စစ်ကိုင်း

မြင်းမူ၊ မတ် ၄၊ ၂၀၂၃။

စစ်ကိုင်းတိုင်း၊ မြင်းမူမြို့နယ်ရှိ စစ်ကိုင်း-မုံရွာ ကားလမ်းပေါ်မှာ စစ်ကြောင်းထိုးဖို့ သွားလာကြတဲ့ စစ်ကောင်စီကားတွေ တိုက်ခိုက်ခံရလို့ ကား ၅ စီး ပျက်စီးသွားခဲ့တယ်လို့ PDF တာဝန်ရှိသူက ပြောပါတယ်။

စစ်ကိုင်း တပ်မ-၃၃ ကနေ မုံရွာဘက်ကို ထွက်ခွာလာတဲ့ စစ်ကောင်စီကား ၁၈ စီးကို မြင်းမူနဲ့ဝမ်းပြည့်ရွာကြားမှာ ၃ ကြိမ်၊ ဝမ်းပြည့်နဲ့ အလ္လကပ္ပရွာကြားမှာ ၅ ကြိမ် စုစုပေါင်း ၈ ကြိမ် မိုင်းဆွဲတိုက်ခိုက်ခဲ့တာ ဖြစ်တယ်လို့ People’s knight Defense Force Myinmu မှ ဗိုလ်အေးချမ်းက ပြောပါတယ်။

“ဒီ ၁၈ စီးကို နေ့လည် ၁ နာရီကျော်မှာ တိုက်တာ။ ၁၈ စီးထဲက ၂ နေရာပေါင်း ကား ၂ စီး ထိခိုက်ပြီး လုံးဝပျက်စီးသွားတယ်။ ပျက်စီးခဲ့တဲ့ ကား ၂ စီးက ပထမဆုံးကားနဲ့ တတိယကားပါ။ စကစတွေ သေဆုံး၊ ဒဏ်ရာရသွားတာကိုတော့ စုံစမ်းနေဆဲပါ။ ကျနော်တို့ ရဲဘော်တွေက ခြုံခိုတိုက်ခိုက်တာဆိုတော့ လုံးဝအထိအခိုက် မရှိခဲ့ဘူး” လို့ ဆိုပါတယ်။

အလားတူ ညနေ ၄ နာရီကျော်မှာ မုံရွာမြို့ကနေ စစ်ကိုင်းဘက်ကို ထွက်ခွာလာတဲ့ စစ်ကား ၃၂ စီးကို အလ္လကပ္ပနဲ့ ဝမ်းပြည့်ကျေးရွာကြားမှာ ၄ ကြိမ်တိုင် မိုင်းဆွဲတိုက်ခိုက်ခဲ့တာကြောင့် ကားကြီး ၂ စီးနဲ့ ကားသေး ၁ စီး လုံးဝပျက်စီးသွားခဲ့တယ်လို့ ဗိုလ်အေးချမ်းက ဆက်ပြောပါတယ်။

“ဒုတိအကြိမ်မှာတော့ ၃ စီး ပျက်တယ်။ ဖြစ်စဥ် ၂ ခုပေါင်းဆိုတော့ စကစ ကား ၅ စီး ပျက်စီးတယ်။ စကစတွေ သေဆုံး၊ ဒဏ်ရာရတဲ့ အခြေအနေကိုတော့ မသိရသေးဘူး။ ဒါပေမဲ့ မြင်းမူ ဆေးရုံကို စစ်ကား ၃ စီးနဲ့ လူနာတွေ လာပို့သွားတယ်လို့ သိထားရတယ်။ ဦးရေ ဘယ်လောက်ဆိုတာ မသိရဘူး” လို့ ဆိုပါတယ်။

ဒီတိုက်ခိုက်မှုကို People’s knight Defense Force Myinmu (PKDF-MMU)၊People’s Army To Fight Dictatorship (PAFD) ၊ Dog Killers Defense Force (DKPDF -MMU) ၊ TAUNGTHA People Defense Force (TTAPDF) ၊ D.B.B.F-MMU စတဲ့ မဟာမိတ်အဖွဲ့ တွေနဲ့ ပူးပေါင်းလုပ်ဆောင်ခဲ့တာ ဖြစ်ပါတယ်။

ပြီးခဲ့တဲ့ ဖေဖော်ဝါရီ ၂၆ ရက်နေ့မှာလည်း မြင်းမူမြို့နယ်၊ ပဒတ္ထိုင်းရွာ၊ ညောင်ပင်ကန်ရွာတို့ကို မီးရှို့ခဲ့တဲ့ စစ်​ကောင်စီစစ်ကြောင်းကို ကန်တော်ကျေးရွာအနီးမှာ People’s knight Defense Force Myinmuနဲ့အတူ မဟာမိတ်အဖွဲ့တွေက တိုက်ခိုက်ခဲ့ရာ တိုက်ပွဲအတွင်း စစ်ကောင်စီဘက်မှ လက်နက်ကြီး (Jammer) တခု လုံးဝပျက်စီးသွားခဲ့တယ်လို့ သိရပါတယ်။

စစ်ကိုင်း၊ မတ် ၄၊ ၂၀၂၃။

စစ်ကိုင်းတိုင်း၊ စစ်ကိုင်း – မုံရွာလမ်းမှာ သွားနေတဲ့ ၁၂ ဘီးကားစစ်ယာဥ်တန်းကို မတ်လ ၃ ရက် မနေ့ကနေ့လယ်ပိုင်းမှာ နေရာနှစ်ခုကနေ မိုင်းဆွဲတိုက်ခိုက်ခဲ့တယ်လို့ People Defence force – South Monywa က သတင်းထုတ်ပြန်ထားပါတယ်။

စစ်ကိုင်းမြို့နယ်၊ ဂွေးပင်တောရနဲ့ ရေပိုးစားရွာကြားကနေ နေ့လယ် ၁ နာရီ ၄၅ မိနစ်မှာ ပဒေသာမိုင်း ၃ လုံး၊ နေ့လယ် ၂ နာရီခွဲလောက်မှာ ပဒေသာမိုင်း ၃ လုံးတွဲ ၂ တွဲနဲ့ ဒုတိယအကြိမ် စောင့်ကြိုတိုက်ခိုက်ခဲ့တာလို့ ဆိုပါတယ်။

“ပထမစစ်ယာဥ်တန်း ၃ စီးက မုံရွာကနေ စစ်ကိုင်းကို သွားတာ။ နောက်ဆုံးက ကားရဲ့ နောက်ပိုင်းကို ထိတယ်။ ဒုတိယအကြိမ်က စစ်ကိုင်းကနေ မုံရွာကို သွားတဲ့ကား ၅ စီးကိုတိုက်တာမှာ နောက်ဆုံးကားပဲ ဘော်ဒီတွေ စုတ်ပြတ်သွားပြီး ဒဏ်ရာရရှိခဲ့သူတွေ ရှိတယ်” လို့ South Monywa မှ တာဝန်ရှိသူက ပြောပါတယ်။

ဒီလှုပ်ရှားမှုကို People Defence Force South-Monywa မုံရွာခရိုင် အမှတ်(၁၁)တပ်ရင်း၊ Monywa People’s Liberation Force ဒေါင်းမင်းစစ်ကြောင်းတပ်ခွဲ၊ Black Hunter people Task Force၊ Romin Thirteen People People Defence Force တို့ ပူးပေါင်းလုပ်ဆောင်ခဲ့တာဖြစ်ပြီး၊ တိုက်ခိုက်ချိန်အတွင်း စစ်သားတွေဘက်က ပြန်လည်ပစ်ခတ်မှုတွေ ရှိခဲ့ပေမယ့် တိုက်ခိုက်ရေးရဲဘော်တွေ အန္တရာယ်ကင်းခဲ့တယ်လို့ ဆိုပါတယ်။

စစ်ကောင်စီတပ်တွေဘက်က ထိခိုက်ဒဏ်ရာရ အခြေအနေတွေကိုတော့ မြေလတ်အသံက သီးခြားအတည်မပြုနိုင်သေးပါဘူး။

ပြီးခဲ့တဲ့ ဖေဖေါ်ဝါရီလ ၂၄ ရက် နေ့လယ်ကလည်း People’s Defence Force – South Monywa အဖွဲ့ဟာ မဟာမိတ်တွေနဲ့ပေါင်းပြီး မုံရွာမြို့လဝကရုံးမှာ တပ်စွဲထားတဲ့ စစ်အုပ်စုကို ဒရုန်းနဲ့ ဗုံးကြဲတိုက်ခိုက်တာအပြင် RPGတွေနဲ့ပါ တိုက်ခိုက်ခဲ့လို့ သေဆုံးမှုတွေ ရှိခဲ့ပါသေးတယ်။

ကန့်ဘလူ၊ မတ် ၃၊ ၂၀၂၃။

စစ်ကိုင်းတိုင်း​ဒေသကြီး၊ ကန့်ဘလူခရိုင်၊ ချပ်သင်းတိုက်နယ်၊ ချပ်ကြီးရွာရှိ စစ်ကောင်စီတပ်နဲ့ ပျူစောထီးအထိုင်စခန်း တိုက်ခိုက်သိမ်းပိုက်ခံပြီးနောက် စစ်​ကောင်စီဘက်က ရဟတ်ယာဥ်နဲ့ ၂ ကြိမ် လာရောက်ပစ်ခတ်ခဲ့တယ်လို့ သိရပါတယ်။

မတ်လ ၂ ရက်နေ့ မနက် ၅ နာရီကျော်ခန့်မှာ စစ်ကောင်စီတပ်နဲ့ ပျူအင်အား ၆၀ ကျော်ရှိတဲ့ ချပ်ကြီးပျူရွာကို KB2 တပ်ရင်းနဲ့ ဒေသ ပကဖ အဖွဲ့တွေ စုပေါင်း တိုက်ခိုက်ခဲ့တယ်လို့ ဒေသကာကွယ်ရေးအဖွဲ့ဝင် တဦးက ပြောပါတယ်။

“ပျူစခန်းကို တိုက်ဖို့ သေချာ ပလန်ချပြီးမှ ဝင်တိုက်ခဲ့တာ။ သူတို့က လက်ရှိ ရှိနေသူအားလုံးက ပျူတွေပဲ။ တိုက်ပွဲဖြစ်ပွားတာကတော့ ၁ နာရီကျော် တိုက်ပွဲဖြစ်ခဲ့တယ်။ တိုက်ပွဲဖြစ်ပြီး စခန်းသိမ်းပြီးနောက် ပြန်ဆုတ်မှ စကစ ဘက်ကနေ Mi 35 နှစ်စင်းနဲ့ ၂ ကြိမ် လာပစ်ခဲ့တယ်။ နမခ က ၁ စီးနဲ့ ကလေး လေတပ်ဘက်က ၁ စီးနဲ့ ပစ်တာ။ တို့ဘက်က ဆုတ်နိုင်မယ်ထင်တဲ့ လမ်းကြောင်းကို လိုက်ပစ်ပေမယ့် တလွဲစီပါဘဲ” လို့ ပြောပါတယ်။

အဲဒီတိုက်ပွဲမှာ ပျူစောထီးစခန်းကို သိမ်းနိုင်ခဲ့ပြီး ပျူစောထီးနဲ့ စစ်ကောင်စီအဖွဲ့ ၄၀ ကျော်သေဆုံးခဲ့သလို ဒေသကာကွယ်ရေးတွေဘက်က ၃ ဦး ထိခိုက်ဒဏ်ရာရခဲ့တယ်လို့ ဆိုပါတယ်။

ဒါ့အပြင် ပျူစောထီးနဲ့ စစ်ကောင်စီတပ်သားတွေ ကိုင်တဲ့ လက်နက် ၁၅ လက်ခန့်နဲ့ ဆက်စပ်ပစ္စည်းတွေကို သိမ်းဆည်းနိုင်ခဲ့တယ်လို့ သိရပါတယ်။

တိုက်ပွဲဖြစ်ပွားပြီးချိန်မှာ စစ်ကောင်စီဘက်က Mi 35 ၂ စီးနဲ့ ပိတောက်ခင်၊ အုတ်ခင်း၊ ဝက်သအင်းကျေးရွာကြားကို လိုက်လံပစ်ခတ်ခဲ့လို့ ဒေသခံတွေ ထိခိုက်မှုအခြေနေကိုတော့ မသိရဘူးလို့ ဆိုပါတယ်။

အဲဒီအပြင် စစ်ကောင်စီအင်အား ၁၅၀ ကျော်ဟာ စစ်ကြောင်း ၂ ကြောင်းခွဲကာ ချပ်ကြီးရွာကို ရောက်လာပြီးနောက် မတ်လ ၃ ရက်နေ့ ယနေ့မနက်မှာတော့ ဝက်သအင်းဘက်ကို စစ်ကြောင်းထိုးနေတယ်လို့ သိရပါတယ်။

ချပ်ကြီးရွာတိုက်ပွဲအပြင် စစ်ကောင်စီဘက်က ရဟတ်ယာဥ်သုံးပစ်ခတ်တာ၊ စစ်ကြောင်းထိုးတာတွေကြောင့် နဂါးပေါ်၊ ပိတောက်ပင်၊ ဇီးကုန်း၊ ဆားချင်း၊ ပင်သာကြီးအပါအဝင် ကျေးရွာ ၅ ရွာက ဒေသခံ ၅၀၀၀ ခန့် ထွက်ပြေးနေရတာ ဖြစ်ပါတယ်။

ဖေဖော်ဝါရီ ၂၂ ရက်နေ့ မနက် ၄ နာရီ ၃၀ မိနစ်မှာ ကန့်ဘလူမြို့နယ် ချပ်သင်း​ကျေးရွာရဲစခန်းမှာ တပ်စွဲထားပြီး ကင်းပုန်းထွက်လာတဲ့ စစ်ကောင်စီတပ်သားတွေကို ချပ်သင်းအရှေ့ဘက်မှာ ဒေါင်းရာဇာအဖွဲ့မှ မိုင်းဆွဲတိုက်ခိုက်ခဲ့လို့ စစ်ကောင်စီတပ်သား ၂ ဦး သေဆုံးခဲ့သေးတယ်လို့ သိရပါတယ်။

စာတည်း – 007

ဘုတလင်၊ မတ် ၃၊ ၂၀၂၃။

စစ်ကိုင်းတိုင်း၊ ဘုတလင်မြို့က စစ်ကောင်စီ စစ်ဆေးရေးဂိတ်ကို မတ်လ ၂ ရက်မနေ့ကမနက်အစောပိုင်းမှာ အလစ်အငိုက် ဝင်ရောက်တိုက်ခိုက်ခဲ့တာကြောင့် စစ်သား ၃ ဦး သေဆုံးကာ သေနတ် ၂ လက်နဲ့ ကျည်မျိုးစုံကိုလည်း သိမ်းဆည်းနိုင်ခဲ့တယ်လို့ Depeyin Local Mobile Team ဆီက သိရပါတယ်။

ဘုတလင်မြို့အထွက်၊ မုံရွာ – ရေးဦးကားလမ်းပေါ်က အဆိုပါဂိတ်ကို မနေ့ကမနက် ၅ နာရီလောက်မှာ ဝင်ရောက်တိုက်ခိုက်ခဲ့တာလို့ Kaung Kin Local Squad နဲ့ Local Mobile Team ရဲ့ စစ်ဗျူဟာမှူး ဗိုလ်ကောင်းကင်က ပြောပါတယ်။

“စစ်သား ၃ ယောက် မနက်အစောပိုင်း အိမ်စီးကားအဖြူနဲ့ ဂိတ်ကို ရောက်လာတာကို တိုက်ခိုက်ခဲ့တာပါ။ စစ်သားတွေ တချက်မှ ပြန်ပစ်ချိန်တောင် မရဘူး။ ပစ်ခတ်ချိန် ၅ မိနစ်အတွင်း နေရာမှာပဲ ပွဲချင်းပြီး သေကုန်တာပါ” လို့ ပြောပါတယ်။

အဲ့ဒီစစ်ကောင်စီဂိတ်ဟာ ဒေသခံပြည်သူတွေဆီက ပိုက်ဆံတောင်းကြမ်းသလို တောင်သူတွေရဲ့ ပဲဆီတွေကိုလည်း ပုံးအဝါနဲ့ ထည့်လို့ဆိုကာ သိမ်းယူတာတွေလည်း ပြုလုပ်လေ့ရှိတယ်လို့ သူကဆက်ပြောပါတယ်။

MA4 တွဲ ၁ လက်၊ MA 11 ၁ လက်၊ ၄၀-မမ အသီး ၁၅ လုံး၊ MA11 ကျည်ဘောက် ၄ ခု၊ လက်ပစ်ဗုံး ၂ လုံးနဲ့ 5.56 ကျည်တောင့်တွေကိုပါ သိမ်းဆည်းနိုင်ခဲ့တယ်လို့ ဆိုပါတယ်။

တိုက်ခိုက်မှုအတွင်း စစ်သား ၃ ဦး သေဆုံးခဲ့တယ်လို့ ကာကွယ်ရေးရဲဘော်တွေက ပြောပေမယ့် ဒီသေဆုံးနဲ့ပတ်သက်ပြီး မြေလတ်အသံက သီးခြားအတည်ပြုချက် မရရှိသေးပါဘူး။

ဒီစစ်ဆင်ရေးကို Local Mobile Teamနဲ့ ကြေးမုံတပ်ရင်း တပ်ခွဲ-၃၊ တပ်ရင်း ၁၂ ရွှေဘိုခရိုင် – တို့ ပူးပေါင်းကာ ပြောက်ကျားစစ်ဆင်ရေးအဖြစ် တိုက်ခိုက်ခဲ့တာလို့ သိရပါတယ်။

Depeyin Local Mobile Team ရဲ့ထုတ်ပြန်ချက်မှာတော့ အခုစစ်ဆင်မှုဟာ ဆပ်ပြာကျင်းတူမီး တိုက်ပွဲမှာ ကျဆုံးခဲ့ရတဲ့ အာဇာနည်ရဲဘော်တွေရဲ့ ၁ နှစ် ၈ လပြည့် ကြေကွဲဝမ်းနည်းဖွယ် အမှတ်တရနေ့အတွက် သူရဲ‌‌ကောင်းတို့အမှတ်တရ အထူးစစ်ဆင်ရေး ပြုလုပ်ခဲ့တာဖြစ်တယ်လို့ ဖော်ပြထားပါတယ်။

ဒီပဲယင်းမြို့နယ်၊ ဆပ်ပြာကျင်းရွာတိုက်ပွဲဟာ ပြီးခဲ့တဲ့နှစ် ဇူလိူင် ၂ ရက်က ဖြစ်ပွားခဲ့တာ ဖြစ်ပြီး စစ်ကောင်စီတပ်က အင်အား အလုံးအရင်းသုံးကာ တိုက်ခိုက်ခဲ့တာကြောင့် ဒေသခံပြည်သူ့ကာကွယ်ရေး ရဲဘော် ၂၆ ဦး ကျဆုံးခဲ့တယ်လို့ Depeyin Local PDF Team ရဲ့ သတင်းပြန်ကြားရေးတာဝန်ခံဆီက သိရပါတယ်။

Depeyin Local Mobile Team အဖွဲ့ဟာ ဇန်နဝါရီလ ၂၉ ရက်ကလည်း ဒီပဲယင်းမြို့တွင်းကို ဝင်ရောက်တိုက်ခိုက်ခဲ့ရာ စစ်သား ၃ ဦး ပြင်းထန်ဒဏ်ရာရခဲ့ပြီး ဒလန်လို့ သတင်းကြီးသူ တဦးကိုပါ ရှင်းလင်းခဲ့ပါသေးတယ်။

စာတည်း – လင်း

မြင်းမူ၊ မတ် ၃၊ ၂၀၂၃။

စစ်ကိုင်းတိုင်း၊ မြင်းမူမြို့ကနေလာတဲ့ စစ်ကောင်စီစစ်ကြောင်းကို မြင်းမူမြို့နဲ့ ပုလဲတန်ရွာကြားမှာ မိုင်းဖောက်ခွဲတိုက်ခိုက်ခံရလို့ စစ်သား ၃ ဦး သေဆုံးပြီး ၄ ဦး ထိခိုက်ဒဏ်ရာရရှိသွားတယ်လို့ Dog Killers People’s Defence Force Myinmu တပ်ဖွဲ့က မတ်လ ၂ ရက် မနေ့က သတင်းထုတ်ပြန်လာပါတယ်။

အင်အား ၆၀ နီးပါးရှိတဲ့ စစ်ကောင်စီစစ်ကြောင်းဟာ ပြီးခဲ့တဲ့ ဖေဖော်ဝါရီလ ၂၈ ရက်မှာ အထူးပြုလုပ်ထားတဲ့ မိုင်းဘီးလူးအမည်ရှိ မိုင်းအမျိုးအစားနဲ့ တိုက်ခိုက်ခဲ့တာလို့ Dog Killers People’s Defence Force Myinmu တပ်ဖွဲ့မှ တာဝန်ရှိက မြေလတ်အသံကို ပြောပါတယ်။

“အဲဒီစခတွေက မြင်းမူမြို့နယ်ထဲမှာရှိတဲ့ ရွာသားတွေကို သတ်ဖြတ်တာတွေ၊ မုဒိမ်းကျင့်တာတွေလုပ်ပြီး စစ်ကြောင်းထွက်လာတာပါ။ ကျနော်တို့ကလည်း စစ်ကြောင်းထိုးလာတဲ့ *တွေကို အထူးထုတ် မိုင်းဘီးလူးကြီးတလုံးနဲ့ ဖောက်ခွဲခဲ့တာ။ သူတို့ဘက်က သေဆုံးသွားတဲ့သူ ဒဏ်ရာရသွားတဲ့သူတွေကို ထမ်းလာတာကို ကျနော်တို့မျက်စိနဲ့ မြင်တွေ့ခဲ့ပါတယ်” လို့ ဆိုပါတယ်။

ဒီစစ်ဆင်ရေးကို People’s Army To Fight Dictatorship(PAFD).တပ်ခွဲ DK PDF(MMU)၊ People’s Knight Defense Force Myinmu (PKDF.MMU)၊ မြင်းမူမြို့တိုက်နယ် အနောက်ခြမ်း ပ က ဖ၊ D.B.B.F.MMU မဟာမိတ်အဖွဲ့တွေက ပူးပေါင်းလုပ်ဆောင်ခဲ့တာလည်း ဖြစ်ပါတယ်။

မိုင်းဆွဲပြီးတဲ့နောက်မှာ စစ်ကောင်စီဘက်က လက်နက်ကြီး၊ လက်နက်ငယ်၊ စက်သေနတ်တွေနဲ့ ပြန်လည်ပစ်ခတ်ခဲ့တယ်လို့ သိရပါတယ်။

ပစ်ခတ်မှုကို ဖေဖော်ဝါရီ ၂၈ ရက်မှာ ပြုလုပ်ခဲ့ပေမယ့် နယ်မြေအခြေအနေကြောင့် သတင်းထုတ်ပြန်မှုကို နောက်ဆုတ်လိုက်ရတာလို့လည်း အထက်ပါတာဝန်ရှိသူက ပြောပါတယ်။

တိုက်ခိုက်မှုအတွင်း စစ်သား ၃ ဦး သေဆုံးခဲ့တယ်လို့ မြေပြင်တိုက်ခိုက်ရေးရဲဘော်တွေက ပြောပေမယ့် မြေလတ်အသံက သီးခြားအတည်မပြုနိုင်သေးပါဘူး။

အလားတူ ဖေဖော်ဝါရီလ ၂၇ ရက်ကလည်း DK PDF တပ်ဖွဲ့ဟာ မြင်းမူမြို့၊ စီးပွားရေးဘဏ်မှာ အထိုင်ချတပ်စွဲထားတဲ့ စစ်ကောင်စီတပ်ဖွဲ့ကို လက်နက်ငယ်တွေနဲ့ သွားရောက်ပစ်ခတ်ခဲ့ပါသေးတယ်။

စာတည်း – လင်း

ရွှေဘို၊ မတ် ၃၊ ၂၀၂၃။

စစ်ကိုင်းတိုင်း၊ ရွှေဘိုခရိုင်၊ ဝက်လက်မြို့နယ်မှာ စစ်ကြောင်းထိုးနေတဲ့ စစ်ကောင်စီတပ်ကို မတ်လ ၂ ရက် မနေ့မနက် ၈ နာရီလောက်မှာ လက်နက်ကြီးတွေနဲ့ တိုက်ခိုက်ခဲ့လို့ ထိခိုက်သေဆုံးသူတွေ ရှိတယ်လို့ Eagle Guerrilla Force ဆီက သိရပါတယ်။

ဝက်လက်မြို့နယ် အောင်ချမ်းသာရွာကနေ အင်အား ၇၀ လောက်နဲ့ ထွက်လာတဲ့စစ်ကြောင်းကို ဘင်တဲကုန်းရွာ အဝင်နဲ့ အထွက်မှာ တိုက်ခိုက်ခဲ့တာလို့ Eagle Guerrilla Force ရဲ့ တပ်ရင်းမှူး ဗိုလ်ကောက်ရိုးက မြေလတ်အသံကို ပြောပါတယ်။

“သူတို့က ဘင်တဲကုန်း ဘုန်းကြီးကျောင်းထဲရောက်တာနဲ့ ကျနော်တို့က စပစ်တာ ဘင်တဲကုန်းရွာ အထွက်မှာ လက်နက်ကြီးထိတာ အဲဒီမှာ စစ်တပ်က လက်နက်မျိုးစုံ ပစ်ခတ်ပြီး ဆောင်ပခက်တွေနဲ့ သခွတ္တောရွာကို ထမ်းသွားတာ ၅ ဦး၊ အဲဒီကနေ ၃ ဖာလုံလောက်ပဲ ဝေးတဲ့ ဝက်လက်ဆေးရုံကို နာရေးကားနဲ့ သယ်သွားတာ” လို့ သူက ပြောပါတယ်။

အဲ့ဒီစစ်ကောင်စီစစ်ကြောင်းဟာ ပြီးခဲ့တဲ့ တပတ်အတွင်းကမှ ရွှေဘိုမြို့နယ်ကနေ ဝက်လက်မြို့နယ်ထဲကို အရပ်ဝတ်တွေနဲ့ ဝင်ရောက်လာတာ ဖြစ်ပြီး မနေ့ညပိုင်းအထိ သခွတ္တောရွာမှာပဲ ရှိနေကာ နေအိမ်တချို့ကို မီးရှို့တာတွေ လုပ်ဆောင်နေတယ်လို့ သူကဆက်ပြောပါတယ်။

တိုက်ခိုက်မှုအတွင်း စစ်ကောင်စီတပ် ထိခိုက်ဒဏ်ရာရသူတွေနဲ့ ပတ်သက်ပြီး မြေလတ်အသံက သီးခြားအတည်ပြုချက် မရသေးပါဘူး။

အဲဒီတိုက်ခိုက်မှုမှာ Eagle Guerrilla Force တပ်ခွဲ ၁ ၊ လျှပ်စီးပြောက်ကျားတပ်ဖွဲ့၊ ရွှေဘိုခရိုင်အမှတ် ၂ တပ်ရင်း တို့ ပူးပေါင်းတိုက်ခိုက်ခဲ့တယ်လို့ သိရပါတယ်။ ဖေဖော်ဝါရီလ ၂၈ ရက် မနက်ပိုင်းကလည်း Eagle Guerrilla Force အဖွဲ့ဟာ အဲဒီစစ်ကြောင်းကိုပဲ ဝက်လက်မြို့နယ်အနောက်ဘက်ခြမ်း ဘိုတဲကျေးရွာအနီးကနေ စောင့်ကြိုတိုက်ခိုက်ခဲ့လို့ စစ်သား ၁ ဦး သေဆုံးကာ ၂ ဦး ပြင်းထန်ဒဏ်ရာ ရရှိခဲ့ပါသေးတယ်။

စာတည်း – ရင်ငြိမ်း