အဖွဲ့ဝင်တွေ လုံခြုံစွာရှိနေတယ်လို့ The Phoenix Army-TPA ဆို

မုံရွာ၊ ဇွန် ၅၊ ၂၀၂၅။

စစ်ကိုင်းတိုင်း၊ မုံရွာမြို့၊ အောင်မင်္ဂလာရပ်ကွက်၊ အထက (၁) ကျောင်းအနီး စစ်ကောင်စီတပ်သား ၂ ဦးကို ပစ်ခတ်ခဲ့သူတွေကို ဖမ်းမိထားတယ်လို့ စစ်ကောင်စီဝါဒဖြန့်တယ်လီဂရမ်ချန်နယ် ၁၀ ခုထက်မနည်းမှာ ဖော်ပြထားကြပေမယ့် ပစ်ခတ်မှုမှာပါဝင်ခဲ့တဲ့ အဖွဲ့ဝင်တွေ လုံခြုံစွာရှိနေတယ်လို့ The Phoenix Army-TPA ထံက သိရပါတယ်။

စစ်ကောင်စီဝါဒဖြန့်တယ်လီဂရမ်ချန်နယ်တွေမှာ ပစ်ခတ်မှုမှာ ပါဝင်ခဲ့တဲ့သူတွေလို့ဆိုကာ အသက် ၁၆ နှစ်အရွယ် ဇော်ကျော်ငြိမ်းထွန်း (ခ) ပေါက်ခေါ ဇလုပ်အနောက်ရွာနေသူနဲ့ သော်ဇင်ထက် (ခ) သော်သော် ရွှေဇလုပ်ရပ်ကွက်နေသူတို့ကို ၂ ရက်အတွင်း ဖမ်းမိခဲ့တယ်လို့ဆိုပြီး ဇွန် ၄ ရက်က စတင်ဖော်ပြနေကြတာပါ။

” မုံရွာမြို့ပေါ်ပြုလုပ်ခဲ့တဲ့ မစ်ရှင်မှာ ရဲဘော် ၅ ယောက်ထဲက ၂ ယောက်မိတယ်ဆိုပြီး စစ်တပ်က ဝါဒဖြန့်နေတယ်။ တကယ်လုပ်ခဲ့တာက ၄ ယောက်တည်းပါ။ မစ်ရှင်လုပ်ပြီး နာရီဝက်လောက်ကတည်းက လွတ်မြောက်နယ်မြေကိုရောက်ခဲ့ပါတယ်။ မိတဲ့သူတွေဆိုတာကလည်း ဘယ်ကညီကိုတွေမှန်းမသိဘူး။ ကျနော်တို့နဲ့မစ်ရှင်တူတူလုပ်ခဲ့တဲ့ရဲဘော်တွေက ကျနော်နဲ့အတူတူ ဘေးကင်းလုံခြုံစိတ်ချရတဲ့နေရာမှာ ရှိနေပါတယ်”လို့ The Phoenix Army-TPA တာဝန်ခံ ရဲဘော်ရောင်နီက မြေလတ်အသံကို ပြောပါတယ်။

စစ်ကောင်စီတယ်လီဂရမ်တွေမှာ ဖော်ပြနေတဲ့ လူငယ် ၂ ဦးဟာ စစ်ကောင်စီတပ်သားတွေဘက်က မတရားဖမ်းဆီးထားပြီး ရိုက်နှက်မှုဒဏ်ကိုမခံနိုင်လို့ မဟုတ်ဘဲနဲ့ဝန်ခံထားရတဲ့ အရပ်သားပြည်သူတွေ ဖြစ်နိုင်တယ်လို့ သူကဆက်ပြောပါတယ်။

ပစ်ခတ်မှုဖြစ်ပွားခဲ့တဲ့ ဇွန် ၁ ရက်ညနေပိုင်းမှာ စစ်ကောင်စီတပ်ဖွဲ့ဝင်တွေဟာ အချုပ်ကားတွေနဲ့ ရောက်လာပြီး အခင်းဖြစ်နေရာ အနီးအနားနေအိမ်တွေနဲ့လမ်းတွေပေါ်က ပြည်သူ ၇၀ ခန့်ကို ဖမ်းဆီးခေါ်ဆောင်သွားခဲ့ကာ ဇွန် ၃ ရက်မှာ ပြန်လည်လွတ်မြောက်လာသူတွေလည်းရှိတယ်လို့ ရပ်ကွက်နေ ပြည်သူတွေထံက သိရပါတယ်။

အဆိုပါ လူငယ် ၂ ဦးဟာ စစ်ကောင်စီတပ်ဖွဲ့ဝင်တွေ ဖမ်းဆီးသွားတဲ့ အရပ်သား ၇၀ ဦးထဲက ဖြစ်နိုင်ကြောင်းလည်း TPA တာဝန်ခံက ပြောပါတယ်။

ဇွန် ၁ ရက် မနက်ပိုင်းမှာ မုံရွာမြို့၊ အထက (၁) ကျောင်းအနီး လမ်းသွားလမ်းလာကားတွေထံက ပိုက်ဆံကောက်နေတဲ့ စစ်ကောင်စီတပ်သား ၂ ဦးကို The Phoenix Army-TPA၊ မုံရွာခရိုင်အမှတ် ၁၇ တပ်ရင်း၊ တပ်ခွဲ ၃ MYF၊ မုံရွာခရိုင် အမှတ် ၁၅ တပ်ရင်း၊ တပ်ခွဲ ၅ WMW အဖွဲ့ဝင်တွေက ပစ်ခတ်လို့ ၂ ဦးစလုံးနေရာမှာပင်သေဆုံးသွားတယ်လို့ သိရပါတယ်။

စာတည်း – ဟိန်းစံ

ပခုက္ကူ၊ မေ ၁၄၊ ၂၀၂၅။

မကွေးတိုင်း၊ ပခုက္ကူမြို့က ပျူစောထီးခေါင်းဆောင်တဦးကို လက်ပစ်ဗုံးတွေနဲ့အတူဖမ်းမိခဲ့တယ်လို့ မြင်းခြံခရိုင်တပ်ရင်း ၉၊ Myingyan Black Tiger – MBT က မေ ၁၃ ရက်မှာ သတင်းထုတ်ပြန်ပါတယ်။

မေ ၉ ရက် ညနေ ၅ နာရီလောက်မှာ ပခုက္ကူမြို့၊ စက်မှုဇုန် ၆ လမ်းနဲ့ ၇ လမ်းကြားမှာနေထိုင်တဲ့ ပျူစောထီးခေါင်းဆောင် အရှည်ကြီး (ခ) ဒူးရှည်ကို ဖမ်းမိတာလို့ သိရပါတယ်။

“အဓိကတော့ တခြား mission လုပ်ဖို့သွားတာ၊ ကျနော်တို့ ရဲဘော်တွေက အဲ့ဒီရပ်ကွက်က ပျူစောထီး ခေါင်းဆောင်ကိုတွေ့တာ၊ သူကလည်း စစ်ကောင်စီရဲ့အဓိကအရေးပါတဲ့သူမလို့ ကျနော်တို့ ဖမ်းဆီးခေါ်ဆောင်လာခဲ့တာပါ၊” လို့ MBT ခေါင်းဆောင် ဗိုလ်မိုက်ခဲက ပြောပါတယ်။

အရှည်ကြီးဟာ စစ်ကောင်စီတပ်တွေနဲ့ပေါင်းပြီး ငွေတောင်းတာ၊ ဒေသခံတွေကိုဖမ်းဆီးရိုက်နှက်တာတွေလုပ်တဲ့အပြင် သူကြောင့်လူသေဆုံးတဲ့ဖြစ်စဥ်တွေလည်းရှိတယ်လို့ ဆိုပါတယ်။

ပြီးခဲ့တဲ့ ၂၀၂၄၊ ဧပြီ ၁၀ ရက်က ပခုက္ကူမြို့၊ စက်မှုဇုန် ၆ လမ်းနဲ့ ၇ လမ်းကြားမှာနေထိုင်တဲ့ ပြည်သူ ၁ ဦးကို PDF တွေကိုထောက်ပံ့တယ်ဆိုပြီး ပျူစောထီးခေါင်းဆောင်အရှည်ကြီးက စစ်ကောင်စီကိုသတင်းပေးဖမ်းဆီးခိုင်းခဲ့သေးတယ်လို့ သိရကြောင်း ခေါင်းဆောင် ဗိုလ်မိုက်ခဲက ပြောပါတယ်။

လက်ရှိမှာစစ်ဆေးမေးမြန်းမှုတွေလုပ်နေပြီး သူ့ဆီကနေ လက်ပစ်ဗုံး ၁ လုံး၊ ဖုန်း ၂ လုံးနဲ့ ဆိုင်ကယ် ၁ စီး တို့ကို သိမ်းဆည်းရရှိထားတယ်လို့ ဗိုလ်မိုက်ခဲကပြောပါတယ်။

ပြီးခဲ့တဲ့ ဧပြီ ၃၀ ရက်ကလည်း မြင်းခြံခရိုင်၊ဆီမီးခုံမြို့အတွင်း ကင်းပတ်လှည့်လည်နေတဲ့ စစ်ကောင်စီတပ်ဖွဲ့ဝင်တွေကို MBT အဖွဲ့က ပစ်ခတ်တိုက်ခိုက်ခဲ့ရာ ဗိုလ်တဦးနဲ့ ပျူစောထီး ၂ ဦးသေဆုံးခဲ့ပါသေးတယ်။

စာတည်း – လင်း