ရောက်ရှိ

မြင်းမူ၊ မတ် ၁၃၊ ၂၀၂၃။

စစ်ကိုင်းတိုင်း၊ မြင်းမူမြို့နယ်၊ လက္ကပင်ကျေးရွာထဲမှာ စစ်ကောင်စီတပ်သားတွေရဲ့ဖမ်းဆီးတာကို ခံလိုက်ရတဲ့ ပြည်ကြီးတံခွန်ဆရာတော်ဦးအဂ္ဂ မှာ တပ်မ(၃၃)ထဲ စစ်ကြောရေးခံနေရပြီး ရွာခံသား ၄ ဦးမှာ သတင်းအစအနမရဘဲ ပျောက်ဆုံးနေဆဲ ဖြစ်တယ်လို့ သိရပါတယ်။

ပျောက်ဆုံးနေတဲ့ လက္ကပင်ရွာခံသား ၄ ဦးမှာ ကိုစိုးတေ (၁၇နှစ်)၊ မင်းမင်းထက် (၃၀နှစ်)၊ ကိုရဲလင်း (၃၀နှစ်)၊ ဖိုးထောင် (၅၃နှစ်) တို့ဖြစ်ပြီး သူတို့ဟာ သတင်းမရဘဲ ပျောက်ဆုံးနေတာ ဒီကနေ့နဲ့ဆို ၉ ရက်ရှိပြီ ဖြစ်တယ်လို့ မြင်းမူအခြေစိုက် Knight Commanders PDF မှ တာဝန်ခံ ဘယ်သန်ကြီးက ပြောပါတယ်။

“ဆရာတော်ကို လူဝတ်လဲပြီးတော့ ဖမ်းသွားတာ။ ဒီနေ့အချိန်ထိတော့ အသက်ရှင်ပြီး စစ်ကြောရေးခံနေရတယ်လို့ သတင်းအတိအကျ ရထားတယ်။ ဒေသခံ ၄ ယောက်ကိုတော့ ဘာမှသတင်းမရဘူး။ သေပြီလား ဆိုတာလည်း မသိရသေးဘူး” လို့ ဆိုပါတယ်။

ပြီးခဲ့တဲ့ မတ်လ ၅ ရက်နေ့က အင်အား ၁၀၀ ကျော်ပါတဲ့ စစ်ကောင်စီစစ်ကြောင်း တခုဟာ လက္ကပင်ကျေးရွာကို ဝင်ရောက်လာပြီး ဆရာတော် ဦးအဂ္ဂ၊ PDF ရဲဘော် ၅ ဦး၊ ရွာခံအမျိုးသား ၄ ဦးတို့ကို ဖမ်းဆီးပြီးနောက် အဲဒီထဲက PDF ရဲဘော် ၅ ဦးကို သတ်ဖြတ်ပြီး အလောင်းတွေကို မြစ်ထဲမျောခဲ့ကြတယ်လို့ သိရပါတယ်။

ပြည်ကြီးတံခွန်ဆရာတော် ဦးအဂ္ဂမှာ အာဏာသိမ်းပြီးချိန်မှစတင်ပြီး အာဏာရှင်ကို ရရာနေရာက ဦးဆောင်တော်လှန်နေပြီး၊ စစ်ကောင်စီနဲ့ ပျူစောထီးတပ်ဖွဲ့တို့ရဲ့ ဖျက်ဆီးခံရတဲ့ ပြည်သူတွေရဲ့ ဒုက္ခဆင်းရဲအပူကို အေးမြသောမေတ္တာ စာနာသောကရုဏာနှလုံးသား ရဲရင့်သောသတ္တိတို့နဲ့ ဦးဆောင်ဦးရွက်ပြုကာ ပြည်သူကို ကျေးဇူးပြုနေသော တော်လှန်ရဟန်းတော်တပါး ဖြစ်တယ်လို့ သံဃသမဂ္ဂ (မန္တလေး)မှ ထုတ်ပြန်ထားပါတယ်။

ပြည်သူကို ကျေးဇူးပြုကာ မတရားမှုကို အစွမ်းကုန် တော်လှန်သော ပြည်ကြီးတံခွန်ဆရာတော် ဦးအဂ္ဂရဲ့ အသက်အန္တရာယ်ဖြစ်ပေါ်ခဲ့ပါက စစ်ကောင်စီတပ်အနေနဲ့ ရာနှုန်းပြည့် တာဝန်ရှိပြီး တာဝန်ခံရမည်ဖြစ်တယ်လို့ ထုတ်ပြန်ချက်မှာ ဖော်ပြထားပါတယ်။

စာတည်း – 007

စစ်ကိုင်း၊ ဒီဇင်ဘာ ၂၁၊ ၂၀၂၂။

စစ်ကိုင်းတိုင်း၊ ယင်းမာပင်ခရိုင်၊ ဆားလင်းကြီးမြို့နယ်မှာရှိတဲ့ တရုတ်ဝမ်ပေါင်ကုမ္ပဏီကို “ဒုစစ်ခေါင်းဆောင်စိုးဝင်း” ရောက်ရှိနေတယ်လို့သတင်းများထွက်ပေါ် နေပါတယ်။

ဒီဇင်ဘာလ ၂၁ ရက်ဒီနေ့မနက် ၄ နာရီခွဲလောက်မှာ ပုသိမ်-မုံရွာကားလမ်းမတလျှောက်မှာ စစ်ကောင်စီတပ်နဲ့ပျူတွေက အင်အား ၃၀၀ နည်းပါးနဲ့ လုံခြုံရေးယူထားတာကြောင့် လမ်းဘေးဝဲယာမှာရှိတဲ့ ဒေသခံတွေကြောက်လန့်ပြီး နီးစပ်ရာကျေးရွာတွေဘက်ကို တိမ်းရှောင်နေကြရတယ်လို့ ဆိုပါတယ်။

“စိုးဝင်းကမြစ်ကြီးနားကနေ လာတယ်ပြောတယ်။ ဒီကိုဘာကြောင့်လာလဲဆိုတာတော့မသိဘူး။ အရင်ကတခါမှမလာဖူးဘူး။ အခုမှလာတာ။ မနေ့ညနေကတည်းက နမခ မှာရောက်နေတာ။ ဒီမနက်ကားဘယ်နှစ်စီးလဲဆိုတာတော့ အတိအကျမသိရဘူး။ ဘာလို့လည်းဆိုတော့ မနက်ဝေလီဝေလင်း လမ်းတလျှောက်ကားတန်းရှည်ကြီး မီးရောင်တန်းကြီးမြင်ရပေမဲ့ အမှောင်မပြယ်သေးတော့ မသိနိုင်ဘူး” လို့ National Revolutionary Guards မှတာဝန်ခံတဦးက မြေလတ်အသံကိုပြောပါတယ်။

ခရီးသွားပြည်သူတွေအနေနဲ့လည်း ဆားလင်းကြီးမြို့နယ်၊ ယင်းမာပင်မြို့နယ်က ပုသိမ် – မုံရွာလမ်းတလျှောက် မြန်မာဝမ်ပေါင်လမ်းဆုံ (၅/၁ လမ်းဆုံ)ကနေ ရွှေတောင်ဦး၊ ပေါင်ကျိုးကုန်းအထိ မိမိတို့ NRG တပ်ဖွဲ့ကထုတ်ပြန်တဲ့အချိန်မှစပြီး နောက်ထပ်တစုံတရာမထုတ်ပြန်မချင်း အဲဒီနေရာတွေကို ဖြတ်သန်းသွားလာခြင်းမပြုဖို့ကိုလည်း ထုတ်ပြန်ထားပါတယ်။

“ကျနော်တို့အနေနဲ့အခုလိုလမ်းတွေပိတ်ရတာဟာ ပြည်သူတွေအတွက်ပါ။ တကယ်လို့ သူတို့ရှိတဲ့လမ်းကနေ ပြည်သူတွေက ဖြတ်သန်းသွားရင် ငွေကြေးတွေကောက်ခံတာတွေ၊ ရိုက်နက်တာတွေ၊ ချော်ဆွဲတာတွေကို စစ်**တွေကလုပ်ရင် ပြည်သူတွေပဲထိခိုက်မှာ။ အဲ့ဒါကြောင့် လမ်းကိုခေတ္တယာယီပိတ်ထားတာပါ။ အခြေနေတွေရှင်းသွားပြီ လမ်းတွေပြန်သွားလို့ရပြီဆိုရင် ကျနော်တို့ Page ကနေ ပြန်ထုတ်ပြန်သွားပေးမှာပါ” လို့ အထက်ပါတာဝန်ခံက ဆက်ပြောပါတယ်။

ဒီလ ဒီဇင်ဘာ ၁၆ ရက်မှာလည်း ဆားလင်းကြီးမြို့နယ်ထဲမှာရှိတဲ့ မြန်မာဝမ်ပေါင်ကုမ္ပဏီမှာအလုပ်လုပ်ကိုင်နေတဲ့ တရုတ်ပညာရှင်တွေ တရုတ်ပြည်ကိုပြန်ဖို့အတွက် သူတို့ရဲ့လုံခြုံရေးကိုစစ်ကောင်စီတပ်ဖွဲ့တွေက အင်အားအများအပြားချပေးထားပြီး လမ်းပိုင်းကိုလည်း ရွှေတောင်ဦး၊ ပေါင်ကျိုးကုန်းအထိသာမက ပုသိမ် – မုံရွာလမ်းမကြီးတလျှောက်ကို စစ်ကောင်စီတပ်ဖွဲ့ဝင်တွေက ကင်းပုန်းချပြီး လုံခြုံရေးယူပေးခဲ့တယ်လို့လည်း သိရပါတယ်။