ကျော်ကြီး 
အရာတော်၊ ဇူလိုင် ၁၅၊ ၂၀၂၆။
စစ်ကိုင်းတိုင်း၊ အရာတော်မြို့နယ်၊ ကံရင်းကျေးရွာမှာ ဗုံးထိမှန်လို့ ကိုယ်ဝန်သန္ဓေသားနဲ့ မိခင်လောင်း အပါအဝင် အမျိုးသား ၁ ဦးသေဆုံးခဲ့တယ်လို့ ရွာခံတွေဆီက သိရပါတယ်။
မနေ့က ဇူလိုင်လ ၁၄ ရက်နေ့ညနေ ၃ နာရီကျော်ခန့်မှာ နမခက နေတက်လာတဲ့ စက်တပ်လေထီး ၃ စီးနဲ့ ကံရင်းကျေးရွာမြောက်ပိုင်းကို ဗုံး ၃ လုံးကြဲချခဲ့တာလို့ ဆိုပါတယ်။
“ဗုံးတွေက လက်ဖက်ရည်ဆိုင်နဲ့ စားသောက်ဆိုင်ကြား ကျတယ်။ ကိုယ်ဝန်ဆောင်အမျိုးသမီးက (ကိုယ်ဝန်)၈ လရှိပြီ။ ကလေးအသက်ကယ်တာတော့ မရလိုက်ဘူး။ အမျိုးသား ၁ ယောက်ကလည်း ဦးနှောက်ထွက်ပြီး ကယ်မရလိုက်ဘူး။ ကိုယ်ဝန်ဆောင်အမျိုးသမီးက သူ့အိမ်မှာ နေနေတာ။ အမျိုးသားကတော့ စားပွဲထိုးလုပ်နေရင်းထိတာ”လို့ ရွာခံတဦးက ပြောပါတယ်။
ဗုံးထိမှန်တာကြောင့် အသက် ၃၀ ကျော်အရွယ် ကိုယ်ဝန်ဆောင်မိခင်နဲ့အသက် ၄၀ ဝန်းကျင်အမျိုးသားတို့နေရာမှာပဲ သေဆုံးသွားပါတယ်။
ဒါ့အပြင် အသက် ၅၀ ဝန်းကျင်အရွယ်အမျိုးသမီး ၁ ဦးလည်း ဒဏ်ရာကသွားသလို လက်ဖက်ရည်ဆိုင်၊ နေအိမ် ၁ လုံးနဲ့ ရွာဘုံသုံးရေစက်လည်းပျက်စီးသွားတယ်လို့ သိရပါတယ်။
ဗုံးကြဲခံရပြီးနောက်မှာတော့ နောက်ထပ် ဗုံးကြဲခံရမှာစိုးရိမ်ပြီး ရွာခံအချို့ကတော့ကျေးရွာကနေ တိမ်းရှောင်သွားတာမျိုးရှိတယ်လို့ ဆိုပါတယ်။
ဇူလိုင်လ ၁၃ ရက်နေ့ကလည်း ခင်ဦးမြို့နယ်၊ ငါးတင်းကြီးကျေးရွာကို လေကြောင်းကနေ ဗုံးကြဲခံရလို့ ပြည်သူ ၂ ဦးဒဏ်ရာရပြီး နေအိမ် ၂၀ ခန့်ပျက်စီးခဲ့တယ်လို့ သိရပါတယ်။