ရေနစ်သေဆုံး

ကြို့ပင်ကောက်၊ ဧပြီ ၁၄၊ ၂၀၂၃။

ပဲခူးတိုင်း(အနောက်ခြမ်း)၊ သာယာဝတီခရိုင်၊ ကြို့ပင်ကောက်မြို့မှာ မနေ့ညက အမျိူးသားတဦး ရေကန်အတွင်း‌ ရေချိုးဆင်းရာက ရေနစ်သေဆုံးခဲ့တယ်လို့ သိရပါတယ်။

ဧပြီလ ၁၃ ရက် မနေ့ည ၁၀ နာရီလောက်က ရေနစ်သေဆုံးခဲ့တာဖြစ်ပြီး ကြို့ပင်ကောက်မြို့၊ ရွာမမြောက်ရပ်ကွက် အေးသန်းဆန်စက်ဝန်းမှာနေတဲ့ အသက် ၃၃ နှစ်အရွယ် ကိုမျိူးလွင်ဦး ဖြစ်တယ်လို့ သိရပါတယ်။

“သူနေတဲ့ အေးသန်းဆန်စက်ဝန်းထဲက ရေကန်ကြီးထဲမှာ ညအချိန်မတော် ရေဆင်းချိုးရင်း ဖြစ်တာပါ။ ရာသီဥတုကလည်း ပူတာလည်း ပါတာပေါ့။ ညတွင်းချင်းပဲ ဆယ်ယူခဲ့ပါတယ်” လို့ ပြောပါတယ်။

အလောင်းကို ကြို့ပင်ကောက်မြို့ နာရေးကူညီမှုအသင်းက ကြို့ပင်ကောက်ဆေးရုံ ရင်ခွဲရုံကို ပို့ဆောင်ခဲ့တယ်လို့ သိရပါတယ်၊၊

ပြီးခဲ့တဲ့ ဧပြီလ ၁၀ ရက်ည ၇ နာရီလောက်ကလည်း ကြို့ပင်ကောက်မြို့၊ တန် ၁၀၀ ဆန်စက်အနီးဆည်မြောင်းရေထိန်းတံခါးမှာ ရေချိုးဆင်းတဲ့ တောင်ဘန့်ဘွေးကုန်းရွာက အသက် ၄၁ နှစ်အရွယ် ကိုပိုက်ထွေးလည်း ဆည်မြောင်းတံခါးအောက်မှာ ဦးခေါင်းညှပ်ကာ သေဆုံးခဲ့ပါသေးတယ်။

ကြို့ပင်ကောက်မြို့မှာ အခုနှစ်မတ်လအတွင်း ရေနစ်သေဆုံးသူ ၄ ဦးရှိပြီး မတ်လ ၅ ရက်ကကြို့ပင်ကောက်မြို့၊ ပန်းတင်ရပ်ကွက် ပန်းတင် ၂ လမ်းက ဆည်မြောင်းအတွင်း ရေချိုးဆင်းတဲ့အသက် ၄ နှစ်အရွယ် မိန်းကလေးငယ် ၂ ဦး၊ မတ်လ ၁၀ ရက်မှာ မြို့လယ်ချောင်းရွာက မြို့လယ်ချောင်းထဲ ရေချိုးဆင်းတဲ့ အသက် ၄၅ နှစ်အရွယ် အမျိူးသားတဦး၊ မတ်လ ၂၄ ရက်မှာ အေဝမ်းဆန်စက်ဝန်းက အသက် ၃၈ နှစ်အရွယ်အမျိူးသားတဦးတို့ ရေနစ်သေဆုံးခဲ့ပါသေးတယ်။

ရက် ၄၀ အတွင်း‌ရေနစ်သေဆုံးသူ ၆ ဦးထဲမှာ အသက် ၄ နှစ်အရွယ် မိန်းကလေးငယ် ၂ ဦးပါဝင်ပြီး ကျန် ၄ ဦးဟာ အသက် ၃၃ နှစ်အထက် အမျိုးသားတွေ ဖြစ်ပါတယ်။

အဲဒီအထဲမှာ မတ်လ ၂၄ ရက်က သေဆုံးတဲ့ အမျိုးသားတဦးသာ အတက်ရောဂါနဲ့ ရေမြောင်းထဲကို ပြုတ်ကျသေဆုံးတာဖြစ်ပြီး ကျန် ၅ ဦးဟာ ရေချိုးဆင်းရာက ရေနစ်သေဆုံးကြတာ ဖြစ်ပါတယ်။

စာတည်း – 007

မကွေး၊ မတ် ၃၀၊ ၂၀၂၃။

မကွေးတိုင်း၊ သရက်ခရိုင်၊ သရက်မြို့နယ် စစ်ကောင်စီလက်အောက်ခံလူဝင်မှုကြီးကြပ်ရေးနဲ့ ပြည်သူ့အင်အားဦးစီးဌာန (လဝက) ဝန်ထမ်း ၁ ဦး မတ်လ ၃၀ ရက် ဒီကနေ့မနက်ပိုင်းက ဧရာဝတီမြစ်အတွင်း ရေနစ်သေဆုံးခဲ့တယ်လို့ မြို့ခံတွေဆီကသိရပါတယ်။

ရေနစ်သေဆုံးသူဟာ အသက် ၃၇ နှစ်အရွယ် သရက်မြို့နယ် လဝက လက်ထောက်လူဝင်မှုကြီးကြပ်ရေးမှူး ဦးသွင်ခန့်ပေါင် ဆိုသူဖြစ်ပြီး သရက်မြို့၊ရုံးရပ်ကွက် ဧရာဝတီမြစ်အတွင်း ဇက်ဆိပ်မှာ ဒီမနက် ၉ နာရီလောက်က ရေဆင်းချိုးရာမှာ ရေနစ်သေဆုံးတာလို့ ဆိုပါတယ်။

“သူက လဝက ၃ ရစ် လက်ထောက်ကြီးကြပ်ရေးမှူးပေါ့။ သူက ချင်းလူမျိုး၊ သူအပါ သူငယ်ချင်း ၃ ယောက်လာတာမှာ သူတယောက်ပဲရေကူးတတ်တော့ ကျန်တဲ့၂ ယောက်ကရေမကူးပဲ ကုန်းပေါ်မှာကျန်ခဲ့တာ။ သူပဲ ရေချိုးဆင်းရင်းရေနစ်တာ”လို့ မြို့ခံတဦးက မြေလတ်အသံကို ပြောပါတယ်။

သေဆုံးသူရဲ့ရုပ်အလောင်းကို နေ့လယ် ၁၂ နာရီခွဲလောက်မှာ ဆယ်ယူရရှိခဲ့ပြီးအလောင်းကို သုခရတနာလူမှုကူညီရေးအသင်းကားနဲ့ သရက်ခရိုင်ဆေးရုံကို ပို့ဆောင်ခဲ့တယ်လို့ သိရပါတယ်။

ပြီးခဲ့တဲ့မတ်လ ၆ ရက် ညနေပိုင်းကလည်း ရေနံချောင်းမြို့၊ ဧရာဝတီမြစ်အတွင်း ဒေသအခေါ် ညောင်လှချောင်းသာမှာ ရေဆော့ကစားတဲ့ အသက် ၁၅ နှစ်အောက်မိန်းကလေး ၂ ဦးအပါ စုစုပေါင်း ၄ ဦး ရေနစ်သေဆုံးခဲ့ပါသေးတယ်။

စာတည်း- ရင်ငြိမ်း

ကြို့ပင်ကောက်၊ မတ် ၂၅၊ ၂၀၂၃။

ပဲခူးတိုင်း(အနောက်ခြမ်း)၊ ကြို့ပင်ကောက်မြို့မှာ မတ်လ ၂၄ ရက် မနေ့ညနေ ၅ နာရီဝန်းကျင်က အမျိုးသားတဦး ရေနစ်သေဆုံးခဲ့တယ်လို့ သိရပါတယ်။

သေဆုံးသူဟာ ကြို့ပင်ကောက်မြို့ အေဝမ်းဆန်စက်ဝန်းမှာနေတဲ့ အသက် ၃၈ နှစ်အရွယ် ကိုကျော်ဇင်ဦး ဖြစ်ပြီး ကံဦး ၂ လမ်းနဲ့ လှည်းတန်းလမ်းထောင့်က ရေမြောင်းထဲမှာ ရေနစ်သေဆုံးတာလို့ သိရပါတယ်။

“ကိုကျော်ဇင်ဦးက အတက်ရောဂါရှိတယ်။ အရက်ကလည်း သောက်တတ်တယ်။ သူရေနစ်သေဆုံးတဲ့ မြောင်းကလည်း သိပ်ပြီးနက်တာမဟုတ်ဘူး။ သူ့ကံပဲပေါ့” လို့ မြို့ခံတဦးက ပြောပါတယ်။

အလောင်းကို မြို့ခံပရဟိတအသင်းကားနဲ့ ကြို့ပင်ကောက် ပြည်သူ့ဆေးရုံရင်ခွဲရုံကို ပို့ဆောင်ထားတယ်လို့လည်း သိရပါတယ်။

ကြို့ပင်ကောက်မြို့ရှိ ရေနစ်သေဆုံးသူ ၃ ဦးတွင် ပန်းတင် ၂ လမ်းပန်းတင်ရပ်ကွက်က အသက် ၄ နှစ်အရွယ် မမေသက်ချိုနဲ့ မဇင်ပိုပိုချစ်တို့ ၂ ဦးဟာ မတ်လ ၅ ရက်က သူတို့ရပ်ကွက်အနီး ဆည်မြောင်းမှာ ရေနစ်သေဆုံးတာဖြစ်ပြီး မတ်လ ၁၀ ရက်က ရေနစ်သေဆုံးသူ အသက် ၄၅ နှစ်အရွယ် အမျိုးသားကတော့ မြို့လယ်ချောင်းကျေးရွာအနီးက မြို့လယ်ချောင်းမှာ ရေနစ်သေဆုံးခဲ့တာပါ။

ရက်ပေါင်း ၂၀ အတွင်း သေဆုံးသူတွေထဲမှာ အမျိုးသား ၂ ဦးနဲ့ အသက် ၄ နှစ်အရွယ် မိန်းကလေးငယ် ၂ ဦးဖြစ်တယ်လို့ ကြို့ပင်ကောက်မြို့နယ် ပရဟိတအသင်းရဲ့ ထုတ်ပြန်ချက်အရ သိရပါတယ်။

နတ်တလင်း၊ မတ် ၂၀၊ ၂၀၂၃။

ပဲခူးတိုင်း(အနောက်ခြမ်း)၊ သာယာဝတီခရိုင်၊ နတ်တလင်းမြို့မှာ မတ်လ ၁၉ ရက် မနေ့နေ့လည်ပိုင်းက ဆည်မြောင်းအတွင်း ရေဆင်းကူး ကစားရာကနေ မိသားစုဝင်အမျိုးသမီး ၃ ဦး ရေနစ်သေဆုံးခဲ့တယ်လို့ ဒေသခံတွေဆီက သိရပါတယ်။

သေဆုံးသွားသူတွေဟာ နတ်တလင်းမြို့၊ သာစည်ရပ်ကွက်၊ အောင်ရတနာလမ်းနေ အသက် ၃၅ နှစ် အရွယ် မမီမီကျော်၊ သမီးဖြစ်သူ ၁၃ နှစ်အရွယ် မယွန်းတာပိုး၊ တူမဖြစ်သူ အသက် ၁၅ နှစ်အရွယ် မရွှေရီမင်းစံတို့ဖြစ်ပြီး နတ်တလင်းမြို့နယ်နဲ့ ဇီးကုန်းမြို့နယ်အစပ် ကြခပ်ဝါးရုံရွာအနီး ရိုးမြောင်းအတွင်းမှာ ရေနစ်သေဆုံးတာလို့ ဒေသခံတဦးက မြေလတ်အသံကိုပြောပါတယ်။

“တအိမ်တည်း အတူနေကြတဲ့ အမေရယ်၊ သမီးရယ်၊ တူမရယ် ရေနစ်ကြတာပါ။ သူတို့က ဘက်ဟိုးနဲ့ တူးထားတဲ့မြောင်းထဲမှာ ရေဆင်းချိုးရင်း နစ်ကြတာ” လို့ ပြောပါတယ်။

သေဆုံးသွားသူတွေကို ဒီကနေ့ နေ့လည် ၂ နာရီခွဲမှာ နတ်တလင်းမြို့၊ အနောက်ပေါက်ပင်သုဿန်ကို ပို့ဆောင်သဂြိုလ်မယ်လို့ သိရပါတယ်။

မတ်လ ၅ ရက်နေ့က စစ်ကိုင်းမြို့မှာ ဧရာဝတီမြစ်အတွင်း ရေချိုးဆင်းတဲ့ ကိုရင် ၃ ပါး ရေနစ်သေဆုံးခဲ့သလို၊ မတ်လ ၆ ရက်နေ့ကလည်း ရေနံချောင်းမြို့၊ ဧရာဝတီမြစ်အတွင်း ဒေသအခေါ် ညောင်လှချောင်းသာမှာ ရေဆော့ကစားတဲ့ ကလေး ၄ ဦး ရေနစ်သေဆုံးခဲ့တာကြောင့် မြေလတ်ဒေသအတွင်းမှာ ယခုမတ်လအတွင်း လူ ၃ ဦးနဲ့အထက် ရေနစ်သေဆုံးမှု ၃ ကြိမ်အထိ ဖြစ်ပွားခဲ့တာ ဖြစ်ပါတယ်။

စာတည်း – ရင်ငြိမ်း