မြေလတ်အသံ၊ အောက်တိုဘာ ၂၉၊ ၂၀၂၅။

ပဲခူးတိုင်း၊ ပန်းတောင်းမြို့နယ်၊ အမှတ်- ၁၆ ကာကွယ်ရေးပစ္စည်းစက်ရုံ (ကပစ-၁၆) လုံခြုံရေးအတွက် အနီးဝန်းကျင်ရှိကျေးရွာတွေကဒေသခံတွေကို စစ်ကော်မရှင်တပ်ဖွဲ့ဝင်တွေနဲ့ရောပြီး ကင်းစောင့် ခိုင်းထားတယ်လို့ ဒေသခံတွေဆီက သိရပါတယ်။

အောက်တိုဘာလ ပထမပတ်ကစတင်ကာ မသုံရွာ၊ ဖလုံရွာ၊ ကျားခြေရာရွာ၊ ကျောက်ဇကွဲရွာတွေက ဒေသခံအမျိုးသားတွေဟာ ကပစ-၁၆ ရဲ့ကာကင်းစခန်းတွေမှာ ၁ ရက်စီ အလှည့်ကျကင်းစောင့်နေရတာလို့ ဆိုပါတယ်။

“ကင်းမစောင့်မနေရ တအိမ်တယောက်ကျပေါ့။ အလှည့်ကျစောင့်ရတယ်။ ရွာသားတွေက စစ်ယူနီဖောင်း (စကမ)ကို ဝတ်ရတယ်။ အဲ့တာကိုဝတ်ပြီးတော့မှ ကင်းစောင့်ရတယ်။ ကင်းကရွာထဲမှာ စောင့်ရတာမဟုတ်ဘူး။ သူတို့ရဲ့(စကမ)ကပစ-၁၆မှာ ကာကင်းတွေရှိပါတယ်။ စက်ရုံတခုလုံးကို ကာထားတဲ့ကင်းတွေပေါ့။ အဲဒီကာကင်းတွေမှာ သွားသွားပြီးစောင့်ရတာပါ။ အန္တရာယ်များတာပေါ့ဗျာ”လို့ မြေပြင်အခြေအနေကိုသိရှိတဲ့ ပန်းတောင်းဒေသခံ အမျိုးသားတဦးက ပြောပါတယ်။

ကပစ ၁၆ အနီးမှာ ကာကင်းစခန်းတွေမှာကင်းစောင့်ရချိန် စစ်တပ်ယူနီဖောင်းတွေကို ဝတ်ဆင်ရပေမယ့် သေနတ်မကိုင်ရဘဲ သေနတ်ကိုင်ဆောင်ထားတဲ့ စစ်သားတွေနဲ့အတူရောပြီး နေ့ရော၊ ညပါ ကင်းဘန်ကာတွေမှာ နေနေရတာလို့ အထက်ပါအမျိုးသားကဆိုပါတယ်။

ဒါ့အပြင် စစ်အင်အား ၂၀ ဦးစီရှိတဲ့ ကင်းစခန်းမှာဆိုလျှင် ၁၅ ဦးက အရပ်သားတွေဖြစ်ပြီး ကျန် ၅ ဦးက စစ်ကသားတွေဖြစ်ကာ၊ ၁၀ ဦးရှိတဲ့ကင်းစခန်းမှာဆိုလျှင်တော့ ၇ ဦးက အရပ်သား တွေဖြစ်ပြီး ၃ ဦးမှာ စစ်သားတွေဖြစ်တာကြောင့် ကင်းစခန်းအပေါ်မူတည်ကာ ကင်းလုံခြုံရေးယူပေးနေရတာလို့လည်း သူကဆိုပါတယ်။

“ရွာသားတွေကတော့ ပုံမှန်စောင့်ရမှာပါ။ ဘယ်ရက်အထိ ဘယ်ခါထိမဟုတ်ပါဘူး။ ရွာထဲမှာလူဦးရေ ၅၀ ရှိရင် ၁၅ ယောက်က ဒီနေ့စောင့်၊ နောက် ၁၅ ယောက်က မနက်ဖြန်စောင့် အလှည့်ကျ စောင့်နေရတာပါ။ ပြောရရင်တော်လှန်ရေးမပြီးမချင်း စောင့်ရမယ့်သဘောရှိနေတယ်။ သူတို့လုံးဝ ဘယ်မှထွက်မရတော့ပဲနဲ့ ဒီစက်ရုံကိုကာကွယ်ရမယ့်သဘောရှိနေတယ်”လို့ အထက်ပါအမျိုးသားက ပြောပါတယ်။

တနေ့တာအတွက် ရွာ ၁ ရွာကအသက် ၁၈ နှစ်ကနေ ၅၀ ကြား အမျိုးသား ၁၅ ဦးနှုန်းနဲ့ ၄ ရွာပေါင်း လူ ၆၀ ဦးကင်းစောင့်ဖို့သွားရကာ အခုလိုနေ့စဥ်အလှည့်ကျ ကင်းစောင့်ဖို့လုပ်ငန်းစဥ်တွေကို သက်ဆိုင်ရာကျေးရွာရှိ အုပ်ချုပ်ရေးမှူးနဲ့ စစ်ကော်မရှင်တပ်သားတွေက နေ့စဥ်ဦးဆောင်ကာပို့ဆောင်နေတာလို့ ဆိုပါတယ်။

ခုလိုရွာသားတွေကို ကင်းစောင့်ခိုင်းရတာဟာ ကပစ ၁၆ မှာအင်အားနည်းကာ အာရက္ခတပ်တော် – AA ထိုးစစ်ကို ကြောက်လို့ဖြစ်နိုင်တယ်လို့ အထက်ပါအမျိုးသားက ခန့်မှန်းပါတယ်။

မစောင့်မနေအခြေအနေနဲ့စစ်ကော်မရှင်ဘက်က အကြောင်းကြားတာဖြစ်ပြီး ဒေသခံတွေအနေနဲ့လည်း ကင်းမစောင့်ရင် စစ်ထဲဝင်ရမှာ၊ ပစ်သတ်ခံရမှာတွေကို ကြောက်ပြီးစောင့်နေကြရကာ တိုက်ပွဲဖြစ်လာမှာကိုလည်း စိုးရိမ်နေရတယ်လို့ သူကဆက်ပြောပါတယ်။

ဒါ့အပြင် အထက်ပါကျေးရွာ ၄ ရွာကိုလုံခြုံရေးအရဟုဆိုကာ အောက်တိုဘာ ၁၃ ရက်ကစလို့ ရွာအပြင်ထွက်ခွင့်ပိတ်ထားသလို စစ်ကော်မရှင်တပ်သား ၁၀ ဦးကို ရွာထဲမှာစောင့်ခိုင်းထားပြီး ရွာပြင်ထွက်တာကို ဖမ်းမိရင် စစ်မှုထမ်းသင်တန်းပို့မယ်ဆိုပြီး ပြောဆိုခြိမ်းခြောက်တာတွေလည်း ရှိတယ်လို့ ဒေသခံတွေကဆိုပါတယ်။

ခုလိုဝင်ထွက်ခွင့်ပိတ်လိုက်တဲ့ အဆိုပါကျေးရွာတွေက ဒေသခံ ၁,၀၀၀ ကျော်စားသောက်ရေးခက်ခဲနေပြီး ကင်းစောင့်ကျတဲ့မိသားစုဝင်တွေကိုတော့ စစ်ကော်မရှင်ဘက်က ဆန်၊ ဆီ၊ ဆားပေးတာရှိတယ်လို့ သိရပါတယ်။

ဒါ့အပြင် အောက်တိုဘာတတိယပတ်အတွင်းမှာလည်း ကပစ ၁၆ အနီး စစ်ကော်မရှင်တပ်နဲ့ AA ပူးပေါင်းတပ်တို့ တိုက်ပွဲတွေပြင်းထန်နေပြီး စစ်တပ်ရဲ့ကာကင်းစခန်းတချို့ကိုလည်း တော်လှန်ရေးတပ်တွေဘက်က ထပ်မံသိမ်းပိုက်ထားတယ်လို့ သိရကာ နောက်ဆက်တွဲအခြေအနေတွေကိုလည်း မြေလတ်အသံက ဆက်လက်စုံစမ်းနေပါတယ်။

ပြီးခဲ့တဲ့ အောက်တိုဘာ ၁၄ ရက်က ပန်းတောင်းမြို့နယ်၊ ပုဂံဂွေ့ (ပန်းကန်ကွဲ) ကျေးရွာတောင်ဘက်၊ ၉ ကီလိုမီတာအကွာအဝေးရှိ စစ်ကော်မရှင်ရဲ့ ၆၆၆ ပွိုင့်ကုန်းကို ၃ နာရီခန့်ကြာတိုက်ခိုက်ခဲ့ပြီးနောက် အပြီးသတ်သိမ်းပိုက်ရရှိခဲ့တယ်လို့ ရုပ်သံမှတ်တမ်းနဲ့တကွ အောက်တိုဘာ ၁၅ ရက်မှာ AA က ထုတ်ပြန်ခဲ့ပါတယ်။

စာတည်း – လင်း

မြေလတ်အသံ၊ အောက်တိုဘာ ၈၊ ၂၀၂၅။

ပဲခူးတိုင်း၊ ပန်းတောင်းမြို့နယ်မှာ ရန်ကုန်မြို့ကိုသွားမယ့် ရခိုင်ဒေသခံ ၅၀ ကျော်ကို အောက်တိုဘာ ၆ ရက်မှာ စစ်ကော်မရှင်တပ်ကဖမ်းဆီးခဲ့တယ်လို့ ဒေသခံတွေဆီကသိရပါတယ်။

ဖမ်းဆီးခံရသူတွေဟာ ရခိုင်ပြည်နယ်၊ တောင်ကုတ်မြို့နယ်အပိုင် ရခိုင်ရိုးမပေါ်မှာတည်ရှိတဲ့ ဒိုးနွယ်စမ်းရွာက ၁၂ ဦး၊ ရေပေါ်ကြီးရွာက ၉ ဦး၊ ရပ်တော်မူရွာက ၆ ဦး၊ စလူရွာက ၄ ဦး၊ ပိန်းနှဲစန်းရွာ ၃ ဦးတို့ အပါအဝင် စုစုပေါင်း ၅၀ ဦးဟာ တောလမ်းကနေ ခြေလျင်လာကြချိန် ပန်းတောင်းမြို့ နယ်အတွင်း စစ်ဆေးရေးဂိတ်တခုမှာ ဖမ်းဆီးခံလိုက်ရတာလို့ ဆိုပါတယ်။

“အခုဖမ်းခံထားရတဲ့ လူတွေက ရိုး(ရခိုင်ရိုးမ)ထဲကရွာတွေက။တောင်ကုတ်အပိုင်ပေါ့။ ဒီရွာတွေအကုန်လုံးက ချင်းရွာတွေ။ အခုဖမ်းခံရတဲ့စာရင်းက ချင်းလူမျိုးတွေရဲ့ စာရင်း။ ရခိုင်တွေ စာရင်းတော့ မသိရသေး။ အဖမ်းခံရတဲ့အထဲမှာ ရခိုင်လူမျိုးတွေလည်းပါတယ်။ စုစုပေါင်းအဖမ်းခံထားရတာ ၅၀ အထိရှိတယ်။ ရခိုင် စာရင်းက မရသေးဘူး”လို့ တောင်ကုတ်ဒေသခံအမျိုးသားတဦးကပြောပါတယ်။

လက်ရှိဖမ်းဆီးခံထားရသူတွေထဲက ချင်းလူမျိုး ၃၄ ဦးမှာ အမျိုးသား၊ အမျိုးသမီး၊ ကလေးငယ်တွေ ပါဝင်ပြီး ၎င်းတို့ရဲ့ ကိုယ်ရေးအချက်အလက်အသေးစိတ်တို့ကို မသိရှိရသေးပေမယ့် သူတို့ကို ဥသျှစ်ပင်မြို့မ ရဲစခန်းမှာထိန်းသိမ်းထားကာ နောက်ထပ် ၁၆ ဦးကတော့ ကပစ – ၆ တပ်မှာ ဖမ်းထားတယ်လို့ အထက်ပါ အမျိုးသားက ဆိုပါတယ်။

ဒါ့အပြင် ဖမ်းဆီးခံထားရသူတွေဟာ ရန်ကုန်မြို့မှာ အလုပ်လုပ်ကိုင်ဖို့သွားတဲ့သူနဲ့ ၎င်းတို့ရဲ့ ကုန်ပစ္စည်းထုပ်တွေကို အငှားထမ်းဖို့လိုက်ပေးသူတွေဖြစ်ပြီး ပြည်မြို့ကပွဲစားနဲ့ချိတ်ဆက်ပြီးလာကြတာလို့ သူကပြောပါတယ်။

ပြီးခဲ့တဲ့ဇွန် ၂၅ ရက်နဲ့ ၂၆ ရက်တို့မှာလည်း တောင်ကုတ်မြို့နယ်ကနေ ရန်ကုန်မြို့ကိုသွားတဲ့ တောင်ကုတ် ဒေသခံ ၄၆ ဦးကို ပြည်မြို့ရှိ နဝဒေးတံတားဂိတ်ရှိ စစ်ကောင်စီတပ်သားတွေရဲ့ဖမ်းဆီးတာကိုခံရပြီးနောက် စစ်သင်တန်းကိုပို့ဆောင်ခဲ့တယ်လို့ ဒေသခံတွေဆီက သိရပါတယ်။

အာရက္ခတပ်တော် – AA သိမ်းပိုက်အုပ်ချုပ်ထားတဲ့ ရခိုင်ပြည်နယ်ထဲကမြို့နယ်တွေမှာအမျိုးသားဆိုလျှင် အသက် ၁၈ မှ ၄၅ နှစ်၊ အမျိုးသမီးဆိုလျှင် အသက် ၁၈ မှ ၂၅ နှစ်အထိ အမျိုးသားကာကွယ်ရေးဆိုင်ရာ အရေးပေါ် ပြဋ္ဌာန်းချက် (NDEP) အရ ၂ နှစ်စာစစ်မှုထမ်းရမှာဖြစ်တာကြောင့် လူငယ်၊ လူရွယ်တွေကို ရခိုင်ပြင်ပသို့ ထွက်ခွာခွင့်ပိတ်ပင်ထားပါတယ်။

ကျိုးကြောင်းဆီလျော်မှုမရှိတဲ့ အကြောင်းပြချက်တွေနဲ့ ရခိုင်မှ နေရပ်စွန့်ခွာလိုသူတွေ၊ NDEP အရ စစ်မှုထမ်းရန်အကျုံးဝင်ပြီး စစ်မှုမထမ်းလို၍ ရခိုင်ပြည်ပြင်ပကို ထွက်ပြေးရန် ကြိုးပမ်းနေသူတွေကို သွားလာခွင့်မပြုဘဲ တည်ငြိမ်တဲ့ စစ်ရေးအခြေအနေတခုကို ရောက်ရှိတဲ့အထိ တားမြစ်လိုက်ကြောင့် မေလ ၂၂ ရက်မှာ AA ကထုတ်ပြန်ခဲ့ပါတယ်။

စာတည်း – လင်း

ပန်းတောင်း၊ မေ ၇၊ ၂၀၂၅။

ပဲခူးတိုင်း၊ ပန်းတောင်းမြို့နယ်၊ ကျီးတောအုပ်စုကကျေးရွာတွေမှာ မေလဆန်းပိုင်းကစပြီး စစ်မှုထမ်းကြေး ခြိမ်းခြောက်တိုးကောက်နေတယ်လို့ ရွာခံတွေဆီက သိရပါတယ်။

ပြည်သူစစ်မှုထမ်းဥပဒေ စတင်အသက်သွင်းတဲ့ ၂၀၂၄ ဖေဖော်ဝါရီကစလို့ ကျီးတောအုပ်စုထဲကကျေးရွာတွေကို အုပ်စုအုပ်ချုပ်ရေးမှူးက စစ်မှုထမ်းလူစားထိုးငှားရမ်းဖို့ ငွေကောက်ခံနေခဲ့တာဖြစ်ပြီး ကောက်ခံရာမှာ ယခင်ငွေထက်တိုးကောက်ပြီး ငွေမပေးနိုင်သူတွေကိုခြိမ်းခြောက်လာတာလို့ ဆိုပါတယ်။

“မပေးတဲ့အိမ်တွေကို မှတ်ထားမယ်ပေါ့။ မှတ်ထားပြီး မြို့နယ်ကိုပြောမယ်ပေါ့။ ပါးစပ်က ဖမ်းမယ်မပြောပေမယ့် အဲ့လိုသဘော သက်ရောက်တယ်။ အကုန်ထည့်ကြရတာပေါ့ ကြောက်တော့။”လို့ ကျီးတောရွာခံတဦးက ပြောပါတယ်။

အပတ်စဉ် ၁ ခုအတွက်စစ်မှုထမ်းကြေး ၁ အိမ်ထောင်ကို ကျပ် ၆,၀၀၀ ကစတင်ကောက်ခံလာခဲ့ရာ အခုမေလမှာ ၁၃,၀၀၀ ကျပ်အထိ တိုးမြှင့်ကောက်ခံလာတာလို့ ဆိုပါတယ်။

ကောက်ခံတဲ့ငွေကို ဒေသခံတွေက ကျေးရွာအုပ်ချုပ်ရေးမှူးရုံးကို လစဉ်တိုက်ရိုက်သွားပေးရတာရှိသလို ဆယ်အိမ်မှူး၊ ရာအိမ်မှူးတွေက နေအိမ်တွေမှာ လိုက်လံကောက်ခံတာတွေရှိပြီး အခု ၁ ကြိမ် ပေးရတာနဲ့ဆို ၁၄ ကြိမ်မြောက်ရှိပြီလို့ ဆိုပါတယ်။

ကျီးတောကျေးရွာအုပ်စုမှာ ကျီးတော၊ စာရေးကွင်း(အရှေ့)၊ စာရေးကွင်း (အနောက်)၊ စာစီ ၊ ရေတွင်းလှ၊ ကြပ်ပြို၊ ဖန်းခါးပင်၊ ရှားဇီးဘိုကျေးရွာတို့ပါဝင်ကာ အိမ်ခြေ ၁,၀၀၀ ကျော်ရှိပြီး အဲ့ဒီရွာတွေက ဒေသခံတွေကိုအားလုံးကို ကောက်ခံတာလို့ ကျီးတောရွာခံတဦးက ပြောပါတယ်။

ယခင်လတွေမှာ စစ်မှုထမ်းကြေးမပေးနိင်သူတွေကို တင်းတင်းကျပ်ကျပ်ခြိမ်းခြောက်တာမျိုးနဲ့ ဖမ်းဆီးအရေးယူတာမျိုးမရှိဘဲ မပေးသူတွေများလာတဲ့အတွက် အခုလမှာ နာမည်စာရင်းနဲ့တကွ မြို့နယ်ကိုတင်ပြသွားမယ်ဆိုပြီး ဖိအားပေးခြိမ်းခြောက်လာတာဖြစ်တယ်လို့ သူကပြောပါတယ်။

စစ်မှုထမ်းကြေးဆိုပြီး လစဉ်ကောက်ခံနေပေမယ့် ဒေသခံတွေအနေနဲ့ ကျေးရွာပြင်ပကိုသွားလာချိန် စစ်မှုထမ်းအတွက်ဖမ်းဆီးခံရပါက တာဝန်မယူဘူးဆိုပြီးပြောဆိုထားတဲ့အတွက် ကျေးရွာအနီးဝန်းကျင်ကိုတောင် ဒေသခံတွေကလုပ်ငန်းကိစ္စ၊ လူမှုရေး၊ ကျန်းမာရေးကိစ္စသွားလာဖို့ ကြောက်လန့်နေကြရတယ်လို့ ဆိုပါတယ်။

လက်ရှိမှာစစ်ကောင်စီဘက်က စစ်မှုထမ်းအပတ်စဉ် ၁၃ ကို မေလအတွင်းဖွင့်လှစ်ဖို့ ပြင်ဆင်နေပြီး အခု ကောက်ခံတာက အပတ်စဉ် ၁၄ အတွက် ကြိုတင်ကောက်တာဖြစ်နိုင်တယ်လို့ ပဲခူးတိုင်းအနောက်ခြမ်းမှ CDM စစ်သားတဦးက ပြောပါတယ်။

“အခုလာပြီးလူစာရင်းကောက်တာဆိုရင် အပတ်စဉ် ၁၄ အတွက်ဖြစ်မယ်။ ၁၃ က ရှေ့တပတ်ဖွင့် မယ်ဆိုရင် အခုအချိန် သက်ဆိုင်ရာအောက်ခြေမှာဆင့်ခေါ်တာ စုဆောင်းတာတွေ လုပ်ပြီးလောက်ပြီ။ ဒီသောကြာလောက်ဆို သင်တန်းကျောင်းတွေကိုပို့လိမ့်မယ် သင်တန်းဖွင့်ပွဲအတွက် အနည်းဆုံး ၁ ရက်ခွဲ ၂ ရက်အချိန်ယူရလေ့ရှိတယ်။” လို့ ဆိုပါတယ်။

ဒါ့အပြင် ခုလိုစစ်ကောင်စီတပ်နဲ့ ၎င်းတို့ရဲ့လက်ဝေခံတွေဟာ နည်းမျိုးစုံနဲ့ပြည်သူကို ဒုက္ခပေးနေတာဖြစ်ပြီး ခုလိုငွေမပေးရင်အထက်ကိုတိုင်မယ်ဆိုတာကလည်း ယဉ်ယဉ်ကျေးကျေးခြိမ်းခြောက်တဲ့ သဘောဖြစ်တယ်လို့ သူက ဆက်ပြောပါတယ်။

“စစ်တပ်နဲ့ သူ့လက်ဝေခံအကုန်လုံးက ရတဲ့နည်းနဲ့နည်းမျိုးစုံနဲ့ ဒုက္ခပေးနေတာပဲ။ အစကတည်းက စစ်တပ်က လက်နက်အားကိုးတယ် အကြောက်တရားနဲ့ခြိမ်းခြောက်တယ်။ သူတို့လက်ဝေခံတွေမှာလည်း ဒီသဘောသဘာဝပါလာမှာပဲ။ အနိုင်ကျင့်မယ် ခြိမ်းခြောက်မယ် ဖမ်းဆီးမယ် ဒါမျိုးပေါ့။ အခုဟာဆိုလည်း မပေးရင်အထက်ကိုပြောလိုက်မယ်ဆိုတာ ဖမ်းမယ်ဆီးမယ်မပြောလို့ ယဉ်ယဉ်ကျေးကျေးခြိမ်းခြောက်တာပါဆိုပြီး ကျေးဇူးတင်ပေးရမလိုတောင်ဖြစ်နေတယ်။” လို့ အထက်ပါ CDM စစ်သားတဦးက ပြောပါတယ်။

၂၀၂၄ ဒီဇင်ဘာမှာ ကျီးတောရွာခံ ကိုဇော်ဝင်သိန်းဆိုသူ စစ်မှုထမ်းဖို့ဖမ်းဆီးခံရဖူးပြီး ငွေကျပ်သိန်း ၈၀ ပေးမှ ပြန်လွတ်လာခဲ့ရတယ်လို့ သိရပါတယ်။

ပြီးခဲ့တဲ့ မေ ၅ ရက်ကလည်း ပန်းတောင်းမြို့ပေါ်ကို ကားပြင်ဖို့ သွားတဲ့ ရှားဇီးဘိုရွာက ကိုဘိုလုမှာလည်း ပန်းတောင်းမြို့အဝင်မှာ ပေါ်တာဆွဲခံရပြီး ဟိုက်ဂျက်ကားကောလူပါ ပျောက်ဆုံးနေပြီး မေ ၇ ရက်ထိ ပြန်မလွတ်လာသေးဘူးလို့ သိရပါတယ်။

စာတည်း – လင်း

ပန်းတောင်း၊ ဧပြီ ၂၊ ၂၀၂၅။

ပဲခူးတိုင်းအနောက်ခြမ်း၊ ပန်းတောင်းမြို့နယ်၊ ပန်းတောင်း-တောင်ကုတ်လမ်း ရခိုင်ရိုးမပေါ် ရှိ ညောင်ကျိုးရွာနဲ့အနီးတဝိုက်ကို စစ်ကောင်စီတပ်က လေကြောင်းကနေဗုံးကြဲပြီး လက်နက်ကြီးတွေနဲ့ပစ်ခတ်တိုက်ခိုက်နေတယ်လို့ ဒေသခံတွေထံက သိရပါတယ်။

ဧပြီ ၂ ရက် ဒီကနေ့မနက်ပိုင်းမှာ ညောင်ကျိုးကျေးရွာနဲ့ အနီးပတ်ဝန်းကျင်တဝိုက်ကို တိုက်လေယာဥ် ၁ စီးနဲ့ ဗုံးကြဲတိုက်ခိုက်ခဲ့တဲ့အပြင် စစ်ကောင်စီတပ်ရဲ့ ၂၇ မိုင်စခန်းဘက်ကနေ လက်နက်ကြီးတွေနဲ့ အလုံးရေ အမြောက်အများပစ်ခတ်နေပြီး ညောင်ကျိုးရွာအပေါ်ဝေဟင်မှာလည်း စက်တပ်လေထီးတွေ အဆက်မပြတ်ပျံသန်းနေတယ်လို့ ဆိုပါတယ်။

” ဒီကနေ့(ဧပြီ ၂ရက်) မနက်လုံးလက်နက်ကြီးသံ အကြိမ်စိပ်စိပ်ထုသံကြားရတယ်။ လေယာဥ်နဲ့ဗုံးကြဲသံလည်းကြားရတယ်။ စစ်တပ်က ထုနေတာ။ ခုလည်း ဆက်ပြီးတချက်တချက် ထုနေတယ်။ လေထီး (paramotor)ကလည်း ပတ်သလားမမေးနဲ့ တချိန်လုံးပျံနေတာပဲ”လို့ မြေပြင်အခြေအနေသိရှိထားတဲ့ ပန်းတောင်းဒေသခံ အမျိုးသားတဦးက မြေလတ်အသံကို ပြောပါတယ်။

အာရက္ခတပ်တော် – AAနဲ့တော်လှန်ရေးပူးပေါင်းအဖွဲ့တွေဟာ ပန်တောင်း-တောင်ကုတ်လမ်းပိုင်း ရခိုင်ရိုးမပေါ်ရှိ မိုးထိတောင်၊ပန်းကန်ကွဲ၊ တောင်ပုံကြီး၊ နတ်တောင်ကုန်းစတဲ့ စစ်ကောင်စီစခန်းတွေကို သိမ်းပိုက်ထားနိုင်ပြီး မတ်လဒုတိယအပတ်အတွင်းမှာ ညောင်ကျိုးပင်မစခန်းနဲ့ ကာကင်းစခန်းတွေကို ထိန်းချုပ်ထားနိုင်ကာ လက်ရှိငလျင်ဘေးဒဏ်သင့်ကာလမှာ ထိုးစစ်တွေကို ယာယီတဖက်သတ်ရပ်တန့်လိုက်တာပါ။

မတ် ၂၈ ရက်မှာ လှုပ်ခတ်ခဲ့တဲ့ အင်အားပြင်းငလျင်ကြီးကြောင့် ပျက်စီးဆုံးရှုံးမှုတွေအပေါ် ကူညီကယ်ဆယ်ရေးလုပ်ငန်းတွေဆောင်ရွက်နိုင်ဖို့ တိုက်ပွဲဖြစ်ပွားရာနေရာတွေက ၎င်းတို့ရဲ့ ထိုးစစ်အားလုံးကို ဧပြီ ၃၀ ရက်အထိ ၁ လတာရပ်စဲထားမယ်လို့ အာရက္ခတပ်တော်-AA အပါ ညီနောင်မဟာမိတ် ၃ ဖွဲ့က ဧပြီ ၁ ရက် မနေ့ကထုတ်ပြန်ပါတယ်။

စစ်ခေါင်းဆောင် ဗိုလ်ချုပ်မှူးကြီး မင်းအောင်လှိုင်ကတော့ တိုင်းရင်းသားလက်နက်ကိုင်တွေအနေနဲ့ ၎င်းတို့ရဲ့ထိုးစစ်တွေရပ်တန့်တယ်ဆိုပေမယ့်လေ့ကျင့်မှု၊ တပ်စုဖွဲ့မှုတွေရှိနေကာ အဲ့ဒီပြင်ဆင်မှုတွေကို တိုက်ခိုက်မှုလို့ သဘောထားပြီး လိုအပ်တဲ့ကာကွယ်ရေးဆိုင်ရာလုပ်ငန်းတွေကို ဆက်လက်လုပ်ဆောင်သွားမယ်လို့ ယမန်နေ့မှာပဲ ပြောကြားခဲ့ပါတယ်။

စာတည်း – ဟိန်းစံ