှတ်ထားတိုက်ခိုက်နေတဲ့အတွက် ပြည်သူအားလုံး လေကြောင်းအန္တရာယ်အထူးသတိရှိဖို့လိုနေပြီ” လို့ အညာမြေအရပ်ဖက်အဖွဲ့အစည်း (မြိုင်)ရဲ့တာဝန်ရှိသူတဦး ကပြောပါတယ်။

ဧပြီလ ဒုတိအပတ် သင်္ကြန်အတွင်းကစပြီး ပခုက္ကူမြို့နယ်အတွင်းကို ဗုံးကြဲတိုက်ခိုက်တာတွေ ခပ်စိပ်စိပ်လုပ်လာတဲ့အတွက် ဖလံအိုရွာ၊ ကံပေါက်စုရွာ၊ ကြယ်ပင်စုရွာ၊ အောက်ကျင်းစုရွာ၊ ရွာသစ်ရွာ၊ ရိုးယာရွာ၊ တမာပင်ရွာ၊ ပူရွာ၊ မြေနီတွင်းရွာ၊ ချိုင်ရွာတွေက ဒေသခံ ၅ ထောင်ကျော် ထွက်ပြေး တိမ်းရှောင်နေရတယ်လို့ သိရပါတယ်။

သတင်း – ဒိန်းဂျား၊ ဟယ်သာ၊ စာတည်း – လင်း

စလင်း၊ ဧပြီ ၂၄၊ ၂၀၂၅။

မကွေးတိုင်း၊ စလင်းမြို့နယ်၊ ပန်းတောကျေးရွာအုပ်စု၊ ပန်းတောကြီးကျေးရွာမှာ စစ်ကောင်စီတပ် ပစ်ခတ်ခဲ့တဲ့ လက်နက်ကြီးထိမှန်ပြီး ဒေသခံအမျိုးသမီး ၁ ဦးနဲ့ အမျိုးသား ၁ ဦးသေဆုံးကာ ၇ ဦး ဒဏ်ရာရခဲ့တယ်လို့ စလင်းမြို့ခံတွေဆီက သိရပါတယ်။

ဧပြီ ၁၉ ရက်မနက် ၉ နာရီ ၁၀ မိနစ်ခန့်မှာ ဆင်ဖြူကျွန်းမြို့အနောက်ဘက် နွယ်တမယ်ရွာမှာ အထိုင်ချထားတဲ့ ပခုက္ကူတပ်မ ၁၀၁ မှစစ်ကောင်စီတပ်ဖွဲ့ဝင်တွေက ၈၁ မမလက်နက်ကြီး ၅ လုံးပစ်ခတ်ရာမှာ ထိခိုက်ခဲ့တာလို့ ဆိုပါတယ်။

“အမျိုးသားကတော့ ဆေးရုံမှာ သေဆုံးသွားတာ၊ အမျိုးသမီးကတော့ ညှပ်ရိုး၊ အူတွေ၊ အသဲ၊ ဘေလုံးထိပြီး ခန္ဓာကိုယ်ထဲသွေးစိမ့်ပြီးသေဆုံးတာ၊” လို့ စလင်းမြို့ခံအမျိုးသမီးတဦးက ပြောပါတယ်။

ဒီပစ်ခတ်မှုကြောင့် ပန်းတောကြီးကျေးရွာက အသက် ၄၃ နှစ် အရွယ်အမျိုးသားနဲ့ အသက် ၂၇ နှစ် အရွယ် အမျိုးသမီးတို့သေဆုံးခဲ့ပြီး အမျိုးသား ၂ ဦးနဲ့ အမျိုသမီး ၇ ဦးထိခိုက်ဒဏ်ရာရခဲ့ကာ ပျက်စီးမှုတွေတော့မရှိခဲ့ဘူးလို့ ဆိုပါတယ်။

ပန်းတောကြီးကျေးရွာဟာ လူဦးရေ ၂၀၀ ဝန်းကျင်နေထိုင်ပြီး ဒေသခံတွေကတော့ တခြား‌ ဘေးလွတ်နေရာကို တိမ်းရှောင်နေကြတယ်လို့ အထက်ပါအမျိုးသမီးက ပြောပါတယ်။

အလားတူအဲ့ဒီနေ့မှာပဲ စလင်းမြို့နယ်၊ ညောင်ကုန်းရွာက အသက် ၇၀ အရွယ်အဖိုး ၁ ဦးကိုလည်း စစ်ကောင်စီစစ်ကြောင်းက လည်လှီးသတ်ခဲ့သေးတယ်လို့ သိရပါတယ်။

ဒါ့အပြင် စလင်းမြို့နယ်အတွင်း လေကြောင်းတိုက်ခိုက်တာ၊ စစ်ကြောင်းထိုးတာတွေလည်း ရှိနေတဲ့အတွက် မြောက်ချောင်းဖြူအုပ်စု၊ ပန်းတောကျေးရွာအုပ်စု၊ မကျီးဖျားကျေးရွာအုပ်စုအတွင်းရှိ ရွာ ၁၃ ရွာက လူဦးရေ ၄ ထောင်လောက်အပါအဝင် စလင်းမြို့နယ်အတွင်းက လူဦးရေ ၁ သောင်းကျော် စစ်ရှောင်နေရတယ်လို့ အထက်ပါဒေသခံကပြောပါတယ်။

ပြီးခဲ့တဲ့ ဧပြီလတတိယပတ်အတွင်းမှာလည်း ဒေသခံကာကွယ်ရေးတပ်တွေနဲ့ စစ်ကောင်စီတပ်တို့ တိုက်ပွဲဖြစ်ခဲ့ပြီး လက်ရှိမှာတော့ တိုက်ပွဲငြိမ်သက်နေကာ ဆင်ဖြူကျွန်းမြို့အနောက်ဘက် နွယ်တမယ်ရွာမှာပဲ စစ်ကောင်စီတပ်ကအထိုင်ချထားတယ်လို့ သိရပါတယ်။

စာတည်း – လင်း