ဂျော့ရှုဝါဗန်

မြေလတ်အသံ၊ စက်တင်ဘာ ၁၅၊ ၂၀၂၄။

စက်တင်ဘာ ၁၅ ရက်၊ ဒီနေ့မနက်မှာထိုးသတ်သွားတဲ့ UFC 306 ပြိုင်ပွဲမှာ ဗန်ဟာ ပြိုင်ဘက်မက္ကဆီကိုဖိုက်တာ ချိုင်းရက်ဇ်ကို အမှတ်နဲ့အနိုင်ရရှိခဲ့ပါတယ်။ 

ပထမအချီမှာတော့ ချိုင်းရက်ဇ်ဟာ အောက်ခြေကန်ချက်နဲ့ ဘယ်ထောက်လက်သီးတွေကိုအသုံးပြု ထိုးသတ်ခဲ့ပြီး ဗန်ကိုအခက်တွေ့စေခဲ့ပါတယ်။

ဗန်ကတော့ အစားထိုး ထိုးသတ်တဲ့ကစားသမားတွေရဲ့ထုံးစံအတိုင်း ပြိုင်ဘက်ရဲ့ အခြေအနေကို စောင့်ကြည့်အကဲခတ်ခဲ့ရပြီး လက်သီးချက်တွေထိရောက်ဖို့ အနီးကပ်အောင်ကြိုးစားထိုးသတ်ရင်း ခြေကန်ချက်တွေကိုလည်း အသုံးပြုခဲ့ပါတယ်။ ပထမအချီဟာ ချိုင်းရက်ဇ်စိတ်ကြိုက်ဖြစ်ခဲ့ပြီး ဗန်ရဲ့ ခြေထောက်လည်း နာသွားခဲ့ပုံရပါတယ်။ 

ဒုတိယအချီမှာတော့ ဗန်ရဲ့လက်သီးချက်တွေဟာထိရောက်ခဲ့ပြီး ချိုင်းရက်ဇ်ရဲ့သက်လုံတွေကိုဖြိုချနိုင်ခဲ့ပါတယ်။ အလဲထိုးထိလုလုဖြစ်ခဲ့ပေမယ့် ချိုင်းရက်ဇ်ရဲ့ခံနိုင်ရည်အားကောင်းမွန်တာနဲ့ ရုတ်တရက်ထွက်လာတဲ့လက်ပြန်ရိုက်ချက်တွေကြောင့် ဗန်အတွက်အခက်တွေ့စေခဲ့ပါတယ်။ ဗန်အသာရခဲ့တဲ့အချီလို့ ပြောနိုင်ပြီး ချိုင်းရက်ဇ်ရဲ့ခံနိုင်ရည်ကလည်း အတော်လေးမြင့်မားတာကိုတွေ့ရပါတယ်။ 

တတိယအချီမှာတော့ ဗန်ဟာပွဲဖြတ်ဖို့ တိုးကပ်ကြိုးစားခဲ့ပြီး သက်လုံကျလာတဲ့ချိုင်းရက်ဇ်ကတော့ ချုပ်ကွက်အသာရအောင်ကြိုးစားလာခဲ့ပါတယ်။ ချုပ်ကွက်ရဖို့ကြိုးစားနေတဲ့ချိုင်းရက်ဇ်ကို ဗန်ဟာ ရုတ်တရက်ကိုင်ပေါက်လှဲချတာမျိုးပြုလုပ်နိုင်ခဲ့ပြီး မြေပြင်ပေါ်မှာလည်း လက်သီးချက်တွေကိုအဆက်မပြတ်အသုံးပြုနိုင်ခဲ့ပါတယ်။ 

ပွဲပြီးဆုံးချိန်မှာတော့ အမှတ်ပေးဒိုင်သုံးဦးစလုံးက ဗန်ကိုအနိုင်ပေးခဲ့ကြတာဖြစ်ပြီး ဒီပွဲအနိုင်ကြောင့် ဗန်ဟာ UFC မှာ နိုင်ပွဲ ၄ ပွဲအထိရှိလာခဲ့ပြီဖြစ်ပါတယ်။

Photo – SS from UFC.

မြေလတ်အသံ၊ စက်တင်ဘာ ၁၄၊ ၂၀၂၄။

UFC ပြိုင်ပွဲတွေမှာ ဝင်ရောက်ထိုးသတ်နေတဲ့ ချင်းလူငယ်ဖိုက်တာ ဂျော့ရှုဝါဗန် ကတော့ UFC 306 မှာ မက္ကဆီကိုဖိုက်တာ အက်ဂါချိုင်းရက်ဇ် နဲ့ ယှဉ်ပြိုင်ထိုးသတ်သွားတော့မှာ ဖြစ်ပါတယ်။ ဗန်ဟာ ဒီပွဲကို ပြိုင်ဘက်ချိုင်းရက်ဇ်နဲ့ထိုးသတ်မယ့် ကယ်ဗင်ဘိုဟာ့စ်နုတ်ထွက်သွားတာကြောင့် လူစားထိုးကစားသမားအဖြစ် ပါဝင်ခဲ့တာဖြစ်ပြီး Flyweight တန်းမှာ ထိုးသတ်သွားမှာပါ။  

အမေရိကန်နိုင်ငံ၊ လပ်စ်ဗီးဂက်စ်မြို့မှာကျင်းပမယ့် UFC 306 ပြိုင်ပွဲဟာ မက္ကဆီကိုအငွေ့အသက်တွေလွှမ်းခြုံထားပြီး မက္ကဆီကိုဖိုက်တာတွေ အများဆုံးပါဝင်တဲ့ပွဲစဉ်တပွဲဖြစ်တာကြောင့် ချိုင်းရက်ဇ်အတွက်တော့ စိတ်ပိုင်းဆိုင်ရာမှာ အားသာမှုရှိနေမှာသေချာပါတယ်။ UFC မှာ သုံးပွဲထိုးပြီး တပွဲနိုင်၊ တပွဲသရေ၊ တပွဲရှုံးရလဒ်ပိုင်ဆိုင်ထားတဲ့ချိုင်းရက်ဇ်ဟာ ပြိုင်ဘက်ကို Stand Fight ယှဉ်ထိုးတာများပြီး လူချင်းပူးကပ်သွားချိန်တွေမှာ ချုပ်ကွက်တွေကို ရုတ်တရက်ပြောင်းလဲအသုံးပြုတတ်ပါတယ်။ ဗန်ထက် အရပ်နဲ့လက်တံထိရောက်မှုအားသာချက်ရှိပြီး အားပါပြင်းထန်တဲ့အောက်ခြေကန်ချက်တွေကို အသုံးပြုတတ်တဲ့ကစားသမားတဦး ဖြစ်ပါတယ်။

UFC မှာပွဲများများထိုးပြီး ချန်ပီယံခါးပတ်ပတ်ခွင့်ရတဲ့ ပထမဦးဆုံးမြန်မာဖိုက်တာဖြစ်ချင်တဲ့ ဗန်ကတော့ ဒီပွဲကိုလည်း လူစားထိုးအနေနဲ့ဝင်ရောက်ယှဉ်ပြိုင်ခဲ့တာဖြစ်ပါတယ်။ ဗန်ဟာ ပြီးခဲ့တဲ့ဒန်ဗာမြို့ပြိုင်ပွဲမှာ ဖိုက်တာဘဝရဲ့ပထမဆုံးရှုံးပွဲအဖြစ် ချားလ်ဂျွန်ဆင်ကိုရှုံးနိမ့်ခဲ့ပေမယ့် ပြိုင်ပွဲတွေအတွက်အမြဲတမ်းအသင့်ရှိနေပြီး ပြိုင်ဘက်မရွေး ယှဉ်ပြိုင်ထိုးသတ်ရဲသူတဦးလည်း ဖြစ်ပါတယ်။ ဗန်ဟာ ပြိုင်ဘက်နဲ့ Stand Fight ယှဉ်ထိုးတာကို နှစ်သက်လေ့ရှိပြီး ပြင်းထန်တိကျတဲ့လက်သီးတွဲလုံးတွေကို အသုံးပြုတတ်ပါတယ်။ ပြိုင်ဘက်ချိုင်းရက်ဇ်ဟာ အရပ်အမောင်းနဲ့လက်တံပိုသာပေမယ့် ဗန်အတွက်တော့ ဒီလိုပြိုင်ဘက်တွေနဲ့ထိုးသတ်ရတာ ရိုးနေပြီလို့ပြောရမှာပါ။ ပြိုင်ဘက်ကို အနီးကပ်ဖိအားပေးထိုးသတ်တတ်တဲ့ဗန်ဟာ ကိုယ့်ထက်အရပ်အမောင်းနဲ့လက်တံသာတဲ့ ကယ်ဗင်ဘိုဟာ့စ်၊ ဖိလစ်ပီဘူးနပ်စ်တို့ကို အသာစီးထိုးပြီး အနိုင်ယူပြထားပါတယ်။ 

UFC 306 မှာ Stand Fight ယှဉ်ထိုးရတာကိုနှစ်သက်ကြတဲ့ ဖိုက်တာနှစ်ယောက်ထဲက အနိုင်ရမယ့်သူဟာ ချိုင်းရက်ဇ်လား၊ ဗန်လားဆိုတာကို မကြာခင်အဖြေပေါ်တော့မှာ ဖြစ်ပါတယ်။ UFC 306 ပြိုင်ပွဲတွေကိုတော့ အမေရိကန်နိုင်ငံ၊ လပ်စ်ဗီးဂက်စ်မြို့မှာ စက်တင်ဘာ ၁၅ ရက်၊ တနင်္ဂနွေနေ့မနက် မြန်မာစံတော်ချိန် ၆ နာရီမှာ ကျင်းပသွားမှာဖြစ်ပါတယ်။ 

Photo – UFC .