လမ်းပိုင်း

မြေလတ်အသံ၊ စက်တင်ဘာ ၂၈၊ ၂၀၂၅။

မိုးသည်းထန်စွာရွာပြီး တောင်နံရံပြိုကျမှုကြောင့် ပြိုကျပျက်စီးသွားတဲ့ မကွေးတိုင်း၊ ဆောမြို့နယ်၊ ဆော-ကျောက်ထု ကတ္တရာ ကားလမ်းပိုင်းကို ပြုပြင်နေဆဲဖြစ်တာကြောင့် ယာဥ်ငယ်တွေကို အချိန်အကန့်အသတ်နဲ့ သွားလာခွင့်ပြုထားရတယ်လို့ ဒေသခံတွေကပြောပါတယ်။

ပျက်စီးသွားတဲ့ လမ်းအရှည် ပေ ၂၀၀ ခန့်ကို စက်တင်ဘာ ၂၆ ရက်ကနေ ၂၈ ရက် ဒီကနေ့အထိ ပြုပြင်နေရဆဲဖြစ်တာကြောင့် ကုန်ကားကြီးတွေကိုသွားလာခွင့်မပေးဘဲ အိမ်စီးကား၊ ခရီးသည်တင် ကားငယ်တွေနဲ့ ကယ်ရီဆိုင်ကယ်တွေကိုသာ သွားခွင့်ပြုပေးနေရတာလို့ ဆိုပါတယ်။

“အချိန်တွေက အလုပ်လုပ်ချိန် ၁ နာရီခွဲလောက်ကြာရင် ၁ ကြိမ်သွားခွင့်ပြုပါတယ်။ အလုပ်နားချိန် ခွင့်ပြုတာမဟုတ်ပါ။ ခရီးသွားတွေသွားနိုင်ဖို့ လုပ်ငန်းရပ်ပေးရတာပါ။ အချိန်ကို နာရီနဲ့ပြောလို့မရဘူး။ စက်ယန္တရားတွေနဲ့ အလုပ်စလုပ်ပြီး ၁ နာရီလောက်ကြာရင် တကြိမ်သွားခွင့်ပြုတယ်” လို့ လမ်းပြုပြင်ရာမှာ ဦးဆောင်လုပ်ကိုင်ပေးနေတဲ့ ဆရာတော်တပါးက မိန့်ပါတယ်။

စက်တင်ဘာ ၂၇ ရက်မနေ့ကမနက်ပိုင်းမှာ လမ်းပြုပြင်နေဆဲကြားကနေ ကားတွေ၊ ဆိုင်ကယ်တွေကို ၃ ကြိမ်ခွင့်ပြုပေးခဲ့ရပြီး စက်တင်ဘာ ၂၈ ရက်ဒီကနေ့မှာတော့ မနက်ပိုင်း ၁ ကြိမ်သာ သွားခွင့်ပြုခဲ့ရပြီး လမ်းအနေနဲ့ ယာဥ်ကြောတဖက်စီပဲသွားခွင့်ပြုရတာကြောင့် ၁ ကြိမ်ကို မိနစ် ၂၀ ခန့်ကြာမြင့်တယ်လို့ သိရပါတယ်။

လက်ရှိပြုပြင်နေရတဲ့ ကားလမ်းပိုင်းဟာ ပြိုကျသွားတဲ့ကတ္တရာလမ်းအစား တောင်ခြေရင်းကနေ ဘက်ဟိုးတွေနဲ့ မြေသားလမ်းသစ်ဖောက်လုပ်ထားတာဖြစ်တာကြောင့် အဲဒီလမ်းကို နောက်ထပ် ရေတိုက်မစားရအောင် သစ်၊ ဝါးတွေနဲ့ဆည်ခတ်ပြီး မြေပြိုတာသက်သာအောင် ကမ်းပါးတွေကို သစ်တွေနဲ့ ဗန်းအဆင့်တွေလုပ်ရအုံးမှာဖြစ်တယ်လို့လည်း ဆိုပါတယ်။

“လမ်းပြင်တဲ့နေရာက ဖို့မြေအသစ်တွေဆိုတော့ လမ်းချော်တယ်။ ဗွက်ထတယ်။ သီးခြားလမ်းလွှဲ လုပ်ဖို့ကလည်းခက်နေတာ။ တောင် နဲ့ ရေချောင်းကြားဆိုတော့ ယာယီလမ်းလွှဲလုပ်လို့ မရဘူး။ လမ်းသစ်အခြေအနေက နောက်သုံးရက်လောက်ဆိုရင် ပြီးမှာပါ။ ကုန်ကျငွေကိုတော့ ပြည်သူတွေလှူကြပါတယ်”လို့ အထက်ပါ ဆရာတော်ကမိန့်ပါတယ်။

အဆိုပါ လမ်းသစ်ပြုပြင်နေမှုဟာ လာမယ့် အောက်တိုဘာ ၁ ရက်မှာ ပြီးစီးနိုင်ပြီး ပြုပြင်မှု ကုန်ကျစရိတ်ကတော့ သိန်း ၂၀၀ ခန့်မှန်းထားကာ လက်ရှိမှာပြည်သူတွေနဲ့ အဖွဲ့အစည်းတွေဆီကနေ အလှူငွေ သိန်း ၁၃၀ ခန့် ရရှိထားပြီဖြစ်တယ်လို့လည်း ဆရာတော်က မိန့်ကြားပါတယ်။

ခုပျက်စီးသွားတဲ့လမ်းပိုင်းဟာ မကွေးတိုင်းကနေ ရခိုင်ပြည်နယ်နဲ့ ချင်းပြည်နယ်ဖက်တို့ကို ကုန်စည်စီးဆင်းရာမှာအရေးပါတဲ့ လမ်းတခုဖြစ်ပြီး ပြီးခဲ့တဲ့ စက်တင်ဘာ ၂၅ ရက်နေ့လယ် ၃ နာရီကျော်မှာ မိုးရွာပြီးတောင်နံရံမြေပြိုကျရာကနေတဆင့် ပျက်စီးခဲ့တာလည်းဖြစ်ပါတယ်။

ဓာတ်ပုံ – ပေးပို့။

စာတည်း – လင်း

ပဲခူး၊ ဇွန် ၁၈၊ ၂၀၂၃။

ရန်ကုန် – ပြည်ကားလမ်းမ၊ ပဲခူးတိုင်း (အနောက်ခြမ်း) မြို့နယ်များအတွင်းရှိ စစ်ကောင်စီတပ် စစ်ဆေးရေးဂိတ်တွေကို ဇွန်လ ၁၇ ရက် မနေ့မနက်ပိုင်းကစပြီး ပြန်လည်ရုပ်သိမ်းသွားတယ်လို့ ဒေသခံတွေက ပြောပါတယ်။

ရန်ကုန်တိုင်းနဲ့ ပဲခူးတိုင်းအစပ် သုံးဆယ်မြို့ရှိ မီးနင်းချောင်းစစ်ဆေးရေးဂိတ် အပါအဝင် ပြည်မြို့အထိ ရန်ကုန် – ပြည်လမ်းတလျှောက် စစ်ဆေးရေးဂိတ်အားလုံးကိုဖျက်သိမ်းလိုက်တာလို့ သိရပါတယ်။

“သာယာဝတီ မီးနင်းချောင်းဂိတ်ဆိုရင် မနေ့ကတည်းက စစ်ဆေးတာမရှိဘူး။ ‘အစစ်ဆေးခံပါ’ဆိုတဲ့ ဆိုင်းဘုတ်တွေလည်းမရှိတော့ဘူး။ လမ်းတွေမှာတားထားတဲ့ ဘယ်ရီဂိတ်တွေပါဖယ်ထားတာ”လို့ သာယာဝတီမြို့ခံတဦးက မြေလတ်အသံကို ပြောပါတယ်။

စစ်ဆေးရေးဂိတ်တွေကို တိုက်ခိုက်ခံနေရတာတွေရှိတဲ့အတွက် ဂိတ်တွေမထားတော့ပဲ မြို့တွင်းကင်းပုန် ချလုံခြုံရေးယူတာမျိုးအပြင် စစ်စခန်းတွေမှာ အင်အားအလုံးအရင်းနဲ့ ခံစစ်ပုံစံမျိုးပြင်ဆင်လုပ်ဆောင်ဖို့ အခုလိုဂိတ်တွေရုတ်သိမ်းတာလို့ သာယာဝတီမြို့နယ်ပအဖအဖွဲ့ဝင် တဦးက သုံးသပ်ပြောပါတယ်။

အဲဒီစစ်ဆေးရေးဂိတ်တွေဟာ စစ်ဆေးရေးလုပ်ဆောင်တယ်ဆိုပြီး လမ်းပိုင်းပေါ်ဖြတ်သန်းသွားလာနေတဲ့ ကား၊ဆိုင်ကယ်တွေဆီကနေ ငွေတောင်းယူတာတွေကို အဓိကထား လုပ်ဆောင်ကြတာလို့လည်း ဒေသခံတွေကတဆင့် သိရပါတယ်။

သဲကုန်းမြို့နယ်၊ ဝက်ပုတ်ရွာကဒေသခံတဦးကတော့ ဝက်ပုတ်တာဆုံမှာ စစ်ကောင်စီစစ်ဆေးရေးဂိတ်တွေ မရှိတော့တဲ့အတွက် စိတ်အနှောက်အယှက်မရှိသလို သွားလာရလုံခြုံပြီး လွတ်လပ်သွားတယ်လို့ ဆိုပါတယ်။

ပဲခူးတိုင်း(အနောက်ခြမ်း)၊ ရန်ကုန် – ပြည်လမ်းပေါ်မှာ သာယာဝတီ၊ လက်ပံတန်း၊ မင်းလှ၊ အုတ်ဖို၊ ကြို့ပင်ကောက်၊ ဇီးကုန်း၊ နတ်တလင်း၊ ပေါင်းတည်၊ ဝက်ပုတ်-အင်းမ (သဲကုန်းမြို့နယ်) ရွှေတောင်နဲ့ ပြည်မြို့တို့ရှိပြီး မြိုအဝင်၊အထွက်တွေတိုင်းမှာ ဂိတ်ထားရှိတဲ့အတွက် စစ်ကောင်စီစစ်ဆေးရေးဂိတ် ၁၅ ဂိတ်ထက်မနည်း ရှိတယ်လို့ဆိုပါတယ်။

ဘာကြောင့် စစ်ဆေးရေးဂိတ်တွေပိတ်သိမ်းတယ်ဆိုတာ အသေးစိတ်မသိရပေမယ့် လမ်းခရီးများရှိ စစ်ဆေးရေးဂိတ်တွေမှာ မလိုလားအပ်ဘဲ ကုန်ကျစရိတ်များမရှိစေရေး ပြည်နယ်နဲ့တိုင်းများအလိုက် တာဝန်ရှိသူများက အလေးထား ကြပ်မတ်ဆောင်ရွက်ဖို့ အာဏာသိမ်းစစ်ခေါင်းဆောင်က ပြောကြားပြီးတဲ့နောက် မြို့ကြီးတွေရဲ့လမ်းပိုင်းတချို့မှာ စစ်ဆေးရေးဂိတ်တွေကို ဖြုတ်သိမ်းလာတာလည်း ဖြစ်ပါတယ်။

စာတည်း-ရင်ငြိမ်း

မန္တလေး၊ မေ ၃၁၊ ၂၀၂၃။

မန္တလေးတိုင်းဒေသကြီး၊ ကျောက်ပန်းတောင်းမြို့နယ်၊ မြိုင်သာယာကျေးရွာအနီး ကျောက်ပန်းတောင်း-မိတ္တီလာကားလမ်းမှာ ခရီးသည်တင်ယာဥ်နဲ့ ဘုန်းကြီးကားတိုက်မိပြီး ဘုန်းကြီး ၁ ပါး ပျံလွန်တော်မူပြီး ၁ ပါးဒဏ်ရာရသွားတယ်လို့ သိရပါတယ်။

မေလ ၃၀ ရ​က် ညနေ ၃ နာရီခန့်မှာ ရန်ကုန်ဘက်ကနေ ကျောက်ပန်းတောင်းဘက်ကို ဘုန်းကြီး ၁ ပါး မောင်းနှင်ပြီး ၁ ပါးလိုက်ပါလာတဲ့ VOXY ကားနဲ့ မျက်နှာချင်းဆိုင်ကလာတဲ့ ရွှေညာမြေခရီးသည်တင်ယာဥ်တို့ ခေါင်းချင်းဆိုင်တိုက်မိခဲ့တာလို့ ဒေသခံတဦးကပြောပါတယ်။

“သိရသလောက်က ဘုန်းကြီးမောင်းလာတဲ့ကားက အဝေးကနေကတည်းက ဟိုဘက်လိုလို ဒီဘက်လိုလိုနဲ့မောင်းလာတာတဲ့။ ဖြစ်တဲ့နေရာကလဲ ကုန်းအတက်အဆင်း နေရာနားမှာဆိုတော့ ကား ၂ စီးလုံးက သူရှောင်ကိုယ်ရှောင်နဲ့ လမ်းပြောင်းပြန်တွေဖြစ်ပြီး တိုက်မိတာ”လို့ပြောပါတယ်။

ယာဥ်တိုက်မှုကြောင့် ခရီးသည်တင်ယာဥ်ပေါ်က ခရီးသည်တွေ ထိခိုက်တာမရှိဘဲ VOXYယာဥ်မောင်းနှင်လာတဲ့ ပုပ္ပါးတောင်အနီး ဒေါင်းလယ်ရွာကျောင်းတိုက်နေ ဥုးတေဇောပါလ နေရာမှာ ပျံလွန်တော်မူသွားပြီး ကျောက်ပန်းတောင်း၊အောင်မြေရတနာ စာသင်တိုက်နေသူ ဥုးခေမာစာရ ဒဏ်ရာပြင်းထန်ရသွားတယ်လို့ ဆိုပါတယ်။

ယာဥ်တိုက်မှုကြောင့် မော်တော်ယာဥ် ၂ စီးလုံးထိခိုက်ပျက်စီးသွားပြီး ပျံလွန်တဲ့သံဃာတော်ကို ဒေသလူမှုညီရေးအသင်းတွေက ကျောက်ပန်းတောင်းဆေးရုံကို ပို့ဆောင်ထားကာ ဒဏ်ရာရသံဃာတော်မှာ ညောင်ဦးဆေးရုံကို လွှဲပြောင်းဆေးကုသမှုပေးနေရတယ်လို့ သိရပါတယ်။

၂၀၂၂ ခုနှစ် ဒီဇင်ဘာလ ၁၄ ရက်နေ့ညပိုင်းမှာလည်း ကျောက်ပန်းတောင်းမြို့နယ် ၊ ဇီးဖြူကုန်းကျေးရွာအနီး ၊ ကျောက်ပန်းတောင်း – မိတ္ထီလာကားလမ်းပေါ်မှာ ခရီးသည်တင်ယာဥ် ၂ စီးတိုက်မိပြီး ၁၃ ဦးသေဆုံးကာ ၅ ဦးဒဏ်ရာရခဲ့သေးတယ်လို့ သိရပါတယ်။

စာတည်း – ရင်ငြိမ်း