ဗိုလ်လုပွဲ

မြေလတ်အသံ၊ ဇူလိုင် ၁၅၊ ၂၀၂၄။

ယနေ့မနက် ယှဉ်ပြိုင်ခဲ့တဲ့ အာဂျင်တီးနားနဲ့ ကိုလံဘီယာတို့ရဲ့ ကိုပါအမေရိက ဗိုလ်လုပွဲမှာ အာဂျင်တီးနားအနိုင်ရရှိခဲ့ပြီး ကိုပါအမေရိကချန်ပီယံဆုဖလားကို ၂ ကြိမ်ဆက် သိမ်းပိုက်နိုင်ခဲ့ပါတယ်။

မြန်မာစံတော်ချိန် မနက် ၆ နာရီခွဲမှာ စတင်ကစားမယ့်ပွဲမှာ ကွင်းအတွင်း ပရိသတ်ဝင်ရောက်မှုအပိုင်းမှာ ပြသနာအနည်းငယ်ရှိခဲ့လို့ ၁ နာရီကျော် နောက်ကျပြီး မနက် ၇ နာရီ ၄၅ မိနစ်မှ ပြိုင်ပွဲကို စတင်နိုင်ခဲ့တာ ဖြစ်ပါတယ်။

ဒီပွဲမှာ အာဂျင်တီးနားအသင်းက ခြေစွမ်းပြသွင်းဂိုးတွေရယူပေးနေတဲ့ တိုက်စစ်မှူး လော်တာရိုမာတီနက်ဇ်ကို ချန်လှပ်ထားခဲ့ပြီး အဲဗာရက်ဇ်နဲ့ ပွဲထွက်လာခဲ့တာပါ။

ကြံ့ခိုင်မှုအသားပေးပြီး ကြမ်းကြမ်းတမ်းတမ်း ကစားတဲ့ ကိုလံဘီယာအသင်းကြောင့် အာဂျင်တီးနားတို့ ကစားရခက်ခဲခဲ့ပြီး နှစ်ဖက်အသင်းသား ထိခိုက်ဒဏ်ရာရမှုတွေမကြာခဏဖြစ်ခဲ့ကာ အာဂျင်တီးနားအသင်းခေါင်းဆောင် မက်ဆီလည်း ၆၆ မိနစ်မှာ ဒဏ်ရာရလို့ လူစားလဲခဲ့ရပါတယ်။

နှစ်ဖက်အသင်းအပြန်အလှန်ဂိုးပေါက်ခြိမ်းခြောက်မှုတွေ ပြုလုပ်နိုင်ခဲ့ပေမယ့် ဂိုးသမားတွေ လက်စွမ်းပြနိုင်ခဲ့ကြလို့ သွင်းဂိုးမရရှိခဲ့ဘဲ ပွဲကစားချိန် မိနစ် ၉၀ ပြည့်ကာ အချိန်ပို မိနစ် ၃၀ ဆက်လက် ကစားခဲ့ရတာပါ။

အချိန်ပိုပထမပိုင်း ၉၇ မိနစ်မှာ ချန်လှပ်ခံထားရတဲ့ တိုက်စစ်မှူး လော်တာရိုမာတီနက်ဇ် လူစားဝင်ရောက်လာခဲ့ပြီး ၁၁၂ မိနစ်အရောက်မှာတော့ ကွင်းလယ်လူ လိုဆယ်လ်ဆိုရဲ့ ဖန်တီးပေးမှုကနေတဆင့် မာတီနက်ဇ်က ဂိုးသမားနဲ့တဦးချင်းအတွေ့မှာ တိတိကျကျကန်သွင်းပြီး အဖိုးတန် အနိုင်ဂိုးကို ရယူပေးခဲ့ပါတယ်။

လက်ကျန်ပွဲကစားချိန်တွေမှာတော့ ကိုလံဘီယာအသင်းက တိုက်စစ်ဖွင့်ပြီး ချေပဂိုးရရှိနိုင်ဖို့ ကြိုးစားခဲ့ပေမယ့် အာဂျင်တီးနားအသင်းက အနိုင်ရလဒ်ကို ထိန်းသိမ်းကာ ပွဲကစားချိန် ၁၂၀ မိနစ်အပြီးမှာတော့ ၁-၀ ရလဒ်နဲ့ ကိုပါအမေရိကဖလားကို အာဂျင်တီးနားအသင်း ကိုင်မြှောက်နိုင်ခဲ့တာပဲ ဖြစ်ပါတယ်။

ကိုပါအမေရိကဖလားရရှိခဲ့လို့ အာဂျင်တီးနားအသင်းဟာ ကိုပါအမေရိကဖလား ၂ကြိမ်ဆက် ဗိုလ်စွဲခဲ့ပြီး မက်ဆီအနေနဲ့လည်း နိုင်ငံတကာပွဲစဉ် အောင်မြင်မှုအနေနဲ့ ကိုပါအမေရိကဖလား ၂ကြိမ် ကမ္ဘာ့ဖလား ၁ကြိမ် ရရှိခဲ့ပါတယ်။

AFA – Selección Argentina 

မြေလတ်အသံ၊ ဇူလိုင် ၁၅၊ ၂၀၂၄။

ဂျာမနီနိုင်ငံကအိမ်ရှင်အဖြစ် လက်ခံကျင်းပခဲ့တဲ့ ယူရို ၂၀၂၄ ပြိုင်ပွဲရဲ့ ဗိုလ်လုပွဲမှာ စပိန်အသင်းက အင်္ဂလန်အသင်းကို ၂ ဂိုး ၁ ဂိုး ရလဒ်နဲ့ အနိုင်ယူပြီး ယူရို ၂၀၂၄ ချန်ပီယံ ဖြစ်ခဲ့ကာ နာမည်ကြီး အင်္ဂလန်အသင်းကတော့ ဒုတိယနေရာသာ ရရှိခဲ့ပါတယ်။

ပွဲစကတည်းက စပိန်အသင်းဟာ ဘောလုံးပိုင်ဆိုင်မှုအသာ ကစားကွက်အသာနဲ့ ကစားနိုင်ခဲ့ပေမယ့် ပထမပိုင်း ၄၅ မိနစ်အတွင်း ထိရောက်တဲ့ ဂိုးပေါက်ခြိမ်းခြောက်မှု တကြိမ်မှ မပြုလုပ်နိုင်ခဲ့သလို အင်္ဂလန်အသင်းအနေနဲ့လည်း ခံစစ်ပိုင်းကိုဦးစားပေးကစားခဲ့ပြီး တန်ပြန်တိုက်စစ်ကစားခဲ့ပေမယ့် စပိန်နောက်တန်းကို ကျော်ဖြတ်နိုင်ခဲ့ခြင်းမရှိခဲ့ပါဘူး။

ဒုတိယပိုင်းအစမှာ ဒဏ်ရာရသွားတဲ့ကွင်းလယ်လူ ရိုဒရီနေရာမှာ မာတင်ဇူဘီအန်ဒီ ဝင်ရောက်ကစားခဲ့ပြီး ပွဲအစ ၄၇ မိနစ်မှာ လာမိုင်းယာမဲလ် ရဲ့ ဖန်တီးပေးပို့မှုကနေတဆင့် နီကိုးဝီလီယံက ဦးဆောင်ဂိုးသွင်းယူကာ စပိန်အသင်းက စတင်ဦးဆောင်နိုင်ခဲ့တာပါ။

ဂိုးပေးလိုက်ပြီးတဲ့နောက် အင်္ဂလန်အသင်းက တိုက်စစ်မှူး ဟာရီကိန်းနေရာမှာ အိုလီဝက်ကင်းစ် နဲ့ ကွင်းလယ်လူ ကိုဘီမိုင်နူးနေရာမှာ ကိုးလ်ပါမာ တို့ လူစားလဲခဲ့သလို စပိန်ကလည်း တိုက်စစ်မှူး မိုရာတာ နေရာမှာ မီခေးလ်အိုရာဇာဘယ်ကို လူစားလဲခဲ့ပါတယ်။

အဲ့ဒီနောက် ပွဲကစားချိန် ၇၃ မိနစ်အရောက်မှာ စပိန်ဂိုးဧရိယာထိပ်မှာ ဘယ်လင်ဂမ် ပြန်ချပေးတဲ့ဘောလုံးကို လူစားဝင်ကစားသမား ကိုးလ်ပါမာ က လှလှပပ ကန်သွင်းပြီး အင်္ဂလန်တို့ ချေပဂိုးရရှိခဲ့ကာ ပြိုင်ပွဲကလည်း ပိုမိုမြိုင်ဆိုင်လာခဲ့ပါတယ်။

အပြန်အလှန်တိုက်စစ်ဆင်ကစားရင်း သရေရလဒ်ကို ထိန်းထားဖို့ကြိုးစားနေတဲ့ အင်္ဂလန်အသင်းကို ပွဲကစားချိန် ၈၆ မိနစ်အရောက်မှာတော့ ကူကူရယ်လာရဲ့ ပေးပို့မှုကနေတဆင့် လူစားဝင်ကစားသမား မီခေးလ်အိုရာဇာဘယ်က ပိတ်သွင်းနိုင်ခဲ့လို့ စပိန်အသင်း ထပ်မံဦးဆောင်နိုင်ခဲ့ပြီး အနိုင်ရလဒ်ကို ထိန်းထားနိုင်ခဲ့ကာ ယူရို ၂၀၂၄ ရဲ့ ချန်ပီယံအသင်း ဖြစ်လာခဲ့ပါတော့တယ်။

ဘောလုံးပိုင်ဆိုင်မှုအသာ ကစားကွက်အသာနဲ့ စပိန်အသင်းက ကစားနိုင်ခဲ့သလို အင်္ဂလန်အသင်ကလည်း တန်ပြန်တိုက်စစ်ကနေတဆင့် အကောင်းဆုံးဖိအားပေးယှဉ်ပြိုင်နိုင်ခဲ့ကာ ကြည့်ကောင်းတဲ့ပွဲတစ်ပွဲဖြစ်ခဲ့ပါတယ်။

စပိန်အသင်းဟာ နောက်ဆုံးယှဉ်ပြိုင်ခဲ့တဲ့ ယူရိုပြိုင်ပွဲ ၅ ကြိမ်မှာ ၃ ကြိမ် ချန်ပီယံဖြစ်ခဲ့ပြီး အင်္ဂလန်ကတော့ ၂ ကြိမ်ဆက်တိုက် ဒုတိယနေရာ ရရှိခဲ့တာပါ။

Photo – UEFA EURO 2024

မြေလတ်အသံ၊ ဇူလိုင် ၁၄၊ ၂၀၂၄။

ယနေ့ည ဇူလိုင် ၁၅ ရက် မြန်မာစံတော်ချိန် မနက် ၁ နာရီ ၃၀ မိနစ်မှာ ယူရို ၂၀၂၄ ဗိုလ်လုပွဲနဲ့ မနက် ၆ နာရီ ၃၀ မိနစ်မှာ ကိုပါအမေရိက ဗိုလ်လုပွဲ တို့ ကျင်းပသွားမှာဖြစ်ပါတယ်။

ယူရို ၂၀၂၄ ကတော့ ဂျာမနီနိုင်ငံက အိမ်ရှင်အဖြစ်လက်ခံကျင်းပနေပြီး ဗိုလ်လုပွဲကို ဘာလင်မြို့၊ အိုလံပီယာကွင်းမှာ ကျင်းပမှာ ဖြစ်ပါတယ်။ ဒီဗိုလ်လုပွဲမှာတော့ စပိန်အသင်းနဲ့ အင်္ဂလန်အသင်းတို့ တွေ့ဆုံမှာဖြစ်ပြီး ပွဲစဉ်တလျှောက် အကောင်းဆုံး စွမ်းဆောင်ရည်တွေပြသနိုင်ခဲ့တဲ့ စပိန်အသင်းက ဗိုလ်စွဲဖို့ ရေပန်းစားနေကာ တဖက်မှာလည်း ကစားသမားကောင်းများစွာ ပိုင်ဆိုင်ထားတဲ့ အင်္ဂလန်အသင်းရဲ့ ပွဲစဉ်တလျှောက် အကောင်းဆုံးယှဉ်ပြိုင်ကျော်ဖြတ်ခဲ့တဲ့ စွမ်းဆောင်ရည်ကို မေ့ထားလို့မရပါဘူး။ 

ယူရိုပွဲစဉ်တလျှောက် ပွဲတိုင်းကို အနိုင်ကစားနိုင်ခဲ့တဲ့ စပိန်အသင်းဟာ လူငယ်ကစားသမားတွေဖြစ်တဲ့ လာမိုင်းယာမဲလ်၊ အော်လမို၊ နီကိုးလ်ဝီလီယံတို့အပါအဝင် ဝါရင့်ကစားသမားတွေဖြစ်တဲ့ ကာဗာဟဲ၊ ရိုဒရီ၊ မိုရာတာတို့နဲ့အတူ ခြေစွမ်းကောင်းပြသနေတဲ့အသင်းဖြစ်ကာ အော်လမိုက ၃ ဂိုးသွင်း ၂ ဂိုးဖန်တီးထားကာ ယာမဲလ်ကတော့ ၁ ဂိုးသွင်း ၃ ဂိုးဖန်တီးထားနိုင်ခဲ့ပါတယ်။

အင်္ဂလန်အသင်းကတော့ ပွဲစဉ်တလျှောက် ခြေစွမ်းပြနိုင်ခြင်းသိပ်မရှိပေမယ့် ကိုဘီမိုင်နူး၊ ဖိုဒန်၊ ဆာကာ၊ ဘယ်လင်ဂမ်၊ အာနိုး၊ ဟာရီကိန်းအစရှိတဲ့ကစားသများကောင်းများစွာ ပါဝင်နေတဲ့အသင်းဖြစ်ပြီး ယူရိုပွဲစဉ်တလျှောက် ၄ ပွဲနိုင်(ပင်နယ်တီဖြင့် ၁ ပွဲ) ၂ ပွဲသရေကျထားတဲ့အသင်းဖြစ်ပါတယ်။ 

ကိုပါအမေရိကပြိုင်ပွဲကိုတော့ US က အိမ်ရှင်အဖြစ်ကျင်းပနေတာဖြစ်ပြီး ဗိုလ်လုပွဲကို ဖလော်ရီဒါက Hard Rock ကွင်းမှာ ကျင်းပမှာဖြစ်ပါတယ်။ ဒီဗိုလ်လုပွဲမှာတော့ အာဂျင်တီးနားနဲ့ ကိုလံဘီယာအသင်းတို့ တွေ့ဆုံမှာဖြစ်ပြီး လက်ရှိကမ္ဘာ့ဖလားချန်ပီယံဖြစ်တဲ့ အာဂျင်တီးနားအသင်းက ဗိုလ်စွဲဖို့ ရေပန်းစားနေသလို တဖက်မှာလည်း အုပ်စုအဆင့်မှာ ဘရာဇီးအသင်းကို နောက်ကောက်ချနိုင်ခဲ့ပြီး ဆီမီးဖိုင်နယ်မှာ ဥရုဂွေးလိုမျိုးအသင်းကို ကျော်ဖြတ်ပြနိုင်ခဲ့တဲ့ ကိုလံဘီယာအသင်းနဲ့ ရင်ဆိုင်ရမှာဖြစ်ပါတယ်။

အာဂျင်တီးနားအသင်းဟာ ပွဲစဉ်တလျှောက် ၅ ပွဲလုံးအနိုင်ရ(ပင်နယ်တီဖြင့် ၁ ပွဲ)ထားပြီး ကစားသမားစုဖွဲ့မှုအားကောင်းကောင်းနဲ့ ပုံမှန်ခြေစွမ်းပြသထားနိုင်ခဲ့ပါတယ်။ တိုက်စစ်မှူး မာတီနက်ဇ်၊ အယ်ဗာရက်ဇ်၊ မက်ဆီနဲ့ မက်အယ်လစ္စတာတို့ရဲ့ ခြေစွမ်းပြမှုနဲ့အတူ ဂိုးသမား အီမီ မာတီနက်ဇ်ရဲ့ စွမ်းဆောင်ရည်တွေကို အသိအမှတ်ပြုရမှာ ဖြစ်ပါတယ်။

ကိုလံဘီယာအသင်းကတော့ ဘယ်သူမှထင်မှတ်မထားဘဲ ဗိုလ်လုပွဲအဆင့်အထိ ရောက်ရှိလာအောင် စွမ်းဆောင်ပြနိုင်ခဲ့တာဖြစ်ပြီး ဘရာဇီးနဲ့ ၁ ပွဲသာ သရေကျတာကာ အခြားပွဲတွေမှာ အနိုင်ရရှိခဲ့တဲ့အပြင် အာဂျင်တီးနားထက် သွင်းဂိုးပိုမို ရရှိထားတဲ့အသင်းဖြစ်ပါတယ်။ ၂၀၁၄ ကမ္ဘာ့ဖလားနဲ့အတူ တောက်ပခဲ့တဲ့ ရီးရဲမက်ဒရစ်ကစားသမားဟောင်း ဟားမက်စ် ရိုဒရီဂွတ် ခြေစွမ်းကောင်းတွေရရှိနေပြီး သူနဲ့ လူးဝစ်ဇ် ဒီးယက်ဇ်တို့အပြင် တသင်းလုံးရဲ့ စွမ်းဆောင်ရည်ကို ဆက်လက်စောင့်ကြည့်ရမယ့် ပွဲကောင်းတစ်ပွဲဖြစ်ပါတယ်။

မြေလတ်အသံပရိသတ်တွေအနေနဲ့လည်း ယူရို ၂၀၂၄ နဲ့ ကိုပါအမေရိက ပြိုင်ပွဲတွေမှာ ဘယ်အသင်းတွေ ဗိုလ်စွဲသွားမလဲဆိုတာကို ဝင်ရောက်ဆွေးနွေးဖို့ ဖိတ်ခေါ်ပါတယ်။

Photo – UEFA Euro, Copa America

မြေလတ်အသံ၊ ဇူလိုင် ၁၁၊ ၂၀၂၄။

အမေရိကန်နိုင်ငံက အိမ်ရှင်အဖြစ် လက်ခံကျင်းပတဲ့ ကိုပါအမေရိက ၂၀၂၄ ပြိုင်ပွဲရဲ့ ဗိုလ်လုပွဲစဉ်မှာ အာဂျင်တီးနားနဲ့ ကိုလံဘီယာ​အသင်းတို့ တွေ့ဆုံကြမှာ ဖြစ်ပါတယ်။

အာဂျင်တီးနားအသင်းဟာ အုပ်စုအဆင့်ပွဲစဉ်တွေမှာ ကနေဒါ၊ ချီလီ၊ ပီရူး အသင်းတို့ကို အနိုင်ရရှိခဲ့ပြီး ကွာတားဖိုင်နယ်မှာ အီကွေဒေါအသင်းကို ပင်နယ်တီအဆုံးအဖြတ်နဲ့ အနိုင်ရခဲ့ကာ ဆီမီးဖိုင်နယ်အဆင့်မှာတော့ ကနေဒါအသင်းကို ကျော်ဖြတ်ပြီး ဗိုလ်လုပွဲကို ရောက်ရှိခဲ့တာ ဖြစ်ပါတယ်။

ကိုလံဘီယာအသင်းအနေနဲ့လည်း အုပ်စုပွဲစဉ်တွေမှာ ပါရာဂွေးနဲ့ ကော်စတာရီကာကို အနိုင်ရရှိခဲ့ကာ ဘရာဇီးကို သရေရယူနိုင်ခဲ့တာဖြစ်ပါတယ်။ အဲ့ဒီနောက် ကွာတားဖိုင်နယ်အဆင့်မှာ ပနားမားအသင်းနဲ့ ဆီမီးဖိုင်နယ်အဆင့်မှာ ဥရုဂွေး အသင်းတို့ကိုအနိုင်ယူခဲ့ကာ ဗိုလ်လုပွဲကို ရောက်ရှိခဲ့တာဖြစ်ပါတယ်။

ကိုပါအမေရိက ဗိုလ်လုပွဲကို အမေရိကန်နိုင်ငံ၊ မိုင်ယာမီမှာရှိတဲ့ Hard Rock Stadium မှာ ဇူလိုင် ၁၄ ရက် ဒေသစံတော်ချိန် ည ၈ နာရီ​ (မြန်မာစံတော်ချိန် ဇူလိုင် ၁၅ ရက် မနက် ၆ နာရီ ၃၀ မိနစ်) အချိန်မှာ ကျင်းပသွားမှာ ဖြစ်ပါတယ်။

ဓါတ်ပုံ – ESPN 

မြေလတ်အသံ၊ ဇူလိုင် ၁၁၊ ၂၀၂၄

ဂျာမနီနိုင်ငံက အိမ်ရှင်အဖြစ် လက်ခံကျင်းပတဲ့ ယူရို ၂၀၂၄ ပြိုင်ပွဲရဲ့ ဗိုလ်လုပွဲစဉ်မှာ စပိန်နဲ့ အင်္ဂလန်​အသင်းတို့ တွေ့ဆုံကြမှာ ဖြစ်ပါတယ်။

စပိန်အသင်းဟာ အုပ်စုအဆင့်ပွဲစဉ်မှာ ခရိုအေးရှား၊ အီတလီ၊ အယ်လ်ဘေးနီးယား စတဲ့အသင်းတွေကို အနိုင်ယူခဲ့သလို ၁၆ သင်းရှုံးထွက်အဆင့်မှာ ဂျော်ဂျီရာ၊ ကွာတားဖိုင်နယ်ပွဲစဉ်မှာ အိမ်ရှင်ဂျာမနီအသင်းကိုအနိုင်ယူခဲ့ပြီး ဆီမီးဖိုင်နယ်ပွဲစဉ်မှာတော့ ပြင်သစ်အသင်းကိုကျော်ဖြတ်ကာ ဗိုလ်လုပွဲအဆင့်အထိ တက်ရောက်လာခဲ့တာဖြစ်ပါတယ်။

အင်္ဂလန်အသင်းကတော့ အုပ်စုအဆင့်ပွဲစဉ်မှာ ဆားဘီးယားကိုအနိုင်ရကာ ဒိန်းမတ်နဲ့ ဆလိုဗေးနီးယားအသင်းတို့ကို သရေရရှိခဲ့ပြီး ၁၆ သင်း ရှုံးထွက်အဆင့်မှာ ဆလိုဗက်ကီးယား၊ ကွာတားဖိုင်နယ်ပွဲစဉ်မှာ ဆွစ်ဇာလန်အသင်းကို အနိုင်ယူခဲ့ပြီး ဆီမီးဖိုင်နယ်ပွဲစဉ်မှာ နယ်သာလန်အသင်းကို ကျော်ဖြတ်ကာ ဗိုလ်လုပွဲအဆင့်အထိ တက်ရောက်လာခဲ့တာဖြစ်ပါတယ်။

ယူရို ၂၀၂၄ ဖိုင်နယ်ပွဲစဉ်ကို ဂျာမနီနိုင်ငံ၊ ဘာလင်မြို့မှာရှိတဲ့ အိုလံပီယာစတေဒီယံမှာ ဇူလိုင် ၁၄ ရက် ဒေသစံတော်ချိန် ည ၉ နာရီ (မြန်မာစံတော်ချိန် ဇူလိုင် ၁၅ ရက် နံနက် ၁ နာရီ ၃၀ မိနစ်) အချိန်မှာ ကျင်းပသွားမှာ ဖြစ်ပါတယ်။

ဓါတ်ပုံ – ESPN