ရေနံချောင်း

ရေနံချောင်း၊ မတ် ၆၊ ၂၀၂၃။

မကွေးတိုင်း၊ ရေနံချောင်းမြို့မ ရဲစခန်းကို မတ်လ ၅ ရက် မနေ့ ညပိုင်းက အဝေးထိန်းစနစ်နဲ့ မိုင်းခွဲတိုက်ခိုက်ခဲ့တယ်လို့ မကွေးခရိုင် အမှတ် ၂ တပ်ရင်း တပ်ခွဲ ၁ People’s Defence Force Yenangyaung အဖွဲ့ဆီက သိရပါတယ်။

မတ်လ ၅ ရက်က အဝေးထိန်းစနစ်နဲ့ မိုင်း ၂ လုံးခွဲ တိုက်ခိုက်ခဲ့လို့ ဘန်ကာအဆောက်အဦးတွေ ပျက်ဆီးသွားတယ်လို့ မကွေးခရိုင် ဗိုလ်စံသျှားက မြေလတ်အသံကို ပြောပါတယ်။

“ည ၈ နာရီဝန်းကျင်မှာ မိုင်းဆွဲတိုက်ခိုက်ခဲ့တာ၊ မိုင်း ၂ လုံးခွဲတိုက်ခိုက်ခဲ့တာ၊ အဲဒီရေနံချောင်းမြို့မရဲစခန်းမှာ အင်အား ၃၀ လောက်ရှိမယ်။ ကျနော်တို့ ပြန်လည်ဆုတ်ခွာတဲ့အချိန်မှာ သူတို့က နောက်လိုက်ပစ်တာတော့ ရှိတယ်။ ထိခိုက်သေဆုံးမှုကိုတော့ စုံစမ်းဆဲပါ။ ပျက်စီးဆုံးရှုံးတာကတော့ ရဲစခန်းဘန်ကာအပိုင်းကို မိုင်းခွဲခဲ့တာဆိုတော့ ပျက်စီးဆုံးရှုံးမှုတော့ရှိမယ်” လို့ ဗိုလ်စံသျှားက ပြောပါတယ်။

အဲဒီမိုင်းခွဲတိုက်ခိုက်မှုကို မကွေးခရိုင် အမှတ် ၂ တပ်ရင်း တပ်ခွဲ ၁ People’s Defence Force Yenangyaung ၊ နတ်မောက်မြို့နယ် ပြည်သူ့ကာကွယ်ရေးတပ်ဖွဲ့ နှင့် Yenangyaung Local People’s Defence Force ဖေကံကောင်းအဖွဲ့တို့က ပူးပေါင်းလုပ်ဆောင်ခဲ့တယ်လို့ သိရပါတယ်။

ပြီးခဲ့တဲ့ ဖေဖော်ဝါရီလ ၂၈ ရက်ကလည်း ပေါက်မြို့နယ်၊ သဖန်းချောင်းကျေးရွာမှ နေအိမ်တွေကို ဝင်ရောက်ဖျက်ဆီးပြီး ပြန်ထွက်လာတဲ့ စစ်ကောင်စီစစ်ကြောင်းကို မကွေးခရိုင် အမှတ် ၂ တပ်ရင်း တပ်ခွဲ ၁ People’s Defence Force Yenangyaung အဖွဲ့က ခြုံခိုတိုက်ခိုက်ခဲ့ရာ စစ်သား ၅ ဦး သေဆုံးခဲ့တယ်လို့ သိရပါတယ်။

စာတည်း – 007

ရေနံချောင်း၊ ဖေဖော်ဝါရီ ၉၊ ၂၀၂၃။

မကွေးတိုင်း၊ ရေနံချောင်းမြို့နယ်၊ မြို့ရှောင်လမ်း လမ်းဆုံရှိ ယာကြီးပြင်စစ်ဆေးရေးဂိတ်ကစစ်ကောင်စီတပ်သားတွေဟာ လမ်းသွားပြည်သူတွေရဲ့ကားတွေကို ဆပ်ကြေးကောက်နေလို့ ဖေဖော်ဝါရီလ ၈ ရက်မနေ့ညပိုင်းမှာ ဒေသခံကာကွယ်ရေးတပ်တွေက ပစ်ခတ်တိုက်ခိုက်ခဲ့တယ်လို့ သိရပါတယ်။

အဲ့ဒီဂိတ်မှာ စစ်သားနဲ့ရဲ ၁၀ ဦးဝန်းကျင်ရှိပြီး သူတို့ကိုမနေ့ည ၁၀ နာရီဝန်းကျင်မှာ မဟာမိတ်အဖွဲ့ ၃ ဖွဲ့ပေါင်းတိုက်ခိုက်ခဲ့တာလို့ မကွေးခရိုင် အမှတ် ၂ တပ်ရင်း တပ်ခွဲ ၁ PDF-Yenangyaung မှ ဗိုလ်စံသျှားကပြောပါတယ်။

“စစ်အုပ်စုက မြို့ရှောင်လမ်းနဲ့ ယာကြီးပြင်ဘက်ကိုဝင်တဲ့လမ်းတွေမှာ ဘယ်ညာညှပ်ထိုင်ပြီး ကားတွေကိုပိုက်ဆံတောင်းတယ်၊ ‌အမျိုးမျိုးငွေညစ်ပြီး ဆပ်ကြေးကောက်နေတာ၊ အင်အားက ၁၀ ကောင်လောက်ရှိတယ်၊ အပြန်အလှန်ပစ်ခတ်ခဲ့တာ ၁၅ မိနစ်လောက် ကြာတယ်၊ ရဲနဲ့စစ်ပေါင်းနေတာ၊ စစ်*ကများတယ်” လို့ ပြောပါတယ်။

ပဲခူးအခြေစိုက် တမခ ၇၇ ကစစ်သားတွေနဲ့ ညောင်လှရဲစခန်းကရဲတွေလည်းပါဝင်ပြီး တိုက်ခိုက်မှုကြောင့် စစ်သား ၃ ဦးသေဆုံးခဲ့ကြောင်း ဒေသခံအချို့ရဲ့ ပြောပြချက်အရ အတည်ပြုနိုင်ခဲ့တယ်လို့ ဗိုလ်စံသျှားက ဆိုပါတယ်။

ဒီသေဆုံးမှုနဲ့ပတ်သက်လို့ မြေလတ်အသံက သီးခြားအတည်မပြုနိုင်သေးပါဘူး။

ဒီတိုက်ခိုက်မှုကို မကွေးခရိုင် အမှတ် ၂ တပ်ရင်း တပ်ခွဲ ၁ PDF-Yenangyaung၊ နတ်မောက်မြို့နယ်ပြည်သူ့ကာကွယ်ရေးတပ်ဖွဲ့၊ Yenangyaung Local People’s Defence Force (ဖေကံကောင်းအဖွဲ့)တို့က ပူးပေါင်းလုပ်ဆောင်ခဲ့တာဖြစ်ပါတယ်။

ပြီးခဲ့တဲ့ ဇန်နဝါရီလ ၃၁ ရက်ညပိုင်းမှာလည်း ရေနံချောင်းမြို့၊ လက်မှတ်ကုန်းနယ်မြေရဲစခန်းကို မကွေးခရိုင် အမှတ် ၂ တပ်ရင်း တပ်ခွဲ ၁ PDF-Yenangyaung အဖွဲ့က မိုင်းခွဲပြီး ပစ်ခတ်တိုက်ခိုက်ခဲ့ရာ ရဲ ၁ ဦး သေဆုံးပြီး ၃ ဦး ဒဏ်ရာရခဲ့တယ်လို့ သိရပါတယ်။

မကွေး၊ ဇန်နဝါရီ ၂၆၊ ၂၀၂၃။

မကွေးတိုင်း၊ ရေနံချောင်းမြို့ ယာပြင်စစ်ဆေးရေးဂိတ်က ပြန်လာတဲ့လက်မှတ်ကုန်းနယ်မြေရဲစခန်းရဲအုပ်စီးလာတဲ့ 3J-2711 ကားကို ဇန်နဝါရီလ ၂၅ ရက်ညနေပိုင်းမှာ ဒေသခံကာကွယ်ရေးတပ်တွေက မိုင်းဆွဲတိုက်ခိုက်ခဲ့ပါတယ်။

ယာပြင်စစ်ဆေးရေးဂိတ်က 3J-2711 ကားနဲ့ပြန်လာတဲ့ ရဲအုပ်နဲ့ရဲတပ်သားတဦးကို ညနေ ၅ နာရီခွဲမှာ တွင်းကုန်းနယ်မြေနဲ့လက်မှတ်ကုန်းနယ်မြေအကြားမှာ မိုင်းဆွဲခဲ့တာလို့ People’s Defence Force Yenangyaung (မကွေးခရိုင် အမှတ် ၂ တပ်ရင်း) ဗိုလ်စံသျှားက ပြောပါတယ်။

“ယာပြင်စစ်ဆေးရေးဂိတ်ကနေလက်မှတ်ကုန်းနယ်မြေရဲစခန်း 3J-2711 ယာဉ်နဲ့ပြန်လာတဲ့ ရဲအုပ်ကားကို တွင်းကုန်းနယ်မြေနဲ့လက်မှတ်ကုန်းနယ်မြေအကြားမှာ မိုင်းဆွဲတိုက်ခိုက်ခဲ့တာ၊ အချိန်ယူနေတာကြာပါပြီ၊ ဒီကနေ့တော့အလစ်အငိုက် မိုင်းခွဲတိုက်ခိုက်ခဲ့တယ်၊ ကားက‌တော့ ဘော်ဒီထိမှန်သွားပြီးကားထိုးရပ်သွားတယ်၊ ထိခိုက်သေဆုံးမှုကိုတော့ စုံစမ်းနေဆဲပါ” လို့ ဆက်ပြောပါတယ်။

ငွေညစ်တောင်းတာ၊ လောင်းကစားဝိုင်းတွေလုပ်တာ၊ အဲဒီရဲအုပ်က မကောင်းမှုနဲ့ကျော်စောတယ်လို့ဆိုပါတယ်။

People’s Defence Force Yenangyaung(မကွေးခရိုင် အမှတ် ၂ တပ်ရင်း) ၊ Hunter Dragon Group ၊ ဖေကံကောင်းအဖွဲ့၊ Chauk Guerrilla Force ညီနောင်တို့က ပူးပေါင်းလုပ်ဆောင်ခဲ့တာဖြစ်ပြီး တိုက်ခိုက်ခံရပြီးနောက် ထိခိုက်သေဆုံးမှုကိုတော့ မသိရသေးဘူးလို့ ဆိုပါတယ်။

ပြီးခဲ့တဲ့ဒီဇင်ဘာလ ၂၅ ရက်ကလည်း ရေနံချောင်းမြို့ လျှပ်စစ်ရုံးအား People’s Defence Force Yenangyaung(မကွေးခရိုင် အမှတ် ၂ တပ်ရင်း) က နောက်ဆုံးအကြိမ်သတိပေး ဗုံးခွဲခဲ့တယ်လို့ သိရပါတယ်။

မကွေး၊ ဒီဇင်ဘာ ၂၅၊ ၂၀၂၂။

မကွေးတိုင်း၊ ရေနံချောင်းမြို့ကလျှပ်စစ်ရုံးကို ဒီဇင်ဘာလ ၂၅ ရက်ဒီညနေ ၆ နာရီခွဲမှာ ဒေသခံကာကွယ်ရေးတပ်တွေက နောက်ဆုံးအကြိမ်သတိပေး ဗုံးခွဲခဲ့ပါတယ်။

အဲ့ဒီရုံးက၀န်းထမ်းတွေအနေနဲ့ ဒေသခံပြည်သူတွေဆီကနေ မီတာခတွေကိုခြိမ်းခြောက်တောင်းဆိုတာတွေလုပ်တာကြောင့် ခုလိုသတိပေးဖောက်ခွဲခဲ့တာလို့ People’s Defence Force Yenangyaung အဖွဲ့မှ ဗိုက်စံသျှားကပြောပါတယ်။

“စာနဲ့သတိပေးတဲ့အပြင် ဖုန်းဆက်ပြီးတော့လည်းအကြိမ်ကြိမ်သတိပေးခဲ့တယ်။ သတိပေးတဲ့ကြားထဲကကို လူထုက ကျနော်တို့ဆီတိုင်တာတွေရှိတယ်။ လျှပ်စစ်ရုံးကတော့ပြောတာပေါ့ မီတာကိုဖြုတ်တာမဟုတ်ပါဘူး၊ မီတာတွေမဆောင်ရင်မီးဖြတ်တာပေါ့။ တကယ့်မြေပြင်မှာကျတော့ မီတာတွေဖြုတ်တယ်။ မီတာဖြုတ်တဲ့အပြင် မြို့ထဲမှာလိုက်ပြီး ဓါတ်စက်နဲ့အော်တယ်”လို့ ပြောပါတယ်။

ဗုံးခွဲတိုက်ခိုက်ခဲ့တဲ့အပြင် 9 မမ လက်နက်နဲ့ပါပစ်ခတ်ခဲ့ပြီး နောက်တကြိမ်ဆိုရင်ဒီထက်ပိုဆိုးလာနိုင်တယ်လို့လည်း ‌ဗိုလ်စံသျှားကဆက်ပြောပါတယ်။

“ဒီတခါ‌တော့ နောက်ဆုံးအကြိမ်သတိပေးခြင်းပေါ့။ နောက်ဆုံးအကြိမ်သတိပေးပြီးခါမှ ဒီထက်မကဆိုးလာရင် ကျနော်တို့အနေနဲ့ မီတာလိုက်ကောက်တဲ့စာရေးတွေနဲ့ လိုက်အော်နေတဲ့မီတာကားတွေပေါ်ကို ပစ်ခတ်သွားမယ်။ ကျနော်တို့အနေနဲ့ သူတို့အသက်အန္တရာယ်ကို သက်ညှာသွားမှာမဟုတ်ဘူး။ အာမခံချက်ပေးသွားမှာမဟုတ်ဘူး”လို့ ဆိုပါတယ်။

ဒီတိုက်ခိုက်မှုကို People’s Defence Force Yenangyaung၊ Hunter Dragon Group၊ ဖေကံကောင်းအဖွဲ့၊ Chauk Guerrilla Force ညီနောင်တို့က ပူးပေါင်းလုပ်ဆောင်ခဲ့တာဖြစ်ပြိး၊ တိုက်ခိုက်မှုကြောင့် ထိခိုက်မှုအခြေအနေတွေကိုတော့ ဆက်လက်စုံစမ်းနေဆဲဖြစ်ပါတယ်။

ပြီးခဲ့တဲ့အောက်တိုဘာလ ၁၉ ရက်ကလည်း အဲ့ဒီလျှပ်စစ်ရုံးကိုပဲ M-70-40 မမ ဗုံးသီးအပါအ၀င် လက်နက်ငယ်တွေနဲ့ပါ People’s Defence Force Yenangyaung အဖွဲ့က ပစ်ခတ်တိုက်ခိုက်ခဲ့လို့ ၀န်ထမ်း ၂ ဦး ဒဏ်ရာရပြီး ၁ ဦးသေဆုံးခဲ့တယ်လို့ သိရပါတယ်။