စလင်း၊ ဇူလိုင် ၂၁၊ ၂၀၂၅။

မကွေးတိုင်း၊ စလင်းမြို့နယ်၊ ရွာသစ်ကလေးရွာကို ဇူလိုင် ၂၁ ရက် ဒီမနက် ၇ နာရီခွဲလောက်မှာ စစ်ကောင်စီစစ်ကြောင်းက ဝင်ရောက်မီးရှို့ခဲ့တယ်လို့ စလင်းမြို့ခံတွေဆီက သိရပါတယ်။

ဆုတ်လေဦးဘက်ကလာတဲ့ အင်အား ၁၀၀ ဝန်းကျင်ပါစစ်ကောင်စီစစ်ကြောင်းက အိမ်ခြေ ၆၅ လုံး၊ လူဦးရေ ၃၃၀ ဝန်းကျင်နေထိုင်တဲ့ ရွာသစ်ကလေးရွာကို မီးရှို့ဖျက်ဆီးခဲ့တဲ့အတွက် နေအိမ် ၄ လုံးပျက်စီးခဲ့တယ်လို့ ဆိုပါတယ်။

“အကြမ်းဖက် စစ်ကောင်စီစစ်ကြောင်းက မနက်က ဆုတ်လှေဦးဘက်မှာ တော်လှန်ရေးတပ်ဖွဲ့ဝင်တွေနဲ့ အပြန်အလှန်ပစ်ခတ်မှုဖြစ်ကြတယ်၊ ရှေ့တိုးလာပြီး ရွာသစ်ကလေးရွာကို မီးရှို့တာ၊ အခုလတ်တလောတော့ ၄ အိမ်မီးရှို့ခံလိုက်ရတယ်၊ လောလောဆယ် ဒေသခံတွေကတော့ စစ်ဘေးရှောင်နေရပါတယ်”လို့ စလင်းမြို့ခံအမျိုးသမီးတဦးက ပြောပါတယ်။

ဇူလိုင် ၂၀ ရက်မနေ့က စလင်းမြို့ပေါ်ကတဆင့် ဆင်ဖြူကျွန်းမြို့ဘက်ကိုလာတဲ့ အင်အား ၂၀၀ ဝန်းကျင် ပါစစ်ကြောင်းက ဒီမနက် ၃ နာရီလောက်မှာ စစ်ကြောင်း ၂ ကြောင်းခွဲပြီး ညောင်ကုန်းကျေးရွာဘက်ကို အင်အား ၈၀ ကျော်၊ ဆုတ်လေဦးဘက်ကို အင်အား ၁၀၀ ကျော်ဝင်ရောက်လာခဲ့တာလို့ ဆိုပါတယ်။

အဲ့ဒီနောက် ဆုတ်လေဦးဘက်ကိုလာတဲ့ စစ်ကြောင်းကဒေသခံကာကွယ်ရေးတပ်တွေနဲ့အပြန်အလှန် ပစ်ခတ်မှုဖြစ်ပြီး ပစ်ခတ်မှုအတွင်းဒေသခံကာကွယ်ရေးတပ်ဖွဲ့ဝင်တဦး ထိခိုက်ဒဏ်ရာရခဲ့တယ်လို့ သိရပါတယ်။

စစ်ကြောင်းကတော့ ရွာသစ်ကလေးရွာကိုမီးရှိ့ပြီးနောက် နွယ်တမယ်ရွာဘက်ကို ပြန်ဆုတ်ခွာသွားတယ်လို့ သိရပါတယ်။

ခုလိုစစ်ကြောင်းထိုးနေတာကြောင့် ရွာသစ်ကလေးရွာ၊ မြောက်ချောင်းဖြူရွာ၊ တောင်ပိုရွာ၊ အမှူးရွာ၊ မြောင်းဂွရွာ၊ ပန်းတောရွာ စတဲ့စစ်ကြောင်းသွားတဲ့ လမ်းတလျှောက်ရွာတွေက ဒေသခံ ၂,၀၀၀ ကျော်လည်း ဘေးလွတ်ရာတိမ်းနေကြရတယ်လို့ အထက်ပါအမျိုးသမီးက ဆက်ပြောပါတယ်။

ဇူလိုင် ၄ ရက် မနက် ၈ နာရီခွဲလောက်မှာလည်း မိုးဝန်းရွာကနေထွက်လာတဲ့ အင်အား ၁၀၀ ပါစစ်ကောင်စီစစ်ကြောင်းက ကညှပ်ရွာကိုဝင်ရောက်လာချိန်မှာ ထမင်းစားနေတဲ့ ကျေးရွာပကဖအဖွဲ့ဝင်တွေကိုတွေ့ပြီး ဝင်ရောက်ပစ်ခတ်လို့ ၁ ဦးသေဆုံးပြီး ဒေသခံတွေလည်း ဖမ်းဆီးခံလိုက်ရပါသေးတယ်။

စာတည်း – လင်း

မြတ်

မြေလတ်အသံ၊ ဇူလိုင် ၁၁၊ ၂၀၂၅ ။

စစ်ကိုင်းမြို့နယ်၊ လင်းတလူးရွာက စစ်ဘေးရှောင်တွေရှိနေတဲ့ ဘုန်းကြီးကျောင်းကို စစ်ကောင်စီတပ်က လေကြောင်းနဲ့ဗုံးကြဲတိုက်ခိုက်ခဲ့လို့ စစ်ရှောင် ၃၀ နီးပါး သေဆုံးခဲ့တယ်လို့ ကနဦးသတင်းတွေအရ သိရပါတယ်။

ဇူလိုင် ၁၁ ရက် ဒီ‌နေ့မနက် ၁ နာရီ ကျော်လောက်မှာ စစ်ကောင်စီတပ်က လင်းတလူးရွာဘုန်းကြီးကျောင်းကို တိုက်လေယာဥ်နဲ့ ၂ ကြိမ် ဗုံးကြဲတိုက်ခိုက်ခဲ့တာဖြစ်ပြီး လူနေအဆောက်အဦတွေပေါ် ကျရောက်ပေါက်ကွဲခဲ့တာကြောင့် အများအပြားသေဆုံးခဲ့တာလို့ သိရပါတယ်။

လင်းတလူးရွာဟာ စစ်ကိုင်း- ရွှေဘိုလမ်းပိုင်းမှာရှိပြီး ဒီလမ်းပိုင်းကို အုန်းတောအခြေစိုက် ၆၀၀၅ တင့်ကားတပ်ရင်းကထွက်တဲ့ စစ်ကောင်စီစစ်ကြောင်းက ဇူလိုင် ၇ ရက်ကစတင်ကာ တင့်ကားတွေပါသုံးပြီး စစ်ကြောင်းထိုးနေတာပါ။

အဲဒီစစ်ကောင်စီစစ်ကြောင်းဟာ ရုံးပင်ကန်ရွာမှာတပ်စွဲထားပြီး မနေ့က စတင်ကာ တော်လှန်ရေးတပ်တွေနဲ့ ထိတွေ့တိုက်ပွဲတွေဖြစ်နေတယ်လို့ သိရပါတယ်။

” မနေ့က နေ့ခင်းလည်း အဲဒီဘက်ကို ဂျက်ဖိုက်တာနဲ့လာချတာရှိတယ်။ အခုကစစ်ဘေးရှောင်တွေရှိတဲ့နေရာ တိုက်ပွဲနဲ့လည်းမနီးဘဲ လာချသွားတာ”လို့ စစ်ကိုင်းဒေသခံတဦးက မြေလတ်အသံကို ပြောပါတယ်။

‌လေကြောင်းတိုက်ခိုက်မှုကြောင့် ထိခိုက်သေဆုံးခဲ့ရမှု အသေးစိတ်အချက်အလက်တွေကိုဆက်လက် စုံစမ်းနေဆဲဖြစ်ပြီး ဒီစစ်ကြောင်းကြောင့် ကျေးရွာပေါင်း ၁၀ ရွာခန့်လည်းစစ်ဘေးရှောင်နေရပါတယ်။

ပခုက္ကူ၊ ဇူလိုင် ၈၊ ၂၀၂၅။

မကွေးတိုင်း၊ ပေါက်နဲ့ပခုက္ကူမြို့နယ်အစပ်က ကျေးရွာတွေကို စစ်ကောင်စီတပ်က လေကြောင်းကနေ ဗုံးအလုံး ၃၀ ကျော်ကြဲချလို့ စစ်ရှောင်တွေထပ်မံနေရာပြောင်းရွှေ့နေရတယ်လို့ အညာမြေအရပ်ဖက်လူမှုအဖွဲ့အစည်း-မြိုင်ထံက သိရပါတယ်။

ဇူလိုင် ၇ ရက် ယမန်နေ့ည ၈ နာရီ ၃၀ မိနစ်ကနေ ၉ နာရီ ၅၀ မိနစ်အချိန်အတွင်း ကမ္မ-ရေပြာလမ်းပိုင်းဘေးရှိ ပခုက္ကူမြို့နယ်၊ သစ်ဘလူကုန်းနဲ့ ပေါက်မြို့ နယ်၊ ထောက်ရှာပင်ရွာအနီးဝန်းကျင်တဝိုက်ကို ဗုံးအလုံး ၃၀ ကျော်ကြဲချခဲ့တာလို့ ဆိုပါတယ်။

“လူထိခိုက်ဘာညာတော့မကြားဘူး။ ချတဲ့အလုံးက ဖိုက်တာ ၂ စီးက ၆ လုံးလောက်ရယ်၊ Y12 က ၃၃ လုံးလောက်ချတယ်။ ရွာစပ်တွေရွာတွေထဲကျတယ်။ ဗုံးကြဲခံရတဲ့နေရာတဝိုက်က စစ်ရှောင်တွေကတော့ ထပ်ရှောင်ရတာရှိတယ်”လို့ အညာမြေအရပ်ဖက်လူမှုအဖွဲ့အစည်း-မြိုင်တာဝန်ခံက မြေလတ်အသံကို ပြောပါတယ်။

မေလကုန်ပိုင်းမှာ ပခုက္ကူကနေ ပေါက်ဘက်ကို စစ်ကောင်စီတပ်က အင်အား ၅၀၀ ကျော်နဲ့ မြေပြင်စစ်ကြောင်းထိုးလာတာကြောင့် ကမ္မ၊ ပခုက္ကူနဲ့ပေါက်မြို့နယ်တွေအတွင်းရှိ ကျေးရွာပေါင်း ၃၀ ကျော်က ဒေသခံ ၂၀,၀၀၀ ကျော်ဟာ ထွက်ပြေးတိမ်းရှောင်နေရတာဖြစ်ပြီး ယမန်နေ့ညပိုင်းမှာ ပေါက်နဲ့ပခုက္ကူအစပ် ကျေးရွာတွေကို ဗုံးထပ်ကြဲလာတာကြောင့် ယာယီနေထိုင်နေရတဲ့ စစ်ဘေးရှောင် ၃,၀၀၀ ခန့်မှာ ထပ်မံရွှေ့ပြောင်းနေရတာပါ။

ပခုက္ကူတပ်မ ၁၀၁ ကလာတဲ့ အဆိုပါစစ်ကြောင်းဟာ ပခုက္ကူနဲ့ပေါက်မြို့နယ်အတွင်းကျေးရွာတွေကို စစ်ကြောင်းပတ်ထိုးနေလို့ ပခုက္ကူမြို့နယ်၊ သစ်ပလွေ ကုန်း၊ သာစည်၊ နှမ်းဆီကန်၊ သံဘို၊ အင်းဘတ်၊ ပေါက်နယ်အရှေ့ပိုင်းကျေးရွာ ၃၀ ကျော်က စုစုပေါင်းဒေသခံ ၂၀,၀၀၀ ကျော်ဟာ စစ်ကြောင်း ပြန်မထွက်သေးတာကြောင့် ရက် ၄၀ ကျော်ကြာ နေရပ်စွန့်ခွာထွက်ပြေးနေရတာပါ။

ဒါ့အပြင် စစ်ကောင်စီစစ်ကြောင်းစထိုးတဲ့ မေ ၂၆ ရက်ကနေ ယမန်နေ့ ဇူလိုင် ၇ ရက်ညပိုင်းအထိ ရေပြာ-ကမ္မလမ်းတလျှောက်ကျေးရွာတွေကို စစ်ကောင်စီတပ်က လေကြောင်းဗုံးကြဲတိုက်ခိုက်မှု အကြိမ် ၂၀ ခန့်ပြုလုပ်ခဲ့တယ်လို့ သိရပါတယ်။

စာတည်း – ဟိန်းစံ

ရွေကျင်၊ ဇွန် ၂၄၊ ၂၀၂၅။

ပဲခူးတိုင်း၊ ရွှေကျင်မြို့နယ်၊ ကွမ်းဆိပ်ရွာအခြေစိုက် ခမရ ၅၉၈ တပ် အနီးကကျေးရွာတွေမှာ ရွာခံတွေပြန်နေထိုင်ဖို့ခွင့်မပြုတာကြောင့် စစ်ရှောင် ၂,၀၀၀ ကျော်နေရပ်မပြန်ရသေးဘူးလို့ ဒေသခံတွေထံက သိရပါတယ်။

ခမရ ၅၉၈ တိုက်ပွဲပြီးဆုံးတာ ရက်ပေါင်း ၄၀ ကျော်ရှိပြီဖြစ်ပြီး တပ်ရင်းအတွင်းစစ်ကောင်စီတပ်ဖွဲ့ဝင်တွေ ပြန်လည်တပ်စွဲနေထိုင်ထားကြပေမယ့် အနီးဝန်းကျင်ကျေးရွာတွေဖြစ်တဲ့ ညောင်ခြေထောက်၊ ရှမ်းစု၊ ကလောမြောင်၊ ကွမ်းဆိပ်စတဲ့ရွာတွေက ဒေသခံတွေပြန်လည်နေထိုင်တာကို ပိတ်ပင်ထားတယ်လို့ ဆိုပါတယ်။

” အချို့က စစ်ရှောင်နေရာကနေ စက်လှေနဲ့ရွာပြန်တာကို မပေးဝင်ဘူး ပြန်လာရတယ်။ တပ်က ပြန်ထိုင်ပြီး မွမ်းမံနေတယ်။ ဘာကြောင့်ပြန်ပေးမဝင်တာလည်းဆိုတာတော့မသိရဘူး။ ရွာကလူတွေက တပ်ကိုသွားတောင်းဆိုတယ်။ တောင်းဆိုတဲ့အခါကျတော့ ပေးမဝင်သေးဘူးတဲ့။ တကယ်လို့ဝင်လို့ရရင် ပြန်အကြောင်းကြားပေးမယ်ဆိုပြီး နှစ်သိမ့်ပြီးပြန်လွှတ်လိုက်တယ်။ သူ့သဘောနဲ့သူပြန်ဝင်တဲ့သူတွေကျတော့လည်း ပေးမဝင်ဘူး”လို့ ဒေသခံစစ်ရှောင်တဦးက မြေလတ်အသံကို ပြောပါတယ်။

ခမရ ၅၉၈ တပ်ဖွဲ့ဝင်တွေက နယ်မြေလှည့်ကင်းထွက်ချိန် ကျေးရွာတွေထဲမှာ ပြန်နေထိုင်တဲ့သူတွေတွေ့ ရှိရင် နေအိမ်တွေက ပြန်မောင်းထုတ်တာတွေလုပ်ဆောင်တယ်လို့ သူကဆက်ပြောပါတယ်။

ကျေးရွာတွေမှာ ပြန်လည်နေထိုင်ခွင့်မရတာကြောင့် ဇွန် ၂၄ ရက် ဒီကနေ့အထိ စစ်ရှောင်တွေဟာ မွန်ပြည်နယ်၊ ကျိုက်ထိုနဲ့ သိမ်ဇရပ်မြို့ပေါ် ရပ်ကွက်တွေ၊ အနီးအနားကျေးရွာတွေက ဘုန်းကြီးကျောင်း၊ သီလရှင်ကျောင်းတွေမှာခိုလှုံနေကြသလို အများစုမှာအိမ်းငှားရမ်းနေထိုင်နေကြရတယ်လို့ သိရပါတယ်။

KNLAနဲ့ ပြည်သူ့ကာကွယ်ရေးပူးပေါင်းတပ်ဖွဲ့တွေက မေလဆန်းကစတင်ကာ ညောင်ခြေထောက်နဲ့ ကွမ်းဆိပ်ရွာရှိ စစ်ကောင်စီတပ်ဖွဲ့တွေနဲ့ ခမရ ၅၉၈ ကိုတိုက်ခိုက်ပြီး မေ ၈ ရက်မှာ တပ်ရင်းကိုသိမ်းပိုက်နိုင်ခဲ့ကာ မေ ၁၁ ရက်မှာ စစ်ကောင်စီတပ်ဖွဲ့တွေက ခမရ ၅၉၈ တပ်ကို ပြန်လည်ရယူနိုင်ခဲ့ပြီးနောက် တပ်ပြင်ဆင်ရေးလုပ်ငန်းတွေ ပြန်လည်လုပ်ဆောင်နေကြပါတယ်။

မေ ၈ ရက် ခမရ ၅၉၈ တပ်ကို KNLA ပူးပေါင်းတပ်တွေက တိုက်ခိုက်သိမ်းပိုက်ခဲ့ရာ တိုက်ပွဲမှာ KNLA ပူးပေါင်းတပ်တွေဘက်က ၁၀ ဦးထက်မနည်း၊ စစ်ကောင်စီဘက်က ၃၀ ကျော်သေဆုံးပြီး သုံ့ပန်း ၁၃ ဦးဖမ်းဆီးရမိကာ လက်နက်ခဲယမ်းအများအပြားသိမ်းဆည်းရမိခဲ့တယ်လို့ အမျိုးသားညီညွတ်ရေးအစိုးရ NUG က မေ ၁၁ ရက်မှာ သတင်းထုတ်ပြန်ထားပါတယ်။

တိုက်ပွဲတွေကြောင့် ရွှေကျင်မြို့နယ်ထဲက ကွင်းဆိပ်၊ ညောင်ခြေထောက်၊ ဒုံစရစ်၊ စလူချောင်း၊ ကလောမြောင်၊ ရှမ်းစု၊ ဥတိုကျေးရွာတွေက လူ ၄,၀၀၀ ထက်မနည်းထွက်ပြေးနေရသလို ဝေါမြို့နယ်ထဲက သူရဲသမိန်၊ စက်စု၊ ဆင်ရွာ၊ လက်ပံ၊ ဂျိုးလေးကျေးရွာတွေက ဒေသခံ ၁၀,၀၀၀ ကျော်နဲ့ ကျိုက်ထိုမြို့နယ်ထဲက ခရွဲ၊ သုံးခွ၊ ရေကျော်ကြီး၊ ရေကျော်လေးအပါအဝင် ကျေးရွာ ၈ ရွာက ဒေသခံ ၃,၀၀၀ ဝန်းကျင်ဟာလည်း ကျေးရွာတွေကနေ ထွက်ပြေးတိမ်းရှောင်ခဲ့ကြရတယ်လို့ သိရပါတယ်။

စာတည်း – ဟိန်းစံ

ကောလင်း၊ ဇွန် ၂၃၊ ၂၀၂၅။

စစ်ကိုင်းတိုင်း၊ ကောလင်းမြို့နယ်အနောက်ခြမ်းက စစ်ရှောင်အိမ်ထောင်စု ၁၅၀ စုကို ဇွန် ၂၂ ရက်မှာ ဆန်ထောက်ပံ့ပေးခဲ့တယ်လို့ ကောလင်းပြည်သူမှပြည်သူသို့ အဖွဲ့ဆီက သိရပါတယ်။

ပြည်ပရောက်အလှူရှင်မိသားစုတစုရဲ့ ထောက်ပံ့မှုကို ဇွန် ၂၂ ရက်မှာ ၁ အိမ်ထောင်ကို ဆန် ၂ ပြည်နှုန်းနဲ့ ကိုယ်စားသွားရောက်ထောက်ပံ့ပေးခဲ့တာလို့ ဆိုပါတယ်။

“ကျနော်တို့ခန့်မှန်းထားတာက ၂၀၀ စာလောက်စီစဉ်ထားတာ၊ ဒါပေမဲ့ ကျနော်တို့သွားတဲ့နေရာမှာ အိမ်ထောင်စု ၁၅၀ ပဲရှိတယ်၊ ကျန်ရှိတဲ့ဆန်တွေကို လိုအပ်တဲ့နေရာမှာ ကျနော်တို့ ပြန်လည် မျှဝေပေးသွားမှာ ဖြစ်ပါတယ်”လို့ ကောလင်းပြည်သူမှပြည်သူသို့ တာဝန်ခံကိုသဲကြီးက ပြောပါတယ်။

ဒါ့အပြင် မိုးတွင်းကာလဖြစ်တာကြောင့် ခြင်အန္တရာယ်နဲ့ တခြားကူးစက်ရောဂါတွေဖြစ်မှာ စိုးရိမ်နေရပြီး ခြင်ထောင်တွေလည်းလိုအပ်နေသေးတာကြောင့် ထောက်ပံ့ပေးကြဖို့လည်း သူကဆိုထားပါတယ်။

“လတ်တလော မိုးတွင်းမိုးဦးကျစဆိုတော့ ခြင်တွေတအားပေါတာပေါ့၊ ခြင်ထောင်လိုအပ်ချက်တွေ ရှိပါတယ်၊ တချို့နေရာတွေကြတော့ တဲအလှူရှင်တွေရှိတော့ နေစရာတော့ အဆင်ပြေသွားကြပြီ၊ ခြင်အန္တရာယ်နဲ့အတူ တခြားတုပ်ကွေးရောဂါအပါအဝင် တခြားကူးစက်ရောဂါတွေပါ ဖြစ်နိုင်တာမလို့ ကျနော်တို့ ခြင်ထောင်လေးတွေတော့ လှူဒါန်းပေးချင်တာပေါ့၊” လို့ တာဝန်ခံကိုသဲကြီးက ပြောပါတယ်။

အဲ့ဒီစစ်ဘေးရှောင်တွေဟာ စစ်ဘေးတိမ်းရှောင်နေရတာ ၁ နှစ်ကျော်ရှိပြီး စားသောက်ရေးအတွက်လည်း အဆင်မပြေမှုနဲ့ရင်ဆိုင်နေကြရတယ်လို့ သိရပါတယ်။

စာတည်း – လင်း

၃ ရက်အတွင်း ရွာ ၇ ရွာမီးရှို့ခံထားရ

မြေလတ်အသံ၊ ဇွန် ၂၃၊ ၂၀၂၅။

ပဲခူးတိုင်း၊ မင်းလှမြို့နယ်ကို စစ်ကောင်စီတပ်က စစ်ကြောင်း ၃ ခုခွဲကာ ၃ ရက်ကြာစစ်ကြောင်းထိုးပြီး လူနေအိမ်တွေကို မီးရှို့နေတာကြောင့် ကျေးရွာ ၁၁ ရွာကဒေသခံတွေ ထွက်ပြေးနေကြရတယ်လို့ ဒေသခံတွေဆီကသိရပါတယ်။

ဇွန် ၂၀ ရက်နေ့လယ် ၁ နာရီကစတင်ကာ စစ်ကွင်းတာဇုံရဲကင်းစခန်းကနေ အင်အား ၅၀၀ ခန့်ရှိတဲ့ စစ်ကောင်စီတပ်သားတွေက ဇွန် ၂၃ ရက်ဒီနေ့ညနေ ၄ နာရီအထိ မင်းလှမြို့နယ်ရှိ ကျေးရွာတွေကို တရွာဝင်၊ တရွာထွက် မီးရှို့နေတာလို့ ဆိုပါတယ်။

“ရန်သူဘက်(စကစ)က စစ်ကွင်းတာဇုံမှာရော၊ အဲ့အရင်ကရော စစ်ကြောင်းတကြောင်းလုံးနီးပါး ပြုတ်ထားသေးတာရောပါမယ်။ အဲ့တာတွေကြောင့် အခုလိုအင်အား အများအပြားသုံးပြီး စစ်ကြောင်းထိုးနေတာ “လို့ မင်းလှဒေသခံကာကွယ်ရေးတပ်ဖွဲ့ဝင်တဦးကပြောပါတယ်။

အဆိုပါစစ်ကြောင်း ၃ ကြောင်းမှာ ကိုင်ပြင်ကြီး၊ အညာတန်း၊ ဆင်အိုင်ချောင်းပေါက်၊ သရော်ကုန်း၊ ဆားချောင်းစတဲ့ ကျေးရွာတွေဘက်ကို ၁ ကြောင်း၊ ဦးတိုတာလေး၊ ဗိုလ်တစ်ထောင်၊ ဂန့်ဂေါ်ပင်စတဲ့ ကျေးရွာတွေကို ၁ ကြောင်း နဲ့ ရေငံ၊ ဘုရားကြီး၊ ငှက်ပျောတုံးစတဲ့ကျေးရွာတွေဘက်ကို ၁ ကြောင်း အသီးသီးခွဲဖြန့်ပြီး စစ်ကြောင်းထိုးနေတာလို့ သူက ဆိုပါတယ်။

“ဒီစစ်ကြောင်း ၃ ကြောင်းမှာ တပ်မ ၆၆ ရော၊ ပျူစောထီးတွေရော၊ ကွန်မန်ဒို ၁၅၀ ပါတယ် သိရတယ်”လို့ အထက်ပါတပ်ဖွဲ့ဝင်က ပြောပါတယ်။

ဇွန် ၂၀ ရက်မှာ တောင်ပြတ်၊ ဦးတိုတာလေးရွာ ၂ ရွာကို မီးရှို့ခဲ့ပြီး ဇွန် ၂၃ ရက်ဒီနေ့မှာတော့ ဗိုလ်တထောင်၊ ဆားချောင်း၊ ဆင်အိုင်ချောင်းပေါက်၊ ဂန့်ဂေါ်ပင်၊ ငလှစမ်းစတဲ့ ၅ ရွာကို မီးရှို့နေတယ်လို့ သူကပြောဆိုပါတယ်။

နေအိမ်ပျက်စီးဆုံးရှုံးမှုတွေကိုတော့ မြေလတ်အသံကဆက်လက်စုံစမ်းနေပါတယ်။

ဇွန် ၂၀ ရက်နေ့က တောင်ပြတ်ရွာသစ်ကျေးရွာအနီးမှာ စစ်ကောင်စီတပ်စစ်ကြောင်းကို တိုက်ခိုက်ဖို့စောင့်ဆိုင်းနေတဲ့ ကာကွယ်ရေးတပ်ဖွဲ့ဝင် ၇ ဦး ဖမ်းဆီးခံရပြီး အသတ်ခံလိုက်ရတယ်လို့ ဒေသခံကာကွယ်ရေးတပ်ဖွဲ့ဝင်တဦးက မြေလတ်အသံကိုအတည်ပြုပြောဆိုခဲ့ပါတယ်။

ပြီးခဲ့တဲ့ဇွန် ၁၆ ရက်ကလည်း မင်းလှမြို့နယ်၊ ဆင်အိုင်ချောင်းပေါက်ကျေးရွာအနီးမှာ ၁ ကြိမ်၊ ရန်ကုန် -ပြည်လမ်းပိုင်းရှိစစ်ကွင်းတာဆုံ ရဲကင်းစခန်းကို ၁ ကြိမ်နဲ့ရှမ်းတောကျေးရွာအနီး ၁ ကြိမ် စုစုပေါင်း ၃ ကြိမ်တိုက်ပွဲဖြစ်ပွားခဲ့ရာ စစ်ကောင်စီဘက်မှ ဗိုလ်မှူး ၁ ဦး၊ ခရိုင်ရဲမှူး ၁ ဦး၊ မြို့မရဲစခန်းမှူး ၁ ဦး အပါအဝင် စစ်ကောင်စီတပ်သား ၂၀ ဦးခန့်သေဆုံးခဲ့တယ်လို့သိရ ပါတယ်။

စာတည်း – လင်း

ပေါက်၊ မေ ၃၀၊ ၂၀၂၅။

မကွေးတိုင်း၊ ပေါက်မြို့နယ်အတွင်း စစ်ကောင်စီတပ်ကစစ်ကြောင်းထိုးဝင်ရောက်နေလို့ ဒေသခံ ၇,၀၀၀ နီးပါး ဘေးလွတ်ရာတိမ်းရှောင်နေရတယ်လို့ ပေါက်မြို့လူသားချင်းစာနာထောက်ထားရေးနဲ့ ဘေးအန္တရာယ်ဆိုင်ရာစီမံခန့်ခွဲရေးဝန်ကြီးဌာနဆီက သိရပါတယ်။

ပခုက္ကူအခြေစိုက်တပ်မ ၁၀၁ က စစ်ကား ၆ စီး၊ အင်အား ၂၀၀ ပါစစ်ကြောင်းဟာ မေ ၂၉ ရက် ညပိုင်းမှာ ပေါက်မြို့နယ်ထဲဝင်ရောက်လာချိန် ပေါက်-ပခုက္ကူလမ်းဘေးတလျောက်ရှိ ကျေးရွာ ၁၃ ရွာကဒေသခံတွေ တိမ်းရှောင်ခဲ့ကြတာလို့ ဆိုပါတယ်။

“ပေါက်မြို့နယ်အတွင်း ရောက်လာတဲ့စစ်ကြောင်းက ဘယ်ကိုသွားမယ်လို့တော့မသိရဘူး၊ စစ်ကြောင်းကတော့ တော်လှန်ရေးတပ်ဖွဲ့ဝင်တွေရှိတဲ့နေရာကို ရှောင်သွားကြတာ၊ ထိ‌တွေ့မှုမရှိအောင် တောလမ်းတွေကတိုးလာတာ၊ တွေ့တဲ့လူတွေကိုတော့ ဘာမှရန်မှုခြင်းတော့မရှိဘူး။” လို့ ပေါက်မြို့လူသားစာနာနဲ့ ဘေးအန္တရာယ်ဆိုင်ရာ စီမံခန့်ခွဲရေးဝန်ကြီးဌာန တာဝန်ရှိသူက ပြောပါတယ်။

လက်ရှိမှာ စစ်ကောင်စီတပ်ဖွဲ့ဝင်တွေဟာ ပေါက်မြို့နယ်၊ ရေပြာကျေးရွာကိုရောက်ရှိနေပြီး ဘယ်ကိုဆက်သွားမယ်ဆိုတာကိုတော့မသိရဘူးလို့ ပေါက်မြို့လူသားစာနာနဲ့ ဘေးအန္တရာယ်ဆိုင်ရာ စီမံခန့်ခွဲရေးဝန်ကြီးဌာန တာဝန်ရှိသူကပြောပါတယ်။

တိမ်းရှောင်နေရတဲ့ကျေးရွာအမည်တွေကိုတော့ လုံခြုံရေးအရထည့်သွင်းပြောကြားခဲ့တာ မရှိပါဘူး။

‌ပေါက်မြို့နယ်အတွင်းမှ တော်လှန်ရေးတပ်ဖွဲ့ဝင်တဦးကလည်း “ကျနော်တို့ စစ်ကြောင်းလာနေလို့ စောင့်ကြည့်နေပါတယ်၊ လောလောဆယ်တော့ ထိတွေ့မှုတော့ မရှိသေးဘူး။”လို့ ပြောပါတယ်။

အဆိုပါစစ်ကြောင်းဟာ မေ ၂၇ ရက်က ပခုက္ကူတပ်မ ၁၀၁ ကစတင်ထွက်ခွာလာပြီး မေ ၂၈ ရက်မှာ ပခုက္ကူမြို့နယ်၊ ကမ္မမြို့၊ မကျည်းသုံးပင်ရွာကိုဝင်ရောက်ခဲ့ပြီးနောက် မေ ၂၉ ရက်မနက်ပိုင်းမှာ ပြန်ထွက်ခွာလာပြီး ၂၉ ရက်ညမှ ပေါက်မြို့နယ်ထဲကိုဝင်ရောက်လာတာလို့ ဆိုပါတယ်။

ပခုက္ကူမြို့နယ်ထဲကို ဝင်ရောက်ချိန်မှာလည်း Kamma Defence force – KMDF တပ်ဖွဲ့စခန်းကို စီးနင်းမီးရှို့ခဲ့ပြီး စစ်ကြောင်းကြောင့် ဒေသခံထောင်ချီတိမ်းရှောင်ခဲ့ကြရတယ်လို့ သိရပါတယ်။

စာတည်း – လင်း