စစ်ကိုင်း၊ မေ ၂၉၊ ၂၀၂၅။

စစ်ကိုင်းတိုင်း၊ စစ်ကိုင်းမြို့နယ်၊ ကင်းကျေးရွာကို စစ်အုပ်စုက မေ ၂၇ ရက်မနက် ၁၀ နာရီကျော်မှာ ဝင်ရောက်မီးရှို့ခဲ့တာကြောင့် လူနေအိမ် ၁၈ လုံး မီးလောင်ပြာကျသွားခဲ့တယ်လို့ ဒေသခံတွေကပြောပါတယ်။

တိုက်ပွဲဖြစ်ပွားတာမရှိဘဲ အိမ်ခြေ ၂၀၀ ခန့် ရှိတဲ့ ကင်းရွာကို အင်အား ၈၀ ကျော်ရှိတဲ့ စစ်ကောင်စီတပ်ဖွဲ့ဝင်နဲ့ ပြည်သူ့စစ်တွေက မီးရှို့ခဲ့တာလို့ဆိုပါတယ်။

“စစ်ကြောင်းမှာက ပြည်သူ့စစ်တွေများတယ်ဗျ။ ဒီအတိုင်းစစ်ကြောင်းထိုးလာပြီးတော့ကို မီးရှို့သွားတာဗျ။ ပြည်သူတွေကတော့ ထွက်ပြေးတာမြန်ကြလို့ အဖမ်းခံရတာမရှိခဲ့ဘူး”လို့ မင်းကွန်းဒေသခံ အမျိုးသားတဦးကပြောပါတယ်။

လူနေအိမ်တွေကို မီးရှို့တဲ့စစ်ကြောင်းဟာ မီးရှို့ပြီးနောက် ကင်းရွာနဲ့ရွာနီးစပ် မင်းကွန်းတိုက်နယ်ကိုဝင်ရောက်ကာ အဲဒီကနေတဆင့် စစ်ကားတွေနဲ့ စစ်ကိုင်းမြို့အခြေစိုက် တပ်မ ၃၃ ကို ဝင်ရောက်သွားခဲ့ကြတယ်လို့ Wetletinformational Network မှတာဝန်ရှိသူတဦးက ပြောပါတယ်။

လူနေအိမ်တွေ မီးရှို့ခံလိုက်ရတာကြောင့် ကင်းကျေးရွာက ဒေသခံပြည်သူတွေဟာ မေ ၂၉ ရက်ဒီကနေ့အချိန်ထိ ကျေးရွာထဲကို မဝင်ရဲကြသေးပဲ ဘေးလွတ်ရာကျေးရွာတွေမှာ ခိုလှုံနေကြတယ်လို့ သိရပါတယ်။

၂ဝ၂၅ ဇန်နဝါရီလကုန်အထိ Data for Myanmar က ကောက်ယူစုစည်းထားတဲ့ အချက်အလက်တွေအရ စစ်အာဏာသိမ်း ၃ နှစ်ကျော်ကာလအတွင်း မီးရှို့ဖျက်ဆီးမှုတွေကြောင့် အရပ်သား ပြည်သူ နေအိမ်ပေါင်း ၁၁၃,၁ဝ၄ လုံး ပျက်စီးဆုံးရှုံးခဲ့ရပါတယ်။

အဲဒီထဲမှာ စစ်ကိုင်းတိုင်းက နေအိမ်ပေါင်း ၇၆,၁၀၆ လုံး ဆုံးရှုံးခဲ့ရလို့ တစ်နိုင်ငံလုံး မီးရှို့ဖျက်ဆီးခံရတဲ့ အရပ်သားနေအိမ်စုစုပေါင်းရဲ့ ၆၇ ရာခိုင်နှုန်းကျော်ရှိတယ်လို့ ဆိုပါတယ်။

စာတည်း – လင်း

ပေါက်ခေါင်း၊ မေ ၂၆၊ ၂၀၂၅။

ပဲခူးတိုင်း၊ ပေါက်ခေါင်းမြို့နယ်ထဲမှာ စစ်ကောင်စီတပ်က မေ ၂၆ ရက် ဒီမွန်းလွဲ ၁၂ နာရီကျော်မှာ စစ်ကြောင်းထိုးပြီး နေအိမ်တွေကို မီးရှို့နေတယ်လို့ဒေသခံတွေက ပြောပါတယ်။

ပေါက်ခေါင်းမြို့ပေါ်ကနေ စစ်ကား ၃ စီးနဲ့ သိုက်ချောင်းကျေးရွာကိုဝင်ရောက်လာပြီးနောက် နေ့လယ် ၁ နာရီကျော်မှာ နေအိမ်တွေကိုမီးရှို့နေတာလို့ဆိုပါတယ်။

“စကစတွေရွာထဲကနေမထွက်သေးဘူး။ မီးရှို့နေတာကို အဝေးကနေလှမ်းမြင်ရတယ်။ မီးခိုးလိပ်တွေ တော်တော်ကိုထွက်နေတာဗျ။ ရွာခံတွေကတော့ အကုန်လုံးထွက်ပြေးကြကုန်ပြီ”လို့ မြေပြင်အခြေအနေကိုသိရှိသူ အမျိုးသားတဦးက ပြောပါတယ်။

စစ်ကောင်စီတပ်က လက်နက်ကြီးတွေပစ်ခတ်ပြီး သိုက်ချောင်းကျေးရွာကို မီးရှို့နေတာကြောင့် တော်လှန်ရေးတပ်ဖွဲ့တွေဘက်ကလည်း လက်နက်ကြီးတွေနဲ့ပြန်လည်ပစ်ခတ်တိုက်ခိုက်နေတယ်လို့ သူကဆက်ပြောပါတယ်။

ပေါက်ခေါင်းဒေသခံ နောက်ထပ်အမျိုးသားတဦးကလည်း ဒီကနေ့ နေ့လယ် ၁ နာရီကျော်ကစတင်ကာ ဒီနေ့လယ် ၃ နာရီကျော်အထိ သိုက်ချောင်းကျေးရွာဘက်နေ လက်နက်ကြီးပစ်ခတ်သံ ၁၀ ကြိမ်ထက် မနည်း ကြားနေရတယ်လို့ ပြောပါတယ်။

“အကြိမ်အရေ ၁၀ ချက်လောက်ရှိပြီး။ အသံကျယ်ကျယ်က ၄ ချက်လောက်။ အတော်ကျယ်တယ်။ အသံကလေသင့်နေတော့ အတော်ကျယ်ကျယ်ကြားရတယ်”လို့ သူကဆိုပါတယ်။

သိုက်ချောင်းကျေးရွာမီးရှို့နေတာကြောင့် သိုင်းချောင်း၊ ကွမ်းအုံစု၊ အိုင်ဇောက်၊ ဗောဓိကုန်း၊ တာကောက်၊ မြှောက်ခွေး၊ ရဲချောင်းခြားစတဲ့ ကျေးရွာတွေက ဒေသခံပြည်သူတွေဟာ ဘေးလွတ်ရာကျေးရွာတွေကို ထွက်ပြေးနေကြရတယ်လို့ဆိုပါတယ်။

အိမ်ခြေ ၁၀၀ ကျော်ရှိတဲ့ သိုက်ချောင်းကျေးရွာကို ပြီးခဲ့တဲ့ဧပြီ ၃၀ ရက်ကလည်း စစ်ကောင်စီတပ်က တိုက်ပွဲမဖြစ်ဘဲ ဝင်ရောက်မီးရှို့ခဲ့ရာ လူနေအိမ် ၇ လုံးပြာကျခဲ့ပါတယ်။

အလားတူ ပြီးခဲ့တဲ့ဖေဖော်ဝါရီ ၁၉ ရက်မှာလည်း သိုင်းချောင်းကျေးရွာအနီးမှာ စစ်ကောင်စီတပ်နဲ့ တော်လှန်ရေးတပ်ဖွဲ့တွေထိတွေ့တိုက်ပွဲဖြစ်ခဲ့ပြီး ၂၃ ရက်မှာတော့ သိုက်ချောင်း ရွာကိုမီးဝင်ရှို့ခဲ့ရာ လူနေအိမ် ၆ လုံးမီးလောင်ကျွမ်းခဲ့တယ်လို့ဒေသခံတွေဆီကသိရပါတယ်။

စာတည်း – လင်း