ပုလဲ

စစ်ကိုင်း၊ မတ် ၃၀၊ ၂၀၂၃။

စစ်ကိုင်းတိုင်း၊ ပုလဲမြို့နယ်၊ အင်မထီးရွာ ပျူစောထီးစခန်းက စစ်ကောင်စီတပ်ဖွဲ့ဝင်တွေနဲ့ပျူစောထီးတွေ မတ် ၂၆ ရက် မနက် ၁၀ နာရီအချိန်လောက်က တိုက်မိုင်းထိလို့ သေဆုံး၊ဒဏ်ရာရသူတွေရှိတယ်လို့ ပုံတောင် Tiger PDF က မတ်လ ၂၉ ရက်မနေ့က ထုတ်ပြန်ပါတယ်။

ပျူစောထီးရွာ စခန်းကနေ အနီးပတ်ဝန်းကျင်တဝိုက်ကို လှည့်ကင်းပတ်ချိန် အင်မထီးရွာအနီး လမ်းတနေရာမှာ PDF ဘက်က ထောင်ထားတဲ့ တိုက်မိုင်းထိတာဖြစ်တယ်လို့ PDF တာဝန်ရှိသူက ပြောပါတယ်။

“Royal Eagle အဖွဲ့က ထောင်ထားတဲ့ တိုက်မိုင်းမိတာပါ။ အင်းမထီးရွာရဲ့အနောက်မြောက်ဘက်နားမှာ ဖြစ်တာ။ ၂၈ ရက်နေ့မှ ပျူ ၂ ယောက်နဲ့ စစ်သား ၁ ယောက် သေတာနဲ့ ၇ ယောက်ဒဏ်ရာရတာ ပြန်သိရတယ်” လို့ သတင်းထောက်လှမ်းရေး တာဝန်ခံ အိုင်အိုဘခက်က မြေလတ်အသံကို ပြောပါတယ်။

တိုက်ခိုက်မှုကို ယင်းမာပင်ခရိုင် တပ်ရင်း-၇၊ ပုလဲမြို့နယ် တပ်ရင်း-၁၊ Royal Eagle တပ်ခွဲ-၂၊ ပုံတောင် TIGER PDF တို့က လုပ်ဆောင်ခဲ့တာ ဖြစ်တယ်လို့ သိရပါတယ်။

မတ်လ ၁၂ ရက်နေ့ကလည်း ပုလဲမြို့နယ် အထွေထွေအုပ်ချုပ်ရေးရုံးမှာ တပ်စွဲနေတဲ့ စစ်အုပ်စု လက်နက်ကြီးနဲ့ ပစ်ခတ်တိုက်ခိုက်ခံရပြီး ရဲတပ်ဖွဲ့ဝင် ၁ ဦး ထိခိုက်ဒဏ်ရာရရှိခဲ့တယ်လို့ သိရပါတယ်။

စာတည်း – ရင်ငြိမ်း

ပုလဲ၊ မတ် ၁၆၊ ၂၀၂၃။

ယင်းမာပင်ခရိုင်၊ ပုလဲမြို့နယ်ရှိ ပြည်သူ့ကာကွယ်ရေးစခန်းတခုမှာ လေပြင်းတိုက် လျှပ်စီးကြောင်းထိမှန်ပြီး ဆိုင်ကယ်တစီး မီးလောင်ဆုံးရှုံးခဲ့တယ်လို့ သိရပါတယ်။

မတ်လ ၁၅ ရက်နေ့၊ ညသန်းခေါင်ယံ အချိန်ခန့်က ဖြစ်ပွားခဲ့တာလို့ ယင်းမာပင်ခရိုင်၊ အမှတ် ၁၂ တပ်ရင်း P1.3012 Guerilla Ranger တပ်ရင်းရဲ့ တာ၀န်ခံ ကိုနေမင်း က မြေလတ်အသံကို ပြောပါတယ်။

“မိုးရွာတာက နည်းတယ်ဗျ။ လေတိုက်တာက အတော်များတယ်။ မိုးခြိမ်းပြီး လျှပ်စီးလက်တာများတော့ လျှပ်စီးကြောင်းထိလို့ ဆိုင်ကယ်ကို မီးစွဲလောင်တာပါ။ တဲစခန်းနဲ့က နီးပေမယ့် ရေစိုနေတော့ တခြားပစ္စည်းတွေ ပျက်စီးဆုံးရှုံးတာ မရှိပါဘူး” လို့ ကိုနေမင်း က မြေလတ်အသံကို ပြောပါတယ်။

မိုးလေဝသ လေ့လာခန့်မှန်းသူ တဦးက မတ်လ ၁၀ ရက်နေ့ကစလို့ မြန်မာနိုင်ငံတဝှမ်း မိုးသက်လေပြင်းကျကာ မိုးသီးများ ကြွေကျနိုင်ပြီး မွန်၊ ကရင်၊ ရန်ကုန်၊ ပဲခူး၊ ဧရာဝတီ၊
မကွေး၊ မန္တလေး၊ စစ်ကိုင်း ကဲ့သို့ပြည်နယ်နဲ့ တိုင်းအချို့မှာ မိုးထစ်ချုန်းရွာသွန်းတာတွေ ဖြစ်နိုင်တယ်လို့ ခန့်မှန်းပြောဆိုထားပါတယ်။

စာတည်း – 007

ပုလဲ၊ ဖေဖော်ဝါရီ ၂‌၇၊ ၂၀၂၃။

စစ်ကိုင်းတိုင်း၊ ပုလဲမြို့နယ်၊ အောင်ချမ်းသာကျေးရွာမှ အမျိုးသားတဦးမှာ ရက်ပေါင်း ၄၈ ရက်ကြာ ပျောက်ဆုံးနေပြီးနောက် ဖေဖော်ဝါရီ ၂၆ ရက် မနက်အချိန်မှာ ဦးခေါင်းပြတ်ပြီး သေဆုံးနေတဲ့ ရုပ်အလောင်းကိုသာ တွေ့ရှိခဲ့ရတယ်လို့ သိရပါတယ်။

သေဆုံးသူမှာ ဦးငြိမ်းဝင်း ၄၈ နှစ် ဖြစ်ပြီး၊ သူက ဇန်နဝါရီ ၁၀ ရက် ည ၉ နာရီအချိန်မှာ နေအိမ်က ထွက်သွားခဲ့ပြီးနောက် ပျောက်ဆုံးသွားခဲ့တာ ဖြစ်တယ်လို့ Pale Joker PDF မှသတင်းပြန်ကြားရေးတာဝန်ခံက မြေလတ်အသံကို ပြောပါတယ်။

“သူက စိတ်မနှံ့ဘူးဗျ။ အိမ်ကနေ သူ့အလိုလို ထွက်သွားတာ။ အဲဒီနေ့ကတည်းက ရှာမတွေ့ တော့တာ။ မနေ့က သူ့ရဲ့အလောင်းကို ကြောင်ဝင်ဒူးရွာရဲ့ချောင်းထဲမှာ ငါးရှာနေတဲ့ကလေး တွေ တွေ့ခဲ့တာ။ အလောင်းမှာက ဦးခေါင်းမရှိတော့ဘူး။ ဦးခေါင်းကို တနာရီနီးပါး ရှာကြည့် သေးတယ်၊ မတွေ့ဘူး။ အဲဒါကြောင့် ညနေလောက်မှာ သင်္ဂြိုဟ်လိုက်တယ်” လို့ ဆိုပါတယ်။

​အလောင်းတွေ့ရှိခဲ့တဲ့နေရာမှာ ​စစ်ကောင်စီတပ်သားတွေ မီးရှို့ခဲ့တဲ့ ကြောင်ဝင်ဒူးကျေးရွာရဲ့ တောင်ဘက် ချောင်းထဲမှာဖြစ်ပြီး၊ ကြောင်ဝင်ဒူးရွာမှာလည်း စစ်ကောင်စီတပ်စွဲနေတဲ့ ကန့်ဒေါင့်ကျေးရွာနဲ့ ၃ ဖာလုံခန့်သာဝေးတယ်လို့ အထက်ပါတာဝန်ရှိသူက ပြောပါတယ်။

“အလောင်းကို တွေ့တဲ့နေရာကလည်း စကစတွေ သွားလာတဲ့လမ်းကြောင်းနားမှာ။ အဲလမ်း ကြောင်းက ဒေသခံတွေ သွားလာလေ့မရှိတဲ့ လမ်းကြောင်းပါ။ ငြိမ်းဝင်း ထွက်သွားတဲ့နေ့က စကစတွေ ရွာကို မီးရှို့တဲ့နေ့ပဲဗျ။ စကစတွေ သတ်သွားတာလို့ပဲ ယူဆတယ်” လို့ ဆိုပါတယ်။

ပြီးခဲ့တဲ့ ဇန်နဝါရီ ၁၀ ရက်နေ့က စတင်ပြီးတော့ ကန့်ဒေါင့်ကျေးရွာထဲ တပ်စွဲနေတဲ့ စစ်ကောင်စီ တပ်သားတွေမှာ ကြောင်ဝင်ဒူးကျေးရွာကို မီးရှို့ခဲ့တာကြောင့် လူနေအိမ် ၃၀ ကျော်ပြာကျ ပျက်စီးခဲ့တယ်လို့ သိရပါတယ်။

ကန့်ဒေါင့်၊ ကြောင်ဝင်ဒူး၊ အောင်ချမ်းသာစတဲ့ ကျေးရွာ ၃ ရွာမှာ ရွာနီးစပ်တွေ ဖြစ်ကြပြီး တရွာနဲ့တရွာ ၂ ဖာလုံ၊ ၄ ဖာလုံခန့်သာ ကွာဝေးကြတယ်လို့ ဒေသခံတွေက ပြောပါတယ်။

ပြီးခဲ့တဲ့ ဖေဖော်ဝါရီ ၉ ရက်နေ့မှာလည်း သာစည်ကျေးရွာမှ အမျိုးသမီး ညီအစ်မ ၂ ဦးမှာ ကန့်ဒေါင့်ကျေးရွာအနီးမှာရှိတဲ့ မိမိတို့ လယ်ပြင်ထဲကောက်ပဲသီးနှံသိမ်းနေကြချိန် မိုင်းနင်းမိခဲ့တာကြောင့် တဦးမှာ ခြေထောက်တဖက် ပြတ်လိုက်ရတယ်လို့ သိရပါတယ်။

ပုလဲ၊ ဖေဖော်ဝါရီ ၂၁၊ ၂၀၂၃။

စစ်ကိုင်းတိုင်း၊ ပုလဲမြို့နယ်က စစ်ရှောင်အချို့ကို ဖေဖော်ဝါရီလ ၂၀ ရက် မနေ့ကမနက်ပိုင်းမှာ ပုလဲမြို့နယ် ပြည်သူ့အုပ်ချုပ်ရေးအဖွဲ့ဝင်တွေက ငွေနဲ့ရိက္ခာတွေ လှူဒါန်းထောက်ပံ့ပေးခဲ့တယ်လို့ သိရပါတယ်။

ပုလဲမြို့နယ်၊ ဇီးဖြူကုန်းကျေးရွာကနေ တိမ်းရှောင်နေတဲ့ အိမ်ထောင်စု ၈၀ ကျော်အတွက် ထိုင်းရောက်မြန်မာနိုင်ငံသားများ စည်းလုံးညီညွတ်ရေးအဖွဲ့၊ မြို့နယ် ပ အ ဖ နဲ့ အလှူရှင်အချို့တို့ ပူးပေါင်းပြီး လှူဒါန်းခဲ့တာလို့ ပုလဲမြို့နယ် ပြည့်သူ့အုပ်ချုပ်ရေးအဖွဲ့ခေါင်းဆောင် ကိုဇော်ထက်က ပြောပါတယ်။

“စစ်ကောင်စီက ဇီးဖြူကုန်းရွာကို ပျူရွာလုပ်တာကို လက်မခံပဲ ထွက်ပြေးလာတဲ့ အိမ်ထောင်စု ၈၀ ကျော် လူဦးရေ ၄၀၀ ကျော်ကို ဒီနေ့သွားရောက်လှူဒါန်းခဲ့တာ၊ သူတို့ရွာကို ပျူရွာ အလုပ်ခံလိုက်ရတော့ ပျူလို့ သတ်မှတ်တာကို လက်မခံလို့ ထွက်ပြေးလာကြတာဆိုတော့ ပစ္စည်းတွေလည်း မယူခဲ့နိုင်ကြဘူး။ ရွာမှာ ကျန်ခဲ့တဲ့ သူတို့အိမ်က အသုံးအဆောင်ပစ္စည်းတွေကိုလည်း ရွာခံပျူတွေနဲ့ စစ်ကောင်စီအဖွဲ့က မီးရှို့လိုက်တာ” လို့ ပြောပါတယ်။

မြို့နယ် ပ အ ဖက ဆန် ၁ တင်းခွဲ အိတ် ၂၀၊ ဆီ ၅ ပိဿပုံ ၅ ပုံး၊ ထိုင်းရောက်မြန်မာနိုင်ငံသားများ စည်းလုံးညီညွတ်ရေးအဖွဲ့က ငွေကျပ် ၅ သိန်း ၂ သောင်း၊ ရန်ကုန်အလှူရှင် တဦးက လှူလိုက်တဲ့ အနွေးထည် ၁၂၀နဲ့ ဖိနပ်တွေကို စုပေါင်းပြီး လှူဒါန်းပေးခဲ့ကြတာလည်း ဖြစ်ပါတယ်။

လက်ရှိအချိန်ထိလည်း ဇီးဖြူကုန်းကျေးရွာမှာ စစ်အုပ်စုက ရွာခံပျူစောထီးအချို့နဲ့ ပူးပေါင်းတပ်စွဲနေတာကြောင့် ရွာသားတွေအနေနဲ့ သူတို့ပိုင်ဆိုင်တဲ့ လယ်ယာမြေတွေမှာ မလုပ်ကိုင်ရဲတော့ဘဲ အခြားနီးစပ်ရာကျေးရွာတွေမှာသာ တိမ်းရှောင်ရင်း ကြုံရာအလုပ်တွေကို လုပ်ကိုင်နေကြရတယ်လို့ သိရပါတယ်။

စစ်ကိုင်း၊ ဖေဖော်ဝါရီ ၁၉၊ ၂၀၂၃။

စစ်ကိုင်းတိုင်း၊ ပုလဲမြို့နယ်၊ နှောရိုးရွာက နေအိမ် ၃ လုံးကို စစ်ကောင်စီတပ်သားတွေက မီးရှို့ဖျက်ဆီးခဲ့ပြီး နေအိမ်တွေထဲကပစ္စည်းတွေကိုလည်း မွှေနှောက်ယူသွားတယ်လို့ သိရပါတယ်။

အင်အား ၇၀ ဝန်းကျင်ပါတဲ့စစ်သားတွေဟာ ဖေဖော်ဝါရီလ ၁၈ ရက်မနေ့ကမနက် ၉ နာရီလောက်မှာ ဝင်ရောက်မီးရှို့ခဲ့တာလို့ Pale Joker PDF မှ ဗိုလ်ပုလဲက ပြောပါတယ်။

“ဇီးဖြူကုန်းရွာကို စစ်ကြောင်းရောက်ကတည်းက အနီးအနားကရွာတွေကို စစ်ရှောင်ဖို့အတွက် အကုန်လုံးကို ဆော်သြထားတာ၊ နှောရိုးရွာကို စစ်ကြောင်းထွက်လာတော့ ရွာမှာက လူတွေမကျန်ခဲ့ဘူး၊ အားလုံးရွာကထွက်သွားကြတာ၊ မနေ့က ဇီးဖြူကုန်းရွာကိုရောက်ပြီး မနက် ၉ နာရီခွဲမှာ နှောရိုးရွာဘက်ကို ထွက်လာတာ။ ရွာလယ်က ‌နေအိမ် ၃ လုံးမီးရှို့၊ နေအိမ်တွေက ပစ္စည်းတွေကို မွှေနှောက်ယူသွားတယ်”လို့ သူကပြောပါတယ်။

နှောရိုးကျေးရွာမှာ အိမ်ခြေ ၁ ထောင်နဲ့ လူဦးရေ ၁၅၀၀ ဝန်းကျင်ရှိပြီး စစ်ကောင်စီတပ်တွေရဲ့ မီးရှို့တာကို ခံရတာဟာ ပထမဆုံးအကြိမ်ဖြစ်တယ်လို့လည်း ဆိုပါတယ်။

အဲ့ဒီစစ်ကောင်စီတပ်တွေဟာ ပြီးခဲ့တဲ့ဖေဖော်ဝါရီလ ၁၅ ရက်ကလည်း ကိုင်းတွင်းရွာက PDF စခန်းတခုနဲ့ နေအိမ် ၂ လုံးကို မီးရှို့ခဲ့ပြီး၊ အဲ့ဒီကနေတဆင့် ၁၆ ရက်မှာတော့ မင်းတိုင်ပင်ရွာက နေအိမ် ၆ လုံးနဲ့ စာသင်ကျောင်းတကျောင်းကိုပါ မီးရှို့ဖျက်ဆီးခဲ့ပါသေးတယ်။

အဲ့ဒီစစ်အုပ်စုဟာ လက်ရှိမှာတော့ နွယ်အင်းကျေးရွာကိုရောက်ရှိနေတယ်လို့သိရကာ နှောရိုး၊ သပြေအေး၊ မင်းတိုင်ပင်ရွာစတဲ့ ကျေးရွာတွေက ဒေသခံ ၆ ထောင်ကျော်လည်း ရွာကနေ ထွက်ပြေးတိမ်ရှောင်နေရတယ်လို့ သိရပါတယ်။