ဒိန်းဂျား

မင်းဘူး၊ စက်တင်ဘာ ၁၅၊ ၂၀၂၅။

မကွေးတိုင်း၊ ငဖဲမြို့နယ်၊ အမ်း-ပဒါန်းလမ်းပိုင်း နတ်ရေကန်ဗျူဟာစခန်းက ထွက်ပြေးလာတဲ့ စစ်ကော်မရှင်တပ်သား ၅ ဦး အမှတ် ၁ စစ်ဒေသ၊ မင်းဘူးခရိုင် အမှတ် ၂ တပ်ရင်းဆီရောက်ရှိခိုလှုံလာတယ်လို့ ရုံးတာဝန်ခံက ပြောပါတယ်။

ဘက်ပြောင်းလာသူတွေဟာ နတ်ရေကန်စခန်းက အမှတ် ၁၇ စစ်ဆင်ရေးကွပ်ကဲမှုဌာနချုပ် (စကခ ၁၇) လက်အောက် စစ်မှုထမ်းတပ်သားတွေဖြစ်တဲ့ အသက် ၃၅ နှစ် ဇော်ထွေး၊ အသက် ၁၉ နှစ် အောင်အောင်၊ အသက် ၂၇ နှစ် ဉာဏ်မြင့်မြတ်၊ အသက် ၂၉ နှစ် ဖြိုးကို၊ အသက် ၂၆ နှစ် အောင်ခိုင်တို့ဖြစ်ပြီး စက်တင်ဘာ ၉ ရက်မှာ ဘက်ပြောင်းခိုလှုံလာတာလို့ ဆိုပါတယ်။

” နတ်ရေကန်စခန်းရဲ့ တောထဲမှာပဲ ၄ ရက်လောက်က အစာရေစာပြတ်ငတ်ပြီး နေခဲ့ရတယ်၊ အဲ့ဒီကနေ ကျနော်တို့ကို ချိတ်ဆက်ပြီး စက်တင်ဘာ ၉ ရက် ၁၀ နာရီခွဲမှာ ကျနော်တို့စခန်းကိုရောက်ပါတယ်၊ ကျနော်တို့က သွားခေါ်ရတာပါ” လို့ မင်းဘူးခရိုင် အမှတ် ၂ တပ်ရင်း ရုံးတာဝန်ခံဆရာကျောင်းက ပြောပါတယ်။

ထွက်ပြေးလာသူတွေဟာ စစ်မှုထမ်းသင်တန်းအပတ်စဉ် ၉၊ ၁၁ နဲ့ ၁၃ က သင်တန်းဆင်းတွေဖြစ်ပြီး စစ်သင်တန်းဆင်းပြီးနောက် စကခ ၁၇ လက်အောက် ခမရ ၅၂၀ တပ်ရင်းကို ရောက်ရှိခဲ့ကာ ပြီးခဲ့တဲ့ ဩဂုတ်လကုန်ပိုင်းမှာ ရက္ခိုင်နဲ့မကွေးတိုင်းအစပ် နတ်ရေကန်စခန်းကို ပို့ဆောင်ခံခဲ့ရတာလို့ ဆိုပါတယ်။

” နတ်ရေကန်စခန်းမှာရှိတဲ့ တပ်မ ၉၉ တပ်တွေနဲ့ စကခ ၁၇ တပ်တွေ အချိန်းအပြောင်းလုပ်တာမှာ စကခ ၁၇ လက်အောက်ခံ တပ်ရင်း ၉ ရင်းနဲ့ အခြား ၃ ရင်းတို့ဟာ နတ်ရေကန်စခန်းကိုရောက်လာတာ။ မစခ ၉၀၅ (ငဖဲအခြေစိုက်) ထဲမှာ သူတို့ ၁ ညတာတပ်စွဲပြီးတော့ နောက်တနေ့မှာ ဗျူဟာတက်တာ။ အဲ့လိုတက်တဲ့အချိန်မှာ AA နဲ့ ထိတွေ့တိုက်ပွဲတွေက အရမ်းပြင်းထန်တော့ စစ်ကော်မရှင်ဘက်က အကျအဆုံးက ၅၀၀ လောက်ကျတယ်၊ ကျတဲ့အချိန်မှာ သူတို့ ကစဥ့်ကလျားတွေဖြစ်ပြီး ထွက်ပြေးကြတာ” လို့ ထွက်ပြေးလာတဲ့ စစ်မှုထမ်းစစ်သားတွေရဲ့ထွက်ဆိုချက်ကို အထက်ပါရုံးတာဝန်ခံက ပြောပါတယ်။

ဒါ့အပြင် AA နဲ့ ထိတွေ့တိုက်ပွဲတွေမှာအထိနာခဲ့တာကြောင့် ခမရ ၅၂၅ တပ်ရင်းမှူးအပါ စစ်ကော်မရှင်တပ်ဖွဲ့ဝင် ၅၀ ကျော်လည်း ၎င်းတို့နဲ့အတူ ထွက်ပြေးလာတာဖြစ်ပြီး ၎င်းတို့ စစ်မှုထမ်း ၅ ဦးဟာ မင်းဘူးခရိုင် အမှတ် ၂ တပ်ရင်းထံ ခိုလှုံရောက်ရှိလာတာဖြစ်ကာ ကျန်စစ်ကော်မရှင်တပ်သားတွေက ထွက်ပြေးနေဆဲဖြစ်တယ်လို့ ဆိုပါတယ်။

ဘက်ပြောင်းလာတဲ့စစ်ကော်မရှင်တပ်သားတွေဟာ ၂၀၂၄ အတွင်း စစ်ကော်မရှင်တပ်ရဲ့ အဓမ္မဖမ်းဆီးမှုတွေကိုခံရပြီးနောက် စစ်မှုထမ်းသင်တန်းတွေကို အသီးသီးပို့ဆောင်ခံရသူတွေဖြစ်ပါတယ်။

၎င်းတို့ ၅ ဦးနဲ့အတူ MA 3 သေနတ် ၁ လက်၊ ၅.၅၆ မမ ကျည်အပါ ကျည်မျိုးစုံ ၆၁ တောင့်၊ ကျည်ကာ ၃ စုံနဲ့ စစ်အသုံးအဆောင်တွေပါလာပြီး လက်ရှိမှာ စစ်ကော်မရှင်ကို ပြန်လည်တိုက်ခိုက်ဖို့ အဆိုပြုထားတယ်လို့ သိရပါတယ်။

မင်းဘူးခရိုင် အမှတ် ၂ တပ်ရင်း အမှတ် ၁ စစ်ဒေသဟာ မကွေးတိုင်း၊ ငဖဲမြို့နယ်အခြေစိုက် တပ်ဖွဲ့တခုဖြစ်ပြီး ၎င်းတို့တပ်ဖွဲ့ထံ နတ်ရေကန်စခန်းကနေ ထွက်ပြေးခိုလှုံလာသူ ၉ ဦးရှိပြီလို့ သိရပါတယ်။

စာတည်း – ဟိန်းစံ

ချောက်၊ စက်တင်ဘာ ၆၊ ၂၀၂၅။

မကွေးတိုင်း၊ ချောက်မြို့၊ အမှတ် ၁၅ တိုးချဲ့ရပ်ကွက် ကိုရီးယားသင်တန်းကျောင်းက ပေါ်တာဆွဲဖမ်းဆီး ခံထားရတဲ့သင်တန်းသား ၁၃ ဦး ပြန်လွတ်လာတယ်လို့ ပြည်သူ့ညီနောင် – စလင်းအဖွဲ့ဆီက သိရပါတယ်။

စက်တင်ဘာ ၄ ရက် ညနေပိုင်းမှာ ၉ ဦး၊ စက်တင်ဘာလ ၅ ရက် နေ့လယ်ပိုင်းမှာ ၄ ဦး ပြန်လွတ်လာတာဖြစ်ပြီး ချောက်မြို့နယ်အထွေထွေအုပ်ချုပ်ရေးရုံးမှာ ခံဝန်ကတိထိုးကာ ငွေကျပ်သိန်း ၅၀ မှ သိန်း ၇၀ အတွင်း ငွေပမာဏနဲ့ မိသားစုဝင်တွေက ပြန်ရွေးခဲ့ကြရတာလို့ ဆိုပါတယ်။

“ခံဝန်ကတိက ဘယ်လိုမျိုးတွေ ထိုးရသလဲတော့ ကျနော်လည်း မပြောတတ်ဘူး၊ သူတို့ခံဝန်ကတိတွေနဲ့ လက်မှတ်ထိုးပြီးမှ သိန်း ၅၀၊ သိန်း ၆၀၊ သိန်း ၇၀ ပေးပြီးရွေးရတယ်၊ ကျောင်းသားမိဘတွေက သွားရွေးကြတာ၊ ၁၃ ဦးလုံးကတော့ သူတို့နေအိမ်တွေမှာ ပြန်ရောက်ပါပြီ၊” လို့ ပြည်သူ့ညီနောင် – စလင်းအဖွဲ့ တာဝန်ခံ ကိုပြည်သူက ပြောပါတယ်။

အဆိုပါသင်တန်းသား ၁၃ ဦးဟာ စလင်းမြို့နယ် ကျေးရွာတွေကနေ သင်တန်းလာတက်နေသူတွေဖြစ်ပြီး လက်ရှိမှာ စစ်ကော်မရှင်လက်ကနေပြန်လွတ်လာပြီးနောက် နေထိုင်ရာကျေးရွာတွေကို ပြန်လည်ရောက်ရှိသွားပြီလို့ သိရပါတယ်။

စက်တင်ဘာ ၄ ရက် နေ့လယ် ၃ နာရီဝန်းကျင်မှာ အထက်ပါ ဘာသာစကားသင်တန်းကျောင်းက သင်တန်းသား ၁၃ နဲ့ တရပ်ကွက်တည်းရှိ ‘ကော်နာ’ စားသောက်ဆိုင်က စားပွဲထိုးလူငယ်အမျိုးသား ၃ ဦးတို့ကို စစ်ကော်မရှင် တပ်ဖွဲ့ဝင်တွေနဲ့ ပျူစောထီးတွေကဖမ်းဆီးခဲ့တာလို့ ဒေသခံတွေကပြောပါတယ်။

ဒီဖမ်းဆီးမှုကို ထွေအုပ်ရုံးမှာထိုင်တဲ့ ချောက်မြို့နယ်စစ်ကော်မရှင်အဖွဲ့ဝင် ၁ DSA အပတ်စဥ် ၄၇ ဆင်း ဝါဇီတပ်က ဗိုလ်မှူး တင်ထွန်းဦးအမိန့်နဲ့ ဖမ်းဆီးခဲ့တာလို့ သိရပါတယ်။

သင်တန်းသား ၁၃ ဦးပြန်လွတ်လာပေမယ့် စက်တင်ဘာ ၆ ရက်ထိ ချောက်မြို့ခံ စားပွဲထိုးလူငယ် ၃ ဦးကတော့ ငွေမပေးနိုင်တာကြောင့် ချောက်မြို့မရဲစခန်းမှာ ဆက်လက်ချုပ်နှောင်ထားတယ်လို့ ပြည်သူ့ညီနောင် – စလင်းအဖွဲ့တာဝန်ခံ ကိုပြည်သူက ပြောပါတယ်။

ခုလိုစစ်ကော်မရှင်တပ်တွေရဲ့ စီးနင်းဖမ်းဆီးမှုတွေရှိနေတာကြောင့် ဒေသခံတွေအနေနဲ့လည်း ည ၈ နာရီထိုးတာနဲ့ နေအိမ်ပြင်မထွက်ရဲဘဲ အသွားအလာနည်းသွားကြတယ်လို့ သိရပါတယ်။

ချောက်မြို့ပေါ်မှာ စစ်ကော်မရှင်တပ်နဲ့ ပျူစောထီးတွေက မကြာခဏပေါ်တာဆွဲဖမ်းဆီးတာတွေ လုပ်နေပြီး ဩဂုတ် ၂၇ ရက်ကလည်း ချောက်မြို့ပေါ်ရှိ ဖုန်းဆိုင်တွေက ဝန်ထမ်းလူငယ်တွေကို စစ်ကော်မရှင်အဖွဲ့တွေ က ပေါ်တာဆွဲဖမ်းဆီးမှုတွေပြုလုပ်ခဲ့သေးတယ်လို့ သိရပါတယ်။

စာတည်း – လင်း

ချောက်၊ စက်တင်ဘာ ၅၊ ၂၀၂၅။

မကွေးတိုင်း၊ ချောက်မြို့ပေါ်ရှိ ဘာသာစကားသင်တန်းကျောင်းက ကျောင်းသား ၁၃ ဦးအပါအဝင် စုစုပေါင်း လူငယ် ၁၆ ဦးကို စက်တင်ဘာ ၄ ရက်နေ့လယ် ၃ နာရီဝန်းကျင်မှာ စစ်ကော်မရှင်တပ်ကဖမ်းဆီးသွားခဲ့တယ်လို့ ချောက်မြို့ခံတွေဆီက သိရပါတယ်။

ချောက်မြို့၊ အမှတ် ၁၅၊ တိုးချဲ့ရပ်ကွက်ရှိ ကိုရီးယားဘာသာစကားသင်တန်းကျောင်းက အသက် ၂၀ အရွယ် သင်တန်းသား ၁၃ ဦးနဲ့ တရပ်ကွက်တည်းရှိ ‘ကော်နာ’ စားသောက်ဆိုင်မှာအလုပ်လုပ်နေတဲ့ လူငယ်အမျိုးသား ၃ ဦးတို့ကို တချိန်တည်း ဖမ်းဆီးသွားတာလို့ ဆိုပါတယ်။

“မနေ့က တိုးချဲ့ရပ်ကွက် GTI ကျောင်းနားလေးက ကိုရီးယားဘာသာသင်တန်းကျောင်း ဖွင့်ထားတာ၊ ဘော်ဒါပုံစံမျိုး ဖွင့်ထားတာရှိတယ်၊ နယ်ကလူတွေ ရွာကလူတွေ တက်နေတဲ့ကလေးတွေရှိတယ်၊ အဲ့ဒီက ကလေး ၁၃ ဦး ပါသွားတယ်၊ ကလေးတွေလို့ပဲ သိရတယ်၊ အသက်တော့မသိရဘူး၊ သင်တန်းတက်နေတဲ့ ကလေးတွေဆိုတော့ ငယ်ဦးမှာပါ၊” လို့ ချောက်မြို့ခံတဦးက ပြောပါတယ်။

ခုလိုဝင်ရောက်ဖမ်းဆီးသူတွေဟာ ပျူစောထီးတွေနဲ့ လုံခြုံရေးနှင့်သက်ဆိုင်သော ပုံနှိပ်လုပ်ငန်းများစက်ရုံ (လနစ) ကတပ်ဖွဲ့ဝင်တွေဖြစ်နိုင်တယ်လို့ ဒေသခံတွေကခန့်မှန်းပါတယ်။

“ဝါဇီတပ်က စစ်ကော်မရှင်တပ်ဖွဲ့ဝင်တွေဖြစ်မယ်၊ မနေ့က GTI တက်နေတဲ့ ကျောင်းသားတွေကိုလည်း ဆိုင်ကယ်တူးဘောက်တွေလှန်ကြည့်ပြီး ကျောင်းတက်တာ ဘယ်နှစ်နှစ်ရှိပြီတုန်းဆိုပြီး စစ်ဆေးတာတွေလည်းရှိတယ်” လို့ ချောက်မြို့ခံတဦးက ပြောပါတယ်။

သင်တန်းကျောင်းက လူငယ် ၁၃ ဦးဟာ စလင်းမြို့နယ်၊ ရေပေါ်ကျွန်းရွာနဲ့ လက်ပံကျွန်းကျေးရွာကဖြစ်ပြီး ကော်နာစားသောက်ဆိုင်က အလုပ်သမားလူငယ် ၃ ဦးတော့ ချောက်မြို့ခံတွေဖြစ်တယ်လို့ ဆိုပါတယ်။

လက်ရှိမှာဖမ်းဆီးခံရသူအားလုံးကို ချောက်မြို့မရဲစခန်းမှာချုပ်နှောင်ထားပြီး ဖမ်းခံရသူတွေနဲ့ပတ်သက်တဲ့ အသေးစိတ်အချက်အလက်တွေကိုတော့ မသိရှိရသေးပါဘူး။

ခုလိုစစ်ကော်မရှင်တပ်တွေရဲ့ စီးနင်းဖမ်းဆီးမှုတွေရှိနေတာကြောင့် ဒေသခံတွေအနေနဲ့လည်း ည ၈ နာရီထိုးတာ နေအိမ်ပြင်မထွက်ရဲဘဲ အသွားအလာနည်းသွားကြတယ်လို့ သိရပါတယ်။

ချောက်မြို့ပေါ်မှာ စစ်ကော်မရှင်တပ်နဲ့ ပျူစောထီးတွေက မကြာခဏပေါ်တာဆွဲဖမ်းဆီးတာတွေလုပ်နေပြီး ဩဂုတ် ၂၇ ရက်ကလည်း ချောက်မြို့ပေါ်ရှိ ဖုန်းဆိုင်တွေက ဝန်ထမ်းလူငယ်တွေကို စစ်ကော်မရှင်အဖွဲ့တွေက ပေါ်တာဆွဲဖမ်းဆီးမှုတွေပြုလုပ်ခဲ့သေးတယ်လို့ သိရပါတယ်။

စာတည်း – လင်း