မြေလတ်အသံ၊ စက်တင်ဘာ ၁၆၊ ၂၀၂၅။

မန္တလေးတိုင်း၊ မတ္တရာမြို့နယ်ကို စစ်ကော်မရှင်တပ်က စက်တင်ဘာ ၁၅ ရက်နေ့လယ် ၁ နာရီကျော်မှာ လေကြောင်းကနေ ဗုံးကြဲတိုက်ခိုက်ခဲ့တာကြောင့် ကလေး ၂ ဦးအပါအဝင် ၆ ဦးသေဆုံးခဲ့တယ်လို့ဒေသခံတွေက ပြောပါတယ်။

မတ္တရာမြို့နယ်၊ အရှေ့မြောက်ခြမ်းရှိ ဒီယာနဲ့ ဥက္ကံစတဲ့ကျေးရွာ ၂ ရွာအနီး ကားလမ်းမကို တိုက်ခိုက်ရေးလေယာဥ် ၂ စီး၊ ပေါင် ၅၀၀ နဲ့ ၃၀၀ ဗုံးသီး ၃ လုံးကြဲချခဲ့တာလို့ ဆိုပါတယ်။

“တိုက်ပွဲဖြစ်တာလုံးဝမရှိပါဘူး။ ဥက္ကံနဲ့ ဒီယာရွာက ၂ မိုင်လောက်ပဲဝေးပါတယ်။ ဗုံးသီးက နေအိမ်ပေါ်ကျလားဆိုတော့ ကားလမ်းဘေးဝန်းကျင်ကျတာ။ ကားလမ်းဘေးက ပြည်သူတွေသေရတာပါဗျ”လို့ Wetlet Informational Network မှ တာဝန်ရှိသူ အမျိုးသားတဦးကပြောပါတယ်။

သေဆုံးသူ ၆ ဦးမှာ ဥက္ကံကျေးရွာမှ အမျိုးသား ၃ ဦး နဲ့ ဒီယာကျေးရွာမှ အမျိုးသား ၃ ဦးတို့ဖြစ်ပြီး အဲဒီထဲမှာ အသက် ၁၀ ကျော်အရွယ်အမျိုးသား ၂ ဦးပါဝင်ပြီး အသေးစိတ်အချက်အလက်တွေကိုတော့ ဆက်သွယ်ရေးအခက်အခဲကြောင့် လောလောဆယ် မသိရှိရသေးဘူးလို့ အထက်ပါအမျိုးသားက ပြောပါတယ်။

ပြီးခဲ့တဲ့စက်တင်ဘာ ၁၃ ရက်ကလည်း မတ္တရာမြို့နယ်အရှေ့ခြမ်းရှိ အင်ကြင်းမြိုင် ကျေးရွာအနီးကို စစ်ကော်မရှင်တပ်က Y12 လေယာဥ်နဲ့ ဗုံးကြဲတိုက်ခိုက်ခဲ့ရာ ဘုန်းကြီးကျောင်းနဲ့ သီလရှင်ကျောင်းတွေကို ကျရောက်ပေါက်ကွဲခဲ့တာကြောင့် ကိုရင် ၁ ပါးအပါအဝင် ၃ ဦးသေဆုံးတယ်လို့ သိရပါတယ်။

စာတည်း – လင်း

မုံရွာ၊ စက်တင်ဘာ ၁၆၊ ၂၀၂၅။

စစ်ကိုင်းတိုင်း၊ မုံရွာမြို့နယ်၊ ညောင်ပင်စောင့်ကျေးရွာမှာ စစ်ကော်မရှင်တပ်ကပစ်ခတ်တဲ့ လက်နက်ကြီး ထိမှန်ပြီး သက်ကြီးပိုင်းအမျိုးသား ၁ ဦးသေဆုံးကာ ၃ ဦးဒဏ်ရာရခဲ့တယ်လို့ ဒေသခံတွေဆီက သိရပါတယ်။

စက်တင်ဘာ ၁၅ ရက်ည ၉ နာရီကျော်မှာ စစ်ကော်မရှင်တပ်တွေအထိုင်ချထားတဲ့ ရွှေတောင်ဦး စခန်းကုန်းကနေပစ်ခတ်တဲ့ လက်နက်ကြီးဟာ ညောင်ပင်စောင့်ရွာ လက်ဖက်ရည်ဆိုင်အနီးက ကားပေါ်ကို ကျရောက်ပေါက်ကွဲခဲ့တာလို့ဆိုပါတယ်။

“လက်နက်ကြီးက လက်ဖက်ရည်ဆိုင်အရှေ့က ကားပေါ်ကျတာဆိုတော့ ကားကပြားသွားတယ်။ ဆိုင်ပိုင်ရှင်ရဲ့ ကားဘဲ။ ဆိုင်ထဲရှိနေသူတွေထိကုန်တာ”လို့ ဒေသခံတဦးကပြောပါတယ်။

လက်နက်ကြီးထိမှန်တာကြောင့် လက်ဖက်ရည်ဆိုင်ပိုင်ရှင် အသက် ၆၀ ကျော်အရွယ် ဦးလှအောင် သေဆုံးပြီး သားမက်ဖြစ်သူ အသက် ၃၀ ကျော်အရွယ် ကိုရဲမင်းအောင်နဲ့ ဆိုင်ထိုင်နေသူ ကျေးရွာ အတွင်းက အသက် ၄၀ ဝန်းကျင်အရွယ်အမျိုးသား ၂ ဦးတို့ထိခိုက်ဒဏ်ရာရခဲ့တယ်လို့ ဆိုပါတယ်။

သေဆုံးဒဏ်ရာရသူတွေကိုတော့ ဒေသခံတွေက မုံရွာပြည်သူ့ဆေးရုံကို ညတွင်းချင်းပို့ဆောင်ခဲ့ရတယ်လို့ သိရပါတယ်။

လက်နက်ကြီးကျရောက်ပေါက်ကွဲတဲ့နေရာက မုံရွာနတ်လူထိပ်ပန်ရပ်ကွက်ထိပ်ရှိ စစ်ကော်မရှင် စစ်ဆေးရေးဂိတ်နဲ့ မီတာ ၁၀၀ ခန့်သာကွာဝေးပြီး ပေါက်ကွဲတဲ့နေရာကို လာရောက်ကြည့်ရှု့တာမျိုး မရှိဘူးလို့ အထက်ပါဒေသခံကပြောပါတယ်။

မေ ၂၂ ရက်ကလည်း မုံရွာမြို့နယ်၊ နဂါးတွင်းကျေးရွာမှာ လက်နက်ကြီးကျရောက်ပေါက်ကွဲပြီး ရွာခံ ၂ ဦး သေဆုံးကာ ၁၀ ဦးဒဏ်ရာရရှိခဲ့ပါသေးတယ်။

စာတည်း – လင်း

မတ္တရာ၊ စက်တင်ဘာ ၁၄၊ ၂၀၂၅။

မန္တလေးတိုင်း၊ မတ္တရာမြို့နယ် အရှေ့မြောက်ခြမ်းကို စစ်ကော်မရှင်တပ်က လေကြောင်းကနေ ဗုံးကြဲလို့ ကိုရင် ၁ ပါးအပါအဝင် ၃ ဦးသေဆုံးတယ်လို့ ကျေးရွာနဲ့နီးစပ်သူတွေထံက သိရပါတယ်။

စက်တင်ဘာ ၁၃ ရက် ည ၇ နာရီခန့်မှာ စစ်ကော်မရှင်တပ်က Y12 လေယာဥ်နဲ့ အင်ကြင်းမြိုင်ကျေးရွာအနီးဝန်းကျင်က တောင်ကြောတွေကို ဗုံးကြဲချခဲ့ရာ ဘုန်းကြီးကျောင်းနဲ့ သီလရှင်ကျောင်းတွေကို ကျရောက်ပေါက်ကွဲခဲ့တာလို့ ဆိုပါတယ်။

” တောင်ကြောတွေပေါ်မှာ PDF တွေရှိတယ်အထင်နဲ့ ဗုံးလာကြဲတာ။ တောင်အောက်မှာက ဘုန်းကြီးကျောင်း၊ မယ်သီလရှင်ကျောင်းတွေရှိတော့ လျှောက်ချတာဆိုတော့ အဲ့လိုနဲ့ထိကုန်တာ။ တိုက်ပွဲဖြစ်တာလည်းမရှိဘူး”လို့ ကျေးရွာနဲ့နီးစပ်သူတဦးက ပြောပါတယ်။

ဗုံးထိမှန်တာကြောင့် အသက် ၁၁ နှစ် ကိုရင် ၁ ပါး၊ အသက် ၇၀ နှစ် သီလရှင် ၁ ပါးနဲ့ အသက် ၄၀ နှစ် အမျိုးသမီး ၁ ဦးတို့သေဆုံးခဲ့ပြီး ဘုန်းကြီးကျောင်းနဲ့ သီလရှင်ကျောင်းက အဆောက်အအုံတွေလည်း ပျက်စီးမှုရှိခဲ့တယ်လို့ သိရပါတယ်။

စစ်ကော်မရှင်ဘက်က လေကြောင်းကနေ ဗုံးလာကြဲချိန် သံဃာတော်၊ ကိုရင်၊ မယ်သီလရှင်တွေနဲ့ ကျေးရွာနေပြည်သူတွေက ပုန်းအောင်းနေရပြီး ရွာကနေစွန့်ခွာထွက်ပြေးကြတာတော့မရှိဘူးလို့ ဆိုပါတယ်။

စက်တင်ဘာ ၁၃ ရက် ယမန်နေ့မှာပဲ သပိတ်ကျင်းမြို့နယ်၊ ညောင်ပင်သာနဲ့ ကျောက်ဖြာရွာတွေကို စစ်ကော်မရှင်တပ်က လေကြောင်းကနေ ဗုံးကြဲလို့ ကလေး ၁ ဦးနဲ့ အမျိုးသမီး ၁ ဦး သေဆုံးပြီး မတ္တရာနဲ့သပိတ်ကျင်းမှာ တရက်တည်း အရပ်သား ၅ ဦးသေဆုံးခဲ့တာလည်း ဖြစ်ပါတယ်။

သပိတ်ကျင်း၊ စက်တင်ဘာ ၁၃၊ ၂၀၂၅။

မန္တလေးတိုင်း၊ သပိတ်ကျင်းမြို့နယ်၊ ညောင်ပင်သာရွာနဲ့ ကျောက်ဖြာကျေးရွာအနီးကို စစ်ကော်မရှင်တပ်က လေကြောင်းကနေဗုံးကြဲတိုက်ခိုက်ခဲ့တာကြောင့် ကလေးငယ် ၂ ဦးအပါအဝင် ၇ ဦးသေဆုံးခဲ့တယ်လို့ Voice of Mandalay – PDF က သတင်းထုတ်ပြန်ပါတယ်။

စက်တင်ဘာ ၁၃ ရက် နေ့လယ် ၁၂ နာရီခွဲမှာ ညောင်ပင်သာရွာကို ဗုံးကြဲတိုက်ခိုက်ခဲ့တာကြောင့် ကလေး ၁ ဦးအပါအဝင် ၅ ဦးသေဆုံးပြီး ၁ ဦးထိခိုက်ဒဏ်ရာရရှိခဲ့ပါတယ်။

ဒါ့အပြင် နေ့လယ် ၄ နာရီဝန်းကျင်မှာလည်း သပိတ်ကျင်းမြို့နယ်အတွင်းကကျေးရွာတချို့ကို Y 12 လေယာဥ်နဲ့ ဗုံးအလုံး ၄၀ ကြဲချရာ ကျောက်ဖြာကျေးရွာအနီးကို ကျရောက်ပေါက်ကွဲပြီး ကလေးငယ် ၁ ဦးနဲ့ အမျိုးသမီး ၁ ဦးသေဆုံးပြီး ဒေသခံ ၃ ဦးထိခိုက်ခဲ့တယ်လို့ ထုတ်ပြန်ချက်မှာဆိုပါတယ်။

ထိခိုက်သေဆုံးသူတွေနဲ့ပတ်သက်တဲ့အခြေအနေတွေကိုတော့ မြေလတ်အသံကဆက်လက် စုံစမ်းနေပါတယ်။

ပြီးခဲ့တဲ့ စက်တင်ဘာ ၁၁ ရက်ညနေ ၄ နာရီဝန်းကျင်ကလည်း သပိတ်ကျင်းမြို့နယ်၊ ကမ်းပါနီနဲ့ ဇရပ်ကွင်းကျေးရွာတို့ကို စစ်ကော်မရှင်တပ်က လေကြောင်းအပြင် လက်နက်ကြီးတွေနဲ့ပါပစ်ခတ်ခဲ့တာကြောင့် ဒေသခံ ၅ ဦးသေဆုံးခဲ့ပါသေးတယ်။

မြေလတ်အသံ၊ စက်တင်ဘာ ၁၀၊ ၂၀၂၅။

စစ်ကိုင်းတိုင်း၊ ဝက်လက်မြို့နယ်က ကျေးရွာ ၆ ရွာကို စစ်ကော်မရှင်တပ်က စက်တင်ဘာ ၉ ရက် နေ့လယ် ၃ နာရီကျော်မှာ ဗုံးကြဲတိုက်ခိုက်ခဲ့တာကြောင့် ကလေး ၁ ဦးအပါအဝင် ၄ ဦးသေဆုံးပြီး ၁၃ ဦးဒဏ်ရာရရှိခဲ့တယ်လို့ ဒေသခံတွေဆီကသိရပါတယ်။

ချင်းတွင်းမြစ်ကမ်းနံဘေးရှိ သစ်ဆိမ့်၊ အင်ဒေါင်း၊ ရုံပင်ကုန်း၊ မင်းကုန်း၊ နဘဲပင်လှ၊ တပ်သာရွာတို့ကို Y-12 လေယာဥ်တစီးနဲ့ ဗုံးကြဲတိုက်ခိုက်ခဲ့တာလို့ ဆိုပါတယ်။

“ဒီရွာတွေက တိုက်ပွဲဖြစ်တာမရှိပေမယ့် မြစ်ကမ်းနားကကျတော့သင်္ဘောတွေကို တိုက်ခိုက်မှာစိုးရိမ်လို့ လေကြောင်းကနေ လမ်းရှင်းတဲ့သဘောလို့ထင်တယ်”လို့ ဝက်လက်ဒေသခံအမျိုးသားတဦးက ပြောပါ တယ်။

သေဆုံးသူ ၄ ဦးမှာ တပ်သာရွာက ကလေးငယ် ၁ ဦး၊ အမျိုးသား ၁ ဦး၊ မင်းကုန်းရွာက အမျိုးသမီး ၁ ဦး၊ နဘဲပင်လှရွာက အမျိုးသမီး ၁ ဦးတို့ဖြစ်ပြီး ဒဏ်ရာရရှိသူတွေကတော့ တပ်သာရွာက ၅ ဦး၊ မင်းကုန်းရွာက ၃ ဦး၊ နဘဲပင်လှရွာက ၅ ဦးဖြစ်ပြီး အမျိုးသား၊ အမျိုးသမီးကိုတော့ ခွဲခြားမသိရှိရသေးဘူးလို့ Wetlet Informational Network မှတာဝန်ရှိသူက ပြောပါတယ်။

ပြီးခဲ့တဲ့စက်တင်ဘာ ၆ ရက်နဲ့ ၇ ရက်တို့မှာလည်း ထီးချိုင့်မြို့နယ်က စစ်သင်္ဘောတွေ ဖြတ်သန်းသွားလာချိန် လုံခြုံရေးလိုက်ပါလာတဲ့ Y-12 လေယာဥ် ၁ စီးက ဗုံးကြဲတိုက်ခိုက်ပြီး လက်နက်ကြီးတွေနဲ့ပါ ပစ်ခတ်ခဲ့ရာ မောင်းကုန်းရွာမှ ၅ ဦး၊ ကျောက်မှော်ရွာမှ ၁ ဦး၊ ဘိုကုန်းရွာမှ ၃ ဦး၊ ဝဲကြီး (ချွန်း)ရွာမှ ၂ ဦး စုစုပေါင်း ဒေသခံ ၁၁ ဦး သေဆုံးခဲ့တယ်လို့ Tigyaing Revolution -TR ကထုတ်ပြန်ထားပါတယ်။

စာတည်း – လင်း

လက်ပံတန်း၊ စက်တင်ဘာ ၁၀၊ ၂၀၂၅။

ပဲခူးတိုင်း၊ လက်ပံတန်းမြို့နယ်၊ သစ်ဟောင်းပြင်ကျေးရွာမှာ ဒရုန်းနဲ့ဗုံးချတိုက်ခိုက်ခံရပြီး အမျိုးသမီး ၂ ဦးသေဆုံးကာ ၂ ဦးဒဏ်ရာရခဲ့တယ်လို့ ရွှေတန်းမြေပြည်သူ့ကာကွယ်ရေးအဖွဲ့ တာဝန်ရှိသူတွေဆီက သိရပါတယ်။

စက်တင်ဘာ ၉ ရက်နေ့လယ် ၁၂ နာရီခန့်မှာ လက်ပံတန်းမြို့ပျူစောထီးအဖွဲ့တွေက သစ်ဟောင်းပြင်ကျေးရွာအနီး တမိုင်ကျော်လောက်ကနေကျေးရွာထဲကို ဒရုန်းနဲ့ဗုံးသီး ၂ လုံးလာကြဲချသွားတယ်လို့ ဆိုပါတယ်။

“အိမ်မှာနေရင်းနဲ့ကိုထိတာ။ ရွာထဲအိမ်တွေမှာရှိနေတာ။ ဗုံးတွေကပြင်းတယ်။ အိမ်တွေပေါ်ကျတာနဲ့ ပွင့်ကျလန်ထွက်ကုန်တာ။ အိမ် ၂ အိမ်ပျက်ပြီး အမျိုးသမီး ၂ ဦးသေပြီး ၂ ဦးဒဏ်ရာရသွားတာ။ မိသားစုဝင်တွေပဲ”လို့ ရွှေတန်းမြေပြည်သူ့ကာကွယ်ရေးအဖွဲ့တာဝန်ခံက ပြောပါတယ်။

စစ်ကော်မရှင်တပ်က မြို့နယ်အလိုက် ပျူစောထီးအဖွဲ့တွေဆီ ဒရုန်းတွေပေးထားတာရှိနေပြီး ပျူစောထီးအဖွဲ့တွေက ရရှိထားတဲ့ ဒရုန်းတွေကို စမ်းသပ်မောင်းနှင်ပြီး ကြုံတဲ့နေရာကို ဗုံးလိုက်ကြဲနေတာလို့ အထက်ပါတာဝန်ရှိသူက ပြောပါတယ်။

ဗုံးကျပေါက်ကွဲလို့ အသက် ၆၀ ဝန်းကျင်အရွယ်ရှိ ဒေါ်ခင်လှိုင်၊ အသက် ၅၀ ဝန်းကျင်ရှိ ဒေါ်စန်းဌေးတို့ နေရာတင်သေဆုံးပြီး အသက် ၉ နှစ်အရွယ် မယွန်းဝတီနဲ့ အသက် ၄၅ နှစ်အရွယ် မညိုမီလှိုင်တို့ ပြင်းထန်ဒဏ်ရာရခဲ့တယ်လို့ ဆိုပါတယ်။

ဒါအပြင်နေအိမ် ၂ လုံးမီးလောင်ပျက်စီးသွားပြီး ဒဏ်ရာရသူ ၂ ဦးကိုတော့ နီးစပ်ရာဆေးရုံပို့ထားရကာ သေဆုံးသွားသူတွေကိုတော့ နေ့ချင်းသင်္ဂြိုဟ်လိုက်ပြီလို့ သိရပါတယ်။

ဒရုန်းဗုံးချခံရတာကြောင့် အိမ်ခြေ ၂၀၀ ခန့်ရှိတဲ့ သစ်ဟောင်းပြင်ကျေးရွာက ဒေသခံအများစုဟာ ဘေးလွတ်ရာကိုတိမ်းရှောင်သွားကြရပြီး လူနည်းစုလောက်က ရွာမှာဆက်ရှိနေပါတယ်။

စက်တင်ဘာ ၄ ရက်ကလည်း လက်ပံတန်းမြို့နယ်၊ သရက်ချောင်းရွာမှာ စစ်ရှောင်ရာကနေ နေအိမ်ခေတ္တပြန်နေနေတဲ့အမျိုးသား ဒရုန်းဗုံးထိမှန်လို့ သေဆုံးသွားတယ်လို့ သိရပါတယ်။

စာတည်း – လင်း

အုတ်ဖို၊ စက်တင်ဘာ ၈၊ ၂၀၂၅။

ပဲခူးတိုင်း၊ အုတ်ဖိုမြို့နယ်၊ ချင်းစု၊ ကိုင်းကြီး၊ ဒေါင်းကြီး၊ ကြို့ကိုးပင်ကျေးရွာတွေကို စစ်ကော်မရှင်တပ်က စက်တပ်လေထီးနဲ့ဗုံးကြဲတိုက်ခိုက်ခဲ့တာကြောင့် ပြည်သူ ၃ ဦးသေဆုံးကာ ၂ ဦးဒဏ်ရာရတယ်လို့ သာယာဝတီခရိုင်စစ်ဆင်ရေးတာဝန်ခံဆီက သိရပါတယ်။

စက်တင်ဘာ ၇ ရက် ညနေ ၅ နာရီကျော်မှာ ကြို့ပင်ကောက်မြို့ဘောလုံးကွင်းကနေတက်လာတဲ့ စက်တပ်လေထီး ၅ စီးက အထက်ပါကျေးရွာတွေကို တိုက်ပွဲဖြစ်တာမရှိဘဲ မိနစ်ပိုင်းလောက်သာခြားပြီး ဗုံးသီးတွေကြဲချခဲ့တာလို့ဆိုပါတယ်။

“ကိုင်းကြီးမြောက်ကျောင်း ဘုန်းကြီးကျောင်းပေါ်ကျတယ်။ ဘုန်းကြီးကျောင်းပျက်စီးတယ်။ ချင်းစုရွာမှာက ဆေးဆိုင်တည့်တည့်ကိုကျတာ။ ပြည်သူတွေကတော့လက်လုပ်လက်စားတွေဘဲ။ လေထီးကိုမမြင်ဘူးတော့ ခြံထဲကနေ ဓာတ်ပုံရိုက်တာ။ အဲ့မှာတည့်တည့်လည်းကျကော မရှောင်သာမတိမ်းသာဘဲထိတာ”လို့ သာယာဝတီခရိုင် စစ်ဆင်ရေးတာဝန်ခံ ကိုသစ္စာကပြောပါတယ်။

ဗုံးသီးကျရောက်ပေါက်ကွဲတာကြောင့် ချင်းစုကျေးရွာနေ အသက် ၃၆ နှစ်အရွယ် ကိုချစ်ကောင်း၊ အသက် ၁၅ နှစ်အရွယ် G7 ကျောင်းသား ခန့်ကျော်သူ၊ ကိုင်းကြီးကျေးရွာဘုန်းကြီးကျောင်းနံဘေးရှိနေတဲ့ အသက် ၃၅ နှစ်အရွယ် ကိုတင်မျိုးမင်းတို့ ၃ ဦးနေရာမှာတင်သေဆုံးခဲ့ကြပါတယ်။

ဒါ့အပြင် ဒေါင်းကြီးကျေးရွာနေအိမ်ထဲရှိနေတဲ့ အသက် ၃၇ နှစ်အရွယ် ဦးအယ်စေးမှာ ပေါင်နဲ့လက် ပြင်းထန်ဒဏ်ရာရသလို သမီးဖြစ်သူ အသက် ၁၄ နှစ်အရွယ် မြမြသင်းဆိုသူမှာလည်း နဖူးထိခိုက်ဒဏ်ရာရခဲ့ကာ ကြို့ကိုးပင်ကျေးရွာမှာတော့ လူထိခိုက်တာမရှိဘူးလို့ သိရပါတယ်။

ဗုံးထိမှန်မိပြီး ချင်းစုရွာက နေအိမ် ၂ လုံး၊ ကိုင်းကြီးကျေးရွာက ဘုန်းကြီးကျောင်း ၁ ကျောင်း၊ ဒေါင်းကြီးရွာက နေအိမ် ၁ လုံးတို့ပျက်စီးပြီး နွား ၁ ကောင်သေဆုံးခဲ့ပါတယ်။

စစ်ကော်မရှင်ဘက်က စက်တပ်လေထီးနဲ့ဗုံးကြဲတာကြောင့် ဒေသခံတွေမှာ ထိတ်လန့်ကြောက်ရွံနေကြပေမယ့် ကျေးရွာကနေ ထွက်ပြေးတိမ်းရှောင်တာမျိုးတော့မရှိဘူးလို့ သိရပါတယ်။

ဩဂုတ် ၂၈ ရက်ကလည်း အုတ်ဖိုမြို့နယ်၊ ဒေါင်းကြီးကျေးရွာကို စစ်ကော်မရှင်တပ်ဘက်က ဒရုန်းနဲ့ဗုံးချတိုက်ခိုက်လို့ သားအမိ ၂ ဦးသေဆုံးသွားသေးတယ်လို့သိရပါတယ်။

၂၀၂၁ စစ်အာဏာသိမ်းချိန်ကနေ ၂၀၂၅ စက်တင်ဘာ ၄ ရက်ထိ စစ်ကော်မရှင်တပ်နဲ့လက်အောက်ခံတွေကြောင့် သေဆုံးခဲ့တဲ့ပြည်သူစုစုပေါင်း ၇,၁၈၂ ဦးရှိပြီလို့ နိုင်ငံရေးအကျဥ်းသားများကူညီစောင့်ရှောက်ရေးအသင်း – AAPP က ထုတ်ပြန်ထားပါတယ်။

စာတည်း – လင်း