ပေါက်၊ ဒီဇင်ဘာ ၁၅၊ ၂၀၂၅။

မကွေးတိုင်း၊ ပေါက်မြို့နယ်၊ သပြေညိုတောင်ပေါ်ကို စစ်ကော်မရှင်တပ်က ၄ ရက်ဆက်ဗုံးကြဲတိုက်ခိုက်ခဲ့တာကြောင့် အဆိုပါတောင်ပေါ်ရှိ သပြေညိုရေနံမှော်ပေါ်ကျရောက်ပေါက်ကွဲပြီး ထိခိုက်ပျက်စီးမှုရှိခဲ့တယ်လို့ ပေါက်မြို့ခံတွေဆီက သိရပါတယ်။

ဒီဇင်ဘာ ၁၂ ရက် နေ့လယ် ၁၂ နာရီမှာ ၁ ကြိမ်၊ ၁၃ ရက် နေ့လယ် ၂ နာရီခွဲမှာ ၁ ကြိမ်၊ ၁၄ ရက် ညနေ ၄ နာရီမှာ ၁ ကြိမ်နဲ့ ၁၅ ရက် နေ့လယ် ၁၂ နာရီ ၁၅ မိနစ်မှာ ၁ ကြိမ် ဂျိုင်ရိုကော်ပတာနဲ့ ဗုံးကြဲချခဲ့တာလို့ ဆိုပါတယ်။

“၁၂ ရက်နေ့ကနေ ၁၅ ရက်အထိ ကြဲတာ၊ ၁၂ ရက်က လူမနေတဲ့ တောင်တွေပေါ်ကျတယ်၊ ၁၃ ရက်ကလည်း ၃ ကြိမ်လောက်လာကြဲတယ်၊ ဆီချက်တဲ့ ချက်ဖိုနားကျတယ်၊ ၁၄ ရက်ကတော့ ၃ ကြိမ်မြောက်လာကြဲတာက ရေနံကျင်းပေါ်ကျပြီး မီးလောင်သွားတယ်၊ ဒီနေ့ နေ့လယ် ၁၂ နာရီ ၁၅ မိနစ်ကလည်း ကြဲသွားတယ်၊ ၁၂၀ မမ ဗုံးသီးတွေနဲ့ ကြဲတာ၊ ဗုံးသီး‌တွေကို ကပစ ထုတ်မဟုတ်ဘဲ ကွန်ဂျူး (PVC ပိုက်)နဲ့ လက်လုပ်ထားတာကြောင့်ထင်တယ် ပေါက်ကွဲအားပိုပြင်းတယ်” လို့ ပေါက်မြို့ခံတဦးက ပြောပါတယ်။

ဒီဗုံးကြဲမှုကြောင့် ဒေသခံတွေထိခိုက်မှုမရှိဘဲ ရေနံမှော်က ချက်ဖို ၁ ခုနဲ့ တဲ ၁ လုံးမီးလောင်ပျက်စီးပြီး ဒေသခံထိခိုက်မှုအခြေအနေကိုတော့ မကြားမိသေးဘူးလို့ ဆိုပါတယ်။

“ဒေသခံတွေက လက်လုပ်လက်စားတွေပါ၊ ထိခိုက်မှုတော့ မကြားမိသေးဘူး၊ ချက်ဖို ၁ ခုနဲ့ တဲ ၁ လုံးတော့ မီးလောင်ပျက်စီးသွားတယ်၊ အရင်တခါတွေက ကြဲတာခံရပြီးကတည်းက ဝေဟင် လေကြောင်းသံကြားရင် ကတုတ်ကျင်းထဲဝင်နေကြတော့တာ” လို့ သူက ဆက်ပြောပါတယ်။

ပေါက်မြို့နယ်၊ သပြေညိုတောင်ပေါ်က သပြေညိုရေနံမှော်ဒေသတဝိုက်မှာ ဒေသခံထောင်ကျော်နေထိုင်ကြပြီး အများစုက ရေနံလုပ်ငန်းလုပ်ကိုင်စားသောက်နေကြသူတွေဖြစ်တယ်လို့ သိရပါတယ်။

ပြီးခဲ့တဲ့ အောက်တိုဘာ ၈ ရက်မနက် ၁၀ နာရီဝန်းကျင်မှာလည်း သပြေညိုရေနံမှော်ကို စစ်ကော်မရှင်တပ်က ဗုံးကြဲတိုက်ခိုက်ခဲ့တာကြောင့် အလုပ်သမားလင်မယား ၂ ဦးသေဆုံးပြီး ကလေးဖြစ်သူ ဒဏ်ရာရခဲ့ပါသေးတယ်။

စာတည်း – လင်း

မြိုင်၊ မတ် ၂၄၊ ၂၀၂၅။

မကွေးတိုင်း၊ မြိုင်မြို့နယ်၊ လက်ပံတိုရေနံမှော်အနီးရှိ နယ်သတ်ကျေးရွာနဲ့ ဆုံကုန်းကျေးရွာအကြားအနီးတဝိုက်ကို စစ်ကောင်စီတပ်ကလေယာဥ်နဲ့ဗုံးကြဲချသွားလို့ ဒေသခံ ၂ ဦး ထိခိုက်ဒဏ်ရာရခဲ့ပြီး တောမီးလောင်ကျွမ်းနေတယ်လို့ အညာမြေအရပ်ဖက်လူမှုကူညီရေးအဖွဲ့ထံက သိရပါတယ်။

မတ် ၂၄ ရက် ဒီကနေ့လယ် ၁၂ နာရီခွဲဝန်းကျင်ခန့်မှာ တိုက်လေယာဥ် ၂ စီးနဲ့ မီးလောင်ဗုံး ၃ လုံးထက် မနည်းကြဲခဲ့တာဖြစ်ပြီး နယ်သတ်ရွာထိပ်ရှိ နေအိမ် ၁ လုံးပေါ်နဲ့ ကျေးရွာ ၂ ခုအကြားနေရာတွေမှာ ကျရောက်ပေါက်ကွဲခဲ့တယ်လို့ ဆိုပါတယ်။

“ လေယာဉ်က ပထမတခါလာပြီးဝဲသွားတာ တော်တော်ကြာအောင်ဝဲပြီးတော့ ပြန်သွားသေးတာဗျ၊ ခဏလေး(၁၅ မိနစ်ခန့်)ရှိတော့ ပြန်လာပြီး ခဏဝဲနေပြီးမှ ချတာဆိုတော့ လူတွေက ရှောင်တိမ်းချိန် ရသွားတာပါ”လို့ အညာမြေအရပ်ဖက်လူမှုကူညီရေးအဖွဲ့မှ ဆရာထွေးက မြေလတ်အသံကို ပြောပါတယ်။

လေယာဉ်ကနေ ကြဲချခဲ့တဲ့မီးလောင်ဗုံးတွေ ကျရောက်ပေါက်ကွဲတာကြောင့် အထက်ပါကျေးရွာ ၂ ခုအကြား တောမီးလောင်ခဲ့ပြီး ဒီကနေ့ ညနေ ၃ နာရီဝန်းကျင်အထိ မီးငြှိမ်းသတ်နေရဆဲဖြစ်တယ်လို့ သိရပါတယ်။

“ ဖိုက်တာ(တိုက်လေယာဥ်) ကနေချတာက ၂ ကြိမ်ချတာဗျ။ နောက်ဆုံးအကြိမ်ချလိုက်တဲ့ အသံကြီး တော်တော်ဟိန်းသွားတာ အရင်ခါတွေချတုံးက အဲ့အသံကြီးတွေ မကြားဖူးဘူး။ ခုခါချမှ ကြားဖူးတာပါ”လို့ ၎င်းက ဆိုပါတယ်။

အဆိုပါကျေးရွာတွေအနီးကို စစ်ကောင်စီတပ်က တိုက်ပွဲဖြစ်ပွားတာမရှိဘဲ လာရောက်ဗုံးကြဲတိုက်ခိုက်ခဲ့တာဖြစ်ပြီး ယမန်နေ့ မတ် ၂၃ ရက်ကလည်း မြိုင်နယ်အရှေ့မြောက်ပိုင်းက ကျေးရွာတွေဘက်ကို စက်တပ်လေထီးနဲ့ဗုံးကြဲချခဲ့သေးတယ်လို့ သိရပါတယ်။

သတင်း – ဟယ်သာ၊ စာတည်း – ဟိန်းစံ

■ ပေါက်နဲ့မြိုင်မှာ လေယာဉ်ဗုံးကြောင့် ၇ ရက်အတွင်း ဒုတိယအကြိမ်မြောက် လူဆယ်နဲ့ချီသေဆုံးမှုဖြစ်

ပခုက္ကူ၊ မတ် ၃၊ ၂၀၂၅။

မကွေးတိုင်း၊ ပခုက္ကူခရိုင်၊ ပေါက်နဲ့ မြိုင်မြို့နယ်အစပ်က လက်ပံတိုရေနံမှော်နဲ့ ရွာတွေကို စစ်ကောင်စီတပ်က လေကြောင်းကနေ ဗုံးကြဲတိုက်ခိုက်ခဲ့လို့ လူ ၁၃ ဦးထက်မနည်းသေဆုံးပြီး ဒဏ်ရာရသူတွေများပြားခဲ့တယ်လို့ ပြည်သူ့ကာကွယ်ရေးတပ်ဖွဲ့-မြိုင်မြို့နယ်ဆီက သိရပါတယ်။

မြိုင်မြို့နယ် ဆိတ်ချေး၊ ဂျုတ်ကုန်း၊ဘောင်ဘင်၊ ညောင်ကုန်း၊ ဆူးဝင်းနဲ့ တောရွာ၊ ပေါက်မြို့နယ် သရက်ကန်၊ ဆုံကုန်း၊ လက်ပံတိုရွာတွေကို မတ် ၃ ရက် မနက်အစောပိုင်း ၁ နာရီခွဲကနေ ၂ နာရီခွဲအတွင်းမှာ တိုက်လေယာဉ်၊ Y 12 လေယာဉ်တွေနဲ့ ၉ ကြိမ် ဗုံးကြဲတိုက်ခိုက်ခဲ့တာလို့ ဆိုပါတယ်။

“အဲ့ဒီရွာတွေမှာ PDF စခန်းလည်းမရှိပါဘူး၊ ပြည်သူတွေပဲနေတဲ့ရွာတွေ။” လို့ မြိုင်ပကဖတာဝန်ရှိသူတဦးက ပြောပါတယ်။

ဗုံးကြဲတိုက်ခိုက်မှုကြောင့် လက်ပံတိုရေနံမှော်က ၆ ဦး၊ ဘော်ဘင်ရွာက ၄ ဦး၊ သရက်ကန်ရွာက ၃ ဦးအပါစုစုပေါင်း ဒေသခံအရပ်သား အမျိုးသား၊ အမျိုးသမီး ၁၃ ဦးထက်မနည်း သေဆုံးထားပြီး သေဆုံးသူတွေရဲ့ အသေးစိတ်အချက်အလက်တွေကိုတော့ မသိရသေးပါဘူး။

ဒါ့အပြင် ဗုံးကြဲတိုက်ခိုက်ခံရမှုအတွင်း နောက်ထပ်ဒေသခံ ၁၅ ဦးထက်မနည်း ဒဏ်ရာရရှိထားကာ ဒဏ်ရာရ သူတွေကို ဆေးဝါးကုသပေးနေတယ်လို့ သိရပါတယ်။

ပြီးခဲ့တဲ့ ဖေဖော်ဝါရီ ၂၅ ရက်မှာလည်း ပေါက်မြို့နယ်၊ ဆုံကုန်းရွာဘုန်းကြီးကျောင်းမှာ ပြုလုပ်တဲ့ PDF တပ်ဖွဲ့ဝင်တဦးရဲ့ မင်္ဂလာဆောင် လေယာဉ်ဗုံးကြဲခံရလို့ လူဆယ်နဲ့ချီသေဆုံးခဲ့လို့ စစ်ကောင်စီရဲ့လေကြောင်းတိုက်ခိုက်မှုကြောင့် ၇ ရက်အတွင်း ဒုတိယအကြိမ်မြောက် လူဆယ်နဲ့ချီသေဆုံးခဲ့တာလည်း ဖြစ်ပါတယ်။

စာတည်း – ဟိန်းစံ

မကွေး၊ ဇွန် ၇၊ ၂၀၂၃။

မကွေးတိုင်းဒေသကြီး၊ မင်းလှမြိုနယ်နဲ့ သရက်မြို့နယ်တွေထဲက ရေနံမှော်တွေကို စစ်ကောင်စီဘက်က ထပ်မံပိတ်သိမ်းခိုင်းလို့ ပြောင်းရွှေ့နေရတယ်လို့ သိရပါတယ်။

ဇွန်လ ၃ ရက်လောက်ကစပြီး မင်းလှမြို့နယ်ထဲက ဒဟတ်ပင်၊ ထန်းကိုင်း၊ ဓာတ်ကုန်း၊ ရေနံမ၊ ကျောက်ပုံ၊ နလဲနဲ့ သရက်မြို့နယ်ထဲက ပိတောက်ပင်စတဲ့ ‌ရေနံမှော်တွေကို စတင်ဖျက်ခိုင်းနေပြီး ဇွန်လ ၇ ရက် ဒီနေ့ နောက်ဆုံး ထားပြီး ရွှေ့ရမယ်လို့ စစ်ကောင်စီတပ်ဘက်က လာပြောသွားတယ်လို့ လုပ်ငန်းရှင်တဦးကပြောပါတယ်။

“၃ ရက်နေ့ကစပြီး အင်အား ၅၀ ကျော်ပါတဲ့ စစ်ကြောင်း ၂ ကြောင်းနဲ့လာပြီး နလဲ ရေနံမှော်လမ်းဘေးက ရေနံတူးနေတဲ့ နေရာတွေကို အင်အားနဲ့လာဖျက်သွားတယ်။ အဲနောက်မှာ ခုလုပ်နေတဲ့ ရေနံမှော်တွေကို ဖျက်ရမယ်ဆိုပြီး ပါးစပ်ကနေ ပြောသွားတာ။ စာထုတ်တာမျိုးလဲ မရှိဘူး။ ကျနော်တို့က ပြည်သူဆိုတော့ ကြောက်တာပေါ့။ သူတို့ဖျက်ဆိုလို့ ဖျက်နေရတယ်။ ပြည်သူကို မွဲအောင်လုပ်နေတာလို့ မြင်တယ်”လို့ သူက ပြောပါတယ်။

ရေနံမှော်တွေထဲမှာ လုပ်ကိုင်နေတဲ့ ပြည်သူအများအပြားရှိနေပြီး ခုလို ရေနံမှော်တွေ ဖျက်သိမ်းခိုင်းနေတာဟာ ပြည်သူတွေကို အလုပ်အကိုင်အခက်ခဲဖြစ်အောင် အကျပ်အတည်းဖြစ်အောင် ဖန်းတီးနေလို့ နောက်ဆက်တွဲ ဆိုးကျိုးတွေသာ ရှိလာနိုင်တယ်လို့ ဆိုပါတယ်။

တချို့ရေနံမှော်ကြီးတွေမှာ မှီခိုလုပ်ကိုင်နေသူ ဦးရေဟာ စုစုပေါင်း ၁ သိန်းဝန်းကျင်ရှိတာကြောင့် အခုလို ရေနံမှော်တွေကို ပိတ်သိမ်းလိုက်တဲ့အတွက် လုပ်ငန်းရှင်၊ အလုပ်သမား၊ စျေးရောင်းသူတွေ၊ ကျပန်းလုပ်သူ၊ မှီခိုသူမိသားစု အရေအတွက် ၁၀ သိန်းအထက် အလုပ်လက်မဲ့ဖြစ်သွားနိုင်တယ်လို့ ဆိုပါတယ်။

မင်းလှမြို့နယ်နဲ့သရက်မြို့နယ်က ရေနံစိမ်းထွက်ရှိမှုဟာ မြန်မာတနိုင်ငံလုံး ရေနံစိမ်းထုတ်လုပ်မှုရဲ့ ၅၀ ရာခိုင်နှုန်းဝန်းကျင်ထိရှိတယ်လို့ အဲဒီဒေသက ရေနံမှော်မှာ တနိုင်တပိုင်ရေနံတူးတဲ့ လုပ်ငန်းရှင်တဦးက ဆိုပါတယ်။

အဆိုပါရေနံမှော်တွေမှာ ကုမ္ပဏီကြီးတွေအပါအဝင် တနိုင်တပိုင်ရေနံတူးသူ လုပ်ငန်းရှင်ဦးရေ ထောင်ကျော်ရှိ တယ်လို့ ဆိုပါတယ်။

စစ်ကောင်စီဘက်က ရေနံမှော်တွေထဲ လုပ်ကိုင်သူတွေကို ထွက်သွားဖို့ ပြောဆိုခဲ့တာကြောင့် လုပ်ငန်းရှင် ၅၀၀ ခန့်က လုပ်ငန်းတွေကို ဖျက်သိမ်းနေကြပြီး ကျန်သူတွေကတော့ အခြေနေကို စောင့်ကြည့်နေကြတယ်လို့ ဆိုပါတယ်။

အဆိုပါ ဒေသတွေက ရေနံမှော်တွေကို ယခင်က လုပ်ငန်းရှင်ကြီးတွေသာ ကြီးစိုးလုပ်ကိုင်ခဲ့ရာမှ NLD အစိုးရလက်ထက်မှာ ဒေသခံပြည်သူတွေ စီးပွားရေးအဆင်ပြေစေဖို့ တနိုင်တပိုင်လုပ်ကိုင်သူတွေကို ခွင်ပြုပေးခဲ့လို့ ရေနံတူးသူတွေ ပိုများလာခဲ့တယ်လို့ သိရပါတယ်။

စာတည်း – လင်းဇေ