ဘုရားကျောင်း

စစ်ကိုင်း၊ ဒီဇင်ဘာ ၁၅၊ ၂၀၂၂။

စစ်ကိုင်းတိုင်း၊ ရေဦးမြို့နယ်၊ ချမ်းသာရွာမှာရှိတဲ့ ဘုရင်ဂျီဘုရားကျောင်းနဲ့ ခရစ်ယာန်သီလှရှင်ကျောင်းကိုဖျက်စီးကာ ရွာကိုလည်း ရွာလုံးကျွတ် မီးရှို့သွားပြီး ပြည်သူတဦးလည်း သတ်ဖြတ်ခံခဲ့ရတယ်လို့ ဒေသခံတွေက တဆင့် သိရပါတယ်။

ဒီဇင်ဘာ ၁၄ရက် မနေ့က ညနေ ၄နာရီဝန်းကျင်က တတိယအကြိမ်မြောက် မီးရှို့ခံရတာဖြစ်ပြီး အိမ်ခြေ ၅၀၀ကျော်ရှိတဲ့ရွာကြီးက ၁၀အိမ်လောက်ပဲကျန်တော့ကာ အိမ်ကြီးအိမ်ကောင်းမှန်သမျှရွေးရှို့ခံလိုက်ရတာဖြစ်တယ်လို့ ဆိုပါတယ်။

“အကိုတို့အိမ်ဆို ၂ကြိမ်မြောက်ရှို့ခံရတာပေါ့၊ ဒုတိယအကြိမ်တလုံးပါတယ်၊ ခုတတိယအကြိမ် ထပ်ဆောက်ထားတဲ့အိမ်တလုံးပါသွားတယ်၊ အိမ်တောင်မှအပြီးမဆောက်ရသေးဘူး၊ ကျောင်းကြီးကတော့ မီးလောင်တဲ့ထဲမပါပေမယ့် အပျက်စီးများတယ်၊ ဘုရားရှိခိုးကျောင်းဆောင်ကြီးထဲမှာလည်း သောက်စားပြီး‌တော့ ဖျက်ဆီးသွားတာတွေရှိတယ်၊ မယ်သီလှကျောင်းထဲမှာလည်း ဖျက်ဆီးထားတာတွေရှိတယ်၊ အိမ်ဆိုလည်း လေး၊ငါး၊ဆယ်လုံးလောက်ပဲကျန်တော့တယ်”လို့ ချမ်းသာရွာသားတဦးက ပြောပါတယ်။

စစ်ကောင်စီတပ်တွေဟာ ဒီဇင်ဘာ၁၄ရက် တရက်တည်း ကုန်းသာ၊ ချမ်းသာ၊ ရွာသစ်ရွာတွေကို ရွာလုံးကျွတ်မီးရှို့ရုံသာမက ချမ်းသာရွာရဲ့ ဗုဒ္ဓဘာသာပိုင်းဖြစ်တဲ့ အိုးသယ်ခွက်အပိုင်းက ဗုဒ္ဓဘာသာဝင်အမျိုးသားတဦးကိုလည်း ခေါင်းဖြတ်သတ်သွားတယ်လို့ ဆိုပါတယ်။

ချမ်းသာရွာဟာ မေလ ၇ရက်က ပထမဆုံးအကြိမ်မီးရှို့ခံခဲ့ရပြီး အိမ် ၂၄လုံး ပျက်စီးခဲ့ကာ၊ ဇွန်လ ၇ရက်က ဒုတိယအကြိမ်အဖြစ် ၁၁၁လုံး မီးလောင်ခဲ့ပြီး၊ ခုတတိယအကြိမ်မှာတော့ ရွာလုံးကျွတ်ပါသွားတာဖြစ်တယ်လို့ သူကပြောပါတယ်။

ချမ်းသာရွာဟာ ပေါ်တူဂီနွယ်ဖွား ခရစ်ယာန်ဘာသာဝင်တွေနဲ့ ဗုဒ္ဓဘာသာဝင်တွေယှဉ်တွဲနေထိုင်တဲ့ရွာကြီးဖြစ်ကာ ရွာလူဦးရေရဲ့ သုံးပုံတပုံခန့်ကသာ ဗုဒ္ဓဘာသာဝင်တွေဖြစ်တယ်လို့ ဆိုပါတယ်။

အခုလက်ရှိ စစ်ကောင်စီအဖွဲ့တွေ ရွာထဲက ထွက်သွားကြပေမယ့် လေကြောင်းသတင်းလည်းကြားနေရလို့ ပြည်သူတွေကတော့ ဆက်လက်ရှောင်တိမ်းနေဆဲဖြစ်ကာ အဆိုပါစစ်ကြောင်းက ဒီပဲယင်းက ရွာ ၁၉ရွာကို မီးရှို့ခဲ့တဲ့ စစ်ကြောင်းဖြစ်တယ်လို့လည်း သိရပါတယ်။

ချမ်းသာရွာကို စစ်ကောင်စီက တတိယအကြိမ်ဝင်မရှို့ခင် ပြီးခဲ့တဲ့အခေါက်တွေမှာ အဲ့ဒီရွာက ပေါ်တူဂီမျိုးနွယ်ဝင်တွေကို ရွာထဲကအပြီးတိုင်ထွက်သွားဖို့နဲ့ ထွက်မသွားရင်လူမျိုးသုန်းသတ်ပစ်မယ်ဆိုပြီး ရွာထဲက အိမ်နံရံအချို့မှာ စာရေးသားပြီးခြိမ်းခြောက်ခဲ့ပါသေးတယ်။

ပဲခူး၊ မေ ၄၊ ၂၀၂၂။

ပဲခူးတိုင်း ပြည်မြို့နယ်မှာ မနေ့က မနက်ပိုင်း သင်းအုပ်ဆရာတဦးနဲ့ လူငယ်တဦး ပျောက်ဆုံးနေပြီး ညဘက်မှာလည်း ဘုရားကျောင်း ၂ကျောင်းကို စစ်ကောင်စီက ဝင်ရှာဖွေတာမျိုးတွေ ရှိခဲ့တယ်လို့ ဒေသခံတဦးဆီက သိရပါတယ်။

မေလ ၃ရက်မနေ့က မနက်ပိုင်း ပြည်မြို့နယ် ဝက်ထီးကန်မြို့ ကျောက်ကွင်းဘုရားကျောင်းက သင်းအုပ်ဆရာနဲ့အတူ လူငယ်တဦးဟာ ပြည်မြို့ကို စျေးလာဝယ်ချိန်မှာ အဆက်အသွယ်ပြတ်သွားခဲ့တယ်လို့ သင်းအုပ်ဆရာရဲ့ မိတ်ဆွေတဦးက ပြောပါတယ်။

” ကျောက်ကွင်းဘုရားကျောင်းကို ဝင်ရှာတော့ တံခါးတွေကို ရိုက်ဖျက်တယ်လို့ သိရတယ်၊ ပြည်မြို့က ဘုရားကျောင်းကိုကတော့ ဒီတိုင်းပဲ လူဝင်ရှာသွားတာပါ၊ ဖမ်းသွားတာမျိုးတော့ မရှိဘူး” လို့ သင်းအုပ်ဆရာရဲ့ မိတ်ဆွေက ပြောပါတယ်။

ပြည်မြို့ ခေတ္တရာ မြို့သစ် ၁၃လမ်း ၄ကွက်က ခေတ္တရာ မြန်မာနှစ်ခြင်းဘုရားကျောင်းနဲ့ ဝက်ထီးကန်မြို့က ကျောက်ကွင်းရွာက နှစ်ခြင်းဘုရားကျောင်းတွေကို စစ်ကောင်စီက မနေ့ကည ၁၀ နာရီနောက်ပိုင်းမှာ ဝင်ရောက်ရှာဖွေတာတွေ လုပ်ခဲ့တယ်လို့ ဆိုပါတယ်။

ပြီးခဲ့တဲ့ လဝက်လောက်ကတည်းက ပြည်မြို့မှာ စစ်ကောင်စီက PDF ကိုထောက်ပံ့တယ်ဆိုတဲ့ အကြောင်းပြချက်နဲ့ ဖမ်းဆီးတာတွေ ဆက်တိုက်လုပ်နေတယ်လို့ ပြည်မြို့ခံတဦးက ပြောပါတယ်။

” အိမ်တွေကိုဝင်ဖမ်းရင် စစ်ကားရဲကားတွေကိုအသုံးပြုပြီးဝင်ဖမ်းတယ်၊ လမ်းတွေပေါ်မှာ ဖမ်းဆီးရင် အရပ်ဝတ်နဲ့ဝင်ဖမ်းတယ်” လို့ ဒေသခံတဦးက ပြောပါတယ်။

ပြီးခဲ့တဲ့ ၁၀ရက်တာ အတွင်း ပြည်မြို့မှာ ၁၀ ဦးထက်မနည်းကို မနက်ပိုင်းတွေမှာ အရပ်ဝတ်တွေနဲ့ ဖမ်းဆီးတာတွေရှိနေပြီး ညဖက်တွေမှာလည်း ဝင်ဖမ်းတာတွေ ရှိနေတာကြောင့် ပျောက်ဆုံးနေသူတွေလည်း ရှိနေတယ်လို့သိရပါတယ်။