အုတ်တွင်း၊ နိုဝင်ဘာ ၂၁၊ ၂၀၂၅။

ပဲခူးတိုင်း၊ အုတ်တွင်းမြို့နယ်၊ သရက်တောကျေးရွာမှာ ဒရုန်းနဲ့ဗုံးကြဲခံရတာကြောင့် မိန်းကလေးငယ် ၁ ဦးသေဆုံးပြီး ၂ ဦးဒဏ်ရာရခဲ့တယ်လို့ ကျေးရွာနဲ့နီးစပ်သူတွေဆီက သိရပါတယ်။

နိုဝင်ဘာလ ၂၁ ရက်ဒီမနက် မနက် ၉ နာရီ ၄၀ မိနစ်မှာ ဒရုန်းတစီးပေါ်ကနေ ဗုံးသီး ၁ လုံးကြဲချခဲ့ရာက နေအိမ်ပေါ်ကျပြီး အိမ်ထဲမှာရှိနေသူတွေ ထိခိုက်သေဆုံးခဲ့တာလို့ ဆိုပါတယ်။

“မင်္ဂလာဆောင်အိမ်ကို ဗုံးလာကြဲတာ။ ဘေးအိမ်ကလူတွေထိခိုက်ကုန်တာ”လို့ ကျေးရွာနဲ့ နီးစပ်သူတဦးက ပြောပါတယ်။

ဒရုန်းဗုံးပေါက်ကွဲစတွေထိမှန်လို့ အသက် ၁၆ နှစ်အရွယ် မချမ်းမီမီအောင်သေဆုံးပြီး အသက် ၁၀ နှစ်အရွယ် မယွန်းမီမီအောင် ရဲ့ မျက်နှာ၊ ကျော နဲ့ ခြေလက်တွေ ဒဏ်ရာရခဲ့ပြီး မယွန်းမီမီဇော်ရဲ့ ကျော၊ ပေါင်နဲ့ ခြေလက် ဒဏ်ရာရရှိခဲ့ကာ နေအိမ်လည်းပျက်စီးခဲ့တယ်လို့ ဆိုပါတယ်။

ထိခိုက်သေဆုံးသူတွေဟာ ညီမအရင်းတွေဖြစ်ပြီး ဒဏ်ရာရရှိသူကလေးငယ် ၂ ဦးကတော့ အမွှာ ညီအစ်မတွေ ဖြစ်တယ်လို့ သိရပါတယ်။

ဒီဗုံးကြဲမှုကို စစ်ကော်မရှင်ကလုပ်ဆောင်ခဲ့တယ်လို့ဆိုပေမယ့် မြေလတ်အသံကသီးခြားအတည်မပြုနိုင်သေးပါဘူး။

နိုဝင်ဘာ ၆ ရက်ကလည်း ဖြူးမြို့နယ်၊ မန်ကျည်းကုန်းတောင်ကျေးရွာက စစ်ကော်မရှင်ဘက်က ဂျိုင်ရိုကော်ပတာနဲ့ဗုံးကြဲခဲ့ရာ ပြည်သူ ၁ ဦးသေဆုံးပြီး နေအိမ် ၆ လုံးပျက်စီးခဲ့သေးတယ်လို့ သိရပါတယ်။

စာတည်း – လင်း

မြေလတ်အသံ၊ နိုဝင်ဘာ ၁၉၊ ၂၀၂၅။

မကွေးတိုင်း၊ ဂန့်ဂေါမြို့နယ်၊ တောင်ခင်ရန်းကျေးရွာကို စစ်ကော်မရှင်တပ်က လေကြောင်းကနေ ဗုံးကြဲတိုက်ခိုက်ခဲ့လို့ အမျိုးသား ၁ ဦးသေဆုံးပြီး ၇ ဦးဒဏ်ရာရရှိခဲ့တယ်လို့ ဒေသခံတွေကပြောပါတယ်။

အိမ်ခြေ ၅၀၀ ခန့်ရှိတဲ့ တောင်ခင်ရန်းရွာထဲကို နိုဝင်ဘာ ၁၈ ရက် ည ၉ နာရီကျော်မှာ တိုက်လေယာဥ် ၁ စီးနဲ့ ဗုံး ၂ လုံး ကြဲချခဲ့တာဖြစ်ပြီး ကျေးရွာတွင်းနေအိမ်တွေကို ကျရောက်ပေါက်ကွဲခဲ့တယ်လို့ ဆိုပါ တယ်။

” ဒဏ်ရာရ၊ သေဆုံးသူတွေက မိသားစုဝင်တွေ။ မိသားစုက ၂ စုထက်မနည်းဘူး၊ ထိခိုက်တာ” လို့ မြေပြင်အခြေအနေကိုသိရှိသူ ဒေသခံအမျိုးသားတဦးက ပြောပါတယ်။

နေအိမ်တွေပေါ်ဗုံးကျရောက်ပေါက်ကွဲတာကြောင့် တောင်ခင်ရန်းရွာခံ အသက် ၃၀ နှစ်ခန့်ရှိ ဦးနိုင်ထွန်း သေဆုံးခဲ့ပြီး ၎င်းရဲ့မိသားစုဝင်တချို့အပါအဝင် အမျိုးသား ၅ ဦးနဲ့ အမျိုးသမီး ၂ ဦး စုစုပေါင်း ၇ ဦး ဒဏ်ရာရှိခဲ့တဲ့အပြင် နေအိမ် ၂ လုံးထက်မနည်းပျက်စီးခဲ့တယ်လို့ သိရပါတယ်။

တောင်ခင်ရန်းကျေးရွာဟာ ပျူစောထီးနဲ့ စစ်ကော်မရှင်တပ်စခန်းအထိုင်ချတပ်စွဲထားတဲ့ မြောက်ခင်ရန်း ကျေးရွာနဲ့ ၁ မိုင်ကျော်ကွာဝေးပြီး လတ်တလောမှာ တိုက်ပွဲဖြစ်ပွားတာမရှိဘဲ အခုလိုဗုံးကြဲတိုက်ခိုက်ခဲ့တာလို့ အထက်ပါအမျိုးသားက ပြောပါတယ်။

နိုဝင်ဘာ ၁၇ ရက် မနက်ပိုင်းက ဂန့်ဂေါမြို့နယ်၊ စန်းမြို့ရွာအနီးကို တိုက်လေယာဥ် ၁ စီးနဲ့ ဗုံးသီး ၂ လုံးကြဲချတိုက်ခိုက်ခဲ့ပြီး အဲ့ဒီတိုက်ခိုက်မှုမှာ လူနဲ့နေအိမ်တွေထိခိုက်တာမရှိခဲ့ဘူးလို့ သိရပါတယ်။

စာတည်း – ဟိန်းစံ

မြေလတ်အသံ၊ နိုဝင်ဘာ ၁၉၊ ၂၀၂၅။

အမျိုးသားညီညွှတ်ရေးအစိုးရ(NUG)လက်အောက် ပြည်သူ့ကာကွယ်ရေးတပ်တွေထိန်းချုပ်ထားတဲ့ စစ်ကိုင်းတိုင်း၊ ဗန်းမောက်မြို့နဲ့ ကနီမြို့နယ်ကို စစ်ကော်မရှင်တပ်က လေကြောင်းကနေ ဗုံးကြဲတိုက်ခိုက်ခဲ့တာကြောင့် အရပ်သား ၃ ဦး သေဆုံးခဲ့တယ်လို့ ဒေသခံတွေက ပြောပါတယ်။

ယမန်နေ့နိုဝင်ဘာ ၁၈ ရက်ညနေ ၄ နာရီကျော်မှာ ဗန်းမောက်မြို့နယ်တောင်ပိုင်းရှိတိုက်နယ်ဆေးရုံနဲ့ အချုပ်ခန်းနေရာတွေကို စစ်ကော်မရှင်တပ်ကတိုက်လေယာဥ်နဲ့ ဗုံးသီး ၁ လုံးစီ ကြဲချခဲ့တာကြောင့် ကျန်းမာရေးဝန်ထမ်းအမျိုးသမီး ၁ ဦးနဲ့ အမျိုးသား ၁ ဦးတို့ သေဆုံးခဲ့တာလို့ဆိုပါတယ်။

” ဆေးရုံကိုအရင်ချတာ။ ပြီးမှအချုပ်ခန်းချတာ။ ဆေးရုံက ၂ယောက်သေတယ်လို့ပဲသိရတယ်။ ကျန်တဲ့ အသေးစိတ်တွေကိုတော့မသိရဗျ။ ထိခိုက်မှုတွေများနိုင်တယ်ဗျ။ ဒီနေရာတွေက လူများတဲ့နေရာတွေလေ”လို့ ဗန်းမောက်ဒေသခံတော်လှန်ရေးတပ်ဖွဲ့ဝင်တဦးက မြေလတ်အသံကို ပြောပါတယ်။

ဗုံးကြဲခံရတဲ့ ဆေးရုံဟာ အမျိုးသားညီညွတ်ရေးအစိုးရ – NUG ရဲ့ထိန်းချုပ်မှုအောက်မှာလည်ပတ်နေတဲ့ တိုက်နယ်ဆေးရုံဖြစ်ပြီး ဖြစ်စဥ်နဲ့ပတ်သက်လို့ ဗန်းမောက်မြို့နယ် ပကဖ၊ ပအဖ၊ ပလဖ အဖွဲ့အစည်းတွေက သတင်းထုတ်ပြန်တာမရှိသေးပါဘူး။

အလားတူ နိုဝင်ဘာ ၁၈ ရက် ညနေ ၃နာရီကျော်မှာ ကနီမြို့နယ်၊ မင်းအိုကျေးရွာအနီး ယာခင်းတွေထဲကို စစ်တပ်တိုက်လေယာဥ် ၂ စီးက ဗုံး ၂ လုံးကြဲချခဲ့တာကြောင့် ယာခင်းထဲမှာရှိနေတဲ့ အမျိုးသမီး ၁ ဦးသေဆုံးပြီး ၂ ဦး ဒဏ်ရာရရှိခဲ့တယ်လို့ သိရပါတယ်။

” ကြဲတဲ့နေရာက PDF စခန်းဟောင်းနေရာလို့ပြောတယ်။ အရင်ကစခန်းချခဲ့တာပေါ့။ အခု မနေတော့ဘူး။ အဲ့နားမှာနှမ်းရိတ်နေကြတဲ့ သားအမိနှစ်ယောက်ထိတယ်။ သမီးဖြစ်သူ သေတယ်။ နောက်ထပ်ထိတဲ့ ယောကျာ်းတယောက်ကတော့ ဘယ်သူလည်းဆိုတာမသိရဘူး” လို့ ကနီဒေသခံအမျိုးသားတဦးက ပြောပါတယ်။

ဗုံးကြဲခံရတာကြောင့် အသက် ၃၀ ဝန်းကျင်ရှိ အမျိုးသမီး ၁ ဦး သေဆုံးခဲ့ပြီး ၎င်းရဲ့မိခင် အသက် ၆၁ နှစ်ရှိ အမျိုးသမီး ၁ ဦးနဲ့ အသက် ၂၃ ဝန်းကျင်ရှိ အမျိုး သား ၁ ဦး ဒဏ်ရာရရှိခဲ့တယ်လို့ ဆိုပါတယ်။

ပြီးခဲ့တဲ့နိုဝင်ဘာ ၁၁ ရက်ကလည်း ကနီမြို့နယ်၊ ဝင်းမနားကျေးရွာရှိ တိုက်နယ်ဆေးရုံကို စစ်ကော်မရှင်တပ်က ဗုံးကြဲတိုက်ခိုက်ခဲ့တာကြောင့် ဆေးကုသမှုခံယူနေကြတဲ့ ​ပြည်သူ ၈ ဦးသေဆုံးပြီး ၅၀ ကျော် ဒဏ်ရာရရှိခဲ့တယ်လို့သိရပါတယ်။

စာတည်း – ဟိန်းစံ

မြေလတ်အသံ၊ နိုဝင်ဘာ ၁၅၊ ၂၀၂၅။

စစ်ကိုင်းတိုင်း၊ ကလေးမြို့နယ်တောင်ပိုင်းနဲ့ မကွေးတိုင်း၊ မြိုင်မြို့နယ်တို့ကို စစ်ကော်မရှင်တပ်က နိုဝင်ဘာ ၁၃ ရက်နဲ့ ၁၄ ရက်မှာ ဗုံးကြဲတိုက်ခိုက်ခဲ့တယ်လို့ ဒေသခံတွေဆီက သိရပါတယ်။

ဒေသခံကာကွယ်ရေးတပ်တွေနဲ့ စစ်ကော်မရှင်တပ်တို့တိုက်ပွဲတွေဖြစ်နေတဲ့ စစ်ကိုင်းတိုင်း၊ ကလေးမြို့နယ်တောင်ပိုင်းရှိ ကမ်းပါးနီစစ်စခန်းအနီးတဝိုက်ကို နိုဝင်ဘာ ၁၄ ရက်နေ့လယ် ၂ နာရီဝန်းကျင်မှာ ဂျက်ဖိုက်တာ ၂ စီးနဲ့ ဗုံး ၂ လုံး Y12 နဲ့ ဗုံးအလုံးရေ ၃၀ ကျော်ကြဲချခဲ့ပြီး ထိခိုက်မှုကိုတော့ အတည်မပြုနိုင်သေးဘူးလို့ ဒေသခံတဦးက ပြောပါတယ်။

ကလေးမြို့နယ်တောင်ပိုင်းကကျေးရွာတွေကို စစ်ကော်မရှင်တပ်က အင်အားထောင်ကျော်နဲ့ စက်တင်ဘာ ၂၇ ရက်ကစတင်ဝင်ရောက်ကာ တပ်ဖြန့်စစ်ကြောင်းထိုးနေခဲ့ပြီး စစ်ကြောင်း ဝင်ရောက်ချိန်ကစလို့ နေ့စဉ်နီးပါတိုက်ပွဲသံတွေလဲကြားနေရတယ်လို့ ဆိုပါတယ်။

ပြီးခဲ့တဲ့ နိုဝင်ဘာ ၁ ရက်နဲ့ ၂ ရက်မှာလည်း အဆိုပါစစ်ကော်မရှင်တပ်က နတ်ချောင်းရွာက အသက် ၅၀ ကျော်အရွယ် အမျိုးသာ ၁ ဦးနဲ့အမျိုးသမီး ၂ ဦးအပါ ၄ ဦးကိုသတ်ဖြတ်ခဲ့ပြီး နိုဝင်ဘာ ၁၁ ရက်မှာလည်း ဒေသခံကာကွယ်ရေးတပ်တွေနဲ့ တိုက်ပွဲဖြစ်ပြီး လက်နက်ကြီးနဲ့ပစ်လို့ နတ်မြောင်းရွာကနေအိမ် ၂ လုံး မီးလောင်ပျက်စီးခဲ့ပါသေးတယ်။

“တချို့က ဝက်စာကျွေး၊ ပစ္စည်းယူသွားကြတာ။ တလရ တပ်ဖွဲ့တွေကတားတယ်။ မရဘူး။ အခု တောင်ပိုင်းလည်း လက်လှမ်းမှီသလောက် လေးလောင်းတွေ့ထားပါတယ်။ သက်ကြီးပိုင်း ၅၀၊ ၆၀ ကြား နှစ်ယောက်ကို နတ်ချောင်းမှာသတ်ပီး ရေမြောင်းထဲ ပစ်ချထားတာ။”လို့ စစ်ရေးအခြေအနေကို သိရှိသူတဦးက ပြောပါတယ်။

စစ်ကြောင်းဝင်ရောက်လာစဉ်ကနေ နေ့စဥ်နီးပါးတိုက်ပွဲဖြစ်နေပြီး စစ်ကော်မရှင်တပ်ဖွဲ့ဝင် အများအပြားသေဆုံးကာ ကလေးမြို့နယ်ဆေးရုံမှာလည်း ထိခိုက်ဒဏ်ရာရသူတွေနဲ့ ပြည့်နေပြီး အရှင်ဖမ်းမိထားသူတွေလည်းရှိကာ ဒေသတွင်းကာကွယ်ရေးတပ်ဖွဲ့ဝင်တွေဘက်ကလည်း သေဆုံးနဲ့ထိခိုက်တွေရှိတယ်လို့ ဆိုပါတယ်။

ကလေးမြို့နယ်မြောက်ပိုင်းကို ပြီးခဲ့တဲ့ စက်တင်ဘာလ ပထမအပတ်ကတည်းက ဝင်ရောက်နေတဲ့ စစ်ကြောင်းတွေဟာ စက်တင်ဘာ ၂၇ ရက်ကစတင်ကာ ကလေးမြို့နယ်တောင်ပိုင်းကို ဝင်ရောက်ခဲ့လို့ ကလေးမြို့နယ်မှာ စုစုပေါင်း ပြည်သူတသိန်းနီးပါး စစ်ရှောင်တိမ်းနေကြရတာတယ်လို့ စစ်ရှောင်ကူညီနေသူတွေဆီက သိရပါတယ်။

အလားတူ နိုဝင်ဘာ ၁၃ ရက်ည ၈ နာရီဝန်းကျင်မှာ မြိုင်စက်မှု ၂ အနီးရှိ ကုန်းရွာထဲကို ပါရာမော်တာ ၂ စီးနဲ့ ဗုံး ၂ လုံး၊ နိုဝင်ဘာ ၁၄ ရက် နေ့လယ် ၁၂ နာရီခန့်မှာ ကုန်းရွာအနီးတဝိုက်ကို ဗုံး ၄ လုံးကြဲချခဲ့တဲ့အပြင် နေ့လယ် ၃ နာရီဝန်းကျင်မှာလည်း မြိုင်မြို့နယ်အနောက်တောင်ဘက်၊ ဝယ်တောင်(မြောက်)ရွာ အနီးတဝိုက်ကို ဂျက်ဖိုက်တာပေါ်ကနေ စက်သေနတ်တွေပစ်ခတ်ခဲ့တာပါ။

“မြိုင်စက်မှု ပတ်ဝန်းကျင်တွေကိုကြဲသွားတာပါ။ ပါရာမော်တာနှစ်စီးနဲ့ လေးကြိမ်ကြဲသွားတာပါ။” လို့ အညာမြေတပ်ပေါင်းစုရဲ့ပြန်ကြားရေးတာဝန်ခံ ကိုဘိုဘိုသန့်ဇင်က ပြောပါတယ်။

ဒီဗုံးကြဲပစ်ခတ်ခဲ့တဲ့နေရာတွေဟာ ရွာအပြင်ဘက်နေရာတွေဖြစ်တာကြောင့် ထိခိုက်ပျက်စီးမှုတွေ မရှိခဲ့ဘဲ စစ်ကြောင်းရောက်ရှိနေတဲ့အတွက်ကြောင့် ခုလိုဗုံးဆက်တိုက်ကြဲတာဖြစ်နိုင်တယ်လို့ သူကဆက်ပြောပါတယ်။

မြိုင်မြို့နယ်အတွင်း စစ်ကော်မရှင်တပ်ရဲ့လေကြောင်းတိုက်ခိုက်မှုတွေကမကြာခဏရှိနေပြီး နိုဝင်ဘာလထဲမှာတော့ စစ်ကြောင်းကြောင့် နေ့ရောညပါ ဗုံးကြဲချလာနေတယ်လို့ သိရပါတယ်။

“ကျနော်တို့နယ်တွေမှာ လေကြောင်းက တလျှောက်လုံးကြဲနေတာပါ အခုနောက်ပိုင်းဂျက်ဖိုက်တာတွေနဲ့ မကြဲတော့ပဲ ပါရာမော်တာတွေ ဂျိုင်ရိုကော်ပတာတွေ နဲ့အဓိက ကြဲနေတာပါ “လို့ ကိုဘိုဘိုသန့်ဇင်က ပြောပါတယ်။

နိုဝင်ဘာ ၁၅ ရက်ဒီနေ့လယ် ၁၂ နာရီခွဲဝန်းကျင်းမှာလည်း မြိုင်စက်မှု ၂ ထဲက စစ်ကော်မရှင်တပ်ဖွဲ့ဝင်တွေအတွက် Y8 နဲ့ ရိက္ခာတွေလာချနေတယ်လို့ ကိုဘိုဘိုသန့်ဇင်က ပြောပါတယ်။

အောက်တိုဘာတတိယပတ်လောက်ကစလို့ မြိုင်မြို့နယ်အတွင်း စစ်ကြောင်းထိုးမီးရှို့ပြီး ဒေသခံတွေကို ဖမ်းဆီးသတ်ဖြတ်ခဲ့တဲ့ အင်အား ၂၀၀ ခန့်ပါစစ်ကြောင်းဟာ နိုဝင်ဘာ ၁၅ ရက် ဒီကနေ့အထိ မြိုင် စက်မှု ၂ ထဲမှာတပ်စွဲနေထိုင်နေတာလည်း ဖြစ်ပါတယ်။

စာတည်း – လင်း

◼ ဗုံးကြဲပြီးပြန်သွားတဲ့ ဂျိုင်ရိုကော်ပတာ လမ်းမှာပျက်ကျလို့ စစ်သား ၂ ဦးသေဆုံး

ဖြူး၊ နိုဝင်ဘာ ၈၊ ၂၀၂၅။

ပဲခူးတိုင်း၊ ဖြူးမြို့နယ်၊ တံခွန်တိုင်ရွာနဲ့ အုတ်ဖြတ်တံတားအနီးမှာ စစ်ကော်မရှင်တပ်ရဲ့ ဂျိုင်ရိုကော်ပတာ ၁ စီးပျက်ကျပြီး စီးနင်းလာသူ ၂ ဦးသေဆုံးခဲ့တယ်လို့ ပဲခူးတိုင်းစစ်ဌာနတာဝန်ရှိသူဆီက သိရပါတယ်။

ပျက်ကျတဲ့ဂျိုင်ရိုကော်ပတာ အပါအဝင် ၂ စီးဟာ နိုဝင်ဘာ ၆ ရက်နေ့လယ် ၁ နာရီခွဲဝန်းကျင်မှာ ဖြူးမြို့နယ်၊ မကျီးကုန်းတောင်ရွာကို ဗုံးကြဲပြီးပြန်လာချိန် ၁ စီးကပျက်ကျခဲ့တာလို့ ဆိုပါတယ်။

“အင်အား ၃၀ နဲ့ ချက်ချင်းရောက်လာပြီးအားလုံးပြန်ကောက်သွားတယ်။ အတို ၂ လက် အလောင်း ၂ လောင်းပါတယ်လို့ စကစ ထဲက သတင်းပြန်ရသလို ပြည်သူတွေသတင်းပေးပို့မှုလည်း ရရှိပါတယ်။”လို့ ပဲခူးတိုင်းစစ်ဌာန တာဝန်ရှိသူက ဆက်ပြောပါတယ်။

အဆိုပါ ဂျိုင်ရိုကော်ပတာ ၂ စီးဟာ မကျီးကုန်းတောင်ရွာကိုဗုံးကြဲချိန် နေအိမ်မှာရှိနေတဲ့ အသက် ၅၅ နှစ်အရွယ် ဦးမောင်ငယ်ဆိုသူမှာ ဗုံးစမှန်ဗိုက်ပွင့်ထွက်ဒဏ်ရာနဲ့ နေရာတင်သေဆုံးပြီး နေအိမ် ၆ လုံးပျက်စီးခဲ့တယ်လို့ ဆိုပါတယ်။

“စစ်ရေးအအခြေအနေက ဘာမှမရှိပါဘူး။ ရည်ရွယ်ချက်ရှိရှိနဲ့ ပြည်သူတွေကို အကြမ်းဖက်သတ်ဖြတ် အကြောက်တရားရိုက်သွင်းတဲ့အာဏာရှင်စစ်တပ်လုပ်ရပ်တွေ လာလုပ်နေတာပါပဲ။ လက်နက်ကြီး ဒရုန်းကတော့ မကြာမကြာ ရွာတွေထဲပစ်ထည့်နေကြပါ”လို့ ပဲခူးတိုင်းစစ်ဌာန တာဝန်ရှိသူတဦးက ပြောပါတယ်။

ပျက်ကျခဲ့တဲ့နေရာဟာ အုတ်ဖြတ်တံတားရှိ စစ်ကော်မရှင်ဂိတ်နဲ့နီးတာကြောင့် အပျက်အစီး အခြေအနေကို မှတ်တမ်းမယူနိုင်ခဲ့ဘဲ သေဆုံးသွားတဲ့ စစ်ကော်မရှင်တပ်သားအလောင်းတွေကိုတော့ တောင်ငူမြို့ဘက်ကိုသယ်ဆောင်သွားပြီး သင်္ဂြိုဟ်မယ်လို့ သိရကြောင်း သူကဆက်ပြောပါတယ်။

ပြီးခဲ့တဲ့ အောက်တိုဘာ ၁၉ ရက်မနက် ၁၀ နာရီခန့်မှာလည်း ပဲခူးတိုင်း၊ လက်ပံတန်းမြို့နယ်၊ သရက်ချောင်းရွာအနီးမှာ စစ်ကော်မရှင်တပ်တွေအသုံးပြုတဲ့ တန်ဖိုးမြင့်ဒရုန်း ၁ စီးပျက်ကျခဲ့တဲ့ ဖြစ်စဥ်ရှိခဲ့ပါသေးတယ်။

စာတည်း – လင်း

စဥ့်ကူး၊‌ နိုဝင်ဘာ ၇၊ ၂၀၂၅။

မန္တလေးတိုင်း၊ စဉ့်ကူးမြို့နယ်မှာ စစ်ဘေးရှောင်တွေခိုလှုံနေကြတဲ့ စာသင်ကျောင်းနဲ့ နောက်ကျေးရွာတရွာတို့ကို စစ်ကော်မရှင်တပ်က နိုဝင်ဘာ ၇ ရက် မွန်းလွဲပိုင်းအချိန်က ဗုံးကြဲတိုက်ခိုက်ခဲ့တာကြောင့် ၄ ဦး သေဆုံးခဲ့တယ်လို့ စဉ့်ကူးမြို့နယ်ပကဖထံက သိရပါတယ်။

နိုဝင်ဘာ ၇ ရက်နေ့ ဒီနေ့ မွန်းလွဲ ၁၂ နာရီမှာ ရွှေပြည်ရွာရှိ စစ်ရှောင်​ပြည်သူ ၁၀၀ ဦးကျော်နေထိုင်တဲ့ အ.ထ.ကစာသင်ကျောင်းအတွင်းကို စစ်ကော်မရှင်က တိုက်ခိုက်ရေးလေယာဥ် ၁စီးနဲ့ ဗုံး ၂ လုံးကြဲချခဲ့တယ်လို့ သိရပါတယ်။

ဗုံးကြဲခံရမှုမှာ သက်ကြီးပိုင်းစစ်ရှောင်အမျိုးသား ၁ ဦးနဲ့ အမျိုးသမီး ၂ ဦးတို့သေဆုံးကာ ဒဏ်ရာရရှိသူများပြားခဲ့တယ်လို့ ဆိုပါတယ်။

“AS(Airstrike)လုပ်တဲ့ နေရာတွေက မတ္တရာကနေ စစ်ရှောင်လာတဲ့ သက်ကြီးရွယ်အို၊ ကလေးသူငယ်တွေ ရှိတဲ့နေရာတွေကို ပစ်သွားတာပါ။ ထိခိုက်ဒါဏ်ရာရတွေထဲမှာ ကလေး သူငယ်တွေပါတယ်”လို့ စဉ့်ကူးမြို့နယ်ပကဖတာဝန်ရှိသူတဦးက ပြောပါတယ်။

အလားတူ ရွှေပြည်ကျေးရွာရဲ့ အနောက်ဘက်က ညောင်ကုန်းကျေးရွာကိုလည်း နေ့လည် ၁ နာရီကျော်မှာတိုက်ခိုက်ရေးလေယာဥ် ၁ စီးနဲ့ ဗုံးသီး ၃ လုံးကြဲချတိုက်ခိုက်ခဲ့ရာ စစ်ရှောင်အမျိုးသမီး ၁ ဦး သေဆုံးပြီး အမျိုးသား ၅ ဦးဒဏ်ရာရရှိကာ လူနေအိမ် ၁ လုံးပါပျက်စီးခဲ့တယ်လို့ သူကဆိုပါတယ်။

​ဗုံးကြဲတိုက်ခိုက်ခံရတဲ့ ရွှေပြည်နဲ့ ညောင်ကုန်းကျေးရွာတို့ဟာ မန္တလေး-မတ္တရာ-မိုးကုတ်ကားလမ်းမပေါ်မှာတည်ရှိပြီး ယခင်ကစစ်တပ်အထိုင်ချတပ်စွဲခဲ့တဲ့ကျေးရွာတွေ ဖြစ်ပါတယ်။

၁၀၂၇ စစ်ဆင်ရေးမှာ တော်လှန်ရေးပူးပေါင်းတပ်‌တွေကသိမ်းယူခဲ့ပြီး လက်ရှိအချိန်အထိ တော်လှန်ရေးတပ်တွေ ထိန်းချုပ်ထားတဲ့ နယ်မြေဖြစ်ပါတယ်။

ယမန်နေ့နိုဝင်ဘာ ၆ ရက်နေ့ကလည်း သပိတ်ကျင်းမြို့နယ်၊ ဇရပ်ကွင်းနဲ့ ဆင်းမွှေးကျေးရွာတို့ကို တိုက်ခိုက်ရေးလေယာဥ်နဲ့ ဗုံးကြဲတိုက်ခိုက်ခဲ့ရာ အမျိုးသား ၁ ဦးသေဆုံးခဲ့တယ်လို့ သိရပါတယ်။

စာတည်း – မြတ်

ဟယ်သာ၊ အောင်စိုး

မြိုင်၊ နိုဝင်ဘာ ၆၊ ၂၀၂၅။

မကွေးတိုင်း၊ မြိုင်မြို့နယ်နဲ့ ထီးလင်းမြို့နယ်ထဲကို နိုဝင်ဘာ ၆ ရက်ဒီမနက်ပိုင်းမှာ စစ်ကော်မရှင်တပ်က လေကြောင်းကနေ ဗုံးကြဲတိုက်ခိုက်ခဲ့တယ်လို့ ဒေသခံတွေဆီက သိရပါတယ်။

မြိုင်မြို့နယ်၊ နှမ်းဆီကန်ရွာအနီးတဝိုက်ကို ဒီမနက် ၇ နာရီဝန်းကျင်မှာ ဂျက်ဖိုက်တာနဲ့ ပါရာမော်တာတွေပေါ်ကနေ စုစုပေါင်းဗုံး ၉ လုံးကြဲချတိုက်ခိုက်ခဲ့တယ်လို့ ဆိုပါတယ်။

“လေကြောင်းကတော့ စစ်ကြောင်းတွေအရွေ့မှာ သူတို့ရဲ့ထုံးစံအတိုင်း လေယာဉ်ပစ်ကူတွေပါ တွဲပါလာပြီးတော့ အရပ်သားပစ်မှတ်တွေကို အဓိကထားပြီးတော့ကြဲချနေတဲ့ သဘောမျိုးပါပဲ။ ထိခိုက်ဒဏ်ရာရတယ်လို့တော့မရှိဘူး၊ တောဘက်တွေမှာကျတယ်။”လို့ဒေသခံတဦးက ပြောပါတယ်။

နှမ်းဆီကန်ရွာထဲမှာ တွင်းမရွာကနေလာတဲ့ အင်အား ၂၀၀ နီးပါးပါစစ်ကြောင်းကဝင်ရောက်တပ်စွဲနေတာကြောင့် အနီးတဝိုက်ကိုပစ်ကူပေးနေတဲ့သဘောဖြစ်နိုင်တယ်လို့ အထက်ပါဒေသခံက ခန့်မှန်းပါတယ်။

အဆိုပါစစ်ကြောင်းဟာ နိုဝင်ဘာ ၅ ရက်မှာလည်း နှမ်းဆီကန်ရွာထဲက နေအိမ်တွေကို မီးရှို့ဖျက်ဆီးခဲ့ပြီး စစ်ကြောင်းရှိနေသေးတာကြောင့် ပျက်စီးမှုအခြေအနေကို မသိရသေးဘူးလို့ ဆိုပါတယ်။

“အရင်းအမြစ်ကတော့ တပ်မ ၁၀၁ ကလာခဲ့တာပေါ့။ ညောင်ဂျစ်ပင် ရောက်တယ်ဆို လက်ရင်းဂိတ်ရှိတဲ့တွေကပြန်လိုက်လာလိုက် အဲ့ကနေမှ တွင်းမရောက်တယ်။ တွင်းမကတွေက ပြန်လိုက်လာလိုက်။ အဲ့လိုပေါ့ တွင်းမရွာထဲကထွက်လာတယ် နှမ်းဆီကန်ရွာကိုရောက်တယ်။ ပြည်သူ့အိမ်တွေလဲမီးရှို့တယ်လို့သိရတယ် ဘယ်နှအိမ်ရှို့လဲဆိုတာတော့ သေချာမသိရဘူး “လို့ ဆိုပါတယ်။

အိမ်ခြေ ၂၈၀ ခန့်ရှိတဲ့ နှမ်းဆီကန်ရွာဟာ ပျူစောထီးအားကောင်းတဲ့ သရက်ကန်နဲ့ တွင်းမရွာကြားမှာရှိပြီး ဒေသခံတွေကတော့ ၂၀၂၃ နှစ်ကုန်ပိုင်းကတည်းက စစ်ရှောင်နေကြရပြီး လက်ရှိထပ်ဝင်နေတဲ့ စစ်ကြောင်းကြောင့်လည်း နှမ်းဆီကန်၊ မြေရင့်၊ သာစည်၊ စိုကန်စတဲ့ ကျေးရွာက ရေရှည်စစ်ရှောင် ၅၀၀ ဝန်းကျင်လည်း နေရာထပ်မံရွေ့ပြောင်းနေရတယ်လို့ ဆိုပါတယ်။

ဒါ့အပြင် ဒေသခံကာကွယ်ရေးတပ်တွေနဲ့လည်းတိုက်ပွဲဖြစ်နေပြီး အသေးစိတ်အခြေအနေကိုတော့ မသိရဘူးလို့ အထက်ပါဒေသခံက ပြောပါတယ်။

အလားတူ နိုဝင်ဘာ ၅ ရက် ည ၁၀ နာရီကျော်မှာလည်း ထီးလင်းမြို့နယ်မြောက်ပိုင်းရှိ ပုံညာတောင်တန်းကို စစ်ကော်မရှင်တပ်က တိုက်ခိုက်ရေးလေယာဥ် ၁ စီးနဲ့ ဗုံးသီး ၂ လုံး ကြဲချတိုက်ခိုက်ခဲ့ကာ ထိခိုက်မှုတွေတော့မရှိခဲ့ဘူးလို့ ဒေသခံအမျိုးသားတဦးက ပြောပါတယ်။

စစ်ကော်မရှင်တပ်တွေဟာ မကွေးတိုင်းအတွင်းကကျေးရွာတွေကို အောက်တိုဘာနဲ့ နိုဝင်ဘာ ပထမပတ်အတွင်း စစ်ကြောင်းထိုးမီးရှို့တာအပြင် အရပ်သားတွေနေထိုင်တဲ့နေရာတွေကိုပါ မကြာခဏလေကြောင်းကနေဗုံးကြဲတိုက်ခိုက်နေတာကြောင့် ဒေသခံထိခိုက် သေဆုံးမှုတွေလည်း ရှိနေပါတယ်။

စဉ့်ကူး၊ အောက်တိုဘာ ၃၁၊ ၂၀၂၅။

မန္တလေးတိုင်း၊ စဉ့်ကူးမြို့နယ်၊ လက်ပန်လှကျေးရွာ၊ အေးချမ်းသာရပ်ကွက်ကို စစ်ကော်မရှင်တပ်ကဗုံးကြဲလို့ မိန်းကလေးငယ် ၁ ဦးအပါအဝင် ၂ ဦးသေဆုံးခဲ့တယ်လို့ ကျေးရွာနဲ့နီးစပ်သူတွေဆီက သိရပါတယ်။

အောက်တိုဘာ ၃၀ ရက် နေ့လယ် ၂ နာရီခန့်မှာ မိတ္ထီလာလေတပ်ဘက်ကတက်လာတဲ့ ဂျက်ဖိုက်တာ ၁ စီးက ကျေးရွာထဲကို ၄ ကြိမ် ဗုံး ၄ လုံးကြဲချခဲ့တာလို့ ဆိုပါတယ်။

“၃ မိနစ်ခြား ၁ ခါ၊ ၄ ခါကြဲသွားတာ။ ငါးခြောက်ပွဲရုံလုပ်တဲ့အိမ်ပေါ်ကို ကျတာ၊ လူနေအိမ်ပါပဲ။ ဘေးပတ်ဝန်းကျင်မှာလည်း စစ်ရေးပစ်မှတ်ဘာမှမရှိဘူး။ ထိခိုက်သေဆုံးသူတွေက တမိသားစုတည်းပဲ”လို့ ကျေးရွာနဲ့နီးစပ်သူတဦးက ပြောပါတယ်။

လေကြောင်းကနေ ဗုံးကြဲခံရတာကြောင့် အသက် ၁၃ နှစ် အရွယ် မိန်းကလေးငယ် ၁ ဦး နေရာမှာတင် သေဆုံးသွားပြီး အသက် ၄၀ ကျော်အရွယ် အမျိုးသမီး ၂ ဦးနဲ့အမျိုးသား ၁ ဦးတို့ဒဏ်ရာရခဲ့ကာ နီးစပ်ရာဆေးရုံကိုပို့ဆောင်ချိန်မှာ အမျိုးသမီး ၁ ဦးထပ်မံသေဆုံးခဲ့တာလို့ ဆိုပါတယ်။

ဒါ့အပြင် ငါးခြောက်ပွဲရုံလုပ်နေတဲ့ နေအိမ်အပါအဝင် နေအိမ် ၄ လုံးလည်းပျက်စီးခဲ့ပြီး ဒေသခံတချို့ကတော့ ဘေးလွတ်ရာကို ရွှေ့ပြောင်းနေထိုင်နေကြပါတယ်။

ဇွန် ၂၉ ရက်ကလည်း စဉ့်ကူးမြို့နယ်၊ လက်ပန်လှကျေးရွာ၊ ပြည်စိုးအောင်ရပ်ကွက်မှာ ကျန်းမာရေးမကောင်း လို့ နေအိမ်ထဲရှိနေတဲ့အမျိုးသမီး ဗုံးထိမှန်ကာ သေဆုံးခဲ့သေးသလို နေအိမ် ၃ လုံးလည်း ပျက်စီးခဲ့တယ်လို့ သိရပါတယ်။

၂၀၂၁ စစ်အာဏာသိမ်းချိန်ကနေ ၂၀၂၅ အောက်တိုဘာ ၃၀ အထိ စစ်ကော်မရှင်တပ်နဲ့ လက်အောက်ခံအဖွဲ့အစည်းတွေကြောင့် သေဆုံးခဲ့ရတဲ့ပြည်သူစုစုပေါင်း ၇,၄၂၃ ဦးရှိပြီလို့ နိုင်ငံရေးအကျဥ်းသားများ ကူညီစောင့်ရှောက်ရေးအသင်း – AAPP က ထုတ်ပြန်ထားပါတယ်။

စာတည်း – လင်း

မြေလတ်အသံ၊ အောက်တိုဘာ ၃၀၊ ၂၀၂၅။

စစ်ကိုင်းတိုင်း၊ ကသာမြို့နယ်က ကျေးရွာတရွာနဲ့ ဗန်းမောက်မြို့အနီးကို စစ်ကော်မရှင်တပ်က အောက်တိုဘာ ၂၉ ရက်မှာ ဗုံးကြဲတိုက်ခိုက်ခဲ့တာကြောင့် ၁၀ နှစ်ကလေး ၁ ဦးအပါအဝင် ၅ ဦးသေဆုံးခဲ့တယ်လို့ တော်လှန်ရေးတပ်ဖွဲ့ဝင်တွေဆီက သိရပါတယ်။

အောက်တိုဘာ ၂၉ ရက်ည ၁၀ နာရီကျော်မှာ ကသာမြို့နယ်၊ ညောင်ခြေထောက်ကျေးရွာကို တိုက်ခိုက်ရေး လေယာဥ် ၁ စီးနဲ့ ဗုံး ၃ လုံးကြဲချခဲ့ရာ ၁၀ နှစ်အရွယ် ယောကျာ်းလေး ၁ ဦး၊ အသက် ၆၀ ကျော်အရွယ် အမျိုး သား ၁ ဦးနဲ့ အမျိုးသမီး ၁ ဦး၊ အသက် ၄၀ အရွယ်အမျိုးသမီး ၂ ဦးတို့ သေဆုံးခဲ့ပါတယ်။

“အသက် ၉၀ ကျော် အမျိုးသမီး ၁ ဦး စိုးရိမ်ဒဏ်ရာရကာ နောက်ထပ် ၇ ဦးလည်း ဒဏ်ရာပြင်းထန် ရရှိထားပါတယ်။ ညအချိန် ပြည်သူများနေထိုင်တဲ့ ကျေးရွာကို အကြောင်းမဲ့ ဗုံးကြဲခံရမှုကြောင့် မသေသင့်ဘဲ ပြည်သူ့ အသက်အိုးအိမ်တွေ ဆုံးရှုံးခဲ့ရပါတယ်”လို့ ကသာခရိုင်ပြည်သူ့အုပ်ချုပ်ရေးအဖွဲ့(ပအဖ)က အောက်တိုဘာ ၃၀ ရက်ဒီကနေ့မှာ ထုတ်ပြန်ခဲ့ပါတယ်။

ဗုံးကြဲခံရတဲ့နေရာတွေဟာ ညောင်ခြေထောက်ကျေးရွာ ဘုန်းတော်ကြီးကျောင်းနဲ့ ကျေးရွာအတွင်းဖြစ်ပြီး ဗုံးကြဲမှုကြောင့် လူနေအိမ် ၁၄ လုံးနဲ့ ဘုန်းကြီးကျောင်းဝန်းအတွင်းရှိ ဓမ္မာရုံ၊ ဂရုဏာပရဟိတကား ၁ စီးလည်း ပျက်စီးခဲ့ရတယ်လို့ ကသာမြို့နယ်ပအဖ က ဆိုထားပါတယ်။

အလားတူ အောက်တိုဘာ ၂၉ ရက်မနက် ၈ နာရီကျော်ကလည်း NUG လက်အောက်ခံ တော်လှန်ရေးတပ်တွေ ထိန်းချုပ်ထားတဲ့ ဗန်းမောက်မြို့ပြင်ရှိ တောတန်းတွေကို Y-12 ထောက်ပို့လေယာဥ် ၁ စီးနဲ့ ဗုံးကြဲတိုက်ခိုက်ခဲ့တယ်လို့ သိရပါတယ်။

“မြို့ပြင်ကိုပါ။ အထိအခိုက် အပျက်အစီးတော့မရှိလိုက်ပါဘူး။တောစပ်တွေကိုပေါ့။ မြို့နားပတ်လည်ပါပဲ။ ဗုံးအလုံးရေများတော့ မရေထားမိလိုက်ဘူး”လို့ ဗန်းမောက်ဒေသခံတော်လှန်ရေးတပ်ဖွဲ့ဝင်တဦးက ပြောပါတယ်။

NUG တပ်တွေတိုက်ခိုက်သိမ်းပိုက်ထားတဲ့ ဗန်းမောက်မြို့ကို ပြန်လည်ရရှိဖို့ ရှမ်းနီအမျိုးသားတပ်မတော်(SNA)နဲ့ စစ်ကော်မရှင်တပ်မ ၃၃ က ပူးပေါင်းအင်အား ၅၀၀ ကျော်နဲ့ ထိုးစစ်ဆင်တိုက်ခိုက်မှုတွေ နေ့စဥ်နီးပါး ရှိနေပေမယ့် တော်လှန်တပ်တွေဘက်က ခုခံမှုကိုမထိုးဖောက်နိုင်သေးဘူး လို့လည်း ဒေသခံတော်လှန်ရေးတပ်ဖွဲ့တွေဆီက သိရပါတယ်။

၂၀၂၁၊ စစ်အာဏာသိမ်းချိန်ကနေ ၂၀၂၅၊ အောက်တိုဘာ ၂၉ ရက်အထိ စစ်ကော်မရှင်တပ်နဲ့ လက်အောက်ခံတပ်ဖွဲ့ဝင်တွေကြောင့် သေဆုံးခဲ့ရတဲ့ပြည်သူစုစုပေါင်း ၇,၄၂၂ ဦးရှိပြီလို့ နိုင်ငံရေးကျဥ်းသားများကူညီစောင့်ရှောက်ရေးအသင်း – AAPP က ထုတ်ပြန်ပါတယ်။

စာတည်း – လင်း

မတ္တရာ၊ အောက်တိုဘာ ၂၇၊ ၂၀၂၅။

မန္တလေးတိုင်း၊ မတ္တရာမြို့နယ်၊ ပတ်လည်အင်းရွာက ဓာတ်ဆီဆိုင်အနီးဗုံးကြဲခံရပြီး အမျိုးသား ၁ ဦးသေဆုံးကာ ၆ ဦးဒဏ်ရာရတယ်လို့ ဒေသခံတွေဆီက သိရပါတယ်။

အောက်တိုဘာ ၂၆ ရက် နေ့လယ် ၃ နာရီ ၁၅ မိနစ်ဝန်းကျင်မှာ မိတ္ထီလာလေတပ်ဘက်က တက်လာတဲ့ ဂျက်လေယာဉ် ၂ စီးက ‘ကောင်းဆက်သာ’ ဆီဆိုင်အနီးကို ဗုံး ၆ လုံးကြဲချခဲ့တာလို့ဆိုပါတယ်။

“ဆီဆိုင်က ပိတ်ထားတာ အဲ့ဒါကိုလာကြဲတာ။ ဘာတိုက်ပွဲမှမရှိဘဲ သက်သက်ကိုဘလိုင်းကြီးလာကြဲသွားတာ။ ဘာထမင်းဆိုင်မှာလည်းမရှိဘူး”လို့ ဒေသခံတဦးက ပြောပါတယ်။

ဗုံးကြဲခံရလို့ ဆီဆိုင်မန်နေဂျာ အသက် ၃၇ နှစ်အရွယ် အမျိုးသား ၁ ဦးနေရာမှာပင်သေဆုံးခဲ့ပြီး အသက် ၂၅ နှစ်ကနေ ၅၀ ကြား အမျိုးသား ၄ ဦးနဲ့အမျိုးသမီး ၂ ဦးထိခိုက်ဒဏ်ရာရခဲ့ပါတယ်။

ဒါ့အပြင် ဓာတ်ဆီဆိုင်အပါအဝင်အဆောက်အဦ၃ လုံး မီးလောင်ပျက်စီးပြီး ဒေသခံတွေလည်း ဘေးလွတ်ရာတိမ်းရှောင်နေကြရပါတယ်။

တော်လှန်ရေးတပ်တွေ ထိန်းချုပ်ထားတဲ့ သပိတ်ကျင်း၊ စဥ့်ကူးနဲ့ မတ္တရာမြို့နယ်က နေရာတွေကို စစ်ကော်မရှင်တပ်က ထိုးစစ်ဆင်မှုတွေ ဆက်တိုက်လုပ်ဆောင်နေသလို လေယာဉ်နဲ့ ဗုံးကြဲတိုက်ခိုက်တာတွေ မကြာခဏ ပြုလုပ်နေပါတယ်။

ပြီးခဲ့တဲ့ အောက်တိုဘာ ၂၄ ရက်မှာလည်း သပိတ်ကျင်းမြို့နယ်၊ ရင်ခတ်ပင်ကျေးရွာကို စစ်ကောင်စီတပ်က လေကြောင်းကနေ ဗုံးကြဲတိုက်ခိုက်လို့ ဒေသခံ ၃ ဦး ပွဲချင်းပြီး သေဆုံးကာ ၁၃ ဦး ထက်မနည်း ထိခိုက်ဒဏ်ရာရခဲ့ပါတယ်။

စာတည်း – လင်း