ချောက်

ချောက်၊ မေ ၂၀၊ ၂၀၂၆။

မကွေးတိုင်း၊ ချောက်မြို့အထွက်၊ အေးရွာအနီး ဓာတ်ဆီဆိုင်အရှေ့မှာ စျေးရောင်းသွားတဲ့ အရောင်းဝန်ထမ်း ၂ ဦးကို စစ်ကော်မရှင်တပ်က ပေါ်တာဆွဲဖမ်းဆီးသွားတယ်လို့ မြို့ခံတွေဆီက သိရပါတယ်။

မေ ၁၉ ရက်မနက် ၁၁ နာရီခန့်မှာ အရပ်ဝတ်နဲ့ လက်နက်ကိုင်ဆောင်ထားတဲ့ စစ်ကော်မရှင်အဖွဲ့ဝင်အင်အား ၁၁ ဦးခန့်ဟာ လမ်းသွားလမ်းလာတွေကို စစ်ဆေးနေစဥ် ချောက်မြို့ဘက်ကနေ ထွက်လာတဲ့ “တိုးကြွယ်” အမွှေးတိုင်၊ ဖယောင်းတိုင် ထုတ်လုပ်ဖြန့်ချီရောင်းချရေး ကုမ္ပဏီက ယာဥ်မောင်း အပါအဝင် ၃ ဦးလိုက်ပါလာတဲ့ ကုမ္ပဏီပိုင်ကားကိုတားဆီးပြီး ဝန်ထမ်း ၂ ဦးကို ဖမ်းဆီးခဲ့တာလို့ဆိုပါတယ်။

“ချောက်မှာစျေးရောင်းပြီး အခြားစျေးကွက်သွားရောင်းဖို့အပြန်မှာ သူတို့(စကမ)တွေက မင်းတို့ ၁၈ နှစ်ပြည့်ပြီဆိုပြီး ခေါ်သွားတယ်။ စုံစမ်းမေးကြည့်တော့ ထွေအုပ်ဝန်ထမ်းတွေကပြောတယ် သူတို့ကတိုင်းခြားဖြစ်နေတော့ စစ်မှုထမ်းခေါ်လို့မရဘူးလည်းပြောတယ်။ မရရင်ပြန်လွှတ်ပေါ့ဗျာ။ ထွေအုပ်ကိုမေးတော့ ခရိုင်ရဲကလွှတ်ပေးမှ။ ရဲကိုမေးတော့လည်း ထွေအုပ်ကလွှတ်ပေးမှဆိုပြီး ပြောနေကြတယ်။ အခုတောင်ဆက်သွယ်လို့မရတော့ဘူးဖြစ်နေတယ်”လို့ မြို့ခံတဦးက ပြောပါတယ်။

ဖမ်းဆီးခံရသူတွေဟာ ဧရာဝတီတိုင်းဇာတိသား အသက် ၂၀ အရွယ် အရောင်းစာရေး မောင်လင်းကောင်းခန့်၊ မောင်အောင်အောင်ဦးတို့ဖြစ်ပြီး ရန်ကုန်ကနေ ချောက်မြို့ကို စျေးရောင်းထွက်လာချိန် ခုလိုဖမ်းဆီးခံရတာလို့ ဆိုပါတယ်။

လက်ရှိမှာတော့ ဝန်ထမ်း ၂ ဦးကို ချောက်မြို့နယ်အထွေထွေအုပ်ချုပ်ရေးဦးစီးဌာနရုံးမှာ ဖမ်းဆီးထားပြီး ကျန်းမာရေးစစ်ဆေးမှုတွေပြုလုပ်နေပြီး ယာဥ်မောင်းကတော့ အသက်အရွယ်ကြီးနေတာကြောင့် ကားနဲ့ယာဥ်မောင်းကိုတော့ ပြန်လွှတ်ပေးထားတယ်လို့ ဆိုပါတယ်။

အခုလို နယ်ထွက်စျေးရောင်းတဲ့ ကုမ္ပဏီဝန်ထမ်းတွေကို စစ်ကော်မရှင်ဘက်က ဖမ်းဆီးပြီး စစ်မှုထမ်းတွေထဲ ထည့်ဖို့ ကြိုးစားလာနေတဲ့အပေါ် ရေရှည်မှာ ဝန်ထမ်းတွေက နယ်ကျော်စျေးရောင်းထွက်ဖို့ ကြောက်လန့်လာနိုင်ပြီး ထုတ်လုပ်ထားတဲ့ကုန်ပစ္စည်းတွေ မရောင်းချမဖြန့်ဖြူးနိုင်ပါက ကုမ္ပဏီတွေ လုပ်ငန်းပြိုလဲသွားနိုင််တယ်လို့ ကုမ္ပဏီနဲ့နီးစပ်သူတွေဆီက သိရပါတယ်။

ဖမ်းဆီးခံရတဲ့ အရောင်းဝန်ထမ်း ၂ ဦးပြန်လည်လွတ်မြောက်လာဖို့ ကုမ္ပဏီဘက်က ကြိုးစားနေပေမယ့် မေလ ၂၀ ရက်အထိ ပြန်လွတ်လာတာမရှိသေးဘူးလို့ သိရပါတယ်။

စာတည်း – လင်း

ချောက်၊ ဇန်နဝါရီ ၂၉၊ ၂၀၂၆။

မကွေးတိုင်း၊ ချောက်မြို့နယ်မှာ စစ်ကော်မရှင်တပ်က စစ်ကြောင်းထိုးရွာလုံးကျွတ်မီးရှို့ခဲ့ပြီး စစ်ကြောင်းထွက်ခွာချိန်မှာ ရိုက်နှက်ဒဏ်ရာ၊ သေနတ်ဒဏ်ရာတွေနဲ့ သေဆုံးနေတဲ့ အမျိုးသား ၁ ဦးရုပ်အလောင်းကိုလည်း တွေ့ခဲ့ရတယ်လို့ ဒေသခံတွေဆီက သိရပါတယ်။

ဇန်နဝါရီ ၂၇ ရက်က ချောက်မြို့ကနေ ကန်ဆောင်ရွာကထွက်ခွာလာတဲ့ ပခုက္ကူအခြေစိုက် တပ်မ ၁၀၁နဲ့ စလေမြို့ ခမရ ၄၁၆ ပူးပေါင်းအင်အား ၁၂၀ ခန့်စစ်ကြောင်းဟာ ဇန်နဝါရီ ၂၈ ရက် ယမန်နေ့ မနက် ၈ နာရီခန့်မှာ မကျီးကုန်းကျေးရွာကို ဝင်ရောက်ပြီး နေအိမ်တွေကို မီးရှို့ခဲ့တာလို့ ဆိုပါတယ်။

” ရွာမဝင်ခင်လမ်းဆုံ (ကန်ဆောင်နဲ့ မကျီးကုန်းကျေးရွာကြား)မှာ တိုက်ပွဲဖြစ်သေးတယ်။ ဒီကောင်တွေလက်နက်ကြီးနဲ့ထောက်ပြီး ငြိမ်ပြီးမှ ရွာကိုအားချင်းဝင်လာပြီး မီးရှို့ပစ်တာ။ မြောက်ကနေတန်းရှို့ဆိုတာအနောက်ခြမ်းတခြမ်းလုံး ကုန်တယ်။ ၅ အိမ်ပဲကျန်တယ်။ အကုန်လုံးမှာ(အိမ်) ၁၆၀ လောက်ရှိတာ ၁၄၀ လောက်ကုန်သွားတယ်” လို့ ဖြစ်စဥ်ကိုသိရှိထားတဲ့ဒေသခံတဦးက မြေလတ်အသံကို ပြောပါတယ်။

ကျေးရွာကိုမီးရှို့ပြီးနောက် ယမန်နေ့ညနေ ၃ နာရီခန့်မှာ အဲ့ဒီစစ်ကြောင်းဟာ လွန်ကြယ်ထိန်ကန်ရွာကို ဆက်လက်ဝင်ရောက်လာပြီး ညအိပ်တပ်စွဲခဲ့ကာ ဇန်နဝါရီ ၂၉ ရက် ဒီကနေ့ မနက် ၇ နာရီခန့်မှာ နေအိမ် ၅ လုံးနဲ့ ဆိုင်ကယ် ၂၀ စီးကိုမီးရှို့ပြီးနောက် ချောက်မြို့ကို ပြန်လည်ထွက်ခွာသွားတယ်လို့ သိရပါတယ်။

စစ်ကြောင်းထွက်သွားပြီးနောက် ဒေသကာကွယ်ရေးတပ်ဖွဲ့တွေက လွန်ကြယ်ထိန်ကန်ရွာကို နယ်မြေရှင်းလင်းရေးဝင်ရောက်ချိန် ကျေးရွာအပြင်ဘက်မှာ ရိုက်နှက်ဒဏ်ရာ၊ သေနတ်ဒဏ်ရာတွေနဲ့ အသက် ၅၄ နှစ်အရွယ် ဦးဝိုင်းမောင် သေဆုံးနေတာကို တွေ့ရှိခဲ့ရတယ်လို့ မြေပြင်တပ်ဖွဲ့ဝင်တချို့ထံက သိရပါတယ်။

စစ်ကြောင်းထိုးလာချိန် ကန်ဆောင်နဲ့မကျီးကုန်းကျေးရွာအကြား၊ မကျီးကုန်းနဲ့လွန်ကြယ်ထိန်ကန်ကျေးရွာအကြားတွေမှာ ဒေသကာကွယ်ရေးတပ်ဖွဲ့တွေနဲ့ တိုက်ပွဲ ၂ ကြိမ်ဖြစ်ပြီး စစ်ကော်မရှင်တပ်က ထိခိုက်မှုရှိတယ်လို့လည်း သိရပါတယ်။

စစ်ကြောင်းထိုးမီးရှို့လို့ အိမ်ခြေ ၁၅၀ ကနေ ၄၀၀ ကြားရှိတဲ့ ကန်ဆောင်၊ မကျီးကုန်း၊ လွန်ကြယ်ထိန်ကန်၊ ကိုင်းထောက်ကန်၊ ထောက်ရှည်ကန်၊ မကျီးဆောက်ကျေးရွာတွေက လူ ၂,၀၀၀ ကျော် ဇန်နဝါရီ ၂၉ ရက် ဒီကနေ့မနက်ပိုင်းအထိ ဘေးလွတ်ရာကို ထွက်ပြေးနေရတယ်လို့ သိရပါတယ်။

ဇန်နဝါရီ ၁၅ ရက်ကလည်း ပခုက္ကူမြို့နယ်၊ ကိုင်းစံပြကျေးရွာနဲ့ မြိုင်မြို့နယ်၊ နှောပင်ကျေးရွာမှာ စစ်ကြောင်းထိုးမီရှို့ခံရလို့ သက်ကြီးအမျိုးသမီး ၁ ဦးသေဆုံးပြီး နေအိမ် ၁၄၀ ကျော် မီးလောင်ပျက်စီးခဲ့တယ်လို့ သိရပါတယ်။

ချောက်၊ ဒီဇင်ဘာ ၁၃၊ ၂၀၂၅။

မကွေးတိုင်း၊ ချောက်မြို့နယ်၊ ကြီးနီကျေးရွာအနီး ရထားလမ်းဘေးမှာ ပစ်သတ်ခံထားရတဲ့ အလောင်း ၂ လောင်းတွေ့ရတယ်လို့ ဖြစ်စဥ်ကိုသိရှိတဲ့ဒေသခံတဦးဆီက သိရပါတယ်။

ပစ်သတ်ခံထားရသူတွေက ချောက်မြို့နယ်၊ အမှတ် (၁၀) ရပ်ကွက်နေ အသက် ၆၀ ကျော်အရွယ် ဦးကျော်အေး နဲ့ ဂွေးချိုကျေးရွာနေ အသက် ၆၁ နှစ်အရွယ် ဦးခင်မောင်နိုင်တို့ဖြစ်ပြီး ဒီဇင်ဘာ ၁၁ ရက်နေ့နေလယ် ၁ နာရီခန့်မှာ လမ်းသွားလမ်းလာတွေကတွေ့ရတာလို့ ဆိုပါတယ်။

“မွန်ကြီး KTV မှာဝင်ဆွဲသွားတာ။ ရွှေဇင်ဝင်းဟိုတယ်နဲ့မျက်နှာချင်းဆိုင် ဆိုင်ကနေ။ ခေါ်သွားပြီးမှ ရှင်းတဲ့သဘောရှိတယ်။ အလောင်းတွေကိုတော့ ကြီးနီဘူတာရုံနားလာပစ်သွားတာ”လို့ ဒေသခံတဦးက ပြောပါတယ်။

သူတို့ ၂ ဦးဟာ ဒီဇင်ဘာ ၇ ရက်ညပိုင်းမှာ KTV ကတဆင့် ပျောက်ဆုံးနေခဲ့တာဖြစ်ပြီး အလောင်းတွေ တွေ့ချိန်မှာတော့ ဦးခေါင်းပွင့်ထွက်ဒဏ်ရာ၊ ဗိုက်ကျည်ထိဒဏ်ရာတွေနဲ့သေဆုံးနေတာတွေ့ရကာ အလောင်းတွေကိုတော့ စစ်ကော်မရှင်တပ်သားတွေကလာကောက်သွားကြတယ်လို့ ဆိုပါတယ်။

သူတို့ ၂ ဦးဟာ စစ်အာဏာသိမ်းစက လူထုဆန္ဒပြပွဲတွေမှာ ပူးပေါင်းပါဝင်ခဲ့သေးပြီး နောက်ပိုင်းမှာ စစ်ကော်မရှင်တပ်ဖွဲ့ဝင်တွေနဲ့ပေါင်းကာ ရေနံစိမ်းအရောင်းအဝယ်လုပ်ရင်း စီးပွားဖြစ်လာသူတွေ ဖြစ်သလို စစ်ကော်မရှင်အဖွဲ့ဝင်တွေနဲ့အတူသွားလာနေထိုင်သူတွေဖြစ်တယ်လို့ အထက်ပါ ဒေသခံတဦးကပြောပါတယ်။

“အရင်က လူမိုက်ကျော်အေးပေါ့။ ကျော်အေးက ခင်မောင်နိုင်တပည့်။ ဆီမှောင်ခိုတွေလုပ်ပြီး အကြီးအကျယ်ချမ်းသာသွားတာ။ စစ်**နဲ့ပေါင်းပြီး ရေနံတွေလုပ်တာ။ စစ်ကောင်စီနဲ့ပေါင်းပြီး ဒေါက်တိုင်လုပ်တာမှန်တယ်။ သူတို့က သပိတ်ကာလမှာ ပထမသပိတ်မှာ ပါသလိုလိုနဲ့နောက်ပြီးမှ **နဲ့ပေါင်းသွားတာ”လို့ အထက်ပါဒေသခံက ဆက်ပြောပါတယ်။

သူတို့တွေကို ဘယ်အဖွဲ့အစည်းတွေဘက်က ဖမ်းဆီးပစ်ခတ်ခဲ့လည်းဆိုတာကိုတာ့ ဒီဇင်ဘာ ၁၃ ရက်မနက်ပိုင်းအထိ သတင်းထုတ်ပြန်တာမျိုးမရှိသေးပါဘူး။

စစ်ကော်မရှင်ထောက်ခံတယ်လီဂရမ်ချန်နယ်တွေမှာတော့ ပြည်သူတွေဖြစ်တဲ့ ဦးကျော်အေးနဲ့ ဦးခင်မောင်နိုင်တို့ဟာ ချောက်ကနေ ဂွေးချိုရွာကို ခရီးသည်တင်ကားနဲ့အသွား လက်နက်ကိုင်အဖွဲ့တခုက ဖမ်းဆီးသွားပြီးနောက် ပစ်သတ်ခဲ့တယ်လို့ ရေးသားဖော်ပြထားကြပါတယ်။

ပြီးခဲ့တဲ့ ဒီဇင်ဘာ ၁၀ ရက်နေ့ကလည်း ချောက်မြို့နယ်၊ စလေမြို့အဝင်က ဘီယာဆိုင်မှာ ချောင်းပိုက်ကျေးရွာက ပျူစောထီးတဦးပစ်သတ်ခံရပြီး သေဆုံးခဲ့သေးတယ်လို့ သိရပါတယ်။

စာတည်း – လင်း

စလေ၊ ဒီဇင်ဘာ ၁၁၊ ၂၀၂၅။

မကွေးတိုင်း၊ ချောက်မြို့နယ်၊ စလေမြို့အဝင် ဘီယာဆိုင်မှာရှိနေတဲ့ပျူစောထီးခေါင်းဆောင်ကို ဒီဇင်ဘာ ၁၀ ရက်နေ့လယ်ပိုင်းမှာ ပစ်သတ်ခဲ့တယ်လို့ ပြည်သူ့ကာကွယ်ရေးတပ်မတော် မကွေးခရိုင် အမှတ် ၁ တပ်ရင်းဆီက သိရပါတယ်။

ချောက်မြို့နယ်၊ ချောင်းပိုက်ရွာက အသက် ၄၄ အရွယ်ပျူစောထီးခေါင်း မိုးအောင်ကို နေ့လယ် ၁၂ နာရီ ၄၅ မိနစ်မှာ ဘီယာသောက်နေချိန်ဝင်ရောက်ပစ်ခတ်ခဲ့တာလို့ ဆိုပါတယ်။

“စလေမြို့အဝင်က ဘီယာဆိုင်တဆိုင်မှာ သောက်နေတာကို သတင်းရလို့ ကျနော်တို့အနေနဲ့ အသင့်စောင့်နေခဲ့တယ်။ သူ့ဆီသွားပြီး ဝင်ရောက်ရှင်းလင်းလိုက်တာ၊ သူ့မှာ လက်နက်ပါတာ ဖြစ်တဲ့အတွက် မိုးအောင်ကို ပစ်လိုက်တဲ့အခါ မှန်သွားတဲ့အချိန် ကျနော်တို့ လက်နက်ယူတဲ့အခါမှာ လှုပ်နေသေးလို့ ထပ်ပြီးပစ်ခဲ့လိုက်တယ်” လို့ မကွေးခရိုင် အမှတ် ၁ တပ်ရင်း တာဝန်ရှိသူတဦးက ပြောပါတယ်။

သူဟာ ချောက်မြို့နယ်အတွင်းမှာ စစ်ကော်မရှင်တပ်တွေနဲ့အတူစစ်ကြောင်းထိုးရာမှာပါဝင်ပြီး ပေါ်တာဆွဲတာတွေကြောင့် ပစ်ခတ်ခဲ့တာဖြစ်ပြီး တော်လှန်ရေးတပ်တွေဘက်က ၂၅ ချက်ပစ်ခတ်ပေမယ့် ၅ ချက်ထိမှန်သေဆုံးခဲ့တယ်လို့ ဆိုပါတယ်။

“ပျူစောထီးခေါင်းဆောင်က ချောက်မြို့နယ်မှာဆိုရင် စစ်ကော်မရှင်က စစ်ကြောင်းထိုးတာတွေအပြင် အရင်တုန်းကလည်း စလေ တကြောနဲ့ မြစ်အနောက်ခြမ်းမှာ ပေါ်တာဆွဲတာတွေလည်းလုပ်တယ်။ သူက ပျူစောထီးခေါင်းဆောင်လည်းဖြစ်တယ်။ ချောင်းပိုက်ရွာမှာ ဂိတ်တွေထိုင်ပြီး လူငယ်တွေကို ပေါ်တာဆွဲတယ်။ သူနဲ့နီးစပ်ရာနေရာတွေမှာ ဆက်ကြေးကောက်တယ်၊” လို့ မကွေးခရိုင် အမှတ် ၁ တပ်ရင်း တာဝန်ရှိသူတဦးက ပြောပါတယ်။

ဇွန်လကလည်း သူ့ကိုပစ်ခတ်ဖို့ တော်လှန်ရေးတပ်တွေဘက်က ကြိုးစားခဲ့ဖူးပေမယ့် ထိခိုက်ဒဏ်ရာသာရခဲ့တယ်လို့ ဆိုပါတယ်။

“ဓားမြတိုက်တွေလည်း လုပ်တယ်။ အရင်တုန်းကတော့ သူ့ကိုလုပ်ဖို့ အဖွဲ့အစည်းအသီးသီးက ကြိုးစားကြတယ်။ မိုင်းဆွဲတာမျိုးတွေ ပစ်ခတ်တာမျိုးတွေလုပ်တယ်။ အဲ့ဒီတုန်းက ဒဏ်ရာပဲရတယ်။ ဒီလိုမျိုး သေဆုံးတာမရှိဘူး”လို့ ပြည်သူ့ကာကွယ်ရေးတပ်မတော် မကွေးခရိုင် အမှတ် ၁ တပ်ရင်း တာဝန်ရှိသူတဦးက ပြောပါတယ်။

ပစ်ခတ်ပြီးနောက် ပျူစောထီးခေါင်းဆောင်မိုးအောင်ဆီကနေ MA 22 ၁ လက်၊ ကျည်ဘောက် ၁ ခု၊ ကျည် ၁၀ တောင့်တို့ကို သိမ်းဆည်းရမိခဲ့ပြီး အလောင်းကိုတော့ ပစ်ခတ်ခဲ့တဲ့နေရာမှာ ထားခဲ့တယ်လို့လည်း ဆိုပါတယ်။

အဲ့ဒီနောက် ၁ နာရီလောက်မှာ စလေမြို့ရဲတွေဟာ သူ့ရဲ့အလောင်းကို ရင်ခွဲရုံပို့ပြီးနောက် သချောင်းပိုက်ရွာကို ပြန်ပို့တယ်လို့သိရကြောင်း အထက်ပါတာဝန်ရှိသူက ပြောပါတယ်။

ပြီးခဲ့တဲ့ ဒီဇင်ဘာ ၄ ရက်ကလည်း ချောက်မြို့၊ အမှတ် ၅ ရပ်ကွက် အုပ်ချုပ်ရေးမှူးကို လူငယ် ၂ ဦးက ဧည့်စာရင်းတိုင်ဖို့ဆိုကာ ဝင်ရောက်လာပြီး နေအိမ်ထဲမှာပဲ ပစ်သတ်သွားခဲ့တဲ့ဖြစ်စဉ်ရှိခဲ့ပါသေးတယ်။

စာတည်း – လင်း

ချောက်၊ ဒီဇင်ဘာ ၅၊ ၂၀၂၅။

မကွေးတိုင်း၊ ချောက်မြို့၊ အမှတ် ၅ ရပ်ကွက် အုပ်ချုပ်ရေးမှူးကို လူငယ် ၂ ဦးက ဧည့်စာရင်းတိုင်ဖို့ဆိုကာ ဝင်ရောက်လာပြီးနောက် နေအိမ်ထဲမှာပဲပစ်သတ်သွားတယ်လို့ ဖြစ်စဥ်ကိုသိရှိတဲ့ ချောက်မြို့ခံတွေဆီက သိရပါတယ်။

ပစ်သတ်ခံရသူက အမှတ် ၅ ရပ်ကွက်အုပ်ချုပ်ရေးမှူး အသက် ၅၂ အရွယ် ထွေးအောင်နိုင်ဖြစ်ပြီး ဒီဇင်ဘာ ၄ ရက် ညနေ ၅ နာရီဝန်းကျင်မှာ ပစ်သတ်ခံရတဲ့အပြင် လက်တဖက်လည်း ဖြတ်ခံလိုက်ရတယ်လို့ ဆိုပါတယ်။

“ကောင်လေး ၂ ဦးက ဧည့်စာရင်းတိုင်ချင်တယ်ဆိုပြီး အိမ်ထဲဝင်ပစ်သွားတာ၊ အိမ်ထဲထိဝင်ပြီး ၃ ချက် ပစ်သွားတာ၊ ဦးခေါင်းပွင့်သွားတယ်၊ လက်တဖက် ပြတ်သွားတယ်၊ သေသွားပြီ၊ အခု ‘မနောဖြူ’ နာရေးကားနဲ့ ချောက်ရင်ခွဲရုံကိုပို့ထားတယ်၊ သူ့လက်ထဲမှာလည်း သေနက်အတိုရှိတယ်၊ သူကိုယ်ပိုင်ဝယ်ကိုင်ထားတာ၊ ချောက်မြို့မှာ ၁၅ ရပ်ကွက် ရှိတာကို ၁၅ ရပ်ကွက်ရဲ့ အုပ်ချုပ်ရေးမှူးတွေ အပေါ်မှာဆရာကြီးလိုနေတာ”လို့ ချောက်မြို့ခံတဦးက ပြောပါတယ်။

ဒီပစ်ခတ်မှုကိုဘယ်အဖွဲ့အစည်းတွေကလုပ်ခဲ့တယ်ဆိုတာကိုတော့ ထုတ်ပြန်ကြေညာတာမရှိသေးပါဘူး။

အမှတ် ၅ အုပ်ချုပ်ရေးမှူး ပစ်ခတ်ခံရပြီးနောက် ချောက်မြို့ အမှတ် ၁ ရပ်ကွက်၊ အမှတ် ၂ ရပ်ကွက်၊ အမှတ် ၃ ရပ်ကွက်၊ အမှတ် ၄ ရပ်ကွက်နေရာတွေမှာ စစ်ကော်မရှင်တပ်တွေက အသွားအလာတွေကို စစ်ဆေးနေတယ်လို့ သိရပါတယ်။

ပြီးခဲ့တဲ့ ဇန်နဝါရီ ၁၁ ရက်ကလည်း ချောက်မြို့နယ်၊ ဆားလယ်ကျွန်းကျေးရွာက စစ်တပ် သတင်းပေး ထွန်းနိုင် ဆိုသူ အသတ်ခံရပြီးသေဆုံးခဲ့ပါသေးတယ်။

စာတည်း – လင်း