ရွှေတောင်၊ အောက်တိုဘာ ၁၃၊ ၂၀၂၅။

ပဲခူးတိုင်း၊ ရွှေတောင်မြို့ဈေးအနီး ရေအနက် ၁၅ ပေကျော်ရှိတဲ့ မီးသတ်ကန်မှာ ငါးမျှားသွားတဲ့ အလယ်တန်းကျောင်းသား ၂ ဦး ရေနစ်သေဆုံးခဲ့တယ်လို့ ဒေသခံတွေဆီက သိရပါတယ်။

အောက်တိုဘာ ၁၂ ရက်ညနေ ၃ နာရီခန့်မှာ ကြာနီကန် အထက(ခွဲ) ကျောင်းမှာတက်နေတဲ့ ကြာနီကန်ရပ်ကွက်၊ ဒေါနခြံလမ်းနဲ့ ထီးတန်းလမ်းနေ အသက် ၁၃ နှစ်အရွယ် ကျောင်းသား ၂ ဦးဟာ ငါးမျှားရင်း ရေနစ်ခဲ့တာလို့ ဆိုပါတယ်။

“ကလေးနှစ်ယောက်က ငါးမျှားနေတာ။ တယောက်က ငါးမျှားတံအောက်ကျသွားတာကို ဆင်းဆယ်ပုံ ရတယ်။ မီးသတ်ကန်က အနက်ကြီး။ ကျန်တဲ့ကောင်လေးက ခြေထောက်လှမ်းပေးတာ။ ခြေထောက်ကနေဆွဲတင်ပေါ့။ အဲ့မှာနှစ်ယောက်စလုံးနစ်သွားတာ။ ကန်ကစောက်ကြီးဖြစ်နေတာ”လို့ ကူညီကယ်ဆယ်ရေးလုပ်ပေးခဲ့တဲ့ ဒေသခံတဦးကပြောပါတယ်။

ရေနစ်ပြီးနာရီဝက်ကျော်အကြာမှာ အလောင်းတွေကိုပြန်လည်ဆည်ယူနိုင်ခဲ့ပြီးနောက် လူမှုကူညီရေး အသင်းတွေက ရွှေတောင်ဆေးရုံကို ပို့ပေးထားရပြီး အောက်တိုဘာ ၁၃ ရက်ဒီကနေ့မှ မိသားစုဝင်တွေက နေအိမ်ပြန်သယ်ကြမယ်လို့ သိရပါတယ်။

စက်တင်ဘာ ၂၆ ရက်ကလည်း ပဲခူးမြို့၊ ဥဿာမြို့သစ်၊ ၉ ရပ်ကွက်က ရေနုတ်မြောင်းထဲမှာ ကလေးဆေးဖိုးအတွက် ဘူးခွံဆင်းကောက်သူ အမျိုးသမီး ရေနစ်သေဆုံးခဲ့ပါသေးတယ်။

စာတည်း – လင်း

ပဲခူး၊ စက်တင်ဘာ ၂၇၊ ၂၀၂၅။

ပဲခူးတိုင်း၊ ပဲခူးမြို့၊ ဥဿာမြို့သစ်၊ ၉ ရပ်ကွက်က ရေနုတ်မြောင်းထဲမှာ ဘူးခွံဆင်းကောက်သူ အမျိုးသမီး ရေနစ်သေဆုံးသွားတယ်လို့ ကူညီကယ်ဆယ်ရေးလုပ်ဆောင်ပေးခဲ့သူတွေဆီက သိရပါတယ်။

သေဆုံးသူက အသက် ၂၉ နှစ်အရွယ် မသင်္ကြန်မိုးဆိုသူဖြစ်ပြီး စက်တင်ဘာ ၂၆ ရက်နေ့လယ် ၁ နာရီခန့်မှာ တူမဖြစ်သူနဲ့အတူ ပလုံကောက်ထွက်ချိန် ရေအနက် ၄ ပေကျော် ရေမြောင်းထဲမှာ ရေနစ် သေဆုံးသွားတယ်လို့ ဆိုပါတယ်။

“ရေကတော့ သူအရပ်နဲ့တောင်လည်ပင်းလောက်ရှိတာ။ ကလေးနေမကောင်းလို့ ဘူးခွံသွားကောက် တာ။ အလောင်းက ၁ နာရီအတွင်းတွေ့တာ။ သူ့တူမလေးနဲ့သွားတော့ သူရေနစ်နေတာကို လူကြီးတွေကို လာပြန်ခေါ်တာ။ ကလေးက လှမ်းဆွဲသေးတယ်။ မမှီတော့လို့”လို့ ကူညီပေးခဲ့သူတဦးက ပြောပါတယ်။

ရေနစ်သေဆုံးသွားသူ အမျိုးသမီးအလောင်းကိုတော့ ဒေသခံတွေက ၁ နာရီအတွင်း ရှာဖွေတွေ့ရှိခဲ့ပြီးနောက် ပဲခူးဆေးရုံကိုပို့ပေးခဲ့ရတယ်လို့ ဆိုပါတယ်။

ရေနစ်သေဆုံးသူ အမျိုးသမီးဟာ ဥဿာမြို့သစ်၊ ရပ်ကွက် ၈ နေသူဖြစ်ပြီး အမျိုးသားဖြစ်သူကလည်း ၂၀၂၄ အတွင်း ကလေးမီးဖွားပြီးချိန်မှာ စွန့်ပစ်သွားတာလို့သိရပါတယ်။

လက်ရှိနေမကောင်းဖြစ်နေတဲ့ ကလေးငယ်က အသက် ၂ နှစ်ဝန်းကျင်အရွယ် သားယောကျာ်းလေးဖြစ်ပြီး တုပ်ကွေးမိပြီးနေမကောင်းဖြစ်နေတာကြောင့်ဆေးခန်းပြဖို့ ငွေကြေးလိုအပ်နေတာလို့ ကူညီပေးခဲ့သူတဦးက ပြောပါတယ်။

ရေနစ်သေဆုံးသွားတဲ့ အမျိုးသမီးရဲ့နာရေးအတွက်နဲ့ကလေးဆေးကုသဖို့ မြို့ခံပရဟိတတွေက ကူညီဆောင်ရွက်ပေးနေပြီး စက်တင်ဘာ ၂၈ ရက်မှာ သင်္ဂြိုဟ်သွားမယ်လို့ ဆိုပါတယ်။

ဩဂုတ် ၄ ရက်ကလည်း ပဲခူးမြို့၊ သွန်းဘုရားရပ်ကွက်၊ သွန်းဘုရားလမ်းရှိ ကြခတ်ဝိုင်း စာသင်တိုက် မှ သက်တော် ၁၃ နှစ်အရွယ် ကိုရင်နန္ဒအပါအဝင် ၆ ပါးဟာ မြစ်အတွင်းရေဆင်းကူးရာမှ ကိုရင်နန္ဒဟာ ရေစီးနဲ့အတူ မျောပါသေဆုံးသွားတယ်လို့ သိရပါတယ်။

သတင်း – ကျော်ကြီး၊ စာတည်း – လင်း

တောင်ငူ၊ မေ ၇၊ ၂၀၂၅။

ပဲခူးတိုင်း၊ တောင်ငူမြို့နယ်၊ ပွတ်စုကျေးရွာအနီး ခပေါင်းချောင်းအတွင်း ရေဆင်းကူးရာကနေ ရေနစ်ပျောက်ဆုံးခဲ့တဲ့ လူငယ် ၁ ဦးရဲ့အလောင်းကို ပြန်တွေ့ခဲ့တယ်လို့ ရှာဖွေကယ်ဆယ်ရေး လုပ်ဆောင်ပေးနေသူတွေဆီက သိရပါတယ်။

မေ ၇ ရက် မနက် ၅ နာရီခန့်မှာ ခပေါင်းချောင်းနဲ့စစ်တောင်းမြစ်ဆုံရာ ခပေါင်းချောင်းဝမှာ ကျွန်းကုန်းကျေးရွာနေထိုင်သူ မောင်စိုးသူရအောင်ရဲ့အလောင်းကို ပြန်လည်ရှာတွေ့ခဲ့တာလို့ ဆိုပါတယ်။

“အလောင်းပြန်တွေ့တဲ့နေရာနဲ့ရေနစ်တဲ့နေရာဆို တမိုင်ခွဲလောက်ဝေးမယ်။ ရေတွေကလွှတ်ထားတော့ အဲဒီရောက်မှာဘဲ။ တွေ့တာက ပိုက်သမားကတွေ့တာ။ DB ကတော့ မျက်စိတွေတောင်ထွက်နေပြီ။ မိသားစုဆီတော့ အလောင်းပြန်ရောက်ပြီ”လို့ ရှာဖွေကယ်ဆယ်ရေး လုပ်ဆောင်ပေးနေသူတဦးက ပြောပါတယ်။

မေ ၅ ရက် ညနေ ၅ နာရီခန့်မှာ ပွတ်စုကျေးရွာမှာနေထိုင်တဲ့ အသက် ၁၆ နှစ်အရွယ် မောင်မင်းခန့်ဖြိုးနဲ့ ကျွန်းကုန်းကျေးရွာနေသူ မောင်စိုးသူရအောင်တို့ ၂ ဦးအပါအဝင် စုစုပေါင်း ၅ ဦး ရေဆင်းကူး နေရာကနေ သူတို့ ၂ ဦးက ရေနစ်ပျောက်ဆုံးခဲ့တာပါ။

ရေနစ်ပြီး ၁ နာရီခန့်အကြာမှာ ရေနစ်မှုဖြစ်ခဲ့တဲ့ဝဲအတွင်းကနေ မောင်မင်းခန့်ဖြိုးရဲ့အလောင်းကို ပြန်လည်ရှာတွေ့ခဲ့ပြီး စိုးသူရအောင်ရဲ့အလောင်းကို ဒီမနက်မှတွေ့ရှိခဲ့တာဖြစ်ပါတယ်။

ပြီးခဲ့တဲ့ မတ် ၂ ရက်ကလည်း တောင်ငူမြို့အဝင် ထီးလှိုင်ကျုံးအတွင်း ရေဆင်းကူးတဲ့ တောင်ငူမြို့မရဲစခန်းက ရဲတပ်ကြပ်တဦးရေနစ်သေဆုံးသွားတဲ့ဖြစ်စဥ်ရှိခဲ့ပါသေးတယ်။

စာတည်း – လင်း

တောင်ငူ၊ မေ ၆၊ ၂၀၂၅။

ပဲခူးတိုင်း၊ တောင်ငူမြို့နယ်၊ ပွတ်စုကျေးရွာအနီး ခပေါင်းချောင်းထဲမှာ ရေဆင်းကူးတဲ့ လူငယ် ၂ ဦး ရေနစ်ပြီးပျောက်ဆုံးနေခဲ့ကာ အဲ့ဒီထဲက ၁ ဦးရဲ့အလောင်းကို ပြန်ရပြီလို့ ရှာဖွေကယ်ဆယ်ရေး လုပ်ဆောင်ပေးနေသူတွေဆီက သိရပါတယ်။

မေ ၅ ရက် ညနေ ၅ နာရီခန့်မှာ ပွတ်စုကျေးရွာမှာနေထိုင်တဲ့ အသက် ၁၆ နှစ်အရွယ် မောင်မင်းခန့်ဖြိုးနဲ့ ကျွန်းကုန်းကျေးရွာနေသူ မောင်စိုးသူရအောင် တို့ ၂ ဦးအပါအဝင် စုစုပေါင်း ၅ ဦး ရေဆင်းကူးနေရာကနေ သူတို့ ၂ ဦးက ရေနစ်ပျောက်ဆုံးခဲ့တာလို့ ဆိုပါတယ်။

“ရေဆင်းကူးရင်းရေနစ်ကြတာ။ အဲနားလေးမှာက အရင်က ဝဲမရှိဘူး။ ငလျင်လှုပ်ပြီးမှ ဝဲတခုဖြစ်လာတာ။ အဲ့ ဝဲထဲကို ဝင်သွားတာ။ ဝဲနဲ့ကမ်းနဲ့လည်းနီးစပ်တယ်။ တယောက်တော့ အလောင်းပြန်တွေ့ပြီ”လို့ ကူညီကယ်ဆယ်ရေးလုပ်ဆောင်ပေးနေသူတဦးကပြောပါတယ်။

ရေနစ်ပြီး ၁ နာရီခန့်အကြာမှာတော့ ရေနစ်မှုဖြစ်ခဲ့တဲ့ ဝဲအတွင်းကနေ မောင်မင်းခန့်ဖြိုးရဲ့အလောင်းကို ပြန်လည်ရှာတွေ့ခဲ့တဲ့အတွက် မိသားစုဝင်တွေက နေအိမ်ပြန်သယ်သွားပြီး နာရေးကိစ္စပြုလုပ်နေပြီလို့ သိရပါတယ်။

စိုးသူရအောင်ရဲ့အလောင်းကိုတော့ လူမှုကူညီရေးအသင်းတွေနဲ့ဒေသခံတွေက ဆက်လက်ရှာဖွေနေသေးပေမယ့် မေ ၆ ရက် ဒီမနက်ပိုင်းထိတော့ ပြန်မတွေ့ရသေးဘူးလို့ ဆိုပါတယ်။

ပြီးခဲ့တဲ့ မတ် ၂ ရက်ကလည်း တောင်ငူမြို့အဝင် ထီးလှိုင်ကျုံးအတွင်း ရေဆင်းကူးတဲ့ တောင်ငူမြို့မရဲစခန်းက ရဲတပ်ကြပ်တဦးရေနစ်သေဆုံးသွားတဲ့ဖြစ်စဥ်ရှိခဲ့ပါသေးတယ်။

စာတည်း – လင်း

ပဲခူး၊ ဖေဖော်ဝါရီ ၁၊ ၂၀၂၅။

ပဲခူးတိုင်း၊ ပြည်မြို့၊ ကမ်းနားလမ်း ဆိပ်ကမ်းဗောတံတားအနီး ဧရာဝတီမြစ်အတွင်းမှာ ကျောင်းသား ၃ ဦးရေဆင်းကူးရာမှ ၂ ဦးရေနစ်သေဆုံးသွားတယ်လို့ ကူညီကယ်ဆယ်ရေးပြုလုပ်ပေးခဲ့သူတွေထံက သိရပါတယ်။

ဇန်နဝါရီ ၃၁ ရက် နေ့လယ် ၁ နာရီခန့်မှာ ဆံတော်ရပ်ကွက်နေသူတွေဖြစ်တဲ့ ကန်ဘောင်ရိပ်သာ အလက ၁ ကျောင်းက ၉ တန်းကျောင်းသား မောင်ထက်လွင်အောင် ၁၆ နှစ်၊ ၇ တန်းကျောင်းသား မောင်ကျော်ဇင်ထက် ၁၄ နှစ်၊ အမက ဆံတော်ကျောင်းက ၄ တန်းကျောင်းသား မောင်သက်ဝေ (ခ) ဖိုးသား ၁၁ နှစ်တို့ ၃ ဦးမှာ မြစ်အတွင်း ရေဆင်းကူးရာမှ မောင်ထက်လွင်အောင်နဲ့မောင်ကျော်ဇင်ထက်တို့ ၂ ဦး ရေနစ်ခဲ့တယ်လို့ ဆိုပါတယ်။

“အတူရေကူးနေရာကနေ ၁၁ နှစ်ကလေးက ကျန်ခဲ့ပြီးတော့ ၁၄ နှစ်နဲ့ ၁၆ နှစ်က မြုပ်သွားတာ။ သူက အကူအညီတောင်းလို့ ပတ်ဝန်းကျင်ကသိပြီး ရှာဖွေကြတာ။ နေ့ချင်းဘဲ သေဆုံးလျက် ၂ ယောက်ကိုပြန်တွေ့ပါတယ်”လို့ ကူညီကယ်ဆယ်ရေးပြုလုပ်ပေးခဲ့သူတဦးကပြောပါတယ်။

ကလေး ၂ ဦးရေနစ်တဲ့နေရာကို ပြည်မြို့ရှိလူမှုကူညီရေးအသင်းတွေနဲ့ မီးသတ်အဖွဲ့ဝင်တွေက ကူညီရှာဖွေပေးခဲ့ကြပြီး ၁ နာရီကျော်ခန့်အကြာမှာ ရေနစ်တဲ့နေရာနဲ့ ပေ ၄၀၀ ခန့်အကွာ မြစ်အတွင်းမှာ မောင်ထက်လွင်အောင်ရဲ့ အလောင်းကို အရင်ဆုံးရှာဖွေတွေ့ရှိခဲ့ကာ နောက်ထပ် ၁ နာရီခန့်အကြာ နောက်ထပ်ပေ ၅၀ ခန့်အကွာမှာ မောင်ကျော်ဇင်ထက်ရဲ့ အလောင်းကိုလည်း ထပ်မံတွေ့ရှိခဲ့ပါတယ်။

သေဆုံးကလေးငယ်တွေရဲ့အလောင်းတွေကို ပြည်မြို့ဆေးရုံကို ပို့ဆောင်ပေးခဲ့ကြပြီး ဖေဖော်ဝါရီ ၁ ရက် ဒီနေ့မှာ သက်ဆိုင်ရာမိသားစုနေအိမ်တွေကိုပြန်သယ်ပြီး နာရေးပြုလုပ်နေကြပြီလို့ သိရပါတယ်။

ပြီးခဲ့တဲ့ နှစ် စက်တင်ဘာ ၃၀ ရက်နေ့ကလည်း ပြည်မြို့၊ ကမ်းနားလမ်း၊ ပန်းခြံအနီးမှာ ဧရာဝတီမြစ်အတွင်း အမျိုးသမီးငယ် ၁ ဦးခုန်ချရာမှ ရေနစ်သေဆုံးသွားတယ်လို့ သိရပါတယ်။

စာတည်း – ကိုချမ်း

မြေလတ်အသံ၊ မေ ၇၊ ၂၀၂၃။

စစ်ကောင်စီရုံးစိုက်ရာ နေပြည်တော်ကောင်စီနယ်မြေ၊ ဇေယျာသီရိမြို့နယ်၊ ကျည်တောင်အုပ်စုရှိ လှေခွင်းတောင် အပန်းဖြေစခန်းအနီး ပေါင်းလောင်းမြစ်အတွင်းမှာ မေလ ၆ ရက်မနေ့ညနေပိုင်းက လူငယ် ၂ ဦး ရေနစ်သေဆုံးသွားတယ်လို့ သိရပါတယ်။

လှေခွင်းတောင် ကမ်းခြေအပန်းဖြေစခန်း၊ ပေါင်းလောင်းစားသောက်ဆိုင်အနီး သာယာဝှမ်း ကျေးရွာဘက်ခြမ်း၊ ပေါင်းလောင်းမြစ်အတွင်းမှာ လူငယ်အမျိုးသား ၁ ဦးနဲ့ အမျိုးသမီး ၁ ဦးဟာ သူငယ်ချင်းတွေနဲ့အတူ ရေကူးနေချိန် ရေနစ်သေဆုံးခဲ့တာလို့ ဒေသလူမှုကူညီရေးအသင်းဝင်တဦးက မြေလတ်အသံကို ပြောပါတယ်။

“သူတို့ ၂ ယောက်က အခြားသူငယ်ချင်းတွေနဲ့အတူ ရေဆော့နေတာဘဲ။ အခြားအပန်းဖြေလာ သူတွေလည်း ရေကစားနေကြသူတွေ အများသားဘဲ။ အဲဒီမှာမှ သူတို့က ရေနက်တဲ့နေရာရောက်ပြီး နစ်သွားတာ။ တနာရီလောက်အကြာရှာဖွေပြီးမှအလောင်းပြန်ရတာ” လို့ ပြောပါတယ်။

ရေနစ်သေဆုံးသွားသူတွေဟာ ၁၆ နှစ်အရွယ် အမျိုးသားနဲ့ ၁၈ နှစ်အရွယ်အမျိုးသမီးတို့ဖြစ်ပြီး ပျဉ်းမနားနဲ့ ပုပ္ပသီရိမြို့တွေမှာ နေထိုင်သူတွေဖြစ်တယ်လို့ သိရပါတယ်။

လူငယ် ၂ ဦးရေနစ်တာကို ဒေသခံတွေနဲ့ကယ်ဆယ်ရေးအဖွဲ့တွေက ဝိုင်းဝန်းရှာဖွေ ကယ်ဆယ်ခဲ့ကြ ပေမယ့် သေဆုံးနေတဲ့အလောင်းကိုသာ ပြန်ရခဲ့ကာ ရုပ်အလောင်းတွေကို ဒေသခံနာရေးကူညီမှုအသင်း ကားနဲ့ နေပြည်တော်ကုတင် – ၁၀၀၀ဆေးရုံကို ပို့ပေးခဲ့ရတယ်လို့ ဆိုပါတယ်။

လှေခွင်းတောင်အပန်းဖြေစခန်းဟာ နေပြည်တော်အတွင်း မြို့နယ်တွေအပါအဝင် နေပြည်တော်နဲ့ ထိစပ်နေတဲ့ ပဲခူးတိုင်းအတွင်း မြို့နယ်တွေက အများဆုံး လာရောက်အပန်းဖြေ ရေလာကူးကြပြီး အခြားဒေသတွေက လာရောက်သူတွေလည်းရှိတယ်လို့ ဒေသခံတွေဆီက သိရပါတယ်။

ပြီးခဲ့တဲ့ မတ်လအတွင်းကလည်း ဇမ္ဗူသီရိမြို့နယ်မှာ နေထိုင်သူ အသက် ၂၈ နှစ်အရွယ် အမျိုးသား ၁ ဦး ပေါင်းလောင်းမြစ်အတွင်း ရေနစ်သေဆုံးခဲ့သေးတယ်လို့ သိရပါတယ်။

စာတည်း – ရင်ငြိမ်း

မကွေး၊ မေ ၄၊ ၂၀၂၃။

မကွေးတိုင်းဒေသကြီး၊ မြို့သစ်မြို့၊ အမှတ် ၁၁ ရပ်ကွက်၊ မြို့အထွက် တောင်တွင်း-နတ်မောက်လမ်း ဆင်ဖြူချက်ကန်အတွင်းမှာ ငါးမျှားတံ လိုက်ဆယ်ရာကနေ ကြွက်တက်ပြီးရေနစ်ရာမှ အမျိုးသား ၁ ဦးသေဆုံးခဲ့တယ်လို့ သိရပါတယ်။

မေလ ၃ ရက်ညနေ ၅ နာရီခွဲကျော်ခန့်မှာ ညောင်ဇင်ကျေးရွာနေ အသက် ၅၃ နှစ်အရွယ် အမျိုးသား တဦးဟာ ငါးမျှားတံဆယ်ဖို့ ကန်အတွင်းဆင်းရာမှ ရေနစ်သေဆုံးခဲ့တာလို့ ဒေသခံတဦး ပြောပါတယ်။

“သူက ငါးမျှားနေရာကနေ သူငါးမျှားတံကို ငါးက ဆွဲသွားတာ။ အဲ့ဒါကို လိုက်ဆယ်ချိန် ကန်လယ်လောက်ရောက်တော့ ကြွက်တက်ပြီး ရေနစ်သေတာ။ ကန်ကလည်း ဘက်ဟိုးတွေနဲ့ တူးထားတာဆိုတော့ ဝါးနှစ်ပြန်လောက်နက်တယ်။ သူက တယောက်တည်းနေတာလို့တော့ သိရတယ်” လို့ ပြောပါတယ်။

ဒေသလူမှုကူညီရေးအသင်းတွေက ဝိုင်းရှာခဲ့ရပြီး နာရီဝက်အကြာမှ အလောင်းကို ပြန်တွေ့ခဲ့ကာ မြို့သစ်မြို့ဆေးရုံကို ပို့ပေးခဲ့ရတယ်လို့ ဆိုပါတယ်။

အဲဒီနောက် လိုအပ်တဲ့စစ်ဆေးမှုတွေပြုလုပ်ပြီး သေဆုံးသူနေထိုင်တဲ့ ညောင်ဇင်ကျေးရွာကို ပြန်ပို့ပေးခဲ့ရတယ်လို့ သိရပါတယ်။

စာတည်း – လင်း

မန္တလေး၊ ဒီဇင်ဘာ ၂၆၊ ၂၀၂၂။

မန္တလေးတိုင်း၊ ပြင်ဦးလွင်မြို့၊ ပွဲကောက်ရေတံခွန်မှာ ရေဆင်းကစားသူ လူငယ် ၃ ဦးရေနစ်ပြီး ၁ ဦးသေဆုံးသွားတယ်လို့ သိရပါတယ်။

ဒီဇင်ဘာလ ၂၅ ရက်မနေ့ကနေ့လည် ၂ နာရီဝန်းကျင်မှာ မကွေးတိုင်း၊ စလင်းမြို့နယ်ဘက်ကနေ လာရောက်လည်ပတ်သူ ခရီးသွားဧည့်သည်ထဲက အမျိုးသားလူငယ် ၂ ဦးနဲ့ အမျိုးသမီးငယ် ၁ ဦးတို့ဟာ ရေတံခွန်ရေအိုင်အတွင်း ရေဆင်းကူးရာမှ ရေနစ်ခဲ့တာလို့ ဒေသခံလူမှုအဖွဲ့အစည်း တာဝန်ရှိသူတဦးက ပြောပါတယ်။

“သူတို့က စလင်းဘက်ကလာလည်ကြတာ။ သူတို့အဖွဲ့ထဲကလူငယ်ကလေးတွေ ရေဆင်းကူးရာကနေ ၃ ယောက်ရေနစ်တာပေါ့။ အဲမှာ လူငယ်အမျိုးသား ၁ ယောက်တော့ဆုံးသွားတယ်။ ကျန် နှစ်ယောက်ကတော့ အသက်ရှင်လျက်ပြန်ကယ်လို့ရသွားတယ်”လို့ ပြောပါတယ်။

သေဆုံးသူဟာ အသက် ၁၅ နှစ်အရွယ်အမျိုးသားဖြစ်ပြီး အလောင်းကိုတော့ပြင်ဦးလွင်ဆေးရုံကို ပို့ထားရတယ်လို့ ဆိုပါတယ်။

အဲဒီနေ့ကခရစ်စမတ်နေ့ဖြစ်သလို ရုံးပိတ်ရက်လည်းဖြစ်တာကြောင့် ပြင်ဦးလွင်ပန်းပွဲတော်နဲ့ ပွဲကောက်ရေတံခွန်ကို လာရောက်လည်ပတ်သူ အများအပြားရှိခဲ့တယ်လို့ သိရပါတယ်။

ဒါ့အပြင် ၂၀၂၁ ခုနှစ်တုန်းကလည်း ပွဲကောက်ရေတံခွန်အောက်နားက သုံးထပ်ရေတံခွန်နားမှာ အလည်လာသူ အမျိုးသား ၁ ဦးရေနစ်သေဆုံးခဲ့ဖူးတယ်လို့ သိရပါတယ်။