ဒိန်းဂျား

မုံရွာ၊ အောက်တိုဘာ ၁၈၊ ၂၀၂၅။

စစ်ကိုင်းတိုင်း၊ မုံရွာမြို့၊ စီးပွားရေးတက္ကသိုလ်ကျောင်းထဲကနေ စစ်ကြောင်းထိုးလာတဲ့ စစ်ကော်မရှင်စစ်ကြောင်းကို အောက်တိုဘာ ၁၅ ရက် မနက် ၇ နာရီခွဲလောက်က မုံရွာ-ကျောက္ကာလမ်းပိုင်းမှာ ကြားဖြတ်တိုက်ခိုက်ခဲ့တယ်လို့ မုံရွာမြို့နယ် ပြည်သူ့ကာကွယ်ရေးအဖွဲ့ ဆီက သိရပါတယ်။

မုံရွာ စီးပွားရေးတက္ကသိုလ်ကနေထွက်လာတဲ့ သံပြားကာကား ၂ စီးနဲ့ အင်အား ၁၀၀ ဝန်းကျင်ပါ စစ်ကော်မရှင်စစ်ကြောင်းကို အောက်တိုဘာ ၁၅ ရက် မနက် ၇ နာရီခွဲလောက်က မုံရွာ-ကျောက္ကာလမ်းပိုင်း၊ ထနောင်းဝင်းရွာနဲ့ ကျောက္ကာရွာကြားမှာ ကြားဖြတ်ပစ်ခတ်ခဲ့တာဖြစ်ပြီး တိုက်ပွဲဖြစ်ပွားချိန် ၁ နာရီဝန်းကျင်ကြာခဲ့တယ်လို့ ဆိုပါတယ်။

“ရန်သူစစ်ကြောင်း အနေနဲ့ကတော့ ထိခိုက်ဒဏ်ရာရတာ သေဆုံးတာတော့ ရှိမှာပ။ ကျနော်တို့ဘက်ကတော့ ထိခိုက်ဒဏ်ရာရတာ မရှိဘူးဗျ။ ဘာလို့ ရန်သူဘက်မှာ ထိခိုက်ဒဏ်ရာရတာနဲ့ သေဆုံးတာ ပြောနိုင်တာလဲလို့ဆိုရင် ကျနော်တို့ လမ်းပေါ်မှာ သွေးအိုင်တွေကို တွေ့လို့ဗျ။” လို့ မုံရွာမြို့နယ် ပြည်သူ့ကာကွယ်ရေးအဖွဲ့ တာဝန်ခံက ပြောပါတယ်။

ကျောက္ကာရွှေဂူနီဘုရားမှာ အထိုင်ချတပ်စွဲထားတဲ့ စစ်ကော်မရှင်တပ်ကို ရိက္ခာသွားပို့တဲ့ အဆိုပါစစ်ကြောင်းဟာ မုံရွာ နမခ ထဲကလာတဲ့ သံပြားကာကား ၂ စီးအပါ စစ်ကော်မရှင်တပ်ဖွဲ့တွေနဲ့ Eco ကျောင်းထဲမှာ အထိုင်ချထားတဲ့ စစ်ကော်မရှင်တပ်ဖွဲ့ ပူးပေါင်းစစ်ကြောင်းဖြစ်ပြီး တော်လှန်ရေးတပ်ဖွဲ့တွေက သံပြားကာ ကား ၂ စီးကိုမတိုက်ခိုက်ခဲ့ဘဲ နောက်က ခြေလျင်စစ်ကြောင်းကို ကြားဖြတ်တိုက်ခိုက်ခဲ့တာလို့ ဆိုပါတယ်။

အဲ့ဒီ စစ်ကြောင်းဟာ တိုက်ခိုက်ခံရပြီးနောက် ကျောက္ကာရွာဘက်ကိုဆက်လက်ထွက်ခွာသွားပြီး အဲ့ဒီနေ့ ညနေမှာပဲ မုံရွာမြို့ထဲကိုပြန်ဝင်သွားတယ်လို့ သိရပါတယ်။

ဒီတိုက်ခိုက်မှုကို မုံရွာမြို့နယ် ပြည်သူ့ကာကွယ်ရေးအဖွဲ့၊ မုံရွာခရိုင် ပကဖ အထူးတိုက်ခိုက်ရေးအဖွဲ့-Danger Force၊ မုံရွာမြို့နယ် ပကဖ တိုက်နယ် ၂၊၃၊၄ ၊ မုံရွာမြို့နယ် ပလဖ၊ မုံရွာမြို့နယ် ပကဖ အထူးတိုက်ခိုက်ရေးအဖွဲ့ – Tribal Force၊ မုံရွာမြို့နယ် ပကဖ တိုက်ခိုက်ရေးအဖွဲ့ – မုံရွာ Special ဒိတ်ဒိတ်ကြဲ၊ တောကျွဲကြီး ပြောက်ကျားအဖွဲ့၊ Black Falcon LDF နှင့် ဒေသခံရပ်ကျေး ပကဖတွေက လုပ်ဆောင်ခဲ့တာပါ။

ပြီးခဲ့တဲ့ ဩဂုတ် ၈ ရက်ကနေ ၁၁ ရက်အတွင်းမှာလည်း စစ်ကိုင်းတိုင်း၊ မုံရွာမြို့နယ်အတွင်းမှာ စစ်ကော်မရှင်စစ်ကြောင်းကို မုံရွာမြို့နယ် ပြည်သူ့ကာကွယ်ရေးအဖွဲ့က ၄ ရက်အကြာတိုက်ခိုက်ခဲ့ရာ စစ်ကော်မရှင်တပ်ဘက်က ၄၀ ကျော်သေဆုံးပြီး ၃၀ ဦးဒဏ်ရာရရှိခဲ့ပါသေးတယ်။

တည်းဖြတ် – M

ပဲခူး၊ အောက်တိုဘာ ၁၇၊ ၂၀၂၅။

ပဲခူးတိုင်း၊ လက်ပံတန်းမြို့နယ်၊ သရက်ချောင်းရွာကို စစ်ကြောင်းထိုးလာတဲ့ စစ်ကော်မရှင်စစ်ကြောင်းကို အောက်တိုဘာ ၁၅ ရက် မနက် ၁၀ နာရီလောက်မှာ ကြားဖြတ်တိုက်ခိုက်ခဲ့ပြီး စစ်သုံ့ပန်း ၁၂ ဦးကို ဖမ်းဆီးရရှိခဲ့ကာ လက်နက်ခဲယမ်းတွေလည်း သိမ်းဆည်းခဲ့တယ်လို့ သာယာဝတီခရိုင် တပ်ရင်း ၃၈၀၂ တပ်ခွဲ ၂ ဆီက သိရပါတယ်။

သရက်ချောင်းရွာက ပြည်သူ့နေအိမ်တွေကို မီးရှို့ဖျက်ဆီးပြီး ထွက်လာတဲ့လာတဲ့ စစ်ကော်မရှင်စစ်ကြောင်းကို အောက်တိုဘာ ၁၅ ရက် မနက် ၁၀ နာရီလောက်က သရက်ချောင်းရွာအထွက်မှာ ကြားဖြတ်ပစ်ခတ်ခဲ့တာဖြစ်ပြီး တိုက်ပွဲဖြစ်ပွားချိန် ၁ နာရီခွဲခန့်ကြာခဲ့တယ်လို့ ဆိုပါတယ်။

“သူတို့ ပြည်သူတွေနေအိမ်ကို မီးရှို့တယ်၊ ဖျက်ဆီးတယ်။ ဖျက်ဆီးတဲ့အချိန်မှာပဲ ရွာအထွက်မှာ ကျနော်တို့တွေ တိုက်ပွဲစတင်ပြီးတော့ ဖော်ဆောင်တယ်ပေါ့။ (စကမ)အင်အားက ၇၀ လောက်ရှိတယ်။ ကျနော်တို့ပိုင်နိုင်စွာပဲတိုက်ခိုက်ခဲ့တယ်ပေါ့။ အဲ့အချိန်မှာ အင်အားက ၇၀ လောက်ကို ၂၀ လောက် ကျသွားတယ်ပေါ့။” လို့ သာယာဝတီခရိုင် တပ်ရင်း ၃၈၀၂၊ တပ်ခွဲ ၂ တာဝန်ရှိသူတဦးက ပြောပါတယ်။

တပ်မ ၆၆ စစ်ကော်မရှင်တပ်သားတွေအပါအဝင် လက်ပံတန်းက ဇော်မင်းသိန်းနဲ့ ဌေးအောင်ရှိန်တို့ဦးစီးတဲ့ ပျူစောထီးအဖွဲ့တွေနဲ့ ပူးပေါင်းအင်အား ၇၀ ခန့်ပါအဆိုပါစစ်ကြောင်းဟာ လက်ပံတန်းမြို့နယ် လွှစင်ကုန်းရွာ၊ ပဒဲကောရွာဘက်ကနေတဆင့် သရက်ချောင်းရွာကို စစ်ကြောင်းထိုးလာတာဖြစ်ပြီး သရက်ချောင်းရွာကို မီးရှို့ခဲ့လို့ နေအိမ် ၆ လုံးခန့် မီးလောင်ခဲ့တယ်လို့ ဆိုပါတယ်။

တိုက်ပွဲအတွင်း တော်လှန်ရေးပူးပေါင်းတပ်တွေဘက်က ထိခိုက်မှုမရှိခဲ့ဘဲ စစ်ကော်မရှင်ဘက်က စစ်သုံ့ပန်း ၁၂ ဦးအပါအဝင် G 3 ၁၀ လက်၊ G 4 ၃ လက်၊ MA 12 ၂ လက်၊ စနိုက်ပါ ၁ လက်၊ ကာဘိုင် ၁ လက်နဲ့ ကျည်အနည်းငယ်ရရှိခဲ့ပြီး စစ်သုံ့ပန်းတွေကိုတော့ တပ်ရင်းတွေက အကောင်းဆုံးထိန်းသိမ်းသွားမှာဖြစ်တယ်လို့ သူကဆက်ပြောပါတယ်။

ဒီတိုက်ခိုက်မှုကို ပြည်သူ့ကာကွယ်‌ရေးတပ်မတော်၊ အမှတ် (၂) စစ်ဆင်ရေးနယ်မြေ၊ ပဲခူးတိုင်းစစ်ဌာန၊ ဗျူဟာ ၂၂ ကွပ်ကဲမှုနဲ့ အမှတ် ၃၈၀၂ တပ်ရင်း၊ အမှတ် ၃၈၀၃ တပ်ရင်း၊ ရွှေတန်းမြေ ပြည်သူ့ကာကွယ်ရေးတပ်ဖွဲ့၊ ဂဠုန်ပြည်သူ့ကာကွယ်ရေးတပ်ဖွဲ့ ပူးပေါင်းတပ်ဖွဲ့တွေက လုပ်ဆောင်ခဲ့တာပါ။

ပြီးခဲ့တဲ့ အောက်တိုဘာ ၆ ရက်ကလည်း ပဲခူးတိုင်း၊ သာယာဝတီခရိုင်၊ မင်းလှမြို့နယ်၊ ဆင်တဲကုန်းအုပ်စု၊ ဆင်တဲကုန်းကျေးရွာ လူငယ်အားမာန်စာကြည့်တိုက်မှာရှိတဲ့ စစ်ကော်မရှင်မဲစာရင်းတွေကို သာယာဝတီခရိုင် တပ်ရင်း ၃၈၀၂၊ တပ်ခွဲ ၂ က မီးရှို့ဖျက်ဆီးခဲ့ပါသေးတယ်။

တည်းဖြတ် – M

ပခုက္ကူ၊ အောက်တိုဘာ ၁၆၊ ၂၀၂၅။

မကွေးတိုင်း၊ ပခုက္ကူမြို့ လေယာဉ်ကွင်းဆီကနေ ရိက္ခာယူပြီးပြန်လာတဲ့ စစ်ကော်မရှင်အင်အား ၂၀ ပါ စစ်ကြောင်းကို ကြားဖြတ်တိုက်ခိုက်ရာ ၆ ဦးသေဆုံးပြီး လက်နက်ခဲယမ်းတွေလည်း သိမ်းဆည်းခဲ့တယ်လို့ Southern YSO PDF ဆီက သိရပါတယ်။

အောက်တိုဘာ ၁၅ ရက်နေ့လယ် ၁ နာရီ ၂၃ မိနစ်မှာ ပခုက္ကူလေယာဉ်ကွင်းကနေ ရိက္ခာယူပြီးပြန်လာတဲ့ စစ်ကော်မရှင်စစ်ကြောင်းကို ပခုက္ကူလေယာဉ်ကွင်းနဲ့ မြောက်လူးကန်ကြားမှာ ကြားဖြတ်ပစ်ခတ်ခဲ့တာလို့ ဆိုပါတယ်။

“ကျနော်တို့က အနီးကပ်တိုက်ခိုက်တာ၊ ပွိုင့်တွေလည်း ခွဲထားတယ်၊ ပွိုင့် ၁ ပွိုင့်က သူတို့ရှေ့ပြေးကင်းနဲ့ တွေ့တယ်၊ ရှေ့ပြေးကင်းနဲ့ဆို ဝါးရင်းတုတ်နဲ့ ထွက်ရိုက်လို့ရတယ်၊ ၁၀ တောင် ၁၅ တောင်လောက် ကွာတော့တာ၊ နောက်ကပွိုင့်ကလည်း ပစ်တဲ့သူကပစ်ပါ၊ ရှေ့ပြေးပွိုင့်ကလည်း ပစ်တဲ့သူကပစ်ပါ၊ နောက်ပွိုင့်ကတော့ နည်းနည်းဝေးတယ်၊ မီတာ ၁၀၀ လောက်ဝေးတဲ့အနေအထားပါ၊” လို့ Southern YSO PDF တာဝန်ခံ ဗိုလ်အောင်မောင်းက ပြောပါတယ်။

နှစ်ဖက်အပြန်အလှန်ပစ်ခတ်မှုလည်းဖြစ်ခဲ့ပြီး တိုက်ပွဲအတွင်း စစ်ကော်မရှင်တပ်ဖွဲ့ဝင် ၆ ဦးသေဆုံးတာကို မျက်မြင်တွေ့ခဲ့ရကာ ပြန်လည်ပစ်ခတ်မှုတွေရှိတာကြောင့် လက်နက်အားလုံးကိုမကောက်နိုင်ခဲ့ဘူးလို့ ဆိုပါတယ်။

“ကျနော်တို့ သေနတ်ကတော့ ၂ လက်ပဲ ကောက်နိုင်တယ်၊ နောက်ပွိုင့် ယာတခင်းကျော်မှာ သေနေတဲ့ကောင်တွေဆီကသေနတ်က ကောက်လို့မရဘူး၊ ကျနော်တို့ ရှေ့မျက်နှာ မီတာ ၃၀၀ အကွာက လေယာဉ်ကွင်းက ပစ်နေတယ်၊ လေယာဉ်ကွင်းက ပွိုင့် 5 တွေ လက်နက်ငယ်တွေနဲ့ ပစ်နေတာ၊ ကျနော်တို့ အလောင်းတွေ မြင်နေရပေမဲ့ လက်နက်ကောက်ခွင့်မသာခဲ့ဘူး၊ ကျနော်တို့ ၂ ခုကြားမှာ ပဲလှော်သလိုလုပ်နေရတာ၊ ရအောင်တော့ ဖောက်ထုတ်ခဲ့တယ်” လို့ သူက ဆက်ပြောပါတယ်။

တိုက်ခိုက်ပြီးနောက် စစ်ကော်မရှင်ဘက်က MA1 ၁ လက်၊ ကျည်ဘောက် ၃ ခု၊ ကျည် ၅၀ ‌တောင့်၊ အူဇီ ၁ လက်၊ ကျည်ဘောက် ၂ ခု၊ ကျည် ၄၅ တောင့် တို့ကို သိမ်းဆည်းရမိခဲ့ပြီး တော်လှန်ရေးတပ်ဖွဲ့ဝင် ၁ ဦး လက်ကိုကျည်ဖောက်မှန်ခဲ့တယ်လို့ သိရပါတယ်။

အဆိုပါစစ်ကြောင်းဟာ ပခုက္ကူ ခလရ ၂၅၉၊ တပ်မ ၁၀၁ စစ်ကော်မရှင်တပ်တွေ၊ ပခုက္ကူမြို့မ ရဲစခန်းက ရဲတွေနဲ့ ပြည်သူ့စစ်တွေပါဝင်တယ်လို့ သိရပါတယ်။

ဒီတိုက်ခိုက်မှုကို Southern Yeasgyo တပ်ပေါင်းစု၊ Southern YSO PDF ၊ ဒေါင်းညီနောင်၊ Yesagyo Revolution Group(YRG)၊ ပြည်သူ့အားမာန်PDF၊ King Cobra နဲ့ ဒေါင်းစစ်သည်တွေက လုပ်ဆောင်ခဲ့တာပါ။

စက်တင်ဘာ ၂၂ ရက် မနက် ၁ နာရီခွဲဝန်းကျင်မှာလည်း ပခုက္ကူမြို့၊ ရထားဘူတာအနီး ကွန်ကရစ်ဇလီဖားစက်ရုံမှာတပ်စွဲထားတဲ့ စစ်ကော်မရှင်ရဲတပ်ဖွဲ့ဝင်တွေကို တော်လှန်ရေးတပ်တွေက ဝင်ရောက်တိုက်ခိုက်ပြီး လက်နက်ခဲယမ်းတွေသိမ်းဆည်းခဲ့ပါသေးတယ်။

စာတည်း – လင်း၊ တည်းဖြတ် – M

စလင်း၊ အောက်တိုဘာ ၁၂၊ ၂၀၂၅။

မကွေးတိုင်း၊ မင်းဘူးခရိုင်၊ စလင်းမြို့နယ်၊ လင်းဇင်းတိုက်နယ် ရဲစခန်းမှာတပ်စွဲထားတဲ့ စစ်ကောင်စီ တပ်ဖွဲ့ဝင်တွေကို ဝင်ရောက်တိုက်ခိုက်ခဲ့ပြီးနောက် ၂ ဖက်ထိခိုက်သေဆုံးမှုရှိခဲ့တယ်လို့ မင်းဘူးခရိုင် အမှတ် ၅ တပ်ရင်း ဆီက သိရပါတယ်။

စစ်ကော်မရှင်တပ်နဲ့ရဲတပ်သား စုစုပေါင်းအင်အား ၃၀ ဝန်းကျင်ရှိတဲ့ အဲ့ဒီစခန်းကို အောက်တိုဘာ ၈ ရက် မနက် ၄ နာရီခွဲဝန်းကျင်ကနေ ၄ နာရီကြာတိုက်ခိုက်ပြီးနောက် စစ်ကော်မရှင်တပ်ဖွဲ့ဝင် ၃ ဦးသေဆုံးပြီး ဒဏ်ရာရသူတွေလည်းရှိခဲ့တယ်လို့ ဆိုပါတယ်။

“ကျနော်တို့ စတင်တိုက်ခိုက်တာကတော့ မင်းဘူးခရိုင် အမှတ် ၅ တပ်ရင်းရဲ့ ဒရုန်းတပ်ဖွဲ့ကနေ ဒရုန်းနဲ့ ဗုံးသီးကြဲချ တိုက်ခိုက်တယ်၊ တိုက်ခိုက်ပြီးချိန်မှာ မြေပြင်တပ်ဖွဲ့အနေနဲ့ မင်ဘူးခရိုင် အမှတ် ၅ တပ်ရင်း ရဲ့ တပ်ခွဲ ၂ ကနေပြီးတော့ ရန်သူ့နယ်မြေအထိချဉ်းကပ်ပြီး လက်နက်ငယ်နဲ့ ပစ်ခတ်တာတွေရှိတယ်၊” လို့ မင်းဘူးခရိုင် အမှတ် ၅ တပ်ရင်း IO ဟီးရိုး ကပြောပါတယ်။

တော်လှန်ရေးတပ်တွေဘက်က ရဲစခန်းဘန်ကာတွေအနီးထိသွားရောက်တိုက်ခိုက်ခဲ့ပြီး ဘန်ကာ ၃ လုံးကိုဖြိုနိုင်ခဲ့ကာ စစ်ကော်မရှင်တပ်တွေဘက်ကလည်း စနိုက်ပါတွေနဲ့ ပြန်လည်ပစ်ခတ်ခဲ့တယ်လို့ ဆိုပါတယ်။

“ကျနော်တို့ဘက်က ပစ်ခတ်ပေမဲ့စစ်ကော်မရှင်ဘက်က ပြန်လည်တိုက်ခိုက်ခြင်း မရှိဘူး၊ ၉ နာရီ လောက်မှာ စစ်ကော်မရှင်ဘက်က ပြန်လည်တိုက်ခိုက်တာတွေရှိတယ်၊ ရဲစခန်း ဘန်ကာတွေ ဆောက်ထားတဲ့နေရာအထိ ကျနော်တို့ ဝင်ရောက်တိုက်ခိုက်တာတွေရှိတယ်၊ ဘန်ကာ ၄ လုံးရှိတယ်၊ ကျနော်တို့ ၃ လုံးကိုဖြိုနိုင်ခဲ့တယ်၊ ၁ လုံးကိုတော့ ကျနော်တို့ မဖြိုနိုင်ဘူး၊” လို့ IO ဟီးရိုး ကပြောပါတယ်။

တိုက်ခိုက်ပြီးနောက် စစ်ကော်မရှင်ဘက်က မနက် ၁၀ နာရီလောက်မှာ ၁ ကြိမ်၊ ၁၁ နာရီထိုးပြီးမှာ ၁ ကြိမ် လေကြောင်းကနေတိုက်ခိုက်ခဲ့တာကြောင့် တော်လှန်ရေးတပ်ဖွဲ့ဝင် ၃ ဦးထိခိုက်ခဲ့တယ်လို့ ဆိုပါတယ်။

ဒါ့အပြင် တိုက်ပွဲအတွင်း လက်နက်ကြီးနဲ့ပစ်ခတ်လို့ အသက် ၁၉ အရွယ် မင်ဘူးခရိုင် အမှတ် ၅ တပ်ရင်းက တပ်ဖွဲ့ဝင်ဖိုးစိုင်း သေဆုံးခဲ့ပြီး သူ့ရဲ့စျာပနကိုတော့ တိုက်ပွဲဖြစ်ပြီးနေ့ချင်းပြုလုပ်ခဲ့တယ်လို့ IO ဟီးရိုးက ပြောပါတယ်။

လင်းဇင်းတိုက်နယ် ရဲစခန်းမှာ ခလရ ၂၅၃၊ ခလရ ၂၅၄၊ ခလရ ၂၅၅ က စစ်ကော်မရှင်တပ်ဖွဲ့ဝင်၊ ရဲနဲ့ ဆယ်ကန်ရွာကပျူစောထီးအပါအဝင် စုစုပေါင်းအင်အား ၅၀ ဝန်းကျင်နဲ့ တပ်စွဲထားတာလို့ ဆိုပါတယ်။

ပြီးခဲ့တဲ့ ဇွန် ၁၅ ရက်ကလည်း မင်းဘူးခရိုင်၊ စလင်းမြို့နယ်အတွင်းရှိ ကံပြားရွာဘက်ကနေ တင့်ကား ၄ စီးနဲ့ အင်အား ၂၀၀ ကျော်ပါ စစ်ကြောင်းကို ပုသိမ်-မုံရွာ ကားလမ်းပိုင်းမှာ မင်ဘူးခရိုင် အမှတ် ၅ တပ်ရင်းက မိုင်းဆွဲတိုက်ခိုက်ခဲ့ရာ ၃ ဦးသေဆုံးပြီး ၈ ဦးဒဏ်ရာရခဲ့ပါသေးတယ်။

စာတည်း – လင်း၊ တည်းဖြတ် – HP

မုံရွာ၊ အောက်တိုဘာ ၁၁၊ ၂၀၂၅။

စစ်ကိုင်းတိုင်း၊ မုံရွာမြို့၊ မင်းဒေါင့်ဆိပ်ကမ်းကနေ ချင်းတွင်းမြစ်ကြောင်းအတိုင်းစုန်လာတဲ့ စစ်သင်္ဘော ၄ စီး တွဲတွန်း ၁၁ စီးတို့ကိုအောက်တိုဘာ ၁၁ ရက်နေ့က မုံရွာမြို့နယ် ချင်းတွင်းမြစ်ကြောင်းတနေရာမှာ လက်နက်ငယ်‌တွေနဲ့ ပစ်ခတ်တိုက်ခိုက်ခဲ့တယ်လို့ Chindwin Fighter Group-CFG ဆီက သိရပါတယ်။

ကျောက်စိမ်း၊ ကြေးနီ၊ ကျောက်မီးသွေး၊ ဆီတွေတင်လာတဲ့ အဆိုပါ စစ်သင်္ဘော ၄ စီးနဲ့ တွဲတွန်း ၁၁ စီးကို မနက် ၈ နာရီခွဲလောက်မှာ လက်နက်ငယ်တွေနဲ့ ပစ်ခတ်ခဲ့တာလို့ ဆိုပါတယ်။

အပြန်အလှန်တိုက်ခိုက်ချိန် ၇ မိနစ်ခန့်ကြာမြင့်ခဲ့ပြီး စစ်သင်္ဘောတွေကိုထိမှန်ခဲ့ကာ သေဆုံးထိခိုက်မှုကိုတော့မသိရဘူးလို့ Chindwin Fighter Group-CFG တာဝန်ခံ ကိုငှက်ခါးက ပြောပါတယ်။

“ကျောက်မီးသွေးကြီးပဲ တင်လာတာမဟုတ်ဘူး၊ ဆီလှောင်ကန်တွေလည်းပါတယ်၊ ကျောက်စိမ်းနဲ့ ကြေးနီတွေလည်း တင်လာတာ၊ ပစ်ခတ်တိုက်ခိုက်အချိန်က ၇ မိနစ်လောက်ရှိတယ်၊ လက်နက်ကြီး လက်နက်ငယ်တွေနဲ့လည်း ပြန်လည်ပစ်ခတ်တယ်၊ ဝေဟင်ကလည်း paramotor စက်တပ်လေထီးနဲ့ ဝဲတယ်၊ ထိခိုက်သေဆုံးမှုတော့ မသိရသေးဘူး၊ စစ်သင်္ဘောတော့ ထိတယ်”လို့ Chindwin Fighter Group-CFG တာဝန်ခံ ကိုငှက်ခါးက ပြောပါတယ်။

တိုက်ခိုက်ချိန်အတွင်း စစ်ကော်မရှင်တပ်ဘက်က Paramotor လာပေမယ့် ပစ်ခတ်သွားခြင်းတော့မရှိဘူးလို့လည်းသူကဆိုပါတယ်။

ဒီတိုက်ခိုက်မှုကို Chindwin Fighter Group-CFG နဲ့ Brave Heart Army-(B.H.A) တို့က ပူးပေါင်းဆောင်ရွက်ခဲ့တာဖြစ်ပါတယ်။

အခုလက်ရှိမှာတော့ ကျောက်စိမ်း၊ ကြေးနီ၊ ကျောက်မီးသွေး၊ ဆီတွေတင်လာတဲ့ စစ်သင်္ဘော ၄ စီးနဲ့ တွဲတွန်း ၁၁ စီးဟာ မြစ်ကြောင်းအတိုင်း မကွေးဘက်ကိုဆက်လက်ထွက်သွားတယ်လို့ သိရပါတယ်။

တည်းဖြတ် – HP