သာယာဝတီ

ပဲခူး၊ မေ ၅၊ ၂၀၂၃။

NLD လက်ထက်ကချေးယူခဲ့တဲ့ သမဝါယမငွေကို ပြန်မဆပ်နိုင်သေးလို့ဆိုကာ ပဲခူးတိုင်းအနောက်ခြမ်း၊ သာယာဝတီခရိုင်၊ သာယာဝတီမြို့နယ်၊အသရော်ကျေးရွာက ဒေသခံတွေကို စစ်ကောင်စီအဖွဲ့ဝင်တွေက ဖမ်းဆီးသွားတယ်လို့ ဒေသခံတွေက ပြောပါတယ်။

မေလ ၅ ရက်ဒီနေ့လယ်ပိုင်းမှာ အသရော်ကျေးရွာက ဒေသခံတွေကို အသရော်နယ်ရဲစခန်းမှာ ခေါ်ယူစစ်ဆေးပြီးနောက် အမျိုးသမီး ၁၃ ဦးနဲ့ အမျိုးသား ၂ ဦးကို ထော်လာဂျီနဲ့ သာယာဝတီမြို့ပေါ်ကို ဖမ်းခေါ်သွားတာဖြစ်သလို အဲ့ဒီထဲမှာ မိခင်ဖြစ်သူနဲ့အတူ နို့စို့အရွယ်ကလေးငယ်တချို့လည်း ပါသွားခဲ့တယ်လို့ ဆိုပါတယ်။

စစ်ကောင်စီတပ်သား ၃ ဦး၊ ရဲ ၃ ဦး၊ သမဝါယမရုံးက အမျိုးသမီးတဦး၊ မြို့နယ်မှူးတို့က အသရော်ကျေးရွာကိုလာပြီး ချေးငွေ ၁ သိန်းဆိုရင် အတိုးနဲ့ ၆ သိန်းစီပြန်ဆပ်ရမယ်လို့ ပြောဆိုကာ မဆပ်နိုင်တဲ့သူတွေကိုဆိုရင် ဖမ်းဆီးရိုက်နှက်ကြတယ်လို့ တိမ်းရှောင်နေတဲ့ တောင်သူတဦးက ပြောပါတယ်။

“အခုက နိုင်ငံရေးအခြေအနေကမကောင်း၊ လူတွေကလည်း လုပ်ရကိုင်ရတာ အဆင်မပြေကြဘူးဗျ။ ကျနော်တို့ဆိုရင် ၂ သိန်းချေးထားတာ။ တချို့ဆိုရင် ၅ သိန်း၊ ၆ သိန်းချေးကြတာပေါ့။ အဲတာကို ရဲ၊ စကစတွေက တောင်းတာဗျ။ လူတွေကလည်း ၁ သိန်းရှိတသိန်းပေးကြတယ်။ ၅ သောင်းရှိရင် ငါးသောင်းပေးကြတယ်ဗျ။ ဒါကိုအကြွေးမရလို့ဆိုပြီး ဖမ်းတာ။ ဖမ်းရင်လည်း ရိုက်နှက်ကြတယ်။ ဒါကြောင့် ပြေးနေရတာ”လို့ ဆိုပါတယ်။

ဒီချေးငွေတွေကိုပြန်ဆပ်ဖို့ မေလ ၃ ရက်က စတင်တောင်းနေတာဖြစ်ပြီး၊ ဒီကနေ့မှ ဖမ်းဆီး ရိုက်နှက်တာတွေလုပ်ခဲ့ကာ၊ အဖမ်းခံရမှာကိုစိုရိမ်လို့ တိမ်းရှောင်နေရသူ စုစုပေါင်း ၅၀ ဝန်းကျင်ရှိတယ်လို့လည်း ဒေသခံတွေက ပြောပါတယ်။

အလားတူ မေလ ၃ ရက်မှာပဲ အင်းဝကျေးရွာက ကိုမျိုးမင်းဆိုသူမှာ ချေးငွေသိန်း ၅၀ ကို ဆပ်ဖို့သွားချိန် စစ်ကောင်စီနဲ့ ရဲတပ်သားတွေကဖမ်းဆီခဲ့တာကြောင့် မိသားစုတွေကပိုက်ဆံပေးပြီး ခေါ်ထုတ်ယူခဲ့ရတယ်လို့ သိရပါတယ်။

ပြီးခဲ့တဲ့ ၂၀၂၂ ခုနှစ် သြဂုတ်လ ၁၀ ရက်ကတော့ သမချေးငွေ အဓမ္မတောင်းတဲ့ မိုးညိုမြို့နယ် ကရင်ချောင်အုပ်စု တောရကုန်းရွာက မြို့နယ်သမဝါယမအလုပ်အမှုဆောင် ဦးမြင့်စိုးကို သာယာဝတီခရိုင်တပ်ရင်း ၃၈ဝ၂ တပ်ခွဲ ၄ နဲ့ မိုးညိုမြို့နယ် ပြည်သူ့ကာကွယ်ရေးတပ်ဖွဲ့က ဇေယျာသော်စစ်ဆင်ရေးအနေနဲ့ ပစ်ခတ်ခဲ့လို့ သေဆုံးခဲ့ပါတယ်။

စာတည်း – လင်း

သာယာဝတီ၊ ဧပြီ ၂၇၊ ၂၀၂၃။

ပဲခူးတိုင်း(အနောက်ခြမ်း)၊ သာယာဝတီမြို့နယ်၊ ရေမီးနင်းကျေးရွာက ပြည်သူ ၇ ဦးအပါအဝင် ကျေးရွာ ၅ ရွာက လူ ၃၀ ကျော်ကို သမချေးငွေ ပြန်မဆပ်လို့ဆိုကာ စစ်ကောင်စီတပ်ဖွဲ့ဝင်တွေ ဖမ်းဆီးထားတယ်လို့ သိရပါတယ်။

ဧပြီလ ၂၆ ရက်မနက် ၁၀ နာရီလောက်မှာ စစ်ကောင်စီလက်အောက် သမဝါယမဦးစီးမှူးတွေနဲ့ ရဲတပ်ဖွဲ့ဝင်တွေဟာ ရေမီးနင်းကျေးရွာ အုပ်ချုပ်ရေးမှူးနေအိမ်မှာ သမချေးငွေ ယူထားတဲ့သူတွေကို ခေါ်ယူပြီးနောက် ချေးငွေဆပ်ခိုင်းကာ မပေးနိုင်သူတွေကို ဖမ်းဆီးခေါ်ဆောင်သွားတာလို့ ဒေသခံတဦးက မြေလတ်အသံကို ပြောပါတယ်။

“သူတို့လာတဲ့အချိန် အလုပ်တွေ သွားနေကြလို့ မရှိကြတာ များတယ်။ ၁၀ ယောက်လောက်ပဲ သွားတာ။ အဲဒါကို ရောက်တာနဲ့ ချက်ချင်း ချေးငွေဆပ်။ မဆပ်နိုင်တဲ့သူတွေကို ထော်လာဂျီပေါ်တင်ပြီး ဖမ်းသွားတာ။ ငွေချက်ချင်း မပေးနိုင်တဲ့သူ ၇ ယောက် ပါသွားတယ်။ အခြားရွာကသူတွေကိုလည်း ရှေ့ရက်တွေမှာ အဲလိုပဲလုပ်ပြီး ဖမ်းဆီးထားတာမျိုးလည်း ရှိတယ်” လို့ ပြောပါတယ်။

ဖမ်းဆီးခံရသူတွေဟာ ရေမီးနင်းကျေးရွာ ဒေသခံ ဦးလှကြိုင်၊ ဦးဖြူအောင်၊ ဒေါ်စန်းဌေး၊ ဦးဖိုးလုံး၊ ဒေါ်မိုးခိုင်၊ ဒေါမြင့်မြင့်ခိုင်၊ ဒေါ် ကြီးမတို့ ၇ ဦးဖြစ်ပြီး သာယာဝတီ မြို့မရဲစခန်းကို ဖမ်းဆီးသွားလို့ မိသားစုဝင်တွေက ချေးငွေပိုက်ဆံပေးဆပ်ကာ ၆ ဦးကို ပြန်လည်ရွေးထုတ်လာရတယ်လို့ ဆိုပါတယ်။

အလားတူ စံရွေး၊ ရွှေညောင်ပင်၊ ဖားရွှေကျော်ရွာတွေအပါအဝင် ကျေးရွာ ၅ ရွာလောက်က ဒေသခံ ၃၀ ကိုလည်း သမချေးငွေ ပြန်မဆပ်လို့ဆိုကာ အခုဧပြီလထဲမှာပဲ သာယာဝတီ မြို့မရဲစခန်း အချုပ်ထဲမှာ ဖမ်းဆီးထားတယ်လို့ သိရပါတယ်။

“ခု ချေးငွေက ၂၀၁၅ -၂၀၁၆ လောက်ကတည်းက ချေးထားတဲ့ငွေပါ။ တရုတ်နဲ့ ဖက်စပ်လုပ်ထားတဲ့ ချေးငွေပေါ့။ အဲတုန်းကတော့ လတိုင်းသတ်မှတ်နှုန်းနဲ့ ပြန်ဆပ်ကြတယ်။ ကိုဗစ်နဲ့ နိုင်ငံရေးဖြစ်တော့ သူတို့လည်း ရွာလာမကောက်တော့ဘူး။ ခုကျမှ ချက်ချင်းကြီးရောက်လာပြီး ချေးငွေဆပ်ရမယ်။ မပေးရင် ဖမ်းမယ်ဆိုတာ ဖြစ်လာတာ။ သူတို့ကို ပေးဆပ်ဖို့ ကျန်တာက ၇ သောင်းကျော်ပဲ။ ခုက အတိုးနဲ့ဆိုပြီး တသိန်းရှစ်သောင်းကျော်အထိ ဖြစ်သွားတာ” လို့ ပြောပါတယ်။

သမချေးငွေပြန်ဆပ်ဖို့ သက်ဆိုင်ရာဌာနက ချေးငွေယူထားတဲ့ ဒေသခံတွေဆီ စာပို့အကြောင်းကြားတာမျိူးတွေမရှိဘဲ ချေးငွေ ပြန်မဆပ်သူတွေကို ဖမ်းဆီးနေတာကြောင့် ချေးငွေ ပြန်မဆပ်နိုင်သေးတဲ့ ဒေသခံတွေဟာ တိမ်းရှောင်ထွက်ပြေးနေရသူတွေလည်း ရှိနေတယ်လို့ ဆိုပါတယ်။

အဆိုပါ သမချေးငွေကို ကျေးရွာတွေမှာ ဒေသခံတွေ ၅ ဦး၊ ၁၀ ဦးအဖွဲ့တွေ စုပေါင်းကာ ဝိုင်းကြီးချုပ်စနစ်နဲ့ ချေးယူကြပြီး တဦးလျှင် တသိန်းကျပ် ရရှိကာ တနှစ်အတွင်း အတိုးအရင်းပေါင်း ခွဲဆပ်ကြရတယ်လို့ သိရပါတယ်။

စာတည်း – ရင်ငြိမ်း

သာယာဝတီ၊ မတ် ၂၅၊ ၂၀၂၃။

ပဲခူးတိုင်း(အနောက်ခြမ်း)၊ သာယာဝတီခရိုင်၊ သာယာဝတီမြို့နယ်၊ သာယာအေးကျေးရွာအုပ်စုအတွင်းက မူရင်းပိုင်ရှင် တောင်သူတွေဆီ စွန့်လွှတ်ပြီးဖြစ်တဲ့ တပ်ပိုင်မြေတွေရဲ့ ပိုင်ဆိုင်မှု ပုံစံ-၇ တွေကို စစ်ကောင်စီကျေးရွာအုပ်စု အုပ်ချုပ်ရေးမှူးက မတ်လ ၂၁ ရက်နေ့ကစတင်ကာ လော်စပီကာနဲ့အော်ပြီး ပြန်အပ်ခိုင်းနေတယ်လို့ သိရပါတယ်။

သာယာဝတီမြို့အခြေစိုက် ခလရ ၃၅ တပ်က ယခင်စစ်အစိုးရလက်ထက်မှာ သိမ်းဆည်းထားတဲ့ သာယာအေးကျေးရွာအုပ်စုအတွင်းက လယ်မြေဧက ၃၀၀ ကို ၂၀၁၃ ခုနှစ်မှာ တပ်ပိုင်မြေအဖြစ်ကနေ စွန့်လွှတ်ခဲ့ရတာဖြစ်ပြီး လက်ရှိမှာ အဲ့ဒီမြေ ပိုင်ဆိုင်ထားသူတွေဆီက ပိုင်ဆိုင်မှု ပုံစံ-၇ စာချုပ်တွေကို ရပ်၊ကျေးလယ်ယာမြေစီမံခန့်ခွဲရေးကော်မတီထံ အပ်နှံခိုင်းနေတာလို့ ဒေသခံတဦးက မြေလတ်အသံကို ပြောပါတယ်။

“ဒီမြေတွေက ဦးသိန်းစိန်လက်ထက်မှာ တောင်သူတွေ အမှန်တကယ် စိုက်ပျိုးမြေတွေဖြစ်လို့ တပ်ပိုင်မြေအဖြစ်ကနေ စွန့်လွှတ်ခဲ့ပြီး သူ့မူရင်းပိုင်ရှင်တွေကို တရားဝင်ပြန်လွှဲထားတဲ့ မြေတွေ။ ခုလို ပုံစံ ၇ ပြန်အပ်ခိုင်းတာက တပ်ပိုင်မြေအဖြစ် ပြန်သိမ်းဖို့ ပြင်ဆင်နေတာလို့ ယူဆပါတယ်” လို့ ပြောပါတယ်။

အရပ်သားအစိုးရလက်ထက်တုန်းကလည်း စစ်ကောင်စီတပ်က အဲ့ဒီမြေဧက ၃၀၀ နဲ့ပတ်သက်လို့ မူရင်းပိုင်ရှင်တွေကို ပြန်လည်လွှဲပြောင်းပေးရာမှာ အငြင်းပွားမှုတွေရှိခဲ့တယ်ဆိုပြီး အကြောင်းပြကာ ပြန်လည်သိမ်းယူဖို့ ကြိုးစားခဲ့ဖူးတယ်လို့ ဆိုပါတယ်။

“NLD လက်ထက် ၂၀၁၇ လောက်မှာ အဲ့ဒီမြေတွေနဲ့ပတ်သက်ပြီးတော့ ဒီမူရင်းပိုင်ရှင်တွေကြားမှာ အငြင်းပွားတာတွေဖြစ်လို့ ၃၅ တပ်က ပြန်သိမ်းဖို့ လုပ်သေးတယ်။ NLD ခံနေလို့ သူတို့မအောင်မြင်တာ” လို့ သူကဆက်ပြောပါတယ်။

အဲ့ဒီမြေဧက ၃၀၀ ရဲ့ ပိုင်ဆိုင်မှုစာချုပ်ပုံစံ ၇ တွေ စစ်ကောင်စီရပ်/ကျေးလယ်ယာမြေစီမံခန့်ခွဲရေးကော်မတီကို ပြန်လည်အပ်နှံဖို့ ခလရ ၃၅ တပ်က တပ်ကြပ်ကြီး သိန်းဦးနဲ့ သာယာအေးရွာအုပ်စု အုပ်ချုပ်ရေးမှူးတို့က ဦးစီးလုပ်ဆောင်နေတာလို့ ဆိုပါတယ်။

သာယာအေးကျေးရွာအုပ်စုထဲမှာ သင်တောရိုး၊ ကညင်ကောက်၊ သာယာအေး၊ ဂွေးချောင်းစတဲ့ရွာတွေ ပါဝင်တာဖြစ်ပြီး စစ်ကောင်စီတပ်က အဲ့ဒီရွာတွေထဲ လယ်မြေဧက ၃၀၀ ကို ၁၉၉၃ ခုနှစ် စစ်အစိုးရခေတ်မှာ တပ်ပိုင်မြေအဖြစ် သိမ်းဆည်းခဲ့တာဖြစ်ကာ ၂၀၁၃ ခုနှစ်မှာ တပ်ပိုင်မြေအဖြစ်ကနေ ပြန်လည်စွန့်လွှတ်ခဲ့ရတာလို့ သိရပါတယ်။

ပဲခူး၊ မတ် ၁၆၊ ၂၀၂၃။

ပဲခူးတိုင်း(အနောက်ခြမ်း)၊ သာယာဝတီခရိုင်ထဲက လယ်သမားတွေကို စစ်ကောင်စီလက်အောက်ခံ မြန်မာ့လယ်ယာဖွံ့ဖြိုးရေးဘဏ်က စိုက်ပျိုးစရိတ်ချေးငွေတွေကို ပြန်ဆပ်ဖို့ ခြိမ်းခြောက်တောင်းခံနေတယ်လို့ ဒေသခံလယ်သမားတွေဆီက သိရပါတယ်။

ခရိုင်တွင်းရှိ သာယာဝတီ၊ အုတ်ဖို၊ နတ္တလင်း တို့မှာရှိတဲ့ မြန်မာ့လယ်ယာဖွံ့ဖြိုးရေးဘဏ်မန်နေဂျာက ခြိမ်းခြောက်စာတွေ ပို့ကာ တောင်းခံနေတာလို့ သိရပါတယ်။

“ကျတော်တို့မိသားစုက ၃ ဦးရှိတာ လယ်က ၆ ဧက ရှိတယ်။ အရင်က ပြေပြေလည်လည် စားနိုင်သောက်နိုင်တယ်။ အာဏာသိမ်းပြီးကတည်းက ကုန်စျေးနှုန်းတွေ ကြီးပြီး လယ်ထွက်စပါးကလည်း အရင်းလောက်ပဲ ပြန်ရတော့ ဘဏ်ကြွေးဆိုတာလည်း မဆပ်နိုင်ဘူး။ အခုအဲဒီကြွေးတွေ ပြန်ဆပ်နိုင်ဖို့ ထိုင်းနိုင်ငံကို တရားမဝင်သွားပြီး အလုပ်လုပ်နရတယ်” လို့ သာယာဝတီမြို့ခံ လယ်သမားတဦးက ပြောပါတယ်။

လက်ရှိမှာလည်း စိုက်ပျိုးစရိတ်ချေးငွေတွေ ပြန်ဆပ်ဖို့ တောင်းခံလွှာတွေ ရောက်နေတယ်လို့ သူကဆက်ပြောပါတယ်။

ငွေတောင်းခံစာတွင် စိုက်ပျိုးစရိတ်ချေးငွေကို လာမယ့်မတ်လ ၁၈ ရက် နောက်ဆုံးထား ပေးဆပ်ရန်နဲ့ ပျက်ကွက်ပါက ဘဏ်ရဲ့လုပ်ထုံးလုပ်နည်း နည်းဥပဒေတွေနဲ့အညီ စီမံခန့်ခွဲခြင်းနဲ့ တရားစွဲဆိုတာတွေ လုပ်ဆောင်သွားမှာဖြစ်တယ်လို့ ဖော်ပြထားပါတယ်။

အုတ်ဖိုမြို့နယ် မြန်မာ့လယ်ယာဖွံ့ဖြိုးရေးဘဏ် မန်နေဂျာ ဒေါ်လွင်မာကြည်ရဲ့ ပြီးခဲ့တဲ့ဖေဖေါ်ဝါရီလက တောင်းခံတဲ့စာမှာလည်း သတ်မှတ်ရက်မှာ ပျက်ကွက်ပါက လယ်ယာမြေလုပ်ပိုင်ခွင့်လက်မှတ် (ပုံစံ ၇)ကို ဘဏ်ဥပဒေနဲ့အညီအရေးယူသွားမှာဖြစ်တယ်လို့ ဖော်ပြထားပါတယ်။

ဒါ့အပြင် နတ်တလင်းမြို့နယ် မြန်မာ့လယ်ယာဖွံ့ဖြိုးရေးဘဏ် မန်နေဂျာလက်မှတ်ရေးထိုး တောင်းခံစာမှာတော့ သတ်မှတ်ရက်မှာ ပျက်ကွက်ပါက လယ်ယာမြေလုပ်ပိုင်ခွင့်လက်မှတ် (ပုံစံ – ၇)ကို လေလံတင် ရောင်းချသွားမှာ ဖြစ်တယ်လို့ သိရပါတယ်။

စစ်ကောင်စီက လက်အောက်ခံ မြန်မာ့လယ်ယာဖွံ့ဖြိုးရေးဘဏ်တွေက စိုက်ပျိုးစရိတ် ချေးငွေ ခြိမ်းခြောက်တောင်းခံနေပေမယ့် အုတ်ဖိုမြို့နယ်နဲ့ နတ်တလင်းမြို့နယ် အရှေ့ဘက်က ကျေးရွာတွေကို စစ်တပ်က စစ်ကြောင်းထိုးနေရတာကြောင့် ရွာလုံးကျွတ် တိမ်းရှောင်နေရပြီး စပါးစိုက်ပျိုးနိုင်ခြင်းမပြုရတဲ့ လယ်သမားတွေလည်း ရှိနေပါသေးတယ်။

သာယာဝတီခရိုင် ပကဖအဖွဲ့ဝင် ဦးလူအေးကတော့ “စစ်ကောင်စီစစ်အစိုးရ စစ်မိစ္ဆာဆိုတာက ဘယ်တုန်းကမှ ပြည်သူလူထု အကျိုးကျေးဇူး ပြည်သူလူထုအပေါ် မျက်နှာမူတယ်ဆိုတဲ့ အစိုးရတရပ် ဘယ်တုန်းကမှ မဖြစ်ခဲ့ဘူး။ သူတို့ကိုယ်ကျိုး သူတို့ရလိုမှုပဲ အမြဲတမ်းကြည့်နေတာဖြစ်တယ်” လို့ ဆိုပါတယ်။

ဆက်လက်ပြီးလည်း “သူတို့က ဒီထက်ပိုပြီး နိုင်ထက်စီးနင်းလုပ်နေအုံးမှာ ဖြစ်တယ်။ ပြည်သူလူထု ဘယ်သူ့ကိုမဆို လယ်သမားကိုပဲဖြစ်ဖြစ် အကုန်လုံးခေါင်းပုံဖြတ်ပြီးတော့ အားလုံးဆင်းရဲတွင်းနက်ပြီးတော့ ချွတ်ခြုံကျသွားအောင် လည်မြိုကိုနင်းလို့ရအောင် အုပ်ချုပ်နေတာ ဖြစ်တယ်” လို့ ပြောပါတယ်။

ပြည်သူ့ကာကွယ်ရေးအဖွဲ့တွေရယ် NUG အစိုးရရယ် ပူးပေါင်းပြီးတော့ ပြည်သူလူထုတရပ်လုံး ရရာလက်နက်စွဲကိုင်ပြီး တော်လှန်တဲ့တနေ့ ရောက်လာမှာပါလို့လည်း သူကဆက်ပြောပါတယ်။

လက်ရှိမှာ ချေးငွေပြန်မဆပ်နိုင်တဲ့ လယ်သမားတွေအနေနဲ့ ခြိမ်းခြောက်စာတွေကြောင့် တရားစွဲဆိုတာနဲ့ လယ်သိမ်းခံရမှာကို စိုးရိမ်နေကြတယ်လို့ သိရပါတယ်။

သာယာဝတီ၊ မတ် ၃၊ ၂၀၂၃။

ပဲခူးတိုင်းဒေသကြီး၊ သာယာသတီခရိုင်၊ သာယာဝတီမြို့နယ်အတွင်းက လုပ်ငန်းရှင်သူဌေးတွေပိုင်ဆိုင်တဲ့ ကားတွေကို စစ်ကောင်စီက စတင်ချောဆွဲယူနေတယ်လို့ သိရပါတယ်။

မတ်လ ၃ ရက်နေ့က စတင်ပြီး ပဲခူးရိုးမအတွင်း PDF တွေရှိနေတဲ့နေရာတွေကို စစ်ကြောင်းထိုးတဲ့နေရာမှာ အသုံးပြုဖို့ သာယာဝတီခရိုင် စီမံကောင်စီဥက္ကဌ အမိန်နဲ့ မြို့နယ် စီမံကောင်စီဥက္ကဌတွေက ချောဆွဲနေတာဖြစ်တယ်လို့ သာယာဝတီ ဂဠုန်တပ်ဖွဲ့တာဝန်ရှိသူကပြောပါတယ်။

“စကစ စစ်ဆင်ရေးမှာ သုံးနေတဲ့ ကားတွေက အစုတ်အပြတ်တွေဆိုတော့ ပြီးခဲ့တဲ့ ရက်ကပဲ ရိုးမအတက်မှာ ကားမှောက်သေထားတာဆိုတော့ ကားကောင်းတဲ့ အရပ်သားကားတွေကို အသုံးပြူဖို့အတွက် ချောဆွဲနေတာဖြစ်တယ်။ သိရတဲ့သတင်းအရတော့ သာယာဝတီခရိုင်တခုလုံးက ကားတွေကို ချောဆွဲမယ်လို့ သိရတယ်” လို့ ပြောပါတယ်။

စစ်ကောင်စီတ​ပ်တွေက အရပ်သားကားနဲ့လာချိန် PDF တွေက ပစ်ခတ်ပါက PDF တွေက အရပ်သားကားတွေကို ပစ်မှတ်ထားတိုက်ခိုက်တယ်ဆိုပြီး သတင်းမှား​ဖြန့်ရန် လုပ်ဆောင်နေတယ်လို့လည်း ဆိုပါတယ်။

“ပြည်သူတွေကို သတိပေးချင်တာက စကစ ကားတွေနဲ့ နီးကပ်စွာ မလိုက်ဖို့။ သူတို့ကားတွေနဲ့ မလိုက်လာဖို့။ သူတို့ရဲ့လှုပ်ရှားမှုတွေကို မပြတ်စုံစမ်းနေတာဖြစ်လို့ စကစနဲ့အတူ လိုက်ပါလာမယ်ဆိုရင် စကစ ဘက်တော်သားလို့ ယူဆပြီး စစ်ရေးအရ တိုက်ခိုက်ရမှာပဲ” လို့ ပြောပါတယ်။

ယနေ့ မတ်လ ၃ ရက်နေ့မှာပဲ သာယာဝတီမြို့နယ် စီမံကောင်စီအမိန့်နဲ့ သာယာဝတီမြို့နယ်ထဲက သူဌေးလု​ပ်ငန်းရှင်တွေ သုံးတဲ့ Extra Cab၊ Double Cap၊ 4Wheel ကား ၁၀ စီးခန့်ကို ချောဆွဲထားတယ်လို့ ဆိုပါတယ်။

မတ်လ ၂ ရက်နေ့ မနက် ၄ နာရီကျော်ခန့်က မင်းလှမြို့နယ်၊ စိန်ကန့်လန့်ကျေးရွာနဲ့ မြို့ချောင်းကျေးရွာကြား ခါချဥ်တောင်လမ်းမှာ PDF တွေကို စစ်ကြောင်းထိုးဖို့လာတဲ့ စစ်ကောင်စီကား မှောက်လို့ ၅ ဦး သေဆုံးပြီး ဒဏ်ရာရသူတွေလည်းရှိတယ်လို့ သိရပါတယ်။

စာတည်း – 007

ပဲခူး၊ ဖေဖော်ဝါရီ ၂၁၊ ၂၀၂၃။

ပဲခူးတိုင်း(အနောက်ခြမ်း)၊ သာယာဝတီမြို့နယ်၊ သင်တောရိုးကျေးရွာအုပ်စု၊ ဂွေးချောင်းကျေးရွာအနီး ရန်ကုန် – ပြည်လမ်းမ မက်စ်မြန်မာတိုးလ်ဂိတ်မှာ ရိုဟင်ဂျာအမျိုးသမီး ၄ ဦးအပါ ၃၂ ဦး ဖမ်းဆီးခံခဲ့ရတယ်လို့ သိရပါတယ်။

ဖေဖော်ဝါရီလ ၂၁ ရက် ဒီကနေ့နေ့လည် ၁၂ နာရီခန့်က အဲ့ဒီတိုးလ်ဂိတ်မှာ ပြည်မြို့ဘက်ကနေ ရန်ကုန်ဘက်ကိုမောင်းနှင်လာတဲ့ အပြာရောင် ၆ ဘီးကားကို စစ်ကောင်စီတပ်ဖွဲ့၀င်တွေက တားဆီးစစ်ဆေးရာကနေ ဝါးထရံတွေကာပြီး တင်ဆောင်လာတဲ့ရိုဟင်ဂျာတွေ ဖမ်းဆီးခံခဲ့ရတာလို့ ဒေသခံတဦးက မြေလတ်အသံကိုပြောပါတယ်။

“ပြန်သိရတာက စကစတွေ စစ်ဆေးနေချိန်မိတာလို့ သိရတယ်။ သူတို့ သတင်းရလို့နေမယ်။ သူတို့ကို တင်လာတဲ့ကားက ကျောက်တွေတင်တဲ့ဖောကား။ အပေါ်ကနေ ဝါးထရံတွေအုပ်ပြီး အောက်မှာ လူတွေလိုက်လာတာ။ ခုတော့ ဖမ်းသွားပြီအားလုံးကို။ ဒီလမ်းကြောင်းတွေက ရခိုင်ဘက်ကနေ ရန်ကုန်သွားတဲ့သူတွေကို သယ်နေကျ လမ်းကြောင်းပဲ။ ခုတခါက ပိုက်ဆံမရလို့လား၊ သတင်းပေးတိုင်လို့လား မသိဘူး”လို့ ပြောပါတယ်။

အဲ့ဒီကားထဲကနေ ရိုဟင်ဂျာလူမျိုး အမျိုးသား ၂၈ ဦး၊ အမျိုးသမီး ၄ ဦးဖမ်းဆီးခံခဲ့ရတာဖြစ်ပြီး ယာဉ်မောင်းနဲ့ ကားကိုပါဖမ်းဆီးကာ သုံးဆယ်ရဲစခန်းဘက်ကို ခေါ်ဆောင်သွားတယ်လို့ သိရပါတယ်။

ပြီးခဲ့တဲ့နှစ် ဇူလိုင်လကလည်း ပန်းတောင်းမြို့နယ်၊ ဉသျှစ်ပင်လမ်းဆုံအနီး စစ်ဆေးရေးဂိတ်မှာ အထောက်အထားမဲ့ ရိုဟင်ဂျာ အမျိုးသား ၁၂ ဦးနဲ့ အမျိုးသမီး ၁၈ ဦ ဖမ်းဆီးခံခဲ့ရသေးတယ်လို့ သိရပါတယ်။

ပဲခူး၊ ဖေဖော်ဝါရီ ၁၄၊ ၂၀၂၃။

ပဲခူးတိုင်းအနောက်ခြမ်း၊ သာယာဝတီခရိုင်၊ မင်းလှမြို့နယ်၊ စမ်းဘုတ်ကျေးရွာအုပ်စု၊ ကျွန်းကုန်း‌‌ကျေးရွာက စစ်ကောင်စီခန့် ရာအိမ်မှူး ၁ ဦး ဖေဖော်ဝါရီလ ၁၃ ရက်မနေ့ကမနက် ၈ နာရီလောက်မှာ သေနတ်နဲ့ ပစ်သတ်ခံခဲ့ရတယ်လို့ သိရပါတယ်။

ပစ်သတ်ခံရတဲ့သူဟာ စစ်ကောင်စီခန့်ရာအိမ်မှူး စိုးနိုင် ဆိုသူဖြစ်ပြီး၊ သူဟာ ဒေသတွင်းသစ်ခိုးထုတ်နေသူတဦးလည်း ဖြစ်ကာ ခုလိုလုပ်နေတာကို မင်းလှ PDF က တားမြစ်ခဲ့လို့ စစ်ကောင်စီနဲ့ပူးပေါင်းပြီး PDF စခန်းတည်နေရာကို လိုက်လံပြသခဲ့တာကြောင့်ပစ်ခတ်ရှင်းလင်းခဲ့တာလို့ သာယာဝတီခရိုင်ပြည်သူ့ကာကွယ်ရေးတပ်ဖွဲ့ တာဝန်ရှိသူတဦးက မြေလတ်အသံကိုပြောပါတယ်။

”သူက ဒလန်ထက်ဆိုးတယ် သစ္စာဖောက်ပေါ့။ အရင်က မင်းလှ PDF စခန်းကို အဝင်အထွက်ရှိတယ်။ PDF စခန်းကို သူလိုက်ပြလို့ စခန်းအစီးခံရတုန်းက ကျသွားတဲ့ ရဲဘော်ရိုးမက သူနဲ့ညီအစ်ကိုဝမ်းကွဲတော်တယ်၊ အဲ့တာကြောင့်လည်း သူ့ကို ဝင်၊ထွက်ခွင့်ပေးထားတာ။ သူသစ်ခိုးထုတ်တာတွေအရမ်းများလာလို့ PDF ကတားတာ၊ အဲ့ဒါကိုမကျေနပ်လို့ စစ်ကောင်စီနဲ့သွားပေါင်းပြီး PDF စခန်းကိုလိုက်ပြတာ။ အဲ့ဒီ စခန်းသိမ်းခံရပြီးနောက်ပိုင်းမှ သူ့ကိုရာအိမ်မှူးခန့်ပြီး သစ်ခိုးထုတ်ခွင့်ပေးထားတာ” လို့ ပြောပါတယ်။

ဒါ့အပြင် စစ်ကောင်စီအားကိုးနဲ့ ဒေသခံတွေကို ခြိမ်းခြောက်ဆဲဆိုကြိမ်းမောင်းပြီး ဖိနှိပ်တာတွေ လုပ်ဆောင်နေတဲ့အပြင် သူ့ကြောင့် ကျွန်းကုန်းရွာခံအများအပြားလည်း ထွက်ပြေးနေရတယ်လို့ သိရပါတယ်။

ဒီတိုက်ခိုက်မှုကို မင်းလှမြို့နယ်၊ ပြည်သူ့ကာကွယ်ရေးတပ်ဖွဲ့နဲ့ သာယာဝတီဂဠုန်တပ်ဖွဲ့တို့ ပူးပေါင်းပြီးတော့ နန်းထိုက်အောင်စစ်ဆင်ရေးအဖြစ်လုပ်ဆောင်ခဲ့တာလို့ ထုတ်ပြန်ထားပါတယ်။

ပြီးခဲ့တဲ့ဇန်နဝါရီလ ၂၉ ရက်ည ၁၁ နာရီခွဲလောက်မှာလည်း သာယာဝတီခရိုင်၊ မင်းလှမြို့နယ်၊ ငလှစမ်းကျေးရွာ၊ ဖဲဝိုင်းတခုမှာ အသက် ၅၀ နှစ်အရွယ် စစ်ကောင်စီခန့်အုပ်ချုပ်ရေးမှူး ကိုထွန်းဝင်းဆိုသူကို သာယာဝတီခရိုင် ဂဠုန်တပ်ဖွဲ့ခွဲ(၃)နဲ့ မင်းလှ PDF ရဲဘော်တွေက နန်းထိုက်အောင် စစ်ဆင်ရေးအနေနဲ့ ပစ်ခတ်ရှင်းလင်းခဲ့ပါသေးတယ်။

ပဲခူး၊ ဒီဇင်ဘာ ၃၁၊ ၂၀၂၂။

ပဲခူးတိုင်းအနောက်ခြမ်း၊ သာယာဝတီမြို့နယ်ထဲမှာ တပ်ထောက်ခံပွဲမလုပ်ရဲတဲ့အတွက် ပြည်မြို့ပေါ်က ကြံ့ခိုင်ရေးရုံးထဲမှာ ပြောင်းပြီးလုပ်ခဲ့ကြတယ်လို့ သိရပါတယ်။

ဒီဇင်ဘာလ ၃၁ ရက်ဒီကနေ့မနက်ပိုင်းမှာ သာယာဝတီမြို့နယ်ကြံ့ခိုင်ရေးပါတီကပြုလုပ်တဲ့ ကုလသမဂ္ဂလုံခြုံရေးကောင်စီက မြန်မာနိုင်ငံနဲ့ပတ်သက်ပြီးဆုံးဖြတ်ချက်ကို ဆန့်ကျင်ရှုံ့ချကြောင်းပွဲကို သာယာဝတီမှာမလုပ်ရဲတဲ့အတွက် ပြည်မြို့၊ ကြံခိုင်ရေးရုံးထဲမှာပြောင်းလဲပြုလုပ်ခဲ့တာလို့ သာယာဝတီမြို့နယ်ကြံခိုင်ရေးပါတီနဲ့ နီးစပ်သူကတဦးကပြောပါတယ်။

“အမှန်ဆို ကုလသမဂ္ဂလုံခြုံရေးကောင်စီက မြန်မာနိုင်ငံနဲ့ပတ်သက်တဲ့ဆုံးဖြတ်ချက်ကို ဆန့်ကျင်ရှုံချပွဲကို မြို့နယ်အလိုက်လုပ်ခိုင်းတာ။ သာယာဝတီက PDF ရန်ကြောက်လို့ ပြည်မှာပြောင်းလုပ်ရတာလို့ သိရတယ်”လို့ ပြောပါတယ်။

စစ်တပ်အာဏာသိမ်းပြီးနောက်ပိုင်း သာယာဝတီဂဠုန်တပ်ဖွဲ့ ပေါ်ပေါက်လာပြီးချိန်မှစတင်ပြီး စစ်ကောင်စီသတင်းပေး၊ ဒလန်ဆိုသူတွေနဲ့ စစ်ကောင်စီတပ်ဖွဲ့တွေ ရှင်းလင်းခံလာရချိန်မှာ သာယာဝတီမြို့နယ်ထဲမှာ စစ်တပ်ထောက်ခံပွဲတွေ လုပ်ရဲသူမရှိသလောက်ဖြစ်လာတယ်လို့ သာယာဝတီဂဠုန်တပ်ဖွဲ့ မြေပြင်စစ်ရေးတာဝန်ခံ ကိုဥက္ကာကပြောပါတယ်။

“သာယာဝတီဂဠုန်တပ်ဖွဲ့မပေါ်ချိန်ကတော့ ကြံခိုင်ရေးနဲ့စကစထောက်ခံသူတွေက တော်တော်လေး လေကျယ်ကျယ်နဲ့ မြို့ပေါ်မှာတောင် တပ်ထောက်ခံပွဲတွေလုပ်ခဲ့ကြတယ်။ ဘယ်သူမှဂရုမစိုက်ဘဲလုပ်ခဲ့တယ်။ ဂဠုန်တပ်ဖွဲ့ ပေါ်လာပြီးချိန်မှာ သူတို့ရဲ့အုပ်ချုပ်ရေးယန္တယားအဖွဲ့ဝင်တွေ ရှင်းခံလာရတော့ အဲဒီအချိန်ကစပြီး ကျီးလန့်စာ စားဖြစ်နေရတယ်။ ဘယ်အချိန် အသတ်ခံရမလဲဆိုပြီးတော့။ ကျနော်တို့ဘက်ကလဲ သူတို့ လမ်းပေါ်တက်လာတာနဲ့ ဘယ်သူဘယ်ဝါသိတာနဲ့ စကစ ဒေါက်တိုင်တွေကို ရှင်းနေမှာပဲ”လို့ ပြောပါတယ်။

သာယာဝတီဂဠုန်တပ်ဖွဲ့အနေနဲ့ ၂၀၂၂ ခုနှစ်၊ ဩဂုတ်လမှစတင်ပြီး ဒီဇင်ဘာလ ၂၈ ရက်အထိ သာယာဝတီမြို့နယ်အတွင်းက အုပ်ချုပ်ရေးအဖွဲ့ဝင်၊ ပျူ၊ သတင်းပေးဒလန်ဆိုသူ စုစုပေါင်း ၁၃ ဦးထိ ရှင်းလင်းထားတယ်လို့ သိရပါတယ်။