စစ်ကိုင်း၊ ဒီဇင်ဘာ ၃၁၊ ၂၀၂၂။

စစ်ကိုင်းတိုင်း၊ မြောင်မြို့နယ်အတွင်းက အောက်တိုဘာလအတွင်း မီးရှို့ဖျက်ဆီးခံလိုက်ရတဲ့ ညောင်ကားယားရွာကဒေသခံ ၇၀၀ ကျော် နှစ်လကျာ်ကြာတဲ့အထိတောတွေထဲ ရှောင်နေရပြီး အခက်အခဲတွေဖြစ်နေတယ်လို့ မြောင်စစ်ဘေးရှောင်ကူညီစောင့်ရှောက်နေတဲ့ တာဝန်ခံတဦးက ပြောပါတယ်။

မြောင်မြို့နယ်အတွင်းက ညောင်ကားယားရွာကို အောက်တိုဘာလ ၈ ရက်နဲ့ ၉ ရက်နှစ်ရက်ဆက်တိုက် စစ်ကောင်စီတပ်တွေရဲ့မီးရှို့ခံခဲ့ရပြီး နေအိမ်အားလုံးနီးပါးမီးလောင်ပြာကျခဲ့တာလို့ ဆိုပါတယ်။

“ခုချိန်ထိကိုမီးရှို့ခံရတဲ့ နေရာတွေလဲမပြန်နိုင်ဘူး။ ရွာနားနီးစပ်တောတွေထဲမှာပဲ နေနေရတယ်။ မြစ်နားနီးတဲ့ရွာတွေဆိုလဲညညဆို ကြောက်နေရတယ်။ အီနာဂါတွေနဲ့ ညဆိုပစ်တော့။ ခုကနှစ်လလောက်ရှိပြီညောင်ကားယားက ၇၀၀ ကျော် ၈၀၀ နီးပါး မီးဘေးရှောင်နေရတာ။ နေစရာအမိုးအကာရော အစားအသောက်အကုန်လိုအပ်နေပြီး အကူအညီတွေလိုနေတယ်” လို့ သူကဆက်ပြောပါတယ်။

ညောင်ကားယားရွာမှာ အိမ်ခြေ ၃၀၀ နီးပါးရှိပြီးလူဦးရေ ၇၀၀ ကျော် ၈၀၀ နီးပါးဘေးလွတ်ရာကို ထွက်ပြေးတိမ်း ရှောင်နေကြရပြီး ခုချိန်ထိအိမ်မပြန်နိုင်သေးသလို တောထဲတွေမှာ အဆင်ပြေသလို နေထိုင်ရင်း အခက်အခဲတွေဖြစ်နေ တယ်လို့ ဒေသခံတွေထံကသိရပါတယ်။

ပြည်တွင်းမှာ စစ်အာဏာသိမ်းပြီးနောက်ပိုင်းစစ်ကောင်စီတပ်က မီးရှို့လို့ စစ်ကိုင်းတိုင်းထဲက နေအိမ်ပေါင်း ၃ သောင်းနီးပါး မီးရှို့ခံခဲ့ရပြီး စစ်ကိုင်းတိုင်းအတွင်းမှာ စစ်ဘေးရှောင်ဦးရေ တသိန်းဝန်းကျင်အထိရှိလာနေတယ်လို့ ကုလသမဂ္ဂလူသားချင်းစာနာမှုဆိုင်ရာညှိနှိုင်း‌ရေးရုံး (UNOCHA) သုတေသနအဖွဲ့အစည်းရဲ့ မှတ်တမ်းတွေက ထုတ်ပြန်ထားပါတယ်။

ချောင်းဦး၊ ဒီဇင်ဘာ ၂၉၊ ၂၀၂၂။

ချောင်းဦးမြို့နယ်အတွင်း စစ်ကောင်စီက ဒီဇင်ဘာ ၂၇ ရက်နဲ့ ၂၈ ရက် ၂ ရက်အတွင်းကို ကျေးရွာ ၆ ရွာနီးပါး မီးရှို့ဖျက်ဆီးခဲ့တယ်လို့ Chaung U Revolution က တာဝန်ရှိသူတဦးက ပြောပါတယ်။

ဒီဇင်ဘာ၂၇ ရက်နေ့က ချောင်းဦးမြို့နယ်၊ ဝယာကျေးရွာနဲ့ ရွာသစ်ကျေးရွာ၊ ဒီဇင်ဘာ ၂၈ ရက်နေ့က နဂါးဗိုလ်ကျေးရွာ၊ ကုန်းသာကျေးရွာ၊ တောကျောင်းလေးကျေးရွာနဲ့ ထန်းတောကုန်းကျေးရွာတို့ကို မီးရှို့ဖျက်ဆီးခဲ့တယ်လို့ ချောင်းဦး(ပကဖ)အဖွဲ့က ထုတ်ပြန်ထားတယ်လို့ဆိုပါတယ်။

“ရွာ ၆ ရွာလို့ကြားပါတယ်။ လက်ရှိရွာသားတွေက ရှောင်နေရတာဆိုတော့ အိမ်ခြေအတိအကျတော့ မသိရသေးဘူး” လို့ ဆိုပါတယ်။

ဒါ့အပြင် ချောင်းဦး အမြင့်ကျေးရွာအတွင်းက ဒေသခံတွေရဲ့နေအိမ်တွေကိုလည်း စစ်ကောင်စီတပ်ဖွဲ့ဝင်တွေက ဖောက်ထွင်းပြီး ပစ္စည်းများလုယက်တာတွေ ပြုလုပ်နေသလို ကျေးရွာနေပြည်သူတွေ ထွက်ပြေးတိမ်းရှောင်နေရလို့ ပျက်စီးမှုအခြေအနေ မသိရသေးကြောင်း ဆိုပါတယ်။

ဒီနေ့ ဒီဇင်ဘာလ ၂၉ ရက်နေ့မှာလည်း ချောင်းဦးမြို့နယ်၊ အမြင့်နဲ့ ကံကြီးကုန်းရွာမှာ စစ်ကောင်စီတပ်ဖွဲ့ဝင်တွေ ရှိနေသေးလို့ ထွက်ပြေးတိမ်းရှောင်နေတဲ့ ဒေသခံတွေအနေနဲ့ သက်ဆိုင်ရာရပ်ကျေး ပအဖ၊ ပကဖ ဒေသခံတော်လှန်ရေးအင်အားစုတွေရဲ့ ခွင့်ပြုချက်မရဘဲ မိမိရပ်ရွာတွေကို အရဲစွန့်ဝင်ရောက်တာတွေ မပြုလုပ်ကြဖို့ ချောင်းဦး(ပကဖ)အဖွဲ့က မေတ္တာရပ်ခံထုတ်ပြန်ထားပါတယ်။

စစ်ကိုင်း၊ ဒီဇင်ဘာ ၂၉၊ ၂၀၂၂။

စစ်ကိုင်းတိုင်း၊ ခင်ဦးမြို့နယ်အတွင်း စစ်ကောင်စီတပ်ဖွဲ့ဝင်တွေနဲ့ ပျူတွေတပ်စွဲထားတဲ့ ရွာသစ်ကုန်းရွာအတွင်း ယမန့်နေ့ ဒီဇင်ဘာလ ၂၈ ရက်နေ့က မြောက်ဘက်ကိုထွက်လာတဲ့ စစ်ကောင်စီတပ်ဖွဲ့ဝင်တွေကို နယ်မြေခံပကဖတပ်ဖွဲ့ဝင်တွေ မိုင်းဆွဲတိုက်ခိုက်ခဲ့တယ်လို့ သိရပါတယ်။

တိုက်ခိုက်ခံရမှုမှာ စစ်ကောင်စီတပ်ဖွဲ့ဝင် ၄ ဦးသေဆုံးပြီး ၂ ဦး ပြင်းထန်ဒဏ်ရာရသွားတယ်လို့ ခင်ဦး PDF တာဝန်ရှိသူတဦးက ပြောပါတယ်။

“အဲဒီတိုက်ခိုက်မှုကို တို့ညီနောင် မဟာမိတ်အင်အားစုအဖွဲ့က အသင့်အနေထားနဲ့ စောင့်ဆိုင်းပြီး ပျောက်ကြားနည်းနဲ့ မိုင်းဆွဲတိုက်ခိုက်ခဲ့တာ ၄ ဦးသေဆုံးပြီး ၂ ဦး ပြင်းထန်ဒဏ်ရာရရှိခဲ့တယ်” လို့ ဆိုပါတယ်။

ဒါ့အပြင် စစ်ကောင်နဲ့ ပျူအင်အား ၃၀ ခန့်ဟာ သံခင်ဦးဘိုနဲ့ ဖိုကုန်းအစပ် ချောင်းအနီးက လူနေအိမ်တလုံးကို မီးရှို့ပြီးလက်နက်ကြီး လက်နက်ငယ်တွေနဲ့ ပစ်ခတ်အာရုံလွှဲကာ မြစ်ကြီးနားလမ်းဘေး အလယ်ရှိုရွာကို ၄၀ မမတွေနဲ့ပစ်ခတ်ပြီး ပြည်သူတချို့ကို ဖမ်းဆီးသွားသလို Local PDF တွေရဲ့ကျည်၊ ခဲယမ်းတွေကို သိမ်းဆည်းသွားခဲ့တယ်လို့ ဆိုပါတယ်။

အဆိုပါ စစ်ကောင်စီတပ်ဖွဲ့ဝင်တွေနဲ့ ခင်ဦး PDF၊ မြို့နယ်ပကဖအဖွဲ့၊ LDF ပူးပေါင်းတပ်တွေ ထိတွေ့တိုက်ပွဲဖြစ်နိုင်လို့ အလယ်ရှိုကျေးရွာနဲ့ အနီးအနားကျေးရွာတွေက ပြည်သူတွေအနေနဲ့ စစ်ကောင်စီတွေနဲ့ လွတ်ကင်းရာ အခြားရွာတွေနဲ့ နီးစပ်ရာတောတွေဘက်ကို တိမ်းရှောင်နေကြရတယ်လို့ သိရပါတယ်။

စစ်ကိုင်း၊ ဒီဇင်ဘာ ၂၃၊ ၂၀၂၂။

စစ်ကိုင်းတိုင်း၊ ဒီပဲယင်းမြို့နယ်မှာ စစ်ကောင်စီတပ်စစ်ကြောင်းထိုးပစ်ခတ်နေပြီး ကလေးငယ်သုံးဦး လက်နက်ကြီးထိမှန်ထားတယ်လို့ ဒီပဲယင်းမြို့နယ်ညီနောင်များအဖွဲ့က ဆိုပါတယ်။

ထိခိုက်ဒဏ်ရာရသူသုံးဦးမှာ မသိမ့်ရတာနာစိုး(ခ)မဖွေးဖွေး အသက် ၁၁ နှစ်ဖြစ်ပြီး ဗိုက်ပေါက်ထွက်ခဲ့သလို မောင်အောင်ငွေဖြိုး အသက် ၁၄ နှစ်မှာ နောက်ကျောလက်နက်ကြီးစ ဖောက်ဝင်ပြီး ဒူးခေါင်းထိခိုက်ခဲ့ပြီး ကျန်ကလေးငယ်တဦးကတော့ လက်ပွန်းပဲ့-အသေးစားဒဏ်ရာရရှိခဲ့တယ် လို့ဆိုပါတယ်။

စစ်ကြောင်းထိုးမီးရှို့နေတဲ့ စစ်ကောင်စီတပ်ဟာ ဒီနေ့ဒီဇင်ဘာလ ၂၃ ရက်မှာ ဒီပဲယင်းမြို့နယ်၊ အနောက်တောင်ဘက်ခြမ်းကျေးရွာတွေကို ဝင်ရောက်လာသလို လက်နက်ကြီးတွေနဲ့ပစ်ခတ်လို့ ဒီပဲယင်းမြို့နယ်၊ ကြည်ဘုရားထွက်ကျေးရွာအတွင်းကျရောက်ပြီး ကလေးငယ်သုံးဦးလက်နက်ကြီးထိမှန်ခဲ့သလို ဒေသခံတွေ ထွက်ပြေးတိမ်းရှောင်နေရတယ်လို့ ဆိုပါတယ်။

“ကလေးတွေအပြင် နွားတွေလည်းထိမှန်ခဲ့တယ်၊ ခုကတော့ အားလုံးပြေးနေရလို့ စာရင်းအတိအကျမသိနိုင်သေးဘူး”လို့ ဒီပဲယင်းမြို့နယ်ညီနောင်များအဖွဲ့က ဆိုပါတယ်။

စစ်ကောင်စီတပ်ဟာဒီဇင်ဘာလအတွင်းမှာပဲ ဒီပဲယင်းမြို့နယ်၊ ချောင်းပေါက်ကျေးရွာကနေအိမ် ၃၂ လုံး ကိုမီးရှို့ဖျက်ဆီးသွားခဲ့သလို ဒီဇင်ဘာလ ၂၂ ရက်ကလည်း ပျံကျရွာကို မီးဝင်ရှို့သွားခဲ့ကြောင်း သိရပါတယ်။

ဒီပဲယင်းမြို့နယ်အတွင်း စစ်ကောင်စီတပ်ဟာ ဒီဇင်ဘာလ ၁ ရက်မှ ၁၀ ရက်အထိ ကျေးရွာပေါင်း ၁၉ ရွာမှ ပြည်သူနေအိမ် ၁၇၀၀ ကျော်မီးရှို့ဖျက်ဆီးသွားခဲ့ပြီး၊ အာဏာသိမ်းပြီးချိန်ကစလို့ ၂ နှစ်နီးပါး ကာလအတွင်း မီးရှို့ဖျက်ဆီးခံရမှု နေအိမ် ၃၀၀၀ ကျော်သွားပြီလို့ဆိုပါတယ်။

ဒီဇင်ဘာလအတွင်း စစ်ကြောင်းထိုးဖျက်ဆီးမှုတွေကြောင့် မုံရွာ – ဒီပဲယင်း – ရေဦး ကားလမ်း ယာဥ်များအသွားအလာတွေရပ်နားပေးကြဖို့လည်း ဒေသတွင်းအဖွဲ့တွေက မေတ္တာရပ်ခံထားတယ်လို့ သိရပါတယ်။

စစ်ကိုင်း၊ ဒီဇင်ဘာ ၂၂၊ ၂၀၂၂။

စစ်ကိုင်းတိုင်းဒေသကြီး၊ ကန့်ဘလူမြို့နယ်၊ စစ်ဘေးရှောင်တွေအတွက် စားနပ်ရိက္ခာနဲ့ဆေးဝါးတွေ အဓိကလိုအပ်နေလို့ အကူညီတွေ လိုအပ်နေတယ်လို့ ကန့်ဘလူတိုင်းဒေသကြီး လွှတ်တော် ကိုယ်စားလှယ် ဦးနေဇင်လတ်က ပြောပါတယ်။

“ကန့်ဘလူဘက်ကို စစ်ကြောင်းတွေက ဖိနေတယ်။ စစ်ကြောင်းတွေ ဝင်တာနဲ့ပြေးရ စစ်ကြောင်းထွက်ရင် ရွာနားပြန်သွားအဲလိုတွေဖြစ်နေတာ။ စစ်ဘေးရှောင်တွေက တစ်နေ့ထက်တစ်နေ့ ပိုများလာတော့ သူတို့အတွက် ရိက္ခာနဲ့ဆေးဝါးတွေလိုအပ်နေတယ်။ ရာသီဥတုကြောင့် ဖျားနာသူတွေလည်း များနေတယ်” လို့ သူက ဆက်ပြောပါတယ်။

အကြမ်းဖက်စစ်ကောင်စီရဲ့ ခမရ(၃၇၆)တပ်က ကန့်ဘလူအတွင်း ဒီဇင်ဘာလ ၁၆ ရက်နေ့ကစပြီး စစ်အင်အား ၁၂၀ လောက် ထပ်မံတိုးချဲ့လာခဲ့ပြီး စစ်အင်အားတိုးချဲ့မှုတွေပြုလုပ်နေသလို ကျေးရွာတွေကို အကြောင်းမဲ့ ဝင်ရောက်မီးရှို့ဖျက်ဆီးတာတွေ ပြုလုပ်နေတယ်လို့ သူကဆက်ပြောပါတယ်။

မနေ့ကလည်း ကန့်ဘလူနယ်ထဲက ပေလယ်ရွာက လယ်တဲ ၁၄ လုံးကို အကြောင်းမဲ့မီးရှို့သွားသလို စစ်ကောင်စီနဲ့ ပျူစောထီးအင်အား ၃၀ ကျော် ဝင်ရောက်လာတယ်လို့ ဆိုပါတယ်။

ကန့်ဘလူနယ်အတွင်း ဒီဇင်ဘာလ နှစ်ပတ်အတွင်းမှာ ပဲဘောရွာ၊ လက်ခုပ်ကုန်းရွာအပါအဝင် ကျေးရွာ ၈ ရွာနီးပါး မီးရှို့ဖျက်ဆီးခံလိုက်ရပြီး အိမ်ခြေ ၃၀၀ နီးပါး မီးလောင်ပျက်စီးခဲ့တယ်လို့ ဆိုပါတယ်။

အကြမ်းဖက်စစ်အုပ်စုစစ်ကြောင်းကြောင့် ကန့်ဘလူအတွင်း ၂၀၂၂ ခုနှစ်အတွင်းမှာ ရွာပေါင်း(၁၈) ရွာက ဒေသခံ ပြည်သူပေါင်း၂‌ သောင်းခွဲကျော် အိုးအိမ်စွန့်ခွါ ထွက်ပြေးတိမ်းရှောင်နေကြရတယ်လို့ သိရပါတယ်။

မြေလတ်အသံ၊ ဒီဇင်ဘာ ၂၁၊ ၂၀၂၂။

၂၀၂၃ ခုနှစ်ထဲကျင်းပမယ့် စစ်ကောင်စီရဲ့ရွေးကောက်ပွဲအတွက် ရခိုင်ပြည်နယ်မှာ မဲစာရင်း ကောက်ယူတာတွေကို ဇန်နဝါရီလ ၉ ရက်မှာ စတင်ကောက်ယူဖို့ စီစဉ်နေတယ်လို့ ရခိုင့်ဝါရင့်နိုင်ငံရေးသမား လွှတ်တော်ကိုယ်စားလှယ်ဟောင်း ဦးဖေသန်းက ပြောပါတယ်။

“မဲစာရင်းကောက်ယူဖို့ သင်တန်းတွေပါပေးဖို့လုပ်နေပြီး အပစ်ခတ်ရပ်ပြီးနောက် စစ်ကောင်စီက မဲစာရင်းကောက်ဖို့စိုင်းပြင်းနေပြီ။ စစ်ကောင်စီရဲ့ရွေးကောက်ပွဲကို လူထုက စိတ်ဝင်စားမှုမရှိဘူးလို့” သူက ပြောပါတယ်။

ဒီရွေးကောက်ပွဲကို နိုင်ငံတကာကထောက်ခံမှုမရှိသလို လွတ်လပ်တရားမျှတမှာမဟုတ်ပေမယ့် စစ်ကောင်စီက ရွေးကောက်ပွဲကို ဖြစ်သလို ရအောင်ကျင်းပလိမ့်မယ်လို့ ဦးဖေသန်းက သုံးသပ်ထားပါတယ်။

စစ်ကောင်စီဟာ ၂၀၂၃ ခုနှစ် သြဂုတ်လအတွင်း ရွေးကောက်ပွဲကျင်းပမယ်လို့ စီစဉ်နေပြီး၂၀၂၀ ရွေးကောက်ပွဲမှာအနိုင်ရခဲ့တဲ့ NLD ပါတီကတော့ အာဏာသိမ်း စစ်ကောင်စီရဲ့ရွေးကောက်ပွဲကို ဘယ်နည်းနဲ့မျှ လုံးဝအသိအမှတ်ပြုမှာမဟုတ်ကြောင်း တရားဝင်ထုတ်ပြန်အသိပေးထားပါတယ်။

ရခိုင်မှမဲစာရင်းအတွက်အိမ်တိုင်ရာရောက် လူဦးရေစာရင်းကောက်မှာဖြစ်ပြီး ကွင်းဆင်းစာရင်းကောက်ဖို့ အဖွဲ့ ၁၂၉၀ ဖွဲ့ထားသလို အဖွဲ့ဝင်အင်အား ၆၉၄၀ ဦးနဲ့ ကောက်ယူမယ်လို့ စစ်ကောင်စီခန့် ရခိုင်ပြည်နယ်ဝန်ကြီးချုပ်က မနေ့ကဒီဇင်ဘာလ ၂၀ ရက်နေ့မှာ ပြောထားကြောင်းသိရပါတယ်။