စစ်ကိုင်း၊ မတ် ၂၇၊ ၂၀၂၃။

စစ်ကိုင်းတိုင်း၊ ရွှေဘိုခရိုင်၊ ခင်ဦးမြို့နယ်အတွင်း ဒီနေ့မတ်လ ၂၇ ရက်နေ့ မနက်အာရုံဦးမှာတော်လှန်ရေးနေ့အထိမ်းအမှတ်အနေနဲ့ ကောက်စိုက်ပြည်သူဒေသခံတွေက သပိတ်မှောက်ကြွေးကြော်ခဲ့ကြပါတယ်။

“ဖက်ဆစ်တော်လှန်ရေးနေ့အထိမ်းအမှတ်နဲ့ ကောက်စိုက်ရင်း စစ်အာဏာရှင် အလိုမရှိကြောင်း ကြွေးကြော်ရင်း လက်သုံးချောင်းထောင် သပိတ်မှောက်ခဲ့ကြတာပါ” လို့ ဒေသခံတဦးက ပြောပါတယ်။

ကောက်စိုက်ပြည်သူများမှ ၂၀၂၃ ခုနှစ် မတ်လ ၂၇ ရက်နေ့မှာ ကျရောက်တဲ့ ဖက်ဆစ်တော်လှန်ရေးနေ့အတွက် “စစ်အာဏာရှင်အလိုမရှိ စစ်အာဏာရှင် ကျဆုံးပါစေ” ဆိုပြီး သပိတ်မှောက် ကြွေးကြော်ခဲ့သလို NUG အစိုးရကို ထောက်ခံကြောင်း ဆန္ဒပြခဲ့ကြတာပါ။

မြောင်၊ မတ် ၁၀၊ ၂၀၂၃။

စစ်ကိုင်းတိုင်း၊ မြောင်မြို့နယ်အတွင်းက ကြားကာလပညာသင်ကျောင်း ၁၅ ကျောင်းက ကျောင်းသား၊သူတွေကို မတ်လ ၉ ရက်မနေ့က စစ်ကောင်စီတပ်တွေရဲ့ လေကြောင်းအန္တရာယ်ကို ကာကွယ်နိုင်ဖို့ ရည်ရွယ်ချက်နဲ့ “လေယာဉ်ပျံတွေလာရင်” ခေါင်းစဉ်နဲ့ ဟောပြောပွဲ ပြုလုပ်ခဲ့ပါတယ်။

ဒီဟောပြောပွဲကို အရာတော်မြို့နယ် လူထုသပိတ်ဦးဆောင်ကော်မတီက ဦးဆောင်ပြုလုပ်ခဲ့တာဖြစ်ပြီး၊ မြောင်ပညာရေးကွန်ရက်က စီစဥ်ထုတ်လုပ်တဲ့ ပညာပေးစာအုပ်တွေ ဖြန့်ဝေတာနဲ့ ကာတွန်းသရုပ်ဖော်ပုံတွေ ပြသခဲ့တာတွေလည်း ပြုလုပ်ခဲ့တယ်လို့ မြောင်ပညာရေးကွန်ယက်မှ တာဝန်ရှိသူတဦးက ပြောပါတယ်။

“ရည်ရွယ်ချက်ကတော့ ၁၀ နှစ်အောက် ကလေးတွေအတွက် စာအုပ်တွေထုတ်ပြီး၊ လူကြီးတွေကိုတော့ advance level တွေးပြီး လုပ်ဆောင်သွားပါတယ်။ ကလေးတွေကိုယ်တိုင် လေယာဥ်လာရင် ဘယ်လိုလုပ််ဆောင်ကြရမလဲဆိုတာ ပိုပြီးသိလာစေဖို့နဲ့ မိမိတို့ကိုယ်တိုင် ကာကွယ်နိုင်ဖို့၊ အတူတူဖေးမကြဖို့ စည်းကမ်းတကျ ဘယ်လိုတွေ လုပ်ဆောင်ကြမလဲဆိုတာနဲ့ ကျောင်းက မိခင်၊ ဆရာဆရာမတွေကိုယ်တိုင် ဘယ်လိုကာကွယ်ကြမလဲဆိုတာကို သိနိုင်ဖို့ရည်ရွယ်ပါတယ်” လို့ ပြောပါတယ်။

ဖေဖော်ဝါရီလ ၂၂ ရက်မှာ ပထမအကြိမ်ဟောပြောပွဲ ပြုလုပ်ခဲ့တာဖြစ်ပြီး၊ အခုမတ်လအတွင်း ဟောပြောပွဲမှာတော့ စစ်ဘေးထိတွေ့ခဲ့တဲ့ ကျေးရွာတွေအပါအဝင် ကျောင်းပေါင်း ၁၅ ကျောင်းက ကလေးတွေနဲ့ ကျောင်းသားတွေရဲ့မိဘတွေပါ ပါဝင်ခဲ့ကြတယ်လို့ ဆိုပါတယ်။

လက်ရှိမြောင်မြို့နယ်အတွင်းမှာ ကြားကာလပညာရေးကျောင်း ၃၀ ကျော် ဖွင့်လှစ်ထားနိုင်ပြီး၊ အဲ့ဒီမှာ ကျောင်းသား၊သူ ၃၀၀၀ ဝန်းကျင်ရှိကာ ဆရာ၊ဆရာမ ၅၀၀ ကျော်က သင်ကြားပို့ချပေးနေတယ်လို့လည်း သိရပါတယ်။

ရွှေဘို၊ မတ် ၈၊ ၂၀၂၃။

စစ်ကိုင်းတိုင်း၊ ရွှေဘိုခရိုင်၊ ခင်ဦးမြို့နယ်ထဲက ကျေးရွာ ၃ ရွာပေါင်းပြီး ဒီနေ့မတ်လ ၈ ရက်မှာ ကျရောက်တဲ့ “အပြည်ပြည်ဆိုင်ရာ အမျိုးသမီးများနေ့” အထိမ်းအမှတ် ပညာပေး အကြိုဟောပြောပွဲကို ဒေသတွင်း တော်လှန်ရေးအင်အားစုတွေက မနေ့ကမတ်လ ၇ ရက်မှာ ပြုလုပ်ခဲ့ပါတယ်။

သက်ဆိုင်ရာဝန်ကြီးဌာနတွေရဲ့ ယန္တရားတွေ သိသာထင်ရှားစွာ တရားဝင်လည်ပတ်နေမှု (အသက်ဝင်နေမှု)ကို သိရှိကြစေဖို့နဲ့ အမျိုးသမီးတွေအတွက် အခွင့်အရေးတန်းတူညီမျှစွာ ရရှိရေးတွေကို သိကြဖို့ “ညီမျှခွင့်တူ ဖမ်းဆုပ်ယူ Embrace Equity” စတဲ့ ခေါင်းစဉ်နဲ့ ပြုလုပ်ခဲ့တာလို့ မြို့နယ်တာဝန်ခံတဦးက ပြောပါတယ်။

“လူတိုင်း ရသင့်ရထိုက်တဲ့ မွေးရာပါ လူ့အခွင့်အရေး၊ အမျိုးသမီးတွေရဲ့ အခွင့်အရေးတွေနဲ့အတူ ကလေးသူငယ်ဆိုင်ရာ အခွင့်အရေးစတဲ့ အမျိုးသမီးရေးရာ ရသင့်ရထိုက်တဲ့ တန်းတူညီမျှသော အခွင့်အရေးပိုင်းဆိုင်ရာတွေကို အကျယ်တဝင့် ရှင်းလင်းပြောဆို ဟောပြောခဲ့ကြတယ်” လို့ ပြောပါတယ်။

ဟောပြောပွဲကို မြို့နယ် ပအဖ ခေါင်းဆောင်၊ ပကဖ တာဝန်ခံ၊ လူသားစာနာရေးဆိုင်ရာ တာဝန်ခံ၊ အမျိုးသမီး ကလေးသူငယ် တာဝန်ခံ၊ သတင်းပြန်ကြားရေး၊ ပညာရေး စုမှူး တာဝန်ခံ၊ အခမ်းအနားမှူး ရုံးအဖွဲ့တွေနဲ့အတူ တိုက်နယ် (၄) ခေါင်းဆောင်နဲ့ အဖွဲ့၊ ရပ်ကျေး ပအဖ/ပကဖ တွေနဲ့ ကျေးရွာအသီးသီးက ဒေသခံတွေ ပါဝင်တက်ရောက်ခဲ့ကြပါတယ်။

ခင်ဦး၊ မတ် ၄၊ ၂၀၂၃။

စစ်ကိုင်းတိုင်း၊ ခင်ဦးမြို့နယ် အနောက်ဘက်ခြမ်းရှိ ကျေးရွာများကို ဖေဖော်ဝါရီလ ၂၅ ရက်မှ မတ်လ ၂ ရက်နေ့ထိ စစ်တပ်က အင်အား ၁၀၀ ကျော်နဲ့ စစ်ကြောင်းထိုး ဝင်ရောက်ပစ်ခတ်မှုတွေကြောင့် ဒေသခံ ၁ သောင်းကျော် အစားအသောက်နဲ့ ကျန်းမာရေး အခက်အခဲဖြစ်နေတယ်လို့ စစ်ဘေးရှောင်ကူညီစောင့်ရှောက်နေတဲ့ တာဝန်ခံတဦးက ပြောပါတယ်။

“စစ်**တွေက လက်နက်ကြီး၊ လက်နက်ငယ်တွေနဲ့ ပစ်ခတ်ဝင်ရောက်လာပြီး ယာတော်ရွာနဲ့ ကျွန်းတောကြီးရွာတွေကို မီးရှို့ရာကနေ တဖြေးဖြေးကျေးရွာ ၁၀ ရွာထိ ပြေးကုန်ရတယ်။ ၄ ရက်တိတိ ဘေးလွတ်ရာကို တနေရာပြီးတနေရာ ဆက်တိုက်ပြေးနေရလို့ အခက်အခဲများစွာနဲ့ အကူညီတွေ လိုအပ်နေတယ်” လို့ သူက ဆက်ပြောပါတယ်။

မြင်းဒေါင်း၊ မကျီးအုပ်၊ သရက်ပင်စု၊ အင်တိုင်းလေးတောင်ရွာ၊ အင်တိုင်းလေးမြောက်ရွာ၊ယာတော်၊ မြင်းကျ၊ ကျွန်းတောကြီး၊ ဥယာဥ်နဲ့ သာဝတ္ထိရွာ စတဲ့ကျေးရွာ ၁၀ ရွာက ဒေသခံတွေ အခုချိန်ထိ နေရပ်မပြန်နိုင်သေးသလို အဲဒီရွာတွေက မီးရှို့ခံရတဲ့ အိမ်အရေအတွက်ကိုလည်း အခုချိန်ထိ အတိအကျ မသိရသေးဘူးလို့ ဆိုပါတယ်။

အဝတ်တထည် ကိုယ်တခုဖြင့် ထွက်ပြေးနေရပြီး နီးစပ်ရာရွာတွေက ထမင်းထုပ်လာဝေမှသာ စားနေရတာ၊ သက်ကြီးရွယ်အိုနဲ့ ကလေးငယ်တွေလည်း ကျန်းမာရေးထိခိုက်မှုတွေ ရှိလာသလို ဆေးဝါးတွေလည်း လိုအပ်နေတယ်လို့ ဆိုပါတယ်။

အာဏာသိမ်းပြီးချိန်မှ ယနေ့အထိ ခင်ဦးမြို့နယ်အတွင်း စစ်ကောင်စီဘက်က ကျေးရွာ ၆၆ ရွာမှ နေအိမ်ပေါင်း ၄၀၀၀ ကျော် မီးရှို့ဖျက်ဆီးထားခဲ့ပြီး ရဲဘော်နဲ့ပြည်သူပေါင်း ၂၅၀ ကျဆုံး ထားပြီလို့ ဆိုပါတယ်။

ယင်းမာပင်၊ ဖေဖော်ဝါရီ ၂၃၊ ၂၀၂၃။

စစ်ကိုင်းတိုင်း၊ ယင်းမာပင်ခရိုင်၊ ဆားလင်းကြီးမြို့နယ်ရှိ စစ်တပ်က မီးရှို့ဖျက်ဆီးခဲ့တဲ့ ကျေးရွာ ၈ ရွာက ဒေသခံပြည်သူ ၃၀၀ ကျော်ကို မနေ့က ဖေဖော်ဝါရီလ ၂၂ ရက်မှာ အိမ်အသုံးအဆောင်ပစ္စည်းတွေ ကူညီထောက်ပံ့ပေးခဲ့တယ်လို့ သိရပါတယ်။

“မနေ့က သွားရောက် လှူဒါန်းခဲ့တာပါ။ ဆားလင်းကြီးမြို့နယ် ကျေးရွာ ၈ ရွာအတွင်းက မီးဘေးသင့်ပြည်သူ ၃၀၇ ဦးအတွက် လူသားချင်း စာနာမှုအနေနဲ့ သွားရောက်တွေ့ဆုံပြီး ကူညီထောက်ပံ့ပေးခဲ့တာပါ” လို့ ယင်းမာပင် – ဆားလင်းကြီးရွာပေါင်းစုံသပိတ် ဦးဆောင်ကော်မတီဝင် တဦးက ပြောပါတယ်။

ယင်းမာပင် – ဆားလင်းကြီးရွာပေါင်းစုံသပိတ် ဦးဆောင်ကော်မတီနဲ့ ပြည်သူမှပြည်သူသို့ ပရဟိတအဖွဲ့တို့ ပူးပေါင်းကာ သွားရောက်လှူဒါန်းခဲ့တာဖြစ်ပြီး၊ လှူဒါန်းခဲ့တဲ့ ကျေးရွာအမည်တွေကိုတော့ လုံခြုံရေးအရ ပြောကြားခဲ့ခြင်း မရှိပါဘူး။

အဆိုပါအဖွဲ့တွေဟာ ဖေဖော်ဝါရီလ ၂၀ ရက်ကလည်း ယင်းမာပင်မြို့နယ် မီးဘေးသင့် လူဦးရေ ၂၁၀ အတွက် သွားရောက်ထောက်ပံမှုတွေ ပြုလုပ်ခဲ့သလို မီးရှို့ခံရမှုအတွက် အားမငယ်ဖို့၊ ဆက်လက်အားမွေးပြီး တောင့်ခံတော်လှန်ပေးကြပါဖို့ အားပေးစကားပြော၊ တောင်းဆိုတာတွေ ပြုလုပ်ခဲ့ကြတယ်လို့ သိရပါတယ်။

မုံရွာ၊ ဖေဖော်ဝါရီ ၂၂၊ ၂၀၂၃။

စစ်ကိုင်းတိုင်း၊ မုံရွာခရိုင်၊ ဘုတလင်မြို့နယ်က ကျေးရွာ ၁ ရွာမှာ ဒီနေ့ ဖေဖော်ဝါရီလ ၂၂ ရက် မနက်ပိုင်းက ဖက်ဒရယ်အရေး၊ မကြောက်တရားနဲ့ ဖက်ဒရယ်ပညာရေးတို့ကို လိုက်လံ မျှဝေ ဟောပြောခဲ့တယ်လို့ ဆိုပါတယ်။

“ကျေးရွာ ၁ ရွာမှာ စုပေါင်းပြီး ဟောပြောပွဲ ပြုလုပ်ခဲ့တာပါ။ ကျေးရွာရပ်မိရပ်ဖတွေနဲ့အတူ ဒေသခံ လူဦးရေ ၅၀ ကျော်နီးပါး ဟောပြောပွဲမှာ လာရောက်ပါဝင်ခဲ့ကြပါတယ်” လို့ မုံရွာသပိတ်ကော်မတီဝင်တဦးက ပြောပါတယ်။

ဟောပြောပွဲကို မုံရွာလူထုသပိတ်တိုက်ပွဲ ဦးဆောင်ကော်မတီမှ ဦးခန့်ဝေဖြိုး၊ မုံရွာစီးပွားရေး တက္ကသိုလ်ကျောင်းသားများသမဂ္ဂ မှ ကိုရှင်းသန့်အပါအဝင် ကိုသန့်ကုဋေအောင်တို့မှ ဦးဆောင်ဟောပြောခဲ့တာလို့ ဆိုပါတယ်။

ရွှေဘို၊ ဖေဖော်ဝါရီ ၂၀၊ ၂၀၂၃။

စစ်ကိုင်းတိုင်း၊ ရွှေဘိုခရိုင်၊ ခင်ဦးမြို့နယ်အတွင်းက လောင်းရှည်၊ လက်ပံလှ မီးဘေးသင့် အိမ်ထောင်စု ၄၉၀ ကျော်အတွက်ခင်ဦး မြို့နယ် ပအဖ၊ ပကဖ တာဝန်ခံ အသီးသီးကစုပေါင်းပြီးမနေ့က ဖေဖော်ဝါရီလ ၁၉ ရက်နေ့မှာ သိန်း (၅၀)ကျပ် တန်ဖိုးရှိတဲ့ ကုန်စိမ်များ ထောက်ပံ့ လှူဒါန်းခဲ့တယ်လို့ သိရပါတယ်၊

“ခင်ဦး လောင်းရှည် ကျေးရွာ မီးဘေးသင့် အိမ်ခြေ (၃၁၀)နှင့်၊ လက်ပံလှကျေးရွာ မီးဘေးသင့် အိမ်ခြေ (၁၈၀)၊ စုစုပေါင်း မီးဘေးသင့် အိမ်ခြေ အိမ်ထောင်စု (၄၉၀) အတွက်အရေးပေါ် လိုအပ်နေတဲ့ စားနပ်ရိက္ခာ ထောက်ပံတဲ့ အစီအစဥ်အနေနဲ့ကျပ် သိန်း (၅၀)တန်ဖိုးရှိတဲ့ (ဆီ၊ဆား၊ပဲ၊ကြက်သွန်နီ၊မုံလာထုပ်၊ခရမ်းသီး၊ခရမ်းချဥ်သီး) ကုန်စိမ် ၇ မျိုးကို ထောက်ပံ့ပေးခဲ့တာ”လို့ မြို့နယ်အုပ်ချုပ်ရေး တာဝန်ခံတဦးကပြောပါတယ်။

အခုလို ထောက်ပံ့လှူဒါန်းမှုကို အမျိုးသားညီညွတ်ရေးအစိုးရ၊ MONREC မှ ရရှိတဲ့ အခွန်ခွဲတမ်းကနေ မြို့နယ် ပအဖ၊ ပကဖ စီမံခန့်ခွဲခွင့်ရှိတဲ့ ဘတ်ဂျက်နဲ့ ကူညီ ဆောင်ရွက်ခဲ့တာဖြစ်ပြီး ဒေသခံပြည်သူတွေဆီသွားရောက်ပြီး တိုက်ရိုက်လှူဒါန်းခဲ့တာလို့ သူကဆက်ပြောပါတယ်။

ခင်ဦးနယ်အတွင်းက မြို့နယ် ပအဖ ၊ မြို့နယ် ပကဖ တာဝန်ခံ၊ လူသားစာနာအဖွဲ့အစည်း၊ ပြည်သူ့ရင်ခွင်၊ သတင်းပြန်ကြားရေး ၊ တရားရေး၊ အခွန်အရာရှိ၊ ဘဏ္ဍာရေး ပ/ဒု တာဝန်ခံ၊ မြို့နယ် ပကဖ ရဲဘော်တွေနဲ့အတူ တိုက်နယ် ၁ ခေါင်းဆောင်အဖွဲ့၊ လောင်းရှည်/လက်ပံလှ ရပ်ကျေး ပအဖ/ ပကဖများ အားလုံး စုပေါင်းပြီး သွားရောက်ထောက်ပံလှူဒါန်းခဲ့ကြတာလို့ သိရပါတယ်။

မကွေး၊ ဖေဖော်ဝါရီ ၁၈၊ ၂၀၂၃။

မကွေးတိုင်း၊ ရေစကြိုနယ်အတွင်းမှာ တပ်သားအင်အားတိုးဖို့နဲ့ တပ်သားပြောင်းလဲဖို့လာတဲ့ ရေစကြိုအခြေစိုက် ခလရ ၂၅၈ က စစ်ကောင်စီစစ်ကြောင်းကို ဖေဖော်ဝါရီလ ၁၇ ရက်မနေ့ကနေ့လည်ပိုင်းမှာ ဒေသခံကာကွယ်ရေးတပ်တွေက ဗုံးကြဲတိုက်ခိုက်ခဲ့တယ်လို့ သိရပါတယ်။

ရှင်မတောင် တောင်ပေါ်ကိုလာတဲ့ စစ်ကောင်စီတပ်တွေကို ထန်းတိုကျေးရွာနဲ့ ချင်းယားကုန်းရွာအကြားမှာ အီနာဂါဗုံးသီး ၅ လုံးကို ဒရုန်းအသုံးပြုပြီးကြဲချတိုက်ခိုက်ခဲ့ရာ စစ်သား ၇ ဦး ဒဏ်ရာရရှိခဲ့တယ်လို့ ပြည်သူ့ကာကွယ်ရေးတပ်ဖွဲ့− ရေစကြိုမှ တာဝန်ရှိသူတဦးက ပြောပါတယ်။

“အင်းအား ၇၀ လောက်ရှိတဲ့ စစ်ကောင်စီတပ်ဖွဲ့တွေသွားနေတဲ့ လမ်းတလျှောက်ကို ဒရုန်းနဲ့လိုက်လံတိုက်ခိုက် ခဲ့တာပါ၊ စစ်တွေ ၇ ဦးထက်မနည်း ဒဏ်ရာအပြင်းအထန်ရသွားပြီး ဒဏ်ရာရတဲ့တွေကို ကားပေါ်ဆွဲ ခေါ်ဆောင်သွားတယ်လို့ စုံစမ်းသိရှိရတယ်”လို့ ပြည်သူ့ကာကွယ်ရေးတပ်ဖွဲ့ ရေစကြိုက တာဝန်ရှိသူတဦးက ပြောပါတယ်။

ဒီတိုက်ခိုက်မှုအတွင်း စစ်ကောင်စီဘက်က ၇ ဦးထက်မနည်းထိခိုက်ဒဏ်ရာရခဲ့တယ်လို့ ပြောပေမယ့် ဒီထိခိုက်မှုအရေအတွက်ကို မြေလတ်အသံက သီးခြားအတည်မပြုနိုင်သေးပါဘူး။

ပြည်သူ့ကာကွယ်ရေးတပ်ဖွဲ့ − ရေစကြိုမြို့နယ်(ပ.က.ဖ)က ဒရုန်းတပ်သားတွေနဲ့အတူ MTRF၊ Young Force UG၊ သံမဏိသိန်းငှက်ပျောက်ကြားတပ်တို့ ပူးပေါင်းတိုက်ခိုက်ခဲ့တာဖြစ်ပြီး၊ ကာကွယ်ရေးတပ်ဖွဲ့ဝင်တွေဘက်က အထိခိုက်မရှိ ဆုတ်ခွာနိုင်ခဲ့တယ်လို့ ဆိုပါတယ်။

ပြီးခဲ့တဲ့ ဖေဖော်ဝါရီလ ၁၆ ရက်ကလည်း ရေစကြိုမြို့နယ်၊ ကံသစ်ကျေးရွာတောင်ဘက်ကို ကင်းပုန်းဝပ်လာတဲ့ ခလရ ၂၅၈ ကတပ်သားတွေကိုလည်း ရေစကြိုမြို့နယ် ပ.က.ဖ မှ ဒရုန်းတပ်သားတွေက ဗုံးကြဲချတိုက်ခိုက်ခဲ့ ပါသေးတယ်။