ဒိန်းဂျား

စစ်ကိုင်း၊ မေ ၃၁၊ ၂၀၂၃။

ပျူစောထီးကျေးရွာမှာ တပ်စွဲထားတဲ့ စစ်သားတွေကို လက်နက်ကြီး အလုံး ၁၀၀ ကျော်နဲ့ ပစ်ခတ်ခဲ့လို့ ဗိုလ်တဦးနဲ့ ပျူစောထီး ၈ဦး ထိခိုက်သေဆုံးခဲ့တယ်လို့ Snipe Rangers Force (LPDF) အဖွဲ့ဆီက သိရပါတယ်။

စစ်ကိုင်းတိုင်း၊ အရာတော်မြို့နယ်၊ စပါးတွင်းကျေးရွာက စစ်သားနဲ့ ပျူစောထီးတွေကို မေလ ၃၀ရက် ညနေ ၆နာရီကနေ ၉နာရီအထိ လက်လုပ်လက်နက်ကြီးတွေနဲ့ ပစ်ခတ်တိုက်ခိုက်ခဲ့တာလို့ Snipe Rangers Force (LPDF) တပ်ဖွဲ့ ရဲဘော် ဆလိုင်းက ပြောပါတယ်။

“စပါးတွင်းကျေးရွာမှာက တပ်မ ၃၃ က စစ်သား ၁၀ ဦးသာရှိပြီး ပျူစောထီးတွေကများတယ်။ ကျနော်တို့ပစ်ခတ်ခဲ့လို့ တပ်မ ၃၃ က ထိန်းချုပ်ဖို့လွှတ်လိုက်တဲ့ ဗိုလ်တဦး သေပြီး ပျူ ၈ ဦးသေတယ်” လို့ ဆိုပါတယ်။

သေဆုံးမှု အခြေအနေကို ကင်းထောက်ဖို့ လွှတ်လိုက်တဲ့ ဒရုန်းကနေမြင်ခဲ့ရတာဖြစ်ပြီး ဒရုန်းကတော့ ပစ်ချခံရလို့လို့ ပျက်စီးဆုံးရှုံးသွားခဲ့တယ်လို့ဆိုပါတယ်။

စပါးတွင်းရွာ အပါအဝင် ငွေတွင်းရွာနဲ့ သလဲရွာကလည်း တပ်မ ၃၃လက်အောက်ဝင်ကာ ပျူစောထီးသင်တန်းတက်ထားကြသူတွေဖြစ်ပြီး စပါးတွင်းရွာမှာတော့ ပျူစောထီး ၈၀ ဦးလောက်ရှိတယ်လို့ဆိုပါတယ်။

စပါးတွင်းကို လက်နက်ကြီးနဲ့ပစ်ချိန် ရွာဘက်ကလည်း ပြန်ပစ်ခတ်တာတွေရှိပေမယ့် မဟာမိတ်တပ်ဖွဲ့တွေဘက်က ထိခိုက်မှုမရှိခဲ့ဘူးလို့ ဆိုပါတယ်။

“လက်လုပ်လက်နက်ကြီးတွေနဲ့ အချက်ပေါင်း ၁၅၀ ပစ်ခတ်ခဲ့တာ။ တဖွဲ့ကို ၁၀ လုံးနှုန်းနဲ့ ပစ်ခတ်ခဲ့တာ။ ကျနော်တို့ ရဲဘော်တွေထိခိုက်သေဆုံးမှုမရှိပေမဲ့ ကင်းထောက်ဝေဟင်ဒရုန်း ၁ စီးတော့ စစ်ကောင်စီဘက်ကပစ်ချလို့ ပျက်စီးသွားတယ်” လို့ ပြောပါတယ်။

ဒီပစ်ခတ်တိုက်ခိုက်မှုကို Snipe Rangers Force (LPDF) တပ်ဖွဲ့၊ နွေဦးရဲဘော် တပ်ဖွဲ့၊ မြင်းခြံ နဂါးနီ ပြောက်ကျားတပ်ဖွဲ့ ၊ DBBF -MMU တပ်ဖွဲ့ ၊ ပြည်သူ့ရောင်နီတပ်ဖွဲ့ အပါအဝင် မဟာမိတ်တပ်ပေါင်းစု ၁၆ ဖွဲ့လောက်က ပူးပေါင်းတိုက်ခိုက်ခဲ့ကြတာပါ။

စာတည်း – ဇို

မုံရွာ၊ မေ ၃၀၊ ၂၀၂၃။

မုံရွာမြို့တွင် ရဲသတင်းပေး ဒလန်လုပ်နေတဲ့ အမျိုးသမီးကို Monywa PDF ပြောက်ကျားအဖွဲ့က မေလ ၂၉ ရက်မှာ သုတ်သင်ရှင်းလင်းခဲ့တယ်လို့ အဆိုပါအဖွဲ့မှ ဗိုလ်ဒဿက ပြောပါတယ်။

သေဆုံးသွားတဲ့အမျိုးသမီးဟာ စစ်တပ်အခြေချထားတဲ့ မြို့တော်ခန်းမထဲသို့ ဝင်ထွက်သွားလာနေသူဖြစ်သလို လူနာတင်ကားကိုအသုံးပြုကာ PDF တွေနေထိုင်တဲ့ နေရာတွေကို လိုက်လံစုံစမ်းနေတာကြောင့် အခုလိုရှင်းလင်းသုတ်သင်ရတာဖြစ်တယ်လို့ သူက ဆက်ပြောပါတယ်။

အဆိုပါ အမျိုးသမီးဟာ မုံရွာမြို့၊ ရုံးကြီးရပ်ကွက်ဈေးတန်းမှာ ဈေးရောင်းနေတဲ့အချိန် ဈေးဝယ်သူအဖြစ် အသွင်းယူကာ ဦးခေါင်းကို သေနတ်ဖြင့် သုံးချက်ပစ်ခဲ့တာဖြစ်လို့ နေရာမှာတင် ပွဲချင်းပြီး သေဆုံးသွားတယ်လို့ Monywa PDF ပြောက်ကျားတပ်ဖွဲ့ ဗိုလ်ဒဿက ဆိုပါတယ်။

“သူတင်မဟုတ်ဘူး သူတို့တမိသားစုလုံးက ဒါပဲလုပ်နေကြတဲ့အတွက် ကျနော်တို့အဖွဲ့က သွားရောက်သုတ်သင် ရှင်းလင်းရတာဖြစ်ပါတယ်” လို့ ဗိုလ်ဒဿက ဆိုပါတယ်။

အဆိုပါ ပြောက်ကျားအဖွဲ့ဟာ ‌ညနေပိုင်းမှာ အဖွဲ့ ၂ ဖွဲ့ခွဲကာ တဖွဲ့က မုံရွာမြို့နယ်အတွင်းက စစ်ကောင်စီတပ် တွေနဲ့ ပျူစောထီးတွေနေထိုင်တဲ့ တောပုရွာကို ညနေ ၅ နာရီကနေ ည ၁၁ အထိ လက်နက်ကြီးနဲ့ သွားရောက်ပစ်ခတ်ခဲ့ကြသလို ကျန်တဖွဲ့က ဘီယာသောက်နေတဲ့ စစ်ကောင်စီတပ်ဖွဲ့တွေကို လက်လုပ် 7.62 စနိုက်ပါနဲ့သွားရောက် ပစ်ခတ်ခဲ့လို့ စစ်ကောင်စီတပ်ဖွဲ့ဝင်တဦး သေဆုံးခဲ့တယ်လို့ ဆိုပါတယ်။

တောပုကျေးရွာထဲကို လက်နက်ကြီးနဲ့ ပစ်ခတ်ခဲ့တာနဲ့ပတ်သက်လို့ ဗိုလ်ဒဿက “ထိခိုက်သေဆုံးမှုကိုတော့ အတိအကျမသိရသေးဘူး။ ကျနော် သိရတာတော့ ရွာထဲကို ၃ လုံးကျတယ်။ သူ့တို့ဘက်က လက်နက်ကြီးနဲ့ ပြန်ပစ်လို့ ပြန်ဆုတ်ခွာခဲ့တယ်” လို့ ဆိုပါတယ်။

စာတည်း – လင်းဇေ

မကွေး၊ မေ ၂၉၊ ၂၀၂၃။

မကွေးတိုင်း၊ ရေနံချောင်းမြို့နယ်၊ မန်းကျည်းရိုးရွာက စစ်တပ်သတင်းပေး အမျိုးသားတဦး မေလ ၂၈ ရက် မနေ့ညပိုင်းမှာ သေနတ်နဲ့ပစ်ခံရပြီး သေဆုံးခဲ့ပါတယ်။

အသက် ၄၅ နှစ်အရွယ် ကိုစိန်ဦးဟာ စစ်ကောင်စီနဲ့ ပူးပေါင်းကာ သတင်းပေးတာတွေလုပ်သလို “PDF တွေကို အသေမလိုချင်ဘူး၊ အရှင်ဖမ်းမယ်” ဆိုပြီးလည်း ကြွေးကြော်ထားသူဖြစ်တဲ့အတွက် သူ့ကို မနေ့ည ၁၁ နာရီလောက်မှာ ပစ်ခတ်ရှင်းလင်းခဲ့တာလို့ မကွေးခရိုင် အမှတ် – ၂ တပ်ရင်း၊ တပ်ခွဲ ၁ People’s Defence Force Yenangyaung တာဝန်ရှိသူက ပြောပါတယ်။

“အဓိကကတော့ ရွာထဲမှာ လူစွာပေါ့ဗျာ။ စစ်တပ်နဲ့ပေါင်းပြီး ရေနံထုတ်တယ် ရေနံခိုးတယ်၊ ပျူတပိုင်း ဖြစ်နေတာပေါ့။ သူ့အိမ်ထဲဝင်ပြီး ရှင်းခဲ့တာ၊ ကျန်တဲ့ ၂ ယောက်က လွတ်သွားတယ်၊ နားထင်တည့်တည့်ကို ပစ်ခဲ့တာ” လို့ အတည်ပြု ပြောပါတယ်။

ကိုစိန်ဦးကို ပစ်ခတ်ချိန်မှာ သူနဲ့အတူရှိနေတဲ့ နောက်ထပ် စစ်တပ်သတင်းလို့ယူဆရသူ အမျိုးသား ၂ ဦးကတော့ ထွက်ပြေးလွတ်မြောက်သွားခဲ့တယ်လို့ ဆိုပါတယ်။

ပစ်ခတ်မှုကြောင့် ကိုစိန်ဌေးမှာ နေရာတင်ပွဲချင်းပြီး သေဆုံးခဲ့ပြီး အလောင်းကိုတော့ စစ်ကောင်စီတပ်သားတွေက လူနာတင်ကားနဲ့သယ်ကာ ရေနံချောင်းမြို့ပေါ်မှာပဲ သင်္ဂြိုဟ်ပေးခဲ့ကြတယ်လို့ သိရပါတယ်။

ပြီးခဲ့တဲ့ မေလ ၇ ရက်ကလည်း ရေနံချောင်းမြို့နယ်၊ ကုက္ကိုခွအုပ်စု၊ မုန်ကန်ကျေးရွာမှာ နေထိုင်တဲ့ စစ်ကောင်စီခန့်အုပ်ချုပ်ရေးမှူး ဦးခင်မောင်ရွှေနဲ့ ပျူစောထီးအဖွဲ့ဝင် ဦးခင်မောင်မြင့်တို့ကို မုန်ကန်ရွာအုပ်ချုပ်ရေးမှူးနေအိမ်မှာ မကွေးခရိုင် အမှတ် – ၂ တပ်ရင်း၊ တပ်ခွဲ ၁ People’s Defence Force Yenangyaung အဖွဲ့က ပစ်ခတ်ရှင်းလင်းခဲ့ရာ ၂ ဦးစလုံး သေဆုံးခဲ့တယ်လို့ သိရပါတယ်။

စာတည်း – လင်း

မကွေး၊ မေ ၂၇၊ ၂၀၂၃။

မကွေးတိုင်း၊ ပခုက္ကူခရိုင်၊ ရေစကြိုမြို့နယ်က ကျေးရွာနေအိမ်တွေကို မေလ ၂၇ ရက် ဒီနေ့မနက်ပိုင်း မှာ စစ်အုပ်စုက စစ်ကြောင်း ၂ ကြောင်းခွဲပြီး မီးရှို့နေလို့ ဒေသခံ ၅၀၀၀ ကျော် ထွက်ပြေးနေရတယ်လို့ သိရပါတယ်။

အင်အား ၈၀ ခန့်ပါ စစ်ကြောင်းက ဒီနေ့မနက်အစော ၅ နာရီခွဲလောက်ကစပြီး မြေတောရွာက နေအိမ်တွေကိုဝင်ရောက်မီးရှို့သွားခဲ့ပြီးနောက် အဲဒီရွာနဲ့ ရွာနားနီးစပ်တွေဖြစ်တဲ့ ဘိစပ်ကုန်းရွာ ၊ ဆည်းသည့်ရွာ ၊ မြေစွန်းရွာက နေအိမ်တွေကိုလည်း မီးရှို့ဖျက်ဆီးခဲ့တယ်လို့ ဒေသခံသတင်းရင်းမြစ်တဦးက မြေလတ်အသံကိုပြောပါတယ်။

အလားတူ နောက်ထပ်စစ်ကြောင်းတကြောင်းဟာလည်း ရေစကြိုမြို့နယ်ထဲက ရေယှားကျေးရွာကို ဒီကနေ့မနက် ၈ နာရီလောက်မှာဝင်ရောက်မီးရှို့ခဲ့ပြီး နေ့လယ် ၁၁ နာရီကျော်လောက်မှာတော့ အဲဒီရွာနဲ့ မိုင်ဝက်လောက်ဝေးတဲ့ နန်းဦးရွာထဲကိုဝင်ရောက်သွားပြီး အဲဒီရွာကနေအိမ်တွေကိုလည်း မီးရှို့ဖျက်ဆီးနေတယ်လို့ သိရပါတယ်။

“အနောက်ဘက်ချင်းတွင်းမြစ်ဘက်ကလာတဲ့ စစ်ကြောင်းတကြောင်းနဲ့ ဧရာဝတီမြစ်ဘက်ကနေလာတဲ့ စစ်ကြောင်းပါ။ ဒီမနက်အထိမီးလောင်သွားတဲ့ အိမ်ခြေတွေကို မသိရသေးဘူး။ ရေယှားရွာကတော့ ၂၀၀ ဝန်းကျင်လောက် မီးထဲပါသွားတယ်လို့တော့ကြားရတယ်။ အတည်တော့မပြုနိုင်သေးဘူး ရွာသားတွေလည်း ရွာနားကိုဘယ်သူမှမကပ်ရဲသေးဘူး ” လို့ ပြောပါတယ်။

စစ်ကောင်စီတပ်က ကျေးရွာနေအိမ်တွေကို ဝင်ရောက်မီးရှို့နေတာကြောင့် မီးရှို့ခံရတဲ့ မြေတောရွာ၊ ရေယှားရွာတွေ အပါအဝင် ၊ နန်းဦးရွာ ၊ ကိုင်းရွာ ၊ ငတမျှော်ရွာ ၊ မြေတောရွာ၊ ဘိစပ်ကုန်းရွာ၊ မြေစွန်းရွာ အစရှိတဲ့ကျေးရွာထဲက ဒေသခံပြည်သူ ၅၀၀၀ ကျော်ဟာ နီးစပ်ရာကျေးရွာတွေဘက်ကို ထွက်ပြေးတိမ်းရှောင်နေရတယ်လို့ သိရပါတယ်။

မေလ ၂၆ ရက်နေ့မနေ့ကလည်း ရေစကြိုမြို့နယ်၊ မိဖုရားကျေးရွာက နေအိမ် ၄ လုံး နဲ့ ပဲမှော်စင်တလုံးကို မီးရှို့ဖျက်ဆီးသွားတဲ့အပြင် စစ်တပ်ကပစ်ခတ်လိုက်တဲ့လက်နက်ကြီးကြောင့် အမျိုးသမီး ၁ ဦးသေဆုံး ပြီး အမျိုးသား ၁ ဦိးဒဏ်ရာရရှိခဲ့တယ်လို့သိရပါတယ်။

စာတည်း- ရင်ငြိမ်း