စစ်ကိုင်း

စစ်ကိုင်း၊ ဇွန် ၃၊ ၂၀၂၃။

စစ်ကိုင်းတိုင်း၊ ယင်းမာပင်ခရိုင်၊ ပုလဲမြို့နယ်က မီးဘေးသင့်ပြည်သူတွေကို ယမန်နေ့ ဇွန်လ ၂ ရက်က ကျပ်သိန်း ၁၀၀ တန်ဖိုးရှိ ပစ္စည်းတွေကို လှူဒါန်းပေးခဲ့တယ်လို့ ပုလဲဒေသခံတဦးထံက သိရပါတယ်။

ဧပြီလအစောပိုင်းမှာ စစ်ကောင်စီတပ်ဖွဲ့တွေ မီးရှို့ဖျက်ဆီးခဲ့လို့ ပုလဲမြို့နယ်၊ နှောကန်ရွာမှ ၁၀၄ အိမ်၊ ချောင်းနားရွာ ၆ အိမ်နဲ့ အလယ်ဘုံရွာ ၁ အိမ်၊ စုစုပေါင်း ၁၁၁ အိမ် မီးဘေးသင့်ခဲ့ရပြီး၊ အဲ့ဒီပြည်သူတွေကို ကမ်းလက်မေတ္တာလူမှုကူညီရေးအဖွဲ့က လှူဒါန်းခဲ့တာလို့ တာဝန်ယူဆောင်ရွက်ပေးခဲ့တဲ့ ဒေသခံတဦးက မြေလတ်အသံကို ပြောပါတယ်။

“ကမ်းလက်မေတ္တာအဖွဲ့ကို မီးရှို့ခံရတဲ့ရွာတွေက ပြည်သူတွေရဲ့ အခက်အခဲကိုပြောပြတယ်။ လိုအပ်တဲ့ပစ္စည်းတွေနဲ့ ကုန်ကျစရိတ် စာရင်းတွေ ပို့ပေးတယ်။ အဲဒီအဖွဲ့ရဲ့ငွေကြေးနဲ့ ပစ္စည်းတွေဝယ်ပြီး လှူဒါန်းခဲ့ပါတယ်” လို့ ပြောပါတယ်။

ကမ်းလက်မေတ္တာလူမှုကူညီရေးအဖွဲ့ကို ပြည်ပရောက်မြန်မာတွေနဲ့ ပြည်တွင်းတချို့က ဖွဲ့စည်းထားတာဖြစ်ပြီး၊ ပြည်တွင်းက စစ်ဘေးရှောင်၊ မီးဘေးသင့်၊ ရေဘေးသင့် ပြည်သူတွေကို ကူညီလှူဒါန်းပေးနေသလို ပုလဲနယ်ကိုလည်း လှူဒါန်းမှု ၄ ကြိမ်ခန့်ရှိပြီလို့ ဆက်ပြောပါတယ်။

“မနေ့ကဆန် ၂၄ ပြည်တအိတ်၊ ဆီတပိဿာ၊ ဓါးတချောင်း၊ ဆားသုံးထုပ်လာလှူပါတယ်။ ပြည်ပရောက်နေတဲ့အဖွဲ့ကလှူတာပါ။ စားဖို့အခက်အခဲပြေလည်လို့ ဝမ်းသာမိပါတယ်” လို့နှောကန်ရွာသားတဦးက ပြောပါတယ်။

နှောကန်ရွာ မီးဘေးသင့်တောင်သူတဦးက ဒီလကုန်စပါးစိုက်ပျိုးဖို့ အခက်အခဲတွေရှိနေပြီး စပါးမျိုး၊ မြေဆီ၊ ထွန်ယက်ဖို့ နွားနဲ့ထွန်စက် ငှားရမ်းခပေးဖို့ငွေကြေးအခက်အခဲ ရှိနေပါတယ်လို့ မြေလတ်အသံကို ပြောပါတယ်။

“တောင်သူတချို့ကလည်းရင်းနှီးတဲ့ မိတ်ဆွေတွေဆီကနေ စပါးမျိုးချေး၊ ငွေကိုအတိုးနဲ့ ချေးနေရတာရှိတယ်။ တချို့က လက်မှုလုပ်ငန်းလေးလုပ်ပြီးတော့ ဖြေးဖြေးချင်းသွားနေရတယ်” လို့ ဆက်ပြောပါတယ်။

လက်မှုလုပ်ငန်းအနေနဲ့ ထန်းလက်ကိုင်းကို လျှော်စုပ်ကာ လျှော်တောင်းတွေပြုလုပ်ရောင်းချတာဖြစ်ပြီး ကွင်းလေးကွင်းပါ လေးကွင်းတောင်း၊ ကွင်းနှစ်ကွင်းပါပါက ဇကတောင်း၊ တင်းဝင်တောင်း၊ ခွဲတောင်း၊ ပြည်ဝင်တောင်း၊ ကျောက်သယ်တောင်း၊ ဂျပ်ပြားတောင်း တွေယက်လုပ်နေတယ်လို့ သိရပါတယ်။

စာတည်း – 007

စစ်ကိုင်း၊ ဇွန် ၂၊ ၂၀၂၃။

စစ်ကိုင်းတိုင်း၊ ဘုတလင်မြို့နယ်၊ မြို့ပေါ်ရွာမှာ ဒေသခံတွေက နှစ်စဉ်ပြုလုပ်နေကျ ငွေချောင်းဘုရားပွဲကျင်းပ နေချိန် စစ်ကောင်စီတပ်က သေနက်တွေ ပစ်ခတ်ပြီး အဲဒီကျေးရွာထဲကို စစ်ကြောင်းထိုးဝင်ရောက်လာခဲ့လို့ ဒေသခံတဦးက ကျည်ထိမှန်သွားတယ်လို့ သိရပါတယ်။

ဇွန်လ ၂ ရက် ဒီနေ့ မနက် ၉ နာရီလောက်မှာ အင်အား ၁၀၀ နီးပါးရှိတဲ့ စစ်ကောင်စီစစ်ကြောင်းဟာ မြို့ပေါ်ရွာထဲကို သေနတ်တွေနဲ့ပစ်ခတ်ပြီး ဝင်လာတာကြောင့် မြို့ပေါ်ရွာက အသက် (၄၀)အရွယ် ဦးဝင်းမင်းဆန်း ရဲ့ ပေါင်ကိုထိမှန်သွားတယ်လို့ သိရပါတယ်။

အဆိုပါစစ်ကောင်စီတပ်ဟာ ကျေးရွာထဲကိုဝင်ရောက်လာပြီး အဲဒီကျေးရွာက နေအိမ် ၇ လုံး၊ မီးဖိုချောင် ၃ လုံး၊ ဆိုင်ကယ် ၅ စီး နဲ့ ကား ၂ စီးတို့ကို မီးရှို့ဖျက်ဆီးသွားပြီး ဒေသခံ ၃ ဦးကိုလည်း ဖမ်းဆီးထားတယ်လို့ ကနီသားများ၏ရင်တွင်းအသံမှ တာဝန်ရှိသူတဦးက ပြောပါတယ်။

“ရွာဘုရားပွဲဆိုရင် တရွာလုံး မုန့်တွေလုပ်၊ လာတဲ့ဧည့်သည်တွေကို ထမင်းကျွေးတာတွေ လုပ်တယ်။ စစ်ကြောင်း ထိုးလာတာကို မသိကြဘူး၊ ရွာထဲဝင်လာပြီ လက်နက်တွေ ပစ်ဖောက်တော့မှ ထွက်ပြေးကြတာ။ လက်နက်ထိမှန်ထားတဲ့ တယောက်ကတော့ မစိုးရိမ်ရပါဘူး။ ရွာသားတွေလည်း အခုထိရွာနားကို မကပ်ရဲသေးပါဘူး”လို့ သူက ဆိုပါတယ်။

ကျေးရွာကို မီးရှို့ပြီး နေ့လယ် ၁ နာရီလောက်မှာ အဆိုပါစစ်ကောင်စီတပ်ဖွဲ့ဟာ သူတို့ဖမ်းဆီးထားတဲ့ ဓားစာခံ အမျိုးသား ၃ ဦးနဲ့အတူ သေနတ်တွေပစ်ဖောက်ပြီးနောက် အနောက်မြောက်တိုင်း စစ်ဌာနချုပ်ထဲသို့ ဝင်ရောက်သွားခဲ့ပါတယ်။

အိမ်ခြေ ၅၀၀ နီးပါးရှိတဲ့ မြို့ပေါ်ကျေးရွာဟာ အခုလိုမီးရှို့ခံရတာ ၃ ကြိမ်တိတိရှိပြီဖြစ်ပါတယ်။ ပြီးခဲ့တဲ့ ၂၀၂၂ မေလ ၁၃ ရက်ကလည်း နေအိမ် ၁၃ လုံးကို မီးရှို့ဖျက်ဆီးသွားသလို အသက် (၃၀)အရွယ် ကိုအောင်ဇော်ဦးကို ပစ်သတ်သွားခဲ့ပါသေးတယ်။ ထပ်မံပြီး ဒီဇင်ဘာ ၁၀ ရက်မှာလည်း ဒုတိယအကြိမ် မီးရှို့ဖျက်ဆီးခဲ့ပါသေးတယ်။

စာတည်း − လင်းဇေ

စစ်ကိုင်း၊ ဇွန် ၂၊ ၂၀၂၃။

စစ်ကိုင်းတိုင်း၊ စစ်ကိုင်းမြို့နယ်၊ စာရေးရွာကို စစ်ကောင်စီက လက်နက်ကြီးနဲ့ပစ်ခတ်နေတဲ့အတွက် ရွာလုံးကျွတ် ထွက်ပြေးတိမ်းရှောင်နေရတယ်လို့ ဒေသခံရွာသားတွေကတဆင့် သိရပါတယ်။

ဇွန်လ ၂ ရက် ဒီကနေ့နေ့လယ် ၁ နာရီခွဲလောက်က ပဒူရွာကို စစ်ကူသွားပို့ပြီးပြန်လာတဲ့ စစ်ကြောင်းဟာ စာရေးရွာနဲ့တမိုင်ခန့်အကွာမှာ မိုင်းဆွဲခံခဲ့ရပြီးနောက် စာရေးရွာသားတွေ မိုင်းဆွဲတယ်အထင်နဲ့ ရွာဘက်ကိုလက်နက်ကြီးတွေနဲ့ ဆက်တိုက်ပစ်နေတာဖြစ်တယ်လို့ ဆိုပါတယ်။

“ကျနော်တို့ကတော့ ခုဝေးသထပ်ဝေးတဲ့နေရာ ပြေးနေရတယ်၊ လူကြီးတွေကိုတော့ လှည်းပေါ်တင်ပြီး သွားနေကြတယ်၊ လူငယ်တွေကတော့ လမ်းလျှောက်လိုက်တဲ့သူတွေက လိုက်ကြတယ်၊ သူတို့(စစ်ကောင်စီ)ဘက်က ၁၅ မိနစ်လောက်နားပြီး တခါပြန်ပစ်တယ်၊ ခုလည်း လက်နက်ကြီးတွေ ဆက်တိုက်ပစ်လို့ တနေရာထပ်ရွေ့နေရတယ်”လို့ စာရေးရွာသားတဦးက ပြောပါတယ်။

စာရေးရွာမှာ စာရေးအရှေ့ရွာနဲ့ စာရေးအနောက်ရွာဆိုပြီး ၂ ရွာရှိကာ ရွာ ၂ ရွာကို သင်္ချိုင်းကုန်းပဲ ခြားထားပြီး၊၂ ရွာပေါင်းမှာ အိမ်ခြေ ၂၀၀၀ ဝန်းကျင်နဲ့ လူဦးရေ ၃၀၀၀ ကျော်ရှိရာ လက်နက်ကြီးတွေက စာရေးအနောက်ရွာဘက်ကို ဆက်တိုက်ကျနေတဲ့အတွက် ၂ ရွာလုံး ပြေးနေရတယ်လို့ ဆိုပါတယ်။

လက်ရှိမှာ စာရေးရွာထဲကို စစ်သားတချို့ဝင်ရောက်ပြီး လက်နက်တွေနဲ့ ပစ်ခတ်နေတယ်လို့သိရကာ ထိခိုက်မှုအခြေအနေတွေကိုတော့ မြေလတ်အသံက ဆက်လက်စုံစမ်းနေဆဲဖြစ်ပါတယ်။

စစ်ကောင်စီက လက်နက်ကြီးနဲ့ပစ်ခတ်ရုံသာမက စာရေးရွာနဲ့ကပ်လျက်မှာရှိတဲ့ ရွာသစ်ရွာကိုလည်း ဝင်ရောက်မီးရှို့နေတဲ့အတွက် နေအိမ်တချို့ မီးလောင်နေပြီး ပဒူရွာအနီးတဝိုက်မှာလည်း လေယာဉ်ပျံသန်းတာတွေ ရှိနေတယ်လို့ ဆိုပါတယ်။

လက်ရှိမှာ စစ်ကိုင်းအခြေစိုက် တမခ ၃၃ ကနေလည်း သံချပ်ကာကား ၃ စီး ပဒူရွာဘက်ကို စစ်ကူအနေနဲ့ထွက်လာကာ လမ်းတလျှောက်မှာရှိတဲ့ စစ်ရှောင်ပြည်သူတွေကိုလည်း ဖမ်းဆီး၊ စစ်ဆေးမေးမြန်းတာတွေ လုပ်နေတယ်လို့ အထက်ပါဒေသခံက ပြောပါတယ်။

ပဒူရွာမှာလည်း စစ်ကောင်စီတပ်ဖွဲ့နဲ့ နယ်မြေခံကာကွယ်ရေးအဖွဲ့တွေ မေလ ၁၉ ရက်‌နေ့ကတည်းက ဒီကနေ့ချိန်ထိ ထိတွေ့မှုတွေဖြစ်နေဆဲပဲ ဖြစ်ပြီး စစ်ကောင်စီဘက်က အကျဆုံးများကာ အထိနာနေတယ်လို့လည်း ဒေသခံတွေဆီက သိရပါတယ်။

စာတည်း – လင်း

စစ်ကိုင်း၊ ဇွန် ၁၊ ၂၀၂၃။

စစ်ကိုင်းတိုင်း၊ ကန့်ဘလူမြို့နယ်၊ ဇင်းရွာမှာ ဦးလေးဖြစ်သူနဲ့ တူတော်စပ်သူကလေး ၂ ဦးတို့ ပိန္နဲသီးခူးအသွား ပျူစောထီးတွေ ထောင်ထားတဲ့မိုင်းကို နင်းမိလို့ တဦးသေဆုံးပြီး ၂ ဦးက ထိခိုက်ဒဏ်ရာရရှိသွားတယ်လို့ ဒေသခံတွေဆီက သိရပါတယ်။

မေလ ၃၁ ရက် မနေ့ကနေ့လယ် ၁၁ နာရီအချိန်လောက်မှာ ဇင်းရွာသားတွေဖြစ်တဲ့ အသက် (၅၀)အရွယ် ဦးမောင်ငွေနဲ့ သူရဲ့တူလေး ၂ ယောက်ဖြစ်တဲ့ အသက် (၁၂) နှစ်အရွယ် ထွန်းစည်သူအောင်နဲ့ အသက် (၉)နှစ်အရွယ် ဗူတီ တို့သုံးဦးဟာ ရွာရဲ့မြောက်ဘက်မှာ ပိန္နဲသီးသွားခူးချိန် ပျူစောထီးတွေထောင်ထားတဲ့ မိုင်းကိုနင်းမိလို့ ဗူတီ ဟာ အဲဒီနေရာမှာတင် ပွဲခြင်းပြီးသေဆုံးသွားခဲ့ရတယ်လို့ သိရပါတယ်။

မိုင်းစထိမှန်ခဲ့တဲ့ ဦးမောင်ငွေ နဲ့ ထွန်းစည်သူအောင်ကိုတော့ မန္တလေးဆေးရုံကြီးကို ပို့ထားရတယ်လို့ ဇင်းရွာသားတဦး က ပြောပါတယ်။

“ပိန္နဲပင်က ရွာပြင်ဘက်မှာရှိတယ်။ အဲဒီအပင်နားမှာ တဲရှိတယ်။ ပျူစောထီးတွေက မိုင်းကို တဲဘေးမှာ ထောင်ထားတယ်။ အဲဒါ အသက်အငယ်ဆုံးကလေးက နင်းမိပြီး အကုန်ထိကုန်တာ။ ဗူတီကိုတော့ မနေ့က သဂြိုလ်ပေးလိုက်ပြီ၊ ဦးမောင်ငွေက အဆုတ်ကိုထိသွားတယ်။ စိုးရိမ်ရတယ်။ ထွန်စည်သူအောင်က မျက်လုံးကိုထိသွားတယ်။ ဘာမှကောင်းကောင်းမမြင်ရတော့ဘူးလို့ ပြောတယ်” လို့ သူက ဆိုပါတယ်။

အခုလို ပျူစောထီးတပ်ဖွဲ့တွေ ထောင်ထားတဲ့ မိုင်းကြောင့် ၂၀၂၂ နဲ့ ၂၀၂၃ ခုနှစ်အတွင်းမှာ သေဆုံးသူ ၆ ဦးထက်မနည်းရှိပြီး ထိခိုက်ဒဏ်ရာရသူတွေကတော့ ၄ ဦးထိရှိတယ်လို့လည်းဆိုပါတယ်။

ထိခိုက်ဒဏ်ရာရတဲ့ ၄ ဦးအနက် ၃ ဦးဟာ အမြင်အာရုံမရရှိတော့ဘူးလို့လည်း ပြောပါတယ်။

“ မိုင်းက ဒီနှစ်အတွင်းမှာ ၃ ခါလောက်ကွဲတယ်။ မနှစ်က ဒီအချိန်လောက်မှာပဲ မှိုရှာရင်းနဲ့ သားမိ ၃ ယောက်သွားတာ ၂ ယောက်က တခါတည်းသေသွားတယ်။ တယောက်ကတော့မသေပဲကျန်ခဲ့တယ်။ မျက်စိတော့မတွေရတော့ဘူးပေါ့။ အသက် ၇၀ ကျော်အဖွား တယောက်လည်း မိုင်းထိပြီ မျက်စိမမြင်ရတော့ဘူး။ နောက်ပြီး ကျွဲ၊ နွားတွေလည်း မိုင်းနင်းမိပြီ သေတာ ၆ ကောင်ကျော်လောက်ရှိတယ်” လို့ ဒေသခံက ပြောပါတယ်။

စစ်တပ်အာဏာသိမ်းပြီနောက်ပိုင်းမှာ ပျူစောထီးတပ်ဖွဲ့တွေဟာ ဇင်းရွာထဲကိုဝင်ရောက်တပ်စွဲခဲ့ပြီး ဒေသခံရွာသားတွေကို အတင်းအဓမ္မ ပျူစောထီးသင်တန်းတက်ခိုင်းသလို ပျူစောထီးတပ်ဖွဲ့ဝင်အဖြင့် နေခိုင်းခဲ့ပါသေးတယ်။

အဲဒီလုပ်ရပ်တွေကြောင့် ဒေသခံတချို့ဟာ ကျေးရွာကနေ ထွက်ပြေးတိမ်းရှောင်နေတာမျိုးတွေလည်း ရှိတယ်လို့ သိရပါတယ်။

စာတည်း – 007