MLAT 
မြေလတ်အသံ၊ ဇွန် ၁၉၊ ၂၀၂၅။
စစ်ကိုင်းတိုင်း၊ ပုလဲမြို့နယ်၊ ကန့်ဒေါင့်ရဲစခန်းကို ဇွန် ၁၉ ရက် ဒီမနက် ၆ နာရီ ၄၀ မိနစ်မှာ သိမ်းပိုက်နိုင်ခဲ့တယ်လို့ ပြည်သူ့လွတ်မြောက်ရေးတပ်မတော် – PLA က ထုတ်ပြန်လာပါတယ်။
ကန့်ဒေါင့်ရွာနယ်မြေရဲစခန်းမှာ အထိုင်ချတပ်စွဲနေတဲ့ စစ်ကောင်စီတပ်ဖွဲ့ဝင် ၅၀ ဝန်းကျင်ကို ဇွန် ၂ ရက်မနက် ၄ နာရီခန့်မှာ PLA နဲ့မဟာမိတ်တပ်ပေါင်းစုတို့ စတင်တိုက်ခိုက်ခဲ့ရာကတိုက်ပွဲစတင်ခဲ့ပြီး ၁၇ ရက်အကြာမှာ သိမ်းပိုက်နိုင်ခဲ့တာဖြစ်ပါတယ်။
“မနေ့က မနက် ၆ နာရီကတည်းက တိုက်ပွဲ ပြင်းထန်နေတာ။ စစ်တပ်ကလည်း အင်အားဖြည့်ပြီး ဇွတ်ကာဖို့လုပ်တယ်။ အင်မထီးကနေ စစ်အင်အားတွေပို့ဖို့ကြိုးစားခဲ့တယ်။ ဒါပေမယ့် တပ်ရင်းတွေကလည်း ဖြတ်တောက်ရေးတွေလုပ်ထားတယ်။ ဒီမနက်တော့ စခန်းကိုရသွားပြီ”လို့ တော်လှန်ရေး တပ်ဖွဲ့ဝင်တဦးက ပြောပါတယ်။
အသေးစိတ်အချက်အလက်တွေကိုတော့ ထပ်မံထုတ်ပြန်သွားမယ်လို့ PLA က ဆိုထားပါတယ်။
တိုက်ပွဲအတွင်း စစ်ကောင်စီဘက်ကလည်း လေကြောင်းတိုက်ခိုက်မှု အကြိမ်ရေ ၆၀ ထက်မနည်းပြုလုပ်ခဲ့ပြီး တိုက်ခိုက်မှုကြောင့် ဒေသခံထိခိုက်သေဆုံးမှုတွေလည်းရှိခဲ့ပါတယ်။
ကန့်ဒေါင့်ရွာနယ် မြေရဲစခန်းဟာ ပုလဲမြို့နယ်အနောက်ခြမ်းက အင်မထီးနဲ့ဇီးဖြူကုန်းရွာတို့ကို ထောက်ပံ့ထားတဲ့ စခန်းဖြစ်ပြီး ပုလဲမြို့နယ်အနောက်ခြမ်းကို တော်လှန်ရေးတပ်တွေ စိုးမိုးနိုင်ဖို့ အရေးပါတဲ့စခန်းဖြစ်တယ်လို့ သိရပါတယ်။