မုံရွာ၊ ဧပြီ ၁၅၊ ၂၀၂၅။

စစ်ကိုင်းတိုင်း၊ မုံရွာမြို့မှာ သင်္ကြန်လည်နေတဲ့ လူငယ်အမျိုးသား ၂ ဦးကို စစ်ကောင်စီတပ်ဖွဲ့က ဖမ်းဆီးသွားခဲ့တယ်လို့ ဒေသခံတွေဆီက သိရပါတယ်။

ဧပြီ ၁၅ ရက် ( သင်္ကြန်အကြတ်နေ့) မနက် ၉ နာရီဝန်းကျင်က မုံရွာမြို့၊ ဒေါနခြံရပ်ကွက်၊ ရေစင်ကြီးမီးပွိုင့်အနီး သင်္ကြန်အလည်အပတ်ထွက်လာတဲ့ ဆိုင်ကယ်စီးအမျိုးသား ၂ ဦးကို အိမ်စီးကား ၃ စီးနဲ့ အရပ်ဝတ်စစ်ကောင်စီတပ်ဖွဲ့ဝင် ၁၅ ဦးခန့်က ဖမ်းဆီးခေါ်ဆောင်သွားခဲ့တာလို့ ဆိုပါတယ်။

” တချို့က စစ်သားမဟုတ်ဘူး ရဲတွေကျည်ကာကတော့ စစ်အရောင်ဝတ်ထားကြတယ်။ ကောင်လေးတွေ မောင်းလာတဲ့ ဆိုင်ကယ်ရှေ့ကို ပိတ်ရပ်လိုက်တယ်၊ ပြီးမှ ကားပေါ်ကဆင်းပြီး ကောင်လေးတွေကို သေနတ်နဲ့ချိန်ကားပေါ် အတင်းဆွဲခေါ်သွားတာ” လို့ မျက်မြင်တွေ့ရှိသူ အသက် ၃၀ ကျော်အရွယ် အမျိုးသမီးတဦးက မြေလတ်အသံကို ပြောပါတယ်။

စစ်အာဏာသိမ်းပြီးနောက် စစ်ကောင်စီက မုံရွာမြို့ပေါ်မှာ အမျိုးသား ၂ ဦးတွဲ ဆိုင်ကယ်စီးနင်းတာနဲ့ အမျိုးသမီးအနောက်မှာအမျိုးသားစီးနင်းမှုတွေကို တားမြစ်ထားပြီး တွေ့ရှိပါက ဖမ်းဆီး၊ သေနတ်နဲ့ပစ်ခတ်တာတွေကို လုပ်ဆောင်တယ်လို့ ဆိုပါတယ်။

ပုံစာ – မုံရွာ၊ ရေစင်ကြီးမီးပွိုင့်အနီး သင်္ကြန်အကျနေ့ မြင်ကွင်း ( ဓာတ်ပုံ – မြေလတ်အသံ)။

သတင်း – ခေတ်သဒ္ဒါ၊ စာတည်း – ဟိန်းစံ

မန္တလေး၊ ဇန်နဝါရီ ၁၃၊ ၂၀၂၅။

မန္တလေးတိုင်း၊ ဝမ်းတွင်းမြို့နယ်အတွင်းရှိ ကျေးရွာတွေကနေ လူငယ် ၆ ဦးထက်မနည်း စစ်မှုထမ်းဖို့ ဖမ်းဆီးခံရတယ်လို့ ဒေသသတင်းရင်းမြစ်တွေထံက သိရပါတယ်။

ဖမ်းဆီးခံရသူတွေဟာ ဝမ်းတွင်းမြို့ လေးမျက်နှာကျေးရွာနေ အသက် ၂၀ ကျော်အရွယ် သူထူးစံနဲ့ တဲစုကျေးရွာက လူငယ် ၁ ဦးတို့ဖြစ်ပြီး ဇန်နဝါရီ ၁၀ ရက် ညနေ ၄ နာရီခန့်မှာ ၎င်းတို့ ၂ ဦးဟာ ဝမ်းတွင်းမြို့ဘက်ကနေ မိတ္ထီလာဘက်ကို ဆိုင်ကယ်မောင်းနှင်လာစဥ် ပင်းတလဲ-မိတ္တီလာလမ်းပေါ်မှာ စစ်ဆေးရေးလုပ်နေတဲ့ စစ်ကောင်စီတပ်ဖွဲ့က ဖမ်းဆီးသွားခဲ့တာလို့ ဆိုပါတယ်။

အလားတူ ဇန်နဝါရီ ၁၁ ရက် ည ၇ နာရီခန့်မှာ ကား ၁ စီးနဲ့လာတဲ့ စစ်ကောင်စီတပ်အင်အား ၅ ဦးဟာ ခင်ကြီးကျေးရွာကိုရောက်ရှိလာပြီး ကျေးရွာတွင်းအရက်ဆိုင်မှာ အရက်ထိုင်သောက်နေတဲ့ အသက် ၂၀ ကျော်လူငယ်တွေဖြစ်တဲ့ အောင်ကျော်ကျော်၊ ဝင်းမင်းထွန်း၊ နိုးတူး၊ ငမျိုးတို့ ၄ ဦးကို ထပ်မံဖမ်းဆီးသွားတယ်လို့ ဆိုပါတယ်။

“(ဆိုင်ကယ်နဲ့) ဘိလပ်မြေသွားပို့တဲ့ ကောင်လေးတွေက (ပင်းတလဲ-မိတ္ထီလာ) လမ်းပိုင်းပေါ် မှာ ဖမ်းခံရတာ။ အရက်ဆိုင်ကိုဝင်ဆွဲတာ အကုန်ထွက်ပြေးကြတာ။ စစ်ကားလာလို့ ကျန်ခဲ့တဲ့ကောင်တွေထဲက အုပ်ကြီးမကြည်တာတွေအဖမ်းခံရတာ။ အုပ်ကြီးကြည်တဲ့သူတွေလွတ်တယ် အဲ့သဘော။ သူတို့တွေက စစ်မှုထမ်းဖို့ဖမ်းခံရတာ။”လို့ ဖြစ်စဥ်ကိုသိရှိထားတဲ့ ဒေသခံတဦးက ပြောပါတယ်။

ဖမ်းဆီးခံရတဲ့ လူငယ်တွေကိုတော့ ပျော်ဘွယ်ဘက်က စစ်ကောင်စီတပ်ရင်းတွေကို ပို့ဆောင်လိုက်ကြောင်း သိရပြီး ဘယ်တပ်ရင်း/တပ်ဖွဲ့တွေဆိုတာကိုတော့ မသိရသေးဘူးလို့ ဆိုပါတယ်။

ဒါ့အပြင် ဇန်နဝါရီ ၁၀ ရက်ကလည်း စစ်ကောင်စီတပ်ဖွဲ့တွေက ရေဆုံးကျေးရွာက ၆ ဦး၊ ကုက္ကိုခါးလှက ၂ ဦး၊ ညောင်ပင်ကုန်းရွာက ၁ ဦး၊ ဒိုင်ကောင်းကုန်းရွာက ၁ ဦး၊ ညောင်ပင်သာဆည်ရွာက ၄ ဦး ထပ်မံ ဖမ်းဆီးသွားတယ်လို့ အထက်ပါဒေသခံက ပြောဆိုပြီး ဒီအခြေအနေတွေနဲ့ပတ်သက်လို့ အသေးစိတ်ကိုတော့ မသိရသေးပါဘူး။

ဝမ်းတွင်းမြို့နယ်ထဲမှာ စစ်ကောင်စီတပ်ဖွဲ့ဝင်တွေက အရပ်ဝတ် အိမ်စီးကားတွေနဲ့ တနေကုန်လှည့်ပတ်သွားလာနေပြီး လူပြတ်တဲ့နေရာတွေမှာ တွေ့ရှိတဲ့ လူငယ်တွေကို ပေါ်တာဆွဲဖမ်းဆီးတာ၊ စစ်ဆေးရေးဂိတ်တွေကို ဖြတ်သန်းသွားလာတဲ့လူငယ်တွေကို စစ်မှုထမ်းဖို့ ဖမ်းဆီးတာတွေ လုပ်ဆောင်နေတယ်လို့ သိရပါတယ်။

ဇန်နဝါရီ ၇ ရက်ကလည်း သဲတောကျေးရွာအနီး သဲတော-ညောင်ပင်သာဆည်ရွာတံတားအနီးမှာ ခင်ကြီးကျေးရွာနဲ့ဆူးပန်းကျေးရွာက လူငယ် ၂ ဦးကို စစ်ကောင်စီတပ်ဖွဲ့ဝင်တွေက ဖမ်းဆီးသွားပြီးနောက် ပြန်လွတ်မလာသေးဘူးလို့ သိရပါတယ်။

စာတည်း – ဟိန်းစံ

မကွေး၊ ဇွန် ၁၃၊ ၂၀၂၃။

မကွေးတိုင်း၊ ပခုက္ကူမြို့နယ်မှာ စစ်ကောင်စီလက်အောက်ခံ ပျူစောထီးတွေက ကျေးရွာတွေကိုဝင်ရောက်ပြီး လူငယ်၊ လူလတ်ပိုင်းအရွယ် အမျိုးသား၊ အမျိုးသမီးတွေကို ဖမ်းဆီးစစ်ဆေးတာတွေ ပြုလုပ်နေလို့ ထွက်ပြေးတိမ်းရှောင်နေကြရတယ်လို့ ဒေသခံတွေက ပြောပါတယ်။

ပြီးခဲ့တဲ့မေလကနေ ဇွန်လ လက်ရှိအချိန်အထိ ပျူစောထီးခေါင်းဆောင် ဇော်နိုင်ဝင်း ဦးဆောင်တဲ့ အင်အား ၅၀ ခန့်ရှိတဲ့ အဖွဲ့က လက်နက်တွေကိုင်ဆောင်ကာ တရွာဝင်၊ တရွာထွက် စစ်ဆေးတာတွေပြုလုပ်နေလို့ အသက် ၁၅ နှစ်ကနေ ၃၅ နှစ်အရွယ် လူငယ်တွေဟာ ကျေးရွာမှာ မနေထိုင်ကြရဘဲ ထွက်ပြေးတိမ်းရှောင် နေကြရတယ်လို့ အသက်၂၀ ကျော်အရွယ် ဆယ်လံကျေးရွာသားတဦး က ပြောပါတယ်။

“ကျနော်ကိုယ်တိုင်လည်း ပြေးနေရတယ်။ ပျူတွေကို စကစတွေက လက်နက်တွေ ပေးထားတော့ စိတ်ကြိုက် သောင်းကျန်းတာပေါ့။ ကျနော်တို့လို လူငယ်တွေဆို အဓိကပစ်မှတ်ထား စစ်ဆေးတယ်၊ ဖမ်းဆီးသွားတာတွေ ရှိတယ်။ အခုဆိုရွာတွေမှာ လူတယောက်မှ မနေကြတော့ဘူး။ အကုန်လုံးတိမ်းရှောင်နေရတယ်” လို့ သူကထပ်မံ ဆိုပါတယ်။

ထွက်ပြေးတိမ်းရှောင်နေရတဲ့ ကျေးရွာတွေကတော့ ပေါက်တော၊ ဆယ်လံ၊ ညောင်လှ၊ မြို့စိုး၊ အိုင်ကြီး၊ ကံကြီးစု၊ ချမ်းသာကြီးစတဲ့ ကျေးရွာတွေက ဒေသခံတွေ ဖြစ်ကြပါတယ်။

ဇွန်လ ၇ ရက်နေ့ မနက်ပိုင်းကလည်း ပျူနဲ့စစ်ကောင်စီ ပူးပေါင်းအဖွဲ့က ပေါက်တောကျေးရွာကို ဝင်ရောက်စစ်ဆေးမှုတွေ ပြုလုပ်တဲ့အချိန်မှာ အသက် ၂၀ကျော်အရွယ် လူငယ်အမျိုးသား ၂ ဦးကို ဖမ်းဆီးသွားခဲ့ပြီးနောက် ဇွန် ၁၃ ရက် ဒီနေ့အထိ သတင်းအစအနမရဘဲ ပျောက်ဆုံးနေတယ်လို့ နောက်ထပ်ဒေသခံ အမျိုးသားတဦးက ပြောပါတယ်။

အဲဒီ ပျူစောထီးအဖွဲ့ဟာ (BPI)ဆေးဝါးထုတ်လုပ်ရေးနှင့် မြင်းမွေးမြူရေးတပ်က စစ်ကောင်စီတပ်သားတွေနဲ့ ပူးပေါင်းကာ ဇွန်လ ၁၃ ရက် နေ့လယ် ၃ နာရီကျော်မှာလည်း မြို့စိုးကျေးရွာကို ဝင်ရောက်မီးရှို့ခဲ့တာကြောင့် လူနေအိမ် ၇ လုံး မီးလောင်ပျက်စီးသွားတယ်လို့ ဒေသခံတွေက ပြောပါတယ်။

စာတည်း – 007

ပဲခူး၊ ဖေဖော်ဝါရီ ၁၀၊ ၂၀၂၃။

ပဲခူးတိုင်း၊ ပဲခူးမြို့တွင်းမှာ ပြီးခဲ့တဲ့ရက်ပိုင်းမှာ ဗုံး ၆ လုံး ဆက်တိုက်ပေါက်ကွဲခဲ့ပြီး စစ်ကောင်စီက လူငယ် ၇ ဦးကို ဖမ်းဆီးလိုက်တယ်လို့ သိရပါတယ်။

ဗုံးဖောက်ခွဲသူတွေလို့ စွတ်စွဲပြီး စစ်ကောင်စီတပ်သားတွေက အမျိုးသား ၅ ဦးနဲ့ အမျိုးသမီး ၂ ဦး စုစုပေါင်း ၇ ဦးကို ဖမ်းဆီးထားတာပါ။

ဖေဖော်ဝါရီလ ၈ ရက်မှာ ပဲခူးမြို့နယ်၊ ကလိကျေးရွာမှာ ရှိနေတဲ့ လူငယ် ၄ ဦးကို စစ်ကောင်စီဘက်က ဖမ်းဆီးခဲ့ပြီးနောက် နောက်ထပ် ၅ ဦးကို ဆက်တိုက်ဖမ်းဆီးခဲ့တာလို့ ပဲခူး ပကဖ တာဝန်ရှိသူတဦးက ပြောပါတယ်။

“လူငယ်တွေ ဖမ်းဆီးခံရတာက ဟုတ်ပါတယ်။ ဖမ်းဆီးခံရသူတွေထဲမှာ မဆိုင်တဲ့သူတွေလည်း ပါတယ်။ စကစ ဘက်ကတော့ နေအိမ်မှာ ပစ္စည်းတွေ၊ လူတွေတွေ့ရင် ဆိုင်ဆိုင် မဆိုင်ဆိုင် ဖမ်းသွားတာဘဲ။ ဖမ်းခံရတဲ့ သူတွေထဲက အချို့ကတော့ အဲနေ့မစ်ရှင်မှာ ပါဝင်ခဲ့သူတွေလို့တော့ သိရပေမယ့် သေချာအောင် စုံစမ်းနေတယ်” လို့ ပြောပါတယ်။

ဖမ်းဆီးခံရသူတွေဟာ ကလိကျေးရွာနေ ဖိုးခွား( ခ) ဉာဏ်လင်းမောင်မောင်၊ မောင်သက်၊ ထားထားဝင်း၊ မျိုးမြတ်မင်းစော၊ ပဲခူးမြို့၊ ပုဏ္ဏားစုရပ်ကွက်၊ ၁၄ လမ်းနေ သူရိန်အောင်(ခ)အောင်သူ၊ ဥဿမြို့သစ် ရက်ကွက်ကြီး( ၁)၊ သီးသန့် ၁ လမ်းနေ ကိုမျိုးတင်နဲ့ ဇနီးဖြစ်သူ မယဥ်ယဥ်ဌေး တို့ဖြစ်တယ်လို့ သိရပါတယ်။

ဖမ်းဆီးခံရချိန်မှာ လူငယ်တွေဆီကနေ သေနတ် ၄ လက်၊ ၄၀ မမ ဗုံးသီး ၂၇ လုံး၊ တရုတ်ထုတ် လက်ပစ်ဗုံး ၅ လုံး၊ လုပ်လုပ်မိုင်းအချို့နဲ့ ကျည်ဆံတွေပါ ဖမ်းဆီးရမိခဲ့တယ်လို့ စစ်ကောင်စီဘက်က ထုတ်ပြန်ထားပါတယ်။

ဖမ်းဆီးခံထားရသူတွေဟာ ဖမ်းဆီးခံရချိန်မှာ ရိုက်နှက်တာတွေ ခံထားရပြီး စစ်ကောင်စီက စစ်ကြောရေးကို ပို့ထားတယ်လို့ ဆိုပါတယ်။

ဖေဖော်ဝါရီလ ၇ ရက်ညနဲ့ ၈ ရက်မနက်ပိုင်းတွေမှာ မဇင်းရပ်ကွက်၊ ပုဏ္ဏားစုရပ်ကွက်၊ ရှင်စောပုရပ်ကွက်တွေမှာ ဗုံးပေါက်ကွဲမှု ၆ ကြိမ် ဖြစ်ပွားခဲ့တာနဲ့ ဆက်စပ်ပြီး အထက်ပါ ၇ ဦးကို ဖမ်းဆီးခဲ့တာ ဖြစ်ပါတယ်။

အဲဒီဗုံးပေါက်ကွဲမှုတွေကြောင့် ထရန်စဖော်မာအချို့အပါအဝင် အုတ်စည်းရိုးနံရံ အချို့ ပျက်စီးမှု ရှိခဲ့ပါတယ်။

စစ်ကိုင်း၊ ဇန်နဝါရီ ၂၅၊ ၂၀၂၃။

စစ်ကိုင်းတိုင်း၊ ဝက်လက်မြို့နယ်၊ ပင်းဇင်းကျေးရွာကို စစ်ကောင်စီတပ်သားတွေက ဇန်နဝါရီ၂၄ ရက် မနေ့က မနက်ပိုင်းအချိန်ကနေ ညအချိန်အထိ မီးရှို့တဲ့အပြင် လူငယ်၃ဦးကိုပါ သတ်သွားခဲ့တယ်လို့ သိရပါတယ်။

စစ်ကောင်စီတပ်သားတွေ မီးရှို့ခဲ့တာကြောင့် အိမ်ခြေ၇၀၀ခန့်ရှိတဲ့ ပင်းဇင်းကျေးရွာမှာ နေအိမ်၆၀၀ခန့်ပြာကျ ပျက်စီးသွားခဲ့သလို အသတ်ခံလိုက်ရတဲ့ လူငယ်၃ဦးရဲ့ကိုယ်ရေးအကျဥ်းကို မသိရှိရသေးဘူးလို့ မြေပြင်ကင်းထောက်တဦးက ပြောပါတယ်။

“စကစတွေက ကောက်ရိုးနဲ့ ဓာတ်ဆီနဲ့လောင်းပြီးတော့ ရှို့တာ။ မနက်ကတည်းကနေ ညလုံး ပေါက်ရှို့တာ။ စကစတွေက ရွာထဲမှာညအိပ်ပြီးတော့ မနက်အချိန်မှထွက်သွားတယ်။လူငယ် သုံးယောက်ကိုလည်း မီးရှို့ထားတဲ့အလောင်းပဲ တွေ့ရတယ်။ဒီလူငယ်တွေက ဘယ်လိုအသတ်ခံလိုက်ရတယ်ဆိုတာတော့ မသိရဘူး”လို့ ဆိုပါတယ်။

ဒါ့အပြင် စစ်ကောင်စီတပ်သားတွေက ပင်းဇင်း ကျေးရွာကနေ မနက်ပိုင်းအချိန်ထွက်သွားပြီး မူးကြီးကျေးရွာကို မီးထပ်ရှို့နေတယ်လို့ဆိုပါတယ်။

“မူးကြီးရွာကို မီးရှို့တဲ့အချိန်မှာဘဲ PDFတွေနဲ့ တိုက်ပွဲဖြစ်နေကြတယ်။ အခုအချိန်မှာတော့ တိုက်ပွဲကငြိမ်သွားပြီ။ အခုလည်း စစ်ကြောင်းက မထွက်သေးဘူး”လို့ ကင်းထောက်ကပဲ ဆက်ပြောပါတယ်။

အလားတူ အဲ့ဒီ စစ်ကြောင်းမှာ ဇန်နဝါရီ၂၃ ရက်ကလည်း မကျီးတုံကျေးရွာကို မီးရှို့ဖျက်စီးခဲ့ပြီး ဒီစစ်ကြောင်းဟာ အင်အား၁၀၀ခန့်ရှိပြီး ရွှေဘိုမြို့နယ်ဘက်က ရောက်ရှိလာခဲ့တာဖြစ် တယ်လို့သိရပါတယ်။

စစ်ကောင်စီက အခုလို တရွာဝင်တရွာထွက်မီးရှို့နေတာကြောင့် မူးကြီး၊ ဝက်လက်၊ မကျီးတုံ၊ပင်းဇင်း၊ လှတော၊ ရွှေကျင်၊ ကျီးကံ၊ ရေထွက် ၊ဥယျာဥ်မစတဲ့ကျေးရွာတွေက ဒေသခံတွေအကုန်လုံး ထွက်ပြေးတိမ်းရှောင်နေကြရတယ်လို့သိရပါတယ်။

မန္တလေး၊ ဇန်နဝါရီ ၂၃၊ ၂၀၂၃။

မန္တလေးတိုင်း၊ မတ္တရာမြို့နယ်၊ လွန်တောင်းကျေးရွာက ပျူခေါင်းဆောင်တဦး ဇန်နဝါရီ ၂၁ ရက် မနက်ပိုင်းမှာ အသတ်ခံလိုက်ရပြီးနောက် စစ်ကောင်စီက ဒေသခံ ၃ ဦးကို ဖမ်းဆီး သတ်ဖြတ်လိုက်တယ်လို့ သိရပါတယ်။

အသတ်ခံရသူ ပျူခေါင်းဆောင်ဆိုသူက ဦးမြင့်ဝင်း ၅၀ နှစ်ဖြစ်ပြီး၊ သူက တောင်ယာထဲမှာ ရှိနေချိန် မြို့ပြပြောက်ကျားအဖွဲ့က ပစ်ခတ်ရှင်းလင်းခဲ့တာဖြစ်တယ်လို့ အဖွဲ့ဝင်ရဲဘော်တဦးက ပြောပါတယ်။

“သေနတ် ၂ ချက် ပစ်ခတ်ရှင်းလင်းခဲ့တာပါ။ သူအသတ်ခံရတဲ့နေ့မှာပဲ စကစတွေက ရွာထဲကို ရောက်လာပြီးတော့ အိမ်ထောင်စုစာရင်းကောက်တယ်။ ပြီးတော့ ကောင်လေး ၂ ယောက်ကို ဖမ်းသွားတယ်။ နောက်ပြီးတော့ တခြားရွာက ကောင်လေးတယောက်ကိုလည်း ဖမ်းသွားတယ်” လို့ ဆိုပါတယ်။

ဖမ်းဆီးခံလိုက်ရတဲ့ လူငယ် ၃ ဦးဟာ အသက် ၂၀ အရွယ် ရှိကြပြီး လွန်တောင်းကျေးရွာက ၂ ဦး၊ ကျူံးကျေးရွာက ၁ ဦးတို့ဖြစ်ကာ ဇန်နဝါရီ ၂၂ ရက် မနက်ပိုင်းမှာ စစ်ကောင်စီက သူတို့ရဲ့ရုပ်အလောင်းကို လာယူဖို့ ကျေးရွာအုပ်ချုပ်ရေးမှူးကို အကြောင်းကြားလာခဲ့တယ်လို့ ဒေသခံတဦးက ပြောပါတယ်။

“ဒီကလေး ၃ ယောက်က PDF အဖွဲ့ဝင်တွေဗျ။ ဘယ်အဖွဲ့ရဲ့ အဖွဲ့ဝင်ဆိုတာကိုတော့ မသိရဘူး။ စကစက ဒီကောင်လေးတွေကို သတ်ပြီးတော့ ရွာကအုပ်ချုပ်ရေးမှူးကို အလောင်းလာယူဖို့ ဖုန်းဆက်ပြောလာတယ်ဗျ။ မတ္တရာမြို့ထဲကို ဖမ်းခေါ်သွားပြီးတော့ သတ်လိုက်တာ” လို့ ဆိုပါ တယ်။

အခုလို ဖမ်းဆီးအသတ်ခံလိုက်ရသူ ၃ ဦးထဲမှ ကျူံးရွာသားရဲ့အမည်မှာ ဒင်ကြီး ၂၁ နှစ်ဖြစ်ပြီး သူတို့တွေဟာ PDF အဖွဲ့ဝင်တွေ ဟုတ်၊မဟုတ်ကိုတော့ မြေလတ်အသံအနေနဲ့ သီးခြားအတည်မပြုနိုင်သေးပါ။

ဒါ့အပြင် သူတို့ ၃ ဦးကို သတ်ဖြတ်လိုက်တဲ့ စစ်ကောင်စီတပ်သားတွေကတော့ (၉၅) တပ်ရင်းနဲ့ မန္တလေးနန်းတွင်းတပ်ရင်းတွေက ဖြစ်နိုင်တယ်လို့ ဒေသခံတွေက ခန့်မှန်းပြောဆိုကြပါတယ်။

မကွေး၊ ဒီဇင်ဘာ ၂၇၊ ၂၀၂၂။

မကွေးတိုင်းဒေသကြီး၊ ဧရာဝတီတံတား(ပခုက္ကူ)မှာ ဖမ်းဆီးထားတဲ့ လူငယ် ၄ ဦးကို ပုလဲနယ်မှာ ဒရုန်းသင်တန်းပေးဖို့ သွားသူတွေလို့ စွပ်စွဲပြီး စစ်ကောင်စီကဖမ်းဆီးထားတယ်လို့ သိရပါတယ်။

ဖမ်းဆီးခံရတဲ့ လူငယ် ၄ ဦးဟာ ရန်ကုန်ကနေ ခရီးသည်တင်ကားနဲ့လိုက်ပါလာချိန် စစ်ကောင်စီတပ်တွေက ဖမ်းဆီးထားလိုက်တာဖြစ်တယ်လို့ ပခုက္ကူ ပအဖ တာဝန်ရှိသူတွေကပြောပါတယ်။

“အဲနေ့က ခရီးသည်တင်ကား ၂ စီးနဲ့ လိုက်ပါလာတဲ့ လူငယ် ၄ ဦးကို PDF တွေဆိုပြီး စကစ ဘက်က တံတားမှာ ဖမ်းလိုက်တာတော့ သိရတယ်။ ကား ၁ စီးမှာ ၂ ယောက်စီလိုက်ပါလာကြတာ။ မြောင်ဘက်ကိုသွားမယ်လို့တော့ သိရတယ်။ ကျနော်တို့ဘက်ကသူတွေမဟုတ်တော့လည်း နောက်ပိုင်းသတင်းအခြေနေကို ထပ်မသိရတော့ဘူး။ အဲနေ့က ဖမ်းဆီးခံလိုက်ရတဲ့ အခြေနေကိုပဲ သိလိုက်ရတယ်။”လို့ ပြောပါတယ်။

အဲ့ဒီလူငယ် ၄ ဦးဟာ အောင်ကျော်ကျော်မြတ် ၂၃ နှစ်စမ်းချောင်းမြိုနယ်၊ ကောင်းမြတ်ထက် ၂၀ နှစ် မြောက်ဥက္ကာလာပမြိုနယ်၊ ဖြိုးမင်းသူ ၂၀နှစ် ကျောက်တံတားမြို့နယ်၊ စိုင်းစည်သူအောင် ၂၄ နှစ်၊ လှိုင်မြို့နယ်တို့က လူငယ် ၄ဦးဖြစ်တယ်လို့ ဆိုပါတယ်။

ဒီဇင်ဘာလ ၁၆ ရက်မှာ ရန်ကုန်ကနေ ရဲသူအောင်၊ ရွှေနတ်သား ဆိုတဲ့ ခရီးသည်တင် မှန်လုံယာဥ်တွေနဲ့ လိုက်ပါလာချိန် ဖမ်းဆီးခံရတာဖြစ်ပါတယ်။

စစ်ကောင်စီဝါဒဖြန့် တယ်လီဂရမ်ချန်နယ်တွေမှာတော့ အဲဒီ လူငယ် ၄ ဦးဟာ မွန်ပြည်နယ်၊ သထုံခရိုင်၊ ကျိုက်ထိုမြို့နယ်၊ ပိန္နဲကုန်းကျေးရွာအနီး တပ်မဟာ(၁) တပ်ရင်း(၃)မှာ ဒရုန်းမောင်းနည်းသင်တန်းတက်ရောက်ခဲ့ပြီး ပုလဲဒေသတွင်း ဗိုလ်နဂါး တပ်တော်အတွက် ဒရုန်းပညာများ ပြန်လည်ပို့ချရန်ဆိုတဲ့ ခေါင်းစဉ်နဲ့ ခရီးထွက်လာချိန်မှာ ဖမ်းဆီးခံရတယ်လို့ ဆိုထားပါတယ်။

လက်ရှိမှာတော့ အဲဒီလူငယ် ၄ ဦးကို စစ်ကောင်စီတပ်က ပခုက္ကူ စစ်ကြောရေးကို ပို့ပြီး စစ်ဆေးနေတယ်လို့ သိရပါတယ်။