မရွှေထား 
မြေလတ်အသံ၊ မေ ၁၄၊ ၂၀၂၆။
မကွေးတိုင်း၊ နတ်မောက်မြို့နယ်နဲ့ မန္တလေးတိုင်း၊ ရမည်းသင်းမြို့နယ်အစပ်မှာ ဝင်ရောက်နေတဲ့ စစ်တပ်စစ်ကြောင်းကို မိုင်းဆွဲတိုက်ခိုက်ခဲ့တာမှာ ထိခိုက်သေဆုံးမှုများပြားခဲ့တယ်လို့ ဗိဿနိုးပြည်သူ့ကာကွယ်ရေးတပ်မတော်၊ စစ်ဦးစီးတပ်က ထုတ်ပြန်ပါတယ်။
မေလ ၁၄ ရက် ဒီကနေ့ မနက် ၁၀ နာရီခန့်မှာ နတ်မောက်နဲ့ ရမည်းသင်းမြို့နယ်အစပ် နယ်ခြားမှတ်တိုင်အနီးမှာ အင်အား ၁၅၀ ခန့်ပါတဲ့ စစ်တပ်စစ်ကြောင်းကို လက်လုပ်ဆွဲမိုင်း ၅ လုံးနဲ့ တပြိုင်တည်း တိုက်ခိုက်ခဲ့တာလို့ ဗိဿနိုးပြည်သူ့ကာကွယ်ရေးတပ်မတော်၊ စစ်ဦးစီးတပ်တာဝန်ရှိသူတဦးက မြေလတ်အသံကို ပြောပါတယ်။
” မိုင်းကွင်းထဲကို ကား ၄ စီး၊ ထွန်စက် ၁ စီး၊ ဆိုင်ကယ် ၁၀ စီးရယ် ခြေလျင်စစ်ကြောင်းရယ် ဝင်ရောက်တဲ့အချိန်မှာ ဖောက်ခွဲခဲ့တာဖြစ်ပါတယ်။ ထိခိုက်သေဆုံးမှုက များပါတယ်ဗျ။ ထိခိုက်သေဆုံးသူတွေကို ကား ၃ စီးနဲ့တင်ခေါ်သွားတာဆိုတော့ စာရင်းအတိအကျကိုတော့ အတည်ပြုဖို့ခက်နေပါတယ်ဗျ” လို့ ပြောပါတယ်။
အဲဒီစစ်ကြောင်းဟာ မေလ ၈ ရက်ကစတင်ကာ နတ်မောက်မြို့နယ်အတွင်း ဝင်ရောက်လာတာဖြစ်ပြီး ယမန်နေ့ညပိုင်းက ဖက်တောရေကျေးရွာမှာ ညအိပ်တပ်စွဲခဲ့ပြီးနောက် ဒီကနေ့မနက်ပိုင်းမှာ ရမည်းသင်းမြို့နယ်အတွင်းကို ထွက်ခွာချိန်မှာ အခုလို မိုင်းဆွဲတိုက်ခိုက်ခဲ့တာလို့ ထုတ်ပြန်ချက်က ဖော်ပြပါတယ်။
” ဒဏ်ရာရတွေကို ခေါ်သွားတဲ့ကား ၃ စီးမှာ စစ်အင်အားတဝက်ပါသွားတယ်ဗျ။ ကျန်အင်အားတဝက်လောက်ကတော့ မိုင်းကွင်းအနီးနားမှာ ရှိနေပါသေးတယ်။ ကား ၁ စီးကတော့ မိုင်းဆွဲတော့ ပျက်စီးသွားပါတယ်” လို့ ၎င်းက ဆက်ပြောပါတယ်။
မိုင်းဆွဲတိုက်ခိုက်ခံရလို့ အထိနာခဲ့တဲ့အဲ့ဒီစစ်ကြောင်းဟာ ဖြတ်သန်းလာရာလမ်းတလျှောက် နတ်မောက်မြို့နယ်အတွင်းကို ဒရုန်းနဲ့ဗုံးကြဲတိုက်ခိုက်တာတွေ လုပ်ဆောင်ခဲ့တယ်လို့ ဆိုပါတယ်။
စစ်ကြောင်းစတင်ဝင်ရောက်တဲ့ မေလ ၈ ရက်ကလည်း အဲ့ဒီစစ်ကြောင်းကို ဗိဿနိုးပြည်သူ့ကာကွယ်ရေးတပ်မတော်က နတ်မောက်မြို့နယ်အတွင်းမှာ ၃ ကြိမ်ထက်မနည်း မိုင်းဆွဲတိုက်ခိုက်ခဲ့ပါသေးတယ်။