စလင်းချောင်း

မကွေး၊ မေ ၁၆၊ ၂၀၂၃။

မကွေးတိုင်း၊ စလင်းမြို့နယ်၊ ဆင်ဖြူကျွန်းမြို့မှာ ရေစီးနဲ့အတူမျောပါပျောက်ဆုံးသွားပြီးနောက် သေဆုံးလျက်တွေ့ရှိသူ ၃ ဦး အထိရှိလာတယ်လို့ ဒေသခံတွေဆီကသိရပါတယ်။

ရုပ်အလောင်းတွေကို မေလ ၁၅ ရက် မနေ့ကမနက်ပိုင်းနဲ့ညနေပိုင်းတွေမှာ နေရာအသီးသီးကနေ ပြန်လည်ဆယ်ယူရရှိခဲ့ပြီး သေဆုံးသွားသူတွေဟာ ဆင်ဖြူကျွန်းမြို့၊ ပြည်စိုးကုန်းရပ်က အသက် ၇ဝ နှစ်အရွယ်ရှိ ဒေါ်အေးသန်း၊ သူ့ရဲ့ သမီးဖြစ်သူ အသက် ၄၄ နှစ်အရွယ် မယဉ်မင်းစိုးနဲ့ နွယ်တမယ်ရွာသား အသက် ၂၂ နှစ်အရွယ် ကိုရှိန်းတို့ ဖြစ်တယ်လို့ ဆိုပါတယ်။

“အလောင်းတွေကိုတနေရာစီမှာ နာရီခြားပြီး တွေခဲ့ရတာပါ၊ အားလုံးဆယ်ယူရရှိပြီးပါပြီ။ ဆင်ဖြူကျွန်းမှာ တော့ရေလည်းကျသွားပါပြီ။ ဒီနေ့မှာသဂြိုဟ်ဖို့စီစဥ်နေပါတယ်။ လက်ရှိက မိုးရွာလေတိုက်တာမျိုးတော့ မရှိပါဘူး” လို့ ဒေသခံတဦးက မြေလတ်အသံကို ပြောပါတယ်။

မေလ ၁၄ ရက် ညနေပိုင်း စလင်းချောင်းရေတက်လာချိန် မယဉ်မင်းစိုးဟာ ပစ္စည်းတွေသိမ်းဆည်းနေစဉ် ရုတ်တရက် ရေနောက်ပါသွားတဲ့မိခင်ကို လိုက်ဆယ်ရာက ၂ ဦးစလုံး ရေနစ်တာဖြစ်ပြီး ကိုရှိန်းဟာလည်း ဆင်ဖြူကျွန်းအောက်ဈေးမှာ မိခင်ရဲ့ဈေးဆိုင်ကကုန်စိမ်းတွေကို သယ်ယူနေရင်း ရေထဲမျောပါသေဆုံးတာ ဖြစ်တယ်လို့ မြို့ခံတဦးကဆိုပါတယ်။

ဒေါ်အေးသန်းရဲ့အလောင်းကို ဆင်ဖြူကျွန်းမြို့ အရှေ့ဘက်လယ်ကွင်းမှာတွေ့ရှိခဲ့ပြီး မယဉ်မင်းစိုးရဲ့ အလောင်းကို ဆင်ဖြူကျွန်းမြို့ အရှေ့တောင်ဘက်စမ်းတွင်းကျေးရွာအနီးက စမ်းတွင်းကျွန်းမှာတွေ့ရှိကာ ကိုရှိန်းရဲ့အလောင်းကိုတော့ နွယ်တမယ်ရွာရဲ့အောက်ဘက်မှာ တွေ့ခဲ့တာလို့ဆိုပါတယ်။

မိုခါမုန်တိုင်းမိုးကြောင့် စလင်းချောင်းရေမြင့်တက်လာပြီး ဆင်ဖြူကျွန်းမြို့ပေါ်ရပ်ကွက်နဲ့ကျေးရွာ နေအိမ်တွေအတွင်းဝင်ရောက်ခဲ့ကာ ရေစီးသန်တာကြောင့် နေအိမ်အတွင်းပစ္စည်းတွေနဲ့ လယ်ယာသုံး ပစ္စည်းတွေအများအပြား မျောပါဆုံးရှုံးခဲ့တဲ့အပြင် လူသေဆုံးမှုတွေပါဖြစ်ပေါခဲ့တာပါ။

လက်ရှိမှာ ဆင်ဖြူကျွန်းတမြို့လုံး ရေကျသွားပြီဖြစ်သလို ကူညီကယ်ဆယ်မှုတွေလိုအပ်နေပြီး ကူညီကယ်ဆယ်ရေးအဖွဲ့တွေကိုလည်း စစ်ကောင်စီက သတိပြုစောင့်ကြည့်နေတယ်လို့ ဒေသခံတဦးဆီက သိရပါတယ်။

စာတည်း-ရင်ငြိမ်း

မကွေး၊ မေ ၁၅၊ ၂၀၂၃။

မကွေးတိုင်းဒေသကြီး၊ ဆင်ဖြူကျွန်းမြို့မှာ ချောင်းရေကြီးလို့ ပျောက်ဆုံးနေနဲ့ သားအမိ ၄ ဦးအနက် ၃ ဦးအသက်ရှင်လျက်ပြန်တွေ့ပြီး မိခင်၁ ဦးကို သေဆုံးလျက်ပြန်တွေ့ခဲ့တယ်လို့ သိရပါတယ်။

မေလ ၁၄ ရက် ညနေ ၃ နာရီကျော်လောက်မှာ စလင်းချောင်း ရေလျှံလို့ ဆင်ဖြူကျွန်းမြို့မှာ ရေကြီး ရေလျှံဖြစ်ပြီး အသက် ၂နှစ်အရွယ်ကလေးနဲ့အမေဖြစ်သူ ၂ ဦးအပြင် နောက်ထပ်သားအမိ ၂ ဦးလည်း ပျောက်ဆုံးခဲ့တာပါ။

ဆင်ဖြူကျွန်းမြို့၊ ပြန်လွင့်ရပ်ကွက်က ၂ နှစ်အရွယ် မောင်အားချစ်နဲ့ အမေဖြစ်သူ မနှင်းနှင်းနှောင်းတို့ နှစ်ဦးဟာ ဆိုင်ကယ်နဲ့ သုံးပင်တောင်အသွားမှာ ရေကြီးတာနဲ့ ကြုံပြီး ပျောက်ဆုံးခဲ့တာလို့ မိသားစုဝင်တဦးက ပြောပါတယ်။

“သူတို့သားအမိက သူတူ ၂ ယောက်ကို ဆိုင်ကယ်နဲ့ နေအိမ်လိုက်ပို့တာ။ လမ်းမှာ ရေတွေက တက်လာတော့ ဆိုင်ကယ်တွေက ဆက်သွားမရတော့ဘူး။ တူ ၂ ယောက်ကိုက မီးသတ်တွေက ကယ်လိုက်လို့ ဆိုင်ကယ်ရောလူတွေရော ပြန်ရတယ်။ သူတို့သားအမိ နှစ်ယောက်က ပျောက်သွားတာ။ ပြန်တွေ့တဲ့အချိန်မေးကြည့်တော့ လမ်းမှာရေကြီးတော့ ဆက်သွားမရဘဲ ပိတ်မိနေခဲ့တာ။ ရေနဲ့တော့ နည်းနည်းပါသွားသေးတယ်တဲ့။ ပတ်ဝန်းကျင်ကကူညီလို့ အဲ့နားက ဘုရားကုန်းပေါ်မှာ ပို့ပေးခဲ့တယ်လို့ သိရတယ်” လို့ ပြောပါတယ်။

အဲ့ဒီအပြင် ညနေ ၄ နာရီမှာ ပြည်စိုးကုန်းရပ်နေ ဒေါ်အေးသန်းနဲ့ ဒေါ်ယာဥ်မင်းစိုးတို့ သားအမိ ၂ ဦးလည်း နေအိမ်မှာရှိနေချိန် ရေစီးနဲ့ မျောပါသွားပြီးပျောက်ဆုံးခဲ့တာပါ။

“သူတို့ သားအမိက အိမ်ထဲရှိနေချိန် တံခါးဖွင့်လိုက်တာ ရေတက်တာနဲ့ကြုံပြီး ရေစီးနဲ့မျောပါသွားတာ။ အမေကတော့ သေသွားတယ်။ သမီးကတော့ အသက်ရှင်လျက် ပြန်တွေ့ရတယ်။” လို့ ဒေသခံတဦးက ပြောပါတယ်။

မေလ ၁၅ ရက် ဒီနေ့မနက် ၁ နာရီခန့်မှာ ဒေါ်အေးသန်း အလောင်းကို သုံးပင်တောင်ရပ်ကွက်၊ ရေမိန်ရိပ်သာကျောင်းအနီးမှာ ပြန်တွေ့ခဲ့ပြီး သမီးဖြစ်သူ ဒေါ်ယဥ်မင်းစိုးကိုပါ အသက်ရှင်လျက်ပြန်တွေ့ခဲ့တယ်လို့ ဆိုပါတယ်။

မေလ ၁၄ ရက်ညနေ စလင်းချောင်း ရေလျှံလို့ ဆင်ဖြူကျွန်းမြို့ သုံးပင်တောင်၊ ကွက်သစ်ရပ်ကွက်၊ ပြည်စိုးကုန်း၊ ရွာသစ်ကလေး၊ ရွာသစ်ကြီး၊ ရန်ဘိုကုန်းရွာ၊ နွယ်တမယ်ရွာတွေအပါအဝင် နေရာအချို့မှာ ရေကြီးရေလျှံတာဖြစ်လို့ ပြည်သူတွေက ဘေးလွတ်ရာကို တိမ်းရှောင်ခဲ့ရတယ်လို့ သိရပါတယ်။

စာတည်း- ဇို